الأخبار
أخبار إقليمية
من د.سارة حسن عبدالله بحوادث العظام والإصابات بمستشفي امدرمان..
من د.سارة حسن عبدالله بحوادث العظام والإصابات بمستشفي امدرمان..
 من د.سارة حسن عبدالله بحوادث العظام والإصابات بمستشفي امدرمان..


08-11-2014 04:28 AM
وصل الى بريد الراكوبة الآتي وننقله كما هو :

ياهو دي المطره لسه صابه ... وفي اخبار عن سيول قادمه ..
كالعاده ...بكره زي كلو نبطشيه ... حنكتف يدينا ونقعد نتفرج في اهلنا وهم بموتو ....

تروما امدرمان (قسم الحوادث والاصابات في مستشفى امدرمان )

عارفين انو مافي سياره اسعاف في المستشفى الا يضربو للاسعاف المركزي وتكلفتو (80 الف الى 100 الف )

عارفين احنا في حوجه للنقالات البجيبو بيا العيان من بره ؟؟عددا بسيط جدا وبخمسوها معانا ناس طوارئ الباطنيه وباقي اقسام المستشفى ..في النهايه اهل العيان مابلقو نقاله ..بخموهو خم من الركشه او من عربيتم بره وبكسرو لينا عضامو زياده ؟؟
عارفين انو المونتر بتاعنا بايظ !!
عارفين انو جهاز شفط السوائل من الرئه بايظ !!
عارفين انو الحقن الفاضيه عددا بسيط و بتنتهي ؟؟
عارفين انو العيان بيشتري الانتي تيتانوس والفولتريكس؟
عارفين العيان بشتري الرباط البنلف بيو الجرح؟؟
عارفين انو العيان بيشتري انبوبه الصدر لاخراج الهواء او الدم او السوائل من الرئه ودي حاجه طارئه جدا مفترض انها تكون متوفره !!
عارفين انو العيان بيدفع حق الفحوصات المعمليه ؟؟
عارفين انو صور الاشعه العاديه مامجانا لاي مريض !! الا الميجر تروما !!
عارفين انو المرافق كان طلبنا منو اشعه مقطعيه (300 الف) لمريضو بقول لي انتي عارفه يادكتوره انو السيل شال البيت بالفيو وانا ماعندي غير الهدوم اللابسه دي؟؟
عارفين انو الموجات الصوتيه في المستشفى بتكون متوفره بالصباح بس لحدي الساعه 12 ضهر .. بعداك بنرسل العيان يعمل الموجات بره خارج المستشفى بي 130 الف !!
عارفين انو العيان كان احتاج لاي تدخل جراحي ..العمليه مجانا لانها طارئه لكن حيدفع دم قلبو في الحقن والعلاجات (بالميت 300 الف)
عارفين انو العيان لو مامشى كويس وخالتو اتدهورت ..العنايه المكثفه بتاعه امدرمان غير انها مانافعه وهي ماعنايه مكثفه ولا بتجي بجنبها اشبه بالعنبر بنرسل المرافق يمشي يفتش لمريضو بره في الخاص ... اليوم من مليون ولي فوق !!
عارفين انو مرافق العيان بيشتري اي حاجه في قسم الكسور (مسطره ..مسمار ..جبص ..الخ)

عارفين انو عدد الممرضين الشغالين معانا غير كافي بنضطر نشتغل معاهم شغلم بالاضافه لشغلنا !!
عارفين انو عدد الاطباء زاتو غير كافي ومافي طريقه لفتره راحه... عادي بتعدي علينا النبطشيه بدون اكل ولا مويه ولا صلاه !!

الناس الاتبرعو لي في مرض عمي ... وقتها انا ما استلمت منكم تبرعاتكم لانو الحمد لله ربنا سهلا ... وقلت ليكم امسكوها لي لحدي ما احتاج ليا

هسي انا محتاجه ليا !!

اطالب كل المجتمع السوداني ...في الداخل والخارج ..
بالمساهمه لنجده اهلنا المتضررين في السيول ..
دي كارثه وطنيه ...لازم كلنا نشترك ونساهم ونتبرع ..
الشعب السوداني وحيد ... لاعندنا حكومه ... ولا عندنا زول قلبو علينا
حتى التبرعات والاغاثات ...بلهفوها ناس الحكومه
ووزير الصحه مشغول بلا مركزيه العلاج وبيع المستشفيات ..والتضييق على هذا الشعب الصبور ...
عندنا ربنا سبحانه وتعالى
وعندنا بعض ...السودانيين دايما عندهم بعض !!
وده كافي جدا

انشاء الله الف جنيه ... اشترو لينا بيا حقنه فاضيه وجيبوها لينا ..
ماتستحقرا وتستصغرا .... انا قبل كده فتشت لي حقنه فاضيه اسعف بيا عيان مسافه اجيبا من الصدليه واجي لقيت العيان اتوفى !!

يلا ياشباب شارع الحوادث ...وباقي الشوارع زاتو .. شدو الهمم
وياناس نفير ... اجتماعاتكم دي طالت .. ورونا وشكم بعده

كل الناس لازم تنسق مع بعض .... اليد الواحده مابتصفق !!

ديل اهلنا ...

د.ساره حسن عبدالله


تعليقات 39 | إهداء 1 | زيارات 13431

التعليقات
#1077700 [ِAburishA]
0.00/5 (0 صوت)

08-12-2014 10:02 PM
لله درك د. سارة... والله تقرير يفطر القلب..الا انه الواقع بكل اسف.. ونقدر لك شحذك للهمم لعمل الخير.. وقال تعالي في محكم تنزيله ( وما تقدموا لأنفسكم من خير تجدوه عند الله هو خيرا وأغظم أجرا)صدق الله العظيم..

** تقرير صادق.. وأهل مكة أدرى بشعابها..وعلى المواطن "المغضوب عليه" خيارين لا ثالث لهما..اما ان يدفع ويدفع ويدفع..واما ان يفرفر مريضه امام عينيه ويفطس..ونعوذ بالله من كآبة المنظر,,

** ان التبرعات تحتاج الى آليات منظمة وترتيب (كمنظمات..جمعيات او جهات موتوق بها) لها اهداف وبرامج وكتيبات تعريفية وما يصاحبه من اعلام.. واجزم بأن السودانيين رغم ضيق ذات اليد والحال الذي بغني عن السؤال سوف لن يبخلوا بعمل الخير.. كما ظل السودانيين في الخارج يدفعوا عن طريق السفارات لجمعيات أصدقاء مرضى القلب ومرضى الكلي والله دون أن يعرفوا عنها شيئا.. ولا ندري هل تصل تلك التبرعات لأهدافها ام لا.. لكن على العموم من يدفع طائعا مختار دايما يتوسم في هذه الجمعيات الصدق والخير وحسن النية..

** نعم اذا وجدت آلية فعالة..أجزم بأن التبرعات والهبات والصدقات والزكوات ستنهال عليها باذن الله..والتحية لشباب شارع الحوادث الا انه لن يمر بذلك الشارع الا ذو حاجة اذا كان زائر للمستشفى او (جابو الطريق) وربنا يجعل عملهم في ميزان حسناتهم.. والدعاء موصول لناس نفير..ولئن تفعل خيرا ولو محدود خير من أن لا تفعل.. والله ان العشم في النظام ليفعل شيئا هو كعشم ابليس في دخول الجنة..
ونسأل الله ان يصلح الحال بسقوط هذا النظام البائس الحقير.. ولله الامر من قبل ومن بعد....

[ِAburishA]

#1077546 [مالك]
0.00/5 (0 صوت)

08-12-2014 05:42 PM
يا دكتوره شكرا ليك ورينانتصل بيك كيف عشان نوصل ليك اي مساعده

[مالك]

#1077528 [عبد الرحمن محمد الحسن]
0.00/5 (0 صوت)

08-12-2014 05:20 PM
العصيان المدني متحقق بالفعل في مستشفى أم درمان وفقا لرسالة الدكتورة سارة، فهي تقول إنو ما في معدات للشغل" ونقعد مكتفين يدينا نعاين لأهلنا بيموتو"، يعني الحكومة هي التي هيأت لهذا العصيان المدني بافقارها المستشفيات من كل معينات العمل.. ومع ذلك فإن العصيان المدني الكامل يحتاج عملا منظما، تنشط فيه بوضوح الجهود التطوعية، ومن ذلك أن يتنظم الأطباء في شكل فرق للمناوبة للتعامل مع الحالات الطارئة، وفيما عدا العمل الجزئي في المستشفيات فيمكن لكل القطاعات الأخرى المشاركة في العصيان المدني، ومتى ما كان شاملا سيكون فاعلا و لن يستطيع النظام الاستمرار طويلا في مواجهة وضع كهذا..

[عبد الرحمن محمد الحسن]

#1077179 [معاوية كورينا]
5.00/5 (1 صوت)

08-12-2014 11:56 AM
هل هذه دولة ؟؟ أم ماذا ؟؟

[معاوية كورينا]

#1076884 [ابويس,]
0.00/5 (0 صوت)

08-12-2014 06:47 AM
ياسلام علي احساسك الراقي دكتوره سارهزصدقيني نحن مشكلتنا ماقروش نحن مشكلتناعدم نظام وسؤ ادارهز بحلف بالله العظيم اسه دي لو وقفنا في الشارع سيتداعى لنا كل الشعب العظيم وسيدفع بطيب خاطر لكن الجماعه مابخلوا القروش تصل لمستحقيهاالا لوكان المستحق من جماعة هي لله

[ابويس,]

#1076706 [nagatabuzaid]
3.00/5 (2 صوت)

08-11-2014 10:23 PM
ربنا يحفظك يا دكتورة واضم صوتى لمن عاتبوا ادارة الراكوبة على انزال اسمها ابكيتينا رغم معرفتنا للواقع المذرى لاهم مرافق السودان وهو المرفق الصحى لا ادرى من اى طينة خلقت هذه الكائنات قبل فترة زمنية كان هناك موضوع يتناول الادوية والعلاجات وندرتها فى السودان ويعكس هذه المعاناة وفى تعليق سابق ذكرت تجربتنا فى دولة الاغتراب كنا مجموعة اتفقنا على شراء الادوية الحيوية والحقن وياخذها احدنا من النازلين الاجازة ويسلمها لجهات معينة لتوصيلها لمحتاجيها والان والحمد لله يوجد شباب شارع الحوادث وتوجد جمعية او تجمع لخدمة الاطفال المصابين بالسرطان مقرها كان قرب ابو حمامة وبعضهم مقيم داخل المستشفى يعملون بنظام الورديات فلماذا لا تطبقون هذه الفكرة وتنفذونها باسرع فرصة
اما من حاولوا تخذيل من دعوا للعصيان المدنى بحجج واهية اقول لهم ان العصيان المدنى قد نجح عدة مرات وكان هناك متطوعوا الهلال الاحمر والكشافة والاتحادات والطلاب وربات البيوت وحتى المرضى ممن تسمح حالتهم تنزل لسد الفراغ ولن يموت احد بسبب العصيان بل يموت الان الناس موت جماعى بسبب طاعون الانقاذ والعصيان المدنى هو الطاعون المهلك لهذه المخلوقات ونعلم انهم مستعدون لانزال جرذانهم لكن الله غالب ولتتوحد الكلمة التحية للطبيبة وكل المناضلين

[nagatabuzaid]

#1076704 [سن ألفيل]
1.00/5 (2 صوت)

08-11-2014 10:19 PM
رموز الانسانية والعمل الخيرى فقط يتبرعون لعلاج الاخ عثمان ميرغني في عاصمة الضباب ولا تعنيهم عاصمة الذباب في شئ

[سن ألفيل]

#1076701 [منو العوض]
3.00/5 (2 صوت)

08-11-2014 10:15 PM
زمن نميري عمل نداء السودان العالم كله جاب اغاثات حتي ريقن من امريكا واليمن جاب خبز حار من الفرن اين نداء حكومة السودان اليوم لانداء استغاثه لانها معزوله دوليا !!!!!!

[منو العوض]

#1076671 [معاذ ود العمدة كجرت]
3.00/5 (2 صوت)

08-11-2014 09:34 PM
والله ان القلب ليحزن والدمع يزرف العينين حزنا على وطني العزيز بعد سماع هذه الماسة بل الكارثة التي هي بمستشفى امدرمان والتحية والشكر والتقدير الى البطلة الشجاعة الدكتورة سارة على شجاعتك وروحك الوطنية بعد نقلك لمايعيشة اهلنا الشرفاء في بلدي العزيز السودان ونحن في الخارج على استعداد للدعم المادي حسب الاستطاعة فقط نرجو ان ترسلوا لنا ارقام او عناوين لنتواصل معكم من المملكة العربية السعودية

[معاذ ود العمدة كجرت]

#1076633 [Awad]
1.00/5 (1 صوت)

08-11-2014 07:51 PM
العصبة الحاكمة تعرف أن المستشفيات والمراكز الصحية أصبحت خالية من كل شىء وينعق فيها البوم وأيضا تعرف أن السودانيين سواء بالداخل أو بالخارج سوف يتنادون ويتعاضدون فى مثل هذه الملمات وهى مطنشة كأن الأمر لا يعنيها ولا هو مسئوليتها ويسرقوا ويلهطوا فى مايرسل لأنقاذ حياة الناس بل هذا هو موسم السرقة.أحى الدكتورة على هذه الرسالة التى أدمعت أعيننا وأنا على أستعداد للتبرع مع أخوتى المتبرعين ولكنها حلول وقتية خصوصا فى تعامى العصابة الحاكمة عما يحدث وهى تنظر بأزدراء لأهلنا وشعبنا وتقول له من لم يمت بالسلاح فليمت بالجوع والغلاء والأمراض والكوارث.الحل الأبدى بمثل تفاعلنا هذا ونحن بالداخل أو الخارج التداعى للنزول للشارع ولا رجوع لنا ألا بأزالة هذا الكابوس الذى قبع على صدورنا25 عام من الجحيم.الحل هو الثورة ولنقدم مئات الألاف من الشهداء.

[Awad]

#1076625 [العبيدي]
1.00/5 (1 صوت)

08-11-2014 07:39 PM
سلام يا اهلنا الطيبين، وفعلاً طيبين وعلي نياتكم، الحكومة بترسل طيارات خاصة
لاجلاء بعض الشرذمة الليبيين وعلاجهم بالسودان، دا غير التبرع بالدم لناس غزة.
ربنا المستعان ولا حول ولا قوة الا بالله. اكثروا من الدعاء بس لانه سبحانه فقط ينزع
الملك ممن يشاء، ولكل اجل كتاب

[العبيدي]

#1076598 [Kamal Mustafa]
1.00/5 (1 صوت)

08-11-2014 06:56 PM
التحيات للدكتوره التي اوضحت الوافع المؤلم المعاش وبصراحه دي استغاثه ليس من اجل المساهمه فقط بل بتقول بدلا من تموتوا بهذا الاهمال موتوا وانتم تحاربون لازالة هذا النظام الفاسد ، وهسع حصلوها احتمال يكون اعتقلوها وعملوا فيها ما يرتكبونه من جرائم

[Kamal Mustafa]

#1076584 [ابو علي]
3.00/5 (2 صوت)

08-11-2014 06:43 PM
الحل التحويل مياشرة باسم الدكتوره يايا الراكوبه تضع عنوانها او الهاتف للتواصل وتنسيق التبرعات

[ابو علي]

#1076537 [موردة حضارة]
2.00/5 (2 صوت)

08-11-2014 05:29 PM
appreciate you dr

[موردة حضارة]

#1076521 [المغترب]
3.00/5 (2 صوت)

08-11-2014 05:11 PM
جزاك الله خير اخت ساره 00نحن نساهم كيف فى السعوديه

[المغترب]

#1076507 [مصباح النور]
3.00/5 (2 صوت)

08-11-2014 04:52 PM
دى أمة سودانية بالله فى داعى للقصص والحكاوى والبطولات أمام هذا المقف المحزن المبكى الذى تقشعر له الابدان للسودانيين الجد - عاوزين بيان بالعمل فكروا وأجمعوا ووصلوا ما جمعتموه للمستشفيات لانقاذ أهلناالمصابين واقترح للدكتورة تحديد رقم تلفون لتحويل ما يمكن تحويله لشراء ولو حقنة انا من خارج الخرطوم ولكن يمكننى أن أساهم ولو بالقليل وايد فى ايد بتجدع بعيد

[مصباح النور]

#1076500 [زهجان جدا]
2.44/5 (5 صوت)

08-11-2014 04:41 PM
د. سارة أحييك علي انفعالك والله ومشكورة ...

لكين آآآ بت امي هل لو أغثنا أهلنا في أم درمان أو الخرطوم أو بحري .. هل دا الحل ؟؟ وهل ديل هم المحتاجيين إغاثة ؟؟

ما بالك بي ناس جنوب النيل الأزرق وجنوب كردفان ودارفور والشرق هل ديل برضو اهلنا ... وهل نستمر في رتق الفتق دا دون النظر ليه الفتق أصلأ موجود ...

دا حل العاجزين ...

الحل يكمن في رحيل هؤلاء القتلة وأنت ومن معك في حوادث العظام بيدكم نصف الحل .. العصيان المدني او خليهم يموتو زي ما ماتو اتنين مليون جنوبي و 300 ألف دارفوري ..

[زهجان جدا]

ردود على زهجان جدا
Sudan [فركتو] 08-11-2014 09:39 PM
اجمل تعليق


#1076488 [khalid osman]
1.00/5 (1 صوت)

08-11-2014 04:22 PM
د.ساره كلامك كله في عين الاعتبار ولكن يكفينا الكيد في بعضنا البعض الحكومه الهزيله والمعارضه المتاجره بارواح شعبها .حكايه انو العيان مات قبل ان
تجيبى الحقنه مابتخش الراس .يجب ان تحاولوا انت وزملاك الاطباء من عمل مجموعات لمساعده هولاء المرضى من خلال الموارد المتاحه
وعلاقه الاطباء في بعضهم سواء داخل اوخارج المستشفي. وذلك حتى يكتب الله امرا كان مفعولا.

[khalid osman]

ردود على khalid osman
Sudan [nagatabuzaid] 08-11-2014 09:46 PM
تفتكر يا خالد حيخلوهم ديل قتلة سفلة هدفهم اهلاك الشعب وربنا يحفظ د سارة واخوتها من الاطباء المناضلين


#1076459 [زول اصيل]
1.00/5 (1 صوت)

08-11-2014 03:49 PM
بدون تعليق

[زول اصيل]

#1076454 [علي باحش الدكوك]
1.00/5 (2 صوت)

08-11-2014 03:38 PM
يا جماعة دا نداء صادق من أنسانة صادقة، قبل ما تكون طبيبة وشاهد على المأساة
يله يا جماعة نتكاتف ويد على يد تجدع بعيد ... أفتحوا حسابات في بلاد المهجر ونسقوا مع دكتورة/ سارة حسن شخصياً ورسلوا الاحتياجات الأسعافية العاجلة بأسرع ما تيسر.

يلله همتكم،،،،

[علي باحش الدكوك]

#1076446 [مازيل تنيبور]
1.00/5 (1 صوت)

08-11-2014 03:27 PM
انتو عارفين انو السودان سنة 1996 بقى دولة فيدرالية ( دويلات داخل دولة ) … وانتو عارفين انو المستشفيات بقت مسوؤلية الولايات رغم امكانياتها الضعيفة انو الحكومة الاتحادية رفعت يدها عن دعم المستشفيات والعلاج عموما … وانتو عارفين انو ناس الاقاليم ( الذى تفشا فيه المرض لجهلهم ) بجو بكميات كبيرة مشان يتعالجو في مستشفياتنا في الخرطوم … وانتو عارفين انو الخرطوم بنص الدستور غير ملزما بعلاجم … وانتو عارفين تكلفة العلاج بقت غالية وولاية الخرطوم ما لاح تصرف مصرياتا على مرضى السودان كله … وانتو عارفين احسن طريقة للتملص من مرضى الولايات هي الشغال فيها حميدة حاليا … وانتو عارفين الزول دا هلا وزع مكنات الغسيل والقلب والقسترة وكل العدة للجزيرة اسلانج وجبيل الطينة وشرق النيل وفتاشة عشان تكون بعيدة عليكم ياناس الولايات ... وانتو عارفين دكتورة سارة قطع شك خريجة الاحفاد … !!!!

[مازيل تنيبور]

#1076331 [خليل عزة]
2.00/5 (5 صوت)

08-11-2014 12:57 PM
مع أحترامي لك وتقديري لانفعالك مع وبقضايا المرضى والشعب عموماً

الا انو دي حلول ميته لا بتقدم ولا بتاخر بل تزيد من عمر النظام..

حلكم واحد يا أطباء بلادي الشرفاء ...

العصيان المدني ... وبس

يعني تقعدو في البيت وتحردو الشغل والله برزقكم .. كلها كمها .. وما ضاع حق وراءه مطالب

اي نعم هناك بعض الضرر سوف يحدث .. ولكنه الى حين .. والحل سيكون أبدي ..

العديل راي ... والعوج برضو راي ... وانا ده رائي

[خليل عزة]

ردود على خليل عزة
[مالك] 08-12-2014 05:45 PM
اولا اغاثه المتضررين لانهم ما بنتظروا

Sudan [nagatabuzaid] 08-11-2014 09:49 PM
ان تم العصيان المدنى سينزل المتطوعون ويسدوا الخانة ولو بالقليل

[shaat] 08-11-2014 06:40 PM
الظاهر يا أبو خليل موضع العصيان دا بيخوف الجماعة ، شوف انفعالات الجراد الالكتروني ، وبلا خجل يفوليك " ولو مالقو زول يفتح باب المسشتفى.. " طبعاً مامون حميدة كسبان، ياأخي دى ما مستشقى دا طريق الى المقابر .. اذا كان القائمة الطويلة المذكورة في المقاول لاتتوقر بالمستشقى، واذا كان الحقنة الفاضية يتم البحث عنها... وفي الزمن الماضي كانت توجد بقرب قلم الطبيب البيكتب بيه الروشته...يعنى انت عايز تحول الاطباء الى فقراء يكتبوا البخرات...المهم يبدو ان الجراد الالكتروني وطبعا حكومة الطرش ماسمعوا ابو المين يردد" عصينا...عصينا...وشنا عصينا....عصينا ...عصينا ...وشلنا عصينا

Saudi Arabia [مشاهد] 08-11-2014 03:12 PM
قال تعالى في محكم تنزيله "فَلَمَّا قَضَيْنَا عَلَيْهِ المَوْتَ مَا دَلَّ هُمْ عَلَى مَوْتِهِ إِلاَّ دَابَّةُ الأَرْضِ تَأْكُلُ مِنْسَأَتَهُ فَلَمَّا خَرَّ تَبَيَّنَتِ الجِنُّ أَنْ لَوْ كَانُوا يَعْلَمُونَ الغَيْبَ مَا لبِثُوا فِي العَذَابِ المُهِينِ " هذه الحكومة تتكي على عصاةسيدنا سليمان فصدقت الخليل لن يزيحها غير العصيان المدني ، والا سيتم بيع السودان وطرد اهله وتشريدهم ، فهؤلاء الخونة عملوا ولازالوا يعملون من اجل احداث التغيير الديمغرافي في السودان ، ولن ينهي وجودهم غير هذا العصيان المجرب في السودان وخارجه

Sudan [ناصر عزة] 08-11-2014 02:35 PM
اتخيل تاني يوم من العصيان المدني
جابوك في في باب الحوادث ما لاقي زول يفتح ليك الباب .... ؟
بعد الناس ماترجع يسموك شهيد العصيان ..!
هنيئاً لك بالراي الأعوج

United Arab Emirates [حسن خيرى] 08-11-2014 01:37 PM
ده همك مع الناس ؟؟؟؟؟ ورايك شنو لو كان المريض ابوك ولا امك ولا اخوك ولا ولدك ننتظر لحدى ما النظام ده يغور عشان نعالجوا ... اضراب الاطباء لا يتضرر منه الا المرضى اما النظام فتستمر الاموال في الزيادة والكروش فى الاستداره ............. عزيزى الرجاء التفكير قليلا قبل التعليق ........ اكثر شئ ضارينا نحن السودانين الانفعال الزائد عن الحد وتصور اننا بالرجاله ممكن نعمل اى حاجه......


#1076330 [ابواحمد]
2.75/5 (3 صوت)

08-11-2014 12:55 PM
التحية للدكتورة سارة وفعلا يجب ان نتعاون جميعا لمساعدة المنكوبين من الامطار والسيول والمرضي لكن بعيد عن الحكومة واتمني ان يفكر الجميع داخل وخارج السودان في طريقة للمساعدة ومعروف عن السودانين الشهامة والكرم بس اكرر بعيد عن الحكومة وسفاراتها

[ابواحمد]

#1076321 [سيف الله عمر فرح]
3.00/5 (3 صوت)

08-11-2014 12:48 PM
نحيى الدكتورة سارة حسن عبدالله على إنسانيتها الصادقة .
ودعونا نسال بعضنا البعض عن من المسئول من مأساة مستشفى امدرمان وعن بقية مستشفيات السودان . وإذا عرفنا المسئول , ما المفروض والواجب عمله اتجاه هذا المسئول .أعتقد اذا تجابنا وخفنا من مجابهة المسئولين بشجاعة ﻻ تخاف الموت . فإننا نستحق الذل والهوان والمعاملة الغير إنسانية التى تحصل يوميا فى مستشفياتنا ..
هل حقا نحن نعاج لنرضى ونسكت عن نصيب مستشفى امدرمان من الموازنة العامة وهى ﻻ تكفى لتغطية أبسط احتياجات اية مستوصف . فى الوقت الذى نسمع فيه من وزير خارجيتنا أن الملحقين الثقافيين في سفاراتنا يتقاضون راتبا شهريا قدره عشرة آلاف دوﻻر أمريكى بدون اى عمل ينجزونه . وفى الوقت الذى يتقاضى فيه رئيس البرلمان راتب وبدﻻت شهرية ال 300 مليون جنيه سودان بالقديم وحسب تصريح من رئيس الجمهورية عمر البشير أن مستشارى الوﻻة يتقاضون راتبا شهريا يعادل ويزيد عن راتب عشرة أطباء استشاريين ..بالله بماذا سيبرر مسئولى الحكومة هذه القسمة الطيزى أمام الله .

دكتورة سارة . انا بعتقد أن مستشفى امدرمان اليوم ﻻ تحتاج إلى تبرعات أهل الخير . لأن خدماتها فقط للقادرين الذين يستطيعون سداد فاتورة العلاج .إنما هى فى أمس الحاجة إلى ثورة شعبية تقتلع المكنكشين في كراسى الحكم وتقتلع الظالمين والفاسدين الذين أثروا وغنوا بمال الشعب .

وأسأل سؤال غبى , لماذا ﻻ يتم علاج المسئولين فى المستشفيات الحكومية ..

[سيف الله عمر فرح]

ردود على سيف الله عمر فرح
United Arab Emirates [إبن السودان البار ********] 08-11-2014 01:48 PM
هذا ما قاله الخبراء الذين تبرع بهم تيتو رئيس يوغسلافيا السابق للرئيس عبود حيث أفادوا بأن مستشفيات السودان الخربة لن تتطور الا إذا تم علاج كل المسؤولين فيها ؟؟؟ وحكومة الكيزان الفاسدة بدلاً من أن تصرف علي المستشفيات بالداخل تجدها تصرف ملايين الدولارات بملحقية الأردن السودانية لعلاج الصفوة ؟؟؟ ومن آخر تجليات حكومة المجرم السفاح البشير الإهتمام بمصابي غزة وليبيا ؟؟؟


#1076310 [عبدالوهاب الجعلي]
3.00/5 (2 صوت)

08-11-2014 12:33 PM
حسبنا الله ونعم الوكيل .. ربنا يحل الكرب عن كل اهلي

[عبدالوهاب الجعلي]

#1076309 [saif]
3.00/5 (4 صوت)

08-11-2014 12:33 PM
انتو بتتكلموا وتفتو فى شنو؟؟ الدكتورة قالت ليكم اتبرعوا حتى لو ب1000 جنية ( يعنى جنية واحد ثمن الحقنة)شابكننا مامون حميدة ..... نميرى الجيران .. اصحوا اصحوا يابريش اااات وللماعارفين سجم اهم ديل يعنى الف حقنة بمليون جنية بالقديم(500درهم ) فهمتوا ؟؟ رسلوا او اسكتوا

[saif]

ردود على saif
United Arab Emirates [إبن السودان البار ********] 08-12-2014 01:06 PM
هل أنت متأكد أنه الدكتورة الوطنية المحترمة الي الآن لم يقبض عليها ولم ينكل بها جهاز الأمن بعلم رئيس المافيا السفاح البشير ؟؟؟ ألم تسمع بقتل الشاهد في قضية وفضيحة الأقطان ؟؟؟ الم تسمع بإغتصاب صفية والمهندس بوزارة الإسكان المرحوم بدرالدين إدريس ؟؟؟ وهل إنت متأكد أنه أي مبالغ ترسل سوف تذهب لغرضها ؟؟؟ ألم تسمع بالمعونات التي أرسلتها دول العالم الي كوارث السودان منذ إستقلاله أين ذهبت ؟؟؟ لنحكي لك قصة بطاطين حكومة الكويت التي تبرعت بها لأهل شرق السودان عندما ضربتهم عواصف البرد وقتلت منهم عدد مقدر ؟؟؟ أرسلت الكويت صحفيين لتصويرهم وهم يتلفحون بهذه البطاطين ومكتوب عليها حكومة الكويت ؟؟؟ ذهب الصحفيين وكان بينهم المصور السوداني الذي حكي هذه الجريمة الي الشرق للتصوير فلم يجدوا أحد يملك بطانية واحدة ؟؟؟ فتملكهم الخوف من أنهاء خدماتهم بالكويت (التفنيش) فوجدا إنه لا مناص من شراء عدة بطاطين من نفس البطاطين التي تبرعت بها حكومة الكويت من سوق الخرطوم وعادوا الي شرق السودان حتي يصوروا بها عدة أشخاص متلفحين بها مظهرين ما كتب عليها ( حكومة الكويت ) حتي يرضي عنهم المسؤولين بحكومة الكويت ويقولون لهم جزاكم الله كل خير وما قصرتم ؟؟؟ والآن هنالك خيام تبرعت بها عدة دول لإيواء المشردين من جراء السيول فأتحداك لو تجد صورة بها أسرة واحدة نصبت لها خيمة واحدة في أي منطقة بالسودان ؟؟؟ وفي التلفزيون يعرض المشردين وهم يغوصون في المياه وبيوتهم مهدمة والمسؤولين يتبجحون بأنهم قدموا لهم أكياس سكر وعدس ؟؟؟ وللمقارنة أنظر لمخيمات اللاجئين بغزة وسوريا والأردن وأنظر الي كضوم أطفالهم المنتفخة ومحمرة اللهم لا شماتة؟؟؟


#1076280 [المتجهجه بسبب الانفصال]
1.00/5 (1 صوت)

08-11-2014 12:10 PM
وبعد ده يطلعوا يقولوا ليك ناكل حارة ما نضوق باردة،، لا بالجد عيني عليكم باردة يا المسئولين الا من رحم ربي وهم قليل وأغلبهم هاجر او هُجر ،،

[المتجهجه بسبب الانفصال]

#1076250 [فاروق بشير]
3.00/5 (2 صوت)

08-11-2014 11:48 AM
اقترح على كل قادر اطبع وزع ,عشرة نسخة.

[فاروق بشير]

ردود على فاروق بشير
France [فاروق بشير] 08-12-2014 07:14 PM
والله يا الغاضبة الضعيف كلامه صاح خالو ما لسع ماسك فى القديم.ابدوا بالواتساب فورا.
الضعيف ود حلال يفتح الباب.

United Arab Emirates [الغاضبة] 08-12-2014 08:58 AM
هوووي يا الضعيف، الضعفاء الذين لا يملكون هواتف بها مميزات واتساب كيف يسمعون بهذه المآسي، خالو فاروق كلامو صح... اطبع وزع لأن الأمر جلل ويحق أن يعمم على الجميع خاصة الفقراء والمعدمين ليعرفوا حقوقهم وعدوهم ... استخدام كافة الوسائل المتاحة واتساب ، اطبع، وزع، فيسبوك، الخ....

Qatar [الضعيف] 08-11-2014 01:47 PM
يا اخوي فاروق انت من زمن اطبع ووزع....
و الواتساب مشا وين، ولا قاعد خاتليهو حنة!!


#1076202 [قبلي المنهك تمزق أشلاء]
1.00/5 (1 صوت)

08-11-2014 11:13 AM
دايرين نرسل لكن للأسف متأكدين الفلوس ما حتصل المحطة النهائية لمستحقيها الله يكون في عونكم

[قبلي المنهك تمزق أشلاء]

ردود على قبلي المنهك تمزق أشلاء
United Arab Emirates [حسن خيرى] 08-11-2014 01:38 PM
ح تصل باو باذن الله فى داعى للتشكيك في ذمم الناس


#1076179 [احمد صالح]
3.00/5 (3 صوت)

08-11-2014 10:44 AM
أحي الدكتورة سارة لقولها كلمة الحق لاصحاب المشروع الحضاري . الذين يعرفون كل شي لكن طالما ماكلين سمح وشاربين سمح ولابسين سمح وساكنين في أرقي الاحياء وعلاجهم بالخارج ما بيشتغلوا بالفارغة يموت محمد احمد تموت الشول اموت شافع وقعت فيه حيطة دي شغلة فارغة. حضرت مع ابي يوما لاجراء عملية لعينه وعند اليوم المحدد ادخلوه لغرفة العمليات وانتظرنا علي امل أن تكلل العملية بالنجاح . تفاجأنا بعد قليل بخروج الدكتور من غرفة العمليات ليخبرنا بأن ( الموية قاطعة ) والله علي ما أقول شهيد - الموية الشافتها الدنيا دي كلهاوالبتكسر لينا البلد سنويا غير موجودة بغرفة عمليات مستشفي ام درمان !!! !!!!!!

[احمد صالح]

#1076166 [محمد]
1.00/5 (1 صوت)

08-11-2014 10:35 AM
يالخايف على الدكتورة انا بعرف انو الزول لو عندو حاجة بتستاهل بخاف عليها اسى الدكتورة دى تخاف على شنو الماهية ولا البيت ولا العربية

[محمد]

#1076150 [أبو مصطفى]
3.00/5 (4 صوت)

08-11-2014 10:19 AM
أبكيتنى والله على ما أقول شهيد ، ليتنا نخرج الأن الأن لنجدة أهلناوبعد داك نقبل على الجماعة الجابو رؤوسنا فى الطين وأزلونا

[أبو مصطفى]

#1076129 [عمر حسن صالح]
3.00/5 (2 صوت)

08-11-2014 10:06 AM
سا سلام يا دكتورة سارة اشكرك جزيلا بالنابة عن السودانين الغلابة ، ولو الواحد في كل مستشفي وكل وزاره اتحصل علي سارة اخري او بمواصفات سارة كان انصلح حالنا .. ونحن جاهزين للدعم .. واول زيارة لي للسودان قبل العيد ان شاء الله سوف اكون بمستشفي ام درمان للسؤال عن هذه الدكتورة الغيورة علي اهلها وبلده واشارك بالدعم الشخصي واحض اهلي واصدقائي بالمشاركة
دكتورة .. اكرر شكري .. واقول لاصدقاء الراكوبة ارح معاي نفير سارة نرمم ما بقي من عظام اهلنا.
عمر حسن محمد صالح .. الرياض

[عمر حسن صالح]

#1076106 [جركان فاضى]
1.00/5 (1 صوت)

08-11-2014 09:46 AM
احتمالات موت المريض بناء على كلام الدكتورة:-
-كان ما عندو حق الاسعاف فالجيران ما بقصروا بعرباتهم....محلولة
-طبعا ما حيكون عندو نقالة...فالجيران ما بقصروا بدرداقاتهم...محلولة
-كان ما عندو انبوبة رئة....حقو راح
-كان جاء اخر الليل وما وجد حقنة...حقو راح
-كان ما عندو حق الاشعة...خلوه فى البيت ينتظر اجلو
-كان انكسر وماعندو المسامير والجبس...شوفوا ليه اقرب بصير يقطع رجلو او ايدو
-كان ما عندو حق جهاز شفط السوائل...خلوه فى البيت يلاقى ربه مخنوقا
-كان جاهو التهاب زايدة فى زمن السيول والامطار....اسرعوا شوفوا اى حتة يابسة احفروا ليهو قبرو
-كان نقص عليه ثمن الدواء...يتمها بالقرض...محلولة
-كان داير تعيش سعيد فى السودان ما تمرض ابدا...وكان جاك مرض اسرع اتخارج من الدنيا وما تعذب روحك فى الفاضى

[جركان فاضى]

#1076087 [المتجهجه بسبب الانفصال]
3.00/5 (3 صوت)

08-11-2014 09:33 AM
اؤيد الاخ أنا سوداني على ملاحظته المهنية ،، وكان على ادارة الراكوبة حجب اسم الطبيبة الشجاعة ،، فاذا كانت العصبة المتنفذة لا يهمها موت الناس فابالطبع لن يهمهم أن يفصلوها او يضايقوها ،، نهدي ما كتبته الدكتورة الى المتغطرس مامون حميدة الراعي الرسمي لبيع ودمار الخدمات الصحية بالبلاد،، أجزم أن كل ما كتبته الدكتورة صحيح بواقع الحال الذي يغني عن السؤال ،، وليس من حل سوى أن يهب الشعب هبة واحدة لحماية حقوقه وحياته من هؤلاء القتلة الذين يستخدمون كافة انواع الابادة دون ان يرف لهم جفن،،

[المتجهجه بسبب الانفصال]

ردود على المتجهجه بسبب الانفصال
United Kingdom [انا سوداني انا] 08-12-2014 01:33 AM
أشكرك ولك التحية اخي المتجهجه بعد الانفصال،،،
هذا واجبنا لحماية الشرفاء أمثال الدكتورة الشجاعة سارة حسن عبدالله ،، ولكننا عوتبنا وعوقبنا علي تنويهنا بان تم حذف التعليق،،،
هكذا تحد ان حميدة والوالي وبطانته فرحوا فرحاً شديدا علي الحذف ،، وتلقاهن قالوا يتساهل ،،،ولكن لا يمهمني مادام كان قول الحق ونصح في محلة ومن منطلق مهني وخبرة صحفية ،،، هذا نا يحدث عندنا في اوربا،،،المصادر محمية ولا يمكن الإفصاح عنهم ولو بأمر المحكمة لانه يوجد قانون حماية المصادر فلا يمكن لقانون التعدي علي قانون وتفريغه من معناه او تجريده من سلطته،،،
فقلبي علي الدكتورة سارة لأنني اعرف هذه الشرذمة سواء تلك التي حول وزير الصحة ام بلطجية الوالي وصعاليك جهاز الامن،، لا احد منهم سيرحم الدكتورة وربما تتعرض للمذلة والاسواء

فاقلع قبعتي اجلالا وانحني امام شجاعة الدكتورة سارة حسن عبدالله


#1076084 [عميد معاش د. سيد عبد القادر قنات]
1.00/5 (1 صوت)

08-11-2014 09:32 AM
سلام دكتة سارة
ليست حوادث أمدمان وحدها بل كل مستشفيات العاصمة فاقدة للأساسيات أنا بعتقد أن الأطبا مفروض يفكروا في عمل جسم يدافع عن المرضي والخدمات الصحية لام يتكاتفاو عشان إنشا نقابة أطباء السودان التي كان لها شنة ور ن ما قبل الإنقاذ، الآن هنالك نقاب المنشأ التي لاتعمل أي شي، ثم إتحاد أطبا السودان ه بدن صلاحيات نهايا،،،

أعتقد الأطبا مفض يتعانا يتكاتفا من أجل كشف تعي كل القص الحاصل دا لام تبصير المواطن بحقوقو

[عميد معاش د. سيد عبد القادر قنات]

#1075971 [مأمون المأمون]
2.25/5 (4 صوت)

08-11-2014 07:06 AM
رغم الأحزان الكثيرة التى ينقلنا إليها حديث الدكتورة لكن للحقيقة هذا المقال قمة فى الموضوعية و القوة و علينا جميعاً أن نتعاون لمحاولة معالجة هذه المشكلة أرجو من الجميع محاولة التجاوب مع هذا النفير الذى أتمنى أن يتحول إلى حملة و أناشد كذلك أخواننا المغتربين و الأشادة واجبة بالشباب القائمين على موقع شارع الحوادث بالفيس بوك و الذين يمكن أن يتم التبرع عبرهم للمستشفى حسب دعوة الدكتورة سارة حفظك الله يا دكتورة و سدد على طير الخير خطاك
من ناحية أخرى شباب شارع الحوادث يعملون على مساعدة المرضى حتى فى مستشفيات الأقاليم فلهم التحية و التقدير موقع شارع الحوادث
https://www.facebook.com/SharAlhwadth

[مأمون المأمون]

#1075967 [ahmed]
3.00/5 (3 صوت)

08-11-2014 07:01 AM
الي د. سارة
أذكر تماماً ما حدث في إنتفاضة أبريل فلقد ترك كل الأطباء المستشفيات وخرجوا في تحد سافر للنميري ..... وتم خلع النميري وذهب الي مزبلة التاريخ ...... نحن نعلم كل ما ذكرته ولكن أنتم الطبقة المتعلمة المثقفة المقعدكم في المستشفيات شنو ؟ الناس كده كده ميتة فإخرجو الشارع وإعتصموا وثقي أن الكيزان لن يستطيعوا أن يصمدوا أمامكم إسبوعين وستظل نفس نسبة الوفيات موجودة ولن تزيد بإضرابكم بل ستقل بعد ذلك وإذا حاول بعض الدكاترة الكيزان كسر الإضراب سجلوا أسمائهم وسيتكفل بهم الممرضين . الشعب كله سيقف خلفكم لأنكم تمثلون قادته فقط إبدأو الإضراب .

[ahmed]

ردود على ahmed
Saudi Arabia [واحد مستاء] 08-12-2014 02:16 PM
نعم يا احمد فان اخر الدواء الكي
هؤلاء لم يعد ينفع معهم الا العصيان المدني من كل افراد الشعب السوداني حتى يعلموا انهم مرفوضون من الكل وحين تتوقف عجلة الحياة سيجدوا انه لا مناص من ذهابهم غير مأسوف عليهم.


#1075950 [عودة ديجانقو]
2.00/5 (9 صوت)

08-11-2014 05:56 AM
فيضان 88 ووقتها كنت بالفرنسيه بمطار الملك خالد الشله عقدت اجتماع طارئ لأرسال معونه عاجله للمتضررين وكل واحد مساهمته حسب معرفته ومقدرته...بأختصار الحوجه الأهم كانت أدويه ومعدات طبيه..فى فتره وجيزه جمعنا ما يفتح 5 صيدليات...وكانت مهمتى الشحن ذهبت لمديرى (الكافر) وبدون تردد بارك خطوتنا واعطانى خطاب لبوليصة شحن مجانيه مفتوحه وكانت مفاجأه لى.
الخطوه الاخيره ذهبنا لسفارتنا وألتقينا أحد المسئولين شرحنا له ما وصلنا إليه وطلبنا منه خطاب إعفاء جمركى..وكان رده كالصاعقه من يضمن لى بأن هذه الاشياء ليست لأغراض تجاريه....وطبعا لغينا الفكره ويا دار ما دخلك شر.

هذه هى العقليه السودانيه

[عودة ديجانقو]

ردود على عودة ديجانقو
[حسكنيت] 08-11-2014 03:27 PM
لك التحية
علمتنا التجارب المريرة أن الأشياء العينية لا تصل أبدا ، ويا ريت لو كل واحد يحول مبلغ لشخص يثق به فى السودان ويوجهه بشراء المتوفر بالصيدليات لإيصاله للمستشفيات أما الغير متوفر فيمكن شراؤه من الخارج و والتوجه به لأقرب مطار دولى وإرساله مع المسافرين على دفعات صغيرة...ولا أظنهم سيرفضون حتى لو كان الوزن زائدا يمكن سداد قيمته

عملت بمدينة الهفوف عام 1998 ربما نكون قد إلتقينا من قبل

Saudi Arabia [ود مدني] 08-11-2014 12:30 PM
فعلا دي العقلية السلبية المسببة لينا كل البلاوي دي .
لكن نحن لازم نتعلم نكون ايجابيين بمعني انو ما نستسلم من اول عقبة ونحاول نوجد حلول . نتعلم فن محاربة الفساد والمفسدين وما نديهم الفرصة . قالوا لي فرعون الفرعنك منو قال ما لقيت حد يوقفني .
هسة نحن كلنا بننتقد ونشخص ونشرح ونفند ، متين حا نبدا نعمل ونغير ؟
متين حا نقتنع انو المؤامرات ممكن نتغلب عليها وانو الخير بنتصر في النهاية ؟
متين نبدا نثق في قدراتنا وامكانياتنا ونتحرك ونخطط وننجز ؟

[الولايات المتحدة السودانية] 08-11-2014 11:32 AM
طيب وماظللنا نسمعه ونردده ببلاهة وسذاجة أنا أهل كرم وجود وأخوان حارة ووووووو دا كلو كلام فارغ وكضب !!! ياخى أنحنا السودانيين ديل أردأ وأسوأ بشر !!!!!
عمرى مابسمع غير أخبار النهب والحرمنة والغش والمواسير !!!!
والحاجة المؤسفة كمان في الكيزان ديل بسرقوا الأكل !!!!!!!!!!!!!!!!!! ياخى ديل جيعانين وهلافيت كيف !!! قرف !!

United States [عميد معاش د. سيد عبد القادر قنات] 08-11-2014 09:23 AM
ومازالت هذه العقلية هي المسيطرة علي كل شيء في السودان عام وخاص،، في إعلان من أجل التبرع بالدم لحوادث الخرطوم وأطفال السرطان والجماعة مشو غزة وفد طبي ونسو مآسي السيول والأمطار والفيضانات وناس دارفور والنيل الأزرق وجنوب كردفان ديل مابشر؟؟ الإغاثة القطرية وصلت والتوزيع إنتهي من زمان وناس معتمدية كمان رفضو لقط الخيرية توزيعها بنفسهم ، بلاوي وحكاوي ولسه

United Arab Emirates [abu ahmed] 08-11-2014 09:16 AM
عودة جيجانقو
رجعتنى للوراء ايام سيول منطقة الجيلى وكنت وقتها اعمل بالسعودية والمنطقة التى اعمل بها منطقة بالإحساء مشهورة بانتاج أجود أنواع التمور وأغلاها واهلها من كرام القوم وهالهم ماشاهدوه من خراب ودمار بمنطقة الجيلى فاقترح أحد شيوخهم بإرسال تمور لهم وطرح على الفكرة فقمت باتصالاتى [غدارة الخطوط الجوية السودانية بالظهران ورحبو بالفكرة واتصلو بإدارتهم فى الرياض ووافقو على نقل أى كمية وكم كانت فرحة القوم كبيرة حيث كانت التمور تنهال علينا بالقفاف الكبيرة ولا أنسى اخوتى السودانيين بالمنطقة الذين لم يدخرو وسعا فى تغليف هذه التمور وكانت اكثر من ثلاثة أطنان وتم تجهيزها واتصلت بالخطوط السودانية وقالو لازم البوليصة تكون باسم السفير السودانى بالرياض وقتها كان المدعو عطا الله حمد بشير .
وتبرع احد أهل البلدة بسيارة كبيرة حملت هذه التمور وتم تسليمها الى وكالة الطيار الوكيل الرئيسى للخطوط السودانية بمطار الظهران .
طبعا كانت شحنة التمور معنونة للحنة العليا لدرء اثار السيول والفيضانات برئاسة مجذوب الخليفة والى الخرطوم حينها والطيب مصطفى امينا لها مدير وكالة سونا آنذاك
وتابعت اخبار الشحنة مع أصدقائنا بالسودان وخاصة الذين يعملون بسونا وسالو الطيب مصطفى قال ما شافور تمور يعنى اتلحست مشت وين .!!!!!!!
واتصلت بالسفارة لن أعمل بعيدا من الرياض ووصلونى بالسفير وكنت غاضبا حينها وأخذ فى تهدئتى ودعانى لزيارته لشرح الأمر فرفضت
سمعت تحت تحت مشت وزارة الخارجية اتوزعت على المحاسيب والدنيا رمضان
ماتنفعكم ياعطا الله وسمعت بيك تتنطط من سكرتير للإيقاد والآن فى مفوضية ا؟لإنتخابات اصلك فاسد ما بتشتغل فى حتة الا فيها مأكلة
شلت ورقى وخطاباتى وكل مستندات وفى أول زيارة للسودان وقلت أشفى غليلى وقلت امكن القى فى رئيس جهاز السودانيين العاملين بالخارج الذى يمثلنى فى التحقيق وطلعت منو والحمد لله بخطابات شكر لأهل تلك البلدة
دى تجربتى رايكم



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة