الأخبار
أخبار إقليمية
اديني من صوتك ضجيج
اديني من صوتك ضجيج
اديني من صوتك ضجيج


11-21-2014 02:54 AM
قصيدة جديدة بقلم الشاعر / أحمد يوسف حمد النيل

انا يا بلد ...
قاصدك عديل
اديني من صبرِك سُكات
اديني من وِردِك مدد
اديني من صوتِك ضجيج
لحظة تقيف الناس تكابس للحياة
اديني نور
لحظة اجيك واشتهيك
خليني ممدود في قفاك
*****
طاحونة الليل الطويل
راجياها ناس واقفين طويل
رافعين عراجين التمر
خاتين قناديل القصب
متلفحين هِدم الصبر
حال الفقر
نِعل الجلد
واليد ممحنة في الخديد
والسايقة واصلة على الجروف
لا بتلعن ا لواطة البِكر
لا بتلعن الموية التسيل
*****
ملعونة فيك سكك الغَزَل
ملعونة طاقات السؤال
مشحوطة قيمك زي عبوب
وزي كرامة المومسات
أكلت عصاك سوسة العساكر والمنافقين والهوام
جعلت يمينك في قفاك
اكلت غداك شلة شواطين البشر
*****
وبقيت تصلي علي ورا
ومرات تصلي يمين شمال
وبقت قبلتك القروش
لهفانة روحك للكروش
وسجدت غلطان يا ولد
وأكلت من حق البلد
لكن ضميرك فاق صحا
وسجدت تال بيت الله داك
قطعت سِبَح اليانصيب
ونضمت سبحة عود بقِس
حَقة صلاح أهل البِرِش
*****
جوك يا بلد ...
ناس مرجفين
ماعون خريفهم ما بلين
ناكرين جميل
حارسين جثث
والدم مجلبط
في السراويل
والملود
والطاسة
والصحن المطرقع والنعال
*****
وجات حبوبة
ما عاجباها ميلة الحال
ولا العجن البضوقوا جُهال بلدك
وناس راميها مر الحال
عاد يا وليد!
لو الناس تدور جنس دا الحال
اخير الموت
ولو شديت
ولو كَرًبت لِبدة سرجك المهزوز
ما كان الحصل وانقال
ولا كان حالك انت المال
*****
لمتين نشوفك منهزم؟
ما تقوم وتنهض يا ولد
فرّغ مرارات السكوت
حرّك دوافك وانتفض
مالك بقيت مسلوب قرار؟!
مالك بقيت حارس الشدر؟!
ولا الرويح الباقية ليك
كسروها جند الظالمين؟
حفرو لك الساس المتين
دفنوك ضِحا
وجلدك خشاش المرفعين
متين يقومن لك ضروس
وتهرس جباهن ما بتلين؟
متين تصيح وتهز عروش المرجفين؟
متين تدك الظالمين؟
ومتين تبقالنا ولداً للعشا
وتحرس بنات المسلمين؟!


[email protected]


تعليقات 3 | إهداء 0 | زيارات 1523

التعليقات
#1154687 [murtada eltom]
0.00/5 (0 صوت)

11-21-2014 09:28 PM
thanks to sayed yousif for his strong and agitative words that made our senses feel so sad for the lost country...tears and home sickness became our agony ,,but no way ,,the sun should rise after darkness

[email protected].........

[murtada eltom]

#1154481 [أحمد يوسف حمد النيل]
5.00/5 (1 صوت)

11-21-2014 11:39 AM
لك تحياتي و اشواقي و انت تكابد في بلاد الاغتراب من اجل لقمة العيش النظيف سلامي كثير صديقي و زميلي دكتور محمد الطالب

[أحمد يوسف حمد النيل]

#1154466 [د.محمد الطالب]
5.00/5 (1 صوت)

11-21-2014 10:41 AM
مبدع كالعادة، ومختلف، وملتزم بخطك الابداعي النبيل، الى الامام حتى نلامس معا خيوط الفجر

د.محمد الطالب (زميل وصديق )

[د.محمد الطالب]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

الاكثر تفاعلاً/ق/ش

الاكثر مشاهدةً/ق/ش

الاكثر تفاعلاً/ش

الاكثر مشاهدةً/ش







الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة