الأخبار
أخبار إقليمية
العيد وصل .. وماك بليد حُكمك تليد ظُلمك رشيد
العيد وصل .. وماك بليد حُكمك تليد ظُلمك رشيد
العيد وصل .. وماك بليد حُكمك تليد ظُلمك رشيد


قصيدة جديدة للشاعر هاشم صديق
07-08-2015 02:01 PM
وماك بليد حُكمك تليد ظُلمك رشيد

هاشم صديق

العيد وصل (1)

صُمنا وفطرنا
علي بصل
فض الشراكة
والحزازات والشَكَل
( رينقو ) الجعيص
عمر البطل
وحليمة
رجعت لي قديمه
وللهبل.
ما شَعّ نور
إلا إنضبح
وهجو أْنكتل.
ما إتلم صف
إلا إنفصل.
ما قام سلام
إلا إنتحر
قبال يتم
شهر العسل .
ما صُمنا يوم
إلا وفطرنا
علي بصل
وده عيد جديد
برضو الحصل
ياهو الحصل
وبرضو الهَبلَ
ياهو الهَبل.
...........
العيد وصل
إتمحنت
شمس الصباح
وفتحتّ
عين الجِراج
إرتجّ
( شارْع الحِلة )
والسوق والكباري
من الحصل .
النيل ( حِسَا )
جف وضِمِر
أصبح تقول
رسموهو
بي قلم الحِبِر
النيم
تنا فرعو انكفا
ونام الفرح
نوماً قفا.
أماتنا ما لبسن
شباشِب للمشي
حَدّن حِداد
مشيّ الحفا
علي المجامر
بي مهل
بكت التهاني
من الضحك
وضحكت دموعنا
من الزعل
...........
العيد مبارك
يا جموع
ماكلين وَهَم
لابسين ضلوع
رافعين فواتح
للثوابت والفروع
شِنّ الخبايز
في الجنايز
طعم الحلاوة
في دنيا جوع ؟
وكيف الوصول
والحال رجوع ؟
وديمه السؤال :
كيف البصارة
وكيف يكون
بكره العمل ؟
..........
العيد وصل
راكب قطار
فاضي وكفيف
خلونا
من حق الخبيز
كيفن يكون
حق الرغيف ؟
الله أكبر
للصلاة
الله أكبر
للنزيف.
الثورة
حاربت الحِلِم
حِرب ( الحرازة )
مع الخريف.
الله أكبر
للسكوت
قول يا مهيمن
ويا لطيف.
يا شعب أيوب
والصَبُر
شن بَشَرت ليلة
القَدُر ؟!!!
...........
أنا أصلي
عقلي
( الما حلو )
ونضمي ديمه
نضِم ( كُتُر )
مش قلت ليك:
( أقبض عذابك
إيد حديد
ما تبيع جروحك
لي عساكر
أو لسيد )
وحسع بقول:
العيد وصل
لا تصدق
الهِدم الجديد
لا تنوم وتحلَم
بالعسل
أنفض غُبارك
يا كبير
أكسر قيودك
يا بطل
العيد يكون
( يوم الخلاص )
أغسل عيونك
من غباش.
ذاكر
صحاف ماضيك
مثل
يمكن يكون
بعد العُصار
العيد وصل
.........
العيد وصل
رطل الحلال
بي كم حرام
والجوع عِشق
ربط الحِزام .
غالي الفِعِل
رِخص الكلام
خنقونا
بي ( أمن البلا)
سامونا
زي زفة هوام
والدنيا
سروالها إتنصل.
..........
قول يالطيف
جايي الخريف
وكَسْر السيول
الفاتو
لسع ما بِرا
ولا إنجبر.
حُزن ( السباليق)
ما كِضِب
ومطر الشاتن
فاض نزل.
وعنتر محكر
في القَصُر
في إيدو
روح الناس
وأنصال الأَمُر
............
مولايا
جاك عيداً
جديد
قصراً جديد
عرشاً مجيد
حرساً شديد
جوقة ونشيد
وانت الحصيف
وماك بليد
حُكمك تليد
ظُلمك رشيد
خايض وقاشر
بالنِعم
مشروق مستف
بالرياش
شعبك
ممسح بالغباش
يأكُل وهم
يشرب وهم
يحلم وهم
وانت الولي
ومك الطناش
وفي قوله
( هارون الرشيد ).
...........
عيدك تماااام
سيدنا الإمام
زيك منو
وقدرك شنو ؟
عليك عفارم
يا بطل
...........
العيد وصل
مالي إنشرق
فرحي وبكي ؟
مالو الصباح
لابس جلاليب
المسا
مالو الحنين
قلبو انكفا
مالها الطواقي
الحمرا ذاتا
اتْلفحت
واتْوشحت
زمن ( الطواري )
واتعبر
حلق الحواري
مرجيحة الأطفال
بقت
في عيوّنا
زي ( ساقية جِحا )
الدنيا شاردة
ممحنه
ومشت التهاني
علي الأسي
لابسه الحفا
والشوق جفل
..........
العيد وصل
صُمنا وفطرنا
علي بصل .


تعليقات 10 | إهداء 0 | زيارات 7146

التعليقات
#1300776 [بهاء الدين]
0.00/5 (0 صوت)

07-09-2015 01:05 PM
يا جماعة الراكوبة ما قلنا ليكم كم مرة ماتعتمدوا على البشير وشوفوا لينا طريقة تانية نحل بيها مشاكلنا , انا الان مغترب في السعودية وجيت السودان جربت الشغل والله حق المواصلات مابيفضل بعد ماتفطر وتتغدى وتفوت وجبه والواحد بقى يفكر يغير جنسيته والانسان اتي لهذه الدنيا ليعيش وليس ليعاني , خلاص أنسو حاجة اسمها البشير والصادق المهدي والميرغني , ماحك جلدك مثل ظفرك فتولى انت جميع أمرك , إلى متى التعويل على ناس هم سبب المشكلة بل كل المشكلة حتى لو مشوا البلد عاوزة ليها كم جيل عشان تقوم على رجولها

[بهاء الدين]

#1300614 [مريود]
1.00/5 (1 صوت)

07-09-2015 09:54 AM
لا حول ولا قوة إلا بالله . هذا حال أكثرنا.

قصيدة مبكية لمن له قلب.

تكافلوا تراحموا خففوا عن بعضكم.

[مريود]

#1300277 [mutaz arabi]
0.00/5 (0 صوت)

07-08-2015 08:26 PM
Bashir is a human with no feelings

[mutaz arabi]

#1300185 [كاره الكيزان محب السودان]
5.00/5 (2 صوت)

07-08-2015 03:41 PM
يا سلام استاذنا يا رائعك

ان شاء الله ياتي مع العيد الفرج، وتحرر الامة السودانية من حاجز الخوف والوهن وتنقض على ازلام النظام البائس لترسلهم إلى مذبلة التاريخ من غير رجعة يارب ياكريم.

[كاره الكيزان محب السودان]

#1300160 [شاهد اثبات]
5.00/5 (2 صوت)

07-08-2015 03:07 PM
فعلا والله يا هاشم يا رائع
الاصر القديم ما عايز ينقلع

image

[شاهد اثبات]

#1300154 [ابو سحر]
5.00/5 (1 صوت)

07-08-2015 02:57 PM
يا سلاااااااام ياراييييييييييييييييع
ان شاء الله السنة الجاية يكون عيد تمااااااااااااااااااااااااااام

[ابو سحر]

#1300145 [همت]
5.00/5 (3 صوت)

07-08-2015 02:46 PM
لو كانت بالبشير ذرة من الإحساس السليم لاستقال بهذه القصيدة، لكنه لم يفعل فهذا الرجل قد عدم الحياء تماماً وجاع الناس وهاجر الشباب إلى إسرائيل وباع بعض الناس أعراضهم ولم يحرك ذلك ذرة من الإحساس في الرئيس العديم الإحساس، بل على العكس تماماً ... زور الانتخابات لكي يحكم خمسة سنة أخرى، لسان حال البشير الآن: أنا جوعت الناس في بلد كانوا بسموها سلة غذاء العالم وما استقلت، أستقيل بقصيدة؟

[همت]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة