الأخبار
أخبار إقليمية
مطر الرماد.. قصيدة جديدة للشاعر هاشم صديق
مطر الرماد.. قصيدة جديدة للشاعر هاشم صديق
مطر الرماد.. قصيدة جديدة للشاعر هاشم صديق


07-01-2015 12:07 PM
مطر الرماد

الشاعر : هاشم صديق


جاني الحُزن
ولهان
من قومتي
تب تبيت
أخدتو بالأحضان
وإتسامرنا
زي حِبان .
جاني الفرح نشوان
ناغمني
ما رديت
عاْرف الفرح
كضاب
ينقر رقيق
في الباب
تفتح
تلاقي رهاب .
..........
يا وطني أعتقني
رضرضت
لي عضمي
فكيت
عُصار جني
فتفت لي ذهني
القاك رماد مضرور
ومرات حبيب
واقف
في الرمَضَا
طيف مشرور
راجي الفرج
في الغيب
وفي الوعسة
طوق مزرور
ممنوع
تخُت رحلك
في فكرة
أو دستور .
..........
يا وطني أعتقني
قوليا أمرق
غُور
أركب هوي الأحزان
فتش ملاذ
ومكان .
.......
دقيت أمل
في باب
وكتفت حُزني
( الشاب)
فَرَد الوهم إيدين
عوّقني ( بالنشّاب )
ما خلي خشمي
( يقول ).
ما شاف
سطر معقول
كتفني
عرض وطول
وباشر
( شريعة الغاب)
..........
جابوني للبوليس
شان قلت
وطني تعيس
ساقوني زي نشال
سجّل عوير
إسمي
في ( دفتر الأحوال)
سووا الشِعِر
عفصة
ما صوت بلد
أو حال
سألوني عن كلمة
وزروني
في نقطة
قالوا
الكلام ألغاز
وباللفة قصدي
أقول
الموية حاجة مجاز
والسوق ركب ( قطرين)
( والفتحة )
يعني العكس
و( الضمة )
يعني الغِش
( والكَسرة )
( عَدَم الغاز )
...........
وسووني
زول
كضاب
( شان الامور
في نصاب)
وأنا بس
عميل مدسوس
زرعوني
ناسي ( الروس )
شان أهدم
الإنجاز
..........
رمضان
دخل عضمي
والعيد
يغازل السوق
وأنا زي أَرض
صابرة
وأصلو الصبر
( ماروق )
نفسي
الصنم ينداس
والضيق
يلاقي مروق
..........
عرس البلد
ينتم
ويغسل
نعاسنا الدم
.........
العيد
يكون مضمون
وباقي الشمل
يتلم
...........
جوني للتفتيش
وساقوني
أخدوا الفيش
التهمة قُحة
وبس
وفي النور
وما بالدس
قالو الكلام
معلوم
كونك تقُح
يا زول
وفي الضو
وما معزول
معناها
رمز صريح
وإشارة
أو تلميح
جواك غِل
مكتوم
داير تقول
للناس
نمرق
عُصار جرار
نركب
جناح الريح
وتبقي القيامة
تقوم
...........
يا وطني
صحّا النوم
............
ليك
لا عتاب لا لوم
بس عندي ليكا
سؤال
كيف يخنقك
بعشوم
وانت
البتأكل النار
وانت العشم
والدار
والثورة والثوار
صحصح
كفاك أعذار
غيظك
أسي الخرطوم
همك
شقا أمدرمان
أدفر
ودُك أسوار
رجّع عُصار
أبريل
نبض النضال
الحار
............
يا وطني
يا مكلوم
يا وطني يا حزنان
سهر
المدن أشجان
غُبن البوادي
يحوم
دُق للمسيرة
طبول
أفقع
مرارة الغول
ما ترجا
سيف مجهول
أنحت
سما الأمكان
أنفخ
شغاف الروح
أزرع
يبابك عرض
وأرسم صباحك
طول
لا ترضا
بالإذعان .
..........
ما تبقي
ديمة جلوس
أدي التمام
وقيام
ما يبقي
غيظك بس
نمة
كلام في كلام
.........
يا وطني أبقي شرار
مطر الرماد
من نار
.........
الحق حبيب
التار
ولهب الجحيم
أنوار .
يا وطني
يا مكلوم
يا وطني
يا مظلوم
يا وطني
يا مقسوم
صحصح
كفاك النوم
ما تسوقني
للأحلام
خلي الفعل
مدفوق
لو درنا
حل ومروق
أرفع كرامتك
فوق
أدفر
في درب السيل
أصرخ
وشد الحيل
شوف السرج
مشدود
امسك
لجام الخيل
صوتك
يشق الليل
لا واطي
لا مشروق
ما بنشتري
الأوهام
من خيمة
جوة السوق
لابد نشيل
التار
عنوة وعديل
ونهار
أكتب
شقاكا العام
في دفتر الإقدام
وأقسم كمان
بالروح
بِتْرَجّع
المسروق
............
قول كمان
وكمان
يمكن وبالإمكان
يرجع
بلد واحد
بي حالو
مليون ميل
...........
جاني
الحُزن ولهان
من قومتي
تب تبيت
أخدتو بالأحضان
وإتسامرنا
زي حبان .
جاني الفرح
نشوان
ناغمني
ما رديت
أصلو الفرح
كضاب
ينقر رقيق
في الباب
تفتح
تلاقي رهاب
...........
مطر الرماد
صب
قحيت
وما مليت
عاْرف الرماد
من نار
والنار
حبيبا الزيت
...........
خلي القيامة تقوم
يا وطني
كبّر وقوم
صحصح
كفاكا النوم .

1/7/2015م


تعليقات 9 | إهداء 0 | زيارات 8656

التعليقات
#1296642 [Kudu]
0.00/5 (0 صوت)

07-02-2015 11:14 AM
يا اخوي هاشم صديق لقد عبرت عنا.. نخن الذين وتربينا على لعبة البطان ونعشق لعبة الوقوف في الرمضاء (X ام البيجري للضل) على انها مباريات للشجاعة والفروسية لكن ان تحتل أرضنا من قبل مجموعة مجرمة وتتسلط علينا وتدجنا وتسوقنا كالبهائم الي المصير المجهول فهذه المنازلة ليست من اختصاصنا..

[Kudu]

#1296540 [ابو الهادي]
3.00/5 (1 صوت)

07-02-2015 08:27 AM
وهذا ما يعرف بزخرف القول

[ابو الهادي]

#1296399 [غصن الشوك]
0.00/5 (0 صوت)

07-01-2015 11:09 PM
و الله يا هاشم صديق انت انسان مبدع ما في ذلك شك لكن شويه شويه لانو الناس ديل نفسهم طويل و بكملو قصائدك كلها و امكن استغفر الله اسلموها المسيح الدجال

[غصن الشوك]

#1296373 [ود أمدرمان المشتاق ليها]
0.00/5 (0 صوت)

07-01-2015 10:22 PM
هاشم صديق ... جرستنا ياخي

[ود أمدرمان المشتاق ليها]

#1296354 [abushihab]
5.00/5 (1 صوت)

07-01-2015 09:28 PM
جميل يا رائع..................

[abushihab]

#1296254 [شمالي]
5.00/5 (1 صوت)

07-01-2015 04:54 PM
يحفظك مولاي يا هاشم صديق
أكيد لينا موعد مع التاريخ

[شمالي]

#1296114 [موسى]
0.00/5 (0 صوت)

07-01-2015 01:35 PM
(اذا اصيب القوم في أخلاقهم فاقم عليهم مأتما وعويلا ...) هكذا يقول لسان الحال

[موسى]

#1296081 [ابو سحر]
5.00/5 (1 صوت)

07-01-2015 12:42 PM
وين يصحصح ويقوم؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟نايمين ؟؟؟؟؟؟؟؟؟؟؟؟؟؟نومة اهل الكهف؟؟؟؟؟؟؟؟؟؟؟؟؟؟؟؟؟
ابريل فات ؟؟؟؟؟؟؟؟؟؟؟؟؟؟؟؟؟؟؟؟؟؟ويونيو30 فات ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟واكتوبر فات؟؟؟؟؟؟؟؟؟

[ابو سحر]

ردود على ابو سحر
European Union [Kudu] 07-02-2015 10:57 AM
نكون راجيين ساعة الصفر منذ ربع قرن؟؟

[المكشكش (مفكر اسلامي، خبير وطني ، مصلح اجتماعي)] 07-01-2015 10:50 PM
والله يا ابوسحر ما قلت الا الحق ، ورغم احترامنا وحبنا للشاعر الرائع ، الا أن شعبه هذا لن يصحو مطلقا" حتى لو غنينا له (ود القرعة ...قوم أرعى)، ونومة اهل الكهف (أخف من نومته)، هذا (شعب الدوبيت ، عزيزي هاشم صديق) ، شعاره :نحن ونحن ونحن ، والزارعنا غير الله ال يجي يقلعنا والنار ولعت بي كفي بطفيها ودخلوها وصقيرا حام .... الى آخر تلك المنظومة التافهة من الكلام المنحط والافك والكذب الصراح ، فشعب هذه ثقافته ، يرقص مع (كبيره) صباح مساء على أنغام تلك الهطرقات الغبية بعغوية حد الهبل هل يرجى منه خير ؟ رباه : هل من وطن بديل لهذا الوطن البليد ؟؟؟آآآآآآآآخ ، واحر قلباه !


#1296077 [برعي]
5.00/5 (1 صوت)

07-01-2015 12:38 PM
اطال الله عمرك حتي تري ذلك اليوم ، ومتعك الله بالصحة والعافية حتي تنبض بحسنا الغايب .
لقد هزتني جدا كل القصيده ولكن ما ابدع (
كيف يخنقك
بعشوم
وانت
البتأكل النار
ةادمعت قلبي :
جاني
الحُزن ولهان
من قومتي
تب تبيت
أخدتو بالأحضان
وإتسامرنا
زي حبان .
جاني الفرح
نشوان
ناغمني
ما رديت
أصلو الفرح
كضاب
ينقر رقيق
في الباب
تفتح
تلاقي رهاب

[برعي]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة