الأخبار
أخبار إقليمية
شغلك .. نضيف
شغلك .. نضيف


10-28-2014 11:26 AM
كمال كرار

هل رأي أحدكم بأم عينيه قطاراً يمر علي خط السكة حديد من الخرطوم لوادمدني طيلة 20 عاماً خلت ؟،الإجابة نراها في بيوت السكة حديد ومنشآت محطات القطار علي طول السكة،والتي تهدمت وانهارت بعوامل (الإنقاذ )والزمن. ومع ذلك فإن المصنع الذي ينتج (الفلنكات)الخرصانية،عازم علي تغيير الفلنكات الخشبية علي طول طريق القطار (المختفي)،أضرب الفلنكة الأسمنتية،في سعرها الخرافي،ثم اضرب الناتج في عشرات الآلاف من الفلنكات الجديدة التي ستحل محل القديمة لتحصل علي الملايين التي ستدفعها السكة حديد(الداقسة)للمصنع (المحظوظ). مثل هذه الأشياء يقال لها باللغة العامية شغلك (نضيف)،وهو تعبير لا يحتاج لشرح من قاموس عبد اللطيف .

ومن الشغل النضيف أيضاً أن تتعاقد مع أي جهة عندها مؤتمر أو ورشة عمل،لجلب الوجبات الفارهة للمدعوين،حيث الوجبة بالسعر العالي،لأنها ملفوفة بورق القصدير،وموضوعة علي أطباق بيضاء لامعة،ومع الوجبة الهنية،زجاجة مياه نقية،وعلبة حاجة باردة مية في المية . ولا يكتمل الشغل النضيف إلا بتسمم المدعوين علي خلفية الفراخ(الضارب) والباسطة المضروبة،وليس هنالك من تداعيات أخري بعد أن صرفت الفواتير علي داير المليم .

ومن عدة الشغل النضيف،الشال الإنقاذي والعباية المزركشة،والعصاية التي تسمي دعوني أعيش،ثم (غرة صلاة)تصنع في سوق (الحرامية)مقابل 20 جنيهاً عداً نقداً،ثم ينطلق(المحتال) بعدة شغله إلي حيث الوزارات والمحليات،ولا يكتمل الشغل النضيف إلا بالرشوات والتسهيلات .

لبس أحدهم في زمن ماضي عدة شغله،ودخل بكل يسر إلي مكتب الوالي،وعن طريق اللابتوب،والعرض الثلاثي الأبعاد،استطاع إقناعه بحل مشكلة المواصلات والكباري،عن طريق بناء نفق تحت النهر،ولم نشاهد إلي هذه اللحظة أي (كراكة)،كما لا نعرف ما إذا كان اللص الظريف قد حصل علي أي أموال أو تسهيلات من أي جهة رسمية.ولبست شركة تركية عدة شغلها واستمتعت بالقرض التركي بعد أن حفرت (الصرف الحي)،ودفنته دفن الليل (أب كراعاً برة)،ثم غادرت بلادنا في جنح الظلام،وبقي القرض معلقاً في رقبة وزارة المالية،تدفعه علي داير المليم وبالفوائد كمان.

ومن تداعيات هذا الشغل النضيف ما ورد علي لسان إنقاذي مشهور من كلام فهمنا منه أن المؤتمر الوطني وفي سبيل راحة ضيوفه القادمين من (بلاد برة) سيؤجر عربات رئاسية من القصر الجمهوري،حتي لا يتهم باستغلال المال العام،ولم يقل لنا بكم الساعة،وهل الوقود المستخدم خارج الإيجار أم داخله،وهل دخلت (القروش)بأورنيك 15 أم بفواتير مضروبة. عموماً هي ملاحظة نقولها لتذكير المراجع العام الذي سيراجع حسابات القصر الجمهوري وشركته الجديدة (ليموزين عشان خاطر الحلوين).
عشان خاطر عيون حلوين واأسفاي،مواكب السدنة متجاورين،وشغلك نضيف يا عبد المعين



kamalkarrar580@hotmail.com


تعليقات 20 | إهداء 0 | زيارات 13140

التعليقات
#1138359 [رجب ود رمضان]
0.00/5 (0 صوت)

10-30-2014 09:05 PM
الصورة أعلاه بالتأكيد حديثة كما نرى ..
بالله ما الذي تغيّر في هذا المنظر بين اليوم وما كان في عهد التركية السابقة ؟؟؟
و (السيد الرقيص) يقول ليك نحنا جبنا الموبايل والأنترنت في البلد .. فتأمل (مصيبتا) قدر شنو ؟؟؟
والله نحنا نايمين على (محنة) كبيرة وما دارنها .

[رجب ود رمضان]

#1137608 [الغلبان]
4.00/5 (2 صوت)

10-29-2014 08:59 PM
كل واحد يشوف المؤتمرجية حوله ابناء عمه خاله خالته عمه عمته شوفوا حالهم بقى كيف ما تنظروا بعيد الحال ما بتغير الا الدم يبلغ الركاب يا عمر اصحي واصنع لي نفسك تاريخ لا تترك التاريخ يصنعك والا اقول ليك خليك كده انت اصلا ضمنت النار وزي ما يقول المارقين نار مضمونة ولا جنة مجهجهة حمار بحق وحقيقه

[الغلبان]

#1137587 [ِِAbu S hihab]
0.00/5 (0 صوت)

10-29-2014 08:05 PM
بالله كيف مايتسمموا؟ واحد كان بياكل ملوحة أو سبروق أو كول أو مرس أوكجيك أو ام بقبق
فجأة لقي قدامو بروستد وبيتزا وهوت دوق وباسطة وباسطرمة و..... قام ملا بطنو وزردا تب
أها دا بيحصل ليه تسمم وللا لا؟ ما الحكاية ملح وكدا!!!!!!!!!!!!!!!

[ِِAbu S hihab]

#1137431 [Abu Amer]
0.00/5 (0 صوت)

10-29-2014 02:48 PM
لاستاذ كمال كرار .. الوقت لايسعفني حاليا لالقاء بعض الحقائق فيما يخص مشروع السكة حديد والتي لو أراد لها أصحاب الشأن أن تطبق ربما كانت السكة حديد في السودان أن تصل الى نتائج خارقة ولا تكاد تكلف البلاد أي أعباء وخلال هذه الفترة كانت ستجني منها الدولة الكثير وقس على ذلك المشاريع الأخرى والتي عمل عليها أبناء السودان الذين يتميزون بالعفة والنزاهة. ولكن سياسة الاقصاء والاحلال والاستحواذ على فرص الآخرين ونفوذ بعض ممن يتميزون بالانانية أدت الى تدهور البلد ولا تزال تتدحرج الى الهاوية.

[Abu Amer]

ردود على Abu Amer
Sudan [شهنور] 10-29-2014 09:04 PM
أقرأ الموضوع مره اخرى.


#1137254 [الكاره المفسدين]
1.00/5 (2 صوت)

10-29-2014 11:14 AM
جاية الانتخابات
وهاك يا سندوتشات و تأجير سيارات
طبع كل إنقاذي يدفع اشتراكه؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لكي يبلع بالمليارات
ما دام أنت إنقاذي سف
لكن تذكر ان الله سبحانه وتعالى يمهل و لا يهمل

[الكاره المفسدين]

#1137185 [ملتوف يزيل الكيزان]
5.00/5 (1 صوت)

10-29-2014 10:12 AM
الوطن ينزلق من بين ايدينا ، من له ذرة وطنية فاليعمل على تكوين خلايا المقاومة بحية.
البشير قال انا جيت بالبندقية و ما بترك الحكم الا بالبندقية.
عليكم بحرق بيوت الكيزان وكلاب الامن.

[ملتوف يزيل الكيزان]

#1137085 [جركان فاضى]
5.00/5 (1 صوت)

10-29-2014 08:50 AM
انجاز الانقاذ فى مجال الطرق والمواصلات كالاتى...دمرت السكة حديد تماما والتى بناها السودان زمن العافية...وعملت الطرق البرية بقروض ما سرق منها اكثر مما صرف على الطرق...وختوا الديون فى رقبة المواطن وابنائه من بعده وابناء ابنائه الى يوم الدين ...والغريب فى الامر انهم يفتخرون بأنهم اقاموا الطرق والسدود والكبارى...كلها ديون فى ديون... وسرقات من القروض نفسها

[جركان فاضى]

#1137066 [الحداحيد - ام عويدات]
5.00/5 (1 صوت)

10-29-2014 08:36 AM
حكى لي واحد قريبي أنه في عهد الوالي المتعافن أن حضر له احد تجار الزرة من منطقة سنار وسمح له بمقابلته وشكي التجار للمتعافي عن وضعه الحرج وفقده لجميع امواله في ظرف وجيز واعلف افلاسه في حين انه كان من كبار التجار فما كان من المتعافي إلا ان كتب له مذكره لادارة المخازن بأن يسمح له بصرف عدد 1000 جوال دقيق وقدم له المذكره ولكن التاجر قال له أن لا املك سعر هذه البضاعة فضحك المتعافن واخذ الجوال واتصل على احد التجار وقال له عندنا تصريح بالف جوال دقيق تجي الآن وتشتريه من صاحبه فحضر الآخر وقدم مبلغ كبير من المال لشراء التصريح فما كان من المتعافي إلا ان اخذ مبلغ زهيد 5 مليون كاش من اجمال المبلغ الكبير ومدها للتجار المنكوب ----- والكلام ده منقول على ذمة صاحبة

[الحداحيد - ام عويدات]

#1136646 [معاويـــــــــــــــــــــــــــــــــــــة]
3.00/5 (3 صوت)

10-28-2014 03:39 PM
ولانو المستندات كلها بتحرق فورا وبعد انتهاء العملية مباشرة

[معاويـــــــــــــــــــــــــــــــــــــة]

#1136634 [ياسر الصافى]
1.00/5 (1 صوت)

10-28-2014 03:23 PM
الفلنكات الخرصانية تقوم بتصنيعها وتركيبها شركة تتبع للحكومة الصينية وهى جزء من القرض الصينى لتطوير قطاع السكة حديد فى السودان , وهى افضل من غيرها على الاقل نحن نرى اين هى الاموال , تقوم الحكومة الصينية بدفع التكاليف والتصنيع والتركيب

[ياسر الصافى]

ردود على ياسر الصافى
Sudan [ابو شيبه] 10-29-2014 10:23 AM
الكلام ده لحد ما صحيح. مصنع الفلنكات ده يتبع للسكه حديد انشسء من القرض الصيني. الغرض من تعيير الفلنكات هو زيادة سرعة القطارات بعد تأهيل 8 قاطرات العام الماضي بواسطة شركه كوريه لترجع السكه حديد للعمل من جديد بداية بنقل البضائع ومن ثم الركاب

Saudi Arabia [الحداحيد] 10-29-2014 08:40 AM
انشـــــــاء الله كلامك ده يكون صحيــــــــــــــــح


#1136605 [جنرال زمان]
3.00/5 (2 صوت)

10-28-2014 02:43 PM
وخشب الفلنكات القديمة مصيره إيه يا ترى ومين حيستفيد منه كحطب حريق!!!!!!!! حريقة تحرقهم كلهم حرامية أولاد سبعين كلب أجرب.

[جنرال زمان]

#1136591 [caeser]
3.00/5 (2 صوت)

10-28-2014 02:23 PM
شغلك نضيف .... !

[caeser]

#1136588 [ابو شهاب]
1.00/5 (2 صوت)

10-28-2014 02:20 PM
للحق اقول فى اخر زياره لى للسودان وانا قادم من مدينه وادمدنى رايت قطار بضاعه يسير فى اتجاه الجنوب ولا اعلم وجتها فبدأت فى النظر الى القطار بدهشه ككاننى لم ارى قطارا من قبل اما قطار نيالا وبورسودان بالدوران اظنه اصبحت حكايات تقص على اطفالنا

اما الفلنكات الخرسانيه يمكن الحكومه بصدد استيراد قطارات جديده من الصين لاحياء ظاهره التسطيح علما بان القطارات الحديثه تفوق سرعتها سرعه قطار البخار والديزل ولامجال للتسطيح يعنى ( يدقو الكجر قبل الحمار )

ومع الضايقه الاقتصاديه التى يمر بها السودان مافى مشكله مادام مشروع الجزيره اصبح قاب قوسين او ادنى يدوروا على مصدر دخل اخر بتاجير عربات القصر الجمهورى او حتى اقتطاع جزء منه يستعمل كفندق للضيوف عامه بس المشكله اورنيك (15) ايرادات يمكن بس ليس بلونه المهود الازرق الفاتح يمكن عمل ايصال عادى بدون رقم مسلسل بس كيف تدخل هذه الايرادات خزينه الدوله الا بقدره قادر يعنى ( المال تلته ولا كتلته )

اما القروض الوهميه التى توقع مع شركات اجنبيه يكون صاحب الفكره قبض عمولته وراح والبحصل يحصل المهم القسمه تمت يعنى ( محل رقيقه تنقطع )

اما حكايه المؤتمرات دى كرما من القائمين على امره لابد من تقديم قاروه ماء صحه وعلبه بارد ودوما بكتروا من البلح والفول المدمس عشان الضيق نفسه تنسده ومايقدر ياكل وده الفرصه الوحيده للقائمين انهم ياكلوا وجبه هنيه يعنى المابتلقى فى بيت ابوك كتر منه ولو يضرك

خلوهم ياكلوا اموال الشعب بس ارفعوا ايديكم وقولوا تدخل عليهم بالساحق والبلاء المتلاحق

[ابو شهاب]

#1136574 [عبدالله النوبي]
1.00/5 (1 صوت)

10-28-2014 02:04 PM
اضرب 200 ألف نخلة في 10 ألف جنيه بس شوف بتطلع بكم يدوها الناس ولا يأجروا عصابة

بجالون بنزين وعود كبربيت وشوف المكسب كم ؟؟؟؟

[عبدالله النوبي]

#1136573 [كفاية]
1.00/5 (1 صوت)

10-28-2014 02:01 PM
فساد لا يحتاج الى دليل او اثبات وتقول كدا يقولوا ليك جيب مستنداتك ؟

[كفاية]

#1136572 [عبدالله النوبي]
1.00/5 (1 صوت)

10-28-2014 01:59 PM
الشغل النضيف جد بتاع السدود والكهرباء قروض على حساب الدولة ولا حسيب ليهم ولا رقيب

حقي وشغل ضراعي عينك يا سمسار وبعد داك اي استثمار مصاحب قريب من اي سد يدخل كرش الفيل

ولا يتم الا بموافقه شخصية اضيف ليهو بناء مساكن جديدة للمهجرين قسرا ودي فيهو الشغل النضيف من اكتر

من جهة مقاولين وتجار مواد بناء وعمال ومساحين وهيلمانه كبيره تاكل قبيلة السدود واحفادم كما

اما تعويض الاغراق والزروع دي فيها شغل نضيف بتاع مافيا حريق النخيل لتقليل التعويض

بالاضافة للحساب الفيهو غلاط طبعا مع عدم ذكر رسوم الترحيل وحق الجاز المفروض يكون مجاني

الله غالب وليكم يوم فيهو شغل نضيف ما مدغمس وان كان المتهم ود قبيله

[عبدالله النوبي]

#1136565 [تفتيحة لمن فضيحة]
1.00/5 (1 صوت)

10-28-2014 01:50 PM
ياجماعة الحاصل في السكة حديد دا جريمة في حقنا انا بعرف ناس بقوا اصحاب مليارات وواحدين بقو اصحاب ملايين من السرقة الحاصلة في مايسمي بمشروع تأهيل السكة حديد واحد عسكري نفر شغال حرس للقضيب البغيروه راكب بكسي 2014 وباني بيت مسلح.. قبل شهر تغريبا واحد مقاول كان بشتري منهم القضيب لقي جماعة من الشرطة وبعض موظفي السكة حديد بشيلو في القضيب ولما سألهم خافو منو وادوهو في الحال عشرة مليون عشان يسكت الشغل الحاصل جريمة في حق السودان!!!!!!!!!!!!!!!!!!!!!!!!!!!!!!!!!!!!!!!!!!!!!!

[تفتيحة لمن فضيحة]

#1136549 [حسكنيت]
1.00/5 (1 صوت)

10-28-2014 01:28 PM
قروش شنو البتدخل بى أورنيك 15 يا ود كرار ، دى دخلت بى فركة القرمصيص

[حسكنيت]

#1136506 [مغبون]
3.00/5 (2 صوت)

10-28-2014 12:41 PM
شغلك نضيف .... !

[مغبون]

#1136490 [كوكي]
3.00/5 (2 صوت)

10-28-2014 12:19 PM
انت داير الحكومة تصرف من جيبها ؟؟ لازم بنود صرف يا ...

[كوكي]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة