الأخبار
منوعات سودانية
فــن الدوبيـت في الســودان
فــن الدوبيـت في الســودان
 فــن الدوبيـت في الســودان


11-18-2014 10:59 PM
إعداد: فيصل مبارك
الدوبيت هو فن شعري ينتمي إلى بحر الرجز المعروف أو هو قريب منه كما أرجعه الكثير من المؤلفين والنقاد. السودان به باديتان...
البادية الشرقية (بادية البطانة بشرق السودان) وشعرائها ينحدرون من قبائل الشكرية والبطاحين والجعليين بصورة رئيسة
والبادية الغربية (بادية كردفان بغرب السودان) وشعرائها ينحدرون من قبائل الكبابيش والكواهلة والمجانين بصورة رئيسة
يقول الشاعر النمير محمد زين لـ (نجوع): دخل الدوبيت السودان عن طريق الهجرات العربية عبر القاهرة عبر طريق باب المندب وعبر الفاشر غربا (درب الاربعين) كما ذكر الدكتور عبد المجيد عابدين في كتابه الثقافة العربية في السودان..
أنواع الدوبيت في السودان:
1ـ المربع وهو النوع المعروف والذي يتكون من أربعة أبيات مع اتحاد في الوزن والقافية
مثال للشاعر النمير محمد زين:
نحنا نشبع الفوج البيجينا جعان
نحنا صغيرنا راتع في الكرم خمجان
في شان البلد والله نموت موت ضان
وطلقانة النفوس شان رفعة السودان
2ـ النوع الثاني المربوقة وهي مجموعة من مربعات الدوبيت وتكون بقافية واحدة ويكون عادة في وصف المحبوبة أو مجارة بين شاعريين
3ـ المسدار وهو مجموعة من مربعات الدوبيت وذات مضمون واحد ويكون عادة في ذكر الارتحال الى ديار المحبوبة عبر دابة وعادة ما تكون ناقة ويتخلله وصف لمعالم الطريق من قرى ووديان
يقول الشاعر النمير محمد زين:
معدوم وصفوا في سير الحسان القبلو
كم في حسنوا يالنوراني شيخي كتبلو
المن تب مجلس فارغة مابيقربلو
نومي نعاهو زي نوم الجداد في حبلو
** **
شبيهة صندل الهند اب عبيرا فاح
يانع عودا ني مروية ذوق وسماح
سهاد الليل وحسيب نجمو لا البياح
معشوقك بيسهن وبرضو مابرتاح
وهنالك أنواع اخرى من الدوبيت عرفتها بوادي السودان المختلفة مثل الجراري والشاشاي والبوشان حيث يشكل الضرب الاوفر حظاً من الانتشار والتداول في السودان لسهولة حفظه وجمال معانيه.
الشاعر احمد النعمة الهادي يقول اشتهر به سكان المناطق الرعوية وهو الشعر ثنائي الأبيات ويستخدم الدوبيت في مختلف المناسبات والمدح والرثاء والغزل والفخر والحماسة
يقول أحمد النعمة:
قنوبك خدر اباديه ويباسك حت
وقمريك قوقا فوق الرشرش الانخت
بهمك مالية ضرعاتو ومستف ست
وحيل نضمينا فوقك اصلو ما انبت
ويقو الشاعر نزار سراج:
مريودتي البريدا وبالأدب مفطومة
قلبي عليها ديمة وبعذرا ومابلومة
نامت وبالا رايق وبيا مي مهمومة
وانا سهران اقلب في العيون البومة
** **
الخاوانا بنعزوا ونقوم بي واجبو
والعادانا بنزّلوا ونزين حاجبو
انحنا بنركب الصعب البجغلب كاجبو
نحنا اولاد جعل للعاجبو والموعاجبو
ختاماً: للدوبيت ارتباط كبير بحياة البدو الفطرية وينتمي الدوبيت السوداني الى بحر من بحور الشعر المستحدثة والمسمى بـ (المواليا) وهو اتفاق القافية الاخيرة من كل جزء من الأجزاء الاربعة أو الثلاثة من مقطع الدوبيت
منوعات للدوبيت:
وانحنا ان قمنا والله الخراب بنعرفو
وانحنا رجالنا ساعة الحارة ما بنعرفو
انحنا كرمنا فات حاتم كمان في وصفو
انحنا عزابنا نار ومنو الرجال ينكسفو
** **
وانحنا إن نظمنا الحروف والله ما بنتجارا
وانحنا إن مشينا على الشعر والله ما بنتبارا
انحنا شعرنا مليان عزة كاسيا نضارة
انحنا إن قلنا نص تلقا السمعنا ده سكارا
** **
انحنا اولاد صواردة وعينا مــــــا بنرميها
أنحنا الفي الكرم نيرانا مـــــــا بنطفيها
انحنا العزة في الإسلام بنفخـر بيهــــا
أنحنا ان درنا نجمات السمــــاء ندليهــا
** **
أنحنا الفي الكرم بنقيف لحــدي الشافعــة
قولت سوي ساي تحلف تقــولك سامعــة
انحنا المافي زينا في الأراضــي الواسعــة
في الطيب والخصال زي الميـاه الناقعــة
** **
انحنا آزول بنمرق في الهجيرة الكاتمة
وانحنا آزول عروضــنا مسترة ويوت سالمة
انحنا الأفعى واللدغة المسكرة سامة
بنساند الــوجع لامــن تطم الطامــة
** **
أمطــار السمــاء النزلت دحيـن صابتنــا
وربك يــعوض الناس اللقـــــت محنتنــا
يا ستــار دعيناك بــي رســــول امتنــــا
خفف بلــوتك وأحفظ عقــــاب دولتنــا
** **
السماء يوم تفيض والله نفــرح بيهـــــا
ويـــا رب العبــاد بــي عافــيتك دليهـــا
يارب يا كريـم مـــــن نعمتـــك أكسيها
يســر للخريف وامطـارنا بــارك الفيهــا

الانتباهة


تعليقات 2 | إهداء 0 | زيارات 12983

التعليقات
#1153072 [القرص المفترس]
1.00/5 (1 صوت)

11-19-2014 02:01 PM
الظاهر انك برضو قاعد تمارس ما تمارسة اجهزة الاعلام الرسمية من تقييب متعمد لدوبيت وشعراء دارفور وبواديها خاصة بادية العقاربة وبادية الزيادية والماهرية وكلهم اصحاب ابل . ولهم مخزون جبار من الدوبيت والمسادير وان اردت ان تتاكد ابحث عن الشاعر جاد الموالي حمدو جاد كريم والشاعر انور فتحي وابحث جيدا
لك شكري وتقدير.
القرص المفترس

[القرص المفترس]

ردود على القرص المفترس
Sudan [فيلص] 12-13-2014 09:20 PM
اول حاجه انا بشكرك على التعقيب
والكلام البتقول فيه (قاعد تمارس ما تمارسة اجهزة الاعلام الرسمية من تقييب متعمد لدوبيت وشعراء دارفور وبواديها ) مابرد عليه
وجاد المولى حمدو انا بعرفو معرفه اكتر من شخصيه (مجموعة رزاز الثقافيه )
مشكور ولك العتبى


#1152777 [زلفي يوسف]
3.50/5 (2 صوت)

11-19-2014 09:19 AM
شعر الدوبيت الان وجد حظه من الانتشار في كافه ةسائل الاعلام المسموع والمقرءو ...وصارت شعبيته في تزايد مستمر بفضل النكنلوجيه التي غزت العالم وساهمت في نشر الثقافات المحليه وابرازها

[زلفي يوسف]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة