الأخبار
أخبار إقليمية
جهاز أمن البشير يمنع الشاعر أزهري محمد علي من مغادرة البلاد
جهاز أمن البشير يمنع الشاعر أزهري محمد علي من مغادرة البلاد
جهاز أمن البشير يمنع الشاعر أزهري محمد علي من مغادرة البلاد


أمن السفاح يرتجف بسبب قصيدة
05-02-2015 02:16 PM
أفادت مصادر صحفية بأن جهاز امن ومخابرات حزب البشير إستدعي الشاعر أزهرى محمد علي ومنعه من مغادرة البلاد ، وذلك بسبب قصيدته " خمسة سنين كمان لي شنو


خمسة سنين كمان لي شنو
نشيلك هم على هم القراية امدق
ودي لا بتحوق ولا بتلحق
تلبس عورة الباطل تياب الحق
كفاك أرحل دي خمسة
ولا بتسوي زلط
رقصت على الخماسي سنين
أمانه عليك كم في الخط
خطاوي على الوجع عديتا
في السكه البديتا غلط
شعائر اقمتها وصليتا
لا نزلت عليك خيرات
ولا اخضرت مشاعرك قط
رهاف قامو الولاد الهجعة
ولطاف مرقن بنات الوجعة
لعبن حجلة جمب الشط
وقعدن يشخبطن في الرجعة
ورسمن في الغمام لوحات
ملامح لى وطن طيب ونكران ذات
وبت في الغيمة بتمشط
براحات الغنا الواسعات
وكتبن في الهوا وشطبن
تلات تسعات 999
اتمغى البحر في الميعة
واتحين سحاب العينة
في لهات التراب نقط
مرابي وعسكري منقط
منقط ومن هنا منقط
وناعم والكلام طاعم
يبين تحت التبن أرقط
ينوم فوق الجرح منحل
ويقوم زي الحبن منحل
دحين يا ورطة كيف الحل
كيف الحل وكم في الخط ؟
مفخخ وخطبتو الملغومة
تشيلا تصلحا الحيكومة
تصدق كضبتا الموهومة
تزيد في غيها المنحط
تزيد في غينا المنحط
غيبوبة دوار السلطة
والهوس العلينا هبط
سكرانا المنابر طينة
سكرانه المدائن هايصة
وأشباح القرى المسكينة
سكران التراب والموية
والسهله ودواهي الغابة
وأحزاب الهوى الكضابة
والحيكومة وقفت لط
وقف خاطر البلد مجروح
وقفنا على الجرح غافلين
نحن سلالة الواطة وولاد الطين
بقينا على خشاش الارض
محل قامت صلاة الغلة نتوضى
نشوفك في المنافي رهاب
تلاويح ايدك البضة
وداعا يا حبيب الروح
وداع والسامر انفض
مرقنا على مدائن التيه خفاف
كان نابا كان نرضى
مرقنا ودمنا اتفرق
ولد شلناهو للأيام
مسك شارع المطار شرق
لمحناو زي خبر عاجل
وزي رفة حمام زاجل
ويا منسلي من ضلف
الضلام في الليل
تعاااال بالباب أكان راجل
واركز واوعى تدرق
من القبلي السحابو ربط
من العبادي يوم ينصر
في وش السما وينمط
وكم في الخط
نحن بنحب شاي الصباح
الشقلة والديم والجخيس
والثورة وامبدة السبيل بالعكسي
ومحجوب الشريف
ال بالمكارم مكسي
ادانا الطريق الما عتر في يخسي
انت رجفت واتحسست
وضع الكرسي
ونحن نزفنا مهر الثورة
بين البوت وضهر البوكسي
نحن هتفنا يااااا ليل
السجون اسمعنا
ياخي اسمعنا
ليه ايش معنى ؟؟
نحن مرقنا قدمنا الشعوب الحرة
في درب النضال ورجعنا
ونحن نزلنا لي اخر
درك وطلعنا
اجمل من ملائكة رحمة
فجينا الضلام ولعنا
قلنا الجاتنا في وليداتنا
جاتنا ان شاء الله تنفعنا
نحن بكينا يوم
بيت القزاز جدعنا
لا ادتنا الشوارع عين
لا صابت نفوسنا اللعنة
علمناك عناق اللهفة
والحرف البراود المعنى
علمنا الثبات والوقفة
وعلم نصلك المسنون
يعلم فجة الطعنة
وكم في الخط
مشينا على الجرح سيرة
وكل ما فحط الدفار
تطير من العيار طلقة
وتطرق حسها مهيرة
ينمل جلدك المدبوغ
على العلقة
سياط العسكري الطيرة
ونحن على الدوام نغفر
نسامح وخيرا في غيرا
سماحات الزمان الفات
زمان الدنيا بى خيرا
رزاز الونسة والضحكات
مطيرة تزفها مطيرة
على شديرة الغنا الحتت
خلاس تاني المطر شالت
خلاس تاني المطر ختت
وبركة وخير وبركة أخير
براك يالاهي سميتا
براك فتحتها النيران
على الناس الطلع زيتا
كمل رايا وفلت من ايدا
راس خيتا
على الهملة وقطعة الراس
وقع فوق راسا راس بيتا
وهيا ريتا لو شافوك
في النايبات مشمر في
الوحل جيتا
وجيدا يا مطر جيتا
وجيدليها البلاد بالجاتا
جلابة الجن والجنادب
والجراد وجلجلة الجلالات
والجنود والجنجويد
نبكي ونعيد كل السماحات
كل السماحات روحت
خلتنا لى باس الحديد
كل المصائب في أمان
هل من مزيد
هل من بوادر رجعة
للماضي البعيد ؟؟؟؟؟
هل من قصائد أو مكائد
أو مصائد تاني للدقشو الصعيد
وياااااااا بلد الكرام
طااااااالت عليك الكرسة
والجوك في الضلام
سرقوا المباهج خلسة
تبكي وتستغيث لا زول
سمع لا حسا
نتاح الضرس
الما بتحلو الجرسة
يديك السهر يقعد يتاورك لسة
تاريهو الوجع بين اللسان واللثة
والداير القلع احسن تلخلخو هسة
قبل الطير تقوم
يا الما بتعرف الخسة
في الطابور تنود
وتدقس تنوم في الحصة
غاااايتو على العموم
خلست خلاس القصة
ماااااات بطل الفلم
وطلعت حبيبتو اللصة
وطلعت شعاراتكم وهم
وطلعت حكاياتكم ملوص
فايرين تعوسو بلا فهم
ساسقتو بين ساسا ويسوس
فقرا ولصوص
ساقونا لى اخر درك
وباعوونا بى وسخ الفلوس
كم من نفوس خانت نفوس
بيناتا قاسم مشترك
صلت على نار المجوس
حاولنا نتحاشى الشرك
ووقعنا في فخ النصوص
قاتلنا في غير معترك
ودهستنا غارات البسوس
وأمانة عليك كم في الخط
وأمانة عليك يا بلد
السماح سامحيني
مجبور مرقتك من دماي
لليل بحهجهك السقط
ريح العوارض تلفحك
ومن ايدي تمشي سقط لقط
وخمسة سنين كمان في شنو ؟؟

وجيدا يا مطر جيتا
وجيدليها البلاد بالجاتا
جلابة الجن والجنادب
والجراد وجلجلة الجلالات
والجنود والجنجويد
نبكي ونعيد كل السماحات
كل السماحات روحت
خلتنا لى باس الحديد
كل المصائب في أمان
هل من مزيد
هل من بوادر رجعة
للماضي البعيد ؟؟؟؟؟
هل من قصائد أو مكائد
أو مصائد تاني للدقشو الصعيد
وياااااااا بلد الكرام
طااااااالت عليك الكرسة
والجوك في الضلام
سرقوا المباهج خلسة
تبكي وتستغيث لا زول
سمع لا حسا
نتاح الضرس
الما بتحلو الجرسة
يديك السهر يقعد يتاورك لسة
تاريهو الوجع بين اللسان واللثة
والداير القلع احسن تلخلخو هسة
قبل الطير تقوم
يا الما بتعرف الخسة
في الطابور تنود
وتدقس تنوم في الحصة
غاااايتو على العموم
خلست خلاس القصة
ماااااات بطل الفلم
وطلعت حبيبتو اللصة
وطلعت شعاراتكم وهم
وطلعت حكاياتكم ملوص
فايرين تعوسو بلا فهم
ساسقتو بين ساسا ويسوس
فقرا ولصوص
ساقونا لى اخر درك
وباعوونا بى وسخ الفلوس
كم من نفوس خانت نفوس
بيناتا قاسم مشترك
صلت على نار المجوس
حاولنا نتحاشى الشرك
ووقعنا في فخ النصوص
قاتلنا في غير معترك
ودهستنا غارات البسوس
وأمانة عليك كم في الخط
وأمانة عليك يا بلد
السماح سامحيني
مجبور مرقتك من دماي
لليل بحهجهك السقط
ريح العوارض تلفحك
ومن ايدي تمشي سقط لقط
وخمسة سنين كمان في شنو ؟


تعليقات 23 | إهداء 1 | زيارات 13887

التعليقات
#1259022 [محي الدين الفكي]
0.00/5 (0 صوت)

05-03-2015 07:05 PM
قصيدة عامية جيده ارجو من الشاعر الوطني ازهري ان يعدل كلمة الجلابةلانها تفرق بين اللحمة الوطنية .

[محي الدين الفكي]

ردود على محي الدين الفكي
European Union [على علوب] 03-09-2016 03:45 AM
على أعتقد كلمة جلابة يقصد بها في القصية جلابة الجن أى جلبوا أو احضروا الجن والجنادب والجلاب والى اخر .


#1258677 [أبوالكجص]
1.00/5 (1 صوت)

05-03-2015 09:18 AM
جهاز أمن حزب البشير دا يا داب صِحى القصيده مر على تأليفها ونشرها في الأسافير أكثر من ستة شهور وقيلت في المنتديات والصوالين وحفظناها على ظهر قلب ومن ذاك الوقت سافر الأستاذ أزهري ورجع أكثر من خمسة مرات.

[أبوالكجص]

#1258662 [كتمت]
1.00/5 (1 صوت)

05-03-2015 09:01 AM
ولا يهمك

[كتمت]

#1258602 [الدماكي]
1.00/5 (1 صوت)

05-03-2015 08:10 AM
تعظيم سلام لصوت الشعب القامة ازهري محمد علي ، ربنا يديك الصحة والعافية

[الدماكي]

#1258575 [بكري الكناني]
3.00/5 (2 صوت)

05-03-2015 07:26 AM
لك التحيات الطيبات شاعرنا الكبير ازهري ولله درك يامناضل يا ابن السودان البار حقيقة اثلجت صدور الملاييين من ابناء وطني المقهورين المطرودين فلا أسكت الله لك حساً فالقصيدة لاتحتاج الي تعليق ولافيها غموض ويمكن لأي سودادني أن يفهمها بسهولة لأنك محنك فإلى المزيد من الابداع

[بكري الكناني]

#1258572 [التاج]
5.00/5 (1 صوت)

05-03-2015 07:24 AM
يعنى ناس جهاز الامن عايزين كل الناس تؤيد البشير غصباً عنهم ولا شنو؟ يعنى هل الرئيس وحكومته فوق مستوى النقد ؟ وهل لا يأتيهم الباطل من بين ايديهم ولا من خلفهم؟
وهل غصبا عننا نؤيد البشير وجماعته الكيزان

وهل غصباً على كل السودانيين يلغوا قناعاتهم ويؤيد التنظيم الدولي للأخوان
وهل غصباً على كل سوداني ان يلغى فكره ويؤيد الأخوان المسلمين والمؤتمر الوطني
وهل غصبا على كل سوداني ان يؤيد غندور وفروفور وعلى عثمان ويؤمن ما يقوله الترابي والسنوسي وكمال عمر ..

ولماذ يعتقل جهاز الامن شاعر بسبب كلام يقتنع فيه وهل رجعنا الى القرون الوسطى مع حكومة غندور وعلى عثمان ونافع وأصحاب المشروع الحضاري الذين يؤمنون بالديمقراطية التي لم يجف الاحبار التي طليت بها اصابع النساءغالية الذين صوتوافي انتخابات النساء الاخيرة..

[التاج]

#1258499 [هاني]
0.00/5 (0 صوت)

05-02-2015 11:45 PM
حليلك يامصطفى سيد احمد وين انت عشان تبرد حشانا بالبكا و تخيلنا نبني من الدموع احلام

[هاني]

#1258496 [هاني]
3.00/5 (2 صوت)

05-02-2015 11:35 PM
حليلك يامصطفى سيد احمد وين انت عشان تبرد حشانا بالبكا و تخيلنا نبني من الدموع احلام

[هاني]

#1258441 [aakarory]
4.25/5 (4 صوت)

05-02-2015 09:22 PM
والله لقد تعبنا ووصلت الحال بنا الى الهاوية اللهم دمر الكيزان وارنا فيهم يوم كيوم عاد وثمود اللهم ارنا فى كل ائمة المساجد والشيوخ وسوار الدهب وكل من يقف مع البشير وهولاء الشياطين شياطين الانس يوم كيوم عاد وثمود لقد اذاقونا الويل جوعونا ونهبونا وقتلونا وعذبونا باسمك يا الله ومن خلفهم ائمة المساجد الذين لا يخافون منك بل يخافون من مالكهم عمر البشير وكلابه

[aakarory]

#1258416 [nagatabuzaid]
4.00/5 (3 صوت)

05-02-2015 08:14 PM
عظيم يا استاذ ازهرى وتعظيم سلام بلا عدد . جننتهم جن كلكى عديل . فهمونى ليه كل ما استاذ ازهرى يفلقهم بروائعه يستدعوه ويمنعوه السفر ؟ حكاية عجيبة
بت البلد وبسطجى ابدعتوا ووجع الوطن يجمعنا واستئصال الورم ان شاء الله يريحنا وخلع الضرس النتاح ان شاء الله بنطاس بارع يتم ويترمى فى مزبلة التاريخ
ولكم جميعا تحياتى

[nagatabuzaid]

ردود على nagatabuzaid
United States [nagatabuzaid] 05-03-2015 11:38 AM
يا شدر مهيد نحن نعرف ازهرى من خلال اشعاره وابياتها التى تفلق الكيزان ويعجبنا اما ما ذكرته فانت مسؤول عنه امام الله شخصيا لا اعرف عنه الا ما ينظمه
واحسبه صادقا اما حسين خوجلى فانا متاكدة من انه غواصة مكشوفة كمان ولذلك لا استمع له فى قناته ولا اصدقه

European Union [شدر مهيد] 05-03-2015 10:21 AM
كذب في كذب ازهري ابن الكيزان ولم يمنع ولن يمنع مثله مثل حسين خوجلي وانا بلدياته واعرفه جيدا بس انتو اللعايشين في الوهم


#1258407 [قلبي على وطني]
4.88/5 (4 صوت)

05-02-2015 07:47 PM
والله فعلا خمسة سنين كمان في شنو ؟ نحن نتسأل مثلك أيها المناضل الجسور ، خليفة شريف وحميد لك التحية والتجلة والثناء

[قلبي على وطني]

#1258397 [salah]
4.88/5 (4 صوت)

05-02-2015 07:14 PM
نضال الكلمة الما بتقع واطه الكلام الحار أخير منو علقه بسوط ،الكلمة فى الصميم كالطلقة فى رؤؤس الخونه ،كلمه تخوف المرعوب و تخليهو يقول الوووب ، تسلم يداك يا شاعر بمآسى الوطن دمت ذخرا يا عفيف القلم و بكرة أحزانا تتقلم ،،
والجوك في الضلام
سرقوا المباهج خلسة
تبكي وتستغيث لا زول
سمع لا حسا
نتاح الضرس
الما بتحلو الجرسة
يديك السهر يقعد يتاورك لسة
تاريهو الوجع بين اللسان واللثة
والداير القلع احسن تلخلخو هسة
قبل الطير تقوم
يا الما بتعرف الخسة
في الطابور تنود
وتدقس تنوم في الحصة
غاااايتو على العموم
خلست خلاس القصة
ماااااات بطل الفلم
وطلعت حبيبتو اللصة
وطلعت شعاراتكم وهم
وطلعت حكاياتكم ملوص
فايرين تعوسو بلا فهم
ساسقتو بين ساسا ويسوس
فقرا ولصوص
ساقونا لى اخر درك
وباعوونا بى وسخ الفلوس
كم من نفوس خانت نفوس
بيناتا قاسم مشترك
صلت على نار المجوس
حاولنا نتحاشى الشرك
ووقعنا في فخ النصوص
قاتلنا في غير معترك
ودهستنا غارات البسوس
وأمانة عليك كم في الخط
وأمانة عليك يا بلد
السماح سامحيني
مجبور مرقتك من دماي
لليل بحهجهك السقط
ريح العوارض تلفحك
ومن ايدي تمشي سقط لقط
وخمسة سنين كمان في شنو ؟

[salah]

#1258384 [بت البلد]
5.00/5 (2 صوت)

05-02-2015 06:24 PM
أمانة عليك كم في الخط ؟
بلاوي كتييييرة والله مابتنعد
ونحن خلاااااس وصلنا الحد
نسدها من هنا بهناك تنقد
وان قلنا شي السما بتنهد

بالله عليك كم في الخط ؟
كضبة فوق كضبة
أبدا ما بتقول الحق
وعرضة فوق عرضة
قايل عليك الرك

ونحن بنقول ارحل
الليلة وبكرة
ولامن يجيب الرب

بنقولا بى كتره
في كل صباح ومسا
وواثقين انو ربنا بقبلا

كان خمسه أو عشره
سنينك كلها أذى

صابرين وبنقول ارحل
صابرين على الأذى الطول
صابرين على الجرح النازف
وجوه القلب غور

صابرين وبنقول ارحل
ولابد يوم ترحل
ومهما الظلم طول
العدل هو الأول

[بت البلد]

#1258378 [منحنى النيل]
4.88/5 (4 صوت)

05-02-2015 05:57 PM
لله درك ازهرى وفيت وكفيت ولا نامت اعين الجبناء

[منحنى النيل]

#1258341 [fatmon]
5.00/5 (4 صوت)

05-02-2015 04:31 PM
عفيف اليد واللسان عدو الخبوب اللاوطني وإنت رجل مرهف وشاعر تقول الحقيقة في وجه السلطان الجائر وتخجل بذلك كل علماء الدين وقول كلمة الحق في وجة السلطان الجائر هي الرجولة الحقة وجعلت كلابهم السعرانة ترتجف من كلمة.....؟؟؟؟ عفارم يا بطل

[fatmon]

#1258335 [ود امبدة]
3.50/5 (3 صوت)

05-02-2015 04:16 PM
الجماعة ديل كافي بطلع روحم غير الكلمة والقلم.

[ود امبدة]

#1258329 [Abu Farag]
5.00/5 (3 صوت)

05-02-2015 03:57 PM
الاستاذ الشاعر ازهري وضاحه لك الاحترام و التقدير لو الكلام ده صخيخ اياك ثم اياك ان تقع في الفخ ديل ما عاوزين كريم و نزيه يقعد جوه البلد و سبب مضايقتهم ليك حتى تشد الرحال و تتخارج وصلت بيهم الحساده درجه حتى محاربي الكلمه دايرنهم يغادروا ويطلعوا بره و يصفى لهم الجو والظلمو السرقه تبقى بلا شهودحفظك الله و رعاك من شرهم

[Abu Farag]

#1258316 [المستعرب الخلوى]
5.00/5 (3 صوت)

05-02-2015 03:07 PM
وبكدا ساهموا فى نشر القصيدة على أوسع نطاق ..
لله درك اخ ازهرى ..كلمات فى الصميم ..

[المستعرب الخلوى]

#1258313 [بسطجى]
5.00/5 (1 صوت)

05-02-2015 03:00 PM
ﻻترشحم ﻻيرشحوك ﻻتنتخب
مابشبهك ياصاحى …
بتاب الكﻼم والعنعنة …
مابشبهك دنس المجالس …
الطافحة بى وسخ النظام
والعلقنة …
صوتك دليل العافية للوجع الهنا …
ترميهو فى وش الضﻼم .
حاﻻ يقوم ذى سنسنة …
قوام يقوم قدامنا ..
فى يومنا النهب …
صوتك مع أوﻻد الشوارع .. لما
الشوارع تلتهب ..
عافيها خضراء الدمن … جافيها
قاعات النهب …
ﻻترشحم ﻻيرشحوك ﻻتنتخب …
غلباوى لكن مابتغلبن …
أقلب كيانن ومغلبن …
بي خوى وأخوك مابتنقلب …
كلك نظر …
ياواعى زرقاء اليمامة …
شافت وراء الظلمات شجر …
شافت ثعالب بى لحا …
وكل المقالب من جحا …
وحاجات كتار مابتنحسب …
و )) الرشحوك (( هم ))
شرحوك …((
أحفظ كرامتك وإنسحب …
نحن بنحاسبك بى غناك …
بكل كلمة بتتكتب …
بكل رفة شوق وراك …
تغفر غيابك وتحتسب …
الراحو فى ساحات فداك …
فى زفة الموت بالغصب …
بصدر مفتوح للرصاص …
بطفل جائع ينتحب …
بقرية طيبة وطيبين ..
مطامنة فى أقصى الغرب …
فتحولها أبواب الجحيم .. نصبولها
عيدان الصلب …
وقفت على باب الكريم .. ذلوها
ذى ذلة كلب …
رفعوا المصاحف فى الرماح ..
حكموها بقلب أمقلب …
ماطاطى غنوات النضال …
لو دقو مزيقة الحرب …
أنا وإنت أوﻻد الحﻼل …
راح لينا فى الموية الدرب
إيدينا فى النار والسياط أدمتنا من
كتر الضرب …
ماتشرفن بي وقفتك …
فى كل صندوق قنبلة …
أطنان من الزيف والكضب … كل
الخوازيق ذى بعض
رغم إختﻼف طرق اللعب

[بسطجى]

#1258304 [ماجد]
4.94/5 (5 صوت)

05-02-2015 02:41 PM
الله الله يا أزهري يا راجل يا كلس يا شعلة من نور يا وهج فتان يا حرف مليان يا وتر دندان يا المعتق النشوان ... سلام .

[ماجد]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة