الأخبار
أخبار إقليمية
إلى مشاعر الدولب..!!
إلى مشاعر الدولب..!!
إلى مشاعر الدولب..!!


09-16-2014 02:11 AM
عثمان ميرغني

بالله عليكم انظروا لهذه التراجيديا المحيرة.. قبل حوالي أسبوع وأكثر قليلاً تابعت في قناة النيل الأزرق (اف ام).. برنامجاً صباحياً شيقاً يقدمه صديقنا البروفيسور عبد اللطيف البوني.. برنامج تفاعلي على الهواء مباشرة، معلوماتي وتحليلي مطعم بأغاني بمزاج البوني المعتق..
لفت نظري في تلك الحلقة اتصال هاتفي من الولاية الشمالية تحدث عن كساد إنتاج التمور هذا العام.. المتصل قال إن أي بيت في الشمالية يزدحم بمئات من جوالات البلح التي لم يعد مجدياً اقتصادياً حصادها فهي لا تفي ولا حتى ثمن جوالات الخيش التي تعبأ فيها..
بعدها بيومين.. تلقيتُ اتصالاً هاتفياً من مزارع بإحدى قرى الجزيرة سرد لي مشهداً مفعماً بالوجع.. قال إنهم باتوا غير قادرين على شراء مطلوبات وجبة طعام واحدة.. لأن حصاد الموسم الجديد لم يهل بعد.. ونفد كل معينهم من مال أو طعام مخزن من الموسم الفائت.. إذا حالفهم الحظ بوجبة فهم لا يحلمون بمثلها بقية اليوم.. وبدلاً من (رزق اليوم.. باليوم) صاروا (رزق الوجبة.. بالوجبة..).
واسمع روايات كثيرة هنا في ولاية الخرطوم – فضلا عن الولايات البعيدة- تستعرض أحوال أسر سودانية باتت غير قادرة على الحصول على الطعام.. يحاصرها الجوع.. أليس هذا منتهى التناقض؟؟
الولاية الشمالية غير قادرة على تسويق محصول البلح لكساد تجارته وضعف عائد بيعه.. وآخرون في ولايات أخرى يتضورون جوعاً ولا يكادون يجدون ما يسد رمقهم..
في أي دولة راشدة.. تتدخل الدولة وبأعجل ما تيسر.. تشتري من أصحاب المحصول الكاسد بما يحقق لهم عائداً مجزياً يشجعهم على الاستمرار في إنتاج التمور.. وتوزعه على الجوعى في الولايات الأخرى.. فتضرب عصفورين بحجر واحد.. (نمير أهلنا ونزداد كيل بعير).. تدعم المنتج في الشمال.. لصالح الفقير الجائع في غيرها من الولايات أو حتى في الولاية الشمالية نفسها..
في أوروبا وأمريكا تدعم الدولة المزارع ليظل منتجاً نشطاً قادراً على العطاء.. وهي تعلم أن دعمه يعني تطوير إنتاجه وزيادته.. ونحن في السودان دولة زراعية في المقام الأول.. فإذا دهست نوائب الدهر المزارع المسكين فلن يجد سوى أن يترك أرضه بوراً ترعاها الحشائش الضالة.. ليأتي إلى الخرطوم يأكل من خشاش الأرض.. بممارسة الأعمال الهامشية.
الدولة لا تفتقر بدعم المزارع المنتج.. بل عدم دعم المزارع المنتج هو الذي يفقر الدولة.. تماماً مثل دفن البذور في الأرض.. لا يفنيها، بل تنمو كل حبة بسنبلة..
ليت الحكومة تأمر فوراً – ولو بالدفع آجلاً- بشراء تمور الشمالية بما يرضي المزارع المنتج.. وتوزعه على الفقراء والمحتاجين في بقية الولايات.. على الأقل من باب (ما نقص مال من صدقة.. بل تزده.. بل تزده) كما أكد ذلك رسولنا محمد ضلى الله عليه وسلم.


التيار


تعليقات 51 | إهداء 0 | زيارات 9548

التعليقات
#1107562 [الكنانى]
0.00/5 (0 صوت)

09-17-2014 09:20 AM
هو زول جعان تجيب ليهو بلح يعمل بيهو شنو والله الا يشدو عرقى

[الكنانى]

#1107398 [Sawt Al Hag]
1.00/5 (1 صوت)

09-16-2014 11:34 PM
يا اخى الكريم .. انسب استثمار وضمان عائدات مربحة هى اقامة مصنع حديث لصناعة وتعليب التمور .. بذلك تكون قدمت فائدة عظيمة للمزارعيين وطلاب العمل والوظائف والبلاد والعباد .. الآن مصانع التمور الحديثة تقوم باضافة حشوة للتمرة مثل الفسدق واللوز وبعض المكسرات الاخري .. يعنى تمور منزوعة النواة .. وداخل التمور المنزوعة النواة يتم وضع اللوز فى شكل حشوة .. او اي نوع من انواع المكسرات المحببة للناس .. و الذين يعانون من السكرى حمانا وحماكم الله .. يستطيعون تناول القليل منها باطمئان لانها قليلة السكر .. و لان وجود ثمرة اللوز داخل التمرة يساعد على تقليل السكر .. اضافة الى صناعة الحليب المخلوط بعصير التمر .. وفى بعض الدول العربية توجد وجبة اسمها فتة تمر .. والشربوت يمكن صناعته وتعبئته فى قوارير من الزجاج .. ويمكن صناعة العديد من انواع حلويات التمور .. وبعد داك تسمع اغنية النخل اتلاقى غنى فى عرس التمور وما تستغرب يا اخى عثمان .. لكن فى وجود ناس زى ديل وا اسفايا .. لعدم اهتمامهم بانسان وشعب هذا البلد الطيب اهله واصله.

[Sawt Al Hag]

#1107341 [عصمتووف]
5.00/5 (1 صوت)

09-16-2014 08:46 PM
ي أي دولة راشدة.. تتدخل الدولة وبأعجل ما تيسر.. تشتري من أصحاب المحصول الكاسد بما يحقق لهم عائداً مجزياً يشجعهم على الاستمرار في إنتاج التمور.. وتوزعه على الجوعى في الولايات الأخرى
اليوم كنت بسوق السمك ب امدرمان ف راعني غلاء كميات الاسماك البايره السرال من هوالطماع الذي يسمسر ف السمك عرضة للتلف كالفواكهة وغيرها انا لا الوم البائع بل التاجر الكبير وزير ولا امير لماذا لا يكون السمك والدجاج في متناول اليد للغني والفقير فكبار رجالات الدولة الهاملة هم سبب طل كارثة يتاجرون في السيخ الاسبيرات اللحوم الرملاالاسمنت كل شئ وليس غريبا قريبا تجدهم اصبحوا حانوتية لدفن الموتي علي الدولة ان تشترية بنصف القيمة وتطرحة في الاسواق وتخيير اي مسئول ب العمل في الحكومة او التجارة ويجب وضع سقف لاموالة ان لا يتجاوزها والا تصادر لكن من يقوم وينفذ ويشرع علي ارض الواقع

[عصمتووف]

#1107332 [بحر مالح]
3.50/5 (2 صوت)

09-16-2014 08:35 PM
يا عثمان صراحة تمور الشمالية الناشفة الشايفنها دى ما بتنافس مع عجوات السعودية والعراق والإمارات والجزائر وما بتنفع إلا لشد العرقى عشان كدة الحكومة لو طنشت عن شراب العرقى التمور دى حتخلص فى يومتهاوبالتالى ترتفع أسعارها،، أو يصدروه للجنوب ووالله تجد الجنوبيين طشمانين قرش ونص طول الوقت لا أبيى ولا جبهة ثورية ولا يحزنون،، الأمريكان عندما تنخفض أسعار الذرة الشامى تقوم الحكومة تشتريها من المزارعين وتكبها فى البحر مكان صيد الأسماك كغذاء فتنتج ضعف كمية الأسماك فى الحالة العادية،، إذا المسألة مسألة تفكير وخيال لكين تلقى دة وين مع الكيزان الجنهم المال والنسوان والغلمان وبعدين مشاعر الدولب بتاع شنو عشان تفهم فى الحاجات دى،،

[بحر مالح]

ردود على بحر مالح
United States [هميم] 09-17-2014 02:29 PM
لا تحض الحكومة على شراء شيء ورميه في البحر فهؤلاء الكيزان قد أدمنوا على ذلك منذ زمن النميري. وهاهو صهيوني الكيزان أسامة داوود يسكب اللبن على الأرض حتى لا ينخفض سعره وهناك من الكيزان من يسكب الكثير من السلع ا لتموينية في البحر دون نصيحة منك حتى تحدث الندرة ويرتفع السعر


#1107299 [سؤال برئ]
5.00/5 (1 صوت)

09-16-2014 07:20 PM
يا جماعة الخير بالله عليكم الرجاء مراجعة النصوص جيداً قبل الدفع بها للنشر وبالذات في ما له علاقة بالمقدسات كالخطأ المتمثل بطباعة حرف الضاد بدلاً عن الصاد في كلمة(صلى) الواردة أعلاه في معرض الصلاة على الصادق المصدوق في نهاية الموضوع.

[سؤال برئ]

#1107281 [هميم]
5.00/5 (1 صوت)

09-16-2014 06:50 PM
الذين يزرعون البلح ستواجههم حوالي عشرين نقطة جباية حتى يصل البلح إلى سوق أمدرمان. مما قد يرفع سعر البلح إلى عشرة أضعاف تكلفته الأصلية وأعتقد أن عثمان ميرغني يعي تماماًأن الحكومة لن توقف نقاط الجبايات التي يسرق القائمين عليها الإيرادات من المزارعين لأن الحكومة تعتقد بأحقية هؤلاء الحرامية في الحصول على "قروش يعيشوا منها" وإن كان بالسرقة فالكيزان الذين يسرقون المليارات ليسوا أفضل من هؤلاء القائمين على نقاط الجبايات والحكومة موافقة على هذه السرقات وإن خرج المزارعين من السوق.... لذلك لم يكلف عثمان ميرغني نفسه أن يطلب من الحكومة إزالة هذه النقاط الجبائية التي ستخرج المزارعين من السوق وستخرجهم يوماً ما إلى الشوارع بثورة قد تنتهي بسحل البشير وزمرته - ثورة لا تبقي ولا تذر وأسأل الله أن يكون ذلك قريباً. لكن عثمان محق في أن يتمنى ... يتمنى أن تدرك الحكومة حقيقة (ما نقص مال عبد من صدقة) ... يا خي في حرامي يؤمن بأن المال لا ينقص من صدقة؟ ياخي الحكومة تجتهد لتمنعنا الرزق الحلال وتحض عسكري المرور على السرقة من التسويات الفورية فيرتشي ويأكل الحرام بتشجيع الدولة له على ذلك ... فهل يمكن لمثل هذه الدولة أن تشتري البلح بسعر تشجيعي وتوزعه على الجهات الجائعة في البلد.. وهذا الجوع نفسه هو ما تجتهد الدولة لترسيخه في أركان البلاد الأربعة يا أستاذ عثمان ... فأفهم .. لاأسكت الله لك "قلماً"

[هميم]

#1107255 [الصوت]
5.00/5 (1 صوت)

09-16-2014 06:20 PM
والله كويس (( تمر الشمالية )) الظهرك على الراكوبة ... عشان كده اديتك (( لايك )) ... يعطيك العافية ...

[الصوت]

#1107153 [ود الجزيرة]
5.00/5 (1 صوت)

09-16-2014 04:09 PM
كان ياما كان في قديم الزمان ..والله قبل الانقاذ كنا نحن ناس الجزيرة مبسوطين ناكل وتاكل بلد بحالها من خيرها الي ان جاء البروفسيرات ودمروا الاخضر واليابس .واتغيرت حياة البشر والدنيا غبشت واستوطنت الامراض وصار الهزال شعارا لكل شي الناس الحيوان الشجر الحجر (قولو معاي انشاء الله كل واحد اخنقو عضم وبي عملية ما يطلع ) قال بروف آل.

[ود الجزيرة]

#1107101 [Kamal Nasir]
5.00/5 (3 صوت)

09-16-2014 03:16 PM
الحكومة لا ترفع حجرا إلا بعد التأكد من العائد السياسي والأمني من ذلك.

[Kamal Nasir]

ردود على Kamal Nasir
United Arab Emirates [RED] 09-16-2014 06:00 PM
المــــــــــــــــــــــــــــــــادى أولا" !!!!!. وصدقت القول يأبن عمى.


#1107081 [Gashrani]
4.75/5 (4 صوت)

09-16-2014 02:53 PM
خليهم يفتحوا الإندايات وشوف بعد داك بيفضلوا كم شوال؟ عصير بلح يعني وكده.

[Gashrani]

#1107071 [Kudu]
4.50/5 (4 صوت)

09-16-2014 02:44 PM
يا اخوي نحن ناس الجزيرة ما بنحب التمر الناشف ده ممكن تمرة واحدة في إفطار رمضان نحن مشكلة الجوع بنحلها في كل السودان بس ابعد جماعتك من مشروع الجزيرة

[Kudu]

#1107034 [elfatih yagoub]
5.00/5 (2 صوت)

09-16-2014 02:08 PM
ومين تطلع مشاعر الدولب دي؟ بلد الناس كان بتفتخر وتنادي بزروق والمحجوب والطيب صالح والفيتوري اصبحت تناجي البشير والبشكير وعلي عثمان وكمان جابت ليها مشاعر دولب؟ دي اول تشوف حسبو نسوان يحل ليها مشكلتها وبعدين تجي تحل مشاكل المحتاجين. فعلا هانت الزلابيا

[elfatih yagoub]

#1107026 [ابو اشرف]
5.00/5 (3 صوت)

09-16-2014 02:03 PM
ناس الجزيرة ديل ما ليهم 40 سنة بضرب فيهم الموسم وزراعتهم تكلفتها عالية مش نخيل واقف لا داير حش لاسقاية !!!!!!
ولا ده ترويج لممارسة التعويضات !!! وبعدين ناس دارفور ديل مش فقدوا محصولهم ديل فقدوا ارضهم ذاتها !!!! حقو الزول العامل فيها كاتب يكون مدرك لكل الابعاد وكل المآسي عشان ما يتهم !!!!!

[ابو اشرف]

#1107014 [Clicker]
5.00/5 (1 صوت)

09-16-2014 01:47 PM
هي الفكرة جميلة إن كانت الحكومة ( أصلاً) تهتم بالإنسان لكنها عكس ذلك تريد إفلاس المزارع ليس في الشمالية فسحب إنما في كل مناطق السودان, ومن الجهة الثانية تريد من الذين يتضورون جوعاً أن يموتوا لترتاح منهم.فهي في الحالتين تريد أن تتخلص من الإثنين.

[Clicker]

#1107011 [Mat too]
5.00/5 (1 صوت)

09-16-2014 01:43 PM
الأستاذ المحترم عثمان يا أخي الحمدلله علي سلامتك من الجبناء الخثيثين الذين استهدفوا شجاعتك في محاربة الفساد ولكن يبدوا الجماعه خلوك تعيد الحسابات يعني(حمار حي أفيد من اسد ميت)..صحيفة التيار فقدت جراتها وتميزها وأصبحت كاخوات كان
التهكم علي الإسلام و نعت الإسلاميون بالفساد خطاء وجرم كبير ولكن لشي يعلمه الله سلط علينا من لا يخافه وكمثال وليس الحصر المتعافي المتعفن والخضر المتحلل حتي ازكم انوفنا بالعفن و ثالثهم الفرعون الشاذ ايلا المتعفن في جسده وهلم جرا....
عندما اختلف اللصان ظهر السارق أي عندما اختلف الفرعون وقلة عقله ايلا اختلف مع نائبه البلدوزر الفحل الزاني محمد طاهر ورد اسمك قالوا أكلت السلات وأكلت السمك واستلمت المعلوم.يعني عديل كده قبضته. صحي الكلام ده،، كان صحي اتحلل ،اتحلل أو قول حاجه
الأستاذ عثمان لك وجهت نظر لماذا لا ينظر إليها بموضوعية بدل ساقط الكلام. ماتزعل بل فكر....

[Mat too]

#1106998 [تينا]
5.00/5 (1 صوت)

09-16-2014 01:28 PM
اقتراح جميل أستاذ عثمان تشكر عليه ليتهم يسمعونك و يعملون به لكن للأسف من مصلحتهم أن يجوع الناس وينقرضوا ويخففوا عليهم!

[تينا]

#1106997 [خليل عزة]
2.50/5 (3 صوت)

09-16-2014 01:25 PM
مالم تتبراء من الحركة الاسلامية ومن الكوزنة المدسوسة ومن الانقاذ ومن الكيزان

في بيان صريح ما فيهو اي دغمسة ...

ستظل عثمان مرغني الكوز الانتهازي النفعي الذي اجرم في حق هذا الشعب وفي حق هذا الوطن مهما انتقدت الحكومة..

والسلام عليكم ورحمة الله تعالى وبركاته..

الرسالة دي تاني ح تلقاها في كل مقال .... حتى حينه

[خليل عزة]

#1106984 [المغبون]
5.00/5 (2 صوت)

09-16-2014 01:10 PM
ارجو من بعض الاخوة المعلقين ان ينظروا للموضوع ويعلقوا عليه بغض النظر عن كاتبه لانو الموضوع هو الذى يهمنا والنوايا ما يعلمها غير الله التحطيم مالو داعى وما بفيدنا بشئ .

[المغبون]

#1106982 [zorba]
3.00/5 (4 صوت)

09-16-2014 01:09 PM
ديل ناسك وأنت عارفهم أكلت وشربت معاهم دي سياستهم من أول يوم. أنت دوبك عرفت الحقيقة ... صحي المهندس لما يشتغل صحفي بفهم زي الحمار الحكو ليهو النكته وفهمهما تاني يوم. لو عرفت المعلومة دي الليلة ما فرق بينك وبين بتاع الاورنيش الما دخل مدارس لأنو عارف المعلومة دي قبلك بل هو أفضل منك.
صحفي سياسي يعني تحلل الوضع قبل حدوثه بفترة و تنبه الناس للنتائج التي سيؤول له حال البلد في حال استمرار هذه السياسات الفاشلة. بصراحة طالما إنت بتعرف المعلومات بعد ما عرفها المواطن البسيط العادي إنت مهندس فاشل و صحفي أفشل ممول من الكيزان لتمثل معارضة وهمية واعتقال وهمي "خلايا نائمة".

يعني من مقالك دا قصدك يجيبوا تمر الشمالية و يوزعوا وجبات علي كل مواطن في الجزيرة وجبة مكونة من تمرتين وكوب ماء ودا بالنسبة ليكم رفاهية. إنتوا كلاب سعرانة جات الخرطوم جعانة و لسة فاكرين البلح وجبة رفاهية لمواطن.

مفهوم رفاهية المواطن بمفهوم الصحفي الفاشل = وجبة من تمرتين لكل مواطن.
من أين آتي هؤلاء؟ بلا يلمك إنت و أسيادك يا شحاتين "إنتوا ست الشاي و الوداعية سرقتوهم صحي كلاب جعانة سعرانة شبعت بعد جوعة".
شوف قروش الصحفية بتاعتك دي جات من وين حتعرف ليه المواطن في الجزيرة ما لاقي وجبة. و الجواب بتاع المقال دا ما عند الناس الجواب عندك ولو عرفت الكرسي القاعد فيهو دا جاء من وين عتعرف إنو ما داعي للمقال دا و كفاية تمثيل.

[zorba]

#1106952 [عمر عابدين - الدوحة]
3.69/5 (7 صوت)

09-16-2014 12:48 PM
تحية واحتراما
صراحة دي مرحلة فقع المرارة (دا طبعا للناس اللسة عندهم مرارة)
والله البيقرا كلام عثمان ميرغني يتاكد تماما من نفاقه
عثمان ميرغني وامام عينيه يتم ابادة جنائن السيد علي الميرغني المصادرة من قبل منظمة الشهيد .. ويتم بيعها حطبا للكماثن .. وهو شاهد على اشجار اعمارها تزيد عن مائة سنة يتم قطعها .. اشجار مانجو .. اشجار يوسفي .. وقريب فروت ونخيل ... بالتاكيد تزوق طعمها عثمان ميرغني ... وهذه الجنينة المثمرة تبعد من منزلهم مرمى حجر ... ولم يكتب سطرا واحدا في ذلك .. وبالرغم من ان كثير من اهالي القرية طلبوا منه التطرق للموضوع ولكنه صمت ،، والغريب ياتي ليتحدث عن كساد البلح في الشمالية ... اتق الله يا عثمان ،،،، فانت لا تكتب عن الحق انما تكتب باجندة خبيثة ،، تكتب بنظرية الحق الذي يراد به باطل ،،،،
فنحن نعرفك اكثر من غيرنا ...
وحديثك عن الجرائد الحائطية في منزلكم ... هذه فرية و محاولة لتجميل صورتك الحقيقية ،، اما الجرائد الحائطية التي نعلمها كانت بنادي الخليلة واذكر تماما وانا طفل حادثة تمزيق الجريدة الحائطية لكونهم افحموك بالحجة ولم تكن لديك حجة سوى تمزيق الجريدة الحائطية لانك ضعيف الحجة ولا تقوى على فطاحلة الحرف والحجة من ابناء الخليلة الشرفاء الانقياء ... بلاش رسم صورة غير مطابقة للاصل (انت تعمل صورة فوتوشوب)
فاصلة اخيرة
قال زراعة قال
ضع القلم

[عمر عابدين - الدوحة]

#1106950 [ابو الزيك]
3.00/5 (4 صوت)

09-16-2014 12:47 PM
والله قمة الاسف ...الصحيفة يطلع عليها كثير من القراء العرب والاجانب...لايستقيم ان تكتب عنوان وفى صلب الموضوع لا تشير اليه..ولو عرضا..لكن شكلها الجلدة الاخدتها جابت راسك...بقيت ترمز من بعيد...الكتابة الصحفية مسؤلية....اذا لم تستطع القيام بها ...اتركها فهناك من هو اشجع منك ولا يخاف فى الحق لومة لائم

[ابو الزيك]

#1106929 [كفاية]
3.00/5 (5 صوت)

09-16-2014 12:35 PM
( فإذا دهست نوائب الدهر المزارع المسكين فلن يجد سوى أن يترك أرضه بوراً )

ما هي نوائب الدهر التي دهست المزارع ؟ اليست هي حكومتكم الرسالية التي ارهقت المزارع بالعوائد والضرائب والزكاة والديون والشراء بثمن بخس دراهم معدودة وفوق كل ذلك تدمير مشروع الجزيرة اكبر المشاريع المروية في العالم
نعيب زماننا والعيب فينا

[كفاية]

#1106922 [saif]
5.00/5 (1 صوت)

09-16-2014 12:31 PM
ياناس ياوهم عثمان اسلامى اوغير اسلامى اداكم حل لى مشكلة وانتو ولا هنا لعنة اللة عليكم شوفو ليكم حل..فكروا .. افهموا مش واقعين فى الراجل شتايم يااااابجم

[saif]

#1106917 [المشتهى السخينه]
5.00/5 (5 صوت)

09-16-2014 12:27 PM
ياتو حكومه ياعثمان تشترى المحصول وتوزعه على الجوعى والفقراء ؟..اوع يكون حكومتنا دى ؟ ياراجل اختشى ..انت نسيت انها حكومة ( اسلاميه ) ؟

[المشتهى السخينه]

#1106898 [ملتوف يزيل الكيزان]
3.00/5 (3 صوت)

09-16-2014 12:10 PM
يا استاذ مثل هذا الكلام لو صدر من جاهل او اجنبي كنا لقينا ليهو العزر، اما ان يصدر منك و انت العارف الكفتة فيها كم رزة ، يبقي يصح ان مثل كلامك دة يقوم دبرة في الدبر.نفاق حتى دخول القبر ، يالمتغابي . ياريت لو ناس حمزة كان استعملوا معاك الخازوق.

[ملتوف يزيل الكيزان]

#1106896 [ساهر]
5.00/5 (1 صوت)

09-16-2014 12:08 PM
أيضاً الجشع هو أحد الأسباب الخفية لتضور المواطن جوعاً. هناك ألف من التجار والمزارعين في الشمالية والجزيرة ومنطقة القضارف والحواتة ومختلف بقاع السودان المنتجة ممن يخزنون القمح والذرة والبصل والتمور انتظاراً لارتفاع أسعارها وتحسباً لأي نكسة خريفية متوقعة (خريف فاشل).... فلو استعان هؤلاء بالله واخرجوا مخزونهم الضخم لرتع السوق وشبع المواطن وانخفض السعر ولحمدنا الله.........

يجب أن تتدخل الحكومة في هذا الأمر، ليس بالتفتيش على المخازن وضرب أصحابها وسحلهم وسجنهم، بل بشراء هذه المنتجات بأسعار مجزية من هؤلاء المواطنين الجشعين........

هناك من يخزن أكثر من ألف جوال ذرة، فلو افترضنا أن هناك ألف شخص مثله فهذا يعني أنه هناك أكثر من مليون جوال ذرة معرضة للاتلاف والإصابة بالتسوس في رقعة جغرافية صغيرة لا تتعدي أكثر من ثلاثة محليات.

[ساهر]

#1106860 [النميرى]
5.00/5 (3 صوت)

09-16-2014 11:47 AM
يا جماعة علقو على الفكرة واتركو النقد الشخصى ، ودى مشكلة السودان الاساسية المشكلة فى الانسان السودانى وليست فى الاحزاب ولا فى الحكومات فشل على مر العهود من كل الحكومات ومن كل الاحزاب

[النميرى]

#1106856 [كتاحة امريكا]
5.00/5 (3 صوت)

09-16-2014 11:46 AM
في أي دولة راشدة.





لكن في دولة الكيزان غير كدا

[كتاحة امريكا]

#1106853 [وراق احمد]
5.00/5 (2 صوت)

09-16-2014 11:44 AM
نحن مشكلتنا كلنا بقينا حكام ونبحث عن الاخطا شنو رايكم نغير شوية ونبقي لاعبين ونبحث عن اهداف .

[وراق احمد]

#1106842 [ماجد]
5.00/5 (2 صوت)

09-16-2014 11:36 AM
ياخي معظم المعلقين عندهم انفصام في الشخصية و شخصيتهم العلقت دي شكلها قرت مقال تاني

دا مقال ذكي و كل كلمة في محلها و اقتراح في غاية الجمال
لكن المرضى النفسيين ديل دايرين ينتقدوا لمجرد اﻻنتقاد

غايتو عثمان ميؤغني جدف لكن القبول من الله

[ماجد]

ردود على ماجد
Sudan [رامبو] 09-16-2014 06:59 PM
هسي في داعي يا ملتوف لي الفاظك الزي وشك دي
لعنة الله عليك الموقع دا بخشوا اسر و ناس محترمين ما كلهم تربية شوارع زيك

Sudan [ماجد] 09-16-2014 04:32 PM
يا انا سوداني اهو ملتوف دا اكبر مثال للانفصام الحاد في الشخصية و انصحوا يعرض نفسو لي اقرب طبيب نفسي

الغريبة انو اقتبس ردي كلو و بعد دا تعليقو ما عندو اي عﻻقة بالموضوع و زي ما قلت الفراخ دي جابا من وين الغبي دا

غايتو نحمد الله نحن بس علينا نستحمل العاهات دي المفتكر انو كان كتب تفووو على الكيزان دا معناها كمل النضال

Sudan [انا سوداني] 09-16-2014 03:50 PM
غايتو سبقتني نفس تعليقي يا اخ ماجد ما عارف الناس ديل علقوا على ياتو المقال
المقال في وادي و هم في وادي
و يا اخ ملتوف ممكن توضح شنو الدخل اكل الفراخ في تعليق ماجد انا قريت التعليق مرتين و ما لقيت ذكر لي موضوع الفراخ دا انت جعان وﻻ شنو
والله شكلك برضو معلق على حاجة تانية و منفصم

Libyan Arab Jamahiriya [ملتوف يزيل الكيزان] 09-16-2014 02:42 PM
كتب المدعو ماجد الاقتباس ده:
"ياخي معظم المعلقين عندهم انفصام في الشخصية و شخصيتهم العلقت دي شكلها قرت مقال تاني

دا مقال ذكي و كل كلمة في محلها و اقتراح في غاية الجمال
لكن المرضى النفسيين ديل دايرين ينتقدوا لمجرد اﻻنتقاد

غايتو عثمان ميؤغني جدف لكن القبول من الله "

انا شخصيا الماجد ده ما عاجبني ، ليه؟ لانو نئ عديل كده و اكتر زول بشبهو حسين خوجلي و الظاهر بيتفاعل مع اسحاق الشين. غايتو جنس تعرصه. و بياكل فراخ من وين وهو العاطل عن المعرفه والخبرة.وشوف كمان كلمة (المرضى النفسيين). يعني كمان ركتني بداءها وانسلت!!! ......... و عينو قوية.


#1106840 [تهارقا]
5.00/5 (5 صوت)

09-16-2014 11:34 AM
يا عثمان كنت شديد الاحترام لما تكتب رغم انك جبهجي الي ان قلت في عبدالرحمن الخضر "وال لايظلم عنده احد" وهذا لو قيل في احد العمرين لكان علي قائلها الاستغفار فما بالك في وال
ينام معظم الناس في ولايته علي ظلامة ويستىقظون علي مثلها اسال الخضر من اين له بمزارع تربية المواشي هلا جلس في بيت ابيه ويري ان كان سيقتني مثلها ياعثمان هؤلاء يشهد الله لايعباؤون بمن مات جوعا او بقي حيا ياعثمان يوميا تترسخ قناعتنا باننا يمكن ان نتقرب الي الله بدم هؤلاء والله اصبحوا عبيدا للبشير ولشهوة المال الحرام الهم لاتذهب الانقاذ بل اعنا وقو سواعدنا علي ازالة الانقاذ

[تهارقا]

#1106826 [ابوغفران]
5.00/5 (4 صوت)

09-16-2014 11:24 AM
ياعثمان خوفك من مصادرة جريدتك بعد طبعها قد يبرر هذه المقالات السازجة التى تكتبها , ولكن السؤال هو : هل انت مدرك لذلك ؟ّ! .

[ابوغفران]

#1106823 [sudan]
5.00/5 (4 صوت)

09-16-2014 11:19 AM
كلامك جميل يا استاذ لكن انت برضو حركه لااسلاميه بس جناح تانى وكلكم على بعضكم وسخ فى عفن . وللعلم هو كبار المستفيدين من هؤلاءالعصابه اى سفره سايقنو واى اجتماع داعينو وظرفو بره وانا صراحه كرهت السودان لانكم فيهو ليس من جوع ولو لقيت اسرائيل احسن لى منكم يا عفن على الاقل هى دوله كافره وواضحه لكن انتو منافقين يعنى بتهدمو من الداخل لعنة الله عليكم يا عفن

[sudan]

#1106817 [كمال الهدي]
5.00/5 (1 صوت)

09-16-2014 11:13 AM
فكرة برضو!!!!!!

" الدولة تشتري التمر ولو بدفع آجل" وتطعم بيه مزارع فقير في منطقة اخرى!! هو ليه يكون في مزارع فقير أصلاً وما لاقي ياكل لو كان في دولة أصلاً؟!

برضو دايرين من ناس بثينة شعبان يتعرفوا على المكنون الثقافي السوداني يا شباب الراكوبة ودايرنهم يعرفوا أكثر عن بلدنا قبل ما يكتبوا عنها!!!!!!!!!!!!!!!!!!!!

[كمال الهدي]

#1106800 [سيف الله عمر فرح]
5.00/5 (3 صوت)

09-16-2014 10:50 AM
استاذ عثمان ميرغنى ، لا يختلف عن حسبو ، غندور ، مصطفى عثمان ، مهدى ابراهيم ، بدرية سليمان ، و ............. ! . هم جميعآ يجيدون لحن الكلام ، وعايشين فى عالم آخر غير عالم المواطنين ! ، ويتقمصون أدوارهم فى سلطة هى لله هى لله ، بجدارة سلبية ، غير مستساغة ! . والمواطن يدرى أن سلطتهم لمصلحة العصبة الحاكمة والمنافقين وآكلى الفتات ، وليست لله كما يزعمون ! .

أفلا يدرى أستاذ ميرغنى مبلغ الضرائب التى يدفعها مزارع الشمالية مقابل النخلةالواحدة إذا كانت مثمرة أو غير مثمرة ؟ .. يا استاذ عثمان مزارعى الشمالية مش عايزين دعم من الحكومة ، طلبهم بسيط جدآ ، هم مش عايزين يشوفوا وجه الحكومة بتاتآ !.. أفلا تدرى أن المزارعين هم الذين يدعمون الحكومة بالضرائب المباشرة والغير مباشرة فى الجازولين وقطع غيار وابوراتهم، ومن انتاج مزارعهم، ولا يجدون خدمات تذكر من الحكومة ؟ .. أفلم تسمع قولهم ( تلت للطير ، تلت للزبير ، وتلت للوابور ، والمزارع فاعل خير ) ، السياسة الضريبية للحكومة لم تتغير من زمن المرحوم الزبير محمد صالح ، ساءت الى درجة أسوأ مما كانت عليها .

يا أستاذ عثمان أنت عايش فى برج عاجى ، لا تدرى شيئآ عن معاناة المزارعين فى الشمالية ! ، لماذا لا تكلف صحفيآ من صحيفتك لتقوم بمهمة مسح على الطبيعة من أقصى جنوب الولاية الى أقصى شمالها لتعرف معاناة مزارعى الشمالية ، بدل أن تستقى معلوماتك من إذاعة أف أم !! .

أستاذ عثمان ميرغنى ، هل حصل زرت مناطق حلفا سكوت المحس ؟ .. هل تدرى أن محلية المحس هى المحلية الوحيدة المحرومة من كهرباء سد مروى فى الولاية الشمالية حتى تاريخ اليوم ، وأن عذر الحكومة أقبح من ذنبها ؟ . هل تدرى أن شيوخ وشباب من محلية المحس تم اتهامهم وفتح بلاغات ضدهم بإزعاج الحكومة لمجرد صرختهم ب ( عايزين كهرباء ، عايزين حقوقنا من ايرادات التعدين المليارية فى الولاية ) بعد مرور عام من تاريخ صرختهم ؟ ..

يا أستاذ عثمان ميرغنى ، نتمنى أن تتشرف أنت وبعض صحفيى جريدتك بزيارة منطقة حلفا سكوت المحس ، لتعرفوا الركن الشمالى فى السودان على الطبيعة ، لكى لا تكتبوا عنه من إذاعة الأف أم ، ولكى لا تحسبوا أنها مناطق جرداء ، كما زعمت أنت فى مقال من مقالاتك ! .

[سيف الله عمر فرح]

#1106787 [سيف الدين خواجة]
5.00/5 (2 صوت)

09-16-2014 10:41 AM
يا عزيزي بمنتهي البساطة اصحابك هؤلاء لا يعرفون معني قيم الدولة ولهم في ارث الديمقراطية الشئ الكثير وقالها لهم التيجاني الطيب ولكن هم الان بين سندان جمع الفلوس باكثر مما تيسر ومطرقة الدفاع عن الفشل !!!

[سيف الدين خواجة]

#1106769 [مدحت عروة]
5.00/5 (4 صوت)

09-16-2014 10:25 AM
انت ماك عارف يا عثمان ميرغنى السودان من يوم 30 يونيو 1989 اى استيلاء الحركة الاسلاموية السودانية على السلطة السودان ما ضاق عافية ابدا؟؟؟؟؟؟؟

[مدحت عروة]

#1106759 [النوباوى]
5.00/5 (1 صوت)

09-16-2014 10:13 AM
لماذا كل التعليقات سلبية

الرجل قال فكرة مفيدة وصالحة

شنو سلبية التعليقات هذه

[النوباوى]

ردود على النوباوى
[إسماعيل آدم محمد زين] 09-16-2014 04:25 PM
تعرف يا نوباوي قلت ذات الفكرة في إحدي اللجان التي ناقشت قانون مشروع الجزيرة لسنة 2005 - حيث نادين بدعم الزراعة وقد فوجئت حين تصدي لي رئيس اللجنة (لجنة سياسات الأراضي أو حاجة زي دي ) و هو يحمل درجة دكتوراة ! قال" مافي دعم للزراعة في العالم !)" و حسب معلوماتي أميركا تدعم الزراعة و كمان صناعة الحديد الصلب! يعني مافيش فايدة!!


#1106727 [الحاج]
5.00/5 (2 صوت)

09-16-2014 09:43 AM
عثمان ميرغتي يا خي اختشي انت تخاطب شافعة اسمها مشاعر
ياخي خاطب ابوها احمد الدولب
بطل استهبال واقتراحات وانت عارف البير وغطاها

[الحاج]

#1106701 [bullet ant]
5.00/5 (4 صوت)

09-16-2014 09:19 AM
لا توجد دولة توجد عصابة حقيرة فكيف تناشد من كان سبب البلاء لرفع البلاء
عثمان ميرغنى الكوز كائن طفيلى لا يستطيع الابداع او الابتكار وانت واحد منهم فاعفنا من سخفك وتلونك الحربائى واعتذر عن قلمك الماجور

[bullet ant]

#1106690 [المشروع]
5.00/5 (4 صوت)

09-16-2014 09:03 AM
يقول المثل اثنين لو قالو ليك راسك ما فيك : اتبنو؟ يا عثمان ميرغني ان محتاج الى اعادة صيانة انا بقولك هذا الكلام ليس شامت ولا شاتم ولكن حقيقة انت محتاج الى اعادة تأهيل .. انت بتكتب كلام "اي كلام"

[المشروع]

#1106688 [//ahmed//]
5.00/5 (5 صوت)

09-16-2014 08:59 AM
ي اخى عثمان ... إنت مصدق لسة عندك دولة وكما فيها وزير بشتكوا له ؟ لا اقصد دولة بمعنى ارض وكيان فالسودان دولة عظيمة بأهلها الطيبين ، ولكن الشىء الذى اريد ان اقولة أن الدولة تقوى بحمكة من يديرها دولة ممثلة فى حكومة راشدة ، هؤلاء أناس قاصرين ومنعدمى الرؤية افقدونا معنى الدولة ورعاية الشعب، تفكيرهم لا يتعدى بطونهم وفروجهم، وانتمائهم المتشدد الضيق فى دائرة الأخوان المتأسلمين ، هل مازلت مصدق اخى /عثمان .. أنك تشتكى لأناس راشدين ، هؤلاء قاصرين امتلكوا من البلد ما يسد شهواتهم من ملبس ومسكن فخيم والزواج بمثنى وثلاث ورباع وانظر لهم هل أنا اتيت بشىء من عندى ؟! ، ومن صفاتهم أنهم كثير فيهم البطر الأشر ، يتمشدقون بالحديث نفاقا ورياء ، ويقولون ما لايفعلون ، وانت تتحدث عن تمر الشمالية كأنه لم يتبقى لنا إلا تلك بيع تلك التمور . يا اخى/عثمان ، السودان كل شبر فيه من البشر والحجر والمطر والشجر فى ركود وكساد ... أعتقد أنك اشتكيت لهذه البنت اعطيتها اكبر من مقامها ... هؤلاء سقطوا فى عين الشعب ... فقدوا الثقة بالكلية وهم اصلا ليست أهلا للثقة ، ولكنهم متشبثين بحكم انقضت صلاحيته انهم يديرون البلاد لتدوم لهم النعم وليست هدف انجاز مغشوش آخر .... السلام عليكم يازول ..

[//ahmed//]

#1106664 [الجموعى]
5.00/5 (5 صوت)

09-16-2014 08:34 AM
انت الطقة حقت العصاية دي زغللت بيك ... حكومة شنو البتشتري تمر وتوزعه وداد بابكر تشتري بيت الشيخ مصطفي الامين من وين ناس مرضي الكلى ماتو ببطء البلد كلها تنهار اقتصاديا وعلميا واجتماعيا ويا حسرة اخلاقيا ونقول حكومة هوفي طين حسبنا الله ونعم الوكيل حسبنا الله ونعم الوكيل

[الجموعى]

ردود على الجموعى
Qatar [mmm] 09-16-2014 09:29 AM
صدقت اخي

لحين ترجع .....تظل الطقة مفعولها ساري....


#1106651 [osama dai elnaiem]
5.00/5 (3 صوت)

09-16-2014 08:05 AM
أخي الاستاذ/ عثمان -- لك التحية-- برضك مصر تقارن دولة المشروع الحضاري باوربا وامريكا الكافرة ( الشيطان الاكبر) -- يأخي الانقاذ (اخوانجية الهوي) صناعة حسن البنا وسيد قطب و( عك) الترابي والبشير لا تقارن بدول لها عقل تحمد ربها علي نعمته وتستخدمه فيما ينفع البلاد والعباد في تلك الدول والتاريخ القريب يحدثنا عن جماعة الاخوان يتسببون في ايام حكومة الصادق في ندرة السلع ومنع وصول شحنات القمح والسكر من الخارج لاسقاط الحكومة--- خليك من المقارنات باسرائيل وامريكا واوربا لاننا نخاف علي سلامتك عزيزنا الغالي.

[osama dai elnaiem]

#1106643 [Haj Ahmed]
5.00/5 (7 صوت)

09-16-2014 07:46 AM
اخوانك ديل ياعثمان استكتروا علينا الاغاثة الرسلوها العرب لمنكوبي الفيضانات قاموا سرقوا جزء والباقي حولوه غزة. نحن بنعاني نقص الادوية والكادر الطبي واخوانك برسلوا قوافل طبية لغزة. نحن بنموت من الجوع والمرض واخوانك برسلوا طائرات لاجلاء جرحى الحرب من اخوانهم في ليبيا. الناس عايزة تنسى دا كولو برسلوا ليهم الجنجويد يقتلوا، يسحلوا، يغتصبوا والويل لمن يناديهم بالجنجويد.
لا ادري هل ماتكتبه سذاجة منك ام ماذا

[Haj Ahmed]

#1106618 [هدهد]
4.88/5 (4 صوت)

09-16-2014 06:37 AM
يا استاذ لو الدولة لها مثقال ذرة من السياسة الرشيدة والشفافية لما وصلنا الى هذا الدرك الاسفل من الانحطاط الاقتصادى والاخلاقى ، المزارع هو ركيزةالاقتصاد وهو الشخص المنتج وهو الذى ينمى اقتصاد الدولة ويبعدنا من شبح الذل والهوان المزارع هو العامل الرئيسى للحفاظ على قوة اقتصادنا ومحاربة ارتفاع الدولار الامريكى واستقرارا الاسعار ونمو التجارة لكن من يعى ومن يعمل !!؟؟ موظفى الدولة تركوا العمل العام ودخلوا الاسواق واسسوا الشركات والمصانع واصبحوا من اكبر رجال البزنس بعد ان طردوا المواطن من السوق واعتمدوا على التفنن فى الجبايات وكيفية سرقة اموال المواطنين برسوم ومسميات ما انزل الله بها من سلطان .... هؤلاء هم حكام الغفلة الفاسدون واولئك رؤساءهم ووزرائهم الكبار يتنافسون فى البزنس والكل اصبح يعمل لصالح نفسه واسرته فمن اين ينصلح حال العباد ؟؟؟؟؟ من خدعنا بالدين انخدعنا له فقد خدع هؤلاء المنافقين الناس بأنهم رجل دين ولكن سرعالن ما عرفناهم رجال دنيا وثروة وسمسروا وتاجروا بالدين وفسدوا وسرقوا وباعوا ممتلكات الوطن واصبحت الدولة تعيش برزق اليوم باليوم وكل صبح جديد تجد جبايات جديدة وغلاء طاحن فى الاسعار . هؤلاء هم المنافقين فعلا لعنة الله عليهم فهم فى الدرك الاسفل من النار فقد أذاقوا العباد شر البلاء والظلم .

[هدهد]

#1106599 [طوفان]
5.00/5 (3 صوت)

09-16-2014 05:28 AM
انك كمن يحرث في البحر . وهنالك مثل مصري يقول ( هي الحداية بتفرق كتاكيت ؟) الحدية (الحدأة ) هل توزع كتاكيت ؟ فالحكومة يا اخي مثل الحدية تخطف بس ولا تعطي احد هؤلاء اوصلوا المزارع الي مرحلة اليأس لكثرة الجبايات وقلة العائد حتي يتخلي عن زراعة الارض فتباع للمستثمرين من خارج السودان ثم الم نسمع ونقرأ عن عمليات حرق آلآف اشجار النخيل في الشمال تلك الحرائق الغامضة . لم يعد السودان جاذبا للمستثمر لكثرة المخاطر وظهور اشكاليات الارض واتجه الي دول اخري كاثيوبيا . وبالامس قرأت خبرا عن اتجاه سعوديين للزراعة في روسيا

[طوفان]

ردود على طوفان
[مازيل تنيبور] 09-16-2014 10:44 AM
الصحيح ( هي الحداية بتفرخ كتاكيت)

Saudi Arabia [محمدين] 09-16-2014 09:41 AM
الحدية (بتفرخ) وليس (بتفرق) كتاكيت: تفرخ يعني يعني بالعربي كدا بتلدكتاكيت


#1106585 [الشايب]
5.00/5 (3 صوت)

09-16-2014 03:40 AM
الموضوع اقتصادي بحت ، والاقتصاد مات من جهل اقتصادي بحت ، لأن نظرية سمعتها من كبيرهم بأن (المال مال الله) وهذه عبارة مخيفة ربما نورد المتفكر فيها إلى التهلكة. هل أعطى الله أحداً منهم مالاً ليوزعه على هواه ؟!! لم اسمع على مر العقود أحداً جبهجياً (منذ ايام الاقتصاد الاسلامي والمرابحة وغيرها) يفتي في أمر الاقتصاد إلا بمقدار ما يؤخذ من عباد الله والمنتجين من ضريبة وزكاة الخ أما كيف ينتج المال ويزيد فهو بالصدقات (اي بالدفع) منه وهذه حقيقة مقدسة ولكن أين المال نفسه ؟ وكيف يشجع الاسلام على اقتناء المال وهو زينة الحياة الدنيا فليس من مجيب ؟ أحل الله البيع وحرم الربا والبيع نفسه في السودان (في تلتلة) لأن من شروط البائع أن يكون جبهجياً حسن الصوت والهندام وغارقاً في أيديلوجية (المال مال الله) !! الاسلام أقل الديانات تدخلاً في الربح الحلال ولا يفرض عليه سوى 2.5% من الربح فّاذا بالبائع والصانع في السودان تصل ضرائبه إلى 45% (أي شراكة عديل) من أولي الأمر. لو أن النظم الاسلاموية أدارت بيوت المال دون سياسة للتمكين واستخدام الآية الكريمة ( واعدوا لهم ما استطعتم من قوة ومن رباط الخيل ...) في غير موضعها لكنا أغنى أغنياء الشعوب!! فالمال عندنا يكنز لحماية النظام ولا تترك فيه (تعريفة) طائرة لأي مسلم حقيقي غير جبهجي !! فلماذا لا نجد من يشتري البلح في الشمالية ولماذا لا نجد في أكبر منطقة زراعية في السودان وجبة من العصيدة والويكة والسلطة ؟!! ولماذا نجد بروفيسور في الزراعة لا يملك ما يشتري به دكوة وبصل وطماطماية وعجورة ؟!! من يخطط لدولة بأكملها بعبارة (المال مال الله) لا يخاف الله !! لأن الله عز وجل أعطى الناس الحرية في أن يسعوا في الأرض فكيف تمتلئ هذه الأرض بالجبايات وتفانين (قلع) المال من أصحابه بحجة التمكين والحماية ومحاربة المسلمين ؟!! تلك عبارة أطلقها كبيرهم دون علم بالاقتصاد لأنه قضى عمره كله في (غش) الناس باسم الدين كما قال الرئيس وهو (منه) أمام الخلق في يوم من الأيام. لكن المال الذي يجبى على حساب الضعفاء وعلى أيد ملطخة بالدماء والفساد وتنعدم فيه قوة الشراء ويتشري معه الحسد والظلم ليس بمال الله ، إنه مال حرام. وخلط المال الحرام بالحلال يخسره كما يعلم ويقول الفقهاء. اللهم اصرف عنا المال الحرام وانصرنا على الجهلاء وأصرفهم عنا وأصرفنا عنهم بجاهك يا من تقول كن فيكن. قولوا آمين.

[الشايب]

#1106579 [البشير جلدنا ما بنجر فيه الشوك]
5.00/5 (3 صوت)

09-16-2014 03:13 AM
الحكونة وضعت اتاوات علي عاتق المزارع ومصادرات بلغت 30% من المحصول ومكنت شركات بعينها باسم الخصصة لطفيليين امثال علي الحاج الذي ارسي عليه عطاء رش المبيدات لمدة سنتين دون احضار برميل اندرين واحد واخيرا اتي بمبيد منتهي الصلاحبة الذي سبب الامراض لاهل الجزيرة كل ذلك يحسم من الانتاج لصالح مثل شركات رش المبيدات و التقاوي الفاسدة واتت بوزراء لصوص همهم الاول الاغتناء علي حساب كل البلد مثل المتعافي وغيره كثر..

[البشير جلدنا ما بنجر فيه الشوك]

#1106576 [Abuahmed]
3.88/5 (5 صوت)

09-16-2014 02:48 AM
الأذان فى مالطا يا أستاذ

[Abuahmed]

#1106575 [أبوالزفت]
4.88/5 (10 صوت)

09-16-2014 02:46 AM
ياخي إنت طيب طيبة , ديل حيشتروا التمر بخسارة المزارعين و يودوهوا غزة , سودانيين شنو كمان الياكلوا تمر .. ياكلوا السم

[أبوالزفت]

ردود على أبوالزفت
Saudi Arabia [عبداللة عبداللعزيز طلب] 09-16-2014 12:06 PM
مافى احسن من الكلام القلتو ياابو الزفت شكرا لك.

Canada [الدنقلاوي] 09-16-2014 03:14 AM
يا حليل الزمن القبيل قبل الإنقاذ ,, التمر الجديد مضيفة وتحلية وقراصة والتمر المسوس - زي ركب رئيسهم - نشربوا ... لعن الله الإنقاذ



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة