الأخبار
أخبار إقليمية
مواطن يشكو مدير شرطة محلية ودمدني
مواطن يشكو مدير شرطة محلية ودمدني
مواطن يشكو مدير شرطة محلية ودمدني


03-04-2015 10:27 AM
تقدم المواطن حسن عبد العظيم بعريضة ضد العقيد شرطة مدير شرطه محليه (مدني الكبري) عثمان فضل المولي (رامبو) ، ويقول الشاكي حسن أنه في يوم السبت الموافق21/2/2015م حوالي 11 مساء كان يقود (ركشة) واعترضته دورية شرطة وقامت بايقافه وانصاع لتوجهياتها وتوقف، وأضاف العقيد عثمان فضل المولي كان يرتدي زياً ملكياً وسألني عن لوحة (الركشة) الخلفية وترخيصها وقلت له سقطت وهي بحوزتي الآن في (طبلون الركشة) والترخيص موجود وابرزته له ، فقال لي العقيد (إنت عايز تتجرجر معانا ) فقلت له (ليس كذلك) فقام العساكر بتفتيش الركشه وكل ماوجدوه (وجبة عشاء)، وأمرني العقيد بربط اللوحة في الصباح ، فقلت له حاضر يا (عثمان فضل المولي فضربني (بونية تحت الأذن وفي الصدر ) وقال لي بالحرف (عثمان ده ابوك) وزاد عندما عدت للمنزل تأثرت بالإعتداء وتورمت أذني فذهبت الى القسم الاوسط بصحبة أقربائي ولم نجد وكيل نيابة في القسم الأوسط ، قابلنا ملازم شرطة وطلبنا أورنيك 8 وبعد ان سردنا له الموقف قال لنا :(عثمان فضل المولي ده ماسك الولاية دي في يدو ومابتاخدو منو حاجه وقضيتكم دي بتروح ساي والبلد دي ما فيها حكومة) -ورفض اعطائنا اورنيك 8 ، وأضاف توجهنا الى النيابة ووجدناها مغلقة ودلفنا لحوادث ودمدني واستخرجنا اورنيك 8 من مكتب الشرطة وقابلنا الطبيب في صبيحة التالي تم تقدمنا بعريضة لرئيس النيابة وامر نيابه القسم الاوسط (الذي يعمل فيه المشكو ضده ) باجراء تحري (مبدئي) ، ومنذ توجيه النيابة لازلنا ننتظر اكمال التحريات وفتح البلاغ حتى الآن.
الجريدة


تعليقات 19 | إهداء 0 | زيارات 7611

التعليقات
#1220973 [shersh]
5.00/5 (1 صوت)

03-05-2015 03:01 PM
ماتخلى حقك ان شاء من ولدو امو مرتو ابوهو حبوبتو ... اوعك تخلى حقك .. طبق القانون بى يدك ويد اهلك ويد قبيلتك .. انت يازول ماعندك اهل مقطوع من شجرة ..

[shersh]

#1220879 [حافظ فتح الرحمن]
0.00/5 (0 صوت)

03-05-2015 12:14 PM
علي العموم ربنا مابنساك،وبقول ليك اذا بسط الي يدك لتقتلني فما انا باسط يدي لأقريك السلام، في لحظتها علي الطلاق اكان ما سكيني عودا رِوا ما اطلعها منووِو.

[حافظ فتح الرحمن]

#1220618 [ولد سيدنتو]
5.00/5 (1 صوت)

03-05-2015 08:46 AM
أقول للموطن المقيم في بلده .. ضربك واحد عقيد إسمه رامبو !!! مش كده .. وماسك المديرية في أيدو مش كده .. شوف المواطن السوداني مهــان كــيف مش في بلدو بس كمــان في الغربة مهــان كرامته من أبناء جلدته شــوف وإقرأ وأسكت على كده ..!!! إقرأ ......:::::::

( رباطة القنصلية السودانية بجدة يعتدون على المهندس اسعد بابكر عمر التاي بالضرب المبرح داخل غرفة في مبنى القنصلية بالمملكة العربية السعودية مدينة جدة !!!
ضرب هذا الشخص ضربا مبرحا من قبل عصابة الحكومة السودانية وهم بلبسهم المدني عندما تكلم هذا المواطن من عدم وجود خدمات متحضرة .. للمواطن السوداني الغلبان في دول المهجر ..
أخي عندما تقرأ هذا الحدث ستشفي لك حدثك .. وتقول حسبي الله ونعم الوكيل وإنتهى الموضوع ..

[ولد سيدنتو]

#1220588 [البورد اللورد]
0.00/5 (0 صوت)

03-05-2015 08:18 AM
رامبو مين ده راجل مفتري جدا

[البورد اللورد]

#1220515 [محمد]
5.00/5 (2 صوت)

03-05-2015 06:35 AM
اخد حقك بى ايدك - ارصد ليهو الى ان يخرج لحاله واكسرو كسر شديد ثم هددو انه فى حال اشتكى اتك سوف تقتله وانا عارفهم جبناء لن يشتكيك ولن يتكلم - وتكل على الله عندنا ناس يا ماجلدو ناس شرطة وامن بالهبل

[محمد]

#1220449 [نحات الصخر]
0.00/5 (0 صوت)

03-05-2015 01:13 AM
يا ابني حسن احمد الله انو بس اذنك تورمت ، والكلام الذي قالو لك الملازم يدل على الكثير وفيه اشارات قوية انت لم تأخذها في الحساب ، المهم نصيحة خالصة مني ليك اسحب البلاغ من اي جهة ذهبت اليها وامشي الى خصمك وقل له انك سحبت البلاغ تقديرا لمكانته وموقعه ثم ودعه بكل ادب واخرج الى الشارع ، ثم بعد شهر تقدم الى اي وظيفة محترمة في اي جهة حكومية او غيرها ولا تهتم اذا كنت تحمل مؤهلات تلك الوظيفة ام لا ، ثم زيارة خفيفة الى خصمك تبلغه فيها انك تقدمت الى تلك الوظيفة وتحتاج الى مساعدته ..وانسى الباقي . يا ابني حسن الركشة دي ما شغلها صعب وانت ولد غلبان ..و يقول المثل ياابني لا تقاتل بالعود الذي فيه شوك لان ذلك سوف يعوقك انت اولا. اتمنى لك التوفيق .

[نحات الصخر]

#1220374 [مغبووون]
5.00/5 (2 صوت)

03-04-2015 09:24 PM
يااخوانا نحنا لسه ما سمعنا الطرف الثاني لكن المفروض يبتاع الركشة لو ده حصل فعلا تاخد حقك بيدك العين بالعين والسن بالسن والبادي اظلم تاخد حقك بيدك لكن انت زول جبان وخواف شنو يعني عقيد ولا فريق وين سكينك افوو

[مغبووون]

#1220277 [سودانى بحب بلده]
5.00/5 (1 صوت)

03-04-2015 04:40 PM
يا أخي العزيز حسن عبدالعظيم ذلك يذكرنى بقول الشاعر:

هذا حال المرء فى سودانه المال عند بخيله والسيف عند جبانه

الطامة الكبرى جايا جايا ... يرونه بعيدا ونراه قريبا

[سودانى بحب بلده]

#1220257 [murtada eltom]
5.00/5 (1 صوت)

03-04-2015 04:11 PM
YA mr. Osman ..if a simple laymann forgot to mention your title,,you just give him a blow on his face...if such behaiour happened in civilized country ,,prison shall be practiced,regardless of rank or title,,learn more about how you treat your citizens

[murtada eltom]

#1220246 [babco1961]
4.63/5 (4 صوت)

03-04-2015 03:52 PM
لم نسمع الطرف اﻻخر لنحكم بالقول...لكن عموما في رجال بيبقوا بالكاكي وفي رجال الكاكي بيبقي بيهم راجل.

[babco1961]

#1220204 [اب طابوزه]
5.00/5 (1 صوت)

03-04-2015 02:58 PM
مثل هذه التصرفات هي التي تولد الغبينة والحنق وهذا يقود للتطرف فى كل السلوكيات التي تعقب ذلك ، فان يعتدي مدير الشرطة شخصياً على مواطن ليس بينهما سوى القانون ولو انه اخذه واودعه الحراسة لما كانت المرارة مثل ضربه معتمدا على وظيفته وليست مسألة رجالة فهذا المواطن لن يستطيع رفع يده عليه اضافة الى ان الضرب اسلوب العاجزين عن الحجة والمنطق ..

حسبنا الله ونعم الوكيل ويا البشير ربنا بسألك من كل تجاوزات ناسك ديل يوم القيامة وبالامس تقول انك لا تريد ان يأتي مواطن يشتكيك لله يوم الحساب الحق فكيف بدماء وحقوق واموال واعراض وكرامات ضاعت من جماعتك وفي عهدك ...

حسبنا الله ونعم الوكيل

[اب طابوزه]

#1220199 [كاسـترو عبدالحميد]
5.00/5 (2 صوت)

03-04-2015 02:53 PM
والله دى ضربة معلم وبالغتم يا ناس الراكوبة ( هيئة التحرير ) اهنيئكم على هذا الأنجاز العظيم بانزالكم صورة البشير وهو يضحك ومن يضحك ايضا يسخر. فعلا كما قال المعلق " المشتهى الكمونية " انه البشير بيضحك وبيسخر على المواطن المسكين وبيقول ليه : طز فيك . اطلب من هيئة التحرير فى الراكوبة ان تنزل صورة البشير هذه وهو بيضجك على كل المقالات من هذا النوع وشكرا.

[كاسـترو عبدالحميد]

#1220179 [yahiakamal]
5.00/5 (3 صوت)

03-04-2015 02:28 PM
عليك الله عليك الله عليك الله يا ابوالتيوس كان ماقفلت خشمك المثل حمامات السوق يا اخى انت والله مقرف بعدين فى الراكوبة ختو صورة حمار واكتبو عليها البشير احسن من صورتوا الماليا لازمة دى انسان جد مريض ومقرف ربى يبتليك بى سلطان يريحنا منك
المهم يااخى اجعل شكواك اللهم انى مغلوب فانتصر ما حاتلقى حاجة مع الحرامية وكان لى تيسنا الما فحل دى رئيس الجمهورية خلوه فى رقيصوا وكذبو الكتير دى

[yahiakamal]

ردود على yahiakamal
European Union [عزمي سند صالح] 03-05-2015 12:34 AM
لأ يختوا نفس الصوره بتاعة اللتخ ويكتبوا تحتا سيماهم في وجوههم.!!!!!


#1220120 [ابو اروى]
5.00/5 (1 صوت)

03-04-2015 01:33 PM
أحسن لك تفتح بلاغك عند الله وان ترفع يدك للعلي القدير
اما من حكومة الكفرة الفجرة هذه لن تجد خيرا

[ابو اروى]

#1220119 [الحجاج]
5.00/5 (2 صوت)

03-04-2015 01:30 PM
يا وزير العدل اين العدالة هنا بالامس تتحجج بان البلد فيها عدالة شوف ما حدث هنا ؟


واذا لم تعدلوا فابشروا بالطامة الكبرى باذن تنزيل عليكم واحد واحد يا اهل الحكم وذلك ليس ببعيد على الله

اين تطبيق الشرع وعدالة عمر بن عبدالعزيز وعمر بن الخطاب ؟


سفلة منحطين ؟ دمرتم السودان باهله بسبب عدم عدالتكم بين الناس .

[الحجاج]

#1220094 [سراجا الدين الفكى]
0.00/5 (0 صوت)

03-04-2015 12:50 PM
والله لامر غريب فى استغلال السلطة حتى تصل درجة الازدراء والغطرسة والاحتقار وسياسة القوى ياكل الضعيف, لكن "عثمان فضلالمولى" ما غلطان الان ما قام بة تجاه هذا المواطن البسيط ما هو الا سياسة بعض من كل, هذه هى سياسة الضليل الفاسد الحقير "بمرمطت انوف الرجال" حتى يتمكن ويسود, سياسة القمع والارهاب والتشفى.
علية فان عثمان ماجاب اى شئ من عندة, بل هى سياسة الدولة بوجه الخصوص والعموم.عشان كدة عثمان ما حيكون فى اى اجراء ضدة, لانة يطبق سياسة الدولة بحزافيرها.
وارجع واقول (اؤلئك القوم نسوا الله فانساهم انفسهم), واجتماع المظالم امام الحق عز وجلا شأنة, لامر رهيب لا قبل ولا طاقة لانسان بة, فاقول "تجتمع المظالم امام الله الحكم الفصل العدل". و لله من قبل ومن بعد, ويااخى صاحب الركشة فقط فوض امرك للة وارفع لة مظلمتك, والله صاحب القوة المتين انة لاقوى على كل قوى.

[سراجا الدين الفكى]

#1220087 [سمير الحسين]
5.00/5 (2 صوت)

03-04-2015 12:45 PM
هوي ها صفي حسابك بي يدك و ألا قول ما قادر وخلينا نتصرف , في زول عاقل بشتكي العساكر للحكومة التالفة دي ما كلهم لصوص و كلاب

[سمير الحسين]

#1220010 [Omer Makkawi]
5.00/5 (2 صوت)

03-04-2015 11:42 AM
المواطن حسن عبدالعظيم علي الطلاق انت ارجل زول ولو في عدل في الدنيا حتأخد حقك بالكامل

[Omer Makkawi]

#1220002 [المشتهي الكمونية]
3.75/5 (3 صوت)

03-04-2015 11:36 AM
يا زول أحمد الله إنو أداك بنية بس ، دا اسمه رامبو والله مرقك منو بأقل الخسائر ،، وبعدين المفروض كان تسمع الكلام وتسكت سااااي لأنه قالوا ليك الزول دا ماسك الولاية في يده وما بتلقى حاجة كان اشتكيتوا ،،، أحمد الله ناس الراكوبة نشروا قصتك وكمان ختوا ليك صورة البشير يضحك عليك

[المشتهي الكمونية]

ردود على المشتهي الكمونية
[كاتم السر] 03-04-2015 05:34 PM
الله يعشيك بكمونية جداد قول امين؟؟ّ

[امير] 03-04-2015 01:54 PM
محبط وانهزامي

خلي الراجل يسجل موقف يجعلة يحترم ذاته



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة