الأخبار
أخبار إقليمية
( إقبال دي منو؟)
( إقبال دي منو؟)
( إقبال دي منو؟)


02-07-2015 04:21 PM
الطاهر ساتي

:: (ده قميص منو؟)، لا أحد يرد في سوق الررواكيب، ( ده سروال منو؟)، لا أحد يرد أمام ورش الحدادين، (ده بنطلون منو؟)، لا أحد يرد من جماهير مباراة كرة القدم في ميدان الحرية، ( دي جزمة منو؟)، لا أحد يرد في السوق الكبير..أوهكذا ظل العم النور حميدة - في رائعة المبدع يحى فضل الله، أسئلة العم النور حميدة الصعبة - يردد أسئلته وهويحمل تلك الأشياء التي يسأل عن صاحبها لأكثر من أسبوعين تجول خلالهما كل شوارع المدينة..وعندما تدخلت الشرطة وصادرت السروال وبقية الأشياء، حول النور حميدة صيغة الأسئلة الي شاكلة : (السروال داك كان حق منو؟)..!!

:: وكان يزعج المارة والسيارة، إلى أن فقد عقله وصار يلقب بالمجنون..ومات النور حميدة قبل أن يعرف صاحب السروال وبقية الأشياء، وكذلك لم يعرف أهل قريته سر السروال وبقية الملابس التي صادرتها الشرطة..ولكن في غمرة هياجات العم النور حميدة المتسائلة لم تنتبه المدينة الى بعض التفاصيل الصغيرة، وهي انه في ذلك الصباح الشتوي الذي صرخ فيه العم النور حميدة باسئلته الحارقة عن صاحب الملابس كانت (عشوشة بت حارن) قد صعدت على ظهر لوري متجهاً الى الشمال وكان بالقرب منها صاحب تلك الملابس..!!

:: ويوم الخميس الفائت، عندما كان الخبر ( جهاز المغتربين و شركة إقبال يوقعان عقد دراسة جدوى بنك المغتربين)، تساءل لسان حال المغتربين بجنون : (إقبال دي منو؟)، ( إقبال دي حقت منو؟)، وهكذا كما العم النور حميدة في رائعة يحى فضل الله..ولكن حال المغتربين - حسب وقائع وتفاصيل الخبر - أفضل من حال العم النور حميدة، بحيث عرفوا أن من وقع على عقد دراسة الجدوى إنابة عن شركة إقبال مع رئيس جهاز المغتربين هو الدكتور عبد الرحيم حمدي، وذلك بصفته رئيس مجلس إدارة شركة إقبال..وعليه، ( إقبال دي منو؟) لم يعد سؤالاً بلا إجابة كما سؤال العم النور حميدة ( ده قميص منو؟).. ولذلك من السهل جداً أن يعرف المغترب وكل أهل البلد مصير ( عشوشة بت حارن)، في حال صعودها على ظهر هذا البنك و ..( تختفي )..!!

:: وعلى كل، ما ليس مهماً، متى - وأين وكيف - طرح جهاز المغتربين عطاء هذا العقد الموقع عليه من قبل رئيس الجهاز ورئيس مجلس شركة إقبال؟..صحف قبل التوقيع، لم تحمل إعلاناً يطلب فيه جهاز المغتربين عن حاجته لدراسة جدوى لمصرف، وأن على الشركات الراغبة في المشاركة تقديم عروضها وفق الشروط (كذا وكذا)، وأن آخر يوم للتقديم هو يوم (كذا)، وأن السيد الرئيس غير مقيد بقبول أقل أو أي عطاء آخر..فالبدايات الصحيحة هي التي دائماً ما تؤدي إلى النهايات الصحيحة، وأن يتفاجأ المغتربين في طول الدنيا وعرضها بإقبال لا يسبقها إعلان منافسة - بالكفاءة والجودة والسعر - ليس ب (بداية صحيحة).. ومع ذلك، كما قلت سابقاً، فأن هذا التعاقد المفاجئ مع إقبال ليس مهماً في أزمنة يتفاجأ فيها الوطن والمواطن بما هو ( أكبر وأعظم) ..فالمهم هو أن يُعيد المغترب ثقته في الحكومة ومشاريعها، ولن تعود هذه الثقة المفقودة ما لم يتحول جهاز المغتربين من ( جهاز جبايات) إلى ( جهاز خدمات)..!!

image


تعليقات 36 | إهداء 0 | زيارات 9628

التعليقات
#1204836 [مذهول من المهبول]
5.00/5 (1 صوت)

02-09-2015 05:52 PM
والله حيرتونا يا جماعه مره شركة امن و مرة حقت راجل بتو و مره ما عارف شنو معقول الشعب جاهل كده ؟ والموضوع بتحت تحت
النصيحه اذا جاءكم فاسق بنبأ فتبينوا !!!!
الطاهر اب صلعه بدأ المقال باسلوب شوارعي ما بعرف الزول ده صحفي كيف !!!
ثانيا حاول التلميح بان مافي عطاء طرح واعلن عنو ومش عارف شنو
والمتابع الحقيقي يعرف بانه كان هنالك عطاء شهر 8 2014 و قدمت شركة الاقبال الاستشارية
رئيس مجلسها الاستاذ عبدالرحيم حمدي فيهو
قدمت 8 شركات بيوت خبرة لهذا العطاء تم التقليص الى 3 شركات منهم الاقبال
الاولى قدمت عرض ب 8 اضعاف عرض الاقبال الثانية قدمت عرض ب4 اضعاف عرض شركة الاقبال !
طبيعي اللجنة تراعي موضوع القروش في موضوع الاختيار ثانيا استاذ حمدي خبير اقتصادي عالمي معروف و مؤخرا الشركة قامت بعمل عدة دراسات لبنوك منها عالمية فطبيعي يقع الاختيار عليها
لا دس دس لا لعب !!!
بطلوا الكذب وخلوا الجهل ورساله للقال حمدي قال نفسوا يعمل بنك لعيالو ابشرك اصلا حمدي اسس بنك حيث قام بتحويل شركة الرواد الى بنك الرواد للتنمية والاستثمار و ب3 فروع كمان
واخيرا قال تعالى
" ما يلفظ من قول إلا لديه رقيب عتيد "

[مذهول من المهبول]

#1203931 [ezr]
5.00/5 (1 صوت)

02-08-2015 12:24 PM
ياجماعة الموضوع واضح وضوح الشمس منفذ جديد للسرقة باسم الشركات الخاصة بالمغتربين والفشل قريب جدا" جدا"

[ezr]

#1203823 [عمار سليمان]
5.00/5 (1 صوت)

02-08-2015 11:00 AM
بالله يا استاذ الطاهر امانة عليك نعرف المبلغ الحتتعمل بيهو دراسة الجدوي كم ؟؟ لأني شغال في المجال دا هنا في السعودية وعملنا دراسات جدوي كثيرة لبنوك ... بس عشان المواطن يعرف حجم النهب المصلح ...

[عمار سليمان]

#1203737 [محمد فضل السيد]
5.00/5 (1 صوت)

02-08-2015 09:25 AM
بس يكفي أنها بين كوز وكوز ، والشعب بيناتهم ينضرب بالجوز .

[محمد فضل السيد]

#1203721 [السودانى]
5.00/5 (2 صوت)

02-08-2015 09:13 AM
يا اخوانا المشكلة فلوسنا بياخدوها مننا غصب يعنى لما تجى مسافر من الخرطوم لوجهتك ليفرضوا علينا لازم تودع مبلغ كذا والا ما فى ليك تاشيره يعنى يلوو ليك ايدك زى البندفع جزية .. عشان تطلع من البلد تدفع اولا والبعملة الصعبة البفتشو ليها دى ..بعدين بنك زى دا نهايتو مع نهاية الحكومة فلوسك وراحت ما بتلقاها .. اعملوا حسابكم وخليكم صاحيين ومناس كتيره مستعدة ما ترجع السودان لو كان الدفع بالغصب زى الجزية حقت النصارى زمان ..

[السودانى]

#1203719 [أبوقرجة]
5.00/5 (1 صوت)

02-08-2015 09:12 AM
اقبال دا اسم حركي لسرقة وسف أموال المغتربين..

[أبوقرجة]

#1203663 [Abdu]
3.88/5 (4 صوت)

02-08-2015 08:13 AM
التكروني ده الله يفكنا منه - بلد هامله ساي وفي السهله قاعده اذا كان زي الدباب ده ماسك زمام امور المغتربين- تأهيله شنو؟ وفهمه شنو؟ بلد عفينه ساي بس الله يكون بالعون

[Abdu]

#1203625 [مندهش أشد الاندهاش]
4.50/5 (3 صوت)

02-08-2015 07:12 AM
مشروعات كثيرة باسم المغتربين وهذه البداية .. جامعة المغتربين .. بنك المغتربين ... الخطوط الجوية للمغتربين .. لسه إنتو شفتو حاجة

[مندهش أشد الاندهاش]

#1203570 [عمدة]
5.00/5 (1 صوت)

02-08-2015 02:40 AM
طبعا الحرامى الكبير عبد الرحيم حمدى بيكون هو صاحب الفكرة لأنه يعلم تماما المغتربلن ثاروا المصدر الوحيد للدولار خاصة وأن أعدادهم متزايدة بمتوالية هندسية. معطم المغتربين خرجوا من السودان مجبرين وبالتأكيد ضحوا بالكثير والان الكرة فى ملعبنا. شخصيا لن أودع أو أحول دولارا واحدا عن طريق بنكهم وأتمنى أن أك يقاطع كل المغتربون هذا البنك وأؤكد لكم أنكم لو تعاملتم معه فستستخدم ودائعكم من العملات الصعبة لشراء السلاح بغية مواصلة الحروب وسيوده لصدور ابنائكم وبناتكم واخوانكم كما حدث فى سبتمبر فلا تنسوا أن وراء ه

[عمدة]

ردود على عمدة
[عم عبد الرحيم] 02-08-2015 11:29 AM
فعلا يا عمدة كلامك حقيقى هل تعلم ان بنك ام درمان الوطني اكبر بنك ممول لتجارة السلاح بدعم من قطر للحركات الاسلامية الجهادية فى افريقيا


#1203565 [عمدة]
5.00/5 (2 صوت)

02-08-2015 02:07 AM
طبعا الحرامى الكبير عبدالرحيم حمدى بيكون هو صاحب الفكرة أصلا لأنه لعلم تماما أن المصدر الاساسى للدولار أصبح المغتربين ال

[عمدة]

#1203545 [bluenile]
5.00/5 (1 صوت)

02-08-2015 01:03 AM
عبد الرحيم حمدى من قال مثلث حمدى يعنى قال عاوز ينمى الوسط
خلى ناس الوسط واهله الحلب يدخلوا معاهوا
اللهم اجعل كيدهم فى نحورهم
حزرى وحزارى وحزارى ايها المغتربون ابعدو من هذا الشرك

[bluenile]

#1203533 [ابولاكومة]
4.88/5 (4 صوت)

02-08-2015 12:04 AM
دراسة الجدوى بس؟؟!! انتظر ياخوي لما تسمع انه تصميم البنك يمنح لشركته حمدي الاستشاريه وينفذ المبنى بواسطة مقاولات الصفا التي يملكها نسيبه والأثاث والتجهيزات يسشتوردها من الصين والباكستان وايطاليا زوج بته الباكستاني ويدار بواسطة خبراء بنك البركة بتاع سيده الكامل وبنك فيصل - والمحاسبين من شركته في لندن - والموضوع كلو مدورنو ناس التنظيم الدولي لجماعة الاخوان المسلمين قصاد عمولة لعبد الرحيم النخناخ - فهو لا خبير ولا حاجة دا مجرد موزع ادوار مجرد سمسار سمسار - الدراسة التي سيقوم بها هي في توزيع الكعكة - كعكة تحويلات السودانيين في الخارج (المغتربين) بين الحكومة والتنظيم الدولي وتماسيح الخرطوم بمن فيهم مصريو وفلسطينيو الشتات بالاضافة لحمدي وشركاته وأسرته. دا قبل انشاء البنك ارباحه لمدة خمس سنوات قادمة الآن هي في الجيوب - وتقول لي انهيار البنوك السودانية؟؟ واسالوا حاملي اسهم بنك فيصل الاسلامي الذي تعلم فيه حمدي السفسفة واللغف وتدرب فيه على السحت واكل اموال الناس والمسلمين - كيف تبخرت قيمة اسهمهم وودائعهم - حمدي وعصابته حلب البنوك والدولة ممثلة وزارة المالية للعشرين سنة الماضية ومازال وسيظل - هل تدرون ما هي المؤسسة التي استشيرت في تحديد موقع بنك السودان (وبيع مقره العتيق القديم جوار سودان بوكشوب - مقر البنك الأهلي القديم الذي انشئ في ثلاثينات القرن الماضي الذي بيع بأبخس الأسعار - ولمن؟؟) بيع في ظرف 3 ايام - وصممت البنك الجديد في المقرن ونفذته واشرفت على عطاء انشائه وتجهيزه وتاثيثه وجلب اجهزته وخبرائه - الجواب حمدي الاستشارية الذي تديرها اسرته وعلى راسها اخواه محمد (الفيل) وعبد الحميد التهتاه - دا شغل مافيا - اما الفلاتي دا مع الحلبة اتراك البلقان ديل فموعود بالفتات والفضلات - اما المغتربين ما ليهم غير الله وعيشة السوق - دا اذا سمح لهم عبدالرحيموف بذلك.

[ابولاكومة]

#1203504 [ود الفاضل]
5.00/5 (4 صوت)

02-07-2015 10:44 PM
ياجماعة بالله تمعنوا فى الموضوع كويس ، واقرؤا مابين السطور ، حاج ماجد وعبدالرحيم حمدي والسيدة اقبال والصافي جعفر وعمر البشير الجميع يعلم ان لا مغترب واحد كامل الاهلية وعقله صحيح ميةفى المية يقوم يحول مليم واحد لهذه الهاوية المسماه بنك المغتربين ، الموضوع فى مجمله فتح باب جديد لنهب المال العام وتجنيبه فى ركن قصي من بنك السودان فى محفظة تسمى بنك المغتربين .... المغتربين تكفيهم مذلة تاشيرة الخروج من جهاز السجم والرماد بالخرطوم ويكفيهم عذاب السفارات ، واربعين عاما وهم يطالبون بان يسن لهم قانون يعطيهم حق الخروج من بوابات المواني الجوية والبحرية بعيدا عن البهدلة والمذلة وحليفة القسم على الراتب .. وكله خارج شرع الله وخارج قوانين الارض .
المغتربين يابقايا الارنئوط والشركس والغجر والفلاته اذا وقفت تحويلاتهم الشهرية الى ارض السودان لاصاب الناس الهلع والجوع ولسقطت حكومة السجم فى اسبوع واحد .. مليارات العملات الصعبة تحول الى ربوع السودان خارج بنوك الحرامية ،ولم يفتح الله عليكم يابجم بقانون واحد فى صالح المغتربين حتى تستفيد البلاد من هذه الاموال الحرة .. بل تفننتم فى السرقة وبيع الهوا فى زجاج للمغتربين ... بصراحة لااحد يثق فيكم حتى اذا اغتسلتم بماء البحار والانهار , ....

[ود الفاضل]

#1203491 [ابو ابراهيم]
0.00/5 (0 صوت)

02-07-2015 09:39 PM
هو في مغترب عنده قروش لامن توفر لشركة اقبال واتجار كان الله في عون المغترب

[ابو ابراهيم]

ردود على ابو ابراهيم
European Union [ابودعد] 02-08-2015 09:15 AM
جبتها يابو ابراهيم... هم عارفين أنو ما خلو ليكم دولار واحد ... يبقى البنك لمين؟؟؟ محتمل للغسيل


#1203483 [saif]
5.00/5 (1 صوت)

02-07-2015 09:26 PM
واللة ياطير انتو نايمين اقبال دة اسم راجل وهو باكستانى وهو زوج ابنة السيد عبد الرحيم حمدى شوفتوا بجوكم كيف وبى وين ؟؟ ياشعب يا نايم

[saif]

#1203474 [هبنقه مروح العنقالي]
0.00/5 (0 صوت)

02-07-2015 08:55 PM
علق أحدالظُرفاء قائلاً : الصوره دي ناقصه الصافي جعفر بس ! وهو من (لهط) قروش المغتربين في مشروع سُندس الوهمي وخلاهم (لافين صينيه) عشرين سنه بعدما ضيعوا تحويشة عمرهم . تاني تقول لي اقبال وعبد الرحيم حمدي وحاج ماجد ؟ على المغتربين ألا يقعوا في هذه المصيده والـ(قرصه الدبيب .. بيخاف من الحبل) .. أووووعكم !

[هبنقه مروح العنقالي]

#1203470 [Almisahir fi izallail]
0.00/5 (0 صوت)

02-07-2015 08:39 PM
دنتو يا سوادنه بقّد ناس طيبين أوى!! عؤولكو زى المناخيل " جمع منخل" اللى بتسموه عندكو "غربال" اللى عندكو كمان بيفضى كل اللى عليه.. بتنسو بسرعه وذاكرتكو ما بتحتفظش بايتها شىء .. كل اللى تعرفوه انكم تتبقحوا وتؤولو ان احنا المصراوه بتوع "هشّك بشّك" وانتو آل ايه آل "ناءشين" وكمان آل "تفتيحه" آل! وتعغنّو آل ايه " نحن ونحن اشّرف الباذخ"
* دنتو كل يوم "عمّال" تطلعو اى كلام !! دنتو نسيتو بسرعه اللى عملها فيكو لارنؤوطى .. يوم ما خد فلوسكو وآلّكو لأننا نحن بنعرف انتسابكو لآل "احطان" وقذوركو ممتده فى اعماق بطون "عبس" وافخاذ "ذبيان" يبأى لازمة تعاملكم النقدى يكون بالدينار والدرهم بدلا من الجنيه لستعمارى.. وهرولتم متزاحمين لتغيير فلوسكم اللى اصبحت ما تسواش ايمة المعدن اللى تم تصنيعها بيه..
* الغريب انكم عدتم يخيبة الرجوع بخفى حنين من بعد ما اندحك عليكو وافتكرتو انكو اصبحتم من ألأعراب نكاية فى "الشوّام بتوع 1956" ورجعتو للجنيه بعد قسمة ما بقالكم من دنانير على "1000" ..لتصبح ايمةالجنيه الجديد اللى فى حيوبكم تساوى "مليم" احمر .. والدولار اللى(سعادة العميد كان خايف يوصل 20 جنيه لو ما جاتش بسلامتها لتقاذ) واللى كان بيساوى ساعتها 12 جنيه اصبح اليوم بفضل غفلتكو تمنتالاف !! موش اؤلتلكو دنتو ما فيش "اطيب" منكو!
* اهو تانى لارنوؤوطى عاوز يدحك علمغتربين المرّا دية.. شوفوهو فى الصوره مبسوط اد ايه! وطبعن اكتر منّو فرحه الراجل اللى ضرب عميد كلية ألأنون بقّلم (يا حسره علاخلاء) وعمّال يتنطط من مكان لمكان!!
* بس الست اللى وافه ويّاهم دى مين؟ معرفتهاش! وايه اللى موأفها وسط رّقّاله؟ تكونش هى دى اللى اسمها "اقبال" صاحبة الشركه!!

[Almisahir fi izallail]

#1203466 [ود اب زهانة]
0.00/5 (0 صوت)

02-07-2015 08:08 PM
ياحاج ماجد لانشك في رغبتك في الخدمة لكن في دي بديت غلط وغلطه قاتله مافي مغترب بدخل في حاجه داخل فيها عبدالرحيم حمدي كفايه السواها في البلد بخصخصة الشوم دي والطاهر ساتي اداك المفيد مفروض اعلانات كبيره يقرأها كل مغترب انشاء الله في راكوبتنا دي عن طرح عطاء بشروطه الصحيحيه اما بالطريقه دي مابني او اسس علي باطل فلامكان له من الاعراب امام فئه مفتحه تفتيحة لمن غلط من كُتر الضرب من القريب قبل البعيد والمغترب بقي زي التاجر تديه ياليمين يديك بالشمال الصحيح والاسلم كان تبدأ بمعالجة موضوع الحراني الصافي جعفر وتحل مشاكلهم تمشي لبشبش تقعد معاه وتفهمه انو المغتربين عشان نستعيد ثقتهم نصحح الفات ونرجع حقوقهم اما انك تجيب ليك حرامي وتبدأ غلط وين اصلا ضماناتك عشان اقوم ادفع لي 10 ولا20الف دولار كمؤسس لبنك ارجو ان يكون كلامي ده وقع ليك في اضانك والنصحك بنشر الصوره دي ضراك كان اخير بدون صوره كتيرين ماعارفين شركة اقبال حقت الحرامي ده فالحق نفسك وحل كمثال سندس

[ود اب زهانة]

#1203464 [السهم]
4.50/5 (2 صوت)

02-07-2015 08:04 PM
هو يعنى نحن عاجبانا البنوك الموجودة ولا المشكلة اسم اقبال او اسم بنك المغتربين بس الجماعة نسو ان يقولوا بنك المغتربين الإسلامي وشركة اقبال الإسلامية قدونا قد وهرونا هري وبرونا بري بكلمة الاسلامية دي الخاتنا مع كل شئ ؟

اما تساؤلك يا الطاهر ساتي بالاعلان عن المناقصة ؟ دا شغل المراجع العام وبعدين مثل هذه الاسئلة التعسفية يكون لحكومة ولي ناس تانين .. اما هؤلاء باعوا البلد كلها من غير مناقصات ولا عرفنا كيف ومتى اتباعت حاجات كثير والمراجع يراجع مؤسستين ويقدم تقرير للبرلمان والبرلمان يقول الحكومة الوحيدة التي يقدم فيها المراجع تقريره للبرلمان والبرلمان عينتوا الحكومة السرية والمراجع عينتوا الحكومة السرية التي تحكم البلد من تحت وبالتالي نحن عايش في لا دولة او دولة (هي لله) يعنى اسكتوا بس

[السهم]

#1203462 [انقاذي سادر في فساده]
5.00/5 (1 صوت)

02-07-2015 07:59 PM
الدهر إقبال وإدبار وهم في حالة إقبال ونحن في ادبار
وإقبال هي سندس الشيخ الورع العارف بالله وبالسيرة النبوية الصافي جعفر
ويابتاع المغتربين كوس ليك غرابا جزو

[انقاذي سادر في فساده]

#1203454 [saleh]
0.00/5 (0 صوت)

02-07-2015 07:45 PM
يلا افرحوا كلكم يا مغتربين ، فقد تفجرت عبقرية ابوسوار عن طريقه جديدة لنهب اموالكم بعد اكتشافكم الطرق القديمه رغم انو كان فيها نوع من استغلال المشاعر الوطنيه والانسانيه بدعومات لصناديق تبدأ بالجرحي والشهداء وتنتهي بالمدينه الرياضيه التي مازالت اطلالا رغم مرور ٢٥ عاما علي بداية مشروعها ، وبين هذا وذاك جبايات اعترف اهل الانقاذ نفسهم بعدم توريدها لخزينة الدوله ، فالي متي تتعامل معكم الحكومه بهذا الشكل الاستغلالي ، رعاة الابقار يعلفون ابقارهم من احسن انواع الاعلاف حتي تنتج الالبان واللحوم وهؤلاء يريدون السطو علي عرقكم بالفهلوه وبدون تقديم اي نوع من الخدمات والا فما معني بنك للمغتربين !! اذا كان معناه المحافظه علي مدخرات هذه الشريحه بالنيابه عنها من قبل لصوص مشهود لهم في كافة مجالات النهب فالله الغني ومن لا تعلمه سيرتهم في هذا المجال فلا يلوماً الا نفسه ، ففي ظل هذا النظام ليس هناك قانون ولا آليه لحفظ الحقوق ولم نسمع بمحاسبة اي لص من الانقاذيون علي كثرة شواهد نهبهم المتطاوله بنياناً والمتداوره كروشا والمتكاثره قروشاً في بنوك الداخل والخارج بعد فقر وحوجه وما اكثر الشهود ، من اراد ان يشقي فليرهن نفسه لهؤلاء وليحتسب شقاء عمره بعد ذلك .

[saleh]

#1203448 [جنوبي]
0.00/5 (0 صوت)

02-07-2015 07:30 PM
هههههههههههه
جهاز المغتربين ده زااااتو منو ؟

[جنوبي]

#1203438 [Awad]
0.00/5 (0 صوت)

02-07-2015 06:54 PM
والله يا الطاهر أخوى كان عملوها ألف بنك للمغترب مع أقبال ولا وداد المغتربين عارفين يحوشوا قروشهم بعيد من أيادى الحرامية فالمؤمن لا يلدغ من جحر مرتين.قروشنا دى يشموها قدحة ونحن ثقة ماعندنا فى أمين شئون المغتربين ولاحمدى ولا أى فرد من الكيزان وقروشنا لو جاء وضع ديمقراطى حر فنحن على أستعداد التحويل والمساهمة فى بناء الوطن حتى لو بكل ماندخره أما الحرامية ديل يشموها قدحة.

[Awad]

#1203432 [نزار]
0.00/5 (0 صوت)

02-07-2015 06:42 PM
انت مفتكر انو المغترب ده زول غبى يشيل اصبعو ويطبز بيهو عينو اول حاجه رجعو القروش الاكلتوها زمان كلها مشروع سندس والاراضى ومابنثق فى اى واحد شارك فى الحكومه الفاسده دى لا حمدى ولا غيرو وحمدى ده محل ودوه مانفع داير انفع فى اداره البنك بس خلونا فى حالنا نحن كده كويسين ومرتاحيين نحول عن طريق السوق الاسود اخير 200 مره من بنككم ده لانو بنضمن حقنا وصل لاهلنا

[نزار]

#1203424 [كارلوس]
5.00/5 (4 صوت)

02-07-2015 06:22 PM
نكته .. قالوا فى امام مسجد بعد صلى بالناس قام حكى
ظروفو الماديه البطاله وقال للمصليين المدام مريضه ولابد
من المستشفى دحين طالب المساعدة منكم .....
الجماعة اسلسلوا واحد واحد وخلوه ليك براهو فى المسجد
وطلعوا .. الامام طلع ماشى على البيت قابلو واحد سكران
قال لى مالك يامولانا ؟؟ وشك ماعاجبنى .. مولانا كلم السكران
بالظروف وحال المدام المريضة .. طوالى يازول السكران طلع 200 الف
وقال لى مولانا اتفضل وماتنسانا من الدعاء..
مولانا قال للسكران ادعو ليك عشان تجى تصلى وراى زى العواليق ديل

[كارلوس]

#1203419 [ود الدكيم]
5.00/5 (3 صوت)

02-07-2015 06:15 PM
عاوزين تلبسوا المغتربين طرابيش؟؟

قروش المغتربين تشموها كدحة

[ود الدكيم]

ردود على ود الدكيم
[حقاني اكتر شوية] 02-07-2015 07:22 PM
اقبل على بنكنا
لو كنت غنيانا


#1203411 [Mousa]
5.00/5 (4 صوت)

02-07-2015 06:04 PM
إقبال هي شركة تابعة لجهاز الامن والمخابرات الوطني وتقوم بمهام الاستثمار في تخطيط الاراضي وأسهم بورصة الخرطوم للأوراق المالية وكذلك تعمل كوكيل معتمد لشهادات شهامة الحكومية.

أما الهدف الاستراتيجي للشركة فهو دعم المجهود الحربي وتوفير بنود موازنة مالية إضافية لجهاز الأمن بعيداً عن الميزانية الرسمية المخصصة للجهاز من وزارة المالية.

ومعروف أن جهاز الأمن وكذلك القوات المسلحة لا يعتمدان علي الميزانيات الرسمية التي تأتيهم سنوياً من وزارة المالية، بل أن لكل منهما إستثماراته الخاصة داخل وخارج السودان لدعم قوة وبقاء الدولة البوليسية.

والمعروف أيضاً أن المراجع العام لا يستطيع الإقتراب من شركات الأمن والجيش، ويكتفي سنوياً بمراجعة الشركات الحكومية المدنية فقط.

[Mousa]

#1203394 [فرح ود تكتوك]
5.00/5 (3 صوت)

02-07-2015 05:28 PM
عارف يا شيخ الطاهر كان زمان الناس تدّخر مخزونها من الذزة في باطن الأرض فيما يعرف بالمطمورة وظل صاحب العيش (الذرة) مرتاح البال طالما كان حصاده ومونته مدفونة تحت بصره. وتقول الطرفة أن أحدهم هم ببيع ما يدخره من ذرة ليستثمره، فذهب وجلس فوق مطمورته وخاطب العيش داخلها قائلاً.. يالعيش يا البتودر الكرميش أبيعك ولا أخليك؟ وصمت برهة ويزعم أنه سمع صوتاً خارجا من المطمورة يقول :- كان بعت نوم عينيك أنا مالي بيك

[فرح ود تكتوك]

#1203381 [المسلمي]
3.00/5 (1 صوت)

02-07-2015 05:03 PM
معناها اختصار ل (انا قلت ليكم بالحرف الواحد لازم تدفعو)

[المسلمي]

#1203380 [برز الثعلب]
5.00/5 (2 صوت)

02-07-2015 05:03 PM
يا مغتربين لقد شاهدتم في الصورة فارسة الاحلام بشحمها ولحمها وهذا هو الطريق المتبع شرعا ، أن تشاهد بأم عينك مخطوبتك التي تريد الاقتران بها. فإن راق لك من بالصورة ودخل قلبك وشعرت بالراحة والإطمئنان فتقدم للخطبة مع الاماني ببيت مال وأموال.

[برز الثعلب]

#1203379 [عصمتووف]
5.00/5 (1 صوت)

02-07-2015 05:01 PM
بتاع اقبال ده عندما تم سؤاله عن الخصخصة وما ادارك م الخصخصة قال البيع لا يعرف شئ عنه بل يتم غمطي وهو وقع غمطي

[عصمتووف]

#1203372 [mustafa seory]
5.00/5 (3 صوت)

02-07-2015 04:43 PM
ونحن كمغتربين لن تعود لنا ثقتنا فى حكومتنا الرشيدة حتى نرى حبيبنا الصافى جعفر ضمن الكوكبة التى تدير بنكنا.

[mustafa seory]

ردود على mustafa seory
[واحد مهموووووووووم] 02-07-2015 06:08 PM
ههههههههههههههههههههه
صدقت يا سيوري


#1203371 [المغترب المعسر]
5.00/5 (6 صوت)

02-07-2015 04:42 PM
انتو نسيتو وللا شنو ؟ ؟

فاحدي أماني عبد الرحيم حمدي هي تصريحه من قبل بانشاء بتك لاولاده بعد تفرغه للمعاش !!!

و أهو جاتو علي طبق من ذهب بتحويش اموال المغتربين بمباركة جهازهم و الأمورة اقبال !!!!!

أهو كلو تحرير .. في تدوير .. في تزوير .......

[المغترب المعسر]

#1203370 [حد فاهم حاجة]
4.25/5 (14 صوت)

02-07-2015 04:39 PM
إقبال دي اختصار لــ:
ا = اكلنا
ق = قروشكم
بال = بالباطل

(منقول)

[حد فاهم حاجة]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة