الأخبار
أخبار إقليمية
قصيدة جديدة.. ( رُكبة ) سيدي .. شعر : هاشم صديق
قصيدة جديدة.. ( رُكبة ) سيدي .. شعر : هاشم صديق
قصيدة جديدة.. ( رُكبة ) سيدي .. شعر : هاشم صديق


08-12-2014 11:04 AM
قصيدة جديدة

( رُكبة ) سيدي

شعر : هاشم صديق

يا خلف الله
ود عبدالله
بص ( الثورة )
مابي يدوِّر
كان ( إستارتر )
أو منفلّة
كوركنا ننادي
هوي يا شباب
هوي يا رْجال
هوي يا حريم
هوي يا شوارع
هوي يا نيم
يا وِلاد البادية
ياوِلاد النيل
يا شعب أكتوبر
يا شعب أبريل
تعالوا ( النفرة )

لزوا معانا
بص الثورة
إنشاءالله يقوم
لو وصَّلنا
لباب القصر
( حتي النصر )
في الخرطوم
وهُتافنا فطر
ما سخسخ
يصوم
وبلّ حبالو
وللحلقوم .
.............

يا خلف الله
يا ناس الحِلة
يا أهل الله
لمتين راجين
ناس ديك
أو ديل
في ( شليل )
و ( الحِجْلَة )
لمتين
( حيص بيص )
لمتين الجوع
لمتين الذِلّة ؟! .
..............
يا خلف الله
البلد إتهرست
داسا السيل
جانا الوالي
عيونو حُمر
( حلب الباقة )
( في الشُنقاقة )
صنقع ودنقر
دوّر ولفّ
إتمّهل وفكّر
إتنحنح وصرّح
- ما مطرة شديدة
دي ( النقناقة )
وباقي الموية
وحتي السيل
من ( أوباما )
وإسرائيل .
والموت يا جماعة
- ومن ما قمنا -
ياهو مهمة
عزرائيل .
...............
آخ خ خ .. يا مهازل
لا زعلنا وشلنا
جناب الوالي
عديل طوالي
مرمغنا رويسو
جوه الطين
لاثُرنا هتفنا
يسقط يسقط
الغش بالدين .
..............
يا خلف الله
بعد ما باعوا
بلدنا وخيرها
باعوا ( العون )
شالوا الخيمة
ولبن البدرة
وصلصة برة
والمكرونة
وشوربة ماجي
وعجوة مكة
وعِلب التونة
وصابون فونا
والمعجون .
شالو العون
بالحاويات
وبالكرتون .
.............
نفس الخمشة
الحول الفايت
بالكربون .
............
حاجه نفيسة
بيتها إتماص
الجوع بكّاها
جاها الوالي
كريم أهداها
بس تلفون
وللبطن الطامة
كمان أداها
فص ( ليمون) .
...............
يا خلف الله
ود عبدالله
بص الثورة
لا داير يدَوّر
كان ( إستارتر )
أو منفلة .
جانا ( الصادق )
قال إنتظروا
لسه ( الأزمة )
بتغلي وتنضج ؟!
جوه الصاج
وجا ( أبو هاشم )
وقال يا رعية
بفاتحة قوية
( الإنقاذ ) دي
بتمرق بالنفاج
وجا ( أبوعيسي )
قال ( لينين )
حيسخت ( بشبش )
إبقي كديسة
وجانا ( ترابي )
قال يا ناس
بحوار ( الوثبة )
الزول دا حيقعد
زي ( موقابي ).
...........
يا خلف الله
ود عبدالله
ربع القرن
ونحنا رهاين
جوه الكُبّة
ومن فات الغازي
والمستعمر
ما شفنا فكي
تحت القُبة
نثور ونفور
نجيب ( الريس )
نقول يتحبا .
ويجينا الخير
ما ياكلو الطير .
لكن يا خسااااره
أحلامنا تموت
ينضرب الشارع
وبالنبوت
زرعنا يضيع
وعشمنا رضيع
وما نحصد حبة .
.............
ويتلِّب طاغية
يحرمنا العافية
ونبقي رهاين
لافانا الكُبّة
عسكر وكاكي
مهازل ورتبة.
..............
( بشبش ) ينقّز
( بشبش ) يعرض
( بشبش ) يرقص
لامن بالغ
وحلج الرُكبة .
.............
ربع القرن
والأُمة في كُبّة
ياخلف الله
ود عبدالله .
لا فُرنا وثُرنا
بلعنا أسفنا .
والطاغية خنقنا
قاعد آمن
سمين مُطامِن
لامن سوّس
وبدل رُكبة .
..........
يا شعب أكتوبر
شعب أبريل
أولاد البادية
أولاد النيل
بص الثورة
داير لزّة
عرش الطاغية
عايز هزّة
خرطوم الوالي
السيل دكّاها
وصبحت ( غزة )
الشعب جعان
لابيت لا أمان
وناس السُلطة
سيلهم ويسكي
وكافيارهم مزة .
.............
ياخلف الله
ود عبدالله
بص ( الثورة )
مابي يدوّر
كان ( إستارتر )
أو منفِلة
كوركنا ننادي
هوي يا رجال
هوي ياحريم
هوي يا شوارع
هوي يانيم
ياوِلاد البادية
يا وِلاد أكتوبر
يا شعب أبريل
تعالوا ( النفرة )
لِزوا معانا
بص الثورة .


11/8/2014م


تعليقات 36 | إهداء 1 | زيارات 26167

التعليقات
#1079953 [nagatabuzaid]
0.00/5 (0 صوت)

08-15-2014 12:19 PM
رد على SESE

لك التحية والشكر بعد الله على التقريظ وشخصى المتواضع لا يرقى لمستوى ملكات مناضل الكلمة هاشم صديق وان كنا من من حى واحد ممتد من بانت للمورده حيث فى كل بيت بطل ومناضل على مر العهود و حيث كل فرد من طفولته حباه الله بحب السودان مهما اختلفت سنوات العمر وتعاقبت الاجيال نحن من احياء متداخلة جمعت على عبد اللطيف وهاشم صديق وعز الدين نصار والكثير الكثير من الابطال وفصص البطولات احياء فى كل شبر فيها ياتيك عبق ملحمة اكتوبر الرائعة وما تلاها وما سبقها من ملاحم ونحن جميعا ملحمة نشانا ولم تخيفنا حبوباتنا بود ام بوعلوا والبعاتى والشكلوته وغيرها مما يخيف كانت قصصهم لنا وتحفيظهم لنا عن ام ضفاير قائدة الرسن نعم كانت جدتى تحفظنا لها وتحكى لنا عن بطولات العازة زوجة على عبد اللطيف ومساندتها لزوجها وحيلها المبتكرة لتوصيل رسالات الثوار لزوجها داخل السجن وتوصيل رسائله لهم كان اطفال العائلة يرسلونهم لسوق الحى ويتاخرون ويرسلونى للبحث عنهم فاجدهم مصنقرين متحلقين حول بائعة الخضار الضخمة ومعها زميلة لها تحكيان لهم عن قصة نساء سوق الخضار مع الخواجة الانجليزى ريد وكثير من القصص البطولية لا زلت احفظها هذا مثال لبيئة واحدة فى السودان فما بالك بكل السودان انى على ثقة ان فى كل مساحة وشبر من السودان قصص نساء حرات ماجدات قالن لهاشم ود عمى صديق هووووووووووووى نحن جايات وللدفرة مستعدات ونحن وهن وهاشم صديق ليكم يا ناس باريس فى انتظار احر من الجمر بص الثورة سخن جد ونريد دفرته من الداخل
الايام دى مجرد كلمة باريس قومت للحكومة قرن يا ربى حيمسحوا كلمة باريس من قوارير عطورهم ؟ الما كانوا بحلموا بيها

[nagatabuzaid]

#1079333 [aburadi]
0.00/5 (0 صوت)

08-14-2014 12:41 PM
دا بص صرته مافيشة كيف يتلز؟
قي الأصل إستوردوه وعارفينو خردة بس عشان نحن نبقى نلز .
نلز شنو ونخلي شنو دي البلد كلها دايرة لز ....

[aburadi]

ردود على aburadi
Sudan [nagatabuzaid] 08-15-2014 08:38 PM
لما بص الثورة يتلز السودان كلوا بتلز بس انت ادى دفرة مع اخوانك ولا تقنط من رحمة الله


#1079248 [ود الرياض]
0.00/5 (0 صوت)

08-14-2014 11:36 AM
شعب وهم رجال ما فيهم فايدة ونسوان اخر زمن انتم تتقاتلون شعرا على جثة هامدة اسمها سودان
يا الله بلا لمة ووسخ معاكم شعة رممممممممممممممممممممممممممممممممممممة .... واخ يا بلد

[ود الرياض]

#1078422 [د الزهجان]
0.00/5 (0 صوت)

08-13-2014 01:31 PM
الاستاذ غير حالته ... ل يشعر بالملل

ليه الاحباط ده ...

[د الزهجان]

#1078144 [الغاضبة]
5.00/5 (2 صوت)

08-13-2014 10:00 AM
هوي يا رجال
هوي ياحريم
هوي يا شوارع
هوي يانيم
ياوِلاد البادية
يا وِلاد أكتوبر
يا شعب أبريل
تعالوا ( النفرة )
لِزوا معانا
بص الثورة .


استاذنا هاشم صديق، معاك دافرين بص الثورة ، تعرف القصيدة دي قريتها كم مرة، بعدد المرات الوصتلني فيها على الواتساب وبعدد المرات النزلوها اخواني واولادهم وبناتهم وصديقاتهم واصدقائي واولادهم وبناتهم في الفيسبوك والكل بغني في غنوة بص الثورة، وبص الثورة خلاص جاهز ونحن مستعدين للدفر يا شاعر الثورة وملهم ثوراتنا من اكتوبر وابريل .... دمت لنا

[الغاضبة]

ردود على الغاضبة
Sudan [nagatabuzaid] 08-15-2014 08:35 PM
تمام يا الغاضبة نحن تب جاهزين وللتعارف فى فى الميدان شعارنا الدفرة بطاقة معلقة فى اعناقنا وبثوب الدفرة محزمات وما خايفات


#1078002 [Fatmon]
0.00/5 (0 صوت)

08-13-2014 08:08 AM
لا حياة لمن تنادي انت قائل السودان فضل فيها راجل عشان يتحقق منانا نحنا جيشنا ما فيه راجل بقدر يرفع راسه ولا يقول بغم ولا عندنا راجل في الشرطة بخدم حق ولا عندنا راجل في الشارع برفع يد اتيتمنا واترملنا والسودان فتناه وروحناه خلاص هيهات هيهات ان نلقاه ولو في الأحلام مافي رجال يزيحوا الظلمة والقتله السفاحين آكلي السحت باسم الدين

[Fatmon]

ردود على Fatmon
Sudan [nagatabuzaid] 08-15-2014 08:27 PM
فى بحثى لقناة اختفت منى حظى العاثر وجدت قناة سودانية قالوا عيد الجيش ولا يوم الجيش ما بعرف د معت عيناى اين الجيش يا حليل الجيش وعيد الجيش ورجال الجيش


#1077747 [ياسر حمد الدول]
0.00/5 (0 صوت)

08-12-2014 10:30 PM
مبدع ثم كما قيل المعاناة تولد العجائب

[ياسر حمد الدول]

ردود على ياسر حمد الدول
United Arab Emirates [عاطف عبد الله] 08-13-2014 11:20 AM
أعتقد أن الأستاذ هاشم صديق تائه وفاقد البوصلة سياسياً ... يا أخي أنت تهاهجم أحزاب قوى الإجماع الوطني والتجمع والقوى والرموز السياسية وتضعهم جميعهم في سلة واحدة ولا تفرق بينهم وبين السلطة التي نكتوي بنارها ، مثل هذا الشعر هو الذي تروج له أجهزة النظام لأنه ينشر الإحباط ويروج لمفهوم لا يوجد بديل .. مصيبة هاشم صديق أنه لم يكن له أي نشاط سياسي ولم ينتمي لأي حزب سياسي ويعتقد بأنه فوق الأحزاب وفوق السياسة ومثله يعتبر وسيلة تفريغ للشعب وهو لا يشكل أي خطر على النظام لذا لم يعرف تجربة الإعتقال .. فشاعر مثل محجوب شريف (شاعر الشعب) أمضى خمسة عشر عاماً من شبابه في المعتقلات ، فكم عدد الأيام التي أمضاها شاعر الملحمة معتقلاً ؟ صفر . لماذا لأنه لا يشكل أي خطر على النظام أو أي ديكتاتورية بل على العكس يخدمها بالتشكيك في القوى السياسية الأخرى التي تضحي وتناضل من أجل الديمقراطية .

سألني أبني المولود في الغربة، عن ما يعنيه الشاعر بـ
تلقى الوطني
ما تلقى خرابة
تلقى خرابة ما تلقوالوطني
وجانا الشعبي يهز ما عارف ...
عجزت عن الرد .. فهل منكم من يتجرأ ويفسر لأبنائنا في الغربة أم نكتفي بالمعنى في بطن الشاعر


#1077720 [سودانى]
5.00/5 (1 صوت)

08-12-2014 09:43 PM
رد على مداخلة الاخ ادم عسكر

ادم عسكر
اهبل واشتر
ريحة كوز
ومعفن اكتر
مرة فى عمرك
جيب ليك بنبر
وفوقو اتكسر
وبى مخك مابرجلك فكر
ومن الانت عليهو اتحسر
وابكى تفاهتك لامن تسكر
ولمن تعقل وفهمك يكبر
فى الما بخصك ما تتحشر
انت وباء الشعب المحبط
انتو تودوا الامة العنبر
لا بتطقعوا لا بتجيبوا
فى ضنب النسوان متحكر

[سودانى]

#1077697 [زاهر محمد أحمد]
0.00/5 (0 صوت)

08-12-2014 08:58 PM
هاشم صديق قامه من قامات الشعر السودانى الأصيل

[زاهر محمد أحمد]

#1077635 [ودالعمدة]
0.00/5 (0 صوت)

08-12-2014 07:20 PM
بارك الله فيك شاعر السودان هاشم صديق والله كفيت ووفييت

[ودالعمدة]

#1077621 [ظلال النخيل /فريد محمد مختار]
0.00/5 (0 صوت)

08-12-2014 06:47 PM
لقد بعثت فينا شعورا ذكرنا بملحمة اكتوبر ...حفظك الله يا هاشم ..أنت عزاؤنا في فقد شاعر الثورة وشاعر البسطاء محجوب شريف ... نرجو منك الاستمرار في قصائدك لايقاظ جذوة الثورة في النفوس المتعطشة لها...

البص حنلزو
وبكرة تشوف يا ود صديق
بشبش ونافع
والمتعافي وباقي الشلة
حنلقطهم واحد واحد
زي الدفيق

[ظلال النخيل /فريد محمد مختار]

ردود على ظلال النخيل /فريد محمد مختار
Sudan [nagatabuzaid] 08-15-2014 08:21 PM
رد على حيدر


يا حيدر ما تسخر امانة ما يقلعوا نافع وانت ماسك فى كرعينوا وعلشان يخلص نفسه من ناس فريد مختار والثوار انت ذااااااتك حيديك رفسة محلك ما يتعرف

United Arab Emirates [hyder] 08-13-2014 12:56 PM
يا سلام عليكم يا طلال و فريد قولتى حتلزو البص وتقلعو نافع ماشااللة عليكم


#1077482 [خالد حسن]
4.00/5 (3 صوت)

08-12-2014 03:33 PM
وبص الثوره كيف يدور
ونحن جارين ورا سيدي وشيخي دهور
كيف يدور ونحن سواقننا ناس غندور ومندور وطرطور
نحن ندفر لاقدام وناس سيدي وشيخي شغالين للخلف دور
بصنا مابدور مادام فينا ناس الدجل والكجور والعسكري الموتور

لك اجمل تحية شاعرنا الخالد هاشم صديق
ورحم الله حميد ومحجوب شريف واطال الله في عمرك لغاية ماتشوف بص الثوره مدور

[خالد حسن]

ردود على خالد حسن
Sudan [nagatabuzaid] 08-12-2014 09:15 PM
لا يا خالد حسن والله يدور بس تلب فوقوا وادفر غندور وشقلب مندور واجدع طرطور والله يدور وانسى ناس سيدى وشيخى وخليهم فى باريس طالقين البخور

Egypt [ادم عسكر] 08-12-2014 07:30 PM
وانت كمان ابدعت يا خالد


#1077440 [الميت مغسة]
0.00/5 (0 صوت)

08-12-2014 02:34 PM
اللزة والدفرلة بس ما بتزحزح الافيال دى لانها ثقيلة الأوزان والدم...داعش والغبراءيمكن تكون فعالة الي حد ما

[الميت مغسة]

#1077396 [حكومة مؤلمة]
5.00/5 (2 صوت)

08-12-2014 01:46 PM
الشاعر هاشم صديق اطال الله في عمرك و ما حرمنا من ادبك الشجاع و انا معاك يا بص الثورة بتين بتقوم انحنا فترنا و جوعنا و متنا و اتهدينا و بشبش قاعد لا بمشي ولا بتزحزح بغير في ركبو و بجدد في شبابو..................

[حكومة مؤلمة]

#1077379 [النقر عثمان]
0.00/5 (0 صوت)

08-12-2014 01:26 PM
حلوه.... لكن ظلمت عزه ،،، عزه بكره بتقيف على رجليها وتلبس احسن حُلة لكن خرطومنا لمن ينضرب كف بجيهو أب عديلات ،،، وتاني ما بتعدل ،،،

التحية لشاعر الملحمة ولو بس كتب الملحمة ما كتب غيرها لكفته

[النقر عثمان]

#1077374 [الضعيف]
5.00/5 (7 صوت)

08-12-2014 01:19 PM
يا جماعة إقترح إنو نسمي بشبش بعد كدا دروقكبا

[الضعيف]

#1077369 [nagatabuzaid]
4.61/5 (9 صوت)

08-12-2014 01:18 PM
تسلم ياهاشم صديق ناديتنا هوى يا حريم نقول ليك هووووووووووووووى نعم تبينا وحاة الله جايات ومعاكم للبص دافرين ربطنا رسينا حزمنا التوب مرقنا حفايا تركنا خدورنا قدنا عيالنا معاك يا هاشم فى الميدان كفينا الحلة اصلها مكفية من يوم حكمونا الحرامية طفينا المنقد كبينا رماده ونحن معاك فى الميدان وتبا تبا لكل جبان واخس واخس على كل جبان والعار العار على كل ***** والله يمين البص يتلز والله يمين الوحل والطين يبقوا كفن لكل عفن من الحاكمين ولكل جدادة من المنتفعين قسما ثسما البص يتلز ورب العزة ينفخ فينا روح اكتوبر وابريل وعبد اللطيف والماظ وباقى الثوار على مر التاريخ ورب العزة البص يتلز ويقوم ويكتسح بلا فرامل ولا رجعة للخلف لمن يكسح كل سجم وكل رماد وكل القتلة والسفاحين وكل الفجرة والسفلة ولصوص العملة وتجار البشر ورب العزة البص يقوم بعزيمتنا وبسرعة صاروخ وبالرفرف يهد كافورى ويصول ويجول بين الفلل وقصور المجرمين وبعون من رب العالمين يا ود عم صديق نحن معاك حريم بانت والموردة والهاشماب مع حريم برى وشمبات وبيت المال وكل المدن ملتحمات وقلنا ليك هوووووووى يا ود صديق نحن جايات معانا الغاضبة ورانياوالمتجهجهة والمقهورة وكلنا من الاغتراب راجعات للنضال وما خايفات تركنا خدورنا جذورنا متينة اصولنا كريمة ورثونا العزيمة وقوة الشكيمة نحن معاك بجنانا معاك

[nagatabuzaid]

ردود على nagatabuzaid
Sudan [nagatabuzaid] 08-15-2014 11:44 AM
مرحبا SESE ترانا متحزمات وليكم منتظرات ما تطولوا افى باريس القعاد

Saudi Arabia [SESE] 08-15-2014 02:14 AM
الله اكبر...لقد وقفت لك ورفعت لك طاقيتي احترما.....

اذا كان هاشم صديق في كفة فأنتي في الكفة المقابلة وبدون مبالغة....

هناك نساء ارجل من رجال وعقولهن توزن بلد ومنهن نجاة ابوزيد......

بس ما تسقطي من حساباتك ناس باريس ديل عضلات تبش وجاية تدف البص معاكم وانتظري بس وحتشوفي كيف يكون الدف.......

Sudan [nagatabuzaid] 08-13-2014 12:51 PM
حسكنيت والغاضبة لكم الف تحية ويا حسكنيت ادم عسكر ما اتلوم ورد لى الجدادة سوداني وليه كل الاحترام ورانيا كان سعت للتابعية ما عيب هى سودانية اصيلة مية المية ومناضلة وماجدة وعزيزة ابية وكل البنات وغيرن من بنات الراكوبة الابيات وان شاء الله بص الثورة يقوم ونتقابل فى الخرطوم ولكن ولكم جميعا اهلى الراكوباب كل الاشواق الاشواق للثورة والاشواق للقاء فى وطننا ونسيم الحرية العليل هابى علينا الاشواق لزيارة احبابى فى كل ركن من السودان الاشواق للوقوف على وادى نيالا وجناين كسلا والتجوال فى جوبا والجلوس تحت نخيل القرير وغشوة نورى الاشواق لدنقلا وديار المحس و الفسحة فى وادى الدليب بكردفان وتقلى العباسية وشمال كردفان والمرور على الابيض وبارا والنهود بلد الاسد الضرغام والعشا فى مينا حلفا بسمك لذيذ وجميل وكل ده بعد الدفره ودفن الكيزان ا ستراحة جميلة فى السودان

United Arab Emirates [الغاضبة] 08-13-2014 09:56 AM
سلام يا نجاة انا ياهو جيت، والله ما مقعدني بعيد الا الشديد القوي .... لكن تراني هنا قرييييبة كلها ثلاثة ساعات بس توصلني البلد وادفر معاكم بص الثورة، بص الثورة الواقفين راجينو من سنين طويلة بندفرو نحن الحريم ... تعالوا معانا يا بت البلد وبت الناظر وبت حبوبتها وكل البنات ...

[حسكنيت] 08-13-2014 09:29 AM
بت أب زيد ..يا قدح الدبكر
ديلا أبوهم ما بتشكر
ماتلتفتى لى ىسودانى ..وآدم عسكر
ديل نعلات ..الخشمو مزفر
أبو العفين..الفوقهم صنقر
=======
وإنتى يا رانيا ما تلوميهم
ديلا واسخة الوسخ الفيهم
بنمروقو ليهم وبنوريهم

Sudan [nagatabuzaid] 08-13-2014 12:31 AM
تسلم يا ابو ريشة وخندفر معاكم البص

Sudan [ِAburishA] 08-12-2014 11:03 PM
* ينصر دينك بت ابزيد.. تسلم البطن الجابتك..والتحية عبرك لكل المناضلات الفضليات في الراكوبة..والخزي والعار لأشباه الرجال...

Sudan [nagatabuzaid] 08-12-2014 09:02 PM
الاعزاء الكرام ادم عسكر تكرم سودانى واحد مسيطيل جدادة تربية كوش
حماية الدين والسيد تسلموا لكن ليه انتوا ظالمين رانيا والسعى للحصول
على التابعية ماهو عيب اوتاكدوا مجرد زوال الكيزان ويصبح الجداد زى ناس سودانى فطيس وضمان مستقبل وتعليم الابناء الجميع برجع يا السيد ده ما شعر ده كلام مرصوص يندفع مع الانفعال اما انت يا سودانى لا رد عليك لانى لا احب الجداد بحات الكوش ولاقط الفضلات الادمية انت خايف مالك قسما قسما البص بتلز وقريب حتبقى فطيسة من هسع ريحة عفن المؤتمرجية طاقة بعد تبقى فطيسة كيف يكون الحال واصبر لينا البص بتلز

Egypt [ادم عسكر] 08-12-2014 07:33 PM
انت القبيح يا السودانى وماك سودانى

Sudan [حماية الدين] 08-12-2014 06:32 PM
رانيا دي انشاء الله تاخد التابعية السعودية متجدعة في المكيفات لكن مهما طال الغيب مصيرا عيشة البعوض والسجم راجياكي يا رنوية

United Kingdom [سودانى] 08-12-2014 04:17 PM
نجاة ابو زيد

انت الزيك ديمة فضيحة
كان فى الشارع او فى البيت
انت بترسمى صورة قبيحة
وبرضى مقصر وماوفيت
مخك فى افكارو شحيحة
زى مخ الغنماية كريت
لو تغتسلى تشيلى الريحة
بى صابونة من غير زيت
بعدها تفهمى منى نصيحة
فهم الاشعار هو خشم بيت

Sudan [السيد] 08-12-2014 04:01 PM
شكرا يا أستاذة انا ما كنت عارف انك شاعرة ومجيدة كمان.. تبارك الله..
بس أحرجت الأخت رانيا لأنها ما ناوية الرجوع وترك الاغتراب لانها تعيش في حلم الحصول على التابعية!!!


#1077362 [جلباق]
0.00/5 (0 صوت)

08-12-2014 01:13 PM
دايما عظيم يا أستاذ هاشم صديق . من دعاية زيت أويليبيا و خلف الله و اللوري التعبان عملت قصيدتك الثورية من أجل الاستنفار و (الى القصر حتى النصر ) كما رددت جماهير الثورة في أكتوبر , لك مني التحية و التقدير

[جلباق]

#1077352 [مفجوع]
5.00/5 (1 صوت)

08-12-2014 01:05 PM
حتماً ستندلع ثورة الجياع يوماً ..
مشكور شاعرنا الكبير هاشم صديق ونسأل الله أن تتحقق بنوءتك في القريب العاجل لتزيح هذا الكابوس الجاسم على صدر الشعب السوداني منذ 1989 ...

[مفجوع]

ردود على مفجوع
[Flowers] 08-12-2014 04:31 PM
إنت بتحلم ساي وحلم الجعان عيش قوم لف شوف ليك شغلة ديل رعايا منتهين الصلاحية ولو بتحلم بثورة أنصحك بإستيراد شعب شجاع من مصر أو تونس أو ليبيا أو حتى الصومال يلة بلا لمة الشاويش إتلما.


#1077350 [شاهد اثبات]
0.00/5 (0 صوت)

08-12-2014 01:05 PM
قصيدة مجيدة فرزت السودان القديم البائس من السودان الجديد الزاهر
يا شعبا تسامي يا حاكى الغمام
التفو فقط حول ابراهيم الشيخ وحزب المؤتمر السوداني وعلم الاستقلال"الاصل"
لمن افك ليكم شفرة السودان القديم دعما لشاعرنا هاشم صديق


قرود بافلوف


نجيكم من الأول حول ظاهرة تشظي وتكاثر الأحزاب والكيانات في السودان

منو القال السودان ما كان فيه حضارة وفكر وبرنامج سياسية قبل ما تستورد النخبة السودانية وادمان الفشل بضاعة خان الخليلي المخستكة من مصر(الناصرية+الشيوعية+ الاخوانجية) والدولة المركزية العروبية الاسلاموية الشوفينية؟؟
1- ترك الانجليز السودان دولة ليبرالية ديموقراطية ودولة مؤسسات وطالبنا السيد عبدالرحمن المهدي السير في طريق الكومونولث وترك مصر ولم يفعلوا ومسخو حتى علم الاستقلال ذو الالوان الثلاث.......
2- طالب الجنوبيين بالفدرالية وهي عصية على فهم الهجين المستعرب و العرب حتى الان-
ما عادا الامارات- ووضع محمود محمد طه مشروع دولة ديموقراطية مدنية فدرالية اشتراكية(اسس دستور السودان-1955)-ويرفضون تسجيل الحزب لجمهوري السوداني حتى الان هؤلاء المنبتين والمشوهين..
3- كانت اتفاقية اديس ابابا 1972 اول مشروع (((سوداني))) ناجح للدولة السودانية وحكم نميري المرحلة بالتكونقراط الحر وأبناء الجنوب الأذكياء وأجهضها الأخوان المسلمين الذين ضل سعيهم في الحياة الدنيا بالمصالحة الوطنية 1978 واستمر اعادة التدوير لنفس الناس حتى الآن...
4- كانت اتفاقية نيفاشا 2005 نسخة مطورة جدا من اتفاقية اديس ابابا و مزودة بدستور ومحكمة دستورية عليا لتحرر السودان من دولة الراعي والرعية والريع والرعاع الى دولة المؤسسات وخرج لها الملايين في الخرطوم -قيامة الساحة الخضراء- وسجل لها 18 مليون سوداني في انتخابات 2010. وخذلهم المهرولون..وتأكدت مقولة حكيم السودان((الشعب السوداني عملاق يتقدمه الاقزام) مشكلة السودان اتشخصت منذ امد بعيد (مركز×هامش) ووضع لها الحلول المكتوبة...بس ناس حقي سميح وحق الناس ليه شتيح ديل قاعدين في راس الناس لحدي هسه وبعقلية اكتوبر 1964رغم قيامة الساحة الخضراء ويدعون الوصاية على الناس

تاني ما يجي زول يرص ليه مشروع ويصنع ليه حزب ويقول السودان ما فيه مشاريع من الاستقلال وما فيه حضارة وما فيه فكر ويعمل فيها مثقف كمان...حيبقى ذى القرود ديل
كيف تصنع شعبا من الأغبياء ؟؟؟

مجموعة من العلماء و ضعوا 5 قرود في قفص واحد و في وسط القفص يوجد سلم و في أعلى السلم هناك بعض الموز
في كل مرة يطلع أحد القرود لأخذ الموز يرش العلماء باقي القرود بالماء البارد
بعد فترة بسيطة أصبح كل قرد يطلع لأخذ الموز, يقوم الباقين بمنعه
و ضربه حتى لا يرشون بالماء البارد

بعد مدة من الوقت لم يجرؤ أي قرد على صعود السلم لأخذ الموز على الرغم من كل الإغراءات خوفا من الضرب
بعدها قرر العلماء أن يقوموا بتبديل أحد القرود الخمسة و يضعوا مكانه قرد جديد

فأول شيء يقوم به القرد الجديد أنه يصعد السلم ليأخذ الموز
ولكن فورا الأربعة الباقين يضربونه و يجبرونه على النزول..
بعد عدة مرات من الضرب يفهم القرد الجديد بأن عليه أن لا يصعد السلم مع أنه لا يدري ما السبب
قام العلماء أيضا بتبديل أحد القرود القدامى بقرد جديد
و حل به ما حل بالقرد البديل الأول حتى أن القرد البديل الأول شارك زملائه بالضرب و هو لا يدري لماذا يضرب
و هكذا حتى تم تبديل جميع القرود الخمسة الأوائل بقرود جديدة
حتى صار في القفص خمسة قرود لم يرش عليهم ماء بارد أبدا
و مع ذلك يضربون أي قرد تسول له نفسه صعود السلم بدون أن يعرفوا ما السبب
لو فرضنا .. و سألنا القرود لماذا يضربون القرد الذي يصعد السلم؟
أكيد سيكون الجواب : لا ندري ولكن وجدنا آباءنا وأجدادنا هكذا
عملياً هذا ما نطبقه نحن في أعمالنا وحياتنا اليومية
نبقى في الروتين خوفاً من التغيير !!!

[شاهد اثبات]

ردود على شاهد اثبات
Saudi Arabia [osmanaboali] 08-13-2014 12:59 AM
ده على فرضية انك واحد من القرود مبروك عليك القرود. نحن ما قرود ولايجوز تشبيهنا بالقرود ولو ماتوحي اليه صحيح القذافي حكم الليبين 43عاما وثار على مدى حكمه ثوار( قرودحسب علمائك)
كثيرة وفي الاخر من بدا شرارة الثورة اهالي الم (القرود) الذين قتلوا في سجن بنغازي ولم يمنع جبروته على الناس من الثورة عليه وهم شعب لم يعرف ثورة على حاكم ليبي وكذلك المصريين في عهد حسني مبارك كان المصريين يعذبون ويغتصبون ويقتلون وامن الدولة السوداني الان بالنسبة لجهاز امن المصريين في عهد مبارك جماعة من الدراويش الطيبين لمدة ثلاثين عاما ولكن ثاروا عليه وخلعوه المقارنة بين البشر غير جائزة شرعا والشعب السوداني ليس جماعة من القرود لكنه شعب واعي يريد بديلا افضل بعد هذه السنين العجاف ولم يرى بديلا جاهزا مقنعا لانه ثار مرتين في مدة22عاما ولم يكون الذي جاء بعد الثورة افضل من الذي قبله ويرى ما حدث في ليبيا وسوريا واليمن حلهم لا يسر احدا وعلى سيرة القرود في مثل من اهل مكةيقول( امسك قردك ما يجيك اقرد منه ) وشكر لك على المعلومات السهلة التي سردتها مع كرهي الشديد للاسلام السياسي الممثل في الترابي ومن تخرج من مدرسته حتى لو انقلب عليه ولصادق والختميةكلهم اساءوا للاسلام باحتكارهم له في اشخاصهم .واخير الله اعز الانسان بالعقل فلا يمكن مقارنته بمن هو دونه


#1077325 [ربش]
5.00/5 (1 صوت)

08-12-2014 12:38 PM
إبداااااااااااع و أيما إبــــــــــــــــــــداع ... تسلم

[ربش]

#1077323 [hassan ali habashi]
5.00/5 (1 صوت)

08-12-2014 12:36 PM
كالعادة شي فوق حد الوصف ووصف تمام للازمه تسلم يارائع وتسلموا انتو نا س الراكوبه

[hassan ali habashi]

#1077314 [Quickly]
5.00/5 (1 صوت)

08-12-2014 12:29 PM
العملاق هاشم صديق ,,, سلمت وطبت

[Quickly]

#1077311 [حسكنيت]
5.00/5 (2 صوت)

08-12-2014 12:27 PM
بص الثورة..داير عمرة
جوة المكنة ...الدخلت فيها
موية المطرة...
وباقى السكرة
الفى رأس سيدى
لا بد تتفك
كان بى شطة ..أو بالعك
أو قولة تك
نحنا بندفر لى قدام
والكمسارى معشق خلف
والجربوكسى الزيتو كمل
إسو فى الكك ككرك
لكن يا هاشم ليهم يوم
إضوقوا المر بى خشم الجك

[حسكنيت]

ردود على حسكنيت
Sudan [nagatabuzaid] 08-12-2014 09:05 PM
تسلم يا حسكنيت اكيد ليهم يوم وقيامتهم بتقوم


#1077293 [ود الشريف]
0.00/5 (0 صوت)

08-12-2014 12:08 PM
القصيدة دي ما بتشبه الشاعر هاشم صديق ابداً .....

[ود الشريف]

ردود على ود الشريف
[SINARI] 08-12-2014 04:53 PM
فسر كلامك مالا القصيده ما بتشبه هاشم صديق هل حصل في زول نسب قصيده لهاشم صديق لو ما عاجباك نحنا نعتبرها قصيده توصف الحال الراهن بحزافيره فشكرا لهاشم صديق والحرب بالشعر اشد ضراوه


#1077279 [الراصد]
5.00/5 (1 صوت)

08-12-2014 11:59 AM
رائع استاذي هاشم... كلمات من عرق الشعب ونبضه... بس (( فاتتك )) سطور كان تصور لينا فيها الزاد الشالوا من فم الغلابة الغرقانين في السيل وودوهو غزة !!

[الراصد]

#1077276 [أبوقرجة]
0.00/5 (0 صوت)

08-12-2014 11:56 AM
يسلم لسانك ياخي .... لكن قريب بنسمع ملحمة أخرى لانتصار الشعب السوداني ..

[أبوقرجة]

#1077271 [فلان بن علان]
0.00/5 (0 صوت)

08-12-2014 11:52 AM
ما أروعك يا ود صديق...

[فلان بن علان]

#1077261 [ود الكوتش]
0.00/5 (0 صوت)

08-12-2014 11:44 AM
الله يديك العافيه يا أستاذ ويحضرك بص (الثوره) لمن يصل آخر محطه

[ود الكوتش]

#1077251 [زعيم الزهاجة]
3.00/5 (1 صوت)

08-12-2014 11:40 AM
بص الثورة اتباع خرد يا حليلو !!

[زعيم الزهاجة]

#1077244 [المتجهجه بسبب الانفصال]
5.00/5 (3 صوت)

08-12-2014 11:34 AM
ان من البيان لسحرا يصف الحال اكثر من المؤتمرات والمنتديات

[المتجهجه بسبب الانفصال]

#1077238 [سوداني]
5.00/5 (3 صوت)

08-12-2014 11:31 AM
اعتقد ان الشاعر هاشم صديق ما قعد للقصيدة دى كويس لانها ما نجيضة لا فى موسيقى ولا فى صور او معانى . .

[سوداني]

ردود على سوداني
Saudi Arabia [نصيحة من تفشجي] 08-12-2014 01:52 PM
هوي ياعمك هوي...والله دي تاني إلا يشوف ليها نار كماين.

Sudan [nagatabuzaid] 08-12-2014 12:39 PM
بالله ؟ عليك الله ؟ كدى ادينا واحدة من عندك تعادل كلمتان من كلمات هاشم صديق وما تنسى الصور والمعانى . وشوية سواسيو حول الجدادة وديك بريالة


#1077236 [Adroab]
5.00/5 (3 صوت)

08-12-2014 11:30 AM
شكراً للشاعر المناضل هاشم صديق اعمل حسابك اوعك يجيك عزرائبل الانقاذ يحصل بيك حميد الا رحمه الله واستشهد واقفاً لا منافقاً أستشهد مكلوماً مثقل باوجاع الفقارا ومشغولاً بحياتهم اليومية

[Adroab]

#1077235 [سوداني]
5.00/5 (1 صوت)

08-12-2014 11:30 AM
اعتقد ان الشاعر هاشم صديق ما قعد للقصيدة دى كويس لانها ما نجيضة لا فى موسيقى ولا فى صور او معانى . .

[سوداني]

ردود على سوداني
Saudi Arabia [ود الركابي] 08-13-2014 08:58 PM
اها وانتا تابع لمنو يازول .. شرطة المصنفات بتاعة قلة الادب ولا شنو . وشايفك عامل ليك .. عصيده .. للاخت نجاة كمان .. طبعأ زي ما انت عارف وانا عارف غالبية حريمنا.. وبحليفته .. ارجل من عشر رجال من رجال الزمن الاغبر ده .. اما استاذنا هاشم صديق طبعأ ماعاوز شهادة من اقزام لانه عملاق كبير جدأ جدأ جدأ وياحليل الزمن الجميل ..

Saudi Arabia [المر] 08-13-2014 01:08 PM
كلامك صاح مابتشبه هاشم صديق شاعر الملحمة -

بص الجن ما حيدور .

Saudi Arabia [فتوح] 08-12-2014 02:38 PM
كلامك صاح ولكن نجض حتة الركبة تمام قال حلج الركبة هههههههههه

United Arab Emirates [جفال الجلابى] 08-12-2014 12:34 PM
هى محاولة بسيطة منه لمخاطبة العامة وعليها يشكر لاننا نعلم من هو . ننتظر محاولتك ومحاولاتنا جميعاز


#1077231 [عبد المنعم]
0.00/5 (0 صوت)

08-12-2014 11:28 AM
هذا فقد عقله .

[عبد المنعم]

ردود على عبد المنعم
[Rebel] 08-12-2014 06:52 PM
* بتقول فى ايه.."فاقد عقله!!"
يا "قوا.."
* غصبا عنك ..و عن "اسيادك"
يا "فاتيه":
* نلزوا غصب..و نجرو كمان
لامن إدور.."إدور" فيكم..قول آمين
* و لامن يوصل..محل "دايرين"
* و إت يا منعم..و يا "ابو النوم"
إت..وهم..يا مجرمين
أسمعا منى,
و حياة بلادنا..وحياة "الشهداء"
و حياة شبابنا..و الله الخلقك:
"عيدانكم" جاهزه..متر..مترين,
قدر ما "تشيلوا!!"..
"تدور" فيكم..
و "تبعبص" فيكم..زى ما "دايرين"
لى يوم الدين.
و يوم "الدين"..حسابكم تانى..
إنشاء الله.
* و قسما..عظما:
زمانكم قرب..شايفنو عيان
و شايفنو بيان.
بس يا "منعم" و يا "ابو النوم"..ويا "التانين":
ما "تتجلعوا"..و ما "تتخشلعوا"
اثبتوا ساكت,
العود بى "جوه"..و "الدروه" وراكم
* وعاد يوم داك
نسانا "تزغرد"..وشبابنا "إبشر"
و نحن نهلل: يا الله..يا الله
كم إنت عدول..
و كم إنت كريم.

++نزيكم و لا كفاكم يا كذبه يا فجره؟!

[ابو النوم] 08-12-2014 01:58 PM
صح كلامك يا منعم


#1077214 [الكجر]
5.00/5 (2 صوت)

08-12-2014 11:18 AM
البص وحلان
وما بتلزا

[الكجر]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

الاكثر تفاعلاً/ق/ش

الاكثر مشاهدةً/ق/ش

الاكثر تفاعلاً/ش

الاكثر مشاهدةً/ش







الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة