الأخبار
أخبار إقليمية
قوي الإجماع الوطني : بيان مهم الي جماهير الشعب السوداني
قوي الإجماع الوطني : بيان مهم الي جماهير الشعب السوداني
قوي الإجماع الوطني : بيان مهم الي جماهير الشعب السوداني


04-27-2015 03:33 AM
بسم الله الرحمن الرحيم
بيان مهم
الي جماهير الشعب السوداني

إنتهت مسرحية الإنتخابات المهزلة التي كشفت عن وعي وحيوية الشعب السوداني الذي قاطع الإنتخابات ، كما كشفت الإنتخابات عن عزلة النظام وفشله وأظهرت الحجم الحقيقي للحزب الحاكم ، رغم محاوﻻت الدعاية والإعﻻم المضلل .
إتساقا مع المقاطعة الشعبية ووفاءا للموقف الحضاري لشعبنا ومن منطلق الوعي والإلتزام الوطني ، تعلن قوي الإجماع الوطني الآتي :-
1/عدم الإعتراف بالإنتخابات .
2/عدم الإعتراف بنتائج الإنتخابات .
3/عدم الإعتراف بأي سلطة تتأسس علي نتائج هذه الإنتخابات .

جماهير شعبنا المناضل
تدركون أن قوي الإجماع الوطني قد قبلت بدعوة الحوار وصوﻻ لحل شامل يفضي الي معالجة مشكﻻت البلاد ، كما تعلمون بأننا قد وضعنا إشتراطات واضحة ومحددة لتهيئة مناخ الحوار ولمعرفة جدية ومصداقية النظام . قبلنا بحوار يؤسس لتفكيك البنية الإستبدادية للنظام ،حوار يقود لوضع إنتقالي كامل تقوده سلطة وطنية إنتقالية ، قبلنا بالحوار المشروط لتجنيب بلادنا مخاطر الإنزﻻق نحو المجهول . لكن في المقابل إتضح للجميع وبما ﻻ يدع مجالا للشك بما فيهم الأسرة الدولية ،إتضح عدم مصداقية النظام وكذبة وتمسكة بالسلطة .

عليه نحمل النظام مسئولية فشل الحوار كما نحملة نتائج تبعات ذلك الفشل .

إن عدم مصداقية النظام ، وإصرارة علي التمسك بالسلطة والبقاء علي سدة الحكم من شأنه أن يعمق أزمات البلاد ، بل أن بقاء هذا النظام يمثل أكبر عقبة نحو إيجاد مخرج ديمقراطي ﻻزمة التطور الوطني في بلادنا . لكل ذلك ولغيره نعلن لجماهير شعبنا بكل الوضوح والصراحة والمبدئية ، أننا الآن أمام خيار واحد ، خيار التحدي والمواجهة خيار العمل الجاد لحشد طاقات الجماهير والإنتقال بها نحو مقاومة جسورة منظمة وفعالة لإسقاط النظام الديكاتوري .
أن هدف إسقاط النظام يتطلب وحدة قوي المعارضة السودانية وتوحيد وبلورة الإرادة الوطنية المستقلة وإعﻻء راياتها عبر وسائل النضال السياسي والجماهيري ، إنتصارا لمصالح شعبنا الحقيقية في السلام والوحدة الوطنية والتقدم الإقتصادي والإجتماعي والإستقلال والسيادة الوطنية .

لإنجاز هذا الخيار الواجب ، ندعو جماهير شعبنا بكل مكوناتة للإنخراط في صفوف لجان المقاومة الشعبية ، وبالقدر اللازم والمطلوب وبما يستحقه ذلك من تضحيات .
* النصر حليف شعبنا علي طريق الإنتفاضة وإسقاط النظام وإستعادة الديمقراطية .
* التحية والإجﻻل للمعتقلين السياسين في سجون القمع والتنكيل .
* المجد والخلود لشهداء شعبنا .
قوي الإجماع الوطني
27 /4/2015
.


تعليقات 49 | إهداء 0 | زيارات 17021

التعليقات
#1255701 [المخالف]
1.00/5 (1 صوت)

04-28-2015 12:15 AM
التنظيم....التنظيم......أهم شـــــــــــــــــــــــئ من دون تنطيم الحصيلة صفــــــــر كبيييييييييييييييييييير يا قوي الإجماع الوطني ولو ما عارفين التنظيم دا شنو عليكم الإنضمام للنظام (الخالف)الذي ليس (مخالف) وكفي المؤمنين شر القتال !!!!!!!!!!!!!

[المخالف]

#1255673 [واجد مافاهم حاجة]
1.00/5 (1 صوت)

04-27-2015 10:58 PM
هو الكلا م بقروش نسمع ضجيج ولانري طحين . اعملو حاجة او حركة او حركتين وبعدين انحنا بنوريهم الطفا النور منو!!!!

[واجد مافاهم حاجة]

#1255626 [abusami]
1.00/5 (1 صوت)

04-27-2015 09:16 PM
فيصل اقاسم صاحبكم في قناة الجزيرة شو كان صار لو ان الرئيس السوداني عمر البشير طلب من المخابرات تخفيض تسعيرة نتائج الانتخابات من 94% الى 60% مثلاً. تنزيلات موسمية، وبيظل ربحان.

[abusami]

#1255588 [mubarak]
1.00/5 (1 صوت)

04-27-2015 07:43 PM
هنالك الكثبر على اللمعارضة فعله قبل الدخول في مواجهات مباشرة مع البشير وزبانيته امثال الفريق الركابي فهؤلاء على استعداد ان يبيدوا الشعب السوداني . لذلك يجع تضييق الخناق على الحكومة داخليا وخارجيا . يجب تصنيف افراد القوات النظامية تصنيفا دقيقا لمعرفة الصالح من الطالح . على ان تستمر الضغوط على الحكومة دون ان تاخذ نفس للراحة . فلو استمرت القوات النظامية في حالة استعداد دائم سيصيبها الوهن . لا نريد لتجربة سبتمبر ان تتكرر . يجب ان تذهب الحكومة باقل التكاليف وذلك ممكنا بالتخطيط الصحيح والننظيم الدقيق

[mubarak]

#1255565 [بت البلد]
5.00/5 (1 صوت)

04-27-2015 06:45 PM
قدما قدما والى الأمام نشاطركم ونشد من أزركم ولا نامت أعين الجبناء

[بت البلد]

#1255543 [ابو الشيماء]
0.00/5 (0 صوت)

04-27-2015 06:05 PM
انا مازلت اطرح السؤال البري جدا جدا والله غلبني .. الضحك .. ههههههههاهههههههاخخخخخ قققرر قر قر قر
اها ها
متين يا جماعة المفاجأة بتاعتكم دي .. والله الايام دي قاعدين ساكت ومرطبين وحتي اصابنا الخمول وانتفاخ الكروش .. عايزين لينا سكة سكتين وراكم لانكم جرياين جنس جري .. يعني عاوزين سويدي ساهل
في انتـــــــــــظأأأأأأأأأأأأأأأار , المــــفـــاجأأأأأأة حقتكم

[ابو الشيماء]

#1255508 [nagatabuzaid]
0.00/5 (0 صوت)

04-27-2015 05:04 PM
تعليقى يشمل نقطتين واحدة للجداد والثانية لقوى الاجماع بالخارج :

نبدا بجدادى يلقط الفضلات ( الجداد البلقط الحب جداد نظيف تربية بيوت ) لكن يلقط الفضلات ده تربية كوش مقرف اكتر من جداد الله كتلا . الجداد ملاء الساحة فى الموضع ده اها ياجداد السجم مالكم ماظهرتوا فى موضوع الفريق اب شعرا وشنبا شيب وخطوتين والقبر ( الاعمار بيد الله ) فريقكم يعمل على القضاء على من تبقى من العسكر واسرهم ويقطع دابر نسلهم مالكم هسسسسسسسس سكتوا قولة كت ما قدرتوا عليها اها يا الجداد فى سرقة خزائن الذهب من لندن وهروب اللصوص الهنود المستاجرين للسودان حيث صاحب الخزانة مدبر السرقة مالكم هسسسس قولة كاك ما سمعناها مالكم فى فضيحة امين الجيش وطيارة غانا قولة كووك ما سمعناها فى فضايحكم تخرسون واراكم الان تكتكتون اخرسوا وقسما ستخرسون وليهناء رئيسكم ببنبر النار الحيقعد فيه وستشمون رائحة الشياط ومعه حكومة ام دفسوا جلوسا فى بنابر من نار تكويهم وتشويهم ان شاء الله

اما قوى الاجماع كلامكم بالحيل سمح لكن تعالوا علينا جاى اقيفوا مع الجوه اتركوا نضال بره اتسجنوا اتحاكموا اتخطفوا تلقونا معاكم وقدامكم نحن نحى الشيخان و د ساندرا وكل المعتقلين والمختطفين على نضالهم وجسارتهم ومعاهم بكل وجداننا وساعة الجد سيجدوننا معاهم والا عندما تقع الواقعة اوعكم تمدوا راسكم ولن تلطشوا جهاد ونضالات اخوتنا وابنائنا

[nagatabuzaid]

ردود على nagatabuzaid
[nagatabuzaid] 04-27-2015 10:33 PM
رد على جبكسين الذى لم يقتل الهيم :

( انتى من انتى ) المخاطب المفرد المؤنث ( انت ) التاء مجرورة بالكسرة وللمخاطب المفرد المذكر ( انت ) التاء منصوبة بالفتحة اما باقى تعليقك فهو خارج الموضوع ولغلغة وورجغة خارم بارم غير مفهومة ولا تستحق الرد عليها والعيب فى الجندوكم ركزوا على الفاقد التربوى دون تاهيله وكانت النتيجة جنس نوعك ده اجرى اتعلم كويييييييس وتعال رد . لكن اقول لك تعليقى وجعك خلاك تلغلغ انتم الايام دى حالتكم دايرة ليها جنازير حالتكم قلتوا اكتسحتوا خجا وتزويرا وجداديا مش ؟ ( انتى من انتى )

United States [جبكسين] 04-27-2015 08:57 PM
وانتي من انتي علشان تنصبي نفسك القاضي و الوصي علي كل من له رأي مخالف بانه جداد وبطيخ . أولاً سياسة التصنيف هذه هي من وصلتنا في السودان إلي هذا الحال ولا فرق بين كل من في الحكومة أو خارج الحكومة احزاب تقليدية أو تقدمية . في كل العالم الناس عرفت أنو الأوطان بوتقة لكل الأفكار و الأجناس و المعتقدات المختلفة ولا بد من وجود قانون يحكم الجميع ويكفل للجميع الحقوق المدنية واحترام هذا القانون . ولكن في سودان ألهم كل من وجد نفسه في موضع الحاكم أقصي الآخرين وعودي إلي تاريخ السودان الحديث من بعد الأستقلال إلي انقلاب الشيوعين مع نميري . ليس هنالك وصي ولن يكون في سلام أبداً طالما اننا جميعاً لا نقبل بعض ولا نحتكم إلي قانون واحد . وسواء وافقتي أم رفضتي الاسلامين لهم ألحق مثل الشيوعين مثل البعثيين مثل الأنصار و الاتحاديين في هذا البلد و إذا عدتي إلي سياسة الأقصاء إذاً اقبلي بمن يقصوك الآن لأن كما تدينين تداني .


#1255500 [ابو رياض]
0.00/5 (0 صوت)

04-27-2015 04:56 PM
يغنى المغنى وكل على ليلاه سئمنا من التنظير فى النت الظاهر الناس دى ما عندها موضوع الحمد لله على نعمة الامن والامان

[ابو رياض]

#1255494 [ابو إبراهيم]
0.00/5 (0 صوت)

04-27-2015 04:46 PM
نحن شعب السودان نوافق و نبصم بالعشرة علي دحر هذا الحزب و نقف معكم في دعوتكم لجماهير شعبنا بكل مكوناتة للإنخراط في صفوف لجان المقاومة الشعبية ، وبالقدر اللازم والمطلوب وبما يستحقه ذلك من تضحيات و نطالب من قياداتنا في كل الحزاب و الحركات المسلحة الذين يتحركون من الخارج بالحضور للخرطوم و جمع الصفوف و قيادة الجموع في الشوراع و بذلك يحرج النظام و تكون القيادة موجودة بالقرب من الشعب.

[ابو إبراهيم]

#1255479 [ابو الشيماء]
0.00/5 (0 صوت)

04-27-2015 04:18 PM
image

image

[ابو الشيماء]

#1255383 [عون الشريف دفع الله]
0.00/5 (0 صوت)

04-27-2015 02:07 PM
فادت قناة CBC EXTRA، في نبأ عاجل لها منذ قليل، بأن اللجنة العليا للانتخابات السودانية، أعلنت فوز عمر حسن البشير، بولاية رئاسية جديدة، بعد حصوله على أكثر من 94% من الأصوات.

كما توقع كل السودانيين والسودانيات .!!!!!!
شيل شيلتك ياسفاح .....!!!!!!!!!!!!!!!!!!!!!!!!!!

[عون الشريف دفع الله]

ردود على عون الشريف دفع الله
[nagatabuzaid] 04-27-2015 04:30 PM
94 بالمئة طيب ال6 بالمئة ديل نحن ياربى الما ادينا صوتنا ؟؟ والله ليحزننى ان تحكمنا مخلوقات مضحكة تضحك على روحها وتضحك العالم عليها واصلا العالمضاحك عليها


#1255315 [القرفان]
5.00/5 (3 صوت)

04-27-2015 01:05 PM
كمية دجاج في الخبر دا .
اصحوا يا ناس الراكوبة
الدجاج محرضنه بمكنة جديدة واسلوب جديد في لخبطة الكيمان ..لاحظوا لكل التعليقات البكون فيها انا ما مؤتمر عفني ..انا ما كوز ... ناس الانقاذ سيئين بس انت اسوء منهم .. والتعليقات الخبيثة المن النوع دا
انتبهوا يا ادارة الراكوبة الدجاج داخل بحنك جديد للتشويش والتخذيل

[القرفان]

#1255297 [chatt]
5.00/5 (3 صوت)

04-27-2015 12:45 PM
بعض التعليقات تغرد خارج السرب لتعكس فجاجة سياسية في فهم تطور الثورة، اولاً لااحد يملك ان يحرم احد مهما كان جهده وتفكيره في كيفية مقاومة النظام والتي بدأت منذ اليوم الاول واجبرت انقلابيو الاسلام السياسي في الجبهة القومية الاسلامية من نفي انهم "كيزان" لفترة استمرت عامين من عم انقلابهم المشئوم، والذي سار في خط مستقيم ومتصاعد في ممارسة العنف والدكتاتورية، والان استطاعت قوى عريضة من الشعب السوداني ان تجتمع في منبر تطور منذ البيان الاول للانقلاب وبظهور التجمعات المختلفة التي شهدت الكثير من التطورات وابرزت حنكة الشعب السوداني وقدراته في اقامة التحالفات وتجميع القوى المعارضة، فافعل السياسي يبدا بسيطاً ويتصاعد مع تصاعد الازمة السياسية والاقتصادية لاي نظام يابى ان يقترب من الجماهير ويحكمها بمنطلقات الديمقراطية. والمتابع لتطور الثورة السودانية يجد كيف انها تطورت وكيف دار الصراع هنا وهناك ، وكيف خلقت التراكمات هذا المد الجماهيري الذي سينفجر في لحظة تاريخية" انتظرناها طويلاً" . فلاشي يولد في فراغ ، وفي رحم الثورة تنبت بذور كثر تعكس ملامح وتاريخ وتجربة كل من ساهم في صنع الثورة ، ولم ينحاز الى معسكر الاسلاميين الانقلابين .

[chatt]

#1255272 [الناهة]
3.00/5 (2 صوت)

04-27-2015 12:13 PM
مرحبا قوى الاماع الوطني
الشعب السوداني قد حسم الامرتماما ولم يكن ينتظرمنكم مثل هذاالبيان لترسموا له خطاه حيث المعاناة من الوضع الميشي هي لوحدها كافيةليقوم الشعب بالانتفاضه دون الاملاء من احد
ويؤسفني ان ابلغكم بان الشعب السوداني قد فقد الثقة في معظم الاحزاب السودانية التي وقفت تتفرج عليه ابان ثورةسبتمبر 2013م التي تم القمع الفصل الاول منها بسقوط عدد من الشهداء قتلوابدم بارد ورغما عن ذلك عندما طرح المؤتمر الوطني حوار الوثبة فاذا انتم تتهافتون من اجل الحصول على مقعد في الحوار غير آبهين بالشعب السوداني الذي لم يعد يثق في المؤتمر الوطني وامتد عدم الثقة ليشملكم ايضا ولا بريد الشعب ان تكونوا شركاء له بعد الانتفاضة لانكم لاتحسنوا شيئا غير الصراع حول الحقائب الوزارية وبذلك يعاد انتاج الازمة حتى يقفز مجددامن يسرق ارادةالشعب السوداني26 عاما اخرى

[الناهة]

ردود على الناهة
United States [بت البلد] 04-27-2015 06:20 PM
ومن أنت حتى تتكلم باسم الشعب :أمثالك هم من يدمرون وحدة الصف وينادون الى التفرقة والشتات , ولولا هؤلاء البواسل لوجدتم ضالتكم وزورتم النتائج ... أما سمعت بحملات ارحل ونداء السودان ؟؟؟ لقد قاموا بمجهود جبار ومقدر داخليا ودوليا فماذا فعلت أنت ؟؟؟!!!

United States [Rebel] 04-27-2015 01:16 PM
* و بعدين معاكم يا جداد!! متى ترعوى!!


#1255257 [Abbood]
3.00/5 (2 صوت)

04-27-2015 12:01 PM
و الله مهزلة أخرى !!! هل قاطعنا الانتخابات لكي يفشل النظام ( الأصلو فاشل) و نأتي بكم أنت يا سجم الرماد!!! بيان هزيل و ملكلك و لغة مكلوجة و أخطاء ناس تامنة ظاهرة فيه. الشعب قاطع الانتخابات كرسالة لكل السياسيين بما فيهم أنتم و النظام المهلهل و أنتم أضعف من أن تحكموا بلد فيه مثل هذا الشعب ... أذهبوا بأجنداتكم العقيمة إلى الجحيم و اتركوا هذا الشعب لحاله فهو يعرف كيف يدير شؤونه . كفانا الله شركم و شر هذه الحكومة .

[Abbood]

ردود على Abbood
United States [Rebel] 04-27-2015 01:20 PM
* لا اعتقد انك تحديدا, قاطعت الإنتخابات!!
* اكثر من ذلك, اعتقد انك كنت احد "حراسها الأمنجيه", او احد "المزوراتيه"!!
* إيه رايك؟


#1255236 [كتمت شعبي]
4.88/5 (4 صوت)

04-27-2015 11:30 AM
عفارم تمام .. صاح الكلام .. كتمت شباب
كتمت خلاص بلغ النصاب
نفد الصبر والجو كتم.
جيبك نضف
وطنك نشف
كتمت سخانة الف الف
اغضب وثور
قوم وانتفض
قف وانتصب ..
لا تستكين ..أو تستخف
للحالة والعيشة القرف
نفد الصبر والجو كتم ..
جيبك نضف
وطنك نشف
لو بكرة عن وطنك سئلت
امام عيالك تنكسف
مهما تبرر او تقول .. ومهما تصف
برضو برضو حتنكشف..
لا تنحبس للحسرة والالم المرير لا ترتجف
فك البلف
كتــــاحة تكتـح
ما تخلـــي تك تح
غبارها يلفــــح
تكشف وتفـــــضح
للدمعة تمـــــسح
للظلم تكـــــشح
حرية تشطــــــح
في وطن مشــلح ... حضن العذاب
عفارم تمام ... صاح الكلام كتمت شباب
كتمت خلاص بلغ النصاب
*******
كتاحة كتاحة
اعصار ودوامة
طلاب شيوخ ورجال
نسوان بنات اطفال
الناس هناك لآمة
ام در وارض القاش
جرافا ديامة
كتاحة قبلية تبرق أمل وشعاع
تحمل صراخ الجاع
تهتف بصوت مسموع .. عن ظلم ساد أنواع
تبكي الصرير المر.. من شدة الأوجاع
كتاحة تلغي فساد .. وتقلع قلع من باع
تنقذ بلد قد ضاع . .. من خائنا جعجاع
كتاحة غربية ... ومرات جنوبية
تقلب شمالية ..... وفجأة شرقية
شايلة البرق والرعد
شايلة الأمـل والوعد
تحمل دعاش وعبيـر
لثورة التغير ..كتاحة للتغير
كتاحة تحت وفوق .. تكسر قـيود الطوق
تقذف يمين وشمال... تنسج خيوط الفال
كتاحة للتعبير عن ثورة التغير
الحكم ما هو خلـود
بكرة الظلم حيفوت
الكبت والجــبروت
لو كان دوام لســـواك
ما كان بترجع ليك !!
والله أحسن ليك ... فالنفس لوامة
حسرة وأسف وندامة
والحالة مش دوامــة
كتاحة كتاحة... إعصار ودوامــة
طلاب شيوخ ورجال
نسوان بنات وأطفال
ام در وارض القاش
ساحات هناك لأمـــة
جرافا ديامة .. الكل نزل وأجاب
عفارم تمام ...صاح الكلام ...كتمت شباب
كتمت خلاص بلغ النصاب
*************
كتاحة كتاحة ... جوة البلد لافة
يا العسكري السراق
مين فينا شاذ آفاق !!
ياالكاذب الافاك .. لا خلقة لا أخلاق
مين الاباد شعــــبو ؟؟
مين الخســر ربــو ؟؟
مين الكــلام كذبــو ؟؟
مين الخلف وعدو ؟؟
مين البخون للـعهد .. للكلـمة والميـثاق؟؟
مين فينا شاذ افاق !!مين الكلامو نفاق ؟؟
ياالكاذب النقناق .. لا خلقة لا أخلاق
قول ياا
اسم مكتوب .. في المحكمة العلياا
يا متهم مطلوب...... لعدالة دولياا
يا هاربــا شــارد .. في هذه الدنياا
وينك تمش حتروح ؟؟
من رب عوضيــــاا ؟؟
انت الشذوذ نفسو لو تم وصفك بيه
اتبرا منك وزاق !!
مين فينا شاذ آفاق!!!
والكل منك ضاق
طبعك كضب ونفاق ..اصلو الطبع غلاب
عفارم تمام ..صاح الكلام ..كتمت شباب
كتمت خلاص بلغ النصاب.

[كتمت شعبي]

ردود على كتمت شعبي
[nagatabuzaid] 04-27-2015 04:35 PM
( كتمت خلاص نفد الصبر ). نحن منز زماننفد الصبر وكان صبر ايوب نحن فتناهو

European Union [somyttotto] 04-27-2015 03:55 PM
يا كتمت شعبي ، عدوها لي نضال بالشعر ، ونحن نحصد في الاصوات ونحكمكم فعلا لا قولا. خليكم في قصايدكم فالشعب السوداني قنعان منكم وعارف الفيكم. خمسة وعشرين سنة قضيتوها في النضال الشعري والبوح بالكلمات. نوموا نومكم حقكم راح راح راح.


#1255177 [ابومحمد]
5.00/5 (2 صوت)

04-27-2015 10:35 AM
هذا ما كان ينبغي ان يحدث من زمان وارى فعلا ان الوقت والظروف الان مهيأة لانتفاضة يتحدث عنها العالم وتكذب ادعاءات النظام المتكررة بان الشعب معه وما حدث في الانتخابات السابقة من مقاطعة شعبية شاملة للانتخابات افقد النظام عقله وكشفت ضعفه وانعدام الثقل الشعبي له ولهذا لابد من عمل منظم ومكثف من قبل قوى الاجماع الوطني يبدأ من الاحياء ومواقع العمل والجامعات والمدارس بتهيئةالشعب وتحقيق الاجماع الثوري وتحديد نقطة وموعد انطلاق الانتفاضة ومراحل توسعها على ان تبدا في وقت واحد في المدن السودانية وفق خطة دقيقة ومدروسة ومتفق عليها من الجميع والله اكبر والعزة للاسلام والمسلمين ولسوداننا الابي ونحن منتظرون فلينتظروا

[ابومحمد]

#1255170 [dulaldaleib]
0.00/5 (0 صوت)

04-27-2015 10:32 AM
ليس هناك ما يعرف بقوى الاجماع الوطنى,,,, دعونا من هذا الهراء الايدولوجى القذر,,,, قد ولى عهد الديناصورات الى الابد من غير رجعة,,,,, الدعوة للانتفاضة لا تتطلب وجود هؤلاء الفاشلين الذين لم ينجزوا شيئا طيلة ال60 عاما الماضية,,,, انا لست معكم ولا مع الحكومة,,, انا مع الشعب الذى قاطع الانتخابات بدون تعبئة من احد,,,, سيزول النظام ولكن يبقى خيار الخلف هو المحك,,,,, الراجيلو شئ من المعارضة قد يطول انتظاره,,,,,, نوموا فى فنادقكم واكلوا من سماسرة الحروب ايها الجبناء ,,,,فلا امل فيكم ولا نتوقع منكم الا الشؤم والخبال,,,, عليكم اللعنة جميعا ايها الارزقية الذين متعتم انفسكم وطحنتم الشعب الذى اصبح همه كيس الرغيف,,,,,قتقلتم البسمة فى شفاه الاطفال الذين لا يجدون مأكل ولا مشرب ولا تعليم,,,,, ليس لكم حيز للولوج الى السلطة مرة اخرى,,,,,, فلتأحذكم الزبانية الى ألسنة اللهب ,,,,,,

[dulaldaleib]

ردود على dulaldaleib
United States [كنياتا] 04-27-2015 07:28 PM
بحكم خبرتنا مع هؤلاء الكيزان من ما الواحد يقول ليك والله يا أخواننا أنا لا مع الكيزان ولا مع المعارضة أعرفوا تماماً إنه دا كوز من أعلى سبيبة في رأسه إلى أخمص قدميه وأنه بذلك يريد أن يدس سماً زعافاً ويشكك الناس في بعض ... إحذروا أمثال هؤلاء

[nagatabuzaid] 04-27-2015 04:39 PM
( قتلتم البسمة ) انت موزع زيت بسمة بتاع عمى الفريق اب شنبا روب بياع الزيت ؟؟

United States [Rebel] 04-27-2015 01:21 PM
* بتقبض كم؟

[murtada eltom] 04-27-2015 01:02 PM
To..Dula...For your information....Existing leader of NIDA AL SUDAN you spoke about are Still leaders of our today struggle....At the the time you was combfortably sit behind key board ,or sleeping at house ,,,,TWO HEROS ...FAROUK....AND MAKI...been under detention At Koober prison,, Fighting for you,,Sorry not for you ,,but for people of Sudan,,learn more,,and stop writing nonsenses


#1255168 [ودامدرمان]
5.00/5 (6 صوت)

04-27-2015 10:31 AM
العصييييييييييييييييييييييييييييييييييييييييييييييييييييييييييييييييييييان المدني مدعوم بالعمل العسكري هو السبيل الوحيد لدحر هذا النظام الفاسد

[ودامدرمان]

#1255163 [شبتاكا]
4.94/5 (5 صوت)

04-27-2015 10:27 AM
لكل ادعياء الزكاء السياسى وكلاب امن النظام واصحاب المصالح البيشتمو ناس المعارضة نقول لهم زمان كلامكم ده كنتم بتقولوه ايام الدكتاتور السفاح نميرى وبنفس الاسلوب ويمكن نفس الكلمات وقلتم الشعب جعان لكنه جبان..واول ما قامت الانتفاضة هرولتم الى كل المنابر وادعيتم البطولات وكم من عميل لاجهزة امن نميرى وحرامى وداعر بشهادة الشهود سمعناه ورايناه يتشدق بالثورية ومواجة الضلال المايوى ...نعلم تماما ان شعبنا الطيب تتفشى فبه الاميه وكل امراض التخلف ونعلم تماما ان كثير من احزابنا السياسية ومنظمات المجتمع المدنى مخترقة من كل اجهزة المخابرات العالميه ولكن نعلم ونؤمن بان شرفاء وشريفات بلادى كتار وعلى مد البصر وموجودين فى كل التنظيمات المعارضه وانتفاضة ابريل ...........سبتمبر قبل الفائت صنعتها نخبة من الشرفاء واكرر نخبة من الشرفاء وزى ما قال الخالد محجوب شريف....عمق احساسك بحريتك يبقى ملامح فى ذريتك ....والشرف ما ادعاءات فارغة ده بنرضعه من امهاتنا الحرائر ومواجهة الموت فى سبيل الوطن ده مهر بندفعه بكل تفانى من اجل الانعتاق...وقوى الجماع الوطنى نحى وقفتها الشجاعة امام بطش وجبروت دكتاتورية الانقاذ الاخوانيه...وادائهم مهما كان معطوبا فى نظر البعض ولكنه لبنه فى جدار مواجهة الدكتاتوريه الفاشيه وبدلا من ان نلعنهم بادعاءات كذوبة يسال الواحد منا ما هو دورك فى مواجهة الدكتاتوريه واقتلاع جزور العفن الاخوانيه وانا على يقين تام بان كل من يقلل من دور المعارضة فى مواجهة الباطل الاخوانى من اصحاب الغرض وعنده مصلحة فى استمرار النظام...........

[شبتاكا]

ردود على شبتاكا
United States [بت البلد] 04-27-2015 06:42 PM
والله كلامك صاح ... ديل عايزين حكم الانقاذ يدوم عشان يشبعوا من السف والنوم ... ونقول لهم المعارضة قامت بأعظم دور أدى لفشل الانتخابات وفجر الخلاص آت لا محالة ...


#1255152 [غيور على بلده]
4.88/5 (4 صوت)

04-27-2015 10:18 AM
ابشرو والي الامام ...ثورة في ثورة حتى النصر

[غيور على بلده]

#1255144 [خالد بلة]
5.00/5 (4 صوت)

04-27-2015 10:08 AM
نعم أؤيدكم واساندكم لإسقاط الخونة والجبناء يداً بيد وساعداً بساعد لنزيل هذا الظلم

[خالد بلة]

#1255143 [حسين ع الغنى]
5.00/5 (4 صوت)

04-27-2015 10:06 AM
إقتباس:
(( أننا الآن أمام خيار واحد ، خيار التحدي والمواجهة خيار العمل الجاد لحشد طاقات الجماهير والإنتقال بها نحو مقاومة جسورة منظمة وفعالة لإسقاط النظام الديكاتوري)) .

هذا هو الكلام النجيض الذى ظل ينتظره مواطنى السودان .. فليكن شعار المرحلة القادمة هو إزالة النظام الإستبدادى و عصابته و لا مجال للمهادنة ولا مكان للمساومة مع نظام مجرم مخادع لا يمكن الوثوق به .

لقد حان وقت تفعيل العصيان المدنى العام فى كل ارجاء البلاد و جاء وقت الإعتصامات السلمية لإسقاط هذا النظام الضعيف المتهالك , إنه فعلاً نظام ضعيف مرعوب و نمر من ورق .
عاش نضال الشعب السودانى البطل و إنها لثورة حتى النصر .

[حسين ع الغنى]

#1255138 [العيسابي]
0.00/5 (0 صوت)

04-27-2015 10:03 AM
كيييييف ؟ بيان عن كيف تكتب موضوع إنشاء؟ صفوف لجان المقاومة الشعبية دي وين ؟ وبقيادة منو ؟

إقتباس (أننا الآن أمام خيار واحد ، خيار التحدي والمواجهة خيار العمل الجاد لحشد طاقات الجماهير والإنتقال بها نحو مقاومة جسورة منظمة وفعالة لإسقاط النظام الديكاتوري ).

مقاومة جسورة ومنظمة وفعالة البنظمها وبخليها فعالة منو؟
والله جبتو لينا الضغط والسكري ووو...
مقاومة وقوى إجماع وطني جبانة إنتو السبب في إطالة عمر هذا النظام ، والمتأمل في طبيعة الشعب السوداني يجد أنه يمتاز بميزة فريدة دون سائر المخلوقات لم يكن يمتاز بها إلا مؤخراً وهي قوة التحمل والصبر والتعايش مع الأنظمة الدكتاتورية وإفرازاتها من ذل ومهانة وإحتقار والدليل على ذلك صبرة وتحمله لهذا النظام 26 سنة مع وجود معارضة عاجزة وضعيفة عايزها باردة ومقشرة ، ما في حاجة بدون ثمن والثمن شهداء وما في زول بموت ناقص عمر ، وكل زول ربنا كاتب ليهو موته بطريقة معينة بالملاريا والتايفويد على فراشك ،أو حادث حركة لاقدر الله ،أو رصاصة في مظاهرة ضد النظام ... الحدَاث مو سواي مش كده ؟

[العيسابي]

ردود على العيسابي
United States [Rebel] 04-27-2015 01:24 PM
* "صفوف لجان المقاومه الشعبيه" دى ما حتجى لباب حضرتك..خليك مفتح!!


#1255137 [الحلومر]
5.00/5 (2 صوت)

04-27-2015 10:03 AM
ما قام باطل إلا لغفلة أهل الحق

[الحلومر]

#1255133 [ولا طابت بلا عيشة]
0.00/5 (0 صوت)

04-27-2015 09:58 AM
يعني قلت لي كلها حملتوها النظام
ما عندكم مشكلة النظام جمل شيل بتحملا ليكم تب اها تاني عندكم حاجة ولا كفاية الحمولة دي
قال حملناها النظام قال هو اصلا معترف بيكم عشان تحملوه

[ولا طابت بلا عيشة]

ردود على ولا طابت بلا عيشة
United States [Rebel] 04-27-2015 08:03 PM
* ياخى مش كان "تدشى" من الباسطه بتاعة عطا وسخ الطفحتها دى بالاول, بدل ما تجى "تطرشها" لينا هنا!!
طرشك بلا إخمكم كلكم واحد واحد..يا إلاهى يا من انت جاهى!!


#1255098 [جعجعة بلا طحين]
4.00/5 (1 صوت)

04-27-2015 09:28 AM
بصراحة اصابنا الممل من جعجعة المعارضة والمعارضين كله تنظير ساكت كان انسب وقت يظهر فيه قناة المعارضة ايام الانتخابات وترفع الصور والفيديوهات علشان الـ 13% ذايتها ما يلموا فيها لكن طلعتو سلاقين بيض وربرابين في الفاضي وكلامكم اكتر من فعلكم اصابنا اليأس صراحة نعم ديل كضابين ودجالين وما عندهم التكتح يقدموها للمواطن لكن ارجل منكم ماسكنها رجالة وحمره عين وتاااااااااني 5 سنة والخضر بقول ليكم استعدو من اسي لانتخابات 2020 يعني الحكاية الى ما لانهاية ويجو احفاد اخوان البشير يحكموا احفادكم وانتو خلوكم مع التنظير ....

قررت ابقى منافق وانضم للبشير
سير سير يا البشير
معارضة ضعيفة كلامها كتير
ناس شغالة بالتنظير

[جعجعة بلا طحين]

ردود على جعجعة بلا طحين
[فدائى] 04-27-2015 01:11 PM
اولا نقدك للمعارضه لا يستند على شى ولكن لتعرف انت وكل من ينتقد المعارضه انها قدمت كثيرا الا يكفيك ويقنعك ان يقدم اثنين قد تعدوا الثمانين عاما انفسهم لنظام معروف عنه انه لا يتورع ان يفغل اى شى قدم الاستاد فاروق ابو عيسى وامين مكى انفسهم للحكم بلاعدام ودخل السيد الصادق المهدى كوبر واعتقل ابراهيم الشيخ وكل يوم يعتقل النظام اعدادا من الناشطين نساء ورجال ولا تنسى الملاحقات والتعزيب وقطع العيش وكل ما يفعله الشيطان فا لو علمت الميزانيه التى يرصدها النظام للمعارضه فلن تتكلم ابدا

[Babiker Shakkak] 04-27-2015 09:47 AM
أنت يا جعجعة أحد أفراد هذا الشعب وترى و تعيش ما يحدث و اريد أن أقول لك طول بالك و لا تيأس حيث لا شىء فى الدنيا أشد فتكا من اليأس. ياخى شوية أصبر قبل أن تتهور و لا تيأس من رحمة الله.


#1255081 [المهاجر]
0.00/5 (0 صوت)

04-27-2015 09:17 AM
انظروا للارضيه شعب لا رجاء فيه

[المهاجر]

#1255072 [أب قرن]
0.00/5 (0 صوت)

04-27-2015 09:03 AM
إجماع وطني مين يا عمي بعدما فضحتكم كرنونة نقد له الرحمة

[أب قرن]

ردود على أب قرن
[البعاتي] 04-27-2015 12:13 PM
طيب كيف سبتمبر معاك ؟


#1255070 [مالك الحزين]
5.00/5 (1 صوت)

04-27-2015 09:02 AM
والله هذاالنظام رغم أخطائه الكثيره ,, لكن برضو أحسن منكم ألف مره ,, إنتو عاوزين تعملوا فوضى في البلد , الآن البلد عايش في أمان الله ,, إنتو عاوزين تخربوا البلد ,, الناس تمرق الشارع , وإنتوا قاعدين تصدروا في البيانات ,, وبعدين تجوا تركبوا ,, وتدلدلوا كرعينكم ,, كلكم سجم في رماد !!
واحد يجى ناطى ويقول أنت مؤتمر وطنى ,,
ده رأيى يأخى ,, وأنا حر أقول رأيى ,, إنت قول رأيك !!

[مالك الحزين]

ردود على مالك الحزين
[مالك الحزين] 04-27-2015 08:27 PM
والله فعلا أنت آخر زمن ياوهم ,, طيب قول أنا مؤتمر وطنى ,, أنت مالك ,,؟؟ مش كل إنسان حر في إنتماءه يا كرور ,, ولاعاوزين الناس تمشى بمزاكم يا جلافيط ياوهم ,, أها البشير حيكب فيكم 5 سنه أيه رأيك ؟؟؟ أشرب من البلاعه أحسن لك

[اخر الزمن] 04-27-2015 12:13 PM
ههههههههههههههه
والله محن
يا دجاجة انت ما مؤتمر عفني انت دجاجة ممعطة وعبيطة وساذجة جدا جدا
ههههههههههههه


#1255046 [المجنون]
0.00/5 (0 صوت)

04-27-2015 08:45 AM
ام قيردون الحاجة الكل يوم مطلعة بيان

البيان بالعمل

[المجنون]

#1255042 [الزلال بت الشمال]
0.00/5 (0 صوت)

04-27-2015 08:42 AM
تحلموا

[الزلال بت الشمال]

#1255023 [أبوقرجة]
0.00/5 (0 صوت)

04-27-2015 08:17 AM
الله أكبر الله أكبر هذه هو العمل الجاد والذي سيؤدي إلى إسقاط نظام الجبهة الإسلامية المتعفن ... الله أكبر الله أكبر على الطغاة .... لإنجاز هذا الخيار الواجب ، ندعو جماهير شعبنا بكل مكوناتة للإنخراط في صفوف لجان المقاومة الشعبية.

ستة وعشرون سنة والنظام يعبث بمقدرات البلاد ومزقها إلى دولتين معترف بهما .. وعدة دول في طريقها إلى الانفصال .... لو بقى نظام الانقاذ هذا إلى فترة سنة واحد والله تجدوا وطنكم مقسم إلى أكثر من ثمانية دول.

الاقتصاد أنظروا إلى المعيشة التي يعيشها الشعب اليوم من ضنك في الحياة ...


أنتظموا في لجان المقاومة الشعبية ... هذاالوقت ليس للجدال... الوقت للعمل العمل العمل العمل .. لاسقاط هذا النظام الفاشي النازي..

الله أكبر الله أكبر الله أكبر

[أبوقرجة]

#1255022 [زول]
0.00/5 (0 صوت)

04-27-2015 08:17 AM
اعلنوا العصيان المدنى

[زول]

#1255020 [زول]
0.00/5 (0 صوت)

04-27-2015 08:16 AM
اعلنوا العصيان المدنى

[زول]

#1255005 [zoal Saket]
2.00/5 (1 صوت)

04-27-2015 07:57 AM
عدم الإعتراف بالإنتخابات .
2/عدم الإعتراف بنتائج الإنتخابات .
3/عدم الإعتراف بأي سلطة تتأسس علي نتائج هذه الإنتخابات

..............................

عدم الاعتراف بظام الإنقاذ من الاساس

[zoal Saket]

#1254996 [ام احمد]
0.00/5 (0 صوت)

04-27-2015 07:48 AM
والله انا من راى هم اخير من خيار القتل والموت والدمار الحاصل فى العالم االعربى وكل حرامى بيسال يوم الموقف العظيم عشان كده خلوهم والموت فى بالله ﻻ تجروا الوطن للاقتتال والبهدله والموت والدمار حكم شنو هى الدنيا بقت اخر زمان ما تخلونا بﻻ قوى اجماع وطنى بﻻ مؤتمر وطنى غلونا نعبش باقى عمرنا فى سﻻم فى داعى للحرب والقتل مش كفايه الحروب المشتعله فى البلد اتقوا الله فينا

[ام احمد]

#1254991 [عبدالمنعم العوض]
0.00/5 (0 صوت)

04-27-2015 07:41 AM
يا قادتنا الكرام سلام
الاعلام هو الوسيلة الفعالة في هذا العصر وقد حكم نظام البغي السودان واستغل ذلك السلاح اي ما استغلال فيا اخوتي في قوى الاجماع الوطني اذا لم تستطيعوا حتى هذه اللحظة ان تتحدوا في عمل قناة فضائية توجهونها لشعبكم وتؤازرونه بها في ثورته الماضية والتي كان اخر ابداعاته فيها العزوف التلقائي في مواجهة الانتخابات فهل تستطيعون اسقاط النظام؟
ان الشعب مازال عنده بصيص امل فيكم لما تحملونه من بذرة الخير وحسن النية نحو وطنكم ولكن هذا الشعب يتقدم قادته بكثير فارفعوا شعار التجرد ونكران الذات وانبذوا المصالح الحزبية الضيقة وحب السيطرة والرئاسة وتقدموا الصفوف وقودوا بانفسكم الشارع حينها سينظر اليكم شعبكم كقدوة وسيتبعكم
قدموا لنا عمل بدلا من هذه البيانات الانشائية التي سئم منها العامة فالغلاء والفساد والدماء وكذب النظام وتلفيقاته لا تحتاج الى بيانات
ارفعوا شعار اسقاط النظام وعدم التحاور معه لهذه المرحلة تفوزوا

[عبدالمنعم العوض]

#1254970 [wadalmanagil]
5.00/5 (3 صوت)

04-27-2015 07:16 AM
كويس وفى الاثناء انتو تكونو وين، بعدين تجو تمسكو الحكم، النضال الحقيقي يكون فى الشارع تعتقل مرة مرتين، أنت مناضل وتستحق الحكم، لكن جماهير شعبنا دى ما بتنفع، وأية شخص زى دا حقو ما نعاين ليهو، لما ننزل الشارع ننزل كلنا، خلاص عهد الوصايا انتهى.

[wadalmanagil]

ردود على wadalmanagil
[عودة ديجانقو] 04-27-2015 09:44 AM
يا ودالمناقل إذا عهد الوصايا إنتهى زى ما بتقول إنت الوصاك على الشعب ده منو عشان تحدد ليهوا ده بنفع وده ما بنفع...ثم ثانيا لم نسمع منهم قط ولا حتى فى البيان ده ذكروا فيهو إنهم جايين يحكموا.
طيب إنت لو عندك شخص معين فى راسك ممكن يحكم ورينا إسمه عشان نعرف.
ياعزيزى لازم تفهم وتوسع أفقك اذا الوضع إتغير لنظام تعددى الفيصل هو الصندوق وإذا زولك الخاتيهوا فى راسك فاز فألف مرحب بيهو لأنه دى الديموقراطيه المنشوده...وإذا عايز الناس تعيش بدون حكومه فهذا موضوع آخر بموجبه نسمى السودان جمهورية المجانين.
ياخى فكر ألف مره قبل ما تعلق
مع إحترامى


#1254969 [عون الشريف دفع الله]
5.00/5 (4 صوت)

04-27-2015 07:14 AM
اخبار القناة الفضائيه اللي ممكن توفر البيانات الكتيره دى شنو ؟

[عون الشريف دفع الله]

ردود على عون الشريف دفع الله
[حسكنبت] 04-27-2015 02:11 PM
فعلا دى مفروض تكون الخطوة الأولى


#1254952 [Almisahir fi izallail]
0.00/5 (0 صوت)

04-27-2015 06:49 AM
هوّانتو لسّ بتتكلمو علحوار ! الحوار يا ساده كان عندو هدف محدد يوصلكم الانتخابات.. واهو وصلتوها .. وما حدش معترف بمقاطعتكم.. النسبه المتدنيه كانت نتيجه لبعض الأخطاء اللى ما اثّرت على النتيجه النهائيه.. والحكايه وما فيها والهدف هو " ا س ت ر د ا ف" لمن يحب "يتردف" بس موش على السرج الورّانى .
* المهم انكم رضيتو او ابيتو وصلتوهم محل ما كانو عايزين يوصلو بيكم .. الانتخابات وانتهت وكسبوها والحكايه خولصت .. الناس اصبحوا حاكمين من جديدوعندهم برنامج حيبتدوا فى تنفيذو بعد ما الرئيس يحلف.. تانى يحاوروكم فى شنووو!؟ عاوزين منكم شنووو؟
* فضوها سيره وانتظرو اللى قال ليكم"اللى عاوز يسقط النظام الباب يفوّت جمل" انتظروه يجيكم راجع وتدوهو التوقيعات عشان يعبئكم وبعدها يصعدكم وعلى بال ما جمعتو التوقيعات ياخدلو خفسه على نادى مدريد وعلى بال ما عملتو اللى قا ليكم عليه ورجع تكون ال 5 سنوات انتهت وتدخلو تانى ان شاءالله فى موّال حوار جديد توصلو بيهو استحقاقكم الدستورى الجديد!

[Almisahir fi izallail]

ردود على Almisahir fi izallail
[الجعلي ود المتمة] 04-27-2015 11:58 AM
انت الجابك هنا شنو ؟؟
والدخلك في شئونا شنو ؟؟
لو مقتنع كل الامور على ما يرام الجقلبة فوق شنو ؟؟
امشي نوم قفا واطمن وما في عوجو حتجيكم تب ..


#1254949 [Ce La Vie]
4.63/5 (4 صوت)

04-27-2015 06:43 AM
بسم الله الرحمن الرحيم. نؤيد ذلك بقوة وثبات. وحدة الصف والالتزام. الجسارة والتضحية. فلنستدعي في هذا الظرف بطولات اجدادنا وشهدائنا في سبتمبر. لا للحوار مع النظام. دقت ساعة الجد والتضحية. موت بشهادة أو حياة بعز وشرف.

[Ce La Vie]

#1254948 [ود البقعة]
0.00/5 (0 صوت)

04-27-2015 06:40 AM
ق

[ود البقعة]

#1254941 [حامد عوض]
5.00/5 (1 صوت)

04-27-2015 06:29 AM
أين ?

[حامد عوض]

#1254935 [ali murtey]
4.88/5 (4 صوت)

04-27-2015 06:13 AM
بيان ضعيف كان المفترض اعلان العصيان المدنى والاضراب السياسى لحين سقوط النظام

[ali murtey]

#1254933 [Aldonglawy]
3.00/5 (1 صوت)

04-27-2015 06:09 AM
انه شعب السودان الراقي والامين

[Aldonglawy]

#1254924 [عودة ديجانقو]
4.88/5 (4 صوت)

04-27-2015 05:18 AM
كلام واضح ومتوازن ولا يحتاج لدرس عصر ويمثل أقرب مسافه بين نقطتين وهو الخط المستقيم.
** النقطه الأولى هى إسقاط النظام
** النقطه الثانيه هى قوي الإجماع الوطني
** أما الخط المستقيم فهو الشعب وإنخراطه في صفوف لجان المقاومة الشعبية.

[عودة ديجانقو]

ردود على عودة ديجانقو
[عودة ديجانقو] 04-27-2015 01:26 PM
يا أخ نفش لاحظت تعليق لك فى موضوع ابوعيسى تتحدث عن الشعب الجائع وهل ابوعيسى حيقوم بأطعامهم.
ياخى خلى إيمانك بالله قوى لأنه القائل وما من دابة فى الأرض إلا وعلى الله رزقها.
إنتهى

[نفش] 04-27-2015 08:48 AM
السلام عليكم
اولا ناس حوار وطني وحوار شعبي ديل منو ؟؟؟؟؟؟
ثانيا : مع منو يكون الحوار الوطني ؟؟؟؟؟؟؟؟؟
ثالثا : ليه حوار اصلاً ؟؟؟؟؟؟؟؟؟؟؟؟؟؟؟؟؟؟؟؟
رابعا : الجوع الحاصل فى البلد دا عايز ليه حوار ؟
خاميا : انقذوا اهلكم الذين هلكوا دون وجهة حق؟
سادسا : شكرا لاتاحة الفرصة .


#1254914 [salah]
4.88/5 (6 صوت)

04-27-2015 04:24 AM
أحى قوى الإجماع الوطنى على بيانكم القوى وقرارات صائبة إستنادا على ما جأ فى إجتماع قادة مخابرات النظام بأنهم سيستفيدوا من حوارهم مع المعارضه إعلاميا و بعدين يقلبوا عليهم الطاولة ، هذا إنذار لكل من يتفوه بكلمه حوار من أحزاب الفكه التبيعة ،أحى أبطالنا الأشاوس من الحركات الشعبيه المسلحه و المدنيه لقد دقت ساعة الخلاص لا تراجع و و حصاد نضالكم لا تهاون فيه ،حكومه محاصرة داخليا وعالميا وقياداتهم من خنسإ القوم ، علقوا المشانق و أشعلوا المحارق كيزان أنجاس إستباحو الحرام حلالا والحلال حراما و عاثوا فينا فسادا ....

[salah]

ردود على salah
[Abbood] 04-27-2015 12:03 PM
و الله مهزلة أخرى !!! هل قاطعنا الانتخابات لكي يفشل النظام ( الأصلو فاشل) و نأتي بكم أنت يا سجم الرماد!!! بيان هزيل و ملكلك و لغة مكلوجة و أخطاء ناس تامنة ظاهرة فيه. الشعب قاطع الانتخابات كرسالة لكل السياسيين بما فيهم أنتم و النظام المهلهل و أنتم أضعف من أن تحكموا بلد فيه مثل هذا الشعب ... أذهبوا بأجنداتكم العقيمة إلى الجحيم و اتركوا هذا الشعب لحاله فهو يعرف كيف يدير شؤونه . كفانا الله شركم و شر هذه الحكومة .


#1254911 [fatmon]
4.72/5 (6 صوت)

04-27-2015 04:10 AM
ده الكلام أبشروا بالخير وكلنا معكم يدا واحدة لأسقاط هذا النظام منتهي الصلاحية
شهر خمسة بعيد يا الصادق المهدي

[fatmon]

ردود على fatmon
[ابو رياض] 04-27-2015 04:59 PM
يا ناس ما تعبوا انفسكم النظام باقى باقى والله نحن احسن حالا من دول الربيع العربى كلها صارت هرج ومرج والموت يباع فى الشوارع اهى الديمقراطيه التى تدعونها ما عاوزنها كده احسن



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة