الأخبار
أخبار إقليمية
بلة الغائب : أتحدى أي رئيس يقول أداني حاجة ،، تعاملي مع الجن كتعامل الحكومات مع السفراء ،، علاقتي مع نميري ما زي مع البشير ،،
بلة الغائب : أتحدى أي رئيس يقول أداني حاجة ،، تعاملي مع الجن كتعامل الحكومات مع السفراء ،، علاقتي مع نميري ما زي مع البشير ،،
بلة الغائب : أتحدى أي رئيس يقول أداني حاجة ،، تعاملي مع الجن كتعامل الحكومات مع السفراء ،،  علاقتي مع نميري ما زي مع البشير ،،


الجن أنا بحبه شديد ويحبني بشدة ،،أمتلك أكثر من 7 عمارات في العاصمة ،،
08-29-2015 04:56 PM
الخرطوم : مصعب الهادي


بين الفينة والأخرى يخرج للملأ بحديث يحمل كثيرًا من الغيبيات، ينقسم خلالها الناس بين المصدق والمكذب، لغط كثير يسببه فور ذلك، سبقته كثير من النبؤات بحسب وصفه وتحققت على أرض الواقع ، لكن سرعان مايجابهها بحملة من الدعاة والشيوخ تثبيطاً للدجل والشعوذة بحسب رؤاهم مايفعله بلة الغائب، على مدى ساعة جلسنا معه نتجاذب أطراف الحديث نرميه ويرد، دارت الجلسة بصورة عامة تبحر في علاقته بالجن والعالم الآخر ومايراه في متقلبات الأيام على الصعيد العام المجتمعي والسياسي والرياضي، في دردشة ربما تصيب وربما تخطئ ، لا يتجاوز سوى رؤيته وما يقوله بلة الغائب:
في البدء كيف استطعت أن تبني علاقة مع الجن رغم أن الرسول نهى عن التعامل معهم؟
لا ، الجن حاربوا معه في كل الغزوات ، ما في كلام بالشكل دا، أنا أتحدى أي شخص مهما بلغ من العلم يقول إنو التعامل مع الجن منهي عنه.
هل من شروط للتعامل معه؟
مافي شروط، سوى أن تكون مع الله، فمن كان مع الله كان الله معه، بعد كدا براهم بجوك، إذا نظفت جسدك وجوارحك من حق الناس بجوك.
إذن كيف لمسلم أن يتعامل مع كل تلك الجنيات؟
تعامل عادي، هسي أنت لما تمشي أوربا مش بتتعامل مع الخواجات، إذن فالجن كذلك، إن كان لا يمنعك من صلاتك وصيامك وذكرك لا تحدث الحرمة، فعكسه تحدث الحرمة، والحمدلله ما حصل معاي كدا، أنا البأمر الجن.
هل ينفذ وعوده؟
بنسبة 100% وأنا إن أمرته لا يخلف وعد.
علاقة الطب والإجابة والتنفيذ مع الجن ، مالسر في ذلك؟
الصداقة والمحبة ، الجن أنا بحبه شديد ويحبني بشدة.
اتأمن غدره؟
100% وماعندهم خيانة إطلاقاً.
بصراحة هل تزوجت واحدة من الجنيات أو عرضت عليك ذلك؟
لا لا ، ولا أقبل، لأنهم من نار ونحن من تراب، والتعامل مع أنثي الجن صعب لأن لديها الغيرة وحب التملك والواحد بخاف على أولادو.
ذكرت من قبل أن علوم الجن تفوق العلوم البشرية بالفي عام ، إن كانوا يسبقوننا ، كيف تسيطر عليهم؟
هم مابسبقوني إطلاقاً وبالمر ، وأنا مستأمنهم تماماً، وبأمن شرهم لايؤذنني ولا أذيهم بشيءِ.
هل يمكن لإنسان أن يؤذي الجن؟
ليه ما ممكن، يمكن، فإذا كان مارد واشتكيتو للملك من مس سببه لك أو لشخص أو استحوذ علي امرأة وأصر بزواجه منها سيأمره ويخرج، وإن رفض يمكن أن تحرقه.
تقول بإنك شيخ، لكن لاول مرة نشوف شيخ بدون حيران؟
كان أن جاءني في منزلي الخليفة "عبدالرحيم البرعي" وقال لي : يا ابني والله طريقتك عجيبة جداً جداً ، قلت له: كيف؟ ، فقال : يا ابني ماعندك حيران، فرددت: أنا عندي مريدين ما عندي حيران، فقال لي ليه؟ ، قلت له : يا شيخنا دكاترة ومهندسين مريدين ومن كل أنواع الطيف بجوا يقعدوا ويتكدسوا على أساس إنو يتلوا الذكر، وربنا قال السماء لاتمطر ذهبًا ولافضة، الناس ديل عندهم نسوان وأطفال، عندهم أهل وأخوات محتاجات، فعشان كدا أنا ماعندي حيران وأي زول جاي عشان يتحور لا، إذا داير سر أو أوراد بدي ، داير أي مسألة بديهو عشان يستفيد لأنو ربنا قال "ما فرطنا في الكتاب من شيء" ، لكن ما يقعد، عندي مناسبة يجي، لكن لا أقبل يجي ويقعد معاي الدهر كلو وأهلو محتاجين ليهو، أنا ضد الحكاية دي.
هل هنالك مريدين من الجن؟
أجاب بدهشة وقال : الله كيف كتار شديد؛ ليردف : في أي موقع؛ واسترسل : أنا في بعض الأحيان عندما أذهب للصحراء وأخد لي إسبوع اسبوعين، ما بكون ضيف على بشر، إنما تعاملي كلو مع الجن، بمشي الجبال والغابات، جل أصدقائي من العالم التاني وأكثر من صداقتي مع البشر.
مسبقًا وصفك الشيخ "عبدالحي يوسف" بالدجال، وقال إن أجهزة الدولة بتتساهل معك، ماردك عليه؟
عبدالحي رجل عالم ومثقف، لكن أنا لساني رطب ما بقدر أشتمه إذا كان هو شتمني، أنا بس ما حصل كذبت في شيء فكل ماقلته تحقق، من سفرة نميري التي منعته منها ، وقلت له إذا سافرتا حتفقد كرسيك وحصل بالفعل، وقلت من قبل لكمال حسن بخيت حتحصل في الوطن العربي ثورات تطيح بأغلب الرؤساء والعالم العربي ماحيستقر وحصل، الكلام دا قلتو قبل 15 سنة وكلو حصل، ومؤخراً قلت بأن عمر البشير سوف يحكم 31 سنة، قالوا أانا دجال وحصل، فما حصل أنا تنبأت بشيء إلا وحدث لم يحدث عكسه مطلقاً، فليس لهم الحق أن يصفوني بالدجل، وحاج عبدالحي أكن له كل الخير وأقول ليهو زيد من الشتائم وهل من مزيد، فالبشر شتمو الرسول، وأنا لا شيء بالنسبة لمقام المصطفى، يشتموني ما يشتموني الجمل ماشي والكلب بنبح، أنا ماشغال بزول ولابشتم شخص.
إذن ما ردك على من يصفونك بالنفاق والشعوذة؟
أنا أي زول بقول إنو أنا دجال أ مشعوذ بقول ليهُ : الله يسامحك ، فإنا الحمدلله عيني مليانة منذ الصغر، ولما كبرت خيري فائض، فالحين القرية التي أسكن فيها القرية التي أسكن فيها بنيت مركز للشباب، ومشتري عمدان الكهرباء كلها التي باللعوتة نحو 178 عمودًا على نفقتي الخاصة، ومشتري 4 ترانس الواحد ثمنو 270 مليوناً والفواتير موجودة عندي دا كلو من أجل سوبا اللعوتة اللي أنا ساكن فيها، ومركز الشباب عملتو أنا والميدان بتاع الربيع بالخيرات الموجودة فيهو عملتها انا "الكور، الشبك" وغيرها عملتو أنا لانو بلد فقير، لذلك أنا جيت وسكنت فيهو.
ألا تجد أن حديثك ذلك يأتي بحثًا عن الظهور وبريق الشهرة والجاه؟
كلا، الظهور عشان شنو؟ وليه؟ ، وأنا أتحدى بالأوراق إن منحت قطعة أرض منحة أو هبة أو غيرها من الدولة أو من أحد، ولا حصل الدولة قالت لي "تعال هاك يابلة" أنا الآن لدي خرط لعمل مجمع إسلامي، قدمت لأجله 4 قطع سكنية لكنهم رفضوا يدوني ليها ناس التخطيط والأراضي، صراحة أنا ما محتاج ليهم بأي شيء، ففاقد الشئ لايعطيه، تعاملي مع الجن كتعامل الحكومات مع السفراء ، فيهم المسيحي والوثني واللا ديني، وأنا بتعامل مع كل العالم الثاني، وهم أصدقائي وحبايبي، كتعاملي مع البشر لأنو ما في ما يمنع، فقط إن كان يأمرك تحدث الحرمة ، لكن إذا كان لا يأمرك لا مانع إنك تتعامل معه عادي.
في الكورة ؛ ماذا ترى في مشاركة الهلال والمريخ على الصعيد الإفريقي والمحلي الآن ومستقبلاً، هل هنالك بوادر بطولة تتشكل في الأفق؟
أجاب قاطعاً : لا لا ما في بطولة ، لأنو عندهم طريقة خبيثة ما بتعجب، عيبهم بمشوا للمشايخ للأذية، فإنك تأذي دا غلط، فالمريخ ليه يأذي الهلال والعكس، دي رياضة وصى عليها جدك الرسول، فعشان دا بحصل الكورة في السودان ماعندها مستقبل، بس يلعبوا هنا لكن برة عشان يجيبوا حاجة للبلد ماشايفها، (مظلمة .. مظلمة).
برأيك ما الحل لنأتي بالبطولات؟
والله أنا شايف دا يرجع لعدم الوطنية، ياخ مافي حرارة قلب، غير كدا البدو للعيبة ما مكفيهم عشان كدا معنوياتهم مدمرة، بجانب عدم استطاعة الأندية يجيبوا مدرب كفء، دا كل البجيبوهم ناس ماكدا.
هل أتى إليك أحد من الناديين لعمل شيء؟
جو كتير لكن ما بعمل ولن أعمل ولا يمكن.
ولا من ناحية وطنية كدا؟
لو كان لي لعبة أجنبية معليش ، لكن هم بجوني لي اللعب المحلي.
هنالك تقارير قسمت السودان إلى عدة دول، هل سيتم ذلك؟
السودان ماحيتقسم، ودي دعاية نابعة من الطابور الخامس وأصحاب الأجندة، السودان ماحيتقسم نهائي، وكل تلك إشاعات، وهي مدعومة من الخارج؛ للأسف مؤيدينها ناس الأحزاب والمعارضة، فكما قالوا (الفوقو ريحة بتنشم) فلايمكن أن ندع ذلك يحدث، إحنا غير مستفيدين من السلطة في شيء، هل تعلم أنا عندي اتنين من أولادي الريح ومنتصر اتخرجوا بشهادات اقتصاد من جامعات برة كانت لديهم رغبة في الكلية الحربية "دايرين الديش"، حاولت اثنيه وقلت ليهم اشتغلوا في التجارة او امشوا برة، رفضوا وقالوا لا إلا الكلية الحربية، استجبت لرغبتهم ، شالوا شهاداتهم ومشوا يقدموا، قابلهم ضابط في المعاينات وشاف أوراقهم ، فقام قال ليهم إنتو أولاد "شيخ بلة"، قالوا نعم، فقال ليهم : "امشوا لما أبوكم يبقى اتحادي ديمقراطي أو حزب أمة تعالوا بعد كدا بنعينكم، بعد الكلام دا رجعوا؛ -تنهد- وأضاف : بالله شوف في بلدنا ودايرين نخدمها يجوا يدمروا الشباب كدا، أولادي قالوا لي : يا أبوي نحنا اقتنعنا بكلامك ومعنوياتنا انتهت.
لنرجع قليلاً، هل كل أبنائك درسوا بالخارج؟
أكبر أبنائي عالم بتاع ذرة من زوجتي الأولى الهولندية لم يرَ السودان قط، وعندي مهند خريج اقتصاد يعمل الآن المدير العام لمال الوليد بن طلال، كذلك الريح ومنتصر لديهم ماجستير في الاقتصاد من الخارج.
مازحته (ياشيخ عالم ذرة وهولندية) ، ووين وكيف تم ذلك؟
مرة مشيت مصر في التمانينات كدا في 10 رمضان أاول من وصلت الشيخ "محمد متولي الشعراوي" قال لي عندي ليك عروسة، قلت لي كيف، فقال لي في امرأة هولندية بتجي تحضر حلقات الذكر وتقرأ القرءان ، طلبت مني أن أزوجها من مسلم –القصة طويلة- المهم اتزوجتها وأنجبت لي "أحمد" ، لكن عندما أصبح عمره "11 شهراً" توفيت هي ومجموعة من بنات عمها بحادث في رحلة بعد ما انقلب بيهم البص 4 مرات من أحد الجبال ، بعديها خيلانو طلبوا مني ما أمشي بيهو السودان ، استجبت ولم أمانع في تركه، علموه وكان الأول في كل فصول الدراسة حتى عندما تخرج في الجامعة، حينها جو الأمريكان وأخذوه ضمن الطلاب النابغين والشاذين في دراستهم ، والحمدلله وما شاءالله الآن يعمل في مجال الذرة بأمريكا ، وممنوع يجي السودان.
هلا تلاقيه؟
كتير، لما يدورنا بنمشي لي في السعودية أو مصر لأنو ممنوع يجي السودان وهو يحرص على ذلك.
وليه ممنوع؟
بحسب حديثه لنا لأنو هو عالم ذرة وبتاع صواريخ وكدا.
ألم يدعوكم أو طلبتم منه الاستقرار بأمريكا أو هولندا؟
طلب مننا كتير، وبقول لي يا أبوي أصبر في حاجات برتب فيها، في أشياء كدا بين السياسة والنظرة الإسلامية، فقال لي: أنا ما داير أدخل إخواني في حتة ضيقة ويقولوا ديل إسلاميين أو أنا ميولي كدا.
من قبل قلت إن البشير سيحكم 31 سنة و25 يوماً ، هل رأيت من سيخلفه؟
كدي هسي خلي يتم السنة دي، ولو ربنا مد في الأام بعد داك بوريك البجي منو.
يعني انت عارف البديل؟
آي عارفو ، لكن ماداير أصرح الآن.
من الشعب أم الجيش أم المعارضة؟
دي خليها في وقتها إن شاء الله.
كانت لديك علاقة مميزة مع نميري ، كيف تبدو مع البشير؟
علاقتي مع نميري مازي مع البشير.
أيهما أحسن وأيهما اسوأ؟
للبلد مافي راجل خدمها زي البشير أصلاً، أما نميري عندو عربية بجي لحدي خشم الباب وبضرب لي البوري، واحد من الأولاد بجي بقول لي يا أبوي الرئيس برة، بمشي بلاقيهو وبقول لي : والله جيت اتفقدكم إنتو كيف كويسين وصحتكم كيف، دي في عمر البشير ما فيشة، وزي ماقلت ليك للبلد أحسن من البشير ما في.
هل حصل قابلت البشير على انفراد؟
لا لا أصلو ماحصل جاني أبدًا إطلاقًا بالمرة.
ألم تحاول له، أو لم يحاول أن يجدك؟
والله حاولت ، لأنو عندي حاجة داير أقولها ليهو لي خدمتو للبلد وبتنفعوا هو كرئيس لي قدام.
داير تقول ليهو شنو؟
ضحك ورد : عاد ياولدي أقولها ليك إنت رئيس ، دا كلام للرئيس.
يعني ذلك إنك رأيت ماسيحدث للمؤتمرجية لاحقًاً؟
ما أقدر اتكلم بعد كدا ، هم حزب والاتحادي الديمقراطي حزب والأمة حزب ، بعد دا أنا بعيد متفرج.
الترابي واجه نقداً حاداً في كثير من فتاويه لعل آخرها فتواه بإمامة المرأة ، برأيك ما يقوله الترابي ويفعله تتفق معه أم تنافيه؟
الترابي قالوا مفكر إسلامي ، والبعمل فيهو بعرفو براهو، ما في زول مسلم ومؤمن بالله يفتي ويقول إنو المرأة تئم الناس في مسجد أو في أي مناسبة كانت، الكلام دا كتير علي الأب الروحي ماحقو يقول كدا، فنحنا دائما نعتبره أب روحي لكل السودانيين ، فهذا كثير الشيء البقولو دا حقو مايتكرر تاني.
إن كان بإسداء نصيحة ماذا أنت قائل له وبشأنه؟
نصيحتي له ، حقو بعد كدا الشيخ الترابي يتنازل، خلاص الراجل عمرو 83 سنة ، يتنازل ليحافظ علي قيمته كأب روحي، فالسياسة مرضى، والترابي الذي اعلمه لايقبل ان يكون رقم 2 أو 3 ، يود الاول ودا الخاتي في راسو لكن الزمن عفى على الاحتكار والبلد فيها ناس، عليه أن يعترف بالتغيير وافعال الزمن الذي تغير، فالناس الآن سواسية وتنفر ممن يركب راسه، عليه أن يتنازل حتى لا يجد نفسه وحيدًا يسير ضد التيار.
بصيغة مباشرة ، هل كلامك ذلك يعني أن الترابي مازال يبحث عن السلطة وأغرته الدنيا وعظمة الجاه؟
لا لا ، الترابي ما داير دنيا ولم تغريه، إن كان يريدها كان زمان اكتفي ذاتيًا وارتاح ، لكن الترابي عندو هدف داير يصلو ويحققو لانو السياسة كما اسلفت بقت مجرى دمو وهسي كلامي بخصوص انو يتنازل ويكون أب روحي للحزب دا مابعجبو ومابقبل بيهو.
برايك هل سيكون له دور أو تأثير في مستقبل السودان القادم؟
إلا بأفكاره إن أخذ بها ، لكن كحاكم أو قائد لا ، على ما أظن.
وعلى عجالة ماذا سيحل بسوريا فيما بعد؟
رئيسهم ماشي ويشيلو شيلتهم.
ومصر؟
السيسي سيحكم فترة طويلة وعهده سيكون عهداً أحسن بكثير.
بقية الوطن العربي؟
أقول : (لاحول ولا قوة إلا بالله)
علي ذكر مصر هل سيعدم مرسي؟
ماظنيت أو بالأحرى ماحيعدم.
ودارفور ومشاكلها ماذا سيحل بها؟
أبناء دارفور سوف يرجعوا إلى رشدهم ، وحيسيبوا الاقتتال وحيجوا لبلدهم وحيجوا لبلدهم والعاصمة ، وحيتفقوا مع الحكومة وحيعمروا بلدهم ، وماحينفصلوا كما يقولون ويدعون ، والوقت حان ، خلال السنة دي حيتم ، والسنة الجاية ماداخلة سلام شامل.
بالرغم من إمكانياتك إلا أنك مازلت تقبع بسوبا ، ألم تفكر أن تسخر مقدراتك وتسكن أحد الأحياء الراقية؟
الحمدلله أنا أمتلك أكثر من 7 عمارات في العاصمة المثلثة ، منها بـ"الطائف ، الرياض ، العمارات ، مدينة النيل" ، لكنني ارتاح في السكن مع الغبش وهؤلاء المساكين ، وان كنت اسكن في الرياض او العمارات جاري مابعرفني.
ومن أين لك بكل ذلك؟
أنا رجل أحمدالله ، وأشكر فضله من سلالة ثرية أبًا عن جد ، من جدي الغائب والريح وأحمد ومحمد وعبدالعزيز ، فنحن أسرة ثرية تشهد بذلك القبيلة كلها ، مامحتاجين نتدهلس لزول او نمد يدنا لوزير ، واللبن الداخل العاصمة المثلثة كلو طالع من مزارعي ، فأنا احلب في اليوم مايقدر بـ 12.600 تُمنة حليب.
ألم يهبها لك نميري أو الإنقاذ؟
أتحدى أي رئيس يقول أداني حاجة، وللعلم قبل 3 أشهر جاتني عربية من السعودية ، حجزت بالمطار، ضرب لي أحد الأمراء من المملكة وقال لي : لمّ لم تستلم العربية ، قلت له : في الجمارك ، قام رسل زول من برة يخلصها ، أنا مخصوص أبيت أدفع للجمارك، عربية هدية قالوا لي أدفع 380 مليون ، شوف زي الكلام دا ماعيب ياخي.
ما سر النظارة السوداء التي ترتديها ليل نهار؟
النظارة دي أنا بشوف بيها آخر الدنيا وأحمدالله.
هل أخذ أحد من أبنائك الهبة والطريقة التي تمتلكها؟
أبداً ، وأولادي كلهم حفظة قرءان من عمر 8 سنوات واتخرجوا في الجامعات بأرفع الدرجات العلمية وليس بهم من يعمل بالحكومة ، سوى اثنين كانت لهم رغبة في الدخول للجيش ولكنهم اتصدموا صدمة شديدة حين تقدموا للالتحاق به.
الم تفكر توريثهم الحكاية؟
والله العندو رغبة بورثو ، اما الماعندو مابراودو براحتهم.
بلة ؛ ماذا رايت في قادمات الايام؟
اقول ليك كلام ناس المؤتمر الوطني انا بعد كدا مابتكلم ، لانو اتكلمت وقلت كتير وماجوني او عبروني عشان ياخدوا برايي وأسفهوني ، والبسفهك تبعد منو ، لذا انا شعرت بالحتة دي بأنو انا راجل غير مقدر لذلك انسحبت.
وماتبوح به لاول مرة؟
عمر البشير الزول دا خيرو كتير وامسكوا فيهو انتو الشباب ، لو فات الدم بصل الركب ، ومااقوله ليس رياء ، وانا ماصديقو ولابزورو ولابجي يزورني ، فقط تفسده البطانة والناس البقولو هم اقتصاديين وخبراء وفاهمين ، شهاداتهم دي حقو يموصوها ، وعمر البشير حقو بعد كدا يجيب مزارعين ورعاة يعينهم في مناصب يقدموا مايساعد الناس ، وانا ما اقوله هذا ليس رياء ، فقط لابراء الذمة ، فأنا مابعرف اكسر تلج والبقولو كدا ديل طابور خامس.
لو لم تكن "بلة الغائب" ماذا كنت تود أن تكون؟
رجل أوعظ في الناس بالخير من اجل المحافظة علي بلدنا وكينونتنا ، عشان مانبقي زي ناس سوريا والعراق واليمن ، نتماسك للنهضة ببلدنا ونعمرها.

التيار


تعليقات 78 | إهداء 2 | زيارات 20978

صفحة 1 من 212>
التعليقات
#1331823 [Rebel]
5.00/5 (3 صوت)

08-31-2015 04:39 PM
* سؤال بسيط و برىء: ( هل هناك فى "وسط الجن" من يعمل عمل "قوم لوط")؟؟
* إن كانت الإجابه "نعم", فالموضوع وضح!
* وإن كانت الإجابة بالنفى فعلي الجن العوض!: لا بد ان يكون "بله" قد ادخل "الفعله" عليهم و"بوظهم" نهائيا واحد واحد!!..
* فكروا فى كلامى ده..

[Rebel]

#1331789 [أبوالكجص]
0.00/5 (0 صوت)

08-31-2015 03:44 PM
إقتباس: الجن أنا بحبه شديد ويحبني بشدة

لكن يا كابتن بلل الجن مابحب ساكت وعشان يلبي الطلبات بعمل في المحبوب حاجات ماكويسة. بس أوعه يكون بتتجلع قدام الناس زي واحداً زي حالتك دي شفتو بي عيوني ديل (ماجابوهو لي) لإنو الجان لما تجيهو الحالة بكابس فيأي وقت وبدون إنذار.

[أبوالكجص]

#1331644 [55555]
5.00/5 (1 صوت)

08-31-2015 12:17 PM
هذا زمانك يا مهازل فامرحي

[55555]

#1331601 [عتمني]
5.00/5 (1 صوت)

08-31-2015 11:24 AM
يا شيخ بله ان عايز منك مالم يطلبه احد من قبلى عايز قطعة ارض فى الخرطوم لابنائى ومستقبلهم وهى امنية عجزت عن تحقيقها فهل يمكن ان تتحقق على يدك؟

[عتمني]

ردود على عتمني
[Rebel] 08-31-2015 07:11 PM
* بله الغايب بقول ليك ده طلب بسيط يا "عتمنى"!!...بس انت تجيب معاك 500 مليون جنيه(قديم) كمقدم "بياض و زواره" عشان الجن إنزل و كده..و قطعتك 300 متر جاهزه فى امبده..و لو عايز قطعه مميزه تجيب معاك 250 مليون زياده!
* و كان عاوز قطعه درجه اولى فى حى راقى, قال "الجن" بقول ليك ده كلام طويل و فيه مال كثير و "نكاح" و كده يا "عتمنى"!
*و شخصيا انا شايف احسن ليك امبده!, و ابعد نفسك من موضوع "نكاح الجن" ده, خاصة انت شايف و عارف الحاله البقى فيها الراجل "المغيب" ده..إلآ كان تكون عاجباك حالته دى!!
* بله "راكبه!" جن يا عتمنى يا اخوى, اوع ابعد!!


#1331590 [سوداني حر]
5.00/5 (1 صوت)

08-31-2015 11:12 AM
اين من حكمو على محمود محمد طه بالاعدام وهم يرون ويقرؤن ما يقوله هذا الدجال للاسف الصحافة تنشر الجهل بين الناس وتنشر الفكر الفاسد حتى يسيطروا على ما هم سيطروا عليه وهم يعاونون اهل الحكم في فسادهم وضلالهم وغيهم ، ونسال الله أن يحمي شعبنا واهلنا من زمرة المفسدين واين علماء السلطان وهيئة علماء السودان من مثل هذه الأقوال والافعال التي يقوم بها هذا الغائب

[سوداني حر]

#1331500 [زول خارج بلدي]
5.00/5 (1 صوت)

08-31-2015 09:38 AM
هذا الانسان غائب عن صوابه فعلا، أول مرة أٍسمع واحد يقول الجن أنا بحبه وبحبني حدا÷ حباه برص . أليس الجن هو الشيطان الذي يستعاذ منه . اعود بالله من الشيطان الرجيم - فعلا هناك شواطين أنس وجن - الله يهديك

[زول خارج بلدي]

#1331402 [محمد المبارك]
5.00/5 (2 صوت)

08-31-2015 08:06 AM
أما آن الأوان لضرب عنق هذا الماجن الكاذب ، أين أنتم ياعلماء السودان الجبناء ،،،،،، سبحان الله قالوا السودان فيه علماء دين أمثال عبدالحي يوسف وغيره آآآه.

[محمد المبارك]

ردود على محمد المبارك
[Rebel] 08-31-2015 04:02 PM
يا اخى, ده زمن حكم الماسونيين المتاسلمين تجار دين العملاء والخونه المجرمين..ناس الترابى و على عثمان والحبر والعتبانى و كمال رزق و كمال عمر وعصام البشير و عبد الرحيم عمر و حسبو نسوان..والقائمه تطول و تطول!..ديل فرخوا و مكنوا للإرهابيين من جهاديين و تكفيريين و طالبانيين و دواعش و "بيت مقدس" و "شيعه" و "انصار سنه" و "انصار إسلام", و القائمه تطول!
* و "بله الغائب" و "علماء السودان" و غيرهم من المنافقين و الارزقيه و الدجالين و المشعوزين و "عبدة الجن" و "عبدة المال" و الفاسدين و الفاسقين و اللصوص, ما هم إلآ مظاهر صاحبت حكم الاسلامويين, بالضروره!!
* يا راجل, الرجل يقول انه يمتلك اكثر من 7 عمارات فى احياء مميزه!!..و يمد العاصمه ب 12600 تمنة حليب يوميا..ما يساوى 3مليون و 780 الف رطل(إذا إعتبرنا التمنه 300رطل فقط!)..ما يساوى 11 مليار 340 مليون جنيه قديم يوميا(على اساس 3 جنيه للرطل كسعر بيع بالإجمالى)..و يبنى المراكز و الميادين!!
* و كل ذلك لأن الرجل من اسره غنيه, قد تكون اغنى من ناس الشيخ مصطفى الامين و عبدالمنعم محمد و فتح الرحمن البشير و داوود عبداللطيف و غيرهم كثر بعضهم افلس بسبب "الإنقاذ"..بل و يتحدى الجميع انه نظيف و عفيف, و لا يتلقى إلآ الهدايا من العظاء و الامراء..و نميرى يزوره فى البيت, لكنه يعتب على البشكير لعدم معاودته و اخذ رأيه..إلى اخر خزعبلات الدجالين و المشعوزين!!
* اظن ان هذا الفاسق المشوطن الدجال, لا يدرى من شدة "تغييبه او غيابه!", ان "اللعوته" التى يقطنها, بناسها(وهو احدهم!)و ارضها و مائها و كلئها, لو عرضت للبيع فلن يساوى العائد منها "ريع" شهر واحد من الذى تجود به "ابقاره"!!!
* هذا رجل دجال و منافق يا اخى..جاهل ولا يفقه فى كتاب الله شيئا! مثله مثل "علماء السودان", لا فرق!
قال تعالى فى "سورة الحج" : "و من الناس من يجادل فى الله بغير علم و يتبع كل شيطان مريد* كتب عليه انه من تولاه فأنه يضله و يهديه الى عذاب السعير"..صدق الله العظيم.


#1331250 [عبدالواحد المستغرب اشد الإستغراب!!]
0.00/5 (0 صوت)

08-30-2015 10:29 PM
كده وضحت الرؤيه أدوار قسمت على الصحف لاجراء لقاءات مع اشخاص بعينهم (عوصام احمد البشير،آمين حسن عمر،وبله الغائب) وغدا من سيكون عليه الدور الله اعلم والهدف واضح أسئله موضوعه بعناية بهدف تحقيق غايات واضحه وصاحب العقل يميز إذا مازال داخل النافوخ عقل!!
جنوب وزارة الخارجيه مبنى قديم يطل على شارع الجامعه المبنى يعلوه لافته مكتوب عليها (مين كده العارف بالله)وانا آسف لعدم تذكرى إسم العارف بالله قاطن ذلك المبنى العتيق ولا اعلم إن كان على قيد الحياة أم توفاه الله وإن كنت على يقين بأن المبتى لم يشغل إلا في وقت قريب وانا خرطومى ولم تقع عينى على اى لافته بهذا العنوان من قبل كما أن مثل هذه المباني تاريخيا لم يشغلها أمثال بله الغائب وبالكاد كانوا يعملون فيها كخدم او خفراء وارجو من اخوتى القراء الذين لهم درايه بهذا المبنى أن يمدونا بأية معلومات !!.

[عبدالواحد المستغرب اشد الإستغراب!!]

#1331210 [الفلكى]
5.00/5 (3 صوت)

08-30-2015 09:08 PM
غايتو يا أبو البل مضيع مهاراتك وامكانياتك دى ساكت في السودان, هسع ولدك العالم بتاع ناسا ده لو شغلك مع علماء الفضاء الامريكان ديل مش كان قدروا يغزوا الفضاء والكواكب من زمان وانت اشتهرت وبقيت ملياردير, ده مجرد اقتراح حقو تفكر فيهو لانو مقدراتك الغير عادية دى أكبر من البلد التعبانة دى.

[الفلكى]

ردود على الفلكى
[Rebel] 08-31-2015 08:01 PM
* يا راجل! جن بله يوزن دهب فى السودان و لبنان و مصر!..ده بوصل و بوزع "الصنف الامريكى" الجيد طرف الولد بتاع "الذره" و من كولومبيا ذاتها, مش لعب بتاع شاشيمنا حبشيه و كده..تقول ليه ناساو علماء الفضاء!!و انت ما شايف نضارته الزى حقت بكرى دى!, و لا ما سمعته بقول بشوف ما وراء البحار من شدة الخيال الواسع!!..ده عنده اكثر من 7 عمارات فى ارقى الاحياء..و بورد للعاصمه 12600 تمنه حليب يوميا, يعنى 3 مليون و 780 الف من الحليب, يعنى 11 مليار و 340 مليون جنيه قديم يوميا..ده ما سائل فى البشير كان عايزه اجيه فى البيت..
* ده راجل واااثق من نفسه بشكل يا قدع!!..ده راجل "ركبه" جن من زمان زمن نميرى..هو يحبه و الجن بحبه!!..حباهم برص!


#1331124 [محب الله]
0.00/5 (0 صوت)

08-30-2015 06:06 PM
رد على :::[ساتي ودعيسى]
لك من التعاسة في حروف اسمك نصيب ...فرايت اجتماع السينات والعين عليك من كل جانب ما احسبك إلا تعيسا من تعساء هذا البلد التعيس

[محب الله]

#1331104 [ابن الشذاذ الأفاق]
5.00/5 (2 صوت)

08-30-2015 05:38 PM
صدق الله العظيم (فَلَمَّا خَرَّ تَبَيَّنَتِ الْجِنُّ أَن لَّوْ كَانُوا يَعْلَمُونَ الْغَيْبَ مَا لَبِثُوا فِي الْعَذَابِ الْمُهِينِ).. الآية
متى نفوق يا شعب لازال يؤمن من أوله لآخره بالدجالين، على المستوى الشعبي البسيط
فلان سحروه وعرس تانية
وفلانة سحروها وطلقوها
وفلان سحروا ورموه في البير
وفلانة سحروها ومشت لورا
يا ناس اعقلوا حتى تأتي البركات والنفحات لا المصائب والسخط والعقوبات
له حق بلة فهو يعرف كيف يضحك على الشعب

[ابن الشذاذ الأفاق]

#1331083 [عمود النص]
5.00/5 (2 صوت)

08-30-2015 04:56 PM
إسمه بلة الغائب في إسته

[عمود النص]

#1331003 [أم كرتبو]
5.00/5 (2 صوت)

08-30-2015 03:04 PM
الجن اليركبك يا بلة الغائب المغيب. ..متخلف. ..تف وووووووووووووو عليك وعلى وشك ي ضلالي

[أم كرتبو]

#1330978 [سند]
5.00/5 (2 صوت)

08-30-2015 02:30 PM
الزمان زمانك

[سند]

ردود على سند
[مراقب] 08-30-2015 03:41 PM
و الغريبة واثق من نفسه و ردوده قاطعة.


#1330946 [كوكو تورو]
5.00/5 (1 صوت)

08-30-2015 01:44 PM
رجاء للصحفى الذى أجرى هذه المفابله الفارغه. اذا كنت تنشد الشهرة فأكتب مواضيع مفيده

[كوكو تورو]

ردود على كوكو تورو
[مراقب] 08-30-2015 03:44 PM
حدثني شقيقي الأكبر و كان يعمل في وزارة الخارجية في الثمانينات أن زميلآ له كان يعاني من وجع ضهر حاد.قال أن هذا الزميل خرج من الوزارة في مكانها القديم في السوق الفرنجي. و لدي خروجه قابله بلة الغايب هذا.سأله عن سبب تعثره في المشي, فروي له ما يعانيه.طلب منه بلة الغايب أن يزوره في سوبا يوم الجمعة. ذهب هذا الرجل غلي هناك ووجد الناس منتظرين بالصفوف.قال أن الراجل عالجه من وجع الضهر و قال ليهو أنا ما عندي جان و لا بستعين بيعم.
حكاية غريبة.


#1330912 [hulfa]
0.00/5 (0 صوت)

08-30-2015 01:07 PM
صحافة وصحافيين ما عندهم شغلة ومارقين للفارغة يا اخي البلد تمر باحرج منعطف واسوا مرحلة على مر تاريخ السودان الحديث والقديم وتقول لي بلا الغائب دا راجل دجال ومشعوذ وعقوبتو الاعدام بحد السيف خليهو لو مخاوي الجن وبنفذوا ليهو كل اوامروا وبحبوهو زي قال يبقى راجل ويقظع البحر الاحمر دا ويقول متل شعوزتو وكلامو الفارغ دا عشان القى روحو معلق مصلوب من غير راس عظة لمن يتعظ برا بلا براوسخ... شكلو كدا بدفع ليكم بالدولار عشان تعملو ليهو الدعايات الفارغة دي ...

[hulfa]

#1330901 [Floors]
5.00/5 (2 صوت)

08-30-2015 12:57 PM
لانستغرب هذا هو حال السودان في زمن إخوان الشيطان لعنة الله عليهم دجل وشعوذة وفساد في الأرض وفي الأخلاق ونهب ثروات البلاد وتطفيش الشباب ليحظوا هم فقط بخيرات البلاد وقد كان إن السماء لاتمطر ذهباً ولافضة خليكم نايمين كده على طول ياكسالى !!!!!!!!!!!!

[Floors]

#1330883 [موجوع]
5.00/5 (6 صوت)

08-30-2015 12:09 PM
ربنا بقول هو الوحيد البعلم الغيب ..تجي إنت تدعي علمك الغيب برضو ..الله يهديك ي زول وبطل شغلتك النية دي..

[موجوع]

ردود على موجوع
[Rebel] 08-31-2015 05:04 PM
* يا اخى, بله عارف نفسه دجال و مشعوذ, حتى لو ما اقر بذلك!!و هو متاكد ما فى زول بحاسبه فى زمن "الدجل الشامل" هذا!!..دى الحقيقه!..يعنى عند ضهر قوى بستند عليه..و شغله "نجيض" ما "ني!" يا اخى: 7 عمارات فى ارقى الاحياء..12600 تمنه يوميا, حوالى 11 مليار جنيه يوميا..النميرى كان بزوره..و هسه زعلان من البشكير لأنه ما بزوره و ما بياخد بى رايه..الراجل بيتحدى شرق غرب, تقول عليه "نى"!!
* هل يعرف الجن "القواده"!!إن كان كذلك, فرأى ان الرجل "قواد" للجن وسط "قوم لوط"..و الله اعلم!


#1330870 [سامي]
5.00/5 (3 صوت)

08-30-2015 11:50 AM
شئ عجيب حيرتنا وكمان شيخ وعندك عمارات

[سامي]

#1330868 [مدحت عروة]
5.00/5 (3 صوت)

08-30-2015 11:48 AM
يا جماعة الزول ده ما هين!!!
بس انا داير اعرف منه هل سيحتفظ برشلونة بكاس ابطال الاندية الاوروبية ولا ح يطير منه!!!!
كسرة:انتو قطر يورتسودان بيقوم الساعة كم؟؟؟؟

[مدحت عروة]

#1330802 [Wad Darfur]
5.00/5 (6 صوت)

08-30-2015 10:03 AM
البلد المافيها تمساح يقدل فيها الورل
واللوم علينا نحنا البنقرا فارغات زى دى.

[Wad Darfur]

#1330786 [abusami]
5.00/5 (5 صوت)

08-30-2015 09:46 AM
يا دجال يا حرامي يا كذاب يا ملعون انتة اهبل وجاهل والصحافي اجهل منك لانو شغال بواحد فارغ السودان عايز نظافة من الدجل الطرق الصوفية الاسلاميين وعائلة البشير ونسايبة .

[abusami]

#1330782 [K. Amear]
5.00/5 (5 صوت)

08-30-2015 09:37 AM
من حارب مع الرسول الملائكه وليس الجن ونهانا ديننا الحنيف التعامل مع الجن... انه عدو مبين والجن من انزل ادم من الجنه وتعهد باغوائه.. محبه بله مع الجن شرحها لي يوسف الرمالي من ابناء مدني الدباغه (الكنيف يابله) كما افادني المرحوم عمده ايدذ كيف انه اغراه بالمال ليصرح بان بله شفاه من الايدذ والذي مات متاثرا به.. كما خكي لي عن السراج الذى استضافه في التلفاذ القومي ومنها اختفي السراج.. كفي سخفا يا اعلام اخر الزمن... .

[K. Amear]

#1330773 [علاء ابو الخير]
4.00/5 (3 صوت)

08-30-2015 09:23 AM
ارى العكس تماما، حيث ان 100 فى 100 من التعليقات كانت ضد هذا الافاك الكاذب المشعوذ، اذا سودانى ما زال بخير والحمدلله

[علاء ابو الخير]

ردود على علاء ابو الخير
[علاء ابو الخير] 08-31-2015 10:12 AM
اخى محب الله كتر خيرك على الرد
اذا انه امر مخيف جدا
نسأل الله السلامة

[محب الله] 08-30-2015 04:38 PM
للاسف كلهم خارج الديار ... اذا كان في تعليقات من داخل السودان صدقني سوف تصدددددددم شئ لا يصدق


#1330746 [اليوم الآخير]
4.97/5 (8 صوت)

08-30-2015 08:34 AM
يا عمي طالما إنت في بلد زي السودان قول أي حاجة ، المغفلين الكتار الذين صدقوا المهدي ممكن يصدقوك براحة ،،
قال يحرق الجن ، طيب هو من نار تحرقو كيف يا منافق

[اليوم الآخير]

ردود على اليوم الآخير
[مراقب] 08-30-2015 03:33 PM
إختلف معك في حكاية حرق الجن دي.
نعم القرآن يحرق الجن. و من الصور التي تؤذي الجن الكافر,سورة الصافات و سورة الطارق.
نصحني شيخ جليل أن اقرأ صورة الصافات ثمانية مرات عقب كل صلاة,ففعلت و بعد أيام زال عني ما كنت أعاني منه من مشاكل نفسية و آلام.كنت أشوف دبيب بني منقرط يجري أمامي و أنا نائم. و أحياناً أشوف نفسي و كأني واقع من أعلي في حفرة فاصحو مذعوراً. هذا و غيره من المشاكل التي سبهها العين و الحسد, حمانا اللله و غياكم.
انصحكم إخوتي بقراءة القرآن.صدق تعالي في محكم تنزيله إذ قال ( و ننزل من القرآن ما هو شفاء و رحمة) و قال تعالي ( فيه شفاء للناس).


#1330742 [راستا]
5.00/5 (1 صوت)

08-30-2015 08:28 AM
أغَايَةُ الدّينِ أنْ تُحْفُوا شَوَارِبَكم يا أُمّةً ضَحكَتْ مِن جَهلِها الأُمَمُ

[راستا]

#1330741 [الجمصي]
4.75/5 (3 صوت)

08-30-2015 08:26 AM
ما قلت لينا رايك في الدهب بتاع الشركة الروسية هل هو حقيقة ولا نجر أخدر من الحيكومة وابواقها؟؟؟

[الجمصي]

#1330740 [:::بيكو:::]
4.99/5 (9 صوت)

08-30-2015 08:21 AM
وقال الحاضر الغائب بله (دي رياضة وصى عليها جدك الرسول)

معقولة بس؟

وذكر متفرد زمانه (لو كان لي لعبة أجنبية معليش ، لكن هم بجوني لي اللعب المحلي)

المحلي في عطبرة ههههههههههه

وقال البله لافض فيه:(عبدالحي رجل عالم ومثقف، لكن أنا لساني رطب ما بقدر أشتمه) وإستدرك قائلاَ (يشتموني ما يشتموني الجمل ماشي والكلب بنبح)

فعلا إنت جمل

كما أشار البله الى (الحمدلله أنا أمتلك أكثر من 7 عمارات في العاصمة المثلثة ، منها بـ"الطائف ، الرياض ، العمارات ، مدينة النيل")وبنات طيبات طيبة وكل كِليمة معاها ضِحيكة..وقالن لي إت ياتك ومن يات سادة وإستايلك ذاتو خرق للعادة ههههههههههههه

#نقيع_قعونج_لا_أكثر ولا أقل!

[:::بيكو:::]

#1330739 [محب الله]
4.75/5 (3 صوت)

08-30-2015 08:21 AM
يحشر المرء مع من احب ... هذا الدجال لو كان في بلدان فيها قوانين لتم محاكمته .. هذا الجاهل ما وصل الى ما وصل اليه إلا بعد من اشخاص نافذين في السلطة ... ولكن من دعمه فهو جاهل ومن صدقه فهو جاهل ... ومن تقرب منه فهو جاهل ... ومن اكله وشاربه فهو جاهل 0. ومن حاوره فهو جاهل ومن افسح له مجال في الصحافة فهو جاهل ... انه بله الجاهل الذي يحب الجن ويكره دين الله ... ما اجهل هذه الامة 0. انه السودان بلد العجائب والموبقات والفواحشس ما ظهر منها وما بطن وبلد الدجل والشعوذة والقباب .. والفوضى الخلاقة انه بلد تعيس ومن يسكنه فهو تعيس الا من رحم الله ...

[محب الله]

ردود على محب الله
[ساتي ودعيسى] 08-30-2015 03:20 PM
انت من يا تعيس وكلك تعاسة ....


#1330732 [موجوع على الوطن]
4.75/5 (3 صوت)

08-30-2015 08:11 AM
قال الله سبحانه و تعالى في سورة الأنعام :

{وَعِندَهُ مَفَاتِحُ الْغَيْبِ لاَ يَعْلَمُهَا إِلاَّ هُوَ وَيَعْلَمُ مَا فِي الْبَرِّ وَالْبَحْرِ وَمَا تَسْقُطُ مِن وَرَقَةٍ إِلاَّ يَعْلَمُهَا وَلاَ حَبَّةٍ فِي ظُلُمَاتِ الأَرْضِ وَلاَ رَطْبٍ وَلاَ يَابِسٍ إِلاَّ فِي كِتَابٍ مُّبِينٍ }الأنعام59 .

[موجوع على الوطن]

#1330718 [أبو عكـــــاز]
4.88/5 (7 صوت)

08-30-2015 08:00 AM
بلة أديني سـفّة .

[أبو عكـــــاز]

ردود على أبو عكـــــاز
[Rebel] 08-31-2015 08:41 PM
* بلبل ما بسف تمباك يااخى, خليك واعى!!..التمباك ده حق المساكين شذاذ الآفاق!..بلبل راجل ثرى جدا..و دجال متحضر لآبعد الحدود, مش زى ناس الترابى و عبدالحى و الحبر و عصام البشير و حسبو نسوان و غيرهم من الدجالين "القدماء" بتاعين حسن البنا, الذين لا يستمتعون بأموالهم سوى فى النساء و الطعام!!..بلبل من فئة الدجالين المتحضرين "أصحاب الخيال الواسع" يا اخى..يتزوج هولنديه او هنديه او حتى جنيه!..و يضع على عينيه ارقى النظارات "الشمسيه" ليل نهار! لزوم ما يلزم!!..و يأتيه الجن باجود "الأصناف امريكيه الصنع" من خامات وارد المكسيك و كولومبيا, مش شاشيمنا و كده.. تأتيه مباشره من الولد بتاع الذره!..
*إنت تقول "سفه"!!

[البطل النميري] 08-30-2015 02:09 PM
والله ضحكتنا لما السفة وقعت من خشمي ... والله أجمل تعليق


#1330710 [سودانى]
4.75/5 (3 صوت)

08-30-2015 07:54 AM
المشكلة ما بلة الغائب المشكلة فى من يفردوا له مساحات واسعة فى وسائل الاعلام لتجهيل الشعب

[سودانى]

#1330706 [المتغرب الأبدي]
4.50/5 (2 صوت)

08-30-2015 07:50 AM
والله حرام عليكم إجراء حوارات كهذه مع دجال ومشعوذ مفروض يقام عليه الحد دون استتابة ..
أين الرقابة القبلية من هذه الحوارات ؟؟ لماذا يسمح لهذه الصحف نشر هذه الخطرفات ونحن في دولة الشريعة والكتاب والسنة كما يقال لنا ؟؟

[المتغرب الأبدي]

#1330690 [مختار اسماعيل]
4.75/5 (3 صوت)

08-30-2015 07:27 AM
مفروض يطبق عليه قانون "من اين لك هذا" وخلى الجن يرجعن ليك

[مختار اسماعيل]

#1330685 [الوطن العزيز]
5.00/5 (1 صوت)

08-30-2015 07:20 AM
اها عرفنا الغناء الهابط كمان طلعت لينا صحافة هابطة ( وصحفي هابط)...

[الوطن العزيز]

ردود على الوطن العزيز
[محب الله] 08-30-2015 09:51 AM
صدقت ورب الكعبة كل يوم يطلع لينا صحفي لا يفقه في الصحافة شئ يوم عن مايستوماويوم مع بله الجاهل واخر شبارقة مع جاهلة الحزب الاتحادي بتاعت سيدها ابو 181 يوم ..وصحافة ساذجة .. تماما مثل الاعاني الساذجة واغاني واغاني بلد جيعاتة بتغني الله لا يكسبكم


#1330669 [bluenile]
5.00/5 (3 صوت)

08-30-2015 06:20 AM
اشهد ان لا اله الا الله له ملك السموات والارض وهو على كل شى قدير يسبح له مافى السموات الارض
اذ ا اراد شى فيقول كن فيكون
كذ ب المنجمون ولو صدق
من توكل على الله فالله حسبه

[bluenile]

#1330638 [عودة ديجانقو]
4.75/5 (3 صوت)

08-30-2015 03:11 AM
أكرر تعليقى هذا كلما ظهر هذا الدجال الغائب.
نبى الله سليمان كان له 3 دعوات ربنا سبحانه وتعالى إستجاب له فى أثنين وواحده من هاتين الأثنين أن يأتيه ملكا لا ينبغى لأحد من بعده.

أحد الصحابه الكرام سأل الرسول صلى الله عليه وسلم هل رأيت الجن يارسول الله..رد عليه الرسول لولا دعوة أخينا سليمان لأمسكت به وعلقته.
ولذلك أنا اكتفيت بقراءة العنوان لأكتب هذا التعليق.

فهمت يا بلبل

[عودة ديجانقو]

#1330627 [عمار]
4.75/5 (6 صوت)

08-30-2015 02:39 AM
شيخ بله رقمك كم او أقدر الاقيك كيف ؟ انا محتاج اهاجر أمريكا لوتري وكده ، ممكن تتوسط ليا عند أوباما لو سمحت ؟

مع كل الود والتقدير

[عمار]

#1330623 [النور]
5.00/5 (3 صوت)

08-30-2015 02:22 AM
يعنى معنى الكلام ده كل من يشكر البشير له حصانة ومطلق الحرية يجدف ويهرطق ويزندق يلغوث زى ما عاوز.

[النور]

#1330617 [الصادق]
4.50/5 (2 صوت)

08-30-2015 01:39 AM
السلام عليكم ورحمة الله وبركاته. اتقو الله ايها الصحفيون مابالكم بين لحظه واخري نجد حوار مع بله الغايب مما يعد تسويق لشركه وضلاله وافتراءه علي الله بعلم الغيب اخوتي اتبعوا هدي المصطفي عليه افضل الصلاه والتسليم ونهيه عن اتيان الكهنه والعرافيين .فمن اتي كاهنا اوعرافا فصدقه فقد كفر بما انزل علي محمد وفي روايه فاذا لم بصدقه لن تقبل صلاته اربعون يوما والله اعلم .ارجو التصحيح في الحديث لو ماصحيح.والغايب هذا لو في بلد شريعه كان اعدم ولكن هو مستشار حكومتنا والله المستعان

[الصادق]

#1330608 [Albardan Saqat Laqat]
4.50/5 (3 صوت)

08-30-2015 01:05 AM
يا اخوانا في علاقة بين بله الغائب وبكري حسن صالح؟ انا شايف شبه شديد في الصورة نفس الملامح والشبه ونفس عوارة بكور في الرد على الاسئلة!!!

[Albardan Saqat Laqat]

#1330601 [جورج كلوني]
5.00/5 (1 صوت)

08-30-2015 12:23 AM
والله انحطاط فايت الحد سقطت في نظري يا عثمان ميرغني البتنشر تفاهات زي دي كلها كذب واحتيال. فمثل هذا الدجال مكانه السجن ومثل هذا الصحفي مكانه محو الامية على ان يشوف ليه شغلة بعدها تناسب ذهنه. ولكن هذا هو حالنا اليوم وهذا فهم ولاة الامر والعياذ بالله كما يقول اخونا شبونة. و نسأل الله الصبر الى أن تفرج

[جورج كلوني]

ردود على جورج كلوني
[مراقب] 08-30-2015 03:39 PM
و عنقريب الجنازة طار و قد القبة و دخل بي ورا عشان المرحوم الفكي ما يخش القبة بي فوق أبوهو الرقد في القبة قبلو.
عندنا قبة في دنقلا العجوز مقدودة من ورا و أهلنا الكبار قالوا لينا الكلام دة حصل قبل عشرات السنين.
يعني نصدقهم و لا لا؟
كلما أمشي جنب القبب في دنقلا العجوز تتملكني هذه الروح الصوفية و الدروشة و العاطفة ,فاصدق هذه المقولات.
ورونا السبب يرحمكم الله.

[السماك] 08-30-2015 12:47 PM
طيب يا جورج كلوني، إنت كنت تتوقع شنو من شخص كان كوز يعني: الجهل النشط .. ده النموذج الحي لتفكير الكيزان .. وأظنك بكده عرفت ليه بلدنا إتقسنت لدولتين .. وليه بنقول ده شعب ميئوس منو وما في أمل مادام من بين مثقفيهم من يحتفي بالدجالين من أمثال بلى الغايب ..

وبعدين أيه الغريب .. السودانيين ديل بيعبدوا الدجالين والمحتالين من شيوخ الصوفية منذ أن نشأ هذا المجتمع في فترة السلطنة الزرقاء في كنف الخلاوي والتقابات .. حيث رضع مقولات من أمثال طيران الشيخ فوق المصلاية .. النبي أذن لي في الحضرة أتزوج سبعه .. الشيخ قطع البحر بكرعيهو ألخ ألخ ألخ !!!

يا له من شعب .. خصوصاً شعب وسط السودان ..


#1330597 [ابو ألنجا]
4.94/5 (6 صوت)

08-30-2015 12:10 AM
نفسي اجيب ليك فيزا تشتغل في السعودية ،،،،،،،،،

[ابو ألنجا]

ردود على ابو ألنجا
European Union [ود الحاجة] 08-30-2015 11:13 AM
قطع رقاب يا أبو النجا


#1330584 [أبو اروى]
4.00/5 (6 صوت)

08-29-2015 11:34 PM
أنت في نار جهنم لشركك بالله فدع عنك جهلك وتب إليه سبحانه

[أبو اروى]

#1330579 [محمد الفاتح]
5.00/5 (3 صوت)

08-29-2015 11:27 PM
تحذير للكل قال الرسول صلي الله عليه وسلم : ( من أتي عرافا فصدقه فقد كفر بما أنزل علي محمد )

[محمد الفاتح]

#1330565 [الحق ابلج]
4.50/5 (4 صوت)

08-29-2015 10:54 PM
وانه كان اناس من اﻷنس يعوذون بأناس من الجن فزادوهم رهقا.
هذا هو مقامك يا بله الغايب لن تتجاوزه الى ان تموت على سؤ الخاتمه .
وستظل هكذا تائها بائسا ومتسوﻻ ومروجا للسحر من حاكم الى آخر .

[الحق ابلج]

#1330553 [عصمتووف]
4.50/5 (2 صوت)

08-29-2015 10:32 PM
لم اقر

الله يقطع الصحف وسنين الصحف والصحفيين
تفوووووو ده مستوي

[عصمتووف]

#1330544 [المقداد بابكر]
4.50/5 (5 صوت)

08-29-2015 10:19 PM
عن أبي هريرة رضي الله عنه قال: قال رسول الله صلى الله عليه وسلم: ((سيأتي على الناس سنوات خدّعات، يُصَدق فيها الكاذب ويُكذَّب فيها الصادق، ويُؤتمن فيها الخائن ويُخوَّن فيها الأمين، وينطق فيها الرويبضة))، قيل وما الرويبضة يا رسول الله ؟ .. قال: "الرجل التافه يتكلم في أمر العامة"

[المقداد بابكر]

#1330538 [mmmmmmmmm]
5.00/5 (2 صوت)

08-29-2015 10:15 PM
سبحان الله (لايعلم الغيب الا الله )

[mmmmmmmmm]

ردود على mmmmmmmmm
European Union [البطل النميري] 08-30-2015 02:15 PM
ولو كنت أعلم الغيب لاستكثرت من الخير وما ... صدق الله العظيم .. هذه سنة الأنبياء والرسل .. ويأتي بله الغايب ويقول بعلم الغيب .. أي أنه فوق الرسل والأنبياء سبحانه الله .. مثل هذا يفترض يستتاب وإلا فضربب الرقاب .. لكن بلدنا منكوبة ومصيبتها في مثل هؤلاء قبل أولئك .. وقد كتبنا كثيراً عن تأخّير السودان .. وسوف لن ولن ولن يصير سودان ما لم تنتهي الخرافات هذه..


#1330529 [الحق ابلج]
4.50/5 (3 صوت)

08-29-2015 09:54 PM
وانه كان اناس من اﻷنس يعوذون بأناس من الجن فزادوهم رهقا.
ستظل هكذا متسوﻻ بائسا يا بله الغايب .

[الحق ابلج]

#1330528 [الدرب الطويل]
4.75/5 (5 صوت)

08-29-2015 09:51 PM
هههههه.. اتذكرت كوميديا جمال حسن سعيد (عوض ديون) الاتدين من الشيطان قروش وابى يرجعها ليهو.. وفي حلقة تانية (عوض حريق) لعب كوشتينة وجر الشيطان خمسين وشال الدهب..

قال لو ناس الكورة جوهو للبطولات الخارجية ممكن يظبط ليهم امورهم.. طيب الفايدة شنو ما كلو غش في غش يا انطون زمانك..

البشكير افضل رئيس بعد الحاصل ده كلو؟.. طيب لو كان اسوأ رئيس كان عمل شنو؟؟..

بالله الشعراوي قال ليك عندي ليك عروس هولندية؟.. ههههههههه..
الولد عالم ذرة وممنوع يجي السودان؟؟.. ليه؟ يا ربي حيصنع قنبلة نووية في اليرموك خلال اجازتو؟..

لا والنظارات السوداء بيشوف بيها آخر الدنيا!!!!..

يا جماعة الناس البتعرف بلة الغايب ايامو في الرهد او الجيش يورونا الزول دا طبيعي من ما قام وللا راكبو شيطان؟؟..

[الدرب الطويل]

#1330527 [ABU YASIR]
5.00/5 (1 صوت)

08-29-2015 09:50 PM
يقول الله سبحانه وتعالى: قُل لَّا يَعْلَمُ مَن فِي السَّمَاوَاتِ وَالْأَرْضِ الْغَيْبَ إِلَّا اللَّهُ-وادعاء علم الغيب من الشرك الاكبر-ولوان بالسودان علماء اجلاء لطالبوا باقامة الحد على هذا الدجال وهو نسخة فى مهاراته لراسبوتين القياصره الذى اثرى من المال العام من بعد ان تمكن منهم-ولو ان فى وطنى محامون غيورين على حرمة المال العام لجعلوا القضاء يفرض عليه الاجابة الواضحة والصحيحة على كيفية اغتنائه لهذا الثراء الطائل وهو عاطل الا من مهارة الشعوذه- ولجردوه من كل ما يملك ولاودعوه غياهب السجون-وما يخدع به الساسه الكبار هو ضرب من ابسط انواع التوقعات لاى نصاب ولا تنطلى الا على عقول قد ملكها الوسواس-واما النظاره فلا يرى بها غيبا كما يدعى ولكن لستر ما قد ينزع وقار الرهبنة قبل اصطياده لفريسته-واخيرا اقول-لك الله يا وطن القلوب والجدود

[ABU YASIR]

#1330524 [ابن السودان البار]
4.38/5 (4 صوت)

08-29-2015 09:49 PM
إذا أكبر تنظيمين طائفيين في سوداننا الحبيب لهم مؤيدين من كبار الافندية الطييبين والأكاديميين وكم من الجهلة والمغيبين دينيا الذين يبوسون أيدي الاسياد ويحملون احذيتهم ؟؟؟ فلماذا لا يظهر مثل هذا الدجال ؟؟؟ دائما ما أقول أن انجح تجارة مربحة في سوداننا الحبيب هي تجارة الدين والدولار ؟؟؟ والذي لا يصدق فليشير اليا الي أي تاجر دين او دولار فاشل ؟؟؟ احدث تاجر دين هو شيخ اللمين الحيرانه غلمان وجكسي ومحايته ببسي أصبح رجل أعمال مليونير بعد أن كان شيال في فرقة موسيقية بامدرمان ؟؟؟ يمتلك شركة في دبي ومستشفي غسيل كلي فى أديس أبابا ومدرسة خاصة بالخرطوم ؟؟؟ مثل هذا الدجال اعترف بأنه يمتلك عدد 7 عمارات بالخرطوم ولا أحد يعرف من أين له هذا ؟؟؟ يكون الجن عامل مكتب هندسي للتصميم وشركة مقاولات ؟؟؟ المفروض تكون مبنية علي اعلي مستوي وتصميم جني فريد يعجز أن يقوم به بشر؟؟؟؟ الخرافات والدجل لا تنتشر إلا وسط الشعوب المتخلفة والغير منتجة وتعيش علي الشحته والديون والجبايات القسرية من أضعف شراءح المجتمع مثل ستات الشاي وأطفال الدرداقة. ؟؟؟

[ابن السودان البار]

#1330520 [الرمنتــــــــــــــــــــــوج]
5.00/5 (6 صوت)

08-29-2015 09:46 PM
(( وربنا قال السماء لا تمطر ذهبًا ولافضة، ))...... إستغفر الله العظيم...

ودي من ياتو سورة يا أبو جهل إنت والصحفي بتاعك ده؟!!!!

[الرمنتــــــــــــــــــــــوج]

ردود على الرمنتــــــــــــــــــــــوج
[أبوقنبور] 08-29-2015 11:20 PM
أشكرك لأنك سبقتني إليها، وهذا أكبر دليل على دجله، لأن الشياطين توحي إليه زخرف القول غرورا، وهل هناك أكذب ممن افترى على الله الكذب.
سبحانك اللهم، تعاليت علواً كبيراً، سبحانك الله وبحمدك أشهد ألا إله إلا أنت، سبحان ربك رب العزة عما يصفون.


#1330498 [ود الحاج]
5.00/5 (1 صوت)

08-29-2015 09:08 PM
زمان المتعاملون مع الجن كما يقولون قالوا ممكن الاستعانة به لهزيمة اسرائيل فلماذا لم يفعلوا؟ أسرائيل دفعت أكتر ولا شنو؟ ذكروني ناس الأنطون في مباريات هلال مريخ

[ود الحاج]

ردود على ود الحاج
[ابراهيم] 08-30-2015 01:19 AM
يا ود الحاج اسرائيل دي الجن الاحمر .. صاحبكم دا الله يرد غيبنه


#1330495 [ود الحاجة]
5.00/5 (1 صوت)

08-29-2015 09:06 PM
حدثنا مسدد حدثنا بشر بن المفضل حدثنا خالد بن ذكوان قال قالت الربيع بنت معوذ بن عفراء جاء النبي صلى الله عليه وسلم فدخل حين بني علي فجلس على فراشي كمجلسك مني فجعلت جويريات لنا يضربن بالدف ويندبن من قتل من آبائي يوم بدر إذ قالت إحداهن وفينا نبي يعلم ما في غد فقال دعي هذه وقولي بالذي كنت تقولين

[ود الحاجة]

#1330492 [Tarig Amman]
4.50/5 (2 صوت)

08-29-2015 09:01 PM
اعدموا هذا الدجال ....

[Tarig Amman]

#1330490 [ود الحاجة]
4.75/5 (5 صوت)

08-29-2015 09:00 PM
الملائكة هم الذين قاتلوا مع النبي صلى الله عليه و سلم في بعض الغزوات و بنص القرءان قال تعالى : "إذ يوحي ربك إلى الملائكة أني معكم فثبتوا الذين آمنوا سألقي في قلوب الذين كفروا الرعب فاضربوا فوق الأعناق واضربوا منهم كل بنان ذلك بأنهم شاقوا الله ورسوله ومن يشاقق الله ورسوله فإن الله شديد العقاب "

أما الجن فمما ورد فيهم قوله تعالى :" وإذ صرفنا إليك نفرا من الجن يستمعون القرآن فلما حضروه قالوا أنصتوا فلما قضي ولوا إلى قومهم منذرين "
و لم يرد أي ذكر لقتال الجن مع النبي صلى الله عليه و سلم .

و قوله تعالى: " ويوم يحشرهم جميعا يامعشر الجن قد استكثرتم من الإنس وقال أولياؤهم من الإنس ربنا استمتع بعضنا ببعض وبلغنا أجلنا الذي أجلت لنا قال النار مثواكم خالدين فيها إلا ما شاء الله إن ربك حكيم عليم "

استمتاع الجن من الإنس أنهم تلذذوا بطاعة الإنس إياهم ، وتلذذ الإنس بقبولهم من الجن حتى زنوا وشربوا الخمور بإغواء الجن إياهم . وقيل : كان الرجل إذا مر بواد في سفره وخاف على نفسه قال : أعوذ برب هذا الوادي من جميع ما أحذر . وفي التنزيل : وأنه كان رجال من الإنس يعوذون برجال من الجن فزادوهم رهقا . فهذا استمتاع الإنس بالجن . وأما [ ص: 77 ] استمتاع الجن بالإنس فما كانوا يلقون إليهم من الأراجيف والكهانة والسحر . وقيل : استمتاع الجن بالإنس أنهم يعترفون أن الجن يقدرون أن يدفعوا عنهم ما يحذرون . ومعنى الآية تقريع الضالين والمضلين وتوبيخهم في الآخرة على أعين العالمين . "

[ود الحاجة]

#1330480 [الجزار]
4.50/5 (2 صوت)

08-29-2015 08:42 PM
دا راجل جاهل و عارفنو..المشكلة في الصحفي الحيوان البيمشي لي جاهل زي دا و يحاورو..

[الجزار]

#1330478 [الداندورمي.]
4.50/5 (2 صوت)

08-29-2015 08:42 PM
هههههههه قديمه يا،،،أبو الدجل
الراجل عاوز يرسل رساله إلي الجميع من البشكير لحدي
زفت الطين إنه ممكن يعمل أي شئ بواسطة الجن دعايه
للدجل والشعوذه من الإعلام الغريب ،لا حوله ولا قوه إلا بالله.
بس ،،،أشرح لي أتزوج الجنيه دي،،،كيف ؟

[الداندورمي.]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 212>
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة