الأخبار
أخبار إقليمية
أمانة عليك.. قصيدة جديدة للشاعر/ ازهري محمد علي
أمانة عليك.. قصيدة جديدة للشاعر/ ازهري محمد علي



10-01-2014 12:59 AM
أزهري محمد علي


ياتايه الخطي
أمانة عليك كم في الخط
خطاوي علي الوجع عديتافي السكة المشيتا غلط
شعائر إقامتها وصليتها
لا نزلت عليك خيرات
لا أخضرت مشاعرك قط
وكم في الخط
رهاف قاموا الولاد الهجعة
لطاف مرقن بنات الوجعة
لعبن )ليا ( جنب الخط
وقعدن يشخبتن في الرجعة
رسمن في الغمام لوحات
ملامح لي وطن طيب
ونكران ذات
وبت في غيمة بتمشط
براحات الغنا الواسعات
وكتبن فى الهوي وشطبن
تلات تسعات
اتمغي البحر في الميعة
واتحين سحاب العينة
في لهات التراب نقط
منقط كان أمام الغفلة
منقط من هنا وهنا ملقط
ناااعم والكلام طاعم
يبين تحت التبن ارقط
ينوم فوق الجرح منحل
يقوم ذي الحبن في محل
دحين يااورطة كيف الحل
وكم في الخط
مفخخة خطبتو الملغومة
تشيلها تصلحا الحيكومة
تصديق كضبتا الموهومة
تزيد في غيها وتنحط
نزيد في غينا وننحط
غيبوبة دوار السلطة
والهوس العلينا هبط
سكرانة المنابر طينة
سكرانة المداين الهايصة
واشباح القري المسكينة
سكران التراب والموية
السهلة ودواهي الغابة
أحزاب الهوي الكضابة
والحيكومة وقفت لط
شتات والسامر انفضى
شتات كان نابا كان نرضي
مرقنا ودمنا اتفرق
ولد شايلنو للايام
مسك شارع المطار شرق
لمحنا
و ذى خبر عاجل
ذي رفة حمام زاجل
يامنسلي من ضلف الضلام في الليل
تعال بالباب أكان راجل
واركز اوعي تدرق
من القبلي السحابو ربط
من العبادي يوم ينصرا
في وش السماء وينمط
وكم في الخط
أمانة عليك ياوطن الكرام
أسمعنا ليه اشمعنا
نحن مرقنا قدمنا الشعوب الحرة
في درب النضال ورجعنا
نحن نزلنا لي آخر درك وطلعنا
أجمل من ملائكة رحمة
فجينا الضلام ولعنا
قلنا الجاتنا في وليداتنا
جات أن شاء الله تنفعنا
نحن بكينا يوم بيت القزاز جدعنا
لا ادتنا الشوارع عين
لاصابت نفوسنا اللعنة
علمناك عناق اللهفة
والحرف البرود المعني
علمنا الثبات والوقفة
وعلم نصلك المسموم
يعلم فجة الطعنة
وكم في الخط
خلاص تاني المطر شالت
خلاص تاني المطر ختت
بركة وخير وبركة أخير
براك يالاهي سميتا
براك فتحتها الخيران
علي الناس الطلع زيتا
كمل رايا وفلت من ايدا رأس خيتا
علي الهملة
وقطعت الرأس
وقع في راسها رأس بيتا
هاياريتها
لو شافوك في النيابات
مشمر في الوحل جيتا
وجيدن يامطر جيتا
وجد ليها البلاد بالجاتا
جلابة الجن والجنادب والجراد
وجلجلة الجلالات والجنود والجنجويد
نبدي ونعيد
كل السماحات روحت
خلتنا لي بأس الحديد
كل المصائب في أمان
هل من مزيد
هل من مزيد
هل من بوادر رجعة للماضي البعيد
هل من قصائد اومكائد اومصائد
تاني للدقشو الصعيد
ياعالي المقام طالت عليك الكرسة
والجوك في الضلام
سرقوا المباهج خلسة
تشكي وتستغيث
إلا البحس ماحسا
مات جلدو اندبغ
ماظن يحس بالقرصة
نتاح الضرس المابتحلو الجرسة
يديك السهر ويقعد يتاورك لسا
داريهو الوجع بين اللسان واللثة
والداير القلع احسن تلخلخو هسا
قبل الطير تقوم يالمابتعرف الخسة
في الطابور تنود
تدقس تنوم في الحصة
غايتو علي العموم خلصت خلاص القصة
مات بطل الفلم وطلعت حبيبتو اللصة
وقمنا انصرفنا علي عجل
ساسقنا بين ساسا ويسوس
ونحن امتحنا بلا خجل
وسقطنا في كل الدروس
كم من لصوص حايمة بتلوص
ودونا لي آخر درك
باعونا بي وسخ الفلوس
كم من نفوس خانت نفوس
بيناتا قاسم مشترك
طافت علي نار المجوس
حاولنا نتفادا الشرك
وقعنا في فخ النصوص
قاتلنا في غير معترك
دهستنا غارات البسوس
وكم في الخط
أمانة عليك يابلد السماح سامحيني
مجبور مرقتك من ضراي
في الليل يجهجهك السقط
ريح العوارض تلفحك
من أيدي تمشى سقط لقط
وأمانة عليك كم في الخط.




تعليقات 14 | إهداء 0 | زيارات 6424

التعليقات
#1119638 [أبو مهند - دبي]
0.00/5 (0 صوت)

10-02-2014 11:05 AM
أستاذ أزهري يا رائع
أنت دائماً كما عهدناك رائع وأروع من الروعة
كل عام وأنت بألف خير والشعب السوداني
ودمت

[أبو مهند - دبي]

#1119106 [meo]
0.00/5 (0 صوت)

10-01-2014 02:35 PM
ياسلام يازول يارائع متعك الله بالصحه والعافيه

[meo]

#1119105 [ابو السباع]
0.00/5 (0 صوت)

10-01-2014 02:32 PM
الله يديك العافية

[ابو السباع]

#1119090 [ابو فاطمة]
0.00/5 (0 صوت)

10-01-2014 02:08 PM
كم من نفوس خانت نفوس
بيناتا قاسم مشترك
طافت علي نار المجوس
حاولنا نتفادا الشرك
وقعنا في فخ النصوص
قاتلنا في غير معترك
دهستنا غارات البسوس
وكم في الخط

كلاام زي الورد يسلم قلمك ايها الرائع

[ابو فاطمة]

#1119087 [Mohammed]
0.00/5 (0 صوت)

10-01-2014 02:03 PM
نهر النيل
عاشق السودان
*************


رائع جداً الله يديك العافية ياهو دا الحال والحل شنو ؟ الخلخلة ولآ القلع ؟ في ظني القلع أخير .

[Mohammed]

#1119021 [البريد السريع]
0.00/5 (0 صوت)

10-01-2014 12:43 PM
ربنا يخليك لينا يااستاذ يامبدع

[البريد السريع]

#1118985 [هاجر]
0.00/5 (0 صوت)

10-01-2014 11:54 AM
رائعة جدا

[هاجر]

#1118895 [زول ساكت]
0.00/5 (0 صوت)

10-01-2014 10:09 AM
هولب لب كم في الخط
وكم في الباردة اتوسد
وكم سطر انفط
متين ترحل بلاوينا وصلنا الحد
ونكسر حواجز الخوف وكم في الخط

[زول ساكت]

#1118859 [bady nogod]
0.00/5 (0 صوت)

10-01-2014 09:39 AM
استاذ ازهري متعك الله بالصحه والعافيه ودمت زخرا للوطن الجريح

[bady nogod]

#1118843 [M.A.Y]
0.00/5 (0 صوت)

10-01-2014 09:20 AM
نتاح الضرس المابتحلو الجرسة
يديك السهر ويقعد يتاورك لسا
داريهو الوجع بين اللسان واللثة
والداير القلع احسن تلخلخو هسا
قبل الطير تقوم يالمابتعرف الخسة
في الطابور تنوم تدقس تنوم في الحصة
غايتو علي العموم خلصت خلاص القصة
مات بطل الفلم وطلعت حبيبتو اللصة


جميلة ومعبرة والداير القلع احسن تخلخلو هسا

[M.A.Y]

#1118834 [الحلومر]
0.00/5 (0 صوت)

10-01-2014 09:06 AM
غايتو علي العموم خلصت خلاص القصة
مات بطل الفلم وطلعت حبيبتو اللصة
وقمنا انصرفنا علي عجل
ساسقنا بين ساسا ويسوس
ونحن امتحنا بلا خجل
وسقطنا في كل الدروس
كم من لصوص حايمة بتلوص
ودونا لي آخر درك
باعونا بي وسخ الفلوس
كم من نفوس خانت نفوس
بيناتا قاسم مشترك
طافت علي نار المجوس
حاولنا نتفادا الشرك
وقعنا في فخ النصوص
قاتلنا في غير معترك
دهستنا غارات البسوس
وكم في الخط
أمانة عليك يابلد السماح سامحيني (لله درك يارايع وانطبق عليهم المثل جا يكحله عماها)

[الحلومر]

#1118831 [حسكنيت]
0.00/5 (0 صوت)

10-01-2014 09:02 AM
يا سلام عليك ياخى

[حسكنيت]

#1118800 [ود يوسف]
0.00/5 (0 صوت)

10-01-2014 07:50 AM
مبدع كما عهدناك دائماً ...

[ود يوسف]

#1118788 [Quickly]
0.00/5 (0 صوت)

10-01-2014 06:51 AM
ياسلام رائعة

[Quickly]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة