الأخبار
أخبار إقليمية
السودانيات الشواعر -4
السودانيات الشواعر -4



04-09-2015 04:04 PM
الباحث /محمد عيد عبد الرحيم أدريس

الأدب فن جميل وهو عطاء ثقافي نام ومتطور ومتنوع يجد السامع والقارئ المتذوق له متعة وراحة نفسية مثلا في لونيات الشعر الغزل والنسيب والوجدانيات والوصف والعاطفة والرثاء او في مجال النثر الفني كالقصة والمسرحية والخاطرة والمقالات والرسائل الادبية وغيرها ، لقد أتاحت لي فرصة حقيقية بالمهجر وغربة الأشواق أن أطل على أسفار من مجموعات الكتب الأدبية وأنهل منها شئ من العلوم خاصة ديوان الشعر العربي وكان لا بد ان أقدم شئ من التواضع وما جنيته عن المرأة السودانية وأذكر في سعى ذلك جمعت عدد من الأوراق الادبية واذكر منها أبيات شعر للشاعرة السودانية أمانى عثمان محمد وأعتقد انها تجسد معانى وحب الشعر في عروقها وهي التي تقول في رحلتها معه الشعر أعطانى جواز سفر للداخل أعبر به إلي نفسي ودعونا نبقى مع عيون شعرها الفرحانة على هذا النحو
أى القصيدة تحب الجمال وتخدع به فتزيديه ، لا صدق الإحساس هو الذي يخلق العمل الشعري

يا عيونى هللي وأفرحي
أنسانك الراجيك وصــل
الليلـــــة ما فجرك أطل
****
يا عيوني هللي وأفرحي
راجياك أنا والشوق بحر
فرشت ليك رمش العيون
سقيت دروبي حــــــنان

وكما انى استمعت الى شاعرة سودانية رائعة استضافتها قناة الخرطوم الفضائية وهي تسكب نسق الهامها الشاعري بنفس راقي في تراجيدا القصيد (انا بنساك بالبساهل) اشرب عارفة سم بعدك زعاف قاتل ، وحتهزمنى المحن والخوف .. تحرق نار جفاك الجوف ، حانضال عشان يسلم عقاب عود الجفاء الجواي متأكل، وحأنضال وأطالب وأحاجج قاضي الريد وأطالب بقصاص عادل لازم برضو ما ادفن في رمل حسرة الخوف ، عشان احقن في جواي دم الحنين والشوق لازم اعترف في ثراك مدفون ، تكتب شاعرتنا البديعة عن معانى الريدة وحروفها وجلد الحنين والذكريات والحروف والامكنة وكما تقول نفس الحنين في دهاليز المكان متدفق ، وتسترسل شاعرنا بولع ودلع وترتب الاشواق في نظم عذب ومعسل وكما تستدعي فصل الخريف في اشعارها الحنينة وهي التى تقول افوتك كيف ! وانا لسع في فلك بدور ، نفس الحضور وعبق الحكايات التي تدور ، نفس العيون تسأل عليك ، نفس الملامح والحضور والعبق وطعم الزنجبيل والشارع بينك مفترق، ونفس الخلق و نفس الحنين في دهاليز المكان مندفق ، والحكايات ونفس الخريف لونك، طعم المطر لونك وريحة الدعاش، لون البرق، ليه حولك الدنيا تدور، ليه الزمن بعدك لحق، ليه الصبر عندك وحك ، والجروح جوانا أكبرمن طيب ..الى ان تقول او ننتظر باكر يطيب فينا الوريد انجرح
https://www.youtube.com/watch?v=TMUT0B319po
أعتقد ان الانسان القارئ والمبصر في ديوان الشعر العربي ربما يجد منافذ أدبية راقية يعبر بها الى دنيا عالم المرأة السودانية التى تؤكد انها انسانة مميزة وشاعرة مطبوعة قد نشرت روائح أنفاسها الذكية في الملتقيات والمنابر الأدبية الخارجية على الدوام . وكما ذكر الشيخ عبد الله محمد البنا عنها
هي كالحياة منعم بوصالها * ومسهد بصدودها ومعذب
هي كالسعادة لفظها متيسر * سهل ومعناها قصى اجنب
وأعتقد أن الشاعرة السودانية الفصيحة آية أسامة وهبي هي موهبة سودانية ملهمة البراعة وتستشف رواء الخيال وتسمو علوا في دنيا الشاعرية وجمالها المنمق وتمتلك كل مقومات الشعر العربي الفصيح ودائما ما تظهر روعة سحر القوافي ورقة معاني المتن في أسلوب قراءاتها السهل الممتع والسلسل في عذوبته وإنى سعيد جداً ان أقرأ ديوانها دوحة العاشقين واستمع إليها مرات عدة في معاني حب الوطن


أحب تراب أرضي طين أرضي ..
أحب العيس في أهلي وداري
أحب أبي وأمي ثم أهلي ..
وإخواني وأصحابي وجاري
أحب الله خالق كل شيءٍ..
أحب الأنبياء وكل جارِ
على نهج الهوى في كل جيلٍ ..
وكل الصالحين ذوي الوقار
ولي في الحب آيات تسامت ..
أنال بهن عزي وافتخاري..
كيف لنا ان لا نكتب ونوثق عنها في أفاق الفضا الفسيح وهي تمثل خير سفير للرسالة الأدب الجميل بمشاركتها باحلى روائع المحاسن البديعة في مؤتمر أرض الكنانة الأدبي وهي التى تقول:
الشعر عندي كالهوى يحيي الفؤاد الميت
في الحقيقة يفخر الإنسان الجميل بالشاعرة السودانية المتفردة والمتوهجة بمشاعل النور( محاسن )التى تؤكد لنا في أشعارها الأدبية الرصينة ان دنيا حواء لا زالت بخير إنها شاعرة الحماسة والنضال ، محاسن الحرية وجمال الشعر كما تحدثت فيه بفخر وسموعن فاطمة غزالي أنت أمامنا ياشرف مكمل نادر...نحن عشان الوطن .. نملأ السجون ونخاطر موقف عزتك طالق على نارية يا هي دي المهرية شرفت النضال والشينة بضاريا .. نحن بنات بلد ..نحن عشان الوطن .. نملأ السجون ونخاطر ونهتف بنقول حرية وانى أرفع آيات الشكر والتحية للشاعرة المجيدة محاسن وهي سودانية بت بلد
https://www.youtube.com/watch?v=-94XQwmUQqsكذلك تأتينا الشاعرة السودانية المبدعة محاسن محمد ابراهيم جفون من بادية كردفان الغربية (دار حمر ) تحمل معها أرث ثقافي ولغوى واضح وأصيل ترجمته في أشعارها الجميلة ، انها شاعرة البادية بمثلها تشرق دروب المراحيل بالنمة والدوباي والدوبيت وتهتدى ألبل بمساديرها والحداء في طوي مسارات السير الطويلة وهى تحمل الأسفار الثقيلة في ظهورها مثل الهوادج والأجراس والخرس والقراف والزمام وكما الاحظ أنها ذكرت منطقة ام بادر في أقصى شمال كردفان بقصيدتها ووادي الوكيل وجماله جنن الناظر

https://www.youtube.com/watch?v=-uq73dFS4W8

هكذا أوردت لها شاعرة الدوبيت الخنساء بت المك مسدار كردفان من الخرطوم الي النهود لقبها (محاسن جفون ) في منتدى التوثيق الشامل وهي الحارزة علي المرتبة الثالثة في شعر الدوبيت والمسادير في مسابقة سحر القوافي

قبال ابدا نمي القول سرح سارقني
شديت الرحال والقول شرد سابقني
غـربته ومشيت للحنهم شارقني
دلوني ونسو الريد والمحل سايقني

جـضن ونوحن امياقي سون تل
وجسدي مورمو الشوق والفؤاد انتل
صوت قــلبي انفضح ياهالة تلتل وتل
وناتق بدني متل الفي القنيص قال تل

شوقـا للأهل عاتي وهوايلو ببكن
هاج فيا الدموع اللي مقاايلي نا عكن
الخـلا الروايق اصلو ماينفكن
بنوت كردفان مــتل الحمايم الركن

ومن اتحرك الباص النعاس حاصرني
لاجاني الملل لاتوب جفاه عصرني
قسم بالله في الكرسي الحنين مصرني
قطع كبدي قام من الطوال قصرني


وباب دمعي انفتح ياهالة كيف وصيدو
حرق جتتي الـولف المقفى قصيدو
فــارق كردفان بلدا موسم صيدو
ذكرني العلـي اكبادي بان فصيدو

بوطة وبادية سنبر وصوت بلوم وقماري
البل وسيسبان وسبق خيول سداري
يــا ارض التقاقيب والحنان الجاري
جاياك كــردفان طفيه وجي وناري

رملة ونال وتك وجمال صعب وصيفو
حنك كردفان قسما صعيب توصيفو
بادية بارا هجرك تب صلانا مصيفو
يا الممطورة حسنك ماكحلنا وصيفو

جحاف بارا والغيم السماهو مندي
طروني اب موايقا عنوه قامن حدي
ياســنبر بلدنا الديمة راحل ضدي
هدلته ومشيت نزل الدمع في خدي

وحزني مبطن اهالة وجوارحي مصابة
شوقا للاهــــــل مرقني في ام روابه
انا العاجبني في عينيه شوق وصلابة
فـــردن جتتي وقدني بي كوكابة

وماك شفتي الموايق وماك خبرتي دلالن
لاكـزات قلبي ياهالة واليم ملالن
انا العجبني في المحن الصعيب حلالن
دغـميس قلبي ساعة يدلقنو دلالن

اسـرني اب لحاظا ادمو قلبي وعلو
حارقات جوفي ياهالةودموعي ناهلو
انا الجنني خلا اعصاب مخيخي انحلو
ريـدا كالعضال ماخلا حس في محلو

قلبي نا هالة ممكون الا دار يتفرعن
الغي شبكو يالكاهلية مااااابنقرعن
الـخلا التهم من تالك ات يندرعن
هـضريب الغرام الفيا ثابت شرعن

وقــابلته البغني النال يشكر فيهن
حـكامت جريجخ قادر الله عليهن
اخـوات اب ضراع الحبة مابتجيهن
الفارســات وحوش الغابه ماتباريهن

وفيك حفير وفيك البير وفيك ناس كوه
فيــــك النوق وفيكنحاس وفيك الخوه
فيــك البقلم الفقار من الترقوه
فيــك الفي الدواس ماهددتو مروه

وعرنونك نضـم جقلى وربطلو هاف
وسبقك فرحـة البادية اللتيبة رهاف
مــداقة المصيف اليبس القحاف
وسبقك جقلى مابمرقو الجنى العواف

وقاصدنا الابيض وقلبي دوبل وفحه
والبــاص بحت الاسفلت لامن وحه
شــــوقك كردفان لهباتومامنشحه
فتناك يا امزبرجد وصابنا مرض الاحه

ودمع فيك سرح فوق عنقريب هبابك
البادية المزرقنة ديس هشابك شابك
مـجلية البطون مالقينا شيتن شابك
الـريد في الضلوم مابثبتنو مشابك



قبــال الخوي غرب التبلدي النيل
الــباص اتسحر من البحت واتميل
لاحنــــلي الجباريك واللتيب الشيل
الحكامة حاضرة الجيدها ديمه متيل

اتحركنا والهـــرع اب عجاج سابقنو
لاقــانا الفزع والليل مخيم جنو
عشــــانا البكفي الضيف كمان لكنو
كان عكت قسم مافي البلاحق جنو

وده الذكرني اخوي الكتلو داوي وقاصف
الاشـــتر نزالو الفي الدواس مابناصف
اخوي في خبتو فات حتى الغبار العاصف
عــراف الحيل درس جماعة آصف

واخوي في الهمبته بقابض الصقور في سماها
اخـوي قرطع بحــور يبسها من الماها
ركاب جقـلى اخوي الصاقعة بتلقاها
ديدان الهنيش قـــام دردما ومطاها

اخــوي صارع فهود لاواها فكه حنكا
قطع نــابا واشنابا ولفاها شنكا
فزاز الوعــر فوق غابة السنمكة
درار المحن والاصلة قالو زنكا

واخوي يوم قال تعال جات الصروف منرصه
اخــوي في الحارة ياخلايا مابتوصى
اخــوي العقرب ام ابار نهار فرصه
اخـوي يوم داك دبيبة الخيل بايدو مرصه

وفي الدودية شفنا البخسه والدحلوب
وغابات تك هبيل وهشاب وشف لالوب
ضــــقنا الفره والتقليه ضقنا الروب
وقابلنا المـلغم ومن وسط مكروب

وشـــفته الداره والقرانه مايل قوسه
شفته عجينة الكسره البمطق عوسه
شفته البحزم القراج في يوم الدوسه
شفنا تبلدي بارا وضقنا فيها عفوسه

حلالن كتااااار لاقوني قبـــل ام جكو
امــثال الخوي واخواتا لللجوف ركو
اتململتا حيـــــن شفته الحنااان وببكو
قلبي تلف متل كرت الرصيد حين حكو

وكان شـفتو النهود دارا تراثها حضارة
فيها النوبة فيها الفور وبرضو البرقصو النقارة
فيها النوق ونفخ البوق وفيها عرب مجانين بارا
فـــيها الرمشو فتن الدينكا والبقارة

وديل البنهرو الاسد البداوس ضلو
اسياد عز وشدادين سروج مابخلو
نحن الدابي في جوووه الجحر بنزلو
نحن اطفالنا بيداوسو النور وبشلو

وديــل جنياتنا عرضة وصوت طبول ودلايك
فرحة ومقدرة وصوت قمري شاغل المايك
انا الخــلاني ريد الكاحلو سوه شرايك
شال سيفو السنين في الزفه سوه عكايك

حي الوحدة عامر وخورو قاسم هافو
خــابرنو الجدود الما انفضح عرافو
الاتراك قسم كان جابو سيرتو بعافو
شيكان شاهدو والتاريخ وفوتوغرافو

والسما دوبلت بواحنا جابلو نسايم
البحــات بحت فضحخدود وزمايم
ســــراية ام رويق فكت رعيدا زايم
بلــه عروقنا زي بلة رويحة الصايم

الليل انقسم قسمن حشاي اهاتو
والصـــــــبر الجميل ايوب ذكر سياتو
الزول المتل قبلي اب رويق بسماتو
دقـــــــــات قلبي اتوزنن علي دقاتو

مايقي يرف جناني نا بي غناك مسرج
آآآلـــعينه البرقها على القويزات عرج
لخـــلوخة الهوى الخلت حشاي يتبرج
زيــــفتا اورت خلتني جن واتكرج

ويــاااستار علي ريدا منخر عظمي
لاخـــلاني قول لا حلا عقدة نظمي
اااه من اللظى الفوق احتمالات كظمي
وااه مـن موردا كل مايشرب يظمي

وعشنا وشفنا علا جمالك آآآبتوصف
النايره امزمام ريدك في كبدي مرصف
قـــرابك محزمة جوف حشاك منصف
ااااابادية غرب مسداري فيك ماوصف

نواصل


تعليقات 0 | إهداء 0 | زيارات 1576


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة