الأخبار
منوعات
حركة حق في مخاطبة جماهيرية تدعو الشعب السوداني لإسقاط النظام وللإنتفاضة الشعبية
حركة حق في مخاطبة جماهيرية تدعو الشعب السوداني لإسقاط النظام وللإنتفاضة الشعبية
حركة حق في مخاطبة جماهيرية تدعو الشعب السوداني لإسقاط النظام وللإنتفاضة الشعبية


11-09-2015 11:56 PM



أقامت حركة القوى الجديدة الديمقراطية حق مخاطبة عصر يوم أمس 9 / 11 / 2015 في موقف جاكسون بوسط الخرطوم ، و حضر عدد كبير من المواطنين المخاطبة التي تحدثت عن الأوضاع السياسية العامة و الضائقة المعيشة التي إستفحلت و إستعظمت آثارها في المجتمع كمادعت الشعب السوداني للإنتفاضة الشعبية وإسقاط النظام ، كما تم توزيع بيان للمواطنين وضح ماهية و رؤى الحركة و بين مواقفها و الأوضاع الحالية و سبل الحل .

بيان : حركة القوي الجديدة الديمقراطية (حق)

حركة القوى الجديدة الديمقراطية
حركة حق

نحن حركة حق ، حركة سياسية سودانية إتأسست سنة 95 ، لأننا كنا شايفين و لحدي أسي إنو الحياة السياسية في السودان في ناس كتار جدا ما بتعبر عنهم و عن أحلامهم و أمنياتهم ، عشان كده ظهرنا ، حركة ديمقراطية علمانية لاننا بنرفض إستغلال الدين في السياسية والمتاجرة بيهو ، و عشان الدين لله و السودان حق كل السودانيين بمختلف أديانهم و معتقداتهم ، و حركتنا بتساوي بينا كلنا كسودانيين و بتنادي بي حقوقنا ، بدون أي خلفية عرقية و لا دينية ، كلنا سودانيين .
الحركة الليلة جات تتكلم معاكم ، لأنها شايفة زي ما إنتو شايفين حكومة الجبهة الإسلامية و المؤتمر الوطني بعد ما عملو إنقلابهم في سنة 89 ، خربو كل حاجة و أشعلو الحرب مرة تانية و لحدي أسي مستمرة و كل يوم بتكتل فينا و بتحرق بيوتنا ، ده الخلانا ننزح و نتشرد بسبب الإبادة و الإغتصاب لأمهاتنا و أخواتنا في مناطق الحروب لي باقي دول العالم ، عشان كده الحركة (حركة حق ) عندها شعار ضخم بتنادي بيهو و لازم تحققو (إيقاف الحرب) و العنصرية و حرب الابادة الحاصلة في دارفور و جبال النوبة و النيل الأزرق .
و غير كده كلنا شايفين الفساد و السرقات الكبيرة لي قروشنا بي إسم الدين وعملو ليها فقه تحلل و فقه السترة بتحمي المجرمين من العدالة ، مليارات بتتسرق من أكلنا من لقمة عيشنا عشان الكيزان يبنو بيها قصورهم و يقرو بيها أولادهم بره و يشغلوهم و نحنا كلنا عطالة ، أي بيت فيهو عاطل و أي بيت فيهو زول ما قدر يكمل تعليمو و فيهو زول مريض ، و دي كلها بسبب سياسيات الحكومة ، اللي كل همها النهب و السرقة و إشعال الحروب .
لدرجة مانزلو سلوكم في المجتمع السوداني زي ماحصل لشاب الفيديو اللي تم تعذيبو بالشطه ده بوري انو الحكومة ضد سيادة حكم القانون المفروض يسود فينا بعد ما نتفق و نصيغ دستوره .
لأنو نحن مع كرامة الانسان و سيادة حقوق الانسان .
الحكومة في فسادها و جرائمها ما بتفرق بين مسلم و لا مسيحي و لا لاديني ، بتكتلنا كلنا بنفس البشاعة و بتسرق لقمتنا كلنا ، عشان كده واجب علينا كلنا كسودانيين نسقطها و نبني بلد جديد يحترمنا و يعبر عننا و يوفر لينا الصحة و التعليم و الأمان و الرفاهية و لي اولادنا
وده مابحققو إلا مشروع النهضة الوطنية الشاملة البتنادي بيهو في حركتنا القدمت نضالات عديدة في الجامعات و في أوساط القوى المعارضة و في المدن و في المنافي و إتعرض اعضاءها للسجن و الإعتقال و التشريد و المنافي .
عشان كده الحركة ما مشاركة في الحوار الزايف الحاصل ده الاسمو حوار الوثبة و الحركة بتدعو الشعب السوداني لخيار الانتفاضة و إسقاط النظام .

حركة حق
نوفمبر 2015


تعليقات 10 | إهداء 0 | زيارات 4699

التعليقات
#1367971 [men]
0.00/5 (0 صوت)

11-11-2015 03:41 AM
اى نظام سياتى بدون تحفظ هو افضل من الكيزان وشيعتهم

[men]

#1367615 [Mohammed]
5.00/5 (1 صوت)

11-10-2015 10:47 AM
كلام والسلام وين الناس دي من احداث سبتمبر

[Mohammed]

#1367565 [أبوبكر]
0.00/5 (0 صوت)

11-10-2015 09:49 AM
أريد الانضمام لحركة حق

[أبوبكر]

#1367537 [najy]
0.00/5 (0 صوت)

11-10-2015 09:23 AM
واين اموال التي تدعمو بها حربكم لسقاط النظام ولكم اكثر من 20 سنة تحاربون على حسب ادعاكم !!!! اذا ديرن الشعب يسقط النظام بتحاربو ليه تعالو مع الشعب جوه واسقطوها
انتم سبب من اسباب بقاء النظام في الحكم خصوصا بعد تجربتكم مخجلة في الجنوب فقد الشعب الاول في جميع من في المعارضة ولن يتحرك من اجلكم فانتم مثل العصابه الحاكمة في السودان مع الفرق انكم لم تصلو الي الحكم

[najy]

ردود على najy
[سيزر] 11-11-2015 12:49 AM
ناجي .. إنت سكران ولا شنو ؟؟؟


#1367499 [yaseen]
5.00/5 (1 صوت)

11-10-2015 08:46 AM
طيب انتو لو بتهمكم مصلحة السودان...الآن فى حوار وطنى ماتنتظروا النتائج التى يخرج بها هذا الحوار ...وبعد داك لو عندكم سجم سجمو ياشوعيين قال علمانيين....
الدين هو معنا فى رحالنا وترحالنا وهو جزء لايتجزأ من حياتنا وهو نبراسنا....
فى كل خطوة نخطوها...وفى كل فكر ورأى لابد أن يكون الدين هو الاساس المتين الذى ننطلق منه أرجعوا الى كتاب الله وأدرسوه بتأنى أنه يدعو الى العدالة الاجتماعية والمساواةوكل شى جميل وينهى عن الفحشاء والمنكر ...وظلم الانسان لاخيه الانسان ومساعدة الفقراء والمساكين ارجعوا الى كتابكم ايها المساكين ...

[yaseen]

ردود على yaseen
[جركان فاضى] 11-10-2015 06:04 PM
ما تنتظروا نتائج الحوار الوطنى!!!!!!....يعنى ننتظر مخريات الحوار(المخريات هى الاسم الصحيح وليس المخرجات)

[yaseen] 11-10-2015 02:24 PM
و عشان الدين لله و السودان حق كل السودانيين بمختلف أديانهم و معتقداتهم ، و حركتنا بتساوي بينا كلنا كسودانيين و بتنادي بي حقوقنا ، بدون أي خلفية عرقية و لا دينية ، كلنا سودانيين .

وعشان الدين لله ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مافهمك لهذه العبارة ايها الاخ ؟؟؟
تريد أن تطبق نظام علمانى يسمح لك بفتح البارات...وبيوت الدعارة...ولعلمك النظام العلمانى ....مجرب فى السودان ولم تات أنت بجديد ...وكل الفجور...رأيناهو فى القيادات والتى يفترض أن تكون قدوة...أن ترى نائب الرئيس سكران فى التلفزيون ..وآخر يرقص فى الحفلات ووهو سكران هذه العلمانية التى رأيناها فى السودان...

[أبو سامي] 11-10-2015 01:11 PM
كاك كاك

European Union [العلماني] 11-10-2015 12:52 PM
دين الكيزان هذا الذي يبيح نهب أموال الشعب واغتصاب النساء وقتل الأطفال واشعال الفتن بين الموطنين ، نحن ما عايزنه ، فلكم دينكم ولنا ديننا، وإنشاء سوف نزج بالكيزان وبكل المتعاونين معهم امثالك الى مزبلة التاريخ، وصبرا ان الله يمهل ولا يهمل، وسوف يرجع الحال كما كان قبل 25 سنة، وتكون المدارس والجوامع والكنائس هي المكان الوحيد لتعليم وأداء الشعائر الدينية، وسوق تقلق جميع المعاهد والجامعات الدينية ، وألما عاجبه يعتكف في المدين.

[ANTI KOAZ] 11-10-2015 11:14 AM
أخ ياسين تحيه طيبه وبعد:
لدي سؤال لك ما رأيك في الدوله التركيه؟
إذا كان جوابك انها دولة ناجحة وتعد من الدول المتقدمه فتعقيبي ان الدوله التركيه دوله علمانية ذات دستور علماني الان يحكمها حزب إسلامي إذاً العلمانيه لا تتنافي مع الاديان ولا تحاربها كما زرع في عقلك, صحيح هنالك بعد التضييق علي الديانات في بعض البلدان العلمانيه وذلك راجع للتطبيق ولا يقدح في مضمون الفكره علماً انها اجتهاد إنساني فكري بحت لاكن في المقابل الدول التي تدعي تطبيق الشريعه الاسلاميه ما الذي وصلت اليه الان؟ لا شي هذا ايضا لابقدح في النظام الاسلامي ولاكن يقدح في التطبيق وإذا انتقدت التطبيق تجد من يهاجمك ويتهمك بالعلمانيه والالحاد مما يؤدي بالبعض الطعن في جوهر الفكر الاسلامي وهذا نتاج لتشدد الحكام اللذين يدعون تطبيق النظام الاسلامي ويضفون هالة ربانية علي تطبيق بشري في الاخر قابل للخطأ والصواب.


#1367497 [جركان فاضى]
0.00/5 (0 صوت)

11-10-2015 08:46 AM
لو كل القوى السياسية اتبعت مثل هذه المخاطبات الجماهيرية فى وقت واحد لانهارت الانقاذ...وشوف لما بدت المخاطبة الجماهرية لحزب البعث جميع الاحزاب التانية سكتت ...وحاليا لم تشاطر بقية الاحزاب المخاطبات الجماهيرية لحق...فيا نداء السودان نسقوا مع بعضكم واخرجوا كلكم فى يوم واحد...وراكم شعب لن يخذلكم...شعب بيأكل الحارة لو وجد اجماع من قيادات المعارضة

[جركان فاضى]

#1367456 [حسن النور]
0.00/5 (0 صوت)

11-10-2015 08:14 AM
نظام خبيث يسعي لخلق الفتن .....لوكان المرحوم الخاتم يتعامل مع امن القتلة لمر احزب الشيوعي لمايملكه من معلومات عنه..لاكن اخلاقه النبيلة وطبعه السمح حالا دون ذلك
. ل ليمين متناغم منذ البدء فمتي يتود اليسار....؟

[حسن النور]

#1367420 [المشروع]
2.00/5 (1 صوت)

11-10-2015 07:03 AM
طبعا جهاز الامن يغض الطرف عن حركة حق ويزيد من الضغط على الحزب الشيوعي السوداني وهو يريد ان ترث حركة حق الحزب الشيوعي السوداني..صحيح حركة حق حركة ديمقراطية يسارية ولكن المؤتمر الوطني يريد تدجينها ويريدها ان تكون الوارث الوحيد للحزب الشيوعي العصي على الاختراق.. ويقول جهاز الامن انه يستفيد من حركة حق في تزويده بالكثير من المعلومات عن الحركة الشعبية والحركات الثورية ولكن كيف؟ لا ادري

المهم حركة حق مكون من مكونات المعارضة وحركة شبابية مناهضة لنظام الاخوان الملمين الذي يستغل الدين والمساجد في دعوتهم وتشبثهم بالسلطة كما انهم يريدون احتكار الاسلام والحديث باسم الدين وقد نجحوا حتى الآن في هذا المسعى وصدقهم الكثير من الناس

[المشروع]

#1367400 [محي الدين الفكي]
1.00/5 (1 صوت)

11-10-2015 05:00 AM
ده شغل وطني كبير كل الشعب عند ان الحل هو اعمال الدستور الانتقالي لسنة 1956 معدل لاخر جمعية تاسيسية وان النظام غير دستور ؟

[محي الدين الفكي]

#1367395 [أسامة الكردي]
1.00/5 (1 صوت)

11-10-2015 04:30 AM
وعشان إنتوا يا شباب والله شجعان وبتنادوا بكرامة المواطن و سيادة حقوق الانسان، ولذلك عايزين تسقطوا نظام الكيزان، هذا النظام الجربان ، نحن حانقيف معاكم كمان ، ليس بالدعم المعنوي فقط بل بكل ما نمل من إمكانيات وأموال.
بس رجاء نظموا حركتكم في الداخل والخارج، وأشركوا معكم العاملين في الشرطة والجيش .
أنحني بكل تواضع تحية اجلال وتقدير لكم أيها الأبطال الأشاوس، أنحني ثم أنحني.

[أسامة الكردي]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة