الأخبار
أخبار إقليمية
نجلاء سيد أحمد: حكاياتي مع البوليس والمحاكم (٣) .. حول اغتصاب صديقتي ورفيقتي في حركة قرفنا
نجلاء سيد أحمد: حكاياتي مع البوليس والمحاكم (٣) .. حول اغتصاب صديقتي ورفيقتي في حركة قرفنا
نجلاء سيد أحمد: حكاياتي مع البوليس والمحاكم (٣) .. حول اغتصاب صديقتي ورفيقتي في حركة قرفنا


المتحري قال بعد معرفة أن المغتصبين من جهاز الأمن : "يا بنت الكلام دا كبير وأحسن تنسي"
07-07-2015 02:22 PM
تواصل الأستاذ نجلاء سيد أحمد توثيق المواقف التي حدثت لها مع نظام الأنقاذ ممثلاً في الأجهزة النظامية كاتبة:

مقدمة لابد منها حول اغتصاب صديقتي ورفيقتي في حركة قرفنا صفية اسحق
اتصل بي الصديق (.........) وعضو في حركة قرفنا فقال لي اود ان اقابلك الأن لأمر مهم وعاجل!!
فقلت له انا في المنزل فتعال
حضر وهو متجهم الوجه عابس ومهموم فقلت له عساك بخير فقال لي باعتبارك اختنا وانت امرأة وعضو في الحركة هنالك اغتصاب حدث لزميلتنا صفية عشان الاسباب دي حنسلمك الملف دا ودي حاجة اكبر من تجربتنا ما عارفين نتصرف.

انا قلت : صفية منو يالله قال لي صفية اسحق!!!
ضاقت علي الارض، وشعرت بالغثيان، ولكن تجاسرت، فقلت اين هي الان؟!! فقال في امدرمان ودا تلفونها (........)

أنا: نجلاء معاك ياصفية ولازم اشوفك هسع انا في بحري.
كنت في انتظارها و الدقائق تمر كأنها يوم بحاله.
وقفت امجاد ... نزلت منها صفية اسحق لا تستطيع المشي بسهولة، تتالم ... وفي رجلها عرجة بسيطة.. انا فتحت الباب ومشيت عليها مسكت فيني وحضنتني بكت بصوت عالي حتي كتفي اتملأ بالدموع.
انا ماعرفت انا منو والحاصل شنو
تجاسرت وقلت لها: "صفية انت قوية ماتنهاري لسع قدامك درب طويل". " ارح المستشفى".
حاولت ابعدها برفق، لكنها تمسكت بي كأنها تحاول ان تحتمي بحضني من واقع البلد والظلم.
تركتها تبكي وكانت دموعي تنهار في صمت وانا أربت علي كتفها لدقائق.
بدأ صوت البكاء ينخفض واصبحت اسمع فقط صوت النحيب عندها اقسمت ان لا اتقاعس عن رد حقها من المغتصبين ومن حكومة الانقاذ وان لايهدي لي بال، اختي وابنتي ورفيقتي في درب النضال ...
اتصلت بالمحامية نجلاء الماحي واخبرتها بالحاصل وهي رتبت واتصلت علي مبادرة متعاونات فحضرن اتنين منهن. وصلنا المستشفى اتسندت على كتفي ومشينا وكان معنا احد اعضاء حركة قرفنا.

المحاميات اخدو يستجبوا فيها وانا سجلت معها الفيدوا دا
.


ودخلنا الى نقطة الشرطة داخل المستشفى فقلت لهم عندنا بلاغ اغتصاب قال منو المغتصبة فقلت لهم اسمها صفية اسحق سألها وين ومتى قالت قبل ثلاثة ايام.
وضع القلم وقال تمشوا للنيابة فتحركنا بعربتي الى نيابة بحري فقلت لهم انا مابدخل عشان بعرفوني انا بنتظركم بعيد وعشان صفية ما بتقدر تمشي نزلتها امام الباب ووقفت بعيد .....
بعد دقائق خرجوا من النيابة فتحركت عليهم اها الحاصل شنو قالوا المتحري سألهم ولمن قالت جهاز الامن قال ليها "يابت الكلام دا كبير احسن تنسي، انت ماقدر الامن"
قامت انهارت وانفعلت وقالت له: "انا مابخلي حقي فقام سألها عن المكان التم فيه الاغتصاب قالت في مباني جمب موقف شندي".
قال دا ما مجال تخصصي امشي باكر لكوبر فطلعنا.

كانت منهارة وتعبانة جدا فاقترحت المحاميات ان ترتاح وباكر نمشي لنيابة كوبر فتحركنا الى البيت عندنا اكلنا شوية وصفية استحمت بماء دافيء ...

انا فكرت الضابط ممكن يتصل بالامن ويقول ليهم باكر في زولة حتفتح بلاغ ضد الامن واول مانصل يتم اعتقال الناس كلها .....
انا سالتها صفية انت مستعدة تخوضي المعركة دي للنهاية مهما كان التمن قالت لي "في تمن اكتر من الاندفع؟" ... "انا مستعدة عشان البنات التانيات مايتعرضوا للأنا شفتوا".
وانهارت ببكاء حار يقطع قلب الحجر ...

اتصلت باستاذة نجلاء واقترحت عليها التحرك الان لفتح البلاغ وحكيت ليها مخاوفي من الانتظار فقالت نقابلها في كوبر، اتصلت على الحركة وقلت ليهم برسلوا زول غير معروف بعربية يسوق الشباب ديل للنيابة وانا بنتظر في المستشفى لمن يتم تحويلها بأورنيك ٨ بكون متواجدة معاكم هناك ..
أها الشباب وصلوا القسم مع صفية اسحق والمحاميات وصلن طلبوا بفتح بلاغ اغتصاب ولمن الضابط المناوب عرف المتهم جهاز الامن وقف الاجراءت واستدعي رئيس القسم ورئيس القسم لمن وصله طلب احضار صفية الى عربة الشرطة وعندها اخبرها ان الموضوع كبير وخطير عليك واحسن تنسي القصة قامت انفعلت ورفضت التحدث او الرد على اسئلة رئيس القسم وهسترت وبدأت تكفت في الشباب المعاها.

قام اتصل علي (.........) عضو في حركة قرفنا قال لي الحاصل من رئيس القسم والانهيار الحصل لصفية قلت له اديها التلفون.
قال لي ما حتتكلم معاك قلت له اديها التلفون انت بس .. سمعته قال ليها نجلاء عايزه تتكلم معاك طوالي انا قلت ليها انت عايزه الناس المعاك دي يتم اعتقالها ممكن تحصل ليهم اي حاجة انت شفتي الناس دي براك قالت: لي لا ... قلت ليها معليش انت قوية وانا بفتخر بيك واصلي وسريع عشانا كلنا الناس البنحبك وواقفة معاك.
قالت لي انا تعبت من كل مرة اعيد الاجابة قلت ليها معليش انا منتظراكم ...
قدرت تستشعر الخطر و كملت التحري ارسلوها للمستشفى مع رجل بوليس وباقي الشباب والمحاميات، وصلوا المستشفي والدكتورة المناوبة اظنها خافت فكتبت كلام مابنفي الاغتصاب أو يؤكده .... ونحن عارفين العدالة في زمن الانقاذ مكبلة.

المهم رجعت عندنا البيت على أواخر الليل انا عرفت القصة حتنتهي هنا لكن مفروض فضح الجناة عبر اعلام قوي اتصلت بمكتب امريكيا مكتب حركة قرفنا قلت لهم ترجموا الفيديو وما يتم رفعه الا بعد خروجها من السودان وطلبت رفع الفلم المترجم في صفحت قرفنا حتى ابعد اي احتمال اني صورت الفيلم.
كلمت منعم الجاك في جوبا بالحاصل وخبر الاغتصاب وصل الأمن. والأمن بقي محاصر المنزل بتاع اسرتها ويضغط على افراد الاسرة لمعرفة تواجدها والقضية وقفت هنا ...
انا اخفيت صفية في بيتنا انا وبخاري، وكان عندنا مرضى من جنوب طوكر.
بقت صفية معانا ونكرت تواجدها حتى علي حركة قرفنا وعلى كل الناس: ناس قوي الاجماع الوطني، ومبادرة لا لقهر النساء، وعلى نجلاء الماحي.
قلت لهم رجعت الى بيت اهلها وتلفونها مقفول وانا ما عندي اي معلومة عنها رتبت مع طبيبة فحصتها وقدمت علاجات ولقاحات وحبوب مهدئية.
تكلمت مع صديقتي (........) عن خطورة تواجدها في السودان فتبرعت بتذاكر سفر الى جوبا. وكان في الوقت دا مسموح السفر بدون اي جواز فسافروا علي انهم من الزاندة. وهي قبيلة من جنوب السودان، بعد لبسوا ملابس افريقية من بخاري القميص وأنا عندي لبسة افريقية لبستها صفية ....

يوم السفر كان الحضور ٣ صباحا وانا عربتي معروفة لجهاز الامن عشان كدا صحبتي القطعت التذاكر جاءت بعربيتها لبيتنا وطلعنا على المطار.
دخلت معاهم حتى داخل الصالة وانتظرت لمن طلعوا على بص المطار.
جاتني مبتسمة خلاص الناس ديل مروا بسلام .
انا قلت ليها احسن ننتظر وانا متفقة معاهم لمن الطيارة تكون في الجو يضربوا لي ...
انتظرنا في العربية.
بعد دقائق مرت كانها دهر تلفوني رنّ صفية تتصل نحن خلاص في الجو.
انا بكيت من الفرح الآن هي بعيدة عن أيادي الامن.
بكيت على الهوان والظلم ومفارقة الاوطان.
المهم رجعت للبيت، وفوراً اتصلت على الصديق منعم الجاك كان في جوبا قلت ليه الانناس حيصل بعد ساعات على الطائرة رقم ......... لمن يصلوك طمني.
أها تم الترتيب على زواجهم في نفس اليوم بالمساء لاعتبارات كتيرة اسرية ونفسية مهمة كانت لصفية وقد كان.
وتم تسجيل الفيديو في جوبا ونحن نشرنا الفيديو الأول.
ثم الفيديو الثاني.
وتناقل الخبر عبر النت والقنوات العالمية واصبح في تفاعل كبير وسط الشعب السوداني وبعض الكتاب في الصحف كتبوا وتمت محاكمتهم وسجن بعض منهم كالأستاذة امل هباني، واستاذة فاطمة غزالي، ودكتورة ناهد محمد الحسن، واستاذ فيصل محمد صالح، ود. عمر القراي.


نواصل ردة الفعل من الحدث والمحاكمات.

.




تعليقات 20 | إهداء 0 | زيارات 26398

التعليقات
#1300263 [على]
1.00/5 (1 صوت)

07-08-2015 07:12 PM
ماهم مغتصبين السودان كله ولاتنسوا حلايب سودانية

[على]

#1300126 [عصام الجزولى]
5.00/5 (1 صوت)

07-08-2015 02:27 PM
كتب الدكتور عمر القراى فى صحيفة اجراس الحرية مقال عن هذه الجريمة التى يندى لها الجبين خجلا كتب مقال بعنوان (الاغتصاب فى ظل الشريعة ) فقام جهاز الامن بفتح بلاغ ضده بأشانة السمعة ؟؟ وتم اعتقاله وبدأت المحاكمة واستمرت حوالى ثلاثة جلسات وفى الجلسة الرابعة شعر كلاب الجهاز بأن القضية لا تسير فى صالحهم وأنها قد تفضحهم أكثر قتغيبوا عنها وحتى القاضى تغيب أكثر من مرة بداعى المرض وأخيرا تمكن الاخ القراى من الخروج من السودان ولم يعترضه أحد رغم أن القضية لم تشطب ولم يصدر فيها حكم وحمد كلاب الامن الله على سفر القراى وتوقف سير القضية

[عصام الجزولى]

ردود على عصام الجزولى
[سند] 07-08-2015 05:23 PM
نرجو من الراكوبة اعادة نشر مقال الدكتور عمر القراي حيث لا نستطيع نقله هنا لطول المقال


#1300110 [هدهد]
5.00/5 (1 صوت)

07-08-2015 02:10 PM
أنتى كريمة بنت اكارم الاستاذة نجلاء وفقك الله دنيا واخرى ومتعك بالصحة والعافية وأكثر الله من امثالك قمة الاخلاق والتفانى .

[هدهد]

#1300045 [إندستين]
3.00/5 (2 صوت)

07-08-2015 12:35 PM
القصه فى شى من الكضب ما اكون الاغتاب قبل ثلاثه ايام وصفيه تتكجول او

[إندستين]

#1299952 [جملون]
5.00/5 (4 صوت)

07-08-2015 10:11 AM
يا الله الرحمن الرحيم الملك القدوس السلام المؤمن المهيمن العزيز الجبار المتكبر الخالق البارئ المصور الغفار القهار الوهاب الرزاق الفتاح العليم القابض الباسط الخافض الرافع المعز المذل السميع البصير الحكم العدل اللطيف الخبير الحليم العظيم الغفور الشكور العلى الكبير الحفيظ المقيت الحسيب الجليل الكريم الرقيب المجيب الواسع الحكيم الودود المجيد الباعث الشهيد الحق الوكيل القوى المتين الولى الحميد المحصى المبدى المعيد المحى المميت الحى القيوم الواجد الماجد الواحد الاحد الصمد القادر المقتدر المقدم المؤخر الاول الاخر الظاهر الباطن الوالى المتعالى البر التواب المنتقم العفو الرؤف مالك الملك ذو الجلال و الاكرام المقسط الجامع الغنى المغنى المانع الضار النافع النور الهادى البديع الباقى الوارث الرشيد الصبور نسالك ان الانتقام فى الدنيا قبل الاخره من كل من اغتصب امرأه او فتاة من نسائنا ونسالك يا الله ان تطمس على صحتهم واموالهم وذريتهم لو كانو من جانب الحكومه او الجنجويد او الحركات المسلحهز قولو امممممين نحن فى العشره الاواخر

[جملون]

#1299836 [سند]
5.00/5 (3 صوت)

07-08-2015 04:15 AM
يا نجلاء سيد أحمد أنت انسانة محظوظة تربيتي في كنف رجل عظيم ثم تزوجتي رجل عظيم ولولا ظروف السودان كنا نرى فيك فاطمة الاخرى

[سند]

#1299801 [Albrado]
3.50/5 (7 صوت)

07-08-2015 01:21 AM
ماهو راي البشير ووزير العدل ورئيس القضاء في السودان؟؟؟؟؟؟؟؟؟؟؟؟؟؟

ما هو راي عصام البشير وهيئة علماء السودان ؟؟؟؟؟؟؟؟؟

ما هو راي علي عثمان ونافع وقادة هذا النظام ؟؟؟؟؟

ما هو راي الترابي كبيرهم الذي علمهم السحر واتي بهؤلاء ؟؟؟؟؟

واخيرا ما هو راي الشعب السوداني وشباب السودان ؟؟؟؟؟

شكرا للذين تضامنوا من داخل وخارج السودان وشكرا لقناة الحرة ولكل

المنظمات الانسانية ....

السؤال الذي يطرح نفسه ..... هل سنكتفي بهذا القدر وننتظر ماساة فتاة اخري

في السودان ؟؟؟؟؟

هذا السؤال يعيدنا الي عام 1924م عندما تعرضت طالبة سودانية في طريق

عودتها من المدرسة في امدرمان للمعاكسة من جندي بريطاني وصرخت الفتاة

وتجمع الناس حولها مستنكرين ما حدث فصرخ شاب باعلي صوته قائلا ... (هل

سنكتفي بهذا القدر من الاستنكار ام ثم ماذا بعد ؟؟؟؟؟؟) فكانت الشرارة

لثورة اللواء الابيض .. ثورة علي عبد اللطيف وعبد الفضيل الماظ ورفاقهم من

شرفاء السودان ......

(( امة لا تستطيع ان تجمي وطنها وشرفها لا تستحق ان تعيش ولا تستحق ان

تكون لها وطن ))

[Albrado]

ردود على Albrado
[تفتيحة لمن فضيحة] 07-08-2015 09:46 AM
راي شنو يا يا استاذ؟!!! انا راي واحد من اخوانها يملي عربية متفجرات ويخش بيها في مبني الجهاز.


#1299764 [ابن السودان البار]
4.50/5 (3 صوت)

07-07-2015 11:35 PM
تسلمي يا بنت الرجال تسلم البطن الجابتك انت سودانية أصيلة يحتاجك سوداننا الحبيب المنكوب بوسطة عصابة اللصوص الأوغاد ورايسهم المجرم الهارب من العدالة الذي نجح في تحطيم الكثير لكن هيهات تحطيم بطلة صنديده كنجلا التي سوف يذكرها تاريخ السودان الذي سيكتبه ويسجله الوطنيين الشرفا وسيسجل اسم صفية كرمز لنساء السودان المناضلات الشريفات فالتحيه والاحترام لهم جميعا

[ابن السودان البار]

#1299756 [عدو الكيزان]
4.75/5 (3 صوت)

07-07-2015 11:27 PM
اللهم في هذه الايام المباركات دمر الكيزان وأرنا فيهم عجائب قدرتك ياكريم ياجواد ،، اللهم أجعل دائرة السوء عليهم ،، على كل كوز ومطبل ومن أيدهم ومن ناصرهم وهو يعلم ظلمهم وجرائمهم يا الله يا كريم ،، يا نصير المطلومين ياااااااااارب .

[عدو الكيزان]

#1299714 [بنت الناظر]
4.50/5 (3 صوت)

07-07-2015 09:59 PM
اللهم أنصر شعب السودان وحرائره على من ظلمهم وأرنا ثأرنا فيهم..تحية إجلال وإكبار أيتها الفارسة المقدامة حفظك الله ومن معك وصبرا عزيزتى فالنصر آت قريبا بإذن الله..

[بنت الناظر]

#1299694 [اشراقة]
4.50/5 (3 صوت)

07-07-2015 08:55 PM
اقعدوا اتفرجوا وخليكم مع عدم المبالة لكن ماتنسوا بكره اخواتكم وزوجاتكم وبناتكم ممكن يتعرضوا لنفس موقف صفية ممكن الواحدة منهم تطلع في مظاهرة او تتشاكل مع كوز او بتاع امن يسوقوها مكاتب الامن وكر المرفاعين والصعاليق ويعملوا فيها اسوا من ما عملوا في صفية بالجد عيب عليكم يارجال عيب تتفرجوا واعراضكم مستباحة ومتروكة للكيزان اشباه الرجال

[اشراقة]

#1299664 [alshrif]
5.00/5 (2 صوت)

07-07-2015 06:50 PM
بسم الله الرحمن الرحيم
والصلاة وسلام النبي المختار
اسف جدا على الظلم الذي وقع على بنتنا صفيه وعلى جميع بنتنا واخوتنا
اللائى تعرضنا للاغتصاب من افراد مرتزقة الانقاد. والله العظيم كلمان اسمع
عن جرائم هذه العصابه اشعر واحس بان العار يحلاقنى كما يلاحق كل المواطنين
الشرفاء و اقول نحن نستاهل كل الاهانه والاضهاد لاننا تنكرنا عن مبادي القيم
ونسينا العبر في ثورة اللواء الابيض وثورة اكتوبر و ثورة ابريل و تجنبنا المواجهه
والعتصام الشعبي ورضينا بالذل والهوان ، ابو محمد السوداني بانكوك

[alshrif]

#1299656 [الحوش]
5.00/5 (3 صوت)

07-07-2015 06:39 PM
الاستاذة نجلاء :انتي عظيمة.

[الحوش]

#1299635 [روعه]
0.00/5 (0 صوت)

07-07-2015 06:02 PM
لاحولا ولا قوة الا بالله...اللهم استرنا اللهم ابعد عنا شيطان الانس اللهم احفطنا وابعدنا عن كل سوء...ربنا يعينها الاخت ولكن نصيحة لكل اب او اخ ابعاد بناتك او اخواتك عن اى تنظيم او تجمع وخاصة اذا كان ضد دولة....فمهما كانت قوة المراة فهى مع الرجال لاحولا لها ولا قوة فالبعد عن الشر احسن....نسالك يالله ان تسترنا دنيا واخره...ولاحولا ولا قوة الا بالله نسالك اللطف

[روعه]

#1299620 [شاهد سقوط متصحفين]
5.00/5 (1 صوت)

07-07-2015 05:20 PM
هذه الحلقات اهديها للمناضلة سارة منصور فتين؟؟؟؟؟؟؟؟؟؟؟؟؟؟؟؟؟؟؟ كما اهديها لمخ مافي النيلين وباقي زبالة السودان.

[شاهد سقوط متصحفين]

ردود على شاهد سقوط متصحفين
[لعنة الله علي الظالمين] 07-12-2015 05:24 PM
اصحي يابريش عندما حدث هذا الاغتصاب كانت سارة منصور مع الانقاذ وقامت بتكذيب الضحية (صفية اسحق) ومساندت الامنجية الكلاب ولم تنفي حتي الآن ..


#1299542 [حمدالنيل]
4.94/5 (7 صوت)

07-07-2015 03:14 PM
أقف اجلالا واكبارا لك أيتها المناضلة الجسورة.. لو وجد حفنة فقط من امثالك وزوجك بخاري لما ظل صعاليك الاسلام ينتهكون شرف الوطن 26 سنة.

[حمدالنيل]

#1299538 [سرحان]
4.38/5 (6 صوت)

07-07-2015 03:10 PM
ما اعظم عدالة الإسلام و اليوم جلد معارضين لأنهم تكلموا فقط و يقولون إن الإسلام عرف حقوق الإنسان قبل العلمانيين ... يقولون إن الكيزان ليسوا على صحيح الإسلام و كذلك دولة النميري و السعودية و دول الخليج و داعش و القاعدة و الشباب الصومالي و بوكو حرام و ابو سياف و طالبان و الدولة الأموية و العباسية و السلطنة العثمانية و المهدية و جماعة انصار السنة و حتى جماعة علماء السودان المؤيدين للكيزان ... تسأل : و من هو أو من هي الجماعة التي هي على صحيح الإسلام ؟ و ما هي الدولة التي عرفت حقوق الإنسان فلم يكن فيها رق و لا سبايا و لا بيع للإنسان عبر التاريخ ؟ فلا يعطونك إجابة ....إما أن الإله يتعمد أن تكون أحكامه غامضة فكل هؤلاء لم يفهموها ليطبقوها أو إن الكيزان ليسوا مسلمين ...

[سرحان]

ردود على سرحان
European Union [Muslim.ana] 07-07-2015 08:07 PM
ياخي كرهتنا بي افكارك المريضة دي. فرقك شنو من الكيزان انت، ما انت برضو بتتاجر بمعاناة الناس عشان تنشر امراضك وسمومك.

كيزان السجم وكلاب امنهم ارتكبوا ابشع جريمة في حق بنت الناس دي وانت ما هاميك غير انك تلعلع بالاسطوانة بتاعت السبايا والرق وصحيح الاسلام وبقية هرطقتك دي.

ياخي لو ما عندك كلام مفيد نقطتنا بسكاتك واحترم على الاقل مأساة البنية دي وما تتاجر بقضتها وتعملها مطية تنشر بيها امراضك.

الكلام ليك وبقية شلتك الشغالين تغيروا لينا في اسماءكم وتبرطموا بي هرجلتكم دي..واحنا عشان عندنا قنابير حنصدق انكم بقيتو كتار واغلبية وحنصدق ونسكت.

وبالمناسبة برضو سيب العلمانية وما تتستر بستارها زي ما قلنا ليك يا أستاذنا.


#1299522 [قاسم]
5.00/5 (10 صوت)

07-07-2015 02:55 PM
الله من الظلم ... الله من القهر ... غدا ستستعدل العدالة و سيتم القصاص ... انتو قايلين الكيزان ديل مكنكشين كده ليه ، ما خايفين من السوووهو ... ليكم يوم يا ولاد الكلب ... حكاية صفية عملت لي حاجة نفسية ... في تلك الايام لم أنم لمدة ثلاثة أيام و كرهت الدنيا ... يا صفية يا رائعة حقك ستاخديهو تالت و متلت ... تفو على الكيزان و اشباه الكيزان و مناصري الكيزان .
اكتب لنا يا نجلاء يا راقية يا صنديدة ...

[قاسم]

#1299520 [خالد الكردفاني]
5.00/5 (3 صوت)

07-07-2015 02:47 PM
ربنا ينتقم من هؤلاء السفلة المجرمين وربنا يذيقهم من نفس الكأس التي أذاقوا منها الشعب السوداني

[خالد الكردفاني]

#1299516 [أبوشولرب]
4.88/5 (7 صوت)

07-07-2015 02:40 PM
ربنا يعين كل مظلوم ويجعل له من يسانده

نجلاء انت طعنة نجلاء فى خاصرة هذا التنظيم الاجرامى المستبد
الله يحفظ كل الشرفاء

[أبوشولرب]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة