و(إيه يعني) ؟!
و(إيه يعني) ؟!


06-22-2015 11:56 AM
‎ صلاح عووضة ‎

*بعض صحف الأمس احتفت بتسوق غندور في (الأنفال)..
*وتطابقت إفاداتها بشكل (مريب!!) في التفاصيل كافة..
*يعني - مثلاً - أنه كان يرتدي جلابية ناصعة البياض..
*وأن المسلك هذا يدل على قمة التواضع من دستوري (رفيع!!!)..
*وأنه حرص على انتقاء حاجياته - من المحل- بنفسه..
*طيب السؤال (غير البريء) هنا :
*هل كان للصحف هذه (عيون) ترابط بجوار منزل غندور في آنٍ واحد؟!..
*وإنها تبعته - كلها - وراء فارهته لتعلم أي وجهة سيقصدها؟!..
*ثم توقفت جميعها - بتوقفه - أمام محل (الأنفال) ذي السلع الفاخرة؟!..
*شيء لا يمكن أن يقبله المنطق بالطبع ...
*ولكن ما يتسق مع المنطق أن جهة ما (وزَّعت!) الخبر هذا على الصحف بغرض التلميع..
*تلميع غندور - إعلامياً - كما تلمع جلابيته البيضاء..
*فبياض جلابيته هذا - بالمناسبة - ذكرته الصحف كافة التي نشرت الخبر..
*ولا أدري لماذا لم (تمش أكثر) وتقول - كما الأغنية- (بيضاء مكوية يا غندور بسحروك ليا)؟!..
*ومن قبل نُشر خبر مماثل عن وزير المالية السابق - علي محمود- أيضاً..
*وكتبنا - في حينه - كلمة بعنوان (ويمشي في الأنفال)..
*وقلنا (طيب كويس ، مشى الأنفال ، أها المطلوب منا شنو؟!)..
*هل نقول : يا سلام إنه يمشي في الأنفال كما كان نبينا الكريم يمشي في الأسواق؟!..
*ولكن الأنفال ليس هو السوق الذي يقصده (عامة الناس!) دلالة على التواضع..
*هل نقول : إنه يشتري حاجياته بنفسه؟!..
*و(إيه يعني) ما دام أغلب رؤساء العالم - دعك من وزراء - يفعلون الشيء ذاته؟!..
*هل لدلالة (البياض) مغزى يُراد منا فهمه من وراء الخبر؟..
*قطعاً لا ؛ إلا أن يكون موزع الخبر يفترض أننا من عشاق (الليث الأبيض!)..
*وبصراحة - يا غندور- هو خبر ليس فيه أي تشريف لصاحبه..
*وإنما الذي يُشرف حقاً هو أن (يعس) المسؤول ليلاً على نحو ما كان يفعل الخلفاء الراشدون..
*أن يمشي في الأسواق - تفقداً لأحوال الناس - لا أن يمشي في (الأنفال!!)..
*أن يتجول في الأحياء بحثاً عن (مظاليم) ما من حجاب بين الله وبين ودعواتهم..
*ولو قيل لنا أن غندور شوهد وهو يتقصى - ميدانياً - مشاكل انقطاع المياه لكان خبراً (مهماً)..
*ولكن أن يٌقال لنا أنه دخل محل الأنفال (الشهير)..
*وأنه كان يرتدي جلابية (بيضاء مكوية)..
*وأنه انتقى حاجياته الغذائية بـ(نفسه)..
*فـ(إيه يعني؟!!).




الصيحة/السياسي
[email protected]


تعليقات 34 | إهداء 0 | زيارات 11710

التعليقات
#1291337 [محمد علي]
5.00/5 (2 صوت)

06-23-2015 03:18 PM
يعني هروب جوهانسبيرج ما مني براه الجعلي ولى الدبر

[محمد علي]

#1291318 [بامكار]
4.50/5 (2 صوت)

06-23-2015 03:00 PM
ليه ما ذكروا ملكية غندور لكلية الرازى ومعه مصطفى اسماعيل والاهم كم صائم فطر هل عنده مائدة رمضانيه امام منزله ؟؟؟

[بامكار]

#1291251 [شاويش]
4.75/5 (3 صوت)

06-23-2015 01:56 PM
خلونا من غندور .. كان فى واحد من الاخوان الجنوبيين شغال فى احدي الوزارات قبل الانفصال طبعا .. جاء المكتب الصباح لابس بنطلون ابيض وقميص ابيض وكرافته بيضاء وحذاء ابيض .. زميله قال ليه شنو الحكاية الليلة ابيض في ابيض .. رد عليه الجنوبي وقال وكمان ما تنسى فطرت بزبادي ههههههههه

[شاويش]

#1291212 [ابوالدفاع]
0.00/5 (0 صوت)

06-23-2015 01:05 PM
(إيه يعني؟!!). تعني ثلاثة اشياء
1- ان اقتصاد البلد في تعافي وتوجد بقالات راقية لمن يستطيع واخري للاقل استطاعة وانتشارات البقالات في كل انحاء الولاية يعني ان هناك طبقة متوسطة كبيرة .
2- هناك استقرار امني في البلد مما اتاح لدستوري كبير ان يتسوق دون حراسة وهذا ما تفقده كل الدول التي حولنا
3- هناك مناخ معتبر من الحرية والتي سمحت لصاحب المقال ان يكتب ناقدا دوستوريا كبيرا دون ان يخشي اي مسائلة وهذا غير موجود في كثير من الدول الشقيقة والصديقة

[ابوالدفاع]

ردود على ابوالدفاع
[أبوبسملة] 06-24-2015 12:20 AM
احترت كيف ارد على هذه السطحية وانا صائم !!! عموما شر البلية مايضحك لأنكم تجهلون ان انتقاد رؤساء الدول العظمى شيئ أكثر من طبيعى . قال حرية استغفر الله! وفى كل يوم تؤكدون وتكشفون مدى خوائكم وسطحيتكم

European Union [aakarory] 06-23-2015 05:23 PM
وفى كمان حاجة انتا ناسيها الملايين فى دارفور وجبال النوبة والنيل الازرق الذين يعيشون فى مخيمات النازحين غير الالف التى تاكل من الكوش بقايا ما تاكلونه من اموال هذا الشعب المضهد بينما قوم لوط يتبضعون فى ارقى المحال التجارية فى الخرطوم ....ز

اختشى يا كوز لكن صحى المثل البيقول الاختشوا مااااااااااتوا


#1291195 [awaad]
4.50/5 (3 صوت)

06-23-2015 12:40 PM
امور تافهه لاتثمن ولاتغنى من جوع اذا كان غندور زمان شبعان من اساسوا ماكان بمشى الانفال لكنه كان معدم الفلس لايملك قوت لحظه مش يوم والبركه فى المره الخلتوا راجل وخلص الجامعه وبقا زول

[awaad]

#1291162 [ساهر]
4.63/5 (5 صوت)

06-23-2015 11:43 AM
مصيبة أن تكون الأنفال أفضل ما عندنا، والمصيبة الأكبر أن نتفاخر بها!!

[ساهر]

#1291091 [observor]
4.75/5 (9 صوت)

06-23-2015 09:54 AM
هووووووي يا الراكوبه - ترا الزول دا حسسسسساس - ان كان كترتو عليه من التعليقات ذات العيار التقيل دي ممكن يبكي ... سبحان الله

[observor]

#1291050 [الباشا]
4.69/5 (6 صوت)

06-23-2015 08:48 AM
صدق المرحوم الطيب صالح حين قال (( قدري انني انتمي لامة مقهورة ودولة ****)) وانا اقول صحافة تافهة.

[الباشا]

#1290922 [يوسف البشير]
4.47/5 (6 صوت)

06-23-2015 12:15 AM
ماهو المطلوب مننا شخص اتسوق ما علاقتنا بههذه قضايا انصرافية

[يوسف البشير]

ردود على يوسف البشير
[مشتهي آلله كتلا] 06-23-2015 05:58 AM
و ماذا يضير ان تسوق متنكرآ بملابس متسخة في سوق 6 بالحاج يوسف آو مايو ؟ ؟ ؟


#1290837 [خالد عزالدين]
4.72/5 (7 صوت)

06-22-2015 08:02 PM
طبعاً السيد الوزير عند تسّوقه فى الانفال أو أى مكان آخر للتسوق يقوم بإستعمال كرت الفيزا الحكومى الذى يُعطى للدستوريين و للوزراء لشراء حوائجهم و مشترياتهم و طبعاً الفاتورة يدفعها المواطن الذى يكابد للحصول على ماء نقى يسد رمق صيامه , و حسبنا الله و نعم الوكيل عليكم يا أهل الإنقاذ و من شايعها ..

[خالد عزالدين]

#1290833 [من الصحراء]
4.44/5 (8 صوت)

06-22-2015 07:48 PM
ومعك نسأل واية يعني او so what بلغة الخواجات
بئس الصحفيين الذين يقتاتون من موائد السلطان. بالله ماذا يهم هذا الشعب الجائع المسكين الصابر لو تسوق غندور او غيره من آكلي قوت الشعب في الانفال او دبي او الواقواق او لبس جلابية او بلدلة؟ هؤلاء سبة وعار علي مهنة الصحافة..

[من الصحراء]

#1290802 [tata]
4.50/5 (8 صوت)

06-22-2015 06:13 PM
لا تقرأ هذه الصحف،،لا تشتري صحيفة،،تصدق بثمنها،،اشترى حلوى لصغير،،لا تشاهد قنوات التلفزيون المعفنة،،البنات مبيض اجسادها،،وكل مكياج،،شاهد ناشونال جغرفيك،obbc,cnn,ure news,mbc,,لا تدفع عتب، رسوم نفايات،لا تدفع ضرائب فى الزفارات،،فقط ثلاثة يوم،،وشوف البصل شنو،،،حارقى فى اليوم الرابع،،،

[tata]

#1290797 [nagatabuzaid]
4.47/5 (11 صوت)

06-22-2015 06:07 PM
صحافة همج يستحقوا الضرب بسوط العنج . هى الانفال دى وين ؟ والصحف شن قدرها ما تنشر الخبر مصادرة من المطبعة طوالى وبعدها العبارة المحفوظة ومليناها ( جهر اذ تستنكر ) يللا اتسوق بقروشنا يا غندور وان شاء الله يسوقونكم الى جهنم زمرا سم هارى يهرى الكبدة والمصران انت وكل جماعتك الكيزان

[nagatabuzaid]

#1290777 [مبارك عبد المنعم]
4.49/5 (10 صوت)

06-22-2015 05:23 PM
إنهم أراذل القوم يا استاذ صلاح , هؤلاء لا يعرفون هذا الشعب الكريم ناهيك عن تفقد أحواله , كلهم من طينة واحدة سوى ان كان وزير البكى و النواح غردون أو سيئ الذكر نافع أو حتى رئيسهم الجراي الذى أصبح يفوق سباق العدو الامريكى جونسون فى سباق المية متر ..

ثم ثانياً , ماذا كنت تتوقع من صحف الأمس التى احتفت بتسوق غندور في (الأنفال) ان تكتب غير الكتبته ؟؟ ماذا كنت تنتظر من صحفيى الغفلة غير الذى كتبوه عن مسئولى الغفلة ؟؟

إننا فى قمة عصر الإنحطاط التى وصلنا قمتها بفضل هاتان الفئتان مسئولى الغفلة و صحفيى الغفلة و دوقى يا مزيكة و رأصنى يا قدع .

[مبارك عبد المنعم]

#1290767 [دردوق]
4.50/5 (15 صوت)

06-22-2015 04:49 PM
كلموهو يجي يسوق معانا في سوق سته في الحاج يوسف اي شئ في

( من الله كتلا الا اكلة كثم الفكي ما داااام الله في ) و ايه يعني !

[دردوق]

ردود على دردوق
[أرسطو] 06-22-2015 08:58 PM
يا دردوق - ياخى فقعت مرارتى بالضحك - لك تحياتى


#1290734 [بكري الحلفاوي]
4.50/5 (11 صوت)

06-22-2015 04:01 PM
يسألونك عن الانفال
في وادي حلفاقبل سنوات قليلة في بعض اهل الخير قاموا بإرسال احتياجات الشتاء من بطاطين ومواد تموينية وللاسف وقعت في يد المعتمد وكتم عليها بس الناس عارفه الحاصل.
معتمد حلفا سرق الحاجات وبصلي بالناس المغرب قراء بعد الفاتحة (يسألونك عن الانفال) بلدياتنا مغيوظ شديد طلع من الصف ومشي مسك المايك قال ليهو (يسألونك من الانفال براو. حيسألوك من البطاطين والدقيق والسكر والطحنية)

[بكري الحلفاوي]

#1290730 [فرويد]
4.50/5 (9 صوت)

06-22-2015 03:48 PM
يا جماعة الزول ده من الخلعة الدخلت فيهو لسه ما شفا, الشوبنق ثرابى كويس للعلاج لحالتو دى.

[فرويد]

#1290711 [مغبونه]
4.37/5 (10 صوت)

06-22-2015 03:30 PM
يا للبراءه

كلكم ما فهمتو المقصود من الخبر

الانفال يا اعزائى هى الوكر الجديد للكيزان التى يبدو ان من خلالها يتم تهريب الدولارات للخارج عبر بوابة استيراد الاغذيه وعلى رأس ادارتها اكبر كيزان واعتقد ان العديد من الجماعه هم شركاء فيها

الخبر بيقول ليكم هنا يتسوق الجماعه الكبار وعاوزين الناس تقلدهم زى ما بيقلدوا المشاهير يعنى تمشوا تكبوا اموالكم هناك والجماعه يلطشوها بره

لو الناس فاهمه وواعيه يجب ان تقوم حمله لمقاطعتها كما حدث فى مقاطعة الانتخابات وان تشمل الحمله كل الاستثمارات الكيزانيه بما فيها المولات والمطاعم وحتى المستشفيات ويجب ان يتم فضح ممتلكيها يا ريت يكون هنالك من يستطيع معرفة الملاك الحقيقين وراء كل بزنس ويخبرنا

انا فى حياتى لم ادخل الانفال ولا انوى دخولها

ركزوا مع الاستثمارات المستقله ويا ريت مع دكان ناس حاج عبدالله الدنيا ما طايره ما ضروري تاكلوا مستورد

ابدأوا حملة المقاطعه دى وخسروهم قروش دى ح تصيبهم فى مقتل وفاعليتها اكبر من الثوره فى الوقت الحالى

[مغبونه]

ردود على مغبونه
[nagatabuzaid] 06-22-2015 06:01 PM
يا المغبونة رمضان مبارك ( عايزين الناس يقلدوهم زى ما بقلدوا المشاهير ) هم عزيزتى مشاهير فعلا مشاهير باللصوصية والكضب والاجرام والتهريب وتجارة العملة مشهورين بكل قبيح وكريه مشهورين بالوسخ والنتانة والجرى اكيد ما حنقلدهم ونبراء ونستبراء منهم


#1290700 [dulaldaleib]
4.50/5 (9 صوت)

06-22-2015 03:16 PM
انا اول مرة اسمع بمكان اسمه الانفال .....المسألة فيها حاجة يا عووضة ...الصحافة بقت تنحى منحا اخر وهو تتبع المشاهير يا اخى ودى عادة قديمة فى الدول الغربية .....لازم نواكب كمان.....ولا شنو؟ خليكم استايل يا فقراء .........

[dulaldaleib]

#1290679 [zozo]
4.50/5 (9 صوت)

06-22-2015 02:57 PM
يشترى أكل من أنفال ينوم جعان فى النهاية كوز
و الكيزان كلهم حراميه

[zozo]

#1290664 [صادميم]
4.50/5 (9 صوت)

06-22-2015 02:42 PM
طيب ما كان يورونا اشترى شنو المفروض يكون لازي قدامو أربعة عربات حمل بقالة كل واحدة لزوجة عشان نعرف قادر يعدل بين زوجاته ولا لا

[صادميم]

ردود على صادميم
European Union [kaka] 06-23-2015 03:39 PM
ما بصدق غندور عندو اربعة عوين !!! الا كان ديكور ساي !


#1290628 [المتجهجه بسبب الانفصال]
4.50/5 (15 صوت)

06-22-2015 02:12 PM
لو تسوقوا في دكان ود البصير الفقير برضو حرامية ولصوص والشحم ده نابت من اكل السحت،،، شنو يعني تسوق في الانفال او الاعراف ،،،

[المتجهجه بسبب الانفصال]

#1290609 [خايوت بعانخى]
4.96/5 (10 صوت)

06-22-2015 01:43 PM
وكمان اقول ليكم حاجة عندما كان غندور رئس اتحاد العمال كان يقبض شهريا مبلغ خمسة مليون جنيه شهريا من نقابة الحافلات بالخرطوم ولحد هسع يعنى هذا الوقت حتى بعد ما رجع من جوهانسبيرج وهو يبكى لا زال يقبض الخمسه مليون شهريا؟؟؟؟؟

[خايوت بعانخى]

#1290591 [badraldin mm]
4.62/5 (12 صوت)

06-22-2015 01:23 PM
قبل فترة بعد فضيحة غسان جابو اعلان فى الصحف اصدقاءالخضر فى صلاة الصبح..واسع بعد فضيحة جوهانسبرج جابو انو الراجل بتسوق عادي...

[badraldin mm]

#1290568 [مظاليم المشروع الحضاري]
4.50/5 (16 صوت)

06-22-2015 12:50 PM
*أن يتجول في الأحياء بحثاً عن (مظاليم) ما من حجاب بين الله وبين ودعواتهم..

[مظاليم المشروع الحضاري]

#1290566 [Ageeb]
4.50/5 (13 صوت)

06-22-2015 12:48 PM
صدقت يا ود عووضة: "وإيه يعني...!!!!"

[Ageeb]

#1290565 [السودانى الاصيل]
4.49/5 (15 صوت)

06-22-2015 12:47 PM
يعطيك العافية يا صلاح عووضة فى الصميم طز فى غندور فى كل من هم على شاكلته هؤلاء قوم ارذل منهم الله ما خلق لو هم قلبهم على الشعب لماذا لا يذهب ليرى الناس على حقيقتهم فى بيوتهم والكهرباء قاطعة او الموية قاطعة ولكن يتسوق ان شاء الله يسوقوه لجهنم يارب امين.

[السودانى الاصيل]

#1290555 [cool]
4.46/5 (12 صوت)

06-22-2015 12:37 PM
لوكان عنده حبه نخوه وكرامه كان يمشى
حافى القدمين حتى يعرف سخانه المكلومين
فى هذا الشهر الفضيل مال الشعب ومال
الانفال ناس تجيب القرف.

[cool]

#1290550 [كلحية]
4.50/5 (14 صوت)

06-22-2015 12:30 PM
وهذا إنحطاط آخر للصحافة في زمن الإنقاذ ! صحافة المرتزقة وتجار الأراضى والسماسرة يا أستاذ صلاح عووضة وأنت من أبناء مكة تعرف شعابها . ماذا كنت تنتظر من هؤلاء ؟أن يقولوا شيئا لمصلحة الوطن والمواطنين !اليست هي جزءا من هذه الميديا الساقطة في بلد غربت فيه شمس صحافة بشير محمد سعيد ومحمد الحسن أحمد والفاتح التيجانى وعبدالله رجب وغيرهم كثر يصعب حصرهم هنا وبقي محجوب محمد صالح وبعض الشرفاء من أمثالكم كاليتامي في مؤدبة اللئام !

[كلحية]

#1290544 [ما مرتاح ....وما مرتاح]
4.49/5 (11 صوت)

06-22-2015 12:23 PM
يعني ان سريرته بيضاء
وملايات سريره ايضا بيضاء
يعني ان قلبه اصبح جامدا وبطل البكاء والجعير
يعني ان شنبو قام فيهو شوك ابيض وحيسافر ايطاليا
ويجيب خبر الناها السودانية.
يعني ان المراقب بتاع اللجنة القبلي قلبو ابيض وحن عليهو.
يعني شوفوني يا ناس ممكن القى الزيي فيكم.
يعني رسالة مبطنة الى الابيض ضميرك "سيد اللبن"
يعني حني علي انا يا ستي "بشة" الحاصل بي سببو انتي.
يعني اموت ركن في الانفال والتوبة بعدين بعد ما امر بعفراء وامواج.

[ما مرتاح ....وما مرتاح]

#1290540 [جنو منو]
4.50/5 (15 صوت)

06-22-2015 12:16 PM
حقا ايه يعنى ..ولكن رغم ذلك اقولك ياود عووضه كسارين الثلج مابقوا كتار خلاص
فى البلد النحس ده.. هؤلاء لايهمهم المواطن فى شىء .. ذهب للانفال ليملاء كرشه
وكروش نسائه الاربعة .. ومن ثم تمتلىء اجسامهم لحما وشحما .. والذى سوف تأكله
نار جهنم وبئس المصير ..!!

[جنو منو]

#1290537 [SDoutcast]
4.24/5 (11 صوت)

06-22-2015 12:14 PM
اضحكتني اضحك الله قلبك
كمية من الغباء تحيرك

[SDoutcast]

#1290536 [يا عوووضة...ما تفهمها ياخ..!!]
4.50/5 (14 صوت)

06-22-2015 12:13 PM
هناك جهة واااحدة فقط هي اتي ترصد و تعرف تحركات الوزراء...

و هي نفس الجهة التي تستطيع إلزام الصحف بنشر ما تشاء...

القصد السخرية من غندور...زي ما قلت بالضبط ...بيضا مكوية...بسحروك ليا..

السؤال: طيب لماذا غندور بالذات...؟؟؟

أديك إشارات...ما بفسر...وإنت ماب تقصر...

المعركة الآن طاحنة بين البشير وركبه...و عيال الترابي و صحبه..

إلى أي معسكر أقرب غندور الآن: البشير و العسكر...أم الحزب الشر شر؟

غندور رضى بالخارجية...و باع ليك القضية و ناس القضية...

لذلك دي حملة عكسية...انتقامية...

و يمكن كمان يطلعو ليهو الحاجات المخفية

[يا عوووضة...ما تفهمها ياخ..!!]

ردود على يا عوووضة...ما تفهمها ياخ..!!
European Union [كديس فى السروال] 06-23-2015 02:14 AM
ده لزوم الدموع في المطار

[التكي تاكا] 06-22-2015 04:21 PM
ماكلهم طلعوا حرامية


#1290526 [صورة مقلوبة]
4.50/5 (13 صوت)

06-22-2015 12:02 PM
هههه انا برضو شفتو في الانفال في بري و آخرون و مافي واحد سأل فيهو و ايه يعني

[صورة مقلوبة]

ردود على صورة مقلوبة
European Union [عبدالواحد المستغرب اشد الإستغراب!!] 06-22-2015 02:59 PM
يا كابتن ما ياها الشوفه دى الكان عايزها !! يعنى قالوا ليك كان لازم تاخدو كده بالاحضان وتبوسو؟!! غبى .. غباوه!! يا أخى مش أنت ولا ود عووضه ولا القراء الكرام أنا قصدى (البشت)الكان ماشى يتغندر !!.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة