الأخبار
أخبار إقليمية
الطائرة ـ القاطرةـ الترام ـ العربةـ اللوري في الغناء السودان
الطائرة ـ القاطرةـ الترام ـ العربةـ اللوري في الغناء السودان
الطائرة ـ القاطرةـ الترام ـ العربةـ اللوري في الغناء السودان


02-27-2015 05:57 AM
بكري الصائغ
١-
***- هناك علاقة وطيدة وقوية تربط الشعراء السودانيين القدامي والجدد بوسائل المواصلات ايآ كان النوع: ( طائرة..قطار..ترام..عربة..لوري.. دراجة). ان الكثيرين من هؤلاء الشعراء (خاصة القدامي) ذاع صيتهم واشتهروا بعد ان وجدت القصائد الغزلية، واجمل اشعارهم الغنائية التي كتبوها في الحب العذري والوله، وراحوا يربطون اسباب اللوعة التي عانوها والارق من الحبيب بالمواصلات.

٢-
***- موضوع مقالة اليوم، محاولة توثيق (ما يمكن من توثيقه) في علاقة الصلة ما بين الحب في السودان بوسائل المواصلات.

٣-
مقـدمة:
-----
***- اول اغنية عن السفر تغنت بها الراحلة (عائشة موسي أحمد إدريس) الملقبة ب(عائشة الفلاتية) عام ١٩٤٤ ابان فترة الحرب العالمية الثانية ، وهي اغنية ( "يجو عايدين إن شاء الله عايدين يا الله..يجوا عايدين بالمدرع والمكسيم). الا انه في الاغنية لم تجئ سيرة كيفية عودة الجنود؟!!..وباي نوع من المواصلات؟!!

٤-
المدخل الاول: -
-علاقة الشعراء والفنانين بالطائرات-
---------------------
(أ)-
***- أغنية عائشة الفلاتية (طيارة جاتنا تحوم، جات تضرب الخرطوم ضربت حمار كلتوم ست اللبن) تعتبر واحدة من اشهر الاغاني عن علاقة الشعر في السودان بالطائرات...حتي في زمن ما كان السودان عنده طائرات!!

(ب)-
***- غني الفنان الراحل ابراهيم الكاشف: (رحلة في طيارة) من كلمات الشاعر الراحل سيد عبدالعزيز، وغني الكاشف ايضآ:(بطير بفوق.. بغرب السوق..اشوف زولي..وابل الشوق)..

٥-
المدخـل الثاني:
-علاقة الشعراء والفنانين بالقـطار-
--------------------
(أ)-
***- تعتبر اغنية (القطار المر) للشاعر الراحل محمد عوض الكريم القرشي واحدة من اشهر اغاني القطار في الغناء السوداني. ابدع الفنان الراحل عثمان الشفيع في اداءها. وتغنى بها اولا فى احدى الاعراس قبل ان يذهب فى اليوم الثانى للاذاعة ويقوم بتسجيلها وبعد الانتهاء من التسجيل كان الشفيع يتمشى سيرا على اقدامه فى شارع الاذاعة ليمر بالقرب من مجموعة من الشباب وهم يترنمون بأغنية القطار المرَّ وبعد ان كتب عنها عدد من الصحفيين منتقدين الاغنية امر الراحل متولي عيد مدير الاذاعة فى تلك الحقبة بان يتم ايقافها وعندما علم القرشى بذلك اتصل بالشفيع وطلب منه الا يغضب ليستمر الشفيع بترديدها فى المناسبات ووجدت الاغنية رواج ليتصل به بعد ايام الاعلامى محمد صالح فهمى ليطلب منه ان ياتى ليتغنى باغنية القطار المرة ليقول له الشفيع ولكن متولى عيد قال ان هذه الاغنية لن تردد عبر الاذاعة مرة اخرى ليقول له ان المستمعين يودون الاستماع لها عبر برنامج ما يطلبه المستمعون ليكتب للاغنية الاستمرار بفضل المستمعين.

(ب)-
من اشهر الاغاني عن القطار:
--------------------
***- (ﻣﻦ ﺑﻒ ﻧﻔﺴﻚ ﻳﺎﻟﻘﻄﺎﺭ)- ﺍﻟﺸﺎﻋﺮ ﺃﺑﻮ ﺻﻼﺡ...

***- (يا قطار الشوق متين ترحل تودينا)...

***- ( فلق الصباح) للشاعر الراحل لخليل فرح وقال:(عزه قومي كفاك نومك، ما كفاك دلال يومك، إنت يا الكبرتوك، البنات فاتوك، في القطار الطار)...

***- (القطر....القطر..نويت...السفر..ودعت حبيبي ودمعي انهمر) الفنان الراحل سيد خليفه..

***- غني الراحل مصطفي سيداحمد:( والبال إشتعَل يا عبدالرحيم قِدّامك قطر..وسال الدم .. مطر.. وطارت دمعتين وإنشايح وتر)...

***- غني الراحل حسن خليفة العطبراوي (طاره حلّ يا ناس..قطاره حلّ
الزول مسافر يا ناس ودعتو الله)...

***- غني ود اليمني:(احمد الله الخاطر انجبر.. وجاني زولاً شايل خبر..قال لي محبوبتك في القطر)..

***- الفنان الراحل ابراهيم عوض:(قطارو اتحرك شوية شوية دا من بعيد بي ايدو لوح لي.. بكت عينيه وكمان عينيه)...

***-غني الفنان ابوعركي البخيت:(عمي الزين موكر في قطار الهم)..
***- يا القطار تدشدش الشلت المحبوبي...

***- تغنى العشاق للحبيب ودعـــــــوا بأن يتكسر القطار الشال الحبيب "حتة حتة"...

***- الفنان أحمد الصادق: (القطار القطار دور حديدو)...

***- البلابل: (قطار الشوق)...

***- ابراهيم الكاشف:'( الحبيب وين؟!! قالوا لي سافر..ياالسفروك بالقطر ودوك)...

***- الفنان الراحل فضل المولى زنقار: (من بف نفسك يا القطار)...

***- الفنان الراحل محمد كرم الله:( ياحليلا بلا عدد قالو شالا قطار الأحد..في الرصيف حِسو بلا الرعد أسأل الله مكنتو تنقّد)...

الـمدخل الثـالث:
-----------
الترام في الشعر الغنائي السوداني:
----------------------
(أ)-
غني الفنان عبدالكريم من كلمات الراحل خليل فرح:(من علايل أبو روف للمزا لق من فتيح لطور للمفالق قدله يا مولاي حافي حالق بالطريق ألشاقي الترام)...

(ب)-
اغنية ترام ابروف للشاعر الشيخ عباس عبدالملك مسجلة لدى اذاعة ام درمان بصوت الفنان على الشايقي:
ترام ابروف امس شال السمح معروف
سبقني
قام بيها الترام مخطوف وخلتني التقول مكتوف
آذتني
واصل حبي مامنتوف رويحتي تسوي في التفتوف
احزنتني
يالحارق الحشا والجوف ويانور البصر والشوف
سبيتني
جوه الهجعه طيفها يطوف جزم رشماتها تامن الخوف
جفتني
اخوك يالخايلة صار مأسوف طريتا ودمعي كب نسوف
هلكني
هي حاكمة الدنيا للمسكوف قليب عاشقك عليك معكوف
عازلي دعني
هي ملكه ولابسه الملكوف مناي من ايدها عشرة كفوف
التذيدني
حباب يوم زعلتو المعروف غضب قال لي هاك مصروف
كفتني
ضحك وانحظ ذوق وظروف قلبنا لاشكلة بالمعروف
بسطني
جسيمك ناعماً كالغوف كخز او نرجساً ملفوف
يريعني
بريد شخصك جلوس ووقوف اكون بي عفوكم محفوف
يسعني...

رابــعآ:
العربات وانواعها في الشعر الغنائي
السوداني وعلاقتها بالحبيب:
------------------
(أ)-
***- اغنية: (يا سايق الفيات)...
***- (السايق البوباي) كلمات المهندس عبدالعزيز سيداحمد...

***- من اغاني البنات: (ناري الليلة وا ناري..ناري السندة طوالي..
وا ناري الما بقيت سواق..أترك العالي وأمشي بالدقداق)...

***- الفنان حسين شندي:( حسين شندي الشهيرة يقول شاعر الأغنية:
" يا سايق يا ماشي..النظرة ماشة وراك وقف وقف..وسوقني معاك يا سايق)...
***- الفنان عبد القادر سالم التي تغني شاعرها للوري وقال:
السيسبان الني.. والحرير الطي..الجابني ليك زمان..وأنا برضي بيك ولهان أنا.. اللوري حل بي دلاني في الودي..جابني للبرضاه..العمري ما بنساه)..

***- وغنت ندي القلعة:( أغنية ندوية القلعة الشهيرة حين تقول:
" الليلة والليلة ..السافر حليلها..اللكزس ألفين وسبعة موديلها..اللكزس هدية ..ما علاقة شخصية..ويا هناي ويا هناية،، أمسكوا القناية..المرسيدس والكزس وبكرة الهمر جاية"...

***- اغنية اخري للركشة:( بلة يابلة دق الرقم جلى.. بلة ود عشة.. السايق الركشة..دق الرقم طشه..بلة ود عايد..دق الرقم زايد..بلة الجموعي ..بكاني بي دموعي..بلة ده الهندي..دق الرقم عندي..بله ده الحنان.. الساكن أمدرمان بلة ودعشة..دق الرقم خشه)...

***- حتى الدفار فقد وجد نصيباً من تلكم الشاكلة من أغنيات الدلوكة:
نزار بوبار بريدو..السايق الدفار بريدو..نزار انا ماسألتو..براهو وقف عجلتو.. بينظرة واحدة بهدلتو..نزار جاب لي دبلة...والدبلة ماقدري..صنقر قعد جمبي ده الكسر سلوك قلبي)...

***- اغنية اخري من اغاني البنات: (" ده كلو من وائل..وايل قفل الموبايل..ده كله من شيحة..شيحة قفل الشريحة..ده كلو من عمر..موبايلو بدون نمر..وعربيته تقول همر)...

***- زنقار أغنية شديدة الخفة: (دودو بي اللوري دودو بي)...

من اشهر الاغاني خارج السودان:( كده كده يا الترلة القاطرة قندراني)...

***- الفنان محمد الريح:(عجبوني أولاد الأهالي.. عجبوني وسروا بالي .. ترسوا البحر بالطواري.. ما شالونا باللواري)...

***- سخر الفنان الراحل محمد وردي من الرئيس الراحل نميري:
(راكب هنتر وعامل عنتر)...

خــامسآ
-المراكب في الغناء السوداني-
--------------------
***- حتى المراكب وجدت لها مكانة في الغناء. غني الفنان الراحل مصطفي سيد أحمد يغني: (وأنا راكب يا مراكب)... و(يا المراكبية البتبجد.. من فك الموج الغريق)،

***- وغني ايضآ النور الجيلاني: (يا ريس المركب.. ما تخلي الشباب يركب.. أصلو المكان أرحب يا ريس)...

اخيـرآ:
****- نواصل رصد علاقة الحب والغرام في السودان بالحديد الطائر في السماء..وشوارع الزلط...

بكري الصائغ
[email protected]


تعليقات 3 | إهداء 0 | زيارات 2485

التعليقات
#1217122 [عوض الله جابر]
0.00/5 (0 صوت)

02-28-2015 12:05 AM
ليس كعادتك أخي بكري...
تحليل غير كامك إستعجلته فيهو شوية ولم تعطه حقه كاملا كعادتك...الحلو ما يكملش..
...علي سبيل المثال..
اين انت من الأغنيه الطريفه..
الرسول يا ودعمي ترسل التصاريح
عشان نركب البسابق الريح
نمشي للخرتوم نستريح..أو كما قيل...
الخ الخ..

[عوض الله جابر]

ردود على عوض الله جابر
[بكري الصائغ] 02-28-2015 06:17 AM
أخوي الحبوب،
عوض الله جابر،

الله يديك الصحة والعافية، والله ما قصرت في المشاركة، لكن والله الاغنية الكتبت عنها اصلآ ما سمعت بها، الف شكر علي ايرادك لها. بالمناسبة: في اغاني حلفاوية كتيرة في نفس الموضوع تحكي عن هجرة النوبيين من حلفا القديمة الي حلفا (خشم القربة)، وكلها لوعة واحزاب علي الارض التي اجبرنا علي تركها ..التراث ..الاثارات..المعابد..الكنائس القديمة الحضارة.. الحقول..المزارع.


#1217085 [عصمتووف]
0.00/5 (0 صوت)

02-27-2015 10:12 PM
وايضا البسكليتة الدراجة الهوائية اب داؤد لدية اغنية ف الدراجة لا اذكرها جيدا وايضا توجد اغنية كما تقول راكب عجلتة ترن ضرب لي الجرس رن قلته ليه احبك واحب ترن تقريبا

[عصمتووف]

ردود على عصمتووف
[بكري الصائغ] 02-28-2015 02:12 AM
أخوي الـحبوب،
عصمتووف،
(أ)-
تحية الود، والاعزاز بقدومك الكريم،
الاغنية التي تقصدها هي:(جاهل صغير في السن راكب عجلته ترن)، هي واحدة من اقدم اغاني البنات، قد اشتهرت في الستينات من القرن الماضي. هي مثلها مثل مئات من اغاني البنات لا احد يعرف كاتبها.

(ب)-
ايضآ في سنوات الخمسينيات كانت هناك اغاني مشهورة لل(حنطور)، من العادات الجميلة التي لم تعد موجودة في الخرطوم، ان العريس وبمجرد عقد قرانه علي عروسه، يقوم باستئجار عدة حناطير تقل عروسه واهله، ايضآ اهل عروسه واصدقاءه. تتجه هذه الحناطير بركابها الي شارع النيل، حيث يقوم العريس هناك بغسل وجه عروسه بماء النيل. اثناء سير موكب الحناطير الي نهر النيل يقمن البنات والفتيات بالغناء:(عريسنا سار البحر يا عديلة قطع جرايد النخل يا عديلة)..البنات ايضآ كنوع من المجاملة لاصحاب الحناطير يقمن بالغناء لهم. وهكذا دخلت الحناطير كجزء هام من افراح الاعراس...

(ج)-
عريسنا سار البحر يا عديلة
قطع جرايد النخل يا عديلة
*******************
المصدر:- منتديات الطمبور-
-20-09-2010-
--------------------
***- ربما ان تحركها على عجل من أجل طي مسافة الشوق وصولاً (للنسايب) هذا ما تقوله كلمات أغنية السيرة الشعبية (السيرة مرقت عصر يا عديلة فوق الشيخ ود بدر يا عديلة).

***- بداية تفاصيل العرس السودانى بعد موافقة أهل العروس للعريس المرتقب واكتمال بقية التفاصيل تبدأ بالسيرة حيث يذهب أهل العريس الى العروس منذ ان كانت السيرة بالجمال الى اللواري مروراً بالبصات والحافلات حتى العربات الخاصة . (مع ملاحظة اختلاف مظاهر السيرة بين القبائل السودانية ) حيث ان السيرة تتوجه صوب أهل العروس من بدري اذا كانت المسافة الفاصله بين القرية والاخرى بعيدة، وعند الوصول تطوف السيرة بأكبر فسحة او مسيد بالحى قبل نزولهم منزل العروس وهو اشعار واشهار ريثما يستعد اهل العروس لاستقبال النسايب الجدد .

***- وهي تردد فى مظاهر فرح بعض المقاطع الشعبية على شاكلة (دور بينا البلد ده احرق الجازولين يا البابور جاز) (وسواقنا زينا وحالف ما يدلينا) او اغنية شعبية اخرى يخاطبون فيها ام العروس بقولهم (أم العروس جينا ليك وجبنا العريس باركناهو ليك ) و(عريسنا سار البحر يا عديلة قطع جرايد النخل يا عديلة) اهل العريس على تلك الحالة لاينزلون من سياراتهم الا بعد ان يستقبلهم اهل العروس بالدلوكة والاهازيج والزغاريد ويرشون عليهم العطور.

***- الشاهد ان هذه المظاهر السمحة اخذت فى الاختفاء بسبب العولمة وما جلبته معها من مظاهر لا تشبهنا فقد اصبح لقاء اهل العريس باهل العروس على صالات الافراح المغلقة وبها تضيق مساحة التعارف والعرسان يأتون إلى الصالة مباشرة فى زفة على عربة مزينة ممهورة بأحرفهما الاولى بالانجليزي.

***- طقوس وتقليد طال حتى رقيص العرسان الذي اصبح بايقاعات بعيدة عن البيئة التى تربينا عليها . ظواهر غريبة حيكت بأبر مسمومة على العيون فى محاولة لعزل الهوية التى جبلنا عليها ونخرت على أوصال عاداتنا بكل ما هو منافٍ لما توارثناه . فهل من فكاك؟!!


#1216892 [جبل البركل]
0.00/5 (0 صوت)

02-27-2015 12:44 PM
يا سلام يا بكري حلقت بنا في عالم الشعر والطرب وتطرقت في هذا المقال الرائع واضيف اليه ما تغني به اهلنا الشوايقه عند فراقهم للاحباب وهذه بعض القصائد:

ﻭﺑﻼ ﺧﺒﺮ
ﻃﻖ ﺍﻟﺨﺒﺮ ﻣﺎﻟﻲ ﺍﻟﺒﻠﺪ
ﻗﺎﻟﻮﺍ ﺍﻟﻌﺮﻳﺲ ﻗﺎﻡ ﺑﺎﻷﺣﺪ
ﺍﻟﺤﻠﻲ ﺟﺎﻃﺖ ﻭﺍﻟﺤﺮﻳﻢ ﻳﺘﻬﺎﻣﺴﻦ
ﺟﺎﻱ ﺍﻟﻮﻟﺪ

وقطر الاحد من كريمه للخرطوم تغني به الكثير من شعراء الشايقيه

وقال احدهم : القطار الشالك انت يتدشدش حتة حتة)

وتغني شعراء الشايقيه بالبواخر التي كانت تذهب شمالا الي دنقلا وكانت الباخره الجلا من اشهرهم وذكرها الشاعر عبد الله محمد خير في قصيدته التي خاطب فيها ود الدابي من اشهر شعراء المنطقه لانه لم يقل شئ حول سفر محبوبته علي تلك الباخره وقال:
(ود الدابي مالك ساكت؟ ما شفت الجلا السوّاها؟ / شال محبوبتي سافر بيها كيفن عاد بعيش لولاها).

وتغني الفنان (بنده) لمحبوته التي سافرت علي القطار وخاف عليها من هزة القطار وقال:

انت ما بتحملي رهد القطارات ,, وفي الكنب ابقالها يايات
فاق حناني علي الامهات

ويالساده ما ودعت بقطر القضارف يالساده

هذا ما اسعفتي به ذاكرتي
دائما مبدع يا بكري الصائغ,

[جبل البركل]

ردود على جبل البركل
[بكري الصائغ] 02-28-2015 01:07 AM
أخوي الـحبوب،
جبل البركل،
(أ)-
اسعد الله مسائكم، ودامت دياركم عامرة بالافراح والمسرات. الف شكر علي الزيارة الكريمة، والمشاركة المقدرة.
(ب)-
نواصل يا حبيب البحث والتنقيب في علاقة الحب والهيام بانواع المواصلات- ولكن طالما هناك سفر وترحال مصحوب دائمآ بالدموع، فهاك عينة من اغنيات فيها الكتير من الوجع والأهات:

(ج)-
١- الفنان الراحل محمد وردي: (قلت ارحل)...
الفنان محمد وردي:(رحلت وجيت في بعدلقيت كل الارض منفي)...

٢-الفنان الراحل سيد خليفة: (يامسافر وناسى هواك اروحنا وقلوبنا معاك)
سيد خليفة: (يوم سافر قطارى يوم ودعت حبى ياناس انا دمعى جارى )...
سيد خليفة:(اودع اودع كيييف افارق افارق كيف)...
سيد خليفة:(لا لا مابقدر اودعكم افارقكم دموع بتغطى عينى)...

٣- الراحل ابوداود:(سفرك بكره قالو لو ودعت مالو؟)...

٤- الفنانة فاطمة الحاج:(يا مسافر فراقك لى صعيب. من بعدك حياتى كيف تطيب)...

٥- الفنان الراحل سرور:( سرور (من الاسكلا وحلا)...

٦- الفنان الراحل عثمان حسين:( لسعادتك إنت كم ضحيت واتغربت وما خليت طريقة..كل طائر مرتحل عبر البحر قاصد الاهل حملتو اشواقي الدفيقة ليك يا الحبيبة وللاهل)...

٧- الراحل مصطفى سيد احمد غنى: ( والله نحن مع الطيور المابتعرف ليها خرطه ولا فى ايدا جواز سفر)..(ولا مطارات الوداع ضجت قدامك وراك)...
مصطفي سيداحمد:(السمحة قالوا مرحلة)...
مصطفي سيداحمد:(وأنا راكب يا مراكب..لا الرياح توقف خطايا..لا الجبال تحجب رؤايا..ست شموس الكون منايا..ليك مسافر من كتير الزاد..مسافر بى غنايا)...

٨- الفنان محمد الامين:(لو تسافر دون رضانا نحن نشقى العمر كلو)...

٩- الفنان الراحل احمد المصطفي:(سفري السبب لي أذاي)...

١٠- الفنان حمد الريح:(حليلو قال ناوي السفر: كيفن نسيبو يروح بعيد في رحلة مجهولة الأمد يا حليلو)...
الفنان حمد الريح:(حمام الوادي يا راحل)...

١١- الفنان الراحل خضر بشير: (ودعني بي لغة العيون )...

١٢- الراحلة عائشة الفلاتية:(الفلاتية: (ابقي قمره جو القطر)...

١٣- الفنان النور الجيلاني: (جاءنا العيد وأنت ما في)...



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة