الأخبار
أخبار إقليمية
شركة سيبرينا وغنماية ود الضي
شركة سيبرينا وغنماية ود الضي
شركة سيبرينا وغنماية ود الضي


11-29-2015 10:31 AM
شوقي بدري

اذكر في بداية التسعينات ان الدكتور محمد محجوب عثمان طيب الله ثراه ، كان يشاركني السكن وكنا نتحدث عن ذكريات ومفارقات امدرمان القديمة . من القصص المشوقة قصة ود الضي او ود الدي كما كان البعض يطلق عليه مخففا الضاض الي دال . وود الدي كان مستهبلا كبيرا في فريق السيد المكي .

قام ود الدي ببيع غنماية امريكانية لاحدي نساء الحي . وهي امرأة كبيرة السن تعاني من ضعف النظر . والاغنام فاتحة اللون عرفت بالاغنام الامريكية لان الارسالية الامريكية قامت بإستيرادها من سوريا واعطوها للاسر الفقيرة كمساعدة . لانها تحلب ضعف او ضعفين ما تنتجه الاغنام السودانية . وبعد يوم ماطر اكتشفت العجوز ان الغنماية الامريكانية قد استعادت هويتها . ود الدي كان قد قام بضرب الغنماية بالجير . ويبدو انه كان محتاجا للمال بسرعة . وقد تكون المناسبة قعدة وجلسة مقامرة . وصرخت العجوز بأعلي صوتها حتي سمعها اهل الحي ,, ود الدييييييييييييي ,, وصار الناس عندما يريدون ان يشيروا لموضوع استهبال او استحمار يقولون ,, ود الديييييي ,,

جننونا بالشركة التي ستستخرج جبال الدهب . وكيف سيسعد اهل السودان بمستوي جنوب افريقيا في استخراج الذهب . وبهذه المناسبة ، ناس الانقاذ ديل بيدخلوا الرئيس امبيكي في حل مشاكل السودان . ما يستعينوا بي جنوب افريقيا ؟ جنوب افريقيا دي ما اكبر منتج للدهب . اظني خايفين من الشفافية والديمقراطية بتاعة جنوب افريقية والصحافة التي لا ترحم . الرئيس والحزب الحاكم الي الآن بيعانوأ من آثار زيارة البشير الاخيرة ولعبة الاستغماية . وبكاء غندور لمن خاف ان يصير من الايتام . . دلوكت الناس مشت جنوب افرقيا . وطار الصقار وخلو ام رخم الله في الدار . وقالوا للبشسر بالمفتوح عليكم يسهل وعلينا يمهل . اوعك تعتب جنوب افريقيا تاني .

اخيرا نطق السفير الروسي ولم يقل كفرا . نطق حقا وقال بصريح العبارة المصيبة دي حقتكم ,, شركة سودانية ,, . جننونا بعظمة الشركة ومقدراتها وامكانياتها . قديما عندما يحضر خادم منزلي بيسالوه اذا عنده دفتر . وفي نهاية الدفتر هنالك صفحات لكي يكتب فيها المخدم السابق ملا حظاته عن الخادم . هذه الشركة البروس ما عندها كتلوجات وسجل لمنجزاتها واعمالها حتي اذا في الفضاء الخارجي ؟
السفير الروسي ذي المطرة الماصت الجير من غنماية ود الدي . الغنماية طلعت سودانية . الدكتور صابون بارك الله فيه وفي البطن الجابتو، قال من الاول الغنماية سودانية . وفي عملية تزوير وخداع وغش . والوزير حلف واقسم واغلظ في القسم بمناسبة وبدون مناسبة .
صديقي خوسي من البيرو يقول لي دائما نحن اهل لاتين امريكا لا نستطيع ان نعيش بدون ان نكذب . الام تكذب الاب يكذب والاطفال يكذبون . وعندما تسمع احدنا يقول ,, تخوري ,, والله ,, فلتتأكد من ان الكلام التي سيأتي هو كذبة ، والا لما اقسمنا بالله . الوزير ما طالبوا بالحليفة. بعد الحليفة كمان قال لو طلع كذاب يقطعوا راسوا ...... الخ

الانقاذ عملت ذي بعض شركات الكيزان شغالين بي طاقية ده في رأس ده . يشوفوا زول عنده ارض في موقع ممتاز. يتفقوا معاه وبصلاتهم يجيبوا تمويل من احد بنوكهم. وياخدوا عرابين من الراغبين في شراء شقق . ولقد صدقت العملية في ايام الفورة والفقاعات التي خلقها اعلامهم . ولكن اليوم هنالك شقق في وسط الخرطوم لا تجد من يشتريها . ولقد تقلص ايجار الشقق الفاخرة الي ثلت السعر قبل 5 سنوات .
الغرض الآن سمكرة الشركة وخلق صورة اسطورية لها. وبدأ البحث عن مستثمرين ورؤوس اموال داخلية وخارجية . وبالرغم من ان الكيزان كالعادة قد صدقوا كذبتهم الا ان العالم رفض ان يصدق . وبدا البحث عن تبريرات كالعادة ومحاولة شراء الوقت . والنظام صار بارعا في شراء الوقت . والمناقشات اليوم ليس المقصود منها الوصول الي حل ، لان من يرسلون لا يملكون صلاحيات . وحتي اتفاق نافع ,,طربقوه ,, له علي رأسه . وانتهي به الامر في مزبلة الانقاذ , لافي ذي الزول الورقو زايد .

يقولون المشكلة ان الفلوس موجودة ولكن المقاطعة وامريكا وقفت في طريقهم . يعني حصلت ليهم مفاجأة ذي حقت الخريف كل سنة ؟ ولا كانوا عارفين في مقاطعة ؟ طيب الودائع القطرية الملياردية وثمن الدم السوداني في اليمن ،السعودية حتدفعوا موية زمزم ولا دولارات . اذا الفلوس في الكيزان ما غلبوا في يوم من الايام من تحريك الفلوس . وعملوا اكبر طشت غسيل اموال ... ظهرة ومكوة .

ولماذا سيدخلون 5 مليارد ؟ حتي شركات النفط الذي يحتاج لجهد اكبر لم تستثمر المليارادت في السودان . شركة نوردين السويدية استثمرت ملاليم وتحصلت علي البلايين . لدرجة ان احد الصحفيين السويديين قد كتب كتابا عن مال الدم وشركة نوردين في السودان . ولقد تناول التلفزيون السويدي الامر كشئ مخجل وشن هجوما علي رئيس الوزراء المحافظ السابق كارل بيلد لانه احد المستثمرين في تلك الشركة . والشركة تعامل في السويد كوصمة عار . وفقد كارل بلد موضعة القيادي في الحزب بالرغم من انه كان الابن المدلل لرئيس الحزب يوستا بومان وقد تزوج ابنته في السبعينات . الا انه فقد احترام السويديين . لانه تحصل علي فلوس دماء السودانيين .

ما يحدث اليوم يشابه ما حدث مع شركة نوردين السويدية . التي باعت الاسهم في السويد وعالميا ولم تمتلك اي رأس مال يذكر . ,, من دقنه وفتلو ,, وصار كل المستثمرين من المليونيرات او الاغنياء من الدم السوداني . ولكن هذه المرة انتبه الناس وعرفوا العاب الكيزان . السفير الروسي ده ما لقو ليه فكي كارب يغطس حجره ؟ وبله الغايب الفي ام راكايب مايوريهم محل الدهب ويريحهم. زمان الكيزان ايام حرب الجنوب مش دقوا الراجل الرد علي الامام ؟ الامام كان بيقول انو الابقار كانت بتجيهم بنفسها وترقد مستقبلة القبلة لكي يقوموا بذبحها . وطبعا الابقار كانت بتنهب من المواطنين الجنوبيين . فقال الرجل ,, يا مولانا البقر ده تاعبكم قدر كده ليه ؟ مايجيكم محمر وجاهز ؟ بله بالبيعرف الغيب ما يوريهم محل الدهب . التعب لزومو شنو شركات وتنقيب وكاشفات عن الذهب بدل كشف الحال .

لافي 5 بليون ولا دهب بالكوم ولا حتي حلاوة لكوم . يا الشعب يقوم .... او يواصل النوم .

[email protected]



تعليقات 20 | إهداء 0 | زيارات 7454

التعليقات
#1378706 [عبدالله احمد محمد]
0.00/5 (0 صوت)

12-01-2015 04:09 PM
الان الاعلام الحكومى يقول بان السفير نفى كلامه وكلامه حور الى مبتغى اخر ... انها الحوصة والدوامة التى لا مفر منها الا ..... من يكمل انا خايف

[عبدالله احمد محمد]

#1378158 [عبدالله احمد محمد]
0.00/5 (0 صوت)

11-30-2015 06:45 PM
نحن نصدق السفير ولا نصدق الحكومة فى حد بيعرف اسمى او مسمى هذه الشركة غير الحكومة او كما قال عادل امام خلونا نعيش فى الاحلام يا كاتب المقال ليه مقفلها علينا والى ان نصحى من احلامنا الله كريم .. كذبة تفوت ولا حد يموت علام حاسدة جنس حسادة ما تخلوا حكومتنا تكذب يعنى شنو هى دى اول كذبة ولا اخر كذبة ما كل حكومات دول العالم الثالث بتكذب اشمعى حكومتنا بس شايلين حسها الكذب عند حومتنا ما بخور البطن ... زى ما الكلمة السمحة بخور البطن الله لا كسبت يا سفير روسيا قطعت قلبنا وصحيتنا من احلامنا الوردية التى كستها بنا حكومتنا فجرت قنبلتك قبل ما يهل علينا اطلالة السنة الجديدة موعد حكومتنا اقصد حومتنا المحومانا الى ان اصبتنا بلفة الراس ما كنت تنتظر لاحدى او السنة والفضيحة بجلاجل يا خبر اليوم بفلوس بكرة ببلاش المصريين ديل عندهم جنس حكم

[عبدالله احمد محمد]

#1377926 [الحقيقة]
4.00/5 (1 صوت)

11-30-2015 12:04 PM
هؤلاء لا يمكن أن يعيشوا وينهبوا بدو الكذب كشعوب أمريكا اللاتينية ونسوا أن حبل الكذب قصير،، على هذا الوزير الإستقالة فورا لو كان يملك ضمير لأن الإنقاذ سوف لن تقيله طالما هو يكذب.

اليوم 147 رئيس دولة مجتمعين في بالريس في قمة المناخ وبشة لا يستطيع المشاركة لعدم دعوته بجانب أن لا يستطيع أن يطأ القارة الأوروبية إلى موته وقد تم إبعاده كذلك من القمة الهندية الأفريقية في جوهانسبيرج ولكى يثير الغبار حول كل ذلك شال كاسه وهاك يالأمارات للشحدة،، قالوا إجتمع يوم أمس مع ولى عهد أبوظبى،، دة كلام؟؟

[الحقيقة]

#1377895 [الناهه]
5.00/5 (2 صوت)

11-30-2015 11:28 AM
السفير الروسي الذي صاح باعلى صوته ياشعب السودان الشركه دي ماروسيه وكلام المسئولين عندكم ده خارم بارم وامور 3 ورقات فحصلوا ذهبكم ما يحصل بترولكم وديل جماعتكم وانتو عارفنهم كويس اكتر من غيركم ..ده الموضوع باختصار شديد جدا ومن غير لف اودوران ...
وهذا نداء للشعب السوداني .. افيقوا ..ادركوا الذهب ما يحصل البترول ..
وهذا نداء لحكومة المؤتمر الوطني .. ولو مره واحده فقط حكموا ضميركم واتركوا ما تبقى من بترول وذهب لشباب السودان حتى يجدوا شيئا من بعدكم بعد ان مزقتم وحدة السودان واضعتم البترول وماتحقق من ايرادات حتى الان وبعد ان دمرتم قطبع الماشيه وصدرتم حتى الاناث ودمرتم مشروع الجزيره والمحالج والسكه حديد وسودانير وسودان لاين والخدمه المدنيه والتعليم والصحه وتاجرتم فيها .. اتركوا ما تبقى من السودان للاجيال القادمه رجاءا

[الناهه]

#1377868 [احمد المصطفى]
4.50/5 (3 صوت)

11-30-2015 10:56 AM
شكراً للعم شوقى بدرى على المقال الروعة ..
المسألة كلها يا أستاذ شوقى ان العصابة الحاكمة جلدها تِخِن و بقت لا تخاف و لا تبالى من أى عواقب قد تصلها من مواطنى السودان لذلك بقو يبالغو فى كضبهم و فى خداعهم .

[احمد المصطفى]

#1377671 [john mohamed]
5.00/5 (2 صوت)

11-30-2015 01:16 AM
الله يكثر امثالك ويعلم الناس كتابة انت معجم للتاريخ والثقافة . الله يحفظك .وللوطن ذخرا .

[john mohamed]

#1377492 [حاج علي]
5.00/5 (2 صوت)

11-29-2015 06:07 PM
وطار الصقار وخلو ام رخم الله في الدار .

فصة البقر والامام زي قصة الدقيق النزل من السماء لغذاء المحاهدين
قال ليك ظهر واحد في برناج ساحات الفداء وقال شاف الدقيق ينزل من السماء لاطعام المجهادين
ادروب كان حارس مخزن دقيق في بوزسودان بالليل باع الدقيق كلو والفلوس في الجيب
عندما سؤل قال الملائكة جات بالليل وشالت الدقبق للمجاهدين بالجنوب

[حاج علي]

ردود على حاج علي
[عثمان عبده] 11-30-2015 09:41 AM
ههههههههههههههههههه


#1377437 [noon]
5.00/5 (1 صوت)

11-29-2015 03:57 PM
ود الدييييييييييييي لما كان وما سيكون
تسلم استاذنا شوقي

[noon]

#1377431 [ABUBAKER]
5.00/5 (2 صوت)

11-29-2015 03:54 PM
حكومة كيزان عايشة على الكذب فقط

[ABUBAKER]

#1377397 [سلطنة المسبعات]
5.00/5 (1 صوت)

11-29-2015 02:30 PM
ههههههههههههههههههههههههههاااااااااااي

[سلطنة المسبعات]

#1377391 [فحل الخلا]
5.00/5 (2 صوت)

11-29-2015 02:12 PM
عسل يا شوقي يا اصيل

[فحل الخلا]

#1377381 [بت مكى]
5.00/5 (1 صوت)

11-29-2015 02:03 PM
ضحكت لمن بكيت، سرد و تحليل رائع لحال الاستثمار السوداني و حال الاقتصاد السوداني عموما. بكيت من الحال الوصل ليه السودان لكن غنماية ود الدى بقت ظااااااهرة ما بنفع فيها بوهيه ولا كريمات تفتيح

[بت مكى]

#1377358 [محمد22]
5.00/5 (2 صوت)

11-29-2015 01:19 PM
يا جماعة لقد قرأتم الخبر الاخير عن ضرب وسلب السودانيين في مصر وما قالته اجهزة امن مصر بان هؤلاء الناس وجدت بطرفهم عملات كبيرة كي يشتروا ويجففوا بها الدولار الحايم في مصر طبعا هذا بيان الاجهزة الامنية المصرية بحسب ما ورد ف الاعلام
عليكم بعكس هذا السؤال بمعنى اخر مصر واجهزتها منذ زمن طويل هي التي تجفف السوق السوداني من العملات الصعبة (دولار) ونحن ما عارفين وبهذا مهما يكون هناك دولار في السودان سيجفف ويدخل الى الخزينة المصرية

وهذا الامر لن تجدوا له حل ابدا لان حتى صغار تجار العملة بالسودان يعملوا لصالح مجرمين كبار بل دول خارج السودان واذا لم يكن كذلك كيف لاجهزة مصر الامنية تاتي بتلك الدعوى على السودانيين الذين لا يملكون حتى قوت يومهم في مصر وكما قامت تلك الاجهزة بسلب نقود المرضى الذين ذهبوا للعلاج هناك

[محمد22]

ردود على محمد22
[Rebel] 11-29-2015 07:39 PM
* انت بره الموضوع بالكامل يا جداده!..قوم لف, جاتك داهيه تخمك و تخم البعين الزيك ده!!


#1377351 [عبدالمنعم موسي]
5.00/5 (2 صوت)

11-29-2015 01:10 PM
كعادتك دائما عمي شوقي تبدع في السرد والتشبيه لما وصل اليه حال السودان .وسؤالي لك الان ماذا نحن فاعلون الثورة اجهضت بسبب الاغتيالات التي قام بها النظام في سبتمبر فهل نفعل مثل ما فعل السوريين ونركب البحر لنحط الرحال في بلاد تموت حيتانها من البرد ام نجر الملاية ونندمدم ننوم.

[عبدالمنعم موسي]

#1377331 [faris]
5.00/5 (2 صوت)

11-29-2015 12:38 PM
ههههههههههههههه
بدون تعليق

[faris]

#1377315 [alwatani]
5.00/5 (2 صوت)

11-29-2015 12:18 PM
بالله الزول دا لسة وزير ولاشالوه

[alwatani]

#1377282 [جالوص]
4.88/5 (4 صوت)

11-29-2015 11:24 AM
هههههههههه.... يعني اكلنا هواء
الدولار قرب اطناشر

[جالوص]

ردود على جالوص
[shawgi badri] 11-29-2015 01:33 PM
المشكلة شن يا جلباق ا اي ما قالوا لو ما جينا الدولار كان وصل عشرين جنيه . حيصل العشرين ... مليون .


#1377281 [جلباق]
4.75/5 (3 صوت)

11-29-2015 11:24 AM
( لافي 5 بليون ولا دهب بالكوم ولا حتي حلاوة لكوم . يا الشعب يقوم .... او يواصل النوم ).

هههههه يا شوقي بدري قفلتك حلوة . قلت الجماعة ختوا طشتهم و استعدوا للغسيل ههههههه

[جلباق]

#1377274 [taluba]
4.75/5 (3 صوت)

11-29-2015 11:19 AM
الاخ شوقي بدري
مقالك جميل ورصين ،وظهر ابداعك في التشبيهه الدقيق الذي يعّبر عن حياتنا في هذا السودان. كنت دائما علي يقين ان في الامر شئ. توفي السودان ورحم الله السودان والبقاء لله وحده وانا لله وانا اليه راجعون... هذا هو التعليق الوحيد فلم يبق لنا قول.

[taluba]

#1377261 [سودانية]
4.75/5 (4 صوت)

11-29-2015 11:02 AM
ياعمو شوقي سمعت بالمثل البقول الخرقاء اللقت الحد حيلة
الكيزان لقو المقاطعة الامريكية حيلة
اكان ادوهم المسوح وحق الجيهة بالدولار وللا الريال الخراقة مابخلوها
مسكين الشعب كتلو بالحد

[سودانية]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة