الأخبار
أخبار إقليمية
رد الشاعر محمد الحسن ابنعوف على جهاز الأمن بعد مساومتة حتى يصمت
رد الشاعر محمد الحسن ابنعوف على جهاز الأمن بعد مساومتة حتى يصمت
رد  الشاعر محمد الحسن ابنعوف على جهاز الأمن بعد مساومتة حتى يصمت


داير كم
09-05-2014 10:05 PM
رد محمد الحسن ابنعوف لجهاز اﻻمن .... بعد خشو معاهو مساومة عشان اسكت .......

.... داير كم ....
داير كم من اﻻخر كدة جاهزين
ندفع ليك عشان تنطم ...
قول داير كم ...
لساتك شاب ...
والفقر عذاب ...
فى البنك الخزنة وفى الدوﻻب ....
قول ما تهتم ....
قول داير كم ...
عربية وبيت ......
بت ناس نديك ...
مشروع يغنيك من شيلة الهم ....
اتكلم قول
قول داير كم .......
قول داير كم .....
مالك بالطير ......
وحقوق الغير .....
اسمعنا اخير .....
قبالك كم من سيف بتار
سينالو جفير .....
ديل شعب وهم ....
قول داير كم .....
منصب نديك .....
والدنيا تجيك .....
ﻻ تنبح ساى زى نبحى الديك ...
وحنحلف ليك بالسترة
قسم .......
قول داير كم .......
داير كم .....

انا داير كم ...؟؟
انا داير كم
الدايرو كتييييييير
علشان انطم .......

********
يا اوﻻد الدرهم والدينار ...
انا ما ود رشوة .....
انا ما ود شينة ....
و ﻻ ود عار ......
انا
ود الدنقر والدلوكة ....
ود النوبة وود الطار .....
انا ود البرزم فى الضحوية
وساعة العركة مخلف وحاااار ....
انا ود السيف
الهبرو شلية
ود السوط
البقلى قلية
ود البكلح فى الضهّار ......
ود العز الما سمعتوبو
ود الشعب
البقدح نار ........

**********
انا داير كم ...؟؟؟
انا داير شعب
يثور ويصارع
انا داير امة
تعبى الشارع
عشان الفضل
ما ينهار ......
مال الشارع الغربى
وناس خط هيثرو
ومشروع سندس
واب كرشوﻻ
الراحت سنبلة
بين القائد والتجار .......
انا داير تار
تار الماتن فى المستشفى
عشان القسطرة
ما مجان .......
تار الهاجر
قفى عقابو
عشان ﻻ واسطة وﻻ سلطان ......
تار الخﻻ المدرسة
شاااااااااااااااطر
شان ما يربى
تمانية اخوان ......
تار النخل
القلد الموية
عشان واطاتو تكون خزان
والخزان
بقى ما خزان ........
تار ام دوم
وحﻻيب
تارى
ام روابة وتار قيسان .......
تار الشهد اء
الدم الطاهر
دم القسمك
يا سودان .......
تار الصمغ العربى الثروة
تار السكر واﻻقطان ......
تار الترعة
وتار الجدول
تار الصحراء
وتار الغابة
تار المشنقة والميدان .......
تار البلد الكلو حرابة
وكل واطاتو
تبق نيران ......
تار الجامع
وتار الخلوة
تار الشفع
والنسوان .......
تار لمتنا على الصينية
وتار المضيفة
والديوان ......
** داير كم **
شوف ديل بى كم .....
قول يا ود خيرى
اتكلم قول
انا داير كم ......
انا داير عز
لى وطن العز ......
ممهور بالدم ....
وعدالة
تخوجل بين الناس
وحفيرة
ودونكى
ومنبر نم ......
انا داير كم
انا داير
مدرسة للأطفال
ومصانع
تنبح للعمال
تيراب وتركتر
للتربال
انا داير جيش جبااااااار واصم ....
انا داير مجلس للنواب
مجلس حاساب
ووزير بفهم .........
انا داير مسكن للطﻻب
انا داير قاعة
ودفتر
وﻻب ........
شوف ديل بى كم
حنجيب قانون
احكم بالعدل
العين بالعين والسن بالسن
الدم بالدم
لو ﻻزم دم
انا داير دم ........
.........


تعليقات 38 | إهداء 0 | زيارات 26740

التعليقات
#1099182 [كاتب معروف]
0.00/5 (0 صوت)

09-07-2014 01:23 PM
أكان كدي ناس الأمن طيبين وكرماء كقارنة بداعش .... إنشاء الله يساوموني أنا ..... بقول داير مليون دولار.

[كاتب معروف]

#1099126 [dougokoper]
4.00/5 (2 صوت)

09-07-2014 12:12 PM
التحية لي ود أبنعوف..

[dougokoper]

#1099037 [ضفاف النيل]
3.50/5 (3 صوت)

09-07-2014 10:43 AM
يا سلااااااام يا ابن عوف ... يا سلام على قريتي لما تترنم شعر و تنثر درر ... ما نسينا دم اقباااااال

العين بالعين و السن بالسن
و الدم بالدم لو لازم دم
دايرين دم

سلم يراعك ابن عوف ... قطر الندى و النضال .....

[ضفاف النيل]

#1098899 [أبو مصطفى]
0.00/5 (0 صوت)

09-07-2014 08:19 AM
أجمل ما فى القصيدة قولك للجامع وللخلوة ، علشان الكيزان يعرفوا انهم ما على دين

[أبو مصطفى]

#1098799 [ود الناس الزمان]
5.00/5 (3 صوت)

09-07-2014 12:33 AM
داير ارجع من الغربةوانجم
واكل لقمة
واحضر لمة واحضن يمة
وكل انتهازي ينطم
وما اشوف في التلفزيون الضلمة
داير اشوف النور عم بلادي
والظلم والفساد رحل لغادي
من حقي احلم واحلم واحقق حلمي

[ود الناس الزمان]

#1098672 [سوداني]
3.00/5 (3 صوت)

09-06-2014 08:10 PM
الدايرو دا كلنا دايرنو ,,, إلا نديك عصاية موسي عليه السلام...
أي واحد داير يصنع لنفسو بطولات ..

[سوداني]

#1098628 [ياسر ود الدكيم]
4.75/5 (4 صوت)

09-06-2014 06:50 PM
كلام جميل فعلا يدغدغ مشاعر واحاسيس المكلومين .!!!!!!
أها..... وبعد دا ؟ هيصنا وزغردنا وانتشينا وعرضنا ... ثم ماذا يعد ذلك ؟
ينفض السامر ويذهب كل زول في حال سبيله وفي الغد ينسي أى من الذين كانوا منتشيين بالأمس ماحدث وهكذا
دواليك الي أن يفتح الله علي ابنعوف او أى شاعر آخر بقصيده تعيد الذكريات وتهيج المشاعر وتحمس الناس فيقومن يعرضون ويلوحون في الهواء الطلق وهكذا .

ناس المؤتمر الوثني يراقبون كل ذلك بنشوه تختلف عن نشوة عذارى الحي ويضحكون ويقهقهون من سذاجة هذا الشعب الطيب الذى تطربه قصيده حماسيه تجعل شبابه ينطط فرحا وسعاده كما لو ان مراده قد تم...

هذه هي أسلحتنا قصيده حماسيه ...عمود نارى في جريده ... وقفه احتجاجيه هزيله ... الخ الخ الخ من هذه الشاكله رغم ان هذا الشعب العظيم هو المعلم والقائد لكل شعوب المنطقه في الانتفاض وقلب الطاولات فوق رؤوس
أعتي الدكتاتوريات قبل أن يعرف أحد من دول مايسمي بالربيع العربي كيفية الانتفاض علي جلاديهم وقلب الطاولات علي رؤوسهم .

ياشعبنا العظيم ....
ياحرائرنا العفيفات الطاهرات
ياشبابنا البض القوى العنيد

لديكم الكثير من الأسلحه التي لو استطعتم ان تحسنوا اسشتخدامها بحكمه وسلميه أول النهار لن ياتي آخره الا
والبشير والترابي وكل العصابه في قبضتكم وسترون منهم عجبا وهم ينهارون بين قبضتكم وستندهشون كيف كانت هذه الفئران المذعوره تحكم بلد في قامة السودان لأكثر من ربع قرن وستندمون وتتأسفون علي ماضيعتم من زمن
وأنتم صابرين علي سفالتهم .

اقسم بالله العلي العظيم أن جيشكم يغلي كالمرجل متشوقا للحظه التي تهبوا فيها اول النهار هبه واحده في العاصمه وفي كل ولايه تعلنون فيها عصيانكم المدني السلمي ... فقط كل ماعليكم وعلينا هو ان نلزم بيوتنا ولا نخرج منها ابدا حتي ولو أكلنا حبال العناقريب وكلنا لذلك علي اتم استعداد فيلتقط جيشكم الرساله ثم دعوا الباقي عليه وسترون كم سيسي في جيشكم العظيم يخرج ليحنو عليكم.

الخطر كل الخطر علينا سيأتي من السلفيين والموتورين وأصحاب اللحي المحننه والجلاليب القصيره والوجوه الكالحه الذين يعتقدون انهم أولي بوراثه الكيزان فاعلموا ان تطهير السودان بعد انهيار الكيزان ليس بالأمر الهين ولكنه أسهل بكثير من اقتلاع شأفة الكيزان من السودان للأبد.

نعلم أن الثأر عظيم والمرارت لا يستهان بها ولكن نحذر من نوازع الانتقام والبطش عند انهيار الكيزان وكل زول مجهزله عود اللي يمسكو عليهو.

فكروا في كلامي دا والسلام ...
عمكم ود الدكيم
ام درمان - حي الشاطيء

[ياسر ود الدكيم]

#1098438 [المتشائل]
1.50/5 (4 صوت)

09-06-2014 02:30 PM
ابنعوف كوز وصديق لاجهزة الامن كلها وكذا الحال ناس الشرطة مثله مثل خالد التجاني النور وعبدالباقي الظافر وهذا على مسئوليتي...والايام بيننا كان حيين...

[المتشائل]

ردود على المتشائل
United Kingdom [المتشائل] 09-08-2014 02:27 AM
والله رضيتو ولا ابيتو ابنعوف كان منهم حتى اخر مرة التقيته نهاية 2013، ويشهد الله حدث اكثر من موقف امام عيني ايضا يثبت ذلك... وبعدين في حاجة تانية بخلاف المواقف التي شهدتها انو الزول ده كان في ابو كرشولا مع الجماعة ولمن رجع قال انا تبت!! بالله؟ الدليل شنو انو تاب وخلاهم؟؟؟ هذه مشاكلنا اننا شعب نساي وبكرة تجو تقولو لي مادام تاب خلاص.. وببساطة يافالحين انتو سامي وودالفحل وزول ساكت: اسالوهو وقولو ليهو الوداك ابو كرشولة شنو؟..مواقف كثيرة تثبت ياسادة: والله على ما اقول شهيد!!

Saudi Arabia [sami] 09-07-2014 09:29 AM
انت الكوز قال تثبت قال ...تثبت شنو ...انت يا منو زاتو عشان ننتظرك تثبت لينا ولا ما تثبت ...ود ابنعوف اشرف من يتهم بمثل هذا من امثالك...
معلومة ما ليك للجميع
ابرهيم ابنعوف بعد مغادرته للبلاد لدولة خليجية طلبت منه تلك الدولة مغادرة اراضيها لانه شخص غير مرغوب فيه.. ومن ثم تمت استضافته فى دولة مجاورة اخرى لمدة تسعة ايام بعد تفهم ظروفه ومن بعد توفيق اوضاعه فى دولة اخرى...

United States [Wadalfa7al] 09-06-2014 04:41 PM
دليلك شنو ولا اتهام والسلام...انا المتشائل بعرف احسن من أي زول لأني عميق ما ليكم وبقرأ بين السطور كمان (ده لسان حالك بقول كده يا متشائم)

United Arab Emirates [Zoal Saket] 09-06-2014 03:57 PM
الان فقط تأكدنا ان الرجل نظيف .... ما دام الجداد حرقوا الشوغل ده


#1098437 [محمد عبد الفتاح ابراهيم]
5.00/5 (1 صوت)

09-06-2014 02:30 PM
أصـــــــــــــــــــــــــــــلي

[محمد عبد الفتاح ابراهيم]

#1098427 [ود الفاضل]
4.63/5 (5 صوت)

09-06-2014 02:18 PM
ابن عوف الاسد الرزم بطناً جابتك ماتندم ..
عايزة ليها فنان فحل يسهر فيها للصباح ويخرجها بلحن يهز اركان الارض تحت الشرزمة الباغية , وتسجل على الكاسيت لتصدح فى مواصلات المدن والبوادي لعلها تحي قلوبا مهجورة وعشعش فوق شرايينها البوم !!!!!!!!!!!!
ولكن ياإخوة اسمحوا لي بهذه التعريجة ، حضرت مع صاحبي قبل اسبوع مناسبة زواج احد شباب السودان على شابة سودانية ايضا (العريس والعروس من مواليد السعودية ) ، فى احدى قاعات الافراح الضخمة بجنوب الرياض ، وعند الفراغ من وجبة العشاء جلسنا فى القاعة الفيحاء ويمكن للمرء ان يقدر عدد الذين وسعتهم القاعة ( قسم الرجال ) بحوالي الف شخص ، ومثلها فى القاعة المخصصة للنساء ..
التفت لصاحبي وقلت له مارأيك فى الحضور وكأنه قرأ افكاري وماكنت اقصده ، فقال : ارى السودان كله امامي فى هذه القاعة ، والمسالة ليست بالكم بل بالكيف , قلت له تخيل نحن الان فى عطلة نهاية الاسبوع فكم قاعة فى مدينة الرياض وجدة والدمام والمدينة ومكمة المكرمة وابها وخميس مشيط وحائل ... وكم قاعة اليوم فى الكويت العاصمة والجهراء والاحمدي- === وكم قاعة افراح فى الدوحة والشارقة وام القوين وعجمان وابو ظبي .. وكم قاعة فى الدوحة فى هذين اليومين .. وعليك ان تتخيل عدد المدعويين الحضور فى هذه القاعات فى مناسبة كهذه . وقعطا اغلبهم ان لم يكونوا كلهم كما ترى امامك هذه الوجوه النيره من ابناء البلد الاصليين , وبدأ صاحبي يعرفني من على البعد على الجالسين ، اترى الرجل الجالس هناك هذا المدير المالي لشركة كذا وهناك المدير التنفيذي لشركة كذا وهناك المستشار القانوني لمجموعة كذا وهناك الاخصائي الشهير فى مستشفى كذا وهناك المهندس الفحل فى شركة كذا وهناك الاستاذ الجامعي ، وبدأت انا اعرفه على معارفي , حتى كدنا نحصي اكثر الجالسين . فقلت له مارأيك اذا . فقال لي : النتيجة القاتلة هي ان هؤلاء هم صفوة متعلمي السودان فى كل المجالات وهم الذين يفهمون وهم مخرجات التعليم ايام السودان كان سودان قبل ان يتحول اسمه الى ( جمهورية الكيزان) هؤلاء كلهم درسوا من الابتدائية حتى تخرجوا وبعضهم ابتعث الى بريطانيا وامريكا والسويد ولم يدفع مليما واحدا من جيب ابيه .. وخرجوا من السودان بعدما حكمه السمبر وطير الرهو . فتلقفتهم دول الخليج التي تعرف قدر العلم والعلماء فأعطتهم مايستحقون من المال والتقدير ، فصبوا علومهم على ارض الخليج صبا ، فكانت النتيجة هذه التنمية البادية للعيان . قلت لصاحبي يحق للبشير وكرتي وعبدالرحيم حسين ان يحكموا خمسين عاما اخرى مادامت هذه الجواهر خارج ارض السودان.. فقال لي بربك هل ترى فى وجوه هؤلاء من يشبه احدا من الذين يحكمون البلد الان . قلت له كان الطيب صالح عليه رحمة الله على حق حينما اطلق عبارته الشهيرة( من أين اتى هؤلاء) قال لي الطيب صالح ابن بلد اصيل واديب ذو بصيرة فاحصة أطلق هذه العبارة بعدما أمعن النظر فى وجوه السمبر وطير الرهو وقارنها مع افعالهم . فأصبحت عبارته تلك تروح وتغدو مع الجماعة كل صباح جديد. اللهم الخلاص . اللهم اعد اهل السودان لبلادهم فقد عشعش فى ساحاتها البوم ...( مسدار : كعب الزول كان زرع تيرابه وطول منه بكون مأسوف خلاص كراتيب العجول برعنه ..............................

[ود الفاضل]

ردود على ود الفاضل
United Kingdom [عصام الأمين] 09-08-2014 09:10 PM
اخي ود الفاضل ، كل أفذاذ الوطن في المنفى ، بينما تعيش طفيليات الكيزان وعلماء السلطان تتغذى على الشعب الفضل .


#1098407 [ود أمدرمان]
4.63/5 (4 صوت)

09-06-2014 01:55 PM
ياخي إنت رائئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئع

[ود أمدرمان]

#1098389 [الكاره المفسدين]
4.38/5 (4 صوت)

09-06-2014 01:42 PM
يا جماعة الراكوبة وزعوا هذه القصيدة بكل الواتساب و الفيس بوك وإرسال لصديق وعدوحتى يعرفوا الفاسدين ليس كل سوداني همه نفسه (مال و بيت ومجموعة من النساء)
و للأسف الحج من مال حرام وبعضهم يصوم يومي الأثنين و الخميس و بفطر بمال حرام

[الكاره المفسدين]

#1098334 [مراقب]
3.00/5 (3 صوت)

09-06-2014 12:53 PM
والكاركتير المرفق لا يقل روعه عن القصيده فقد عبر خير تعبير عن واقعنا فالحيه للراكوبه والرسام الذى لم نتبين اسمه وقبل كل هؤلاء لشاعر الثوره ابنعوف

[مراقب]

#1098305 [صه يا كنار]
2.00/5 (3 صوت)

09-06-2014 12:27 PM
رائع ود ابنعوف
صاحب القصايد والحروف
قريب بتخضر الصاري والجروف

[صه يا كنار]

#1098280 [ابو رجاء]
0.00/5 (0 صوت)

09-06-2014 11:58 AM
اتونسوا لو الونسه تجيب التار وتكلموا لو الكلام بجيب الفات بس افعلوا لان فى الفعل خيران

[ابو رجاء]

#1098254 [الحلاوي]
3.50/5 (2 صوت)

09-06-2014 11:13 AM
في خضّم الحياةِ وتحتَ وطأةِ الكبت الذي نعيشُه كانَ لزاما علينا أن نُفكِرَ جادين في فّكِ قيدٍ كهذا بطَريقةٍ أو بِأُخرَى ولأنّ الأرضَ باتّت تئنُ مِن أشخاصٍ يعيشونَ فوقها مُتقوقعِينَ على ذواتِهم نائينَ بها عمّن حولهُم لا يكادُ يُسمَعُ لهم صوتٌ أو يُعرَفُ عنهُم خبَر !! ولأنّنا سئمنا تِكرارَ مسرحية الحياة ذاتها كل يوم , إذ لا تغييرَ يُذكَر , ولا جديدَ مُفيدٌ يُشَارُ إليهِ بالبنانِ ويُنظَر ! ولأنّ كُلُ الكونِ خُلِقَ ليعمّل , ليُنتِج , ليُؤثّرَ ويتأثَر.. وكذلِك نحنُ لم نُخلَق لنكونَ تِكراراً لِقصةٍ حدَثت أو عَالةً لا يُرجَى نفعُها كشجّرةٍ يَبُسَت.. خرجنَا مِن ظُلُماتٍ ثلاث وهُدِينا النّجديّن وتُرِكَ لنا القرارُ ونحنُ مَن نختار وكانَ القرارُ الأَمثَل ( إطلاقُ السّراح)

أطلِق سرَاح (خمسٍ) فيك. “سراحَ قلبِك , سراحَ فِكرِك , سرَاح جسَدِك , سراحَ رأيك , سراحَ أيامِك “

قلبُك نقهِ من الأدران , من الضغائن المُتراكمةِ به .. من العُتمةِ المُخيّمةِ على زواياه , مِن عواصِفِ الحُزنِ التي تفتِكُ به مِنَ الأسَى الذِي يُعشعِشُ فيه . لا تجعَل مِنهُ منفًى لماضِيك لمشاكِلِك .. فمشكلتُنا الحقيقيةُ لا تكمنُ في تعرُضِنا للمُشكلات ! مُشكلتُنا : أننا نُعطِي مشاكلنا أكبر من حجمِها ,ننظرُ إليها كأنها امتدَادُ سِردَاب , ولا ننظرُ إليها على أنها ثُقبٌ فِ باب .. نحنُ غالباً ما (نُبالغْ) .
معَ كُلِ انبِلاجِ صُبحٍ وشرُوقِ شمسٍ ضع في قرارةِ نفّسِك أنّ يومّكَ ليسَ كالأمس! وأنّك شخصٌ آخر غيرَ الذي تعَرِف .. إنّ أكثرَ ما يُصِيبُنا بالاكتِئَاب هوَ : أنَنا نُمارِسُ الطُقُوسَ ذاتها دونَ أيِ تغيير كلّيٍ أو جُزئِيٍ حتّى ثُمّ نردِد : سَئمنَا الرُوتين , ملَلنَا العيّش ..وفِي الضِفةِ الأُخرى مِن العَالم أشخاصٌ على خط الفقر ومع ذلك حياتُهم ” كِفاحٌ وعمّل“ و لا وُجُودَ للملَلِ أبداً في قامُوسِهم ..

رغمَ ما يُكابِدُونَ مِن شَظَفِ العيّشِ ومَرارةِ الأيّام وبؤس الحال

أمّا نحنُ فمُترفُون ,والنِعَمُ تلفُنَا مِن كُلِ جانِب والأمنُ يغشَانا مِن فوقِنا ومِن أسفلَ مِنّا ومعَ هذا فـ (العجزُ والكسّل) داءٌ عُضَال استفّحلَ فِي دواخِلِنا فصِرنا نلجَأُ لأبسَطِ الحلُولِ وأسرّعِها هاربينَ منَ التفكير فّارِينَ مِن العمَل , ثُم نشتكِي مِن الفراغِ ولو علِمنا ما يجرُهُ علينَا لشكوناه !! . الفرَاغ :رأسُ كُلِ بليّة فحاوِل تخطِيه , إشغالهُ , ملأهُ بما يعُودُ عليكَ بالنّفعَ في الدينِ والدُنيّا قبلَ أن يوقعُكَ فِي مَصائبَ ومُشكلاتٍ غيرِ محمُودةِ العُقّبَى ! إنّ أبشّع شُعورٍ قد يعترِضُنا أن نشعُر أنَنا شيءٌ زائدٌ مُستغنىً عنهُ ولا معنَى له ولكّنَ الحقيقة المُغيّبةُ عن أذهانِنا والتي لا نستَشِعرُها بسببب مُزاحمةِ أُخرَى سلبيةٍ لها هو/ أنّك لستَ زائدا . أنتَ جُزءٌ من هذا العالم , العالمُ كلهُ يحتاجُك , أهلُك , أصدقاؤك , أُمتُك .. كلُهم بحاجتك , أنتَ (واحد) في نَظرِك ولكنّك(الكثير) في نظرِهم. لِذا لا تنحصِر في غُرفتِك , وتعِش عُمرك في معزلٍ عمن حولك .. وقبلَ ذلك نفسك !! .. صالِح نفسَك ,وقوّمهَا ستجِدُ أنّ العالمَ كلّهُ صارَ وطناً كبيراً وأنّ الحدُودَ ما هِي إلا خطوطٌ رُسِمت على الخارِطة وأنّ رُوحكَ صارت مساحةً شاسِعةً تستوعِبُ العالمَ أجمّع لِذا كُن دائماً السعادةَ لأحدِهم انهض بِه , ادفعهُ ثُمّ الحقهُ وسيرا معاً جنباً إلى جنبٍ نحوَ هدفٍ نبيل افتَح لهُ النافِذةَ ليرى الضوءَ ويملأ رِئتاهُ بالأملِ ويُعاودُ مُزاولةِ الحياة بعدَ أن غَدت في ناظريهِ لوحةً رماديةً باهِتة .. ( ومَن أحيَاها فكأنّما أحيَا الناسَ جمِيعا) . للجُزءِ الخامدِ فِي يسَارِك , للجُزءِ النائمِ مِن عقلِك , للجُزءِ المُحبَطِ بك …أطلِق سرَاحه , حَرر قُيُوده , أعلِن عليهِ (الحياه !

سرَقتنا التقنيّةُ ومُستجدّاتُ العصرِ منّا باعدت بيننا وبينَ مَن لا يفصِلُنا عنهُم سِوى (جدار) ! صِرنا نجِدُ في انعزالِنا الراحةَ والهُدُوء والنأيَ عَن صَخبِ الحياةِ وضجيجِ البَشَر حتى صارت ديدناً لنا مُتناسينَ بأنّ الحياةُ ( مُشاركة) وأنّ مُخالطةَ الناسِ والصبرِ على أذاهُم أمرٌ نبوي بل هوَ خير. أطلِق سراحك , تعايش معَ المُحيطينَ بِك.. أخبرهُم بتفاصِيلك .. اركُل شعورَ الوحدةِ الذي ينهشُ قلبك , ويقضُ مضجعك .. العُزلةُ ليستْ لك .. الكثيرُ هُنا يُحبك , يسعدُ لسعادتك ويُؤرِقهُ حُزنُك .. افتح عينيكَ جيداً وأبصِره .وان خطرَ في بالِكَ أنّ العالمَ كلهُ واقِفٌ ضدّك يُحاوِلُ اسقاطكَ ويسعَى لزعزعتك .. فما ذالكَ إلا خطراتُ نفسِك !! .. الكلُ هُنا مُنشَغِلٌ بأولوياتِهِ ومُهماتِه وليسَ بِك !!.. وانّ تفرّغَ لكَ أحدٌ وثارَ عليّك ليٌحُطَ مِن عزمِك ويُعرقِلَ خطّوَك فولهِ ظهركَ وامضِ قُدُماً في طرِيقك .. لا شيءَ يُعِيقُك ما دُمتَ تعرِفُ ماذا تُريد وتسّعَى لهُ , وتَبغِي الوُصُول.. صُغ رأيك عبّر عنه دُونَ تحيُّزٍ إلى فِئةٍ أو تحرِيضٍ على قِتال ! ولكن كُن على الحِيادِ وبينَ بيّن ! بينَ فِكرةٍ واضحةٍ وصوتٍ مسمُوع وبينَ تَقصّ للحقائقِ وتجنُبٍ للشائعاتِ وإثارةِ للبلبلةِ التِي لا تجلِبُ معها إلا الهيجَانَ الجماعِي ثُم لا مُستفِيد ! .

الحُرية : فتحٌ للأبوابِ وكسرٌ للقيُودِ لتُحلِقَ بذلِك النفسُ في الأُفقِ وتجُوبَ المدَى الفسيح وهيَ راضيَةٌ كُلَ الرِضى عمّا تصنَع , مُطمئِنةٌ له , مأجورةٌ عليهِ – بإذنِ الله – لِذا ضع في حُسبانِك أنّك إن صلُحت , صارَ بمقدُورِك أن تُصلِح (إن أُريدُ إلا الإصلاحَ ما استّطَعت) .

لا تندَرِج بينَ تِعدادتِ السُكانِ كأيِ شخصٍ آخر وإنّما كُن مُندرِجاً في تعداداتِهم مُنفِرداً بينَ عداداتِهم بفِكرٍ وثّاب ونفسٍ حُرةٍ تأبَى أن تكونَ ظِلاً أو أن تحيَا في الظِل !

وأخيراً ..

ثمّةَ فرحٌ ينبثقُ مِن سرادِيبِ الحُزنِ المُعتِمةْ

ثمّة شخصٌ يُحِيكُ لك السعادةَ معَ كُلِ إطلالةِ شَمس ..بحرفٍ ,ببسمةِ ثغرٍ بل بقُرب! ….

ثمّةَ ضوءٌ وأملٌ وفجرٌ آت ( لا تُغلِق كُلَ الطُرقِ المُؤدية إليك) .

[الحلاوي]

ردود على الحلاوي
United States [بت البلد] 09-06-2014 09:16 PM
تسلم يا أستاذ حلاوي : وهو كذلك
ثمّةَ فرحٌ ينبثقُ مِن سرادِيبِ الحُزنِ المُعتِمةْ

ثمّة شخصٌ يُحِيكُ لك السعادةَ معَ كُلِ إطلالةِ شَمس ..بحرفٍ ,ببسمةِ ثغرٍ بل بقُرب! ….

ثمّةَ ضوءٌ وأملٌ وفجرٌ آت ( لا تُغلِق كُلَ الطُرقِ المُؤدية إليك) .
ستبقى كل الطرق مفتوحة باذن الله حتى نصل الى ما نصبو اليه ومن سار على الدرب وصل...
لك كل التحايا النواضر يا أستاذ وللأسرة الكريمة مع كل الود


#1098183 [Awad]
3.50/5 (2 صوت)

09-06-2014 09:41 AM
يا أبن عوف ده مالدايره أنت بس ده دايره كل الشعب المطحون والمسحول والمغبون..ده نالدايره أنت وحاتك ده دايراه عزة المغتصبة والمجلودة والمكلومة وحشاها مهرود فى جنيات سفك دمهم هدرا..ده الدايره الجائع والمات من غير حق علاج والمضروب بطائرات الجلاد..ده دايرنه نحن يوم الحوبة وقت تفيض جموع الشعب نحو القصر وتنصب المشانق فى الشوارع والأزقة وناخد التار..ده الدايرنه نحن وقت نعرض صقار فوق جثث من أذاقونا الأمرين وليس بعيد..ليس بعيد..شكرا د/ أبنعوف فقد أثرت فينا معنى أخذ الحقوق والحساب ولد للكيزان وأمنهم.

[Awad]

#1098181 [ناصر التجانى]
3.50/5 (2 صوت)

09-06-2014 09:39 AM
ربنا يصحي باقي الضمائر النائمة

[ناصر التجانى]

#1098144 [ابومحمد]
2.38/5 (5 صوت)

09-06-2014 07:50 AM
الشعر كان بينفع كان نفع المتنبي زمان ده كلام اوهام والقلتو داير عزم معاه اصرار وداير راجل ياكل النار .

[ابومحمد]

#1098126 [المتغربة]
2.75/5 (6 صوت)

09-06-2014 06:50 AM
ياسلاااااام تسلم

[المتغربة]

#1098125 [الحلومر]
3.25/5 (6 صوت)

09-06-2014 06:40 AM
منفيستو الحساب والقصاص تسلم البطن الجابتك ياباشمهندس

[الحلومر]

#1098115 [ابضلعا حديد]
3.50/5 (4 صوت)

09-06-2014 05:52 AM
اشعلها حتي يغربو عنا هؤلاء الذين جوعو الشعب وجعلو ركل الزيت بي عشرين جنيه هؤلاء مستعدين يعملو كل شئ من اجل الكرسي الذي مل منهم قبل الشعب السوداني .

[ابضلعا حديد]

#1098111 [Kabbashi]
4.91/5 (6 صوت)

09-06-2014 05:07 AM
يا ابن عوف إنت منعش وكلامك طاعم ذي صحن المرارة يوم العيد.

[Kabbashi]

#1098097 [mansour]
3.00/5 (3 صوت)

09-06-2014 03:39 AM
دي مابقدرواعليها

[mansour]

#1098077 [اامنجلك]
4.50/5 (9 صوت)

09-06-2014 02:25 AM
كلمات أقوي من طلقات الرصاص. براءت أمك التي لم تحملك سفحاً وارضعتك كرامة وعزة. وكل التهنية للسودان بابناء مثلك

[اامنجلك]

#1098043 [العمرابي الاول]
2.88/5 (4 صوت)

09-06-2014 12:55 AM
ابنعوووووووووووووووووووووووووووووووووووووووووووووووووووووووووووووووووووف

[العمرابي الاول]

#1098035 [ربع الرطل الملا القزازه]
3.50/5 (6 صوت)

09-06-2014 12:28 AM
كملت الروعة
يا ابن عوف
ديل لو باعوا امهاتهم ما يقدروا يسددوا فاتورتك دى
مع انها ممكن تتحقق فى يوم واحد
حين نتخلص من هذا الكابوس

[ربع الرطل الملا القزازه]

#1098034 [ودالعمدة]
3.97/5 (6 صوت)

09-06-2014 12:25 AM
جعلك الله دخرا للوطن ....جزاك الله خيرا كفيت ووفيت

[ودالعمدة]

#1098032 [nagatabuzaid]
5.00/5 (3 صوت)

09-06-2014 12:13 AM
ان شاء الله الدايرنو نحن ليهم يورينا الله فيهم
ياناس الخرطوم ويا ناس الراكوبة اليوم الجمعة الحاصل شنو ؟؟ حسب ما اخبرتنى من اثق فيها انها فى مشوارها لعزاء عندما وصلوا الشهداء اتت سيارتان احداهما بوكس والاخرى اللورى المقفول بالحديد مليئتان بلعساكر حاملى الدرقات مسرعتان مخترقتان شارع الدكاترة بامدرمان متجهتان غرب ثم اختفتا خمنت هى ان تكونا متجهتان لدار حزب الامة بشارع الموردة ولكن عندما وصلوا شارع الموردة كان هادىء ما فيه شرطة قالت وعندما رجعوا من العزاء عصرا شاهدت الملفحين بالدرقات قرب سجن امدرمان عدد كبير ولكنها مستغربة انهم كانوا فى الممر الضيق بين حائط السجن الشمالى ومبنى مجاور للسجن ويتحركون ببطء دى انا فسرتها بانه استعداد لفض وقفة احتجاجية عنفا او انهم فضوها بحثت فى الراكوبة ولم لاجد الخبر اليقين اشعلوها يا جماعة رياح سبتمبر هابة ستلهبها

[nagatabuzaid]

#1098030 [أبو الحسن الشاعر]
3.47/5 (6 صوت)

09-06-2014 12:12 AM
.. إن من البيان لسحرا .. هذا هو ، والله ، الشعر .. معنى ومبنى .. وليصمت المتشاعرون .. أيدك الله بروح القدس لتنضج أكبادهم .. والحساب بعد كل الذي ذكرت لا شيء سوى " الدم بالدم " .. شكرا لك .

[أبو الحسن الشاعر]

#1098028 [الراجل]
3.50/5 (6 صوت)

09-06-2014 12:05 AM
يا مبدع يا جميل

[الراجل]

#1098027 [خالد حسن]
3.50/5 (6 صوت)

09-06-2014 12:05 AM
ربنا يحفظك ذخرا للثوره انت وشعرائنا الوطنيين

[خالد حسن]

#1098024 [الشايقي]
3.50/5 (6 صوت)

09-05-2014 11:54 PM
تحيه واحترام واجلال ابن عمي

[الشايقي]

#1098013 [Amin]
3.47/5 (6 صوت)

09-05-2014 11:42 PM
رائعة

[Amin]

#1097971 [سودانية]
3.50/5 (7 صوت)

09-05-2014 10:50 PM
عفيت منك

[سودانية]

#1097969 [الحازمي]
3.50/5 (8 صوت)

09-05-2014 10:48 PM
أصيل يا ضمير الأمة
أصيل يا فارس الحوبة
أصيل يا ود النوبة
أصيل يا قاتل النوم لكلاب الأمن

[الحازمي]

#1097952 [ود عز]
3.50/5 (8 صوت)

09-05-2014 10:18 PM
والله كلام يا ابنعوف عافى منك

[ود عز]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة