الأخبار
أخبار إقليمية
ملعون أبو الكلام!!
ملعون أبو الكلام!!
ملعون أبو الكلام!!


08-07-2014 11:40 AM
إبراهيم الكرسني

يسعدني أن أهدي هذه الخواطر الى المناضل إبراهيم الشيخ، والذى تشرفت بتدريسه بجامعة الخرطوم، وهو يقاوم صلف، وعنجهية، وظلم نظام أبالسة الإنقاذ، وكذلك يلهم شباب السودان، بل ويعطي درسا بليغا لعواجيز السياسة السودانية‘ عن معنى التحدى والصمود فى وجه الطغيان، من داخل أسوار سجنه الفسيح الواسع، وهم يتحاورون، ويناورون نظام الأبالسة، الذى يقبع فى سجن ضيق، فوق تراب الوطن الفسيحة الواسعة!!

ملعون أبو الكلام!!

الشعب ما داير كلام
الشعب مل من الكلام
الشعب داير ناس شباب
ناسن تمام.......
ناسن غبش.....
يجوهو من وسط الزحام
ما يكونوا لغفو مع اللئام
أو عقدوا صفقة مع النظام
جوا الصوالين والجناين
كتبوها فى عز الظلام!!
....
الشعب ذلوهو اللئام
خلوهو تايه فى بلادو
يكوس يدور زي غريب
زي زول مهلوس فى منام
ناسن كتار....
واحدين ترك....
واحدين تتار....
واحدين يقضو الليل سهر
واحدين بيلغفو بالنهار
ما بيشبهو الناس الزمان
صلاح عدييييل....
يتعرفو فى جبينن وسام!
....
الشعب هاجر لى بلادن
فيها ما بيلقى الحمام
يتمنى شوفة القمري
فوق سعف النخيل
يقوقي فرحان بالسلام
أو قمره ....
تضويلو ليل زي السجم
ما أصلو ليل الكوز طويل
ليلن يعادل ألف عام !!
....
الشعب ما داير كلام
الشعب داير ناس تمام
مو ناس حرب...
ناسن يعززو للسلام
مو ناس كلام...
ناسن تخدر للأراضي الناشفي
من يوم ترابلتا هاجرت
لا زول عزق....
لا زول نقح....
خلوها للترك الجداد
زرعوها أسمنتي ورخام!!
....
الشعب ما داير كلام
الشعب داير ينتفض
فرسان مجربه من قبل
موبس يلعلع بالكلام
هزم العساكر بالمواكب
بالمناشير..بالصمود..
وإضرابو عام....
لكنو وين يلقى السهام
دسوها ناسن....
ما بيعرفو من النضال غير الكلام
ناس "سيدي" فى لندن هناك
و الباقي تماهو الإمام !!؟؟

إبراهيم الكرسني
7/8/2014م
shiba1949@hotmail.com


تعليقات 5 | إهداء 0 | زيارات 5053

التعليقات
#1073477 [المشروع]
4.67/5 (11 صوت)

08-07-2014 01:30 PM
شكرا على مؤازرتك اللطيفة القية يا دكتور على هذه الخاطرة وانت تعلم الناس معنى التواضع وان تكتب اسمك بدون كلمة دكتور وان يكتب استاذ في تلميذه هذه الكلمات الرائعة فشكرا لك بروفسير كرسني وابن قرية شبا البارة

[المشروع]

#1073464 [قرفاااان شديد]
3.00/5 (3 صوت)

08-07-2014 01:15 PM
تسلم يارااائع --- واتمنى ان تنعي دكتور عوض السيد الكرسني -استاذ العلوم السياسية في جامعة الخرطوم - الذي بدل جلده وأصبح يوالي الكيزان في افكارهم ودستورهم .......

[قرفاااان شديد]

#1073434 [Quickly]
4.59/5 (10 صوت)

08-07-2014 12:34 PM
ياســـلالالالام ,,,, قصيدةولااروع!!

شدتني عبارة ((والذى تشرفت بتدريسه بجامعة الخرطوم...))
هكذا يكون ادب وتواضع العلماء الاجلاء,,,, معك الله بالصحة والعافية وزادك علماّ ورفعة

[Quickly]

#1073430 [كاكا]
3.25/5 (3 صوت)

08-07-2014 12:32 PM
شكراً يا دكتور على هذا الكلام النجيض،، شكراً جداً..

[كاكا]

#1073407 [محمد احمد]
1.87/5 (13 صوت)

08-07-2014 12:12 PM
كلام سمح لكن برضو كلام مثل كلام ابو كلام سيدى الامام وزى تصريحات سيدى ابوهاشم الهمام لمن يكون خارج حدود السودان شعرك دا عايزنك تقرنه بالعمل وتطلع الشارع وخلينا من كلام اجوف فارغ تنفخ فيه بطالبك الغشيمان و قطعا سيصدق و سيقضى ردحا من الزمان فى سجون الكيزان حتى ينساه النسيان

[محمد احمد]

ردود على محمد احمد
Kenya [واحد قريعتو رايحة] 08-07-2014 02:43 PM
محمد احمد يا اخوي:
ابراهيم الكرسني راجل "بروفيسر" وقد ذكر بتواضع العلماء بأنه "تشرف بتدريس" ابراهيم الشيخ وهذا يعطي فكرة عن عمره متعه الله بالصحة والعافية. وعليه ليس مطلوباً منه الخروج الى الشارع بقدر ما نحتاج منه ومن جيله لالهام او النصح للشباب بحكمتهم وخبرتهم.

فيا اخوي لو كنت من جيل بروفيسور الكرسني فلا نطلب منك سوى المساهمة بحكمتك او على اقل تقدير عدم التثبيط بالانتقاد الدائم والاعتراض من اجل الاعتراض على كل شئ وكل ما يقال...وأما لو كنت من جيل الشباب ورغم ذلك ترى ان الخروج مطلوب من البروفيسور وجيله فحينها لا اجد ما اعلق به سوى: ابشروا بطول سلامة يا كيزان السجم!!

واما لو كنت "دجاجة" فعذرا على المقاطعة وارجو ان تواصل مكاكاتك!!



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة