الأخبار
منوعات سودانية
الممثل جمال عبد الرحمن: صمت أول مرة وعمري تسع سنوات وصمدت حتى النهاية



07-12-2014 11:44 PM
الخرطوم – نصر حامد

الممثل البارع جمال عبد الرحمن رجل ينتزع الضحكة من الأعماق بتلقائية وبلا تكلف بفضل موهبته الفذة في التمثيل ويكفي أنه الآن من المع نجوم الدراما, قدم العديد من الأعمال الدرامية الناجحة مثل جو أوربي والحاج متذكر إلى جانب ظهوره في العديد من المسرحيات المتميزة, حل ضيفاً عزيزاً على مائدة إفطار (اليوم التالي) عبر حوار رمضاني تفضل مشكوراً بالإجابة على جميع تساؤلاته كما سنطالع كل ذلك عبر تفاصيل هذا الحوار:

في البداية حدثنا عن تفاصيل أول يوم صمته؟

بتذكر اليوم داك كويس, كان وقتها عمري تسع سنوات, ركبت راس ووقلت لازم أصوم, توسط الأهل وقالوا لي انت ود متين ويا ود انت لسه صغير, في النهاية صمت وصمدت لي حدي النهاية لكن بصراحة قربت أموت من العطش لكن في النهاية الأمر انتهى بسلام.

ما حاولت تعمل فيها صائم وكنت فاطر؟

والله دي كان من الصعب جداً أعملا, أبوي راجل في البوليس ليهو 40 سنة ولو عملت كدا بعرف الحاصل عشان كده ما فكرت في كضبة زي دي.

برنامجك شنو في رمضان؟

بطلع من الشركة بعد نهاية الدوام, طوالي بمشي البيت وباخد لي نومة وما بصحى تاني إلا للإفطار.

بتفطر في الشارع ولا في البيت؟

أنا ساكن مدينة النيل ما في زول بالغلط بيطلع يفطر في الشارع عشان كدة بفطر مع الأسرة في البيت.

بتصلي التراويح وين؟

في مسجد الرحمة بالحي وهو قريب من منزلنا.

عندك أي نشاط مسرحي في رمضان؟

والله ما في نشاط ملحوظ كدا, غالبية عملنا الدرامي في الفضائيات بنسجلو قبل رمضان بي وقت وبعد يجي رمضان بنتفرج زيكم وواحد.

اكتر قناة اشتغلت فيها في رمضان؟

والله اشتغلت مع كل القنوات, في النيل الأزرق جو خليجي وفي الشروق حكايات سودانية وفي الإذاعة الحاج متذكر.

وجبة بتحبها في رمضان؟

الفول.

لما تكون عطشان شديد بتعمل شنو؟

بمشي على المكيف وما بفارق الهوا البارد إلا إذا الأذان أذن.

حصل صمت بره السودان؟

والله صمت في عدد من الدول مثل اليمن والسعودية ومصر لكن بصراحة رمضان ما عندو طقوس وطعم ونكهة مميزة إلا في السودان.

حاجة جميلة بتحبها في رمضان؟

انو وقتك بيكون منظم جداً في رمضان, في وقت كافي للراحة وفي وقت كما للعمل.

حصل صمت فترة طويلة؟

نعم, مرة كنت سائق عربية في شارع مدني وضربت زول, وبعد شهرين توفي لرحمة مولاه, صمت شهرين متتاليات.

برنامج بتحرص على مشاهدته في شهر رمضان؟

برنامج أغاني وأغاني.

بتشجع ياتو منتخب في كأس العالم؟

رغم السبعة الألمانية القاسية بحب البرازيل وبموت في كرة السامبا, كنت دايرهم يشيلو كأس العالم لكن الألمان ثقيلين جداً.

حاجة بتفتقدا بي شدة في رمضان؟

الموية الباردة, والله الزول لما يعطش شديد بصل لي قناعة انو ما في عصير بينافس الموية الباردة.

عندك عمل درامي في رمضان؟

عندي عمل مسرحي في منتصف شهر رمضان مع فرقة الأصدقاء المسرحية.

حصل فطرت بي الخطأ؟

أيوة, مرة كنت في سنار ومشيت أسأل من نتيجيتي في امتحان الشهادة السودانية, كنت متوقع أجيب نسبة كبيرة جداً, مشيت لقيت نسبتي 67% بدون ما أشعر مشيت على الزير وشربت ما رويت بعد داك اتذكرت اني صائم.

بتحب تقول شنو لي قراء اليوم التالي في الختام؟

بقوليهم رمضان كريم وتصوموا وتفطروا على خير وربنا يتقبل منا ومنكم صالح الأعمال.


اليوم التالي


تعليقات 0 | إهداء 0 | زيارات 3548


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة