الأخبار
أخبار إقليمية
بعد التوقيع على نداء السودان ..بيان من الجبهة الثورية
بعد التوقيع على نداء السودان ..بيان من الجبهة الثورية



12-04-2014 05:36 AM

بسم الله الرحمن الرحيم
الجبهة الثورية والقوى السياسية السودانية توقع على إعلان باريس وعلى وثيقة نداء السودان
فى إطار البحث عن حلولٍ للأزمة السودانية المستفحلة، وإعلاءاً لما يحتاجه شعبنا من دعم لإرادته وقواه السياسية وتلبيةً لتطلعاته وآماله وشحذاً ودفعاً للعمل الوطنى المشترك من أجل إنتشال الوطن من التردى الذى وصل إليه تحت ظل نظام الحزب الواحد، وقعت الجبهة الثورية، مع كل من حزب الأمة وقوى الإجماع الوطنى ومنظمات المجتمع المدنى، على وثيقة نداء السودان، حيث إتفقت الأطراف الموقعة على الوثيقة على العمل من اجل تفكيك نظام دولة الحزب الواحد لصالح دولة الوطن والمواطنه المتساوية عبر النضال الجماهيري اليومي وصولاً للإنتفاضة الشعبية واضعين قاعدة صلبة تنطلق منها مسارات تامين الحقوق للشعب السوداني في التحرر من الشمولية والعنف والسعى نحو ديمقراطيةٍ راسخةٍ وسلام عادل وتنمية متوازنه والتزمت القوى الموقعأ على اولوية انهاء الحروب والنزاعات وبناء السلام على أساسٍ عادلٍ وشاملٍ، بجانب الإلتزام بالحل الشامل لقضايا المناطق المتأثرة بالحرب فى دارفور وجبال النوبة وجنوب النيل الأزرق.
كما وقعت الجبهة الثورية على النسخة الأصلية لإعلان باريس مع كلٍ من الحزب الوطنى الإتحادى ومنظمة غايات السلام والتنمية والتعمير والحركة الإتحادية الوطنية والحزب الديمقراطى الليبرالى السودانى، مجتمعة نيابةً عن القوى الوطنية للتغيير.
تؤكد الجبهة الثورية أنها ستمضى قُدماً فى تعزيز علاقاتها مع القوى السياسية السودانية من أجل الوصول إلى حلٍ لكل أزمات البلاد وتحقيق سلامٍ مستدام وحل القضايا الإنسانية وإيقاف الحرب والتوصل إلى أرضية مشتركة عبر رؤى واضحة ومن ثم الخروج بمواقفٍ محددة الأهداف والرؤى حول حوارٍ شامل لا يقصى أحد.
التوم هجو
نائب الرئيس ومسئول الإعلام بالجبهة الثورية.



تعليقات 4 | إهداء 0 | زيارات 2490

التعليقات
#1163249 [Big Mouth]
0.00/5 (0 صوت)

12-04-2014 11:30 PM
اكرر المقترح ده مره تانيه و هو (عصيان مدني شااااااااامل) يبدأ بالقطاع الخاص، كل صاحب متجر و محل و حرفه و اي مهنه غير حكوميه يضرب عن العمل لمدة اسبوع او اثنين بهدف خلق فجوه اقتصاديه و تعطيل حركة السوق و بالتالي ارباك الحكومه و اصابتها بالشلل. من المهن الحرجه ذات الأثر السريع في انجاز العصيان عندكم قطاع المواصلات الداخليه و السفريه، تجار المواد الغذائيه من جمله و قطاعي في الاسواق و الاحياء (الكناتين و البقالات) و ديل ياريت يضربو بعد ما الناس تشتري المخزون الغذائي اللي حنذكرو لاحقا. اضف لذلك اصحاب المحال التجاريه (الملابس، المغالق، الصياغ، الخ) ديل طبعا مفروض اول ناس يبدو بالاضراب عن العمل لأن المهن بتاعتهم غير حرجه لذلك مفروض يتكلو من بدري و هم ما اقل اهميه لانهم كتيرين و موزعين في جميع الاتجاهات و غيابهم حيدي العصيان صوره اقوي و اوضح.
الهدف من البدايه بالقطاع الخاص هو عدم التزامهم للحكومه باي قيد و هم لحد بعيد احرار في العمل او التوقف عنه مقارنه بالقطاع الحكومي. بعد دخول القطاع الخاص في العصيان بايام قليله حتظهر آثارو علي سير الدوله و بصوره تلقائيه حيدخل القطاع الحكومي في العصيان و يصبح شامل و يشل الدوله و يعطل كل آليات الحكم و ما يفضل للكيزان خيار غير يتكلو علي الله.
التجهيزات اللوجستيه:
قضاء اسبوعين او اكثر في البيوت بدون حركه و انتاج حيخلق حاله استهلاكيه بحته وسط المواطنين، عشان كده اقترح العمل مبكرا علي تخزين مستوي ادني من المواد الغذائيه (خصوصا الجافه) و الماء و بقية المستهلكات اليوميه بما يكفي لاسبوعين او اكتر.
التكاليف الاقتصاديه:
كتير من الاسر في الاحياء ممكن ما يكون عندها حق الفطور ناهيك عن مخزون عذائي لقريب شهر. اقترح انو الناس في الاحياء تنسق و الناس الحالها ميسور تشايل الحموله مع المعدمين و الناس كلها تتكافل بنفس مبدأ (الضرا) بتاع رمضان. و الفقر ما مفروض يكون سبب لادانة الفكره لأننا في الحالتين جيعانين و الشعب كلو جيعان و لو جاع زياده ما فارقه معاهو احسن يجوع جوعه واحده تودي الطير ديل في ستين الف داهيه.
من الاساليب المجديه لتخفيف التكاليف الناس تحاول تركز علي الاغذيه المالئه الغير مكلفه و ذات نسب الياف عاليه تجنبا لامراض البطن في ظل حالة العصيان. ضروري جدا جدا الناس تقلل الحركه اثناء الفترة دي و كل ما قلت الحركه قلت حوجة الجسم للطاقه بالتالي الغذاء المستهلك.
الجدوي من هذا النوع من العصيان:
اولا:
الناس تعبانه و هلكانه و بصراحه دخلها خوف بسبب شراسة و دموية النظام من اول ما استلم البلد، و كل زول بقي شغال بسياسة الخواف ربي عيالو، و لا يلام احد.
تانيا:
النماذج الثوريه المعاصره في الدول العربيه اثبتت وجود مصالح كتيره جدا بتختلط مع الثوره و بتفسد اهدافها الأوليه. عشان كده المواجهه المباشره حتجيب خساير غير محدوده في الارواح و تختلط اهدافنا بالانتقام و الغضب الغير موجه و ناس تقوم تتحالف مع قوي خارجيه و اكيد في مواهيم حيضربو لناس داعش ههههههه و بقية الصور النمطيه لفشل الثورات في دول الجوار. لذلك العصيان المدني المقترح بالصوره دي حيمنع او في اسوأ الفروض حيقلل من درجة المواجهه المباشره مع مليشيات الكيزان و بالتالي تقل الخسائر في الارواح (الفيروس المدمر لثورات الربيع).
تالتا:
السودان ليهو خصوصيه اثنيه لا ينكرها احد، و الجبهه القوميه الاسلاميه اشتغلت في المجال ده و بدعت لدرجة انو بقينا نشوف صور في الفيس لقبايل تمثل بجثث اولاد عمومتهم. القبليه اتفشت و حصلت تصدعات في البنيه السكانيه. بالتالي السودان لا يملك مقومات صلبه لتأسيس ثوره ناجحه و ده ما انكار لاكتوبر و ابريل انما اعتبارا لسياسات التفريق و التشتيت اللي عملوها الكيزان في فترة حكمهم. زمان ما كان في قبليات و حساسيات و الانسان السوداني لا زال قادر علي صنع الثورات انما الاجواء مشحونه و ممكن تحيد بالثوره عن مسارها. عندك ليبيا و اليمن و سوريا امثلة ثورات فاشله رغم انو نظامهم القبلي ما معقد زي العندنا في السودان، فما بالكم لو حصلت ثوراتهم دي في السودان في ظل الشحن القبلي؟؟؟ كارثــه اكيد!
رابعا:
من اهم الاشياء انو نتيجة العصيان حتكون ملك حصري للشعب بمجهودو الخاص و مافي زول حيكون عندو عين يركب الثوره او يدعي ملكيتها ولا يجي يفرض نفسو لأنو من اسرة عريقه ولا حزب عتيق، خلاص الحنك ده بقي ما بياكل معانا، و الشعب حيكون خلق حدود واضحه لدور المعارضه في الثوره عشان ما تتكرر تاني نفس الاخطاء.
خامسا:
تمن اي مواجهه مباشره مع النظام حتكون خسائرها فادحه جدا جدا، لسبب بسيط انو السودانيين ما عندهم جيش ينحاز ليهم. الجيش البنحاز للشعب كلو نزل الصالح العام او اترفد. الشايفنهم ديل كلهم عبدة النظام و مرتزقه متخصصه في القتل مقابل المال و لكم في الدعم السريع اكبر دليل بقيادة تاجر الحرب القذر سيء السمعه حميدتي.
اذا نحنا ما عندنا جيش و لو نزلنا الشارع و قفلنا عليهو حنكون قافلين علي كرت ميت و الكلاب الشايفنهم لابسين الميري ديل و الله ما فارق معاهم يصفو الشعب السوداني كلو طالما العداد رامي، و الما مصدق يراجع احداث سبتمبر.
القياده و تحديدها:
اي مقترح يبرز للسطح لتغيير اي نظام سياسي لا يمكن ان ينجح بدون قياده قويه و مؤثره و في نفس الوكت درجة الاتصال لا بد تكون عاليه جدا مع الجمهور بحيث انو لو القياده وصلت لأي قرار يصل للناس باسرع فرصه. مسألة التواصل مع الجمهور ما اظنها مشكله في وجود الانترنت و شبكات التواصل الاجتماعي، لكن مسألة تحديد القيادات فيها صعوبه لأنو الفكره لا زالت في طور البدايه، و عشان ما نتحصل علي قاده ناجحين لادارة العصيان لا بد ان نتخذ نقطة انطلاق مصحوبه بتنوير اعلامي و عرضها علي اكبر عدد من الناس في السودان (الفيسبوك، الفضائيات.. الخ). ضربة البدايه الاعلاميه حتدي المشروع دفعه قويه بعد داك كل شي حيكون ساهل بعد ما القيادات تتفق علي ساعة الصفر لبداية العصيان لكن علي شرط القيادات تكون محدده و متفانيه في الاداء و يتم جمعهم علي ميثاق شرف بتسليم نتيجة العصيان ايا كانت للشعب و الاتفاق علي ان الشعب هو المالك الحصري لهذا المشروع.
شرعية الفكره مفروض تكون مستمده من نبض الشارع و تجمعات المواطنين في الميادين اللي لازم تكون اصواتهم مسموعه و كل قرار منذ بداية العصيان مفروض الناس تصلو عبر الديمقراطيه و التصويت علي الهواء و كده الناس حتكون اتبنت الديمقراطيه من الصفر عشان تكون في النهايه ممارسه طبيعيه في مرحلة اعادة بناء الدوله.
عموما ما عايز استرسل في التفاصيل و استقراء المستقبل لأنو العلم عند الله، لكن نمد حبل افكارنا قدر النيه، و النيه خلاص الشعب و البلد قبل ما ندخل في دوامة الانقسام الكبري.
انها دعوه من اجل الوطن، فكره في طور التكوين، قابله للتلقيح و التطعيم بكل ما من شأنه ان يحول دون السودان و الهاويه. يلا يا اخوانا ورونا رايكم و خلونا نعمل منتدي لنقاش الفكره دي او اي فكره تاني ما مهم ايه المهم كفايه رقاد و اتكاليه و استسلام.

[Big Mouth]

#1162935 [الشعب تعب]
0.00/5 (0 صوت)

12-04-2014 04:48 PM
مافي زول مسكين
بخلي ايالو جعانين وهو برضو جعان يقدر يمرق في الشلرع يضحي بنفسه يقول طيرطير يا بشير يطيرو هو ذاتو فبل ما يطير الناس ديل مقصرو وقفو مع احزاب المعازضة وعملو مظادرات عديدة وما في احد دفع عنهم وما تو ما في واحد يزكرهم
وشاركو في حرك المسلح با سم الحرية والحقوق ولم يتحقق ١١سنة

[الشعب تعب]

#1162845 [المغصة كاتلاني]
5.00/5 (2 صوت)

12-04-2014 03:29 PM
يا جماعة انا قلت كلامي وبكرر الناس ديل لو ما نزل دم في الشوارع ما بمشوا وتوقيعات واتفاقياتكم دي ما بتخوفم ولا بتهز شعرة من راسم .. السلاح ولا شئ غير السلاح صدقوني... والمصريين والسوريين خير دليل والليبيين خير دليل
وخير الكلام ما قل ودل....

ولكم التحية

[المغصة كاتلاني]

ردود على المغصة كاتلاني
[Flowers] 12-04-2014 04:28 PM
نعم يا أخي كلامك عين الحقيقة توقيعات وصور وأعلام ده كلو كلام فاضي أزحفو للخرطوم وسينتفض الكسالى من ثباتهم وسنقبض على اللصوص ونرجمهم جميعاً في ميدان أبوجنزير ، تعالو تعالو صدقوني الشاويش في الرمق الأخير هبو هبو هبو ولبو نداء الوطن ولو مرة واحدة.


#1162670 [سودانى شديد]
0.00/5 (0 صوت)

12-04-2014 11:06 AM
إلى الأمام

[سودانى شديد]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة