الأخبار
أخبار إقليمية
الكبري الطلع من حقنتك بالسيسي..هداهو الجقر وقدت علبتو ام سيسي
الكبري الطلع من حقنتك بالسيسي..هداهو الجقر وقدت علبتو ام سيسي
الكبري الطلع من حقنتك بالسيسي..هداهو الجقر وقدت علبتو ام سيسي


قصيدة الشاعر ازهري محمد علي.
02-08-2015 10:48 PM

ازهري محمد علي.


ياودالخدر وكت النفوس مطايبة

الخير بالشرق إلا المراكب جايبه

موجعني العوج فوق البلاد السايبة

فيرانكن تغن ولا الكدايس خايبة

ياوالي الوجع غافل سفهتا حديثي

وارخيت السمع لي كلبك البوليسي

الكبري الطلع من حقنتك بالسيسي

هداهو الجقر وقدت علبتو ام سيسي

السكة الحديد كانت تصينا دريسة

تبرا فلنكتا وتعرف تحدد ميسا

الليلة السدود عينتا ليها كديسة

للفار الجقر لافرتكان لاعيسي

بنوت اللعاب حمدتهن بالنفرة

وحندكتا الولاد بالدين ضفرتنا ضفرة

تربستا البلد غافل نسيت الشفرة

نحن مع الجقور في شرعك أولاد حفرة

في عز الطلب عايش عزيز في خيري

رطانة وعرب فاطنة وعزيزة وميري

الحال انقلب وانا ذاتي واحد غيري

بارينا العلب ولعبنا توم ان جيري.


تعليقات 21 | إهداء 0 | زيارات 7807

التعليقات
#1205121 [يس عبدالفتاح]
0.00/5 (0 صوت)

02-10-2015 08:08 AM
ازهري الوطن
الوطن موجوع
لك التحيه ازهري

[يس عبدالفتاح]

#1204898 [بت البلد]
0.00/5 (0 صوت)

02-09-2015 08:23 PM
يا ود محمد علي الجقر ساي حقروبو
حملوهو الغلط درعا ملبس فوقو
عارفنو مو غلطان
وهم أهل الغلط بس ما عرفو وين يجولوبو
وكيف يخلصو منو عاد الشريف بقلع توبو؟!

تسلم ياابني يالك من مبدع ...اني أرى فيك شاعر الشعب محجوب شريف له الرحمة والمغفرة

[بت البلد]

ردود على بت البلد
United States [بت البلد] 02-11-2015 08:41 AM
يا بت أبو زيد انت كمان ديمه عاجباني
ردودك حاضره تب ما بتغباني
مصيرنا نتلاقا في حلفاية الملوك
لو ربك أراد يجمعنا في السودان
وانت أبوك ياهو الكان في سوق الحلفاية
جار ابوي وللا واحدا تاني
تسلمي يا عزيزه وان شاء الله ربي يحقق الأماني

[nagatabuzaid] 02-09-2015 11:35 PM
يا بت البلد تب عجبتينى وود محمد على الرائع ديمه افحم جقر الولاية واكيد حنتقابل محل السدرة فى الحلفاية


#1204630 [مبارك]
0.00/5 (0 صوت)

02-09-2015 12:59 PM
الاخ ازهري لك التحية وانت تناضل ضد نظام الدجل والشعوذة والسرقة المنظمة . في كل قوانين الدنيا يضمن المقاول و المهندس ما يحدث من تهدم أو خلل كلي أو جزئي فيما أقاماه من منشآت ثابتة وذلك خلال عشر سنوات من وقت إتمام الإنشاء . فكبري المنشية تم انشائه سنة 2006 يعني لم يتم عشر سنوات بعد ، فلماذا تهدم ؟ ولماذا لم يطبق شرط الضمان العشري ضد الشركة التي انشئته ؟ اشعر ان هذا الكبري قد حدث به تلاعب كبير من جانب المتنفذين من الحكومة ، فهم ما عندهم شغلة غير العمولات التي يؤخذونها من الشركة المنفذة . ان كبري المنشية لاكبر دليل على فساد الحكومة وفساد منسوبيها

[مبارك]

#1204598 [الناهة]
5.00/5 (1 صوت)

02-09-2015 12:22 PM
الجقور بريئة براءة الذئب من دم ابن يعقوب
الموضوع ببساطة شديدة جدا
الجماعة ديل اتفقوا مع الصينيين يعملوا العلب التى تقع داخل الماء في النيل
وقالوا ليهم الباقي بتاع الارض اليابسة ده عندنا شركات ( وطنية) بتعملوا وجزاكم الله خيرا
اها الشركات ( الوطنية ) دي كان مفترض تعمل اربعه علب صبة بمداخل الكبري من الجيهتين
اها قامت ما عملتهم وجابت تراب ساكت كبته وعملت من فوقه الاسفلت على طول
وقامت الشركات ( الوطنية) شالت السيخ والاسمنت بتاع العلب المفروض تتعمل في الارض اليابسة وشالته
وتحول الى بناء قصور وعمائر وفلل في بعض الاحياء
اها قام جاء الفيضان جرف الردميات مما هدد فصل جسم الكبري عن اليابسة
يعني ممكن تجي ساي عربيتك جمبلق تلقى نفسك عائم في الموية
اها الجماعة هسي دايرين يعملوا صبات لتصحيح الوضع
والخوف نفس الحكاية تكون اتعملت في كبري المك نمر وتوتي وخلافهم
لكن الجقور ماليها ضلع في الموضوع وبهتت افكا في الموضوع
الجقور بريئة

[الناهة]

ردود على الناهة
European Union [مبارك] 02-09-2015 04:35 PM
الناس ديل بخافوا الله سيدهم ؟ يا خي لو في شخص عربيته غطست في الموية ومات من الذي يتحمل مسئوليته ؟ . وبعدين ليش كبري النيل الابيض من زمن الانجليز ما حصل ليه اللي حصل على كبري المنشية ؟ . الناس ديل اجرموا في حق الشعب السوداني اجرام شديد والعجيبة الكلام ده كله ما بهمهم بس فالحين يملوا كروشهم من ما لذ وطاب والشعب السوداني ليه الله .


#1204525 [Awad]
5.00/5 (1 صوت)

02-09-2015 11:09 AM
أخاف عليك أخى أزهرى من هؤلاء (الأوباش) لأن شيمتهم الغدر والخسة والنذالة.الله يحفظك أخى يا مبدع وداخرنك ليوم جميل يوم الفرحة الكبرى بالأنعتاق من أستعمار(العلب).

[Awad]

#1204480 [soso]
5.00/5 (1 صوت)

02-09-2015 10:21 AM
روعه كلعاده استاذ ازهري

[soso]

#1204457 [المصباح]
0.00/5 (0 صوت)

02-09-2015 09:55 AM
استاذ بطل شجاع لماح ، يزيدك علم وعافية.

[المصباح]

#1204417 [حوشة]
0.00/5 (0 صوت)

02-09-2015 09:18 AM
تفرق عننا الهم وتزيل الغم بي حلو النم يا شاعر الحقيقة يا الصوتك صداهو بعيد محال يتلم
شكراً أستاذنا الجليل ازهري محمد علي قائد دفة الحلم الفسيح والبيت الوسيع.
تقدري وأحترامي،،،

[حوشة]

#1204414 [الجراح]
5.00/5 (1 صوت)

02-09-2015 09:15 AM
رائع جدا استاذ ازهرى..

[الجراح]

#1204355 [ظلال النخيل]
5.00/5 (1 صوت)

02-09-2015 08:26 AM
الشعب يتفاءل باسمك يا ( أزهري )

النصر بعد الله بامثالك ايها الوطني الغيور

[ظلال النخيل]

#1204353 [أب جنقة]
5.00/5 (1 صوت)

02-09-2015 08:23 AM
أخاف عليك من حادث مثل حادث حميد ... قلمك رصاص في صدور أهل الحكم

[أب جنقة]

#1204337 [Abu]
5.00/5 (2 صوت)

02-09-2015 08:08 AM
Poetry should be great and unobtrusive, a thing which enters into one's soul, and does not startle it or amaze it with itself, but with its subject.

[Abu]

#1204331 [dougokoper]
4.25/5 (5 صوت)

02-09-2015 07:59 AM
طالما هناك أمثال أستاذنا أزهري محمد علي .. فـ عمر الدوش ومحجوب شريف وحميد وغيرهم شعراء القضية المنحازين لشعبهم لم يموتوا. دعواتنا لك شاعرنا أزهري الله يعطيك العافية ويحفظك.

[dougokoper]

#1204323 [abumajid]
1.00/5 (1 صوت)

02-09-2015 07:52 AM
ليتهم يفهموك :

[abumajid]

#1204317 [أبو مهند]
1.00/5 (1 صوت)

02-09-2015 07:43 AM
لك التحية أستاذ أزهري
كلمات مختصرة وموجزة ومفيدة
في انتظار المزيد من إبداعاتك أخي أزهري

[أبو مهند]

#1204314 [Heron]
1.00/5 (1 صوت)

02-09-2015 07:38 AM
جميل كعاتك دائماً.

[Heron]

#1204287 [خرطوش]
1.00/5 (1 صوت)

02-09-2015 05:53 AM
"بارينا العلب ولعبنا توم ان جيري"...علب عديل كده؟

هاهاهاها...عشان كده فى السودان بيستخدموا علب الصلصه كيزان فوق الأزيار !
يعني العلبه بتبقى كوز.

[خرطوش]

ردود على خرطوش
European Union [boss] 02-09-2015 09:02 AM
ههههه ي خرطوش العلب او العلبة بلغة الشباب او الشارع تعني (المثليين) وكلتاهما تنطبق علي الكيزان.


#1204260 [الدنقلاوي]
4.00/5 (1 صوت)

02-09-2015 02:26 AM
رائع يا استاذ أزهري... همنا الراهن بلغتنا المنكورة .. لغة الحاردلو وود الفراش وود ضحوية .. وأقرب الشعر للروح تحمله أخف الكلمات على اللسان.
إبداع

[الدنقلاوي]

#1204259 [دافعوا عن انفسكم]
0.00/5 (0 صوت)

02-09-2015 02:20 AM
استاذ يا استاذ
وهكذا يكتب الشعر

[دافعوا عن انفسكم]

#1204251 [ودالعمدة]
5.00/5 (1 صوت)

02-09-2015 01:24 AM
سلم يراعك ايها الشاعر ازهري حفظك الله دخرا للوطن وللبلاد والعباد الروعة تاتي من المعناة وشعرك صار مدرسة الحقيقة في وجه الطغاة نأمل المذيد من شعرك الراقي ومن كل شعراء السودان الشرفاء

[ودالعمدة]

#1204246 [طه جعفر الخليفة]
1.00/5 (1 صوت)

02-09-2015 12:53 AM
دمتم يا استاذ ازهري و دامت كلماتك النبيلة

[طه جعفر الخليفة]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية



الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة