الأخبار
أخبار إقليمية
شاهد الصور: الأنقاذ سيرة وانفتحت (2) ... المتعافي سأل عن الكوميشن، وبكري طالب بالنصف، وعبدالرحيم ن طالب بإدخال شركاته.
شاهد الصور: الأنقاذ سيرة وانفتحت (2) ... المتعافي سأل عن الكوميشن، وبكري طالب بالنصف، وعبدالرحيم ن طالب بإدخال شركاته.
شاهد الصور: الأنقاذ سيرة وانفتحت (2) ... المتعافي سأل عن الكوميشن، وبكري طالب بالنصف، وعبدالرحيم ن طالب بإدخال شركاته.


ماذا طلبت سكرتيرة مدير الهلال الأحمر بعد أن رفضنا دفع رشوة مالية؟!!
05-20-2015 10:40 AM
‫سمية هندوسة

‫‏شهادتي للشعب‬: عن فساد منسوبي المؤتمر الوطني وطريقتهم في السطو على مجهودات الغير واستغلالهم لمصائب الوطن

- صاحب فكرة مشروع بنك الهلال الاخَٓضٓر لدعم التعليم و الشيخ محمد بن سعيد لوتاه صاحب منظمة لوتاه الخيرية و مدير منظمة زايد الخير تفاجأوا بطمع المسئولين و ضرورة ان يدفع لهم حتي يتحصل المتبرع على التصديقات اللازمة

- من اراد ان يقدم شيء لأهل دارفور عليه ان ينفذ مشروعه بنفسه و يتابع مراحله عبر سفارته لأن كل مليم يدخل السودان سيذهب الى جيوب المسئولين

- عثمان جعفر مدير الهلال الاحمر السوداني: قال (الأماراتيون يورونا ميزانيتهم كم و عايزين شنو، و ينزلوا القروش في حسابنا، ونحنا ننفذ المشروع بمعرفتنا عبر شركة وطنية) و غير كده مشروعهم ده مرفوض.

- بكري حسن صالح سأل عن ميزانية المشروع وعندما وجد أن الرقم خيالي، قال هو حا يجيب الموافقة على شرط يقوم بتنفيذ المشروع مع الشركة المنفذة كشريك بالنصف.

- سكرتيرة مدير الهلال الأحمر طالبت برشوة مالية وعندما رفضنا طلبت سيارتي قائلة: "خلاص ممكن اخد عربيتك المرسيدس البيضاء شفتها واقفة جمب المفوضية و عجبتني شديد"

اليوم عايزة احكي عن فساد منسوبي الموتمر الوطني و طريقتهم الأخطبوطية في السطو علي مجهودات الغير و محاولة استغلالهم لمصائب الوطن ليغتنوا من خلال معاناة النازحين في مناطق الحروب ، تحديدا دارفور و جبال النوبة ، و عايزة احكي من خلال تجربة شخصية فقد غادرت السودان منذ العام ٢٠٠٤ للإقامة في مصر و لكن لم تنقطع زياراتي للسودان، و في العام ٢٠٠٦ تنقلت مع زوجي في عدد من الدول العربية و كنت اعمل مع منظومة بمصر في رصد انتهاكات حرية التعبير و النشر الصحفي و في مجال حقوق الانسان من خلال التشبيك فتمت دعوتي لحضور مؤتمر في دوسلدورف بالمانيا و هنالك تعرفت علي عدد من المدعوات من دبي و كانت إحداهن تعمل بمنظمة دبي العطاء و تناقشنا حول مشكلة دارفور و معاناة النازحين فقدمت لي دعوة بان اشاركهم في مؤتمرهم القادم للمشاورة حول كيفية عمل ملموس للنازحين حيث انهم قدموا الكثير من اجل دارفور و لكنه غير ملموس ، المهم كنت معهم في مؤتمرهم و هنالك التقيت بمجموعة من السيدات و الرجال الذين يعملون بالمجال الانساني و لديهم مؤسساتهم الخيرية و جميعهم تحدثوا عن دعم قدموه لم يذهب للمتأثرين و لم يتم دعوتهم لافتتاح مشاريعهم و عندما ذهبوا بأنفسهم لمحاولة إنفاذ مشاريع خيرية فوجئوا بطمع المسئولين و ضرورة ان يدفع لهم حتي يتحصل المتبرع علي التصديقات اللازمة و قال احدهم بانه ذهب عن طريق شخص مقرب من المتعافي و رتب له لقاء مع المتعافي الذي رحب بفكرة بناء قريتين و لكن الرجل عند الاتفاق علي كيفية التنفيذ تفاجأ بالسيد المتعافي يسأله عن نسبته اذا خلص موضوع التصديقات الرجل ساله ان يوضح كلامه اكتر فقال له المتعافي بالحرف ( الكوميشا حقي ) قبل ابدا اي اجراء قلت شنو ؟ التفت الرجل لمدير أعماله و ساله عن اول موعد لطيران الإمارات الي دبي متي ، فسأله المتعافي تاني ( رأيك شنو يا شيخنا ) الرجل اجابه هدوء قلت ارجع بلدي يا رجل انا جيت اعمرلك بلدك تطالب بسمسرة قبل اي اجراء ، انا ما ادفع لسمسار ادفع لناس محتاجة هادا اجر لله سبحانه و تعالي و خرج ، بعد سماعي لهذه القصص المخجلة قلت لهم في ذات الطاولة من اراد ان يقدم شيء لأهل دارفور عليه ان ينفذ مشروعه بنفسه و يتابع مراحله عبر سفارته لان كل مليم يدخل السودان سيذهب الي جيوب المسئولين ، المهم علي ضوء ما عرفته من انتهازية و استغلال قررت ان اتفرغ بعض الشيء للتنسيق مع هولاء المانحين لننفذ مشاريع يستفيد منها الناس مثل حفر آبار مياه و بناء مدارس و قري نموذجية للنازحين لأجل استقرارهم و اتفقنا مبدئيا علي ان احاول مساعدتهم في حال ان ياتوا بمشاريعهم جاهزة و ينفذونها عبر شركات تتبع لهم ، و بعدها بعام عدت الي الوطن و ذهبت الي دارفور و تنقلت في معسكرات النزوح القريبة من نيالا مثل كلما عُطاش وقمت بعمل دراسة حالة و حصر عدد المتضررين و ارقام النساء و الاطفال و الشيوخ داخل هذه المعسكرات و احتياجاتهم ، هذا في العام ٢٠٠٨ و بعدها بعام قررت ان استقر في السودان رسميا للعمل من اجل إنسان المعسكرات بدارفور و انشاء قري و مدارس و مرافق صحية ، و بالفعل كنت بالسودان منذ يونيو بين ٢٠٠٩ /٢٠١١ .
أولاً بعد التشاور مع عدد من زوي الخبره علمت بانه ينبغي ان أقوم بتسجيل منظمة خيرية اولا، و بعد عمل اللائحة و اسم المنظمة و برامجها قمت بتسجيلها في وزارة الشئون الانسانية في الادارة العامة للمنظمات باسم ( الوكالة الدولية للتنمية و العون الانساني ) و حصرنا مهامنا في المناطق المنكوبة وهي دارفور و جنوب كردفان فعلمت انه علينا ان نحضر موافقة من الهلال الاحمر بكادقلي حتي نستطيع ان نعمل فيها ، و بالفعل حصلنا علي الموافقة بمقابل طبعا طلب الرجل مبلغ خمسة الف جنيه بالجديد ليوافق و كان اسمه محمد هارون و هو المنسق العام للهلال الاحمر بكادقلي ، فدفعنا له فأعطانا الموافقة في شكل شهادة تقول بأننا نعمل معهم في المجال الانساني و لنا كادر مؤهل مع إننا لم نبدأ العمل بعد ( سارفق إفادته هنا ) و قمت باستئجار مكتب لعملنا بعد عودتنا من كادقلي ، و بدانا فكرة كيفية ان نستطيع تنفيذ مشروعات دون تدخل الحكومة او نهب مال المشروع و راسلت جميع الأشخاص الذين اعرفهم من منظمات خليجية و تحدثنا عن الدعم و قلت لهم بالحرف الواحد اننا نحتاج لمشروعات تنفذونها بمعرفتكم و متابعتنا لمراحل التنفيذ مع ممثل سفارتكم فعلمت انه علينا التنسيق مع جهة حكومية لأجل الاعفاءات الجمركية و تخليص ما تحضره المنظمات الداعمة و تخصيص الاراضي لأجل بناء المدارس و المستشفيات و القري النموذجية.

image

و بعد البحث و التمحيص علمت بان الجهة المناط بها تنفيذ هكذا مشاريع هي مفوضية نزع السلاح و التسريح و اعادة الدمج عبر ادراة مشروعات السلام و هي تابعة لرئاسة الجمهورية ، و لأنني مقاطعة الكيزان و تابعي الموتمر الوطني و كل ما هو حكومي من سنوات لأسباب جوهرية عانيت ما عانيت حتي وجدت شخص له صلة بمفوضية DDR و هي اخت زوجي المرحوم و بالفعل وصلتني بشخص في المفوضية يدعي عبد الحفيظ محمد احمد و هو رجل محترم جدا ولا يشبه الكيزان في شيء فحدثته عن الفكرة بالواضح و عن سمعتنا في الخارج خاصة منظمات الخليج فتاسف الرجل و قال بانه مسئول مشاريع السلام و وعدني بان ننفذ كل مشروع يأتي لخدمة الناس عبر الجهة المانحة دون تدخل اي جهة داخلية ما عدا تخصيص الاراضي و تخليص الجمارك ، و قال بان هذا يتطلب إبرام اتفاق بين وكالتنا و مفوضية نزع السلاح ، فاتفقنا علي ان يكتب كل طرف مهامه و بعد ذلك جلسنا و قمنا بصياغة الاتفاق و توقيعه بعد التعديل حيث ان شخص اخر في بالمفوضية كتب من ضمن البنود بان الوكالة الدولية هي الزراع المدني لمفوضية DDR ، فاعترضت علي هذا بشدة و اشترطت عليهم ان يكون تنفيذ المشروع الاول هو الذي يحدد استمرار العقد او فسخه ، فعدل الفقرة بان الوكالة الدولية هي الزراع المدني للمفوضية في هذا العمل ، و بعدها اجريت اتصالاتي و سافرت الي دبي و قبل ان أقابل اي شخص ممن اتيت للتنسيق معهم كان ولابد ان اتصل بالأخ الاستاذ الطيب عبد الماجد و بالفعل حضر الي في مكان اقامتي و جلسنا باستقبال الفندق لأشرح له سبب قدومي فتحمس جدا للفكرة و قال لي بانه سوف يحدد لي موعدا مع شخص من أبناء دارفور رجل اعمال و بر و سيدلني و اجد المشورة عنده فيما يختص بالتنفيذ ، و بالفعل كنّا باليوم الثاني في مكتب الاستاذ المحترم عيسي آدم مدير اسواق دبي و رئيس الجالية السودانية بدبي و هو من أبناء الفاشر ، و بعد ان جلسنا و تفاكرنا حول ما يجب ان نقدمه لاهلنا وجدنا عنده عدة مشاريع جاهزة للتنفيذ و لكن الحكومة كانت تقف عائقا في تنفيذها و من ضمنها كان مشروع بناء بناء قريتين نموذجينين بكامل مرافقهم بالمباني الجاهزة 3D panel ، و كل قرية تتكون من أربعمائة منزل بالاضافة للمدارس و المستشفيات و المتنزهات و دور العبادة و الأندية الرياضية بكامل شبكات المياه و محطات الكهرباء ، فتحمست لهذا المشروع الضخم ، فسألته عن الجهة الممولة فقال بانه مقدم من الهلال الاحمر الإماراتي كمشروع جاهز و كان لابد من إيجاد شركة وسيطة للاتفاق مع الشركة المنفذة و لعدم الثقة الحادث من المسئولين السودانيين و عدم تنفيذ المشروعات اضطر الاستاذ آدم ان يتفق مع شركة هندية باسم شركته لتنفيذ المشروع بتفويض من الهلال الاحمر الإماراتي و تعهد بان يساهم في إكمال كل ما ينقص ، و أجرينا اتصالاتنا بالهلال الاحمر الإماراتي الذي كان يعول علي الاستاذ عيسي آدم في التنفيذ فعلمنا بان ميزانية المشروع جاهزة و الشركة المنفذة جاهزة و لكن علينا ان نحضر موافقة من الهلال الاحمر السوداني لان عدم موافقته يعني عدم تنفيذ المشروع بالكامل ؟ و قمنا بابرام اتفاق للتنفيذ بعد ان حضر السيد عبد الحفيظ مدير إدارة مشروعات السلام بمفوضية DDR ، و حددنا ان نبدأ باستقرار نازحي اكبر المعسكرات مثل كلما ، و وعد الاستاذ عبد الحفيظ بان يحضر موافقة الهلال الاحمر.
image

image

image

image

و بعد ان عدت الي السودان وجدت بان السيد مدير الهلال الاحمر رفض تنفيذ المشروع جملة و تفصيلا ، ابلغني الاستاذ عبد الحفيظ ذلك و قال له محاولات اخري عبر رئاسة الجمهورية ، و كنت في غاية الاحباط ، فسالت شخص قريبي يعمل بالشئون الانسانية عن من هو مدير الهلال الاحمر السوداني قال لي قريبك اسمه حبيب مختوم ، فسألته هل تعرفه أجابني : عز المعرفة و اعرف منزله بالمعمورة ممكن أكلمه الان لو حاجتك مهمة قلت له مهمة جدا ، كلمه و حدد موعد بمكتبه عاجلا ، و بعد قليل اتصل بي قريبي قائلا بان السيد حبيب مختوم ينتظرنا بالمنزل اي وقت من الان ، خرجت من المكتب و ذهبت ناحية المعمورة بعد ان التقيت بقريبي بمحطة البلابل ، و كنت أفكر في شيء واحد فقط كيف ان يكون هذا الشخص من دارفور و يرفض مشروع مثل هذا ؟ و وصلنا اليه و استقبلنا بحفاوة و شرحت له المشروع و سألته عن سبب الرفض قال ليس هو من رفض قد يكون المدير الذي بعده و اسمه عثمان جعفر و قال بانه تم نقله او إحالته لا ادري ، خرجنا منه و في اليوم الثاني ذهبت الي مكتب الهلال الاحمر السوداني لمقابلة السيد عثمان جعفر و قالت سكرتيرته علي ان اعمل موعد لاقابله لاحقا فقلت لها الموضوع هام ولا يحتمل التأجيل فسألتني و حينما علمت بانه يتعلق بمنحة الهلال الاحمر الإماراتي أخبرتني بأنها تعلم كل ما يتعلق بهذا و دخلت مكتبه ثم عادت لتاذن لي بالدخول ، و حينما دخلت وجدت السيد عثمان جعفر فقمت بتحيته فرد ببرود ، و بعد ان جلست قبل ان اساله سألني هو : من الذي اعطانا الحق لابرام اتفاق لتنفيذ مشروع من الهلال الاحمر ؟ و كيف تحصلنا علي ذلك المشروع و قال بالحرف الواحد عشان اختصر عليك انا رديت للهلال الاحمر الإماراتي باننا غير موافقين علي هذا المشروع ما لم نقوم نحن بتنفيذه ، سألته كيف قال حسب الأصول المتفق عليها ( هم يورونا ميزانيتهم كم و عايزين شنو و ينزلوا القروش في حسابنا و نحنا ننفذ المشروع بمعرفتنا عبر شركة وطنية ) و غير كده مشروعهم ده مرفوض ، خرجت من عنده و اتصلت بعبد الحفيظ فقال انه مجتهد و د سلاف الدين وعده حا يقابلنا ب بكري حسن صالح وزير الدفاع السابق و هو قادر علي ان يحصل علي الموافقة من عثمان جعفر ، جلسنا مع بكري حسن صالح سال عند ميزانية المشروع وجد رقم خيالي فقال الموافقة بسيطة علي شرط يقوم هو بتنفيذ المشروع مع الشركة المنفذة كشريك بالنصف ، سالت: كيف ؟ اجاب ( يعني نجيب شركات الكهربا و الموية و نعمل التشجير و نجيب شركات التأمين لانه دارفور منطقة حرب و غير آمنة ) فقلت له ما اظن سيوافق الهلال الاحمر قال ( خلاس اسالوهم لو هم ما موافقين نحنا ذاتنا ما موافقين ، و بعدين ما حنخصص ليهم أراضي مجانا يشتروا مننا الارض بسعر المتر للمستثمرين مش ده مشروعهم و باسمهم ؟) طلعنا وانا مؤمنة اكتر بانه الكيزان ديل دراكولا الوطن ولا يهمهم آي شيء غير فائدتهم ، و قررت إيقاف السعي لان اي مسئول يشترط ان يكون شريك لياتي بشركات تخالف المواصفات من اجل الكسب المادي او سيرفض التعاون ، و بعدها ذهبنا الي كادقلي لتأسيس عمل هناك و معنا مساعدات إنسانية ، حتي هنا انا اعمل بمجهود ذاتي من مالي الخاص دون دعم من اي جهة ولا اريد ، كل ما أريده هو ان نحصل علي جهات تحضر بنفسها لتقف علي اغاثة المتضررين ، و قمنا بحصر المتضررين من الهجوم المسلح الذي كان يحدث بين الحين و الاخر علي المدنيين قبل ان يبدأ قصف الانتنوف بقليل ، المهم حينما رجعنا وجدت عبد الحفيظ يبشرني كما قال بخبر سار ، سألته ما هو قال بانه تحدث مع عبد الرحيم محمد حسين وزير الدفاع و وعدنا خيرا ، فأجبته مستغربة ( اللمبي ؟ ما اظن يجي منه خير ، يا زول ناسكم ديل كلهم حرامية ) قال : نحنا نجرب ما خسرانين حاجة ، أجبته ( لا والله انا خسرانة حاجات كتيرة أولها سمعتي كونه اجلس مع كيزان لصوص و تجار دين و انسانيا لا يجوز نجلس مع من يبيد الشعب و نصافح اياديهم الملطخة بدم الشعب و بعد ده كل واحد عايز يستفيد من المشروع مش يفيد الجهة المن اجلها تم المنح ، معقولة ديل مسلمين ؟ أسالك بالله في مسلم يمنع مسلم من الضل ؟ جهة خارجية عملت عمل خير الكيزان يرفضوا الخير للناس عشان يستفيدوا هم ؟ ، المهم بعد ان قال قولته الشهيرة عندما يكون متضايق ( يا سيدي رَسُولِ الله ) و ختم كلامه بانه دي اخر محاولة و ذهبنا لعبد الرحيم محمد حسين في منزله بالقيادة العامة ، و كان عازمنا غداء بعد صلاة الجمعة اعتذرت عن الغداء لعبد الحفيظ بحجة انه ( ده مال حرام و سحت و ما باكل مع كوز ملح و ملاح ) احترم الحاجة دي قال نمشي الساعة ٦ مساءا ، و بالفعل كنّا هناك و قابلنا اللمبي ، و كان متحمس جدا و قال الموافقة بنجيبها علي طول وانه أتكلم مع مع عثمان جعفر و ما عندها مانع يوافق ، و تابع لكن المشروع ده ضخم و كان معاه صورة من دراسة جدري المشروع و الميزانية ، قلت : نحنا البهمنا انه المشروع ده يتنفذ باي طريقة عبر الشركة التم إبرام العقد معاها و وقعنا معاها مذكرة تفاهم ، قال : ايوه جدا بعدين ال ٢٠٠ قرية ديل مش كل قرية فيها ٤٠٠ بيت ؟ نحنا ممكن ال ٢٠٠ قرية ذاتهم نعملهم ٤٠٠ قرية ، سألته باندهاش مصطنع كيف ؟!!!! قال بنفس التكلفة دي نحنا نعمل القرية قريتين لكن ما بنعمل مباني تركيب و تلاتة غرفة و حمامين و الكلام المكتوب ده نحنا نعمل حسب حوجة أهل المنطقة ، يعني زي ناس دارفور ديل بيت من ٢٠٠ متر و غرفة و قطية بالمواد المحلية معاها مطبخ و ( دبلوسيه) كفاية عليهم و كتيرة كمان ، هم هسي ساكنين في رواكيب و بيقضوا حاجتهم في الخلا و ضحك ضحكة عبيطة و قال هسي ناس دارفور ديل لو عملتوا ليهم الحمامات دي ما بيعرفوا يستعملوها ذاته كل زول يشيل لي حجر ولا إبريق و يطّلع الخلاء ، عشان اختصر سماجته سألته : انا عايزة اعرف ال ٢٠٠ قربة نموذجية كيف ممكن تكون ٤٠٠ علما انه ما بنقدر نغير مواصفات الشركة الهندية المنفذة ، قال شركة شنو نحنا ننفذها برّأنا عبر شركاتنا قلت : رويال الهندسية ؟ و لسان حالي يفكره بمباني الرباط الانهارت فقال بكل حماس نحنا عندنا سبعة شركات مباني جاهزة ، اي واحدة ممكن ننفذ عبرها ، هنا سالت عبد الحفيظ : الساعة كم ؟ بعد ده نمشي لانه عندي اطفال و اتاخرت، طلعنا و انا قفلت الملف ده نهائيا ، و واصلت العمل تجاه جنوب كردفان مره يتصل مكتب بكري حسن صالح يسالوا الجماعة ما ردوا لسة ؟ انتي شرحتي ليهم عرضنا ؟ و يوم اتصلت سكرتيرة عثمان جعفر مدير الهلال الاحمر. و هي زوجة لواء في ال DDR وقالت انها بتقدر تجيب الموافقة علي شرط قبل ما تسلمنا ليها تستلم ٢٨٠ مليون بالقديم، قلت ليها نحنا ما عندنا قروش و مافي جهة بتدعمنا شغالين لأجل الناس دون مقابل، عشان كده صعب ندفع ٢٨٠ او حتي ٨٠ مليون ولا حتي ٨ قالت: "خلاص ممكن اخد عربيتك المرسيدس البيضاء شفتها واقفة جمب المفوضية و عجبتني شديد". قلت ليها يا ريت بس هي تبع زوجي، و كمان ما بندفع رشاوي عشان تصديق، ومنها الجوال مراقب و مكاتبنا مراقبة و نحنا مراقبين، مشينا كادقلي بقافلة ملابس اطفال و أدوية.
اتسجنا و قالوا تابعين لوين و اتهمنا بالتخابر و زولنا بتاع الهلال الاحمر داك هو ذاته الشهد علينا زورا و هو من أبلغ عننا.

- هؤلاء هم الكيزان وأولئك هم المسؤولين السودانيين في عهد الموتمر الوطني.

* مرفق جميع المستندات التي توكد هذا حتي لا ندع مجالا للجداد و الكيزان .

image

image

image


تعليقات 94 | إهداء 9 | زيارات 76996

صفحة 1 من 212>
التعليقات
#1374082 [همت]
0.00/5 (0 صوت)

11-23-2015 05:35 PM
هتاري البشير متمسك بيهم كده، بكري وعبد الرحيم، عشان هم فاسدين!! وهل يمكن لرئيس فاسد أن يختار أناس نزيهين ليعملوامعه؟

[همت]

#1288322 [ابن السودان البار]
5.00/5 (1 صوت)

06-18-2015 12:08 PM
أيف جدا اطلعت علي كل تفاصيل الموضوع والتعليقات عمل المنظمات هو عمل انساني بالدرجة الاولي الا انه اصبح غطاء وساتر لبعض الجهات الاستخباراتية .
سؤال برئ من اين تنال الاستاذه / سمية راتبها وراتب من معها
وماهو العيب في ان يشرف الهلال الاحمر السوداني ويتم دفع مبالغ التحركات الادارية
واتعاب المشرفين والنثريات التشجعية لانفاذ المشروع الكبير .
هل هناك بعية القط والفار في فترة من الفترات بين السودان والامارات .
وهل ممكن يتكرر سيناريو مصر مرسي مع السودان.
وهل هناك دولة لاتنفذ مشاريع بنفسها واموال الامارات في الاصل هي اموال اهل دارفور ولهم حق فيها لانها اموال المسلمين ويغتبر هذا مبلغ نقطة ماء من محيط
ارجو ان يعي كل سوداني غيور والرجوع للوطنية .
من يعيش داخل السودان يأمل اجر انما يوفي الصابرون اجرهم بغير حساب
المواقف الشبابية من داخل البلد افضل من العمالة والارتزاق.
وحكاية المجمعغات السكنية دي اولاد الزغاوة ممكن يبنو نصف افريقيا .
مشكلة دارفور طريقها مثل طريق الجنوب تأكدوا من ذلك
لان السودان لابد من تفكيكه لخمس دويلات ودا مخطط اليهود من ازمان بعيدة .....

[ابن السودان البار]

#1286344 [عمار]
5.00/5 (1 صوت)

06-15-2015 09:44 PM
اقتصاد الكومشينات والمحسوبيات الي تؤديها الحكومة علي اكمل وجه , الجنة والنار حق فويلهم من عذاب الله لانو ده حق المساكين والفقراء

[عمار]

#1284835 [MAGDI]
5.00/5 (1 صوت)

06-14-2015 11:56 AM
قال تعالى ( ولا تحسبن الله عافلا عما يعمل الظالمون إنما يؤخرهم ليوم تشخص فيه الأبصار)
وفي الحديث "إذا غضب الله على عبد رزقه من حرام، وإذا اشتد غضبه عليه بارك له فيه"؟

[MAGDI]

#1282747 [قهران]
0.00/5 (0 صوت)

06-10-2015 04:52 PM
أحلفي

[قهران]

#1278255 [عباس محمد علي]
5.00/5 (1 صوت)

06-03-2015 12:51 PM
بشــر البشير في مستهل فترة رئاسته الجديدة بتكوين آلية جديدة مفوضية لـ(الشفافية ومحاربة الفساد) برئاسته هو شخصيا يعني لن تكون مستقلة فإذا كانت الحكومات هي آلية تنفيذية لخدمة مصالح الشعب إلا أنها أنشأت آلية للفساد موازية لها من قبل و ترعرعت في عهد نظام (النميري) الديكتاتوري الذي قنن آلية الفساد على مستوى جميع مفاصل الحياة السياسية و الإجتماعية خاصة بعد مصالحة و شراكة الأخوان له في الحكم بعد مصالحة 1978م المشهورة التي أتت بـ(الترابي) نائبا عاما و وزير للعدل و آلية الفساد باقية و لم تتغير من ذلك التاريخ بتغير الوزراء و تغير الحكومات بل زاد عليها البشير آلية إضافية جديدة هي آلية المليشيات المسلحة القبلية و غيرها موازية لقوات الشعب المسلحة و لأنها آلية تتبع لقمة هرم الرئاسة و نازلة تحت للمرؤوسين مما يعني أنها أقوى و أقدم من جميع الوزراء و المؤسسات ولن يستطيع الرئيس و أخوانه وعشيرته الفاسدة هزيمة آلية الفساد بأي آلية أو مفوضية جديدة مهما كانت قوتها لأنهم هم أصل الفساد و هم من أوجدوه و شجعوه و عليه سننتظر خمسة سنوات أخرى من إنتصار و إنتشار الفساد !!!

[عباس محمد علي]

#1276817 [الكردفاني العدييييييييييييييييييييييييييييييييييييييل]
5.00/5 (1 صوت)

06-01-2015 01:54 PM
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....
اللهم عليك بالارجاس ..... لا تدع منهم ..... احدا ابدا .... اقطعهم ... تك .....

[الكردفاني العدييييييييييييييييييييييييييييييييييييييل]

#1274663 [عثمان عبده]
5.00/5 (1 صوت)

05-28-2015 09:40 AM
لا حول ولا قوة إلا بالله العلي العظيم..
اللهم أجرنا في مصيبتنا...

[عثمان عبده]

#1271923 [أبو ياسر]
5.00/5 (2 صوت)

05-24-2015 10:53 AM
والله لقد سالت دموعي عندما قرأت هذا المقال وشعرت بالضآلة أمام هذه المرأة المناضلة العظيمة. لله درك ياسمية فإنك أشجع وأنبل من معظم رجال السودان الذين رضوا بالذل والهوان.

[أبو ياسر]

#1271569 [ودالحمر]
5.00/5 (2 صوت)

05-23-2015 09:33 PM
نداء موجه لسارة منصور فتين اقفلي ال بامبرز حقك وخليكي بعيدة عن مناضلات السودان من لدن ............. الائي قذفتيهن الي آخر ضحاياك سميه هندوسه ماذا نقول لك الله يهديك.

[ودالحمر]

#1271554 [H.Ali]
5.00/5 (1 صوت)

05-23-2015 09:06 PM
لو فى حد مفكر انو الإماراتيين ممكن يكرر أخطاء الماضى يكون غلطان الهلال الأحمر الاماراتى بنفذ بواسطة مهندسين من عنده و لانو هذا المشروع مسروق لا يمشى خطوة للامام للأسف ما فى حد قدر يقول حلو الهلال الأحمر السودانى لانو هو الفساد و هو لا يرغب فى مساعدة أهل الحاجة لو جات لذا كل المنظمات فهمت اللعب و فتحت مكاتب متابعة بادارته
استقيل يا عثمان أكرم لك.

[H.Ali]

#1271494 [سلطان]
5.00/5 (1 صوت)

05-23-2015 06:24 PM
جديات العسين قالن لي أحمي رهودنا عن ضباع الإنقاذ وامنع ضواري لصوصنا.........
هل من حماة؟؟؟؟؟؟؟؟؟؟؟؟؟؟

[سلطان]

#1271474 [احمد اسماعبل]
5.00/5 (3 صوت)

05-23-2015 05:26 PM
انا ارجو من ادارة موقع الراكوبة المناضلة ترك هذا الموضوع ضمن العناوين البارزة باستمرار لكي يقرا الشعب السوداني تصرفات النظام

[احمد اسماعبل]

#1271368 [ابو فاطمة]
5.00/5 (3 صوت)

05-23-2015 12:36 PM
حسبنا الله ونعم الوكيل اللهم اننا مغلوبون فانتصر

[ابو فاطمة]

#1271279 [العتباني]
5.00/5 (3 صوت)

05-23-2015 09:57 AM
الآن فقط ولا غيره عرفت لماذا تخشي هذه الحكومة النساء خاصة وتبطش وتنكل بهم ايما تنكيل ! وفقط الآن عرفت لماذا حلقوا لسمية رأسها وقالوا ليها ادينا شعرنا(ههههههاي)-طبعا هم كلهم شعرم سبيبي!!!- وطبعا ننتظر خروج د.ساندرا لنسمع العجب العجاب ! لله دركن يا نساء السودان Well am proud of you, u truely an inspiration to the rest of us

[العتباني]

#1271239 [kurbaj]
5.00/5 (4 صوت)

05-23-2015 08:56 AM
وذا عرف السبب بطل العجب..؟؟!..الآن فقط عرفت لماذا لم يهدا بال لمتأسلمي الانقاذ وزبانيتهم من كلاب الامن حتى تمكنوا من ان تغادر هندوسة البلاد على مضض... ومن قبل غادر الكثيرين امثالها ولم يبوحوا باسرارهم..؟؟!! وسوف لن يدعوا احدا ذو ضمير حي يعيش على تراب هذا الوطن وهم احياء..؟؟!!

[kurbaj]

#1271123 [ســـــــــــــــارى الــلـــيــــــل]
5.00/5 (3 صوت)

05-22-2015 10:59 PM
وقل اعملوا فسيرى الله اعمالكم و رسوله و المؤمنون وستردون الى عالم الغيب و الشهادة .
واخرون مرجون لأمر الله اما يعذبهم واما يتوب عليهم و الله عليم حكيم . صدق الله العظيم ( التوبه 105-106 ....
لم اجد ابلغ من هذه الايات الكريمه تعبيرا صادقا عن حسن نيتك و حبك للخير و اعانة المستغيث و مساندة الضعيف و تواضعك الرفيع و حبك للوطن و المواطن فى عهد اخوان الشواطين الذى فسقوا و فجروا و تكبروا و طغوا و لم يراعوا ابسط حقوق الانسان و ما هى واجبات الراعى على الرعية .
لك منى تحية اكبار و اجلال لشهامتك و اما اخوان الشواطين فلهم يوم مشهود و نسأل الله أن يعجل لنا به لرى الى درك هم سوف يقادون ...

[ســـــــــــــــارى الــلـــيــــــل]

ردود على ســـــــــــــــارى الــلـــيــــــل
[ســـــــــــــــارى الــلـــيــــــل] 05-23-2015 09:48 AM
لك العتبى حتى لا تغتاظ ....
مع الشكر ....

[مغتاظ] 05-23-2015 02:28 AM
تصويب
قال تعالى:
(( وَقُلِ اعْمَلُواْ فَسَيَرَى اللَّهُ عَمَلَكُمْ وَرَسُولُهُ وَالْمُؤْمِنُونَ وَسَتُرَدُّونَ إِلَى عَالِمِ الْغَيْبِ وَالشَّهَادَةِ فَيُنَبِّئُكُم بِمَا كُنتُمْ تَعْمَلُونَ(105)وَآخَرُونَ مُرْجَوْنَ لِأَمْرِ اللَّهِ إِمَّا يُعَذِّبُهُمْ وَإِمَّا يَتُوبُ عَلَيْهِمْ وَاللَّهُ عَلِيمٌ حَكِيمٌ(106) ))



نصيحة أكررها لوجه الله تعالى لكل من يكتب في الراكوبة (و في غيرها)
لا تطبعوا القرآن الكريم على الكيبورد (من راسكم !)حتى لا تقعوا في مثل هذه الأخطاء فتأثموا...
هناك طريقة (بسيطة وسهلة) لكل من يريد الاستدلال أو الاستشهاد بآية
فقط أكتب كلمات من الآية التي تريد في أي من محركات (البحث في القرآن الكريم) أو محرك البحث الذي تستخدمه عادة ( Google أو غيره - ويستحسن التأكد من أكثر من موقع!) ، وسوف تجد الآية عند استعراض نتائج البحث .. فقط انسخها (بعد التأكد منها)ثم الصقها حيث تريد

والتحية للأخت سمية


#1271104 [abushihab]
4.00/5 (2 صوت)

05-22-2015 10:22 PM
اخت سمية عبدالحفيظ محمد احمد الان طريح الفراش بعد ان اتهموه بالاختلاس وعذبه هؤلاء الابالسة وهو الان لا يملك ثمن الدواءنسأل الله أن يشفيه هذا الرجل النبيل.

[abushihab]

#1271018 [Mohammed Ahmed Mustafa]
0.00/5 (0 صوت)

05-22-2015 06:24 PM
Thanks Hindousa, But who cares!? No body is caring for what the Sudanese are facing. Only those who are in the conflict areas. But who will support them. The whole world is not willing to support people of Nuba Mountains, Blue Nile and Darfur. Those people do not want you to interfere, they only wants the international community to stop Air Attacks, Missiles and the using of forbidden weapons. If these happen the people of these areas can defeat the government troops and conquer them. I challenge you try that

[Mohammed Ahmed Mustafa]

#1270994 [AHMED SALAH]
5.00/5 (1 صوت)

05-22-2015 05:13 PM
# بت ملوك النيل (سميه هندوسه)#

يابت ملوك النيل..*
يااخت البدور مين لعلاكِ ينيل..
فى البدو والحضور..*

الجبره فيك بتخيل..
محمية الحمى*الما حام حداها دخيل..*
ماكان ابوكِ بخيل بت عز الرجال..*
اهل الدروع والخيل..*
الهنا والسرور..

الراقيه ست الجيل..
طرفك من حياه فى عصر السفور خجيل..*
حسنك وضع تسجيل..
فى صحف الدهور يتلوه جيل عن جيل..*
لى يوم النشور..*

غضنك رطيب وعليل..
شعرك ليل جبينك يخجل القنديل..*
النور عليكِ سديل..
يامعنى الجمال الما إتوجد له عديل..*
فى ناس ولا حور..*

فُقتى الكانوا قبيل..
ماخدات فى الجمال جائزة نوبل..*
عاجبنى فيك تمثيل..
لاقي الربيع فى سطوة القتِيل..
الفارس الجسور..
*
ياصاحبة الإكليل..
مااظن النهار العين تدور له دليل..*
محياكِ نوره جليل..
كنت اقول شمس لو ماالزمن كان ليل..*
وإنتِ عليك نور..*

يابت ملوك النيل..*
يااخت البدور مين لعلاك ينيل..
فى البدو والحضور..*

[AHMED SALAH]

#1270968 [محمد]
3.00/5 (1 صوت)

05-22-2015 03:07 PM
في واحدة من جلسات إلمفاوضات بين وفد الحكومة برئاسة علي عثمان محمد طه والحركة الشعبية وافق وفد علي عثمان علي الاستفتاء على الانفصال دون الرجوع لعمر البشير وقد اتفق الأستاذ المحامي كمال الجزولي علي تلك الخطوة القفز في الظلام ....نسبة لوعود الدول المانحة لطرفي التفاوض بمنحهما مبلغ 4 مليار دولار للتنمية وتعميم دمرته الحرب في حال التوصل الي اتفاق سلام .....لقد رأى الرجل أن المبلغ يستحق المغامرة وفصل االترلة عن العربة لتنطلق للإمام .....وقد أفلح علي عثمان في إقناع حكومته بدوي المغامرة ....وانتظر القوم بعد اتفاقية السلام منحة الدول المانحة ولكنها لم تأتي تعرفون لماذا ؟؟؟؟؟ لأن الدول المانحة تفقد الثقة في مسؤولي النظام القائم. ...الفاسدين المفسدين في الارض.

[محمد]

#1270274 [محلل تعليقات]
4.88/5 (27 صوت)

05-21-2015 08:41 AM
أنا سمية دي كنت فاكرها مجرد صحفية كتبت كلمة حق وعشان كدا بهدلوها. تخيلو كنت اتمنى اتزوجها وبقناعة شديدة بدون ما اكون عارف انها متزوجة فلها مني ولزوجها شديد الاعتذار. أما الان فإني أرى نفسى اصغر منها بكثير واجدها انسانة تستحق الاحترام لا الشفقة بل أنا من أرى الان اني استحق منها الشفقة فلها منى كل المودة وكامل الاحترام.

[محلل تعليقات]

#1270272 [kimo]
4.97/5 (10 صوت)

05-21-2015 08:40 AM
المؤسف حقاً أنهم يصلون ويدعون الإسلام ، ويخاطبوا الجماهير ويبشروهم بأنهم لا لدنيا قد عملنا .
حسبي الله ونعم الوكيل .

[kimo]

#1270222 [زول الخلا]
4.88/5 (7 صوت)

05-21-2015 07:58 AM
حقنا وين ..مافي شئ يمر من غير معرفتنا

[زول الخلا]

#1270204 [كاره الشيوعيين والكيزان]
4.86/5 (11 صوت)

05-21-2015 07:35 AM
الله يحفظك يابنتي

[كاره الشيوعيين والكيزان]

#1270187 [الشايقي]
4.99/5 (12 صوت)

05-21-2015 07:15 AM
أعوذ بالله من.كوز لا يشبع
أنهم يفوقون سوء الظن العريض .. وكلما تسئ الظن بهم تجد انك كنت تحسن الظن
نفس السيناريو يتكرر ... اليسوا هم من أكل الاغاثه ? وحجز طعام الطياره القطريه حتى فسد ?
هذا هو حكم الجوعي ... ما زال الجوع في بطونهم باقي
نحي صلابة هذه المرأة ... امرأة بألف راجل

[الشايقي]

#1270148 [أسامة الكردي]
4.97/5 (14 صوت)

05-21-2015 05:09 AM
التحية والإجلال للأخت المناضلة البطلة الجسورة بنت الملوك سمية هندوسة.
أتمنى أن يكون هذا التقرير تنوير لكل من يرغب في خدمة الوطن، حيث أنه أثبت بما لا يدع للشك بأن أي مشروع خيري يجب أن يكون ورائه عدة أشخاص نزيهين في الداخل والخارج وذو كفاءات وتخصصات علمية وخبرات متنوعة حتى يتم تنفيذه.
أرجو يا أستاذه هندوسة أن لا تتوقفي، فهنالك ألاف بل ملايين السودانيين الشرفاء الذين يرغبون في مد يد العون ماليا وفكريا وجسديا.
شكرا لك يا بنت الملوك وواصلي وإنشاء الله النجاح سيكون حليفك .

[أسامة الكردي]

#1270076 [ود البقعة]
5.00/5 (15 صوت)

05-20-2015 11:27 PM
والله بت رجال الله يحفظك يابتي من شر الكيزان اخوان الشيطان .

[ود البقعة]

#1270056 [بت أمدرمان]
5.00/5 (18 صوت)

05-20-2015 10:44 PM
برغم مرارة الكلام الكتبتيه، لكن واالله شعرت بالفخر بإنى إمرأة سودانية، التحية لكل نساء بلادى من المناضلات وأولهم ستات الشاى

[بت أمدرمان]

#1270050 [nagatabuzaid]
4.99/5 (12 صوت)

05-20-2015 10:38 PM
لا املك الا ان اترحم على طيب الذكر ابونا وعمنا ومعلمنا ومدربنا رئيس الهلال الاحمر المرحوم محجوب سلطان والتقدير والاحترام لطاقمه من بقى منهم ومن رحل

يا استاذة سمية الجماعة ديل اتاريهم ممغوصين منك عذبوك وفعلوا معك ما فعلوا لانك حرمتيهم من الرشوة والسكرتيرة ام عينا فارغة الشحادة حرمتيها من المرسيدس وهم اكيد جميعا امنجية ولهسع الله يستر عليك منهم بطنهم تكون فايرة عليك اللهم افضحهم كمان وكمان لصوص مجرمين بلطجية اولاد شوارع اللهم ارنا فيهم اياتك

[nagatabuzaid]

ردود على nagatabuzaid
United States [بت البلد] 05-21-2015 02:50 AM
عودا حميدا يا بت أبوزيد أين كنت ؟؟؟!!! والله قلت قطعا انك اعتقلوك وبرضو كمان أبو الريش اختفى معاك نأمل أن يكون هو أيضا بخير ... يعني معقول الفترة دي كلها لا حس ولا خبر؟؟؟


#1269957 [عودة ديجانقو]
3.10/5 (11 صوت)

05-20-2015 07:18 PM
عندما مررت على التعليقات لمعرفة ردود الفعل إندهشت فى الطريقه التى يفكر بها بعض الناس..حتى لو كان بعض المعلقين من الكلاب المدسوسه.

بعد مرور 26 سنه لا زالت معظم التعليقات مندهشه لفساد الانقاذ ... أى أدمغه يحمل هؤلاء الناس فى رؤوسهم......شابكننا رسلوا لينا الصور للتوثيق وأخبار القناة الفضائيه شنو...وأذكر تعليق مثل هذه الايام من العام الماضى واحد بقول يا أخوانا نأجل الأنتفاضه لما بعد رمضان عشان عايزين نصوم كويس.

وأقول إذا دى حيلتكم مافى قناة فضائيه ماذا انتم فاعلون.

[عودة ديجانقو]

#1269939 [ابن جلاء]
4.00/5 (5 صوت)

05-20-2015 06:56 PM
أحيي الاخت سميه هندوسة لشجاعتها وصبرها والله بالفعل كانت تسعى بكل جهد وقدر من اجل انسان دارفور ومساعدته واذكر ان زارتنا بتلك المدنية وتحارونا معها ساعات عدة وكانت تحمل معها ملفات لهذه الاغراض المذكورة بها بعض شهادات الهلال الاحمر وغيرها انا شخصيا اطلعت عليها وذكرت لي انها كانت تعمل بسويسرا وشعرت بعقد ذنب بما يحدث في دارفور وتدمير مدارسها وتعليمها لذا أتت من البحث عن رجال الخير والعمل الطوعي وانى احيها وربنا يأخذ لها حقها القديم من ذئاب الامن وان شاء الله نأخذوا لها ثأرها .. نحن عندنا الثأر لا يسقط بالتقادم وكلنا الناس عادات بقارة والرزيقات منهم .

[ابن جلاء]

#1269934 [الحلم المنتظر]
4.79/5 (13 صوت)

05-20-2015 06:44 PM
( وتمت كلمت ربك الحسنى على بني اسرائيل بما صبروا ودمرنا ماكان يصنع فرعون وقومه وماكانوا يعرشون )

ايها الناس ..الزموا بيوتكم واغلقوا عليكم ابوابكم .. واتقوا الله في انفسكم ..فقد وقعت

الفتنة التي يعجز فيها العقلاء عن دفع السفهاء ...واصبروا على هذا الابتلاء حتى يرفع الله عنكم هذا البلاء

عليكم انفسكم لايضركم من ضل أذا اهتديتم ..

مافعله هولاء في بنية السودان الاخلاقية ..وان بترنا الاطراف الفاسدة يوما ما فسنظل نشعر بالالم فيها لفترة طويلة رغم عدم وجودها ..

يصعب على السودان ازالة هذا الكم الهائل من فساد النفوس ..لان زعيم قومنا أرذلنا ..وسيد قبيلتنا أفسقنا

اللهم نسألك من فيض رحمتك ماندرأ به فتنتك

[الحلم المنتظر]

#1269932 [عوض الله جابر]
4.97/5 (21 صوت)

05-20-2015 06:40 PM
أطالب وبشده إدارة الراكوبة رفع هذا المقال عاليا...........

[عوض الله جابر]

ردود على عوض الله جابر
[مدني] 05-21-2015 08:22 AM
.

United States [ود البقعة] 05-20-2015 11:35 PM
وانا معك اؤيدك في اقتراحك .
فكيف بالله يوضع مقال (موثق) هكذا ويدين كبار قادة النظام ويوضع في حيز (الاخبار) وفي المقابل هناك مقالات في حيز (جديد المقالات) تجدها لا ترتقي ان توضع حتى على جريدة مدرسية حائطية ، الفهم اقسام يا عوض الله جابر.


#1269917 [بت البلد]
4.41/5 (6 صوت)

05-20-2015 06:15 PM
لا حول ولا قوة الا بالله ... ذكرتيني يا أستاذة عام 77 ابان فترة حكم نميري حينما كنت أعمل في منظمة بلان سودان بمنطقة البطانة شرق الجزيرة ... حين بداية العمل لم يشترط علينا أي مبالغ مالية ولكنه أراد أن يعلم الناس أن المشروع قد قام برعايته ,ولم يمانع الخواجات وذكروا لنا لا يهمهم ما تقول حكومتنا ما دام مشروعاتهم ستكون قائمة والمستفيدون هم الأسر المعنية بذلك ... وبدأنا العمل بالتنسيق مع وزارة الشئون الاجتماعية بمدني على قدم وساق وعملنا بمنطقة البطانة مدة 17 عاما نفذنا فيها الكثير من المنشآت , من مدارس ومستشفيات وآبار ومصانع صغيرة ومزارع وغيرها الكثير ولا زالت المنظمة تعمل بالسودان في كسلا والنيل الأبيض ومكتبها الرئيسي بالخرطوم ...
وكما ذكرتي يا أستاذة ديل هم الكيزان لا يعرفون غير أنفسهم ولا نقول غير حسبنا الله ونعم الوكيل ولا حول ولا قوة الا بالله العلي العظيم

[بت البلد]

#1269915 [قهران]
4.75/5 (7 صوت)

05-20-2015 06:14 PM
هنالك اناس لا امل في صلاحهم او علاجهم،موتهم هو العلاج الوحيد لهم،بقاء هؤلاء علي قيد الحياة يعني فقر وموت المئات يوميا

[قهران]

#1269912 [الحقيقة مرة]
4.99/5 (19 صوت)

05-20-2015 06:05 PM
انا كعلماني اطالب يتحكيم الشريعة في السودان لانو لو طبقناها ما حيفضل كوز واحد على ظاهر الارض والحيفضل حيكون بزحف على بطنو

[الحقيقة مرة]

ردود على الحقيقة مرة
United States [amal altom] 05-21-2015 07:08 AM
والله أضحكتني يا أخ بهذا التعليق الساخر الظريف كلنا كنا حنكون زاحفين علي أصلابنا لكن رحمة الله واسعة الحمد لله تغمدتنا فانسلخنا من هؤولاء منذ 20 سنة ..نحمده ..


#1269910 [أحمد سكاك قطيه]
4.50/5 (5 صوت)

05-20-2015 06:03 PM
بلد يحكمه الحراميه والمرتشين والمنافقين ,, قطاع الطرق ,, السماسره ,, هؤلاء الذئاب المعفنه لايشبعون ,, ولايخافون يوم الحساب ولايتذكرون بأن هنالك موت وهنالك حساب ؟؟ بالله كيف يتثنى لهؤلاء معدومى الضمير أن يحمكوا بلدا بحجم السودان , ويقطعون أوصاله ,, ويدمرون المصانع , والمواطن ,, ولاأحد يتكلم ,, حتى دول أفريقيا الفقيره ثارت على حكامها ,, ورمتهم في مزبلة التأريخ ,, ونحن لانزال نرزح في ظلم هؤلاء الطغاة المتجبرين ,, إلى متى ؟؟؟؟؟؟؟؟؟؟؟؟؟

[أحمد سكاك قطيه]

#1269904 [Ahmed]
4.00/5 (6 صوت)

05-20-2015 05:43 PM
لا حول و لا قوةإلا بالله
حسبنا الله و نعم الوكيل
كما قال أحد أبناء السودان الشرفاء: ( كلما أسأت الظن بالكيزان فتجد نفسك قد أحسنت الظن بهم)
فالشكر بعد الله موصول للأخت سمية للتوثيق والأن فقط عرفنا سبب التنكيل و الظلم و التعذيب الذي تعرضت له و حقها لا يضيع أبداً عند من اسمه العدل و الحكم جل و تعالى في علاه.
فهي دعوة للكل للتوثيق حتى يعرف كل مخدوع بالكيزان أعمالهم و أن الأسلام الذي يرفعون رايته هم أبعد الناس عن تعاليمه وأن تشدقهم بالشريعة والاسلام ما هو إلا نفاق ومن أجل الدنيا و كنز المال.

قال إيه: ما لدنيا قد علمنا هي لله هي لله
و الله والواحد يستحي من جراءة هؤلاء القوم على الله وكذبهم كأنهم لا يعلمون بأن الله لا تخفى عليه خافية.

[Ahmed]

#1269896 [zoooool]
4.99/5 (7 صوت)

05-20-2015 05:30 PM
حسبنا الله ونعم الوكيل

[zoooool]

#1269889 [عثمان]
3.00/5 (7 صوت)

05-20-2015 05:15 PM
أزكروا مسئول لاتحوم حوله شبهة ,وأقسم لكم صادقاً أنكم لستم في السودان من العسكري النفر الى رئيس الجمهورية,ومما يؤسف له أن هذا النظام لايسخدم الأ ابناء الهامش من الجهلاء خملة الشهادات أمثال حسبو والحاج ادم وانتهاءاً بالامييين أمثال حميدتي في محرقته للوطن والله لو أحتج أبناء النوبة في القوات المسلحة وأبناء دارفور في الشرطة والامن على ما يجري لأهلهم لما صمد هذا النظام ساعة زمن ولكنه يشتري ضعاف النفوس منهم ويتجسس على تحركلتهم ويعلي شأن الحقير منهم ليطعن أبناء إقليمه .

[عثمان]

ردود على عثمان
[كوكاب] 05-20-2015 07:18 PM
هؤلاء الذين ذكرتهم هم زعماء الجنجويد الذين تمت مكافاتهم بهذه الوظائف بعد قتلوا وحرقوا واغتصبوا هؤلاء ليس هم الدار فورين الأصليين ناس الساس والراس القران والتاريخ ارجو ان يكون الموضوع واضح ومفهوم لديك.


#1269881 [دفن الليل ابكراعاً برة]
3.97/5 (8 صوت)

05-20-2015 05:04 PM
احييك واحي شجاعتك والمجهودات البذلتيها في مساعدة الناس وربنا يجعله في ميزان حسناتك
لكن الناس البتاكل في السحت ديل ما بهمهم غير انفسم واولادم وماشاعرين ولا حاسين بي اي حاجة وما عارفين الناس دي بتعاني قدر ايه , الله ينتقم منهم وليهم يوم

[دفن الليل ابكراعاً برة]

ردود على دفن الليل ابكراعاً برة
United States [بركل بدر] 05-21-2015 12:56 AM
بالله وأناشدك الله أن تنزع هذه العبارة من لسانك:

[وربنا يجعله في ميزان حسناتك]

لأنها عبارة خطاب هؤلاء الكيزان الثقلاء السخفاء. لا تتحدث بخطابهم هذه الخطوة الأولى في المعارضة الناجحة.


#1269880 [عبود]
1.88/5 (4 صوت)

05-20-2015 05:03 PM
فساد مسئولي الانقاذ واضح وضوح الشمس .. من اكبر رأس الي اصغر مراسلة في مكتب .. وهذا ينطبق علي 99% من العاملين في السودان قطاع عام ,خاص, او منظمات ... الا من لم يجد سانحة او فرصة للهف و الخمش .. الناس شغالة بالمثل القائل.. دار ابوك كن خربت !!!! خد ليك منها عـــــود . اصبح الشك والريبة في نوايا و اهداف اي متصدر للعمل العام او الخيري هو الفرضية الي ان يثبت العكس ... حتى انت يا اخت هندوسة .. سيارة زوجك المرسيدس البيضاء التي تسر الناظرين ....ومقدرتك الغير عادية في اقناع الخيرين ومنظمات العمل الانساني للقدوم السودان وتنفيذ كل تلك المشاريع المكلفة في دار فور او جنوب كردفان ..موضوع بصراحة داير ليهو دربكين عشان يخش الرأس .. عفوا اختي ,,, هكذا الحالة الذهنية .حيث صرنا نرتاب من نوايا
اي خطيب ... ومن كل شي .. حتى اذا كان المقصود بناء مسجد للصلاة ..ياما سمعنا هي لله هي لله...

[عبود]

ردود على عبود
[كمال عبيد] 06-08-2015 03:25 AM
طبعا بعض شعبنا مع الاشياء وضدها , سمية هندوسة المناضلة الجسورة نست الكيزان ونست وسخهم ونست العملوه فيها وجاءت كسوبرمان تقنع الاماريتية وتقنع الكيزان الحرامية وتعمل بي نفس طريقتهم , تدفع الشوة 8 الف لبتاع كادقلي وتمشي بي واسطة لعبد الرحيم احمد حسن ...يعني عاملة رايحة ومابتعرف انهم حرامية ودايرا تبني قري للنازحين في جبال النوبة وفي دارفور....وعلينا ان نصدق ونمجد الواطنة البطلة وكان قلنا اي كلمة نكون جداد الكتروني ..سمية هندوسة بطلي حركات في مثل سوداني بيقول الكلب بدور خناقة ...نحن عارفين الحاصل والضحك والقرقراب هناك والجدية والروح الوطنية هنا...؟ لا ياسوبر مان

[paker1] 05-23-2015 05:33 PM
امسك جدادة الكترونية

[Abu Hawa] 05-21-2015 09:10 AM
تسلم اخي عبود والله دا الحاصل بالظبط لكن نحن نحسن الظن بهندوسة لانها مغصتهم لامن حلقوها


#1269862 [انقاذي سادر في فساده]
4.00/5 (12 صوت)

05-20-2015 04:36 PM
انت الرجل الوحيد وسط جوقة الصحفيين وانت ارجل من مشى على قدم في زمن خراب الوطن والكل يلوذ بالصمت والفرحة
أحييك واحيي ام قسمة وكل نسائنا اللاتي صرنا رجالا في زمن انعدمت فيه الرجولة

[انقاذي سادر في فساده]

#1269859 [طارق الباز]
2.88/5 (5 صوت)

05-20-2015 04:29 PM
تماسيح 4WD

[طارق الباز]

#1269855 [الشعب الفضل]
3.50/5 (5 صوت)

05-20-2015 04:15 PM
حسبنا الله على الكيزان حسبنا الله على الكيزان حسبنا الله على الكيزان حسبنا الله ونعم الوكيل

[الشعب الفضل]

#1269851 [quickly]
2.75/5 (5 صوت)

05-20-2015 04:09 PM
الجماعة ديل شغالين نهب شديد دي دلالة على انهم خايفين وماضمانين بكرة حيحصل شنو
عشان كدا بحاولو يطمئنو أنفسهم بي حق الشعب المنهوب
ولكن هيهات هيهات

[quickly]

#1269850 [شكراً...هندوسة]
4.50/5 (9 صوت)

05-20-2015 04:08 PM
على طول...ذكرني موقفك...هذا النشيد
.


https://www.youtube.com/watch?v=rcTFkSfY0kM

[شكراً...هندوسة]

#1269841 [الكتراااااااااابة...و في خشمنا الترابة!]
4.50/5 (8 صوت)

05-20-2015 03:50 PM
لا حولاااااااااااااااااااااا...

بالله أتاريك...ماسكة عليهم فضائح زي دي....!!

طيب يا دوووب...عرفنا سبب مضايقتهم ليك...و (حلقة الشعر) ديك...!!

و الزمن ده كلو....ساكتة....و....ومقطعا في مصارينك؟ ليه؟

عفارم عليك يا هندوسة....لكن والله دخلت عش الدبابير....الله يكون في عونك...

الله في... وناس دارفور....ليهم رب اسمو الحي القيوم...

.

[الكتراااااااااابة...و في خشمنا الترابة!]

#1269839 [فكرى]
4.50/5 (8 صوت)

05-20-2015 03:40 PM
لكم الله يا أهلى فى المخيمات والمعسكرات ومناطق الحرب والسودان عموما ... هاهى حكومة الأخوان المتأسلمين تمنع عنكم يد البر والإحسان لأجل مضاعفت مال السحت والحرام وتوسعة الأصول لتفى بحاجة الغسيل من أموال الحرام ... يمهل ولايهمل ... أتمنى من إدارة الراكوبة وضع هذا المقال على صدر صفحتها الرئيسية لشهور أو فليكن دائم الوجود إلى حين إستعادت وطننا المسلوب من قبل التنظيم العالمى للأخوان المتأسلمين ويصبح أحد الشواهد لإدانة أفراده المجرميين ..

[فكرى]

#1269834 [مغبونه]
4.50/5 (8 صوت)

05-20-2015 03:30 PM
لا حول ولا قوة الا بالله

شئ لا يصدقه العقل

الف مليون تحيه للاخت سميه عرفناك مناضله والآن رأينا الوجه الانسانى والواعى والمثقف الذى يعرف كيف يعرض قضيته بلغه وادله واضحه وموثقه فى ميزان حسناتك يا رب

لو فى زى بيقدر يقول انه مؤيد للانقاذ بعد ده فليتفضل

مقال يقطع القلب و كل ما فيه يؤكد على ان من يحكمون هم اسوأ من السئ اذا ما عاوزين تساعدوا الناس ليه بتمنعوا الآخرين يساعدوهم وكمان اهل دارفور ما كفايه قتلتوهم وعذبتوهم وشردتوهم والان تطاردوا ابناءهم فى الجامعات

لا ادرى ما اقول بس نفسى اعرف مشكلتكم شنو مع السودانيين؟

وبالتحديد مشكلتكم شنو مع اهل دارفور؟

مستكترين عليهم الاستقرار والراحه والبيت الكبير؟


ربتا يشلهتكم بكل خطوة من مشوار فيه تعب وشقاء النسوان البيقطعوا الاميال عشان يجيبوا المويه والحطب كل العوزينو ياكلوا اسرهم لو فى اكل اساسا

ربنا يحرق قلوبكم على اولادكم واهلكم زى ما عملتوا فيهم يا رب

ربنا ينتقم منكم بكل دمعة حزن نزلت من ام وابنه وزوجه واخت واب وجد وحبوبه واخ يا رب

واخيرا

ربتا يحشر اى شخص مؤيد للانقاذ معاهم فى اسفل سافلين يا رب

[مغبونه]

#1269826 [الأزهري]
1.25/5 (3 صوت)

05-20-2015 03:20 PM
دي ما سمية الحلقوا ايها ورموها في الطين؟ رجعت السودان تاني والله جدعة بس حكاية (تنفيذ هكذا مشاريع) دي ماتعجبني وبوقف القراءة فورا عندما تلاقيني

[الأزهري]

ردود على الأزهري
United States [بركل بدر] 05-21-2015 01:07 AM
طيب يا أزهري حتى تستطيع أن تكمل قراءة هذا التقرير الواقعي المقنع الكاشف كل رذائل حكومة الإخوان المسلمين نعدِّل لك عبارة الثائرة هندوسة كالآتي:

"وثَمَّـةَ مشاريعٌ قمنا بتنفيذها".


واصل قراءة


#1269823 [محمد خليل]
3.97/5 (7 صوت)

05-20-2015 03:14 PM
لا حول و لا قوة الا بالله! حسبى الله و نعم الوكيل، يا جماعة البلد كلها ما فيها مسئول واحد نظيف؟ كبارهم و صغارهم، لو أن سمية هندوسة ذهبت الى عمر البشير لطلب عمولته حتى يوافق على هذا العمل الخيرى أو لطلب الدخول كشريك فيه مثل فعل نائبه بكرى المسطول.
حسبى الله عليكم يا كيزان، كروشكم دى ما بتتملى أبداً، بعد اللقف و البلع دا كلو ما شبعتوا؟ الله لا شبعكم لا فى الدنيا و لا فى الآخرة، لا حياء و لا دين و لا أخلاق؟، تمنعوا وصول الخير لناس محتاجين ليهو عشان ما قدرتوا تلغفوا منو؟.
و الله فساد زي فساد حكومة المؤتمر الوطنى دا ما حصل فى تاريخ السودان على الاطلاق، نميرى مات نضيف ليس ديه أرصدة فى البنوك و لا عقارات، و أزهرى كان يستدين من النفيدى حتى يبنى منزله، كانوا نضاف لم يتلوثوا بالفساد و لم يدعوا زوراً انهم ما لدنيا قد عملوا أو إنها لله.
أعوذ بالله من الكيزان ربنا يكفينا شرهم.
لكن على الأخت سمية هندوسة أن لا تعود الى السودان، لأن هؤلاء الأقزام أقصد الكيزان سوف لن تسلم من أذاهم و شرهم ان هى عادت بعد هذا المقال الذى كشفت فيه فضائحهم و ان كانت فضائحهم أصلا مكشوفة و معروفة و لكن أهلنا بقولوا " المابخاف الله خاف منو".

[محمد خليل]

#1269820 [خالد حسن]
4.75/5 (10 صوت)

05-20-2015 03:01 PM
مش الدين قال جزاء المفسدين في الارض القتل او الصلب
يعني هسع الواحد لو شال ليه رشاش وفضاه في راس اجعص حمار من حمير الانقاذ والكيزان ربنا بحاسبه ؟
داير لي فتوي من غير علماء الحيض والبيض

[خالد حسن]

#1269804 [أبومهند عبدالجبار]
2.88/5 (5 صوت)

05-20-2015 02:40 PM
وافضيحتاه ! واعيباه ! انها النذالة والخساسة والدناءة بعينها تمثلت فى هؤلاء المسئولين الذين لايخافون الله ولايخافون حسابه يوم الحساب يوم لا ينفع مال ولا بنون . هل يعقل أن يصل مستوى أخلاق هؤلاء الى هذا الدرك الأسفل من الأنحطاط ؟ ولكن هل يمكن لنا هنا أن نقول بأن الغاية تبرر الوسيلة ؟ بالرغم من المبدأ هو أن لا ندفع الرشوة وخاصة اذا كانت تضر أو تهضم أو تتغول على حقوق الآخرين ، ولكن دفع الرشوة هنا وقدرها ما يعادل 32000 دولار أمريكى مبلغ بسيط جدا لدفعه لمديرة المكتب والحصول على التراخيص اللازمة لأنشاء هذه القرى ليستفيد منها أهل دارفور وبالتالى دفع الرشوة هنا يفيد ولا يضر طالما أنه لا توجد طريقة أخرى لمساعدة أهل السودان الذى يجثم على ظهره هؤلاء الأوباش الذين لا يخافون الله ، هذا اذا افترضنا أن موضوع الرشوة سينتهى الى هذا الحد و لايظهر نذل آخر يعطل التنفيذ ما لم يدفع له ، وهذا الأمر وارد جدا طالما الكبار ظهروا منذ البداية. هذا مجرد رأى وهو صواب يحتمل الخطأ.

[أبومهند عبدالجبار]

#1269801 [خالد الكردفاني]
4.50/5 (6 صوت)

05-20-2015 02:36 PM
لا حول ولا قوة إلا بالله الأخت سميه ربنا يوفقك على عمل الخير. عشان الناس تعرف بأن من يحكموا السودان هم عصابات مافيا وتجار دين ولصوص ولا يهمهم الوطن في شئ بل تهمهم مصالحهم الخاصة. تبا لهم ربنا يورينا فيهم يوم أسود كسواد قلوبهم وأعمالهم

[خالد الكردفاني]

#1269794 [Amir Salih]
4.74/5 (8 صوت)

05-20-2015 02:26 PM
أختاه هاهي مقلتاي تزرف بالدوع حزنا علي ما آل اليه هذا الوطن الجميل ،أرض طاهرة وحكامها أنجس من إبليس، تراهم يتطاولون علي الخلق وكأنهم من كوكب أخر، وكأنهم خلقو من غير آدم وحواء،يحتقرون الكبير والصغير، يأكلون اموال اليتمامي ظلما،ويقتلون في خلق الله جورا وبهتانا ومن غير حق، بطونهم كالنار تأكل كل شي ،وتاكل بعضها ان ان لم تجد ما تأكله، لو شبعت جهنم لما شبعت بطون هولاء الظلمة، جمعوا قناطير من الذهب والفضة ولازالت أنفسهم المريضة تقول هل من مزيد،وكأنهم لايتدبرون القرآن ام قلوبهم أقفالها.....

[Amir Salih]

#1269792 [محمد احمد]
4.74/5 (9 صوت)

05-20-2015 02:23 PM
شكرا سمية هندوسة

وبالطبع هناك الكثير الذين يملكون معلومات تشيب لها الولدان عن جرائم وفضائح وفساد اهل هذا النظام ، وعندما ينجلى الليل عن صبح وتشرق شمس الحرية والديمقراطية سوف تظهر الحقائق العارية ، ولذلك فأن اهل هذا النظام يعملون بأيديهم وارجلهم واسنانهم لكى لا يأتي هذا اليوم .

لكنهم يرونه بعيدا ونراه قريبا

[محمد احمد]

#1269781 [الطاهر على الريح]
4.75/5 (9 صوت)

05-20-2015 02:06 PM
معقول تجينا 200 قرية وكل قرية 400 منزل = 80,000 منزل تسع لنصف مليون نسمة ونرفضها ! لماذا لأن الكل يريد أن يستفيد شخصياً ؟ ما هكذا يمكن أن يُدار بلدٌ ولكنها مصيبة ما بعدها مصيبة والأنكى من ذلك الاِستهزاء بشعبنا ولكننا نقول ونرفع أيدينا الى السماء نشكو كل من عطل المشروع .

[الطاهر على الريح]

#1269777 [ودالجزيره]
2.38/5 (5 صوت)

05-20-2015 02:02 PM
يا بت الناس ...عرب الخليج ديل عندهم قروش ماعارفين اودوها وين ...ناس بتفكر فى عمل الخير ونحن احوج الناس لهذه القروش ..لازم نجيبها السودان وباى طريقه...اسالينا نحن عشنا مع كل الاجيال الجيل القديم اخوان فاطمه ...والجيل الجديد اخوان نسيبه...عشان مشروعك امشى ليقدام لازم تدفعى اى حاجه فى السودان بالفلوس ...وعشان ماتحرمى الشعب المحتاج من هذه الفلوس الكتيره ...المثل بقول المال تلتو ولا كتلتو...يعنى تمشى نص القروش لاهل دارفور والنص التانى للكمشنات والتصاديق والحاجات دى ...احسن مما ترجع القروش وما يستفيد منها السودان ...خلى فكرك واسع شويه وظاهر عليك راسك قوى وطولت من البلد...اكان القروش نصها مشت للحراميه والنص التانى مشى لاهل دارفور برضوا نقول خير وبركه ..الحراميه ديل عندهم شركات والشركات دى بشتغلوافيها سودانيين وبرضوا الناس بتستفيد منهم ...فكرى كويس واسمعى كلامى دا وخلى قوة الراس

[ودالجزيره]

ردود على ودالجزيره
Russian Federation [عبد الرحيم الكنانى] 05-27-2015 04:11 PM
انت فعلا احوج يا ود الجزيرة على الطلاق انت النوع الجاب الجوع والغلاء والكلت واسمح لى ما مفروض تشارك فى منبر زى دا نوعك دا البخلى الواحد يطلع من المله ويسب للوطن الانجبك ياخى اظهر حتى بعض التعاطف مع المناضلة دى شنو راسك انت قايل روحك بخاطب فى بتك جايب ليها عريس دا شنو الرجعية والتخلف الانت فيهو دا تف تف فت

[smy] 05-23-2015 12:29 PM
ياخي من فضلك شوف ليك اي اسم غير ود الجزيرة فلايوجد امثالك في الجزيرة والا تكون انت زي ناس البشير وسرالختم يعني جزيرة تيوان ما جزيرة اصلي لو فعلا انت من الجزيرة فانت اكيد شكل هولاء

[مواطن] 05-21-2015 12:20 AM
ده كلام شنو يا ود الجزيرة !! ما فعلته هندوسة هو الأصوب .. حتى لا يستفيد التماسيح .. لأن الأموال أو السمسرة التي يأخذونها عمولات لهم سيشتروا بها السلاح ليفتكوا بأهل دارفور وجبال النوبة وأهل النيل الأزرق وطلاب الجامعات وكل من يخرج في مظاهرة ضدهم .. هؤلاء الكيزان لا دين لهم ..



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 212>
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة