الأخبار
أخبار إقليمية
شاهد الفيديو: سيدة سودانية تصرخ أمام الملأ : "أقسم بجلال الله البخت ايدو في قلم و يجي يصوت هو ما راجل"
شاهد الفيديو: سيدة سودانية تصرخ أمام الملأ : "أقسم بجلال الله البخت ايدو في قلم و يجي يصوت هو ما راجل"
شاهد الفيديو: سيدة سودانية تصرخ أمام الملأ :


12-03-2014 01:28 PM
أسماء الجنيد


ضلاله بي طرقه

مشروره في حيطة

متكوله بي مرقه

رقراقا بيتاوق

بيناغم ألفرقه

حداها أم الزين

لابساها نص فتقه

بلامه في وجيها

ملتوقه بي لفقه

شايلالا خماره

في حليلة متحرقة

وقودا في اليدين

حازماه بي بتقه

جهالا بي غادي

تشابا في شفقه

تغنى وتهاتي

لصغيره بي رقه

تحجي يوماتى

خايفالو من شرقه

مقسومة في العينين

ما بتعرف ألمرقه

معيشة زى همين

تبداها بي طرقه

وحليلة في منقد

بصلاتها متفرقة

قفيفه مقدوده

مرقوعه بي ورقه

تتناول الفندك

تنادى للرفقة

كريمه أم الزين

بتقسم ألنبقه

حنينه للمسكين

تسقيه بالبقة

دمعاتها جوه العين

فرحانة مى حرقه

تلولى في الكرعين

ما بتعرف النقه

تحجي بالوالدين

لا صرخة لادقه

السمحة نواره

مرسومة ألخلقه

تتفقد ألجاره
بالنية مي زرقة

التحية للوالدة الجسورة التي عبرت بصدق وشجاعة وتلقائية عن ما يجيش بخاطر كل مواطن من هذا الشعب الممكون وصابر والتحية لكل امهاتنا وإخواتنا وبناتنا المناضلات يحيا نضال المرأة السودانية الصبورة المكافحة

ثورة ثورة حتى النصر
أسماء الجنيد

شاهد الفيديو لتعرف لماذا أقسمت هذه السيدة السودانية على الهواء قائلة: "أقسم بجلال الله البخت ايده في قلم و يجي يصوت هو ما راجل."

.


تعليقات 70 | إهداء 1 | زيارات 18604

صفحة 1 من 212>
التعليقات
#1164037 [بت البلد]
0.00/5 (0 صوت)

12-06-2014 12:57 PM
الكلمة أمضى سلاح... معا معا حتى ندك عرش السفاح, تضامنا وعملا بما نادت به السيدة الجليلة التي رفعت صوتها عاليا فوق أصوات الخونة والمارقين ,وتجار الدين شاربي عرق المزارعين الكادحين ... هيا الى النضال هيا الى الكفاح حتى تشرق شمس الصباح لينعم كل الشعب ويرتاح ...

[بت البلد]

#1163219 [صديق الشيخ حمد النيل]
0.00/5 (0 صوت)

12-04-2014 10:41 PM
ها البشورة بدور تفتحلك جبهة فى الجزيرة ؟؟والله ندفنكم فى الحواشات ولا بعدين تصبحوا سماد فاسد ..أخير نرميكم للسمك ..أولاد الحايل

[صديق الشيخ حمد النيل]

#1163158 [تينا]
0.00/5 (0 صوت)

12-04-2014 09:16 PM
تسلمى يا (((نجاةابوزيد))) يا عزيزة وسألت عليك العافية ان شاءالله ... وكتر خيرا أمنا الفى الفيديو كفت ووفت ما قصرت ربنا يمتعا بالصحة والعافية ويعجل لينا باليوم البنشوف فيهو بلدنا اتحرر من العصابة المغتصباه ورجع ذى ما كان ... تحياتى

[تينا]

#1163128 [ثورة محمية بالسلاح - كاودا وبس]
0.00/5 (0 صوت)

12-04-2014 08:41 PM
خالتنا دي ارجل من البشير
لدي طلب من إدارة الراكوبة الموقرة :
أرجو ارسال رقم موبايل خالتنا بغرض تكريمها

[ثورة محمية بالسلاح - كاودا وبس]

#1162853 [شمس]
0.00/5 (0 صوت)

12-04-2014 03:36 PM
والله لم أشارك منذ أن جاءت هذه الإنقاذ اللعينة في أي انتخابات ...بل ولم ولن أسجل اسمي

[شمس]

#1162811 [Mr.Right]
0.00/5 (0 صوت)

12-04-2014 03:05 PM
المشكلة انو الانتخابات دي مزورة عشان كده الأصوات ما بتفرق ............تزويييييييير وبس لا نزاهة ولا حرية

[Mr.Right]

ردود على Mr.Right
[ashafokhalp] 12-05-2014 06:06 AM
يا مستر رايت خلي الرخرخه
خليهم يزوروها بس انت ما تسجل ولا تصوت
كلم جيرانك واحبابك وكل من يهمك امره
العالم دا كلوا ح ييراقب الانتخابات دي
حتي مركز كارتر الباع الانتخابات الفاتت مقابل انفصال الجنوب ما ح يبصم زي ما بصم في الانتخابات السابقه
شدوا حيلكم من هسع
وابقوا ايد واحده ضد الكيزان


#1162810 [ثورة محمية بالسلاح - كاودا وبس]
0.00/5 (0 صوت)

12-04-2014 03:04 PM
صباح الخير
الاخوة في ادارة الراكوبة الغراء الظليلة أرجو إعادة تشغيل الفيدو والذي تم تعطيله من قبل الجدادالالكتروني الكيزاني المعتت المعفن المسترزق

[ثورة محمية بالسلاح - كاودا وبس]

#1162729 [صرخة شعب]
0.00/5 (0 صوت)

12-04-2014 01:52 PM
ياعمر البشير الحاجه البتكلم دى برضو خسرانه منذ الستينات وبتأكل ديون الحكومة وعاله على الدوله وتربية شيوعيين وله عندك اساءه خاصه تخرجها للحاجه من مخزونك الاستراتيجى فى البذاءه

[صرخة شعب]

#1162682 [الجندى]
5.00/5 (1 صوت)

12-04-2014 11:43 AM
الكلام الكتير انتهى، جاء وقت البيان بالعمل، يا اصحاب نداء السودان يجب ان يكون نداؤكم هذا نداء رجال ولا ياتى النظام وينفرد بكم فيما بعد واحدا تلو الاخر ويغريكم بالوعود واشياء اخرى فتتراجعون ويذهب ريحكم ثم تنالون سخط الله والشعب.

عليكم وعلينا جميعا توعية الشعب وتحريضه بكل الوسائل المتاحه، فيس بوك، تويتر، مواقع الكترونيه، منشورات تحريضيه فى الاماكن العامه، فى الجامعات، المدارس والاماكن الشبابيه فالشباب هو الذى يقوم بالتغيير كما حدث فى كل ثوراتنا السابقه. انظروا الى الشباب التونسى والمصرى كيف استفادوا من المواقع الالكترونيه فى اشعال ثوراتهم. طلاب الجامعات هم الطبقه المستنيره التى اشعلت كل الثورات السودانيه السابقه، وعليهم وعلى النقابات السريه وبقية قطاعات الشعب المسحوقه البدء فى العمل منذ اليوم ضد هذا الفرعون الغبى وبطانته الفاسده المفسده. لقد وصل به الطغيان ان يقول كلاما كله كذب وبهتان فى حق المزارعين الغلابه فقد لهف واسرته واخوانه وبطانته النتنه البترول وترك الغلابه جوعى ونسى ان جميع ملته كانوا من الغلابه واعترف بلسانه انه كان يعمل طلبة مبانى ووقع عليه طوبه وكسر سنه . والان بعد ان صار رئيسا بدلا من ان يقف مع الغلابه تنكر لماضيه فافقرهم وجوعهم بل وفى نهايته صار يستفزهم ويشتمهم . يتحدث وكانه متحصل على مؤهل اكثر من ثانوى دون نجاح اى فاقد تربوى صار فى فلتة من الزمان رئيسا للجمهوريه بمساعدة ابن غفير حديقة الحيوانات المجرم على عثمان وتخطيط خايب حنتوب الارعن الزنديق حسن الترابى.

يلا استعدوا ياشعب السودان لقد بلغ السيل الزبى فلا خير فيكم بل وستنالون غضب الله ان لم تفعلوها, فالله لا يغير ما بقوم حتى يغيروا ما بانفسهم . هيا للاضراب السياسى والمظاهرات الليليه فى شتى الاحياء لتشتيت جهود الطغمه الظالمه . لتكن الخطه التوقف عن العمل خاصة اصحاب المواصلات لعدة ايام ، ثم الخروج فى مظاهرات صغيره ومتفرقه ومستمره فى الاحياء ليلا ، والهتاف الداوى ضد لصوص كافورى .. لو شتتوا جهود كلابهم حتشوفوا لو ما ارتبكوا وارتجفوا وبداوا فى تهريب اسرهم ثم اللحاق بهم ، فهم جبناء اكثر مما تتصورون لانهم حراميه وكذلك رئيسهم المطلوب للعداله الدوليه.

لازم الشعب يكون لجان فى الاحياء لتضع خططا لقيادة الجماهير وان تكون اللجان متتاليه، وفى حالة اعتقال احدى اللجان تتسلم اللجنه التاليه مهامها وذلك حتى لا تخمد الاحتجاجات بمجرد اعتقال القاده وذلك ان حدث لان الشعب لا بد ان يقاوم ويعامل بالمثل. المعارضه السياسيه يجب ان تكون فى المقدمه هذه المره كما فعلت المعارضه فى الثورتين السابقتين 1964 و 1985 وكل حزب يتخاذل سوف يتم كشفه وتعريته ووصفه بالخائن للوطن عندما تاتى الانتخابات الحره باذن الله . وعلى رؤساء الاحزاب الذين غادروا البلاد عليهم بالعوده فورا بمجرد انطلاق الثوره والا سيعتبروا متخاذلين ويتم عزلهم شعبيا حتى لا يفوزوا فى اى انتخابات مقبله. اما المعارضه المسلحه فعليهم تقع حماية الثوار . وبدلا من الحرب فى الاحراش عليهم ان ينقلوها لداخل العاصمه ضد الجنجوبد وكلاب الامن الذين يدافعون عن النظام . جرجروا الكلاب الضاله لداخل الاحياء ثم حاصروهم واقبضوا عليهم ثم شدوا وثاقهم ، اما اذا قاوموا فاستعملوا معهم السلاح الذى يفهمونه. فاذا تصديتم لهم مره او مرتين فسيولون الادبار لانهم مرتزقه وليست لهم قضيه يموتون من اجلها.اما بقية القوات النظاميه فبدون شك بل كما اكد الكثير منهم بانهم سيقفون بجانب الشعب كما فعلت القوات النظاميه فى الثورات السابقه، فهم ايضا اصابهم الكثير من الظلم والاهانه والتهميش.

استعدوا للاضراب السياسى والمظاهرات الليليه فى شتى الاحياء لتشتيت جهود الطغمه الظالمه . لتكن الخطه التوقف عن العمل خاصة اصحاب المواصلات لعدة ايام ، ولا عوده للعمل الا بسقوط النظام او هروبهم ، مواصلةالخروج فى مظاهرات صغيره ومتفرقه ومستمره فى الاحياء ليلا ، والهتاف الداوى بسقوطهم حتى ينهاروا ...

جميع الشعب الان ملتف حول قضية الحريه ، وجميع الكيانات متفقه عليها والرافض الوحيد لمنح الحريه هو هذا البغل الاصلع المنتفخ المكرش من مال السحت ، فهو وبطانته يريدون امتصاص عرق ودماء هذا الشعب الى ما لا نهايه حبا فى الحياه وخوفا من الموت ناسيين قوله تعالى : ان الموت الذى تفرون منه فانه ملاقيكم وستردون الى عالم الغيب والشهاده فينبئكم بما كنتم تعملون. صدق الله العظيم

الناس تخلى بالها حتى لا يفلتوا... التركيز على المطارات ومنافذ الحدود مع اثيوبيا ومصر وارتيريا وليبياو تشاد. اما جنوب السودان فالمجارمه لا يتجراؤن بالهروب اليه لانهم يعرفون مصيرهم هناك ... اسمعوا ماذا يقول رئيس كلابهم:
"الجهاز حيكون داعم للحوار الوطني – بس دا ما معناهو أي زول عايز يلم ليهو 10 او 15 نفر ويعمل ليو ندوة ويطلعوا يكوركوا في الشارع ويعملوا فوضى"

متى استعبدتم الناس ايها السفله وقد ولدتهم امهاتهم احرارا؟

قوموا الى ثورتكم يرحمكم الله ويوفقكم.

[الجندى]

ردود على الجندى
Saudi Arabia [الارباب] 12-05-2014 02:10 AM
المطلوب الآن ـ والوثيقة حارة ـ بيانات تأيييد من الهيئات والنقابات والشخصيات و المنظمات الوطنية والقوى الشبابية
والنسوية لهذا النداء التاريخي والهام والوقوف معه .
على ان تتبنى جهه نشر وتوزيع النداء على نطاق واسع داخل السودان لظروف السودانيين بالداخل والتي لا تمكّن قطاع كبير منهم
متابعة النت والاسافير والراكوبة وغيرها

ثم المطلوب ((عصيااان مدني شااامل)) مترافق ومتزامن مع (انتخاباتهم) المخجوجة
يعقب ذلك حشد ثم خروج عام بكل الاقاليم في يوم واحد للشوارع بانتهاء ايام الانتخاب .
يجب الاعداد لذلك من الآن ..
النظام سيحاور ليوم الدين .. جاء في الوثيقة المسربة لاجتماع قياداتهم ان الحوار ما هو الاّ (مناورة)


#1162561 [nagatabuzaid]
5.00/5 (2 صوت)

12-04-2014 05:05 AM
العزيزات رانيا تينا وكل البنات اين انتن امر كل يوم على الراكوبة وابحث عنكن احيانا اعلق و من مساحة الثائرة الجميلة هذه لكن التحية وكل الكرام وساعود ان شاء الله بعد اسبوعين ولنهتف معا يحيا نضال المراة السودانية الباسلة ولا للتصويت

[nagatabuzaid]

ردود على nagatabuzaid
United Arab Emirates [الغاضبة] 12-04-2014 01:01 PM
سلام يا نجاة، نعم لا للتصويت وعاش نضال نساء السودان، وانني اؤمن تماما بأن ثورة النساء قادمة بل هي قائمة ومستمرة ....


#1162558 [ود الفاضل]
0.00/5 (0 صوت)

12-04-2014 05:00 AM
ابشري يابت الرجال الصناديد.... ياريت لو كان فى كل مدينة يوجد عشرة من امثالك يالخالة العزيزة ، وهذا القسم الذي اطلقتيه سينساب فى ربوع السودان ليتحول الى غبار واتربه وكتاحة فى عيون الذين خانو الوطن وباعوه بثمن بخس وشتتوا شمله , انت يابت عزاز الناس امثالك اصبحن عملة نادرة , لك التحية والتجلة والاحترام , وقسما تستحقي ان تجلسي على كرسي رئيس الجمهورية بجدارة . لتبعثي فى الوطن الهمم العوالي لنهضته بعد الدمار الذي حل به .
لماذا يصوت السودانيون الا يكفي ان الشعب وصل به الحال الى اكل لحوم الحمير والكلاب وهل يعيدوا انتخاب البشير لفترة رابعة ليصل الشعب الى اكل لحوم البشر !!!!! لم يبقى الا ذلك !!!!!!!!!!!!!!!!!!!!!!!!!

[ود الفاضل]

#1162555 [nagatabuzaid]
5.00/5 (1 صوت)

12-04-2014 04:53 AM
تسلمى يا حبيبة ونحن معاك قسما وعهدا وتكفى تعليقات الاخوة والابناء وياهو ده السودان وتاكدى يا حبيبة ان المغتربين الاحرار اصدروا التعليمات لاسرهم بعدم التصويت ومتعك الله بالصحة والعافية ونساله تعالى ان يمد فى العمر حتى نحضر ونشاهد ونعايش ونشارك فى عملية الكنس

[nagatabuzaid]

#1162496 [عصينا]
4.50/5 (2 صوت)

12-04-2014 03:09 AM
مادام هناك (خّج) .
ما فارقة معاهم تجي الناس ما تجي
في (الخجة) الماضية حضر الاف (الموتى) لمراكز الإنتخاب
هؤلاء اللصوص ماذا يجيدون غير الاحتيال والشعوذة ؟؟؟

المطلوب اكثر من مقاطعة الانتخابات (المخجوجة)
ان يرافق الانتخابات (عصيــــــان مـــــــدني شـــــــــــــامل) يهّز اركان البلد ويوقف عجلتها (الواقفة) اصلاً
وحتى يرى العالم أن الشعب السوداني يريد ذهاب هذا النظام .

[عصينا]

#1162441 [على]
5.00/5 (1 صوت)

12-04-2014 12:43 AM
الشجاعة فى بلدنا دايما كانت للنسوان من فاطمة ورفيقاتها انا اتصور حقو نسلم قيادة المعارضة ليهم امكن ربنا ينفخ فى رحم السودان كما بينفخ فى ارحامهم خلونا نجرب لعلى وعسى

[على]

#1162403 [آمال]
5.00/5 (1 صوت)

12-03-2014 11:42 PM
ثورة حتى النصر و لتتحرر البلاد من شر الكيزان

[آمال]

#1162376 [صديق الموج]
5.00/5 (4 صوت)

12-03-2014 11:00 PM
لافض فوك يا والدة، معاً من اجل محاربة الانتخابات وليست مقاطعتها فقط، فقد احتقرنا السفهاء بما يكفى ،فعلاً البصوت ما راجل ولا عنده ذرة من احساس تجاه هذا الوطن المكلوم، انشروا هذا المقطع فى قروباتكم فى صفحاتكم على الفيس بوك وغردوا لحملة البصوت ما راجل ...اكتبوا فى كل وسائل التواصل الاجتماع معاً لمحاربة الانتخابات واعداء الوطن، صوتك طلقة ترتد لصدر اخوانك واخواتك قاطعوها فانها منتنه،،،

[صديق الموج]

ردود على صديق الموج
[حجر] 12-03-2014 11:57 PM
كلامك ما عندو علاقة بالرجالة يا حاجة خليك حالك
وبعدين شنو قصة الرجالة الطالعين بيها اليومين دي حسين خوجلي الممسح بقي يقول للناس انتو ما رجال.


#1162318 [ابوبكر جعفر]
3.00/5 (2 صوت)

12-03-2014 09:23 PM
ثورة فى يوم الانتخابات لاسقاط النظام و فضح التزوير على الملا وللعالم اجمع , اسقاط النظام و بناء سودان جديد يعود فيه كل مهاجر لوطنه و اهله و اولاده و ننهض بالسودان.

[ابوبكر جعفر]

#1162299 [ود ابوك اسد الخلا]
3.00/5 (2 صوت)

12-03-2014 08:52 PM
واقسم بالله العظيم وبي كتابة الكريم ماااااااااااااااا اصوت فاليحي العظماء

[ود ابوك اسد الخلا]

ردود على ود ابوك اسد الخلا
Saudi Arabia [ابومحمد] 12-04-2014 03:38 AM
صوته ولا ما صوته بش بش فائز بنسبة 99.9% اسرع حل للتخلص من المحنة تصفية هذه الفئة الضالة وبعدها فاليفعل الله ما يشاء واكيد سوف تفرج


#1162236 [menshi]
4.00/5 (3 صوت)

12-03-2014 07:47 PM
كلام الحاجه دى براها شالت 15 مليون صوت للرجال خارج حساب البشير , و الحنه جاهزه للبقيه بدأ بالاصم و الشله الباقيه لأن المراكز ح تتفرق للنساء حتى عمر بشير لو خشى و صوت لنفسو ح يحننو عديل كدا . يا جماعه اجمعوا الحنه و احمر شفاه للمصوتين المختثين من هسه .

[menshi]

#1162229 [Moy Ako]
4.75/5 (5 صوت)

12-03-2014 07:42 PM
انهن الكنداكات ولاعجب!
لو اريد بهذا السودان خيرا لتركنا امره لامهاتنا واخواتنا وبناتنا فهم اشد عزيمه واقوى حجه واقدر على مسايسه امور الحياه.

[Moy Ako]

#1162216 [ود القضارف]
4.00/5 (3 صوت)

12-03-2014 07:33 PM
ما الليل الداجي الطوّل
فجر النور من عينا إتحول
كنا نعيد الماضي الأول
ماضي جدودنا الهزمو الباغي
وهدوا قلاع الظلم الطاغي
***
وفي ليلة وكنا حشود بتصارع
عهد الظلم الشبّ حواجز
شبّ موانع ..
وجانا هتاف من عند الشاعر
قسماً قسماً لن ننهار
طريق الثورة هـُدي الأحرار
والشارع ثار
وغضب الأمة إتمدد نار
والكل ياوطني حشود ثوار
وهزمنا الليل
والنور في الآخر طل الدار
والعزة إخضرت للأحرار
***
يا أكتوبر نحن العشنا
ثواني زماااااااان
في قيود ومظالم وويل وهوان
كان في صدورنا غضب بركان
وكنا بنحلم بالأوطان
نسطـِّر إسمك ياسودان

ستشرق شمس الحرية يوماً مهما طال الظلام.......

[ود القضارف]

#1162212 [ود القضارف]
4.50/5 (4 صوت)

12-03-2014 07:29 PM
نمشي وين والدنيا عتمة
يا حكومتنا العزيزة ؟
كل احاديث المدينة
قصه اليخت اللذيذة ..
والتعرفو من مصيرنا
كلو تحت الطربيزة ..
وكل صباح الامة تصبح
بي مزاج ناس كونداليزا ..
ونحن صلعنا وكبرنا
وتاني ما بيدونا فيزا ..

*****
والقصة ما قصة يخوت ..
القصة قصة شعب
جايع دار يموت ..
قصه البلد المكتح
وباني فوقو العنكبوت ..
قصة الايدز والملاريا
القالو ازمة بنكنوت ..
قصة الكلى لما تفشل
من شراب موية البيوت ..
قصة السيل البيطفح
فات خلاص حد السكوت ..
قصة الوطن المجرح
وكل يوم خاشيهو بوت ..
وايه الفرق بين فرح الوطن
وفرح الحبيبة وبسمتا ؟
وايه الفرق بين الرفد
وبين الضياع والشلهتة ؟
وايه الفرق بين الرسم
في الامتحان والشخبتة ؟
وايه الفرق بين الرسوم
وبين القلع والهمبتة ؟
وايه الفرق بين المقابر
والضماير الميتة ؟
وايه الفرق بين موتة دايمة
وللا موتة مؤقتة ؟ وايه الفرق بين العرس
والقرمصيص والكبرتة ؟
وايه الفرق بين البري
وبين الكلام العكلتة ؟
هل جينا في الزمن الخطأ ؟
هل جينا في زمن
الضجيج والسلبطة ؟
هل جينا بالشعر الطوال
خشينا عهد الزعمطة ؟
هل نحن عاجزين عن
مواجهة المصايب والمحن ؟
هل نحن اكوام من
هلافيت الزمن ؟ هل نحن كالابطال
بندفع في الثمن ؟
أم نحن اذيال الحكاوى الانتهن ؟
هل نحن إنسان القرون الانتهن ؟
أم نحن اصحاب المباديء
ويا أم ضفاير قودي الرسن ؟
هل نحن جادين في الوطن ؟
هل نحن اخوان في الوطن ؟
هل نحن سيان في الوطن ؟
هل نحن اخوان في المحن ؟
هل نحن انسان الوطن ؟
ام نحن من جان نمتحن ؟
من نحن.. يا هذا الزمن ؟ يا ام مصايب قودي الرسن ؟
واهتفي... يا سيدي الحسن ؟

[ود القضارف]

ردود على ود القضارف
[قال مسلمين قال] 12-04-2014 04:55 AM
ابداع


#1162208 [ود القضارف]
4.88/5 (6 صوت)

12-03-2014 07:27 PM
من طواقي الجبهة من دقن الترابي
من اباريق تدلق الدم في المواعين والكبابي
من حقوقنا ايتامنا من سبحة مرابي
من صدى اهات سنابل دابها في حوضا بتشابي
من قنابل نازفة في حلق الطوابي
بالقرار الأربعيني رخيص ونابي
جيتنا في اول بيان للعزة والحرية مابي
يا البشير بالشر معمد انقلابي

صوتك المسلوب مطرّق بالاراجيف والخيانة
صوتك المغضوب معلق فوق مصابيح الحزانى
وحبلك المفتول مصنّع من دقون تحت الديانة
جيتنا في تهريج برامج هشة مهدود حيل كيانا
من كتاب عرابي يتاجر بالديانة

والعصابة كلابا تنبح والقوافل ما بتهابا
ماشه وماشه وفي طريها دبمه للوعى ارتهانا
مهما حبلك زاد متانة
مهما مشنقتك تدلت ما حترفعك مكانه
انت ماذاكرت ماضي زمن رفاقتك في الخيانة
يوم هبوب الريح على زمن المهانة
دكت الحصن المحصّن بالزنازين والعيون
بالمكايد والظنون
بالطموحات المهابي

[ود القضارف]

#1162185 [ود الركابي]
4.50/5 (4 صوت)

12-03-2014 07:03 PM
والله يأمي ماخليتي لينا الا الطرح .. وحقك قلعتيهوا حمرة عين . ابشري لامن يسمعوا كلامك ده بيعطوك قطعة ارضك علشان يسكتوك انت عارفه ياوالده هم مابيحبوا الشوشرة ابشري حقك وصلك . سبق وزكرت في الراكوبة بأن كثير من حريمنا ارجل من رجال كثر .. الله يحفظك اعطيتينا درس ..

[ود الركابي]

#1162179 [ابونضال]
5.00/5 (9 صوت)

12-03-2014 06:45 PM
يجب ان تقوم النساء بحملة ( البصوت ما راجل) وتوزيع اكياس الحنة للمصوتين امام مراكز التصويت وفي. الاحياء ومقاطعتهم ونبذهم اجتماعيا... لتبدء الحملة من الان...

[ابونضال]

ردود على ابونضال
Saudi Arabia [الجعلي الصاحي] 12-04-2014 02:22 AM
وما تنسى الطلح والشاف والدلكة لكل من يقترب من مركز تسجيل او تصويت


#1162169 [Khalid Ali]
4.88/5 (4 صوت)

12-03-2014 06:33 PM
افووو كلامك دى فوق العين والرأس نحن اولاد رجال السودان اذا اتغشيتا 26 سنه من الخونه عملاء التنظيم العالمى للكيزان ، اليشفوا مننا والله الناس والتاريخ يذكروا لمدة الف سنه بنفك غبينتك ونحن رجااااله .

[Khalid Ali]

#1162152 [radona]
3.50/5 (3 صوت)

12-03-2014 05:59 PM
ياله من قسم سيبر الله قسمها
لقد قالت مالم يقله الرجال
على ايتها حال من الواضح ان الشعب السوداني قد اجمعوا على قلب رجل واحد على مقاطعه اتخابات الحزب الحاكم
ولكن
الانتخابات قائمه ونتائجها معروفه سلفا
ولكن الفرق بينها وبين انتخابات 2010م كبير وخطير ومن المرجح ان يكون يوم الانتخابات هو اليوم الموعودلم يعد الشعب ليحتمل المزيد

[radona]

#1162138 [Salah El hassan]
5.00/5 (6 صوت)

12-03-2014 05:44 PM
بأسم الدين كبرت الكروش
انتفخت الاوداج
كبرت الارداف
ذادت المليارات
باسم الدين ملأتم الشوارع
والحوارى و الطرقات
و الخيران و المستشفيات
ومكبات النفايات
بأطفال مجهولى الأباء
مجهولى الامهات
بلا هويات .....؟
تنهش اشلاءهم البريئة
القطط و الكلاب الضالات
بأسم الدين ستلعنكم الملائكة
من فوق سبعة سموات
و البشر وكل المخلوقات

بأسم الدين
باسم الفقراء
بأسم الشعب
بأسم المسحوقين
و المرضى فى المستشفيات
وضحايا الامطار و السيول و الملاريات
و المشردون فى مناطق
التعدين و الغابات
لعنكم الله فى الحياة وفى الممات
الشعب لن يغفر لكم
والله لن يغفر لكم
وكل الرسل و الانبياء
والقران و الآنجيل و التورات

انهض يا شعب
و اقتلع دولة الفاسدين
ومؤتمر وطنى الشواطين
واللصوص و المنافقين ؟
نريد وطن لكل السودانيون
بالحرية و الديمقراطية
وليس بالتمكين ؟
انهض ياشعب انهض ياشعب

[Salah El hassan]

#1162126 [عدو الكيزان]
5.00/5 (3 صوت)

12-03-2014 05:32 PM
إنهن مهيرات السودان نسوان الرجال خرجن باصواتهن عاليا فالن لا للإنتخابات ،، والبيمشي برضو ماراجل .

كفيتي ووفيتي يا أماه.. الدور بقى على الرجال ماذا أنتم فاعلون ؟

[عدو الكيزان]

#1162123 [جنوبي]
5.00/5 (6 صوت)

12-03-2014 05:28 PM
الله يحفظك يمه ويغتيك .. ويجعل نهايتهم قبل يومك وتشفي غليلك ..
نحنا لو رجال يمه ما كان حكمونا 25 سنة ويطمعوا في المزيد !!
المقاطعة تعطي السفلة فرصة التزوير ولكن نصوت لغير ( الحقير ) إن وجد غيره او اتلاف ورقة التصويت لقطع الطريق .. هذا إن لم يقم السفلة بتغيير الصناديق بأكملها ..!
هاكي درقتي واديني رحطك فانا لا استحق الدرقة بعد ما قلتي ..

[جنوبي]

#1162118 [ابومحمد]
5.00/5 (7 صوت)

12-03-2014 05:25 PM
لقد قالتها بشجاعة ولنحزو حزوها وليخرج الشعب يوم الانتخابات في مواكب هادرة في كل الولايات ويقولها لا للعصابة الحاكمة ليعلم العالم ان الشعب قد لفظهم

[ابومحمد]

#1162115 [ابومحمد]
4.75/5 (8 صوت)

12-03-2014 05:21 PM
لقد قالتها بشجاعة ولا يصوت لهم وليخرج الشعب يوم الانتخابات الى الشارع في مواكب ويقولها لا للحزب الحاكم ليعلم العالم ان الشعب يلفظهم هلا فعلناها اكراما وعزة لامهاتنا واخواتنا وزوجاتنا وبناتنا ولنجعل من ذلك اليوم يوما للثورة ضد العصابة الحاكمة

[ابومحمد]

#1162104 [Flowers]
5.00/5 (6 صوت)

12-03-2014 05:13 PM
والله أنتي أرجل من الشاويش ولكن للأسف شعبك جبان وكسلان وخامل وبتاع رقص وهز وسط وهو جائع وعاري ومريض يجمعهم ندي القلعة ويفرقهم خوفهم من كلاب الشاويش وينتظرون أن ينزل الله عليهم جنوداً من السماء .. الله يحفظك ويحميك !!

[Flowers]

#1162089 [أسمر جميل فتان]
5.00/5 (7 صوت)

12-03-2014 04:59 PM
يا يمه والله وراك رجال وجنس كلامك ده هو البدينا أمل في باكر ...

وعشان خاطرك عيونك يمه بخوض النار ...

واشيلك يمه في كتفي وشلوخك ديل افتخر بيهم واقول دي ياها أمي وتاج راسي

لك التحية ... ومادام طلعتي يمه تاكدي تماما انو ايام الخلاص قرررررررربت

تعبنا من النفاق والشتائم الجايانا من حكومة السجم وتعبتنا الغربة بالجد جد

وخلينا نقارن بس ما بين كلامك وكلام عمر البشير بتاع امبارح ونشوف الرجالة وين دربها

[أسمر جميل فتان]

#1162077 [مهدي إسماعيل مهدي]
5.00/5 (12 صوت)

12-03-2014 04:49 PM
ما رأي الأصم؟
أم أنه أصم بحق وحقيقة؟!!

لا أعتقد أنه يوجد في السودان أتفه من هذا الأصم، سوى علي عُثمان (ضرة نافع) الذي رشح البشير نكايةً في ضرته..

هذا زمانك يا مهازل فامرحي.

[مهدي إسماعيل مهدي]

#1162062 [nafissa]
4.50/5 (2 صوت)

12-03-2014 04:31 PM
أختي الكريمة لله درك

[nafissa]

#1162059 [المهاجر]
5.00/5 (2 صوت)

12-03-2014 04:29 PM
هؤلاء أمهاتنا, أمهات مولانا سيف الدوله حمدنالله وفتحي الضو و كمال الجزولي و شوقي بدري , حفظك الله يا أمي!

[المهاجر]

#1162055 [ثورة محمية بالسلاح - كاودا وبس]
4.94/5 (10 صوت)

12-03-2014 04:28 PM
أقسم بالله اذا شربت دم البشير غبينتي ما بتنتهي واذا حرقت نافع بالبنزين ما بتنتهي ... عندما شفت الفيديو وقبل أن أكمل أقشعر بدني ومسكت رأسي بكلتا يدي ونزلت مني دمعة ساخنة ولدي غبن سنين طويلة 26 عاما من القهر والذل تحت نيران الكيزان العملا للغرب والشرق الماسونيين تجار الدين ... باعو الوطن بثمن بخس وفقدنا كل شيء ... والبشير يحاول يبرر تدميره لمشروع الجزيرة العملاق وتشريد العمالة الماهرة بأنهم تربية شيوعيين ... يا البشير هل مسلم بحق وأفضل من الشيوعيين أنت قتلت الناس وجوعتهم وسرقت قوت عيالنا وسرقت نوم عيوننا ومستقبلنا ووأدت أحلامنا وأشواقنا في بلد حر ديموقراطي كنا بنحلم بيهو ولا زلنا نحلم بيهو بعد كنسك وكنس حثالتك وعفنك ووسخك يا ... البشير لا يستحق أن يطلق عليه لقب رئيس ببساطة هو حرامي سارق سلطة وثروة فقط ... يمكن يصلح أن يقال له زعيم عصابة وثلة من الصعاليك والمجرمين الذين يتدثرون باللحي ونسائهم بالعبايات ولكن من جوه ومن تحت كله فارغ ... كلما أتذكر جحر وعود القذافي أشعر بالراحة بان حقنا لن ولم يضيع ولكل طاغية نهاية ... نهاية مرة

[ثورة محمية بالسلاح - كاودا وبس]

#1162046 [كاره الكيزان محب السودان]
2.75/5 (6 صوت)

12-03-2014 04:15 PM
والله يا أمي، أنت أفضل من كل أزلام النظام وأذناب الجبهة الاجرامية.

لو تحلى أفراد الشعب السوداني بشجاعتك هذه لما جثم على صدورهم هذا الكابوس اللعين أكثر من رقع قرن.

أتمنى ان يشحذ كلام هذه المناضلة الشريفة الههم في نفوس الشعب السوداني ويهب لتخليص وطنه من قبضة هؤلاء الفسقة المخانيث.

[كاره الكيزان محب السودان]

#1162044 [الفاروق]
5.00/5 (3 صوت)

12-03-2014 04:13 PM
ابشرى الحمد لله ماحصل ومايحصل منى ويكفى انتى امرأة عرفتى الحاصل فكيف يعرف المداهنون واقع الحال اليوم ؟ انشاء الله رحمة الله تخرج السودان من الوضع المشاهد بأقل الخسائر فى الارواح .

[الفاروق]

#1162038 [ظلال النخيل]
4.50/5 (7 صوت)

12-03-2014 04:08 PM
ياناس هوي
يا ناس هوي

يا شعب
يا امة
يا خلق

سمعتوا كلام خالتنا ولا ما سمعتوه ؟؟؟ كان ماتوا عشرة وسلموا مية مش اشرف ليكم والله كلام اجبرني على البكاء ..... الله الله الله

يا جماعة خالتنا دي اسمها منو عشان نخلد اسمها في التاريخ كبطلة ومناضلة .
الله يحفظك ويحفظ اولادك ويبارك لك في صحتك وعافيتك ... وكل الشعب السوداني المناضل اولادك وكلامك ده سمعناهو ووعيناهو ابشرررررررررررررررررررررري

[ظلال النخيل]

#1162024 [عصام]
5.00/5 (2 صوت)

12-03-2014 03:59 PM
إذا صوت السودان كله بلا ...فهؤلاء قادرين علي أن يبدلو صناديق الإقتراع بليل ....
هل تعلمون أن هنالك صناديق بديله جاهزة ومعده مسبقا لهذا اليوم ...فتشوا في الحائط علي منفذ مصصم خصيصا لتمرير هذه الصناديق ...مطلي بطلاء الجدران ...لا يعلمه إلا هم ...
ولقد حدث ذلك عندما كانت الأحزاب تحرث الصناديق بالخارج وعلي البوابة الرئيسة ...
إذا بهم يستبدلونها من خلف المبني ...طوقو المبني من كل الجهات ...
سوف يسقط هولاء أو تسيل الدماء من أجل السودان ...
لك العزه ياخالتي ...والجمرة مابتحرق غير ال واطيها...!!!!

[عصام]

#1162021 [الالم]
4.00/5 (2 صوت)

12-03-2014 03:57 PM
التحـــــــــــية للخالــــــــــة
الهم دمر كل من شارك فى دمار الوطن الجميل
اللهم عليك بالكيزان فانهم لا يعجزونك
اللهم آآآآآآآآآآآآآآآآآآمين ,, اللهم أجعلهم يشتهون الماء ولا يستطيعون شرابها ويتمنون الموت من شدة الالم فلا ينالونه ,, اللهم عذبهم بكل أم بكت أنصاف الليالى على فلذة كبدها أو زوجها أو أبيها ,, اللهم عذبهم وزبانيتهم بحق كل فم جاااع ,, وبطن قرقرت ومريض مات من عدم أستطاعته توفير الدواااء اللهم عذبهم بحق كل زفرات شوق وبعاد يعانيها ابناء المهاجرين والمتغربين الفارين من الوطن بسبب سياساتهم وأفسادهم ,, اللهم أجعلهم يشتهون الطعام فلا يتذوقونه بحق كل شبر من أراضى السودان التى باعوها والتى حبسوا عنها الماء فصارت بووورا تشكوهم لربها ,,, اللهم أنا غير شامتين ولكن أمرتنا بالدعاء على من ظلمنا لذا دعوناك ,, فأن كنتم أيها السودانيين تظنون أن البشير والكيزان ظلموكم فعليكم بالدعاء فأنه أمضى سلااااح ,,أدعوا عليهم بالويل والثبوور وعظائم الامور من سرطان وأمراض

الترابى .. البشير .. على عثمان .. نافع .. الجاز .. الزبيرين .. ربيع .. امين حسن .. غندور
قطبى .. مصطفى اسماعيل .. بكرى .. الخضر .. احمدهارون .. عثمان كبر .. وقوش .. والمتعافى ودوسة .. وسبدرات .. ومامون حميدة .. وحاج ماجد سوار .. وكل باقى التنابلة
وكل من اشترك فى دمار وتشريد محمد احمد دافع الضريبة

[الالم]

#1162020 [الالم]
1.00/5 (1 صوت)

12-03-2014 03:56 PM
التحـــــــــــية للخالــــــــــة
الهم دمر كل من شارك فى دمار الوطن الجميل
اللهم عليك بالكيزان فانهم لا يعجزونك
اللهم آآآآآآآآآآآآآآآآآآمين ,, اللهم أجعلهم يشتهون الماء ولا يستطيعون شرابها ويتمنون الموت من شدة الالم فلا ينالونه ,, اللهم عذبهم بكل أم بكت أنصاف الليالى على فلذة كبدها أو زوجها أو أبيها ,, اللهم عذبهم وزبانيتهم بحق كل فم جاااع ,, وبطن قرقرت ومريض مات من عدم أستطاعته توفير الدواااء اللهم عذبهم بحق كل زفرات شوق وبعاد يعانيها ابناء المهاجرين والمتغربين الفارين من الوطن بسبب سياساتهم وأفسادهم ,, اللهم أجعلهم يشتهون الطعام فلا يتذوقونه بحق كل شبر من أراضى السودان التى باعوها والتى حبسوا عنها الماء فصارت بووورا تشكوهم لربها ,,, اللهم أنا غير شامتين ولكن أمرتنا بالدعاء على من ظلمنا لذا دعوناك ,, فأن كنتم أيها السودانيين تظنون أن البشير والكيزان ظلموكم فعليكم بالدعاء فأنه أمضى سلااااح ,,أدعوا عليهم بالويل والثبوور وعظائم الامور من سرطان وأمراض

الترابى .. البشير .. على عثمان .. نافع .. الجاز .. الزبيرين .. ربيع .. امين حسن .. غندور
قطبى .. مصطفى اسماعيل .. بكرى .. الخضر .. احمدهارون .. عثمان كبر .. وقوش .. والمتعافى ودوسة .. وسبدرات .. ومامون حميدة .. وحاج ماجد سوار .. وكل باقى التنابلة
وكل من اشترك فى دمار وتشريد محمد احمد دافع الضريبة

[الالم]

ردود على الالم
Sudan [nagatabuzaid] 12-04-2014 04:54 AM
اللهم اميييييييييين


#1162016 [دولار]
1.00/5 (1 صوت)

12-03-2014 03:54 PM
و الله لامن شعر جلدي وقف
ياهو دة السودان والسودانيين
مش بني كوز الانجاس تجار الدين

[دولار]

#1162013 [ودامدرمان]
4.00/5 (2 صوت)

12-03-2014 03:53 PM
والله موقف يشرح القلب يابت ملوك النيل ربنا يديك الصحة والعافية

[ودامدرمان]

#1162005 [محمد احمد]
5.00/5 (1 صوت)

12-03-2014 03:47 PM
حرم وعلي الطلاق بالتلاته ما اصوت

[محمد احمد]

#1161999 [أبوقرجة]
5.00/5 (1 صوت)

12-03-2014 03:42 PM
بت رجال والله ..

[أبوقرجة]

#1161989 [osama dai elnaiem]
5.00/5 (3 صوت)

12-03-2014 03:33 PM
عافاك الله وأبر قسمك فهو قسم لو تعلمون عند الله عظيم فقدر هذه الشعثاء الغبراء عند الله باذنه الكريم عظيم ونسأل الله ان ينصرها وهو باذن الله لا يضيع اهل السودان فهو الجبار القاهر فوق عباده.

[osama dai elnaiem]

#1161985 [بلادي وإن جارت علي عزيزة]
5.00/5 (3 صوت)

12-03-2014 03:32 PM
الله يديك العافيه ياخالتي وان شاء الله نحتفل بيك في السودان الجديد واوعدك ياخالتي امام الله انو ما اصوت في الانتخابات الجايه .....عشه كلمينا ميري ذكرينا يامهيره بت عبود ويا حبيبة قلبي ياسودانية ياأسمى معاني في زول بيعاني
ياود ضكران يابت دغرية وانا إن سامعاني فضلت
أغاني غبش فقرية وروح غانياني حويتك منك
يادافعاني براحة إيديا كما الأشواق وياجابداني
برفق علي ومابتحير بين الفوق وبين التحتانية
إلامغير ولاعقوق ولاكفيف الإنسانية
ومنك وين ياكاشفة عيني بنور الالفة ضياء الحنية
وحلم العالم ناس تتسالم والبني آدم صافي النية
والأطفال الناشفة ضلوعها أطمن روعها
وتبدأ تغني غناوي البكرة الكم مسموعة....
معا لوطن يسع الجميع ضد الناس السرقو ارضنا

[بلادي وإن جارت علي عزيزة]

#1161978 [ود شندي]
5.00/5 (6 صوت)

12-03-2014 03:25 PM
معاً جميعاً لحملة علي الطلاق صوتي مابديهو , وعلي الحرام وطلقانة ام وليداتي بالتلاتة لا انا لا هي صوتنا مابنديهو للبشير ,ابشري بالخير يمه حرم وليداتك رجال

[ود شندي]

ردود على ود شندي
Saudi Arabia [المغبون] 12-03-2014 05:05 PM
حكاية التصويت دى كلام فاضى ساكت بس عشان يقولوا انحنا عملنا انتخابات وشغلنا مظبوط
وديمقراطى والحقيقة انو الجماعة ديل ما بيغلبم شئ يعنى بانتخابات هم حاكمين اربعة سنين اخرى وبغير انتخابات هم حاكمين يعنى الناس مفروض ما تشتغل بالموضوع ده كثير وزى ما قالوا هم المادايرنا يجى يقلعنا يعنى المسألة مسألة قلع بس كيف ينقلعو دى الدايرين الناس يفكروا فيها اما اصوت وما اصوت دى ضياع وكت ساكت وتشتيت افكار ساكت .


#1161974 [مراقب عن كثب]
5.00/5 (3 صوت)

12-03-2014 03:24 PM
جدعة عفيت منك.

[مراقب عن كثب]

#1161968 [مدحت عروة]
4.75/5 (5 صوت)

12-03-2014 03:17 PM
انت والله ياحاجة بمية راجل وتستحقى الاحترام واقسم بالله انه مافى زول فى الحركة الاسلاموية السودانية يستحق ادنى درجة من الاحترام او التقدير!!!!

[مدحت عروة]

#1161958 [حزين جداً]
5.00/5 (8 صوت)

12-03-2014 03:07 PM
سودانية أصيلة شريفة وتعبر عن رأيها بصدق . . . أين نحن الآن من دول الخليج

التى ظهرت في السبعينات بس ...اليوم أبراج عاليه تناطح السحاب ...

وحياة متقدمه وعيش رقيد ... ونخن لا زلنا نتخبط ونكذب على الشعب الغلبان

والمصيبه نكذب بإسم الدين ... وإلى متي هذا النفاق ؟؟؟؟

نحن كل صباح يوم نرجع 1000 خطوة للخلف ...والدول الصادقة تتقدم 1000 خطوة للأمام

ناس ما قادره تاكل ولا تتعالج ولا تعلم أبناءها ...وناس لا يركبون إلا السيارات

الفارهه ولا يشربون إلا الماء الصحي المستورد ( ماء الأفيان ) القارورة الصغيرة

ب 15000 جنيه سوداني ... والأبناء بأحسن المدارس خارج الوطن ...والعلاج خارج الوطن

ونحن نكافح ونناضل من أجل لقمة فقط لنسد بها رمق الجوع الكافر ...

وأيضاً نرشح الريس لخمس سنوات أخري ؟؟؟؟

وإلى متي ؟؟؟؟؟؟ مفروض عمر البشير يحس ويقول يا جماعة شوفوا ليكم شخص ثاني

راضع من لبن أمو عشان ينقذ السودان إنقاذ حقيقي ... وليس إنقاذ الإنقاذ!!؟؟؟

إلى متي يا جماعة ؟؟؟ بعد ما نحن نتلحس ولا شنو ... و حتى الأمور تظبط ؟؟؟

يا رب الفرج .... يار أفرجها علينا ونحن عبادك المظلومين ...

[حزين جداً]

#1161957 [مقهور]
5.00/5 (4 صوت)

12-03-2014 03:05 PM
يا هو ده السودان ... أبشري يا أم شلوخ يا بت ملوك النيل ... يا أصيله ... ياريت لو في البلد في راجل بشبهك ...

[مقهور]

#1161956 [الحقيقة مرة]
4.50/5 (4 صوت)

12-03-2014 03:05 PM
خالتي دي شدة ما زعلاناة كان لمت في الخدر الا تخلي ريحتو طير وكان لينا مراد يا خالة نقبضو ونشنقلو ليك من كرعينو التجضمي وشو السمين دا وتدقي بالمفراكة قليل الادب

[الحقيقة مرة]

#1161952 [بنت الناظر]
5.00/5 (5 صوت)

12-03-2014 03:02 PM
أيتها المرأة الشجاعة شجاعتك ذكرتنى بالمناضلة الأستاذة فاطمة أحمد إبراهيم حفظها الله وحفظك ..لقد أدخلتى فى نفوسنا الأمل وحسستينا أن السودان مازال بخير ...لك منى مليون تعظيم ومليون سلام ..

[بنت الناظر]

#1161942 [هجو يوسف عبدالله]
5.00/5 (5 صوت)

12-03-2014 02:56 PM
أحبك يا أمي و بك أرفع رأسي . وعلي الطلاق ما أصوت و لا أشارك . وأنا ما بخذلك ولا بجيب ليك الهوان

[هجو يوسف عبدالله]

#1161941 [علي البرقاوي]
5.00/5 (4 صوت)

12-03-2014 02:56 PM
والله عفيت منك يا الخالة وربنا يطول عمرك ويبارك في ذريتك

[علي البرقاوي]

#1161939 [عزة]
5.00/5 (4 صوت)

12-03-2014 02:55 PM
اقترح أن نقوم بحملة ضد الإنتخابات بهذا التحدي "البيصوت ماراجل" وتقيف كل النساء رافعات اليافطات ونقود حملة إفشال الإنتخابات

[عزة]

ردود على عزة
European Union [لواي سلسلن] 12-03-2014 03:29 PM
بل "البصوت للبشير ما راجل"
ولنصوت لمن نراه اهلا لذلك



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 212>
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة