الأخبار
أخبار إقليمية
( خاوي الأبلج )..تفاصيل ليلة القبض على إبن الوزيرة
( خاوي الأبلج )..تفاصيل ليلة القبض على إبن الوزيرة



بتهمة حيازة مخدرات
12-15-2015 04:51 PM
الطاهر ساتي

:: ومن أخلاق الهمباتة و مكارم خصالهم، فقدت إمرأة أساورها الذهبية وإتهموا طه الضرير بسرقتها .. وكان طه هذا من مشاهير الهمباتة و فرسانها، وربما كان أقربهم مكاناً إلى موقع الحدث.. فانزعج من الإتهام وخاطب المرأة شعراً : أخوك يا السمحة ثقاف الخلا العتمور/ وأخوك يا الجاهلة ختار الجدي المديور/ كان اسرق سوارك وأدورلي فيهو سرور/ حكاية تضحك النعجة وتبكي التور..لم ينف طه الضريرعن نفسه تهمة النهب و السرقة، ولكنه أرقى وأكبر من أن يسرق أساور إمرأة ..!!

:: للهمباتة أخلاق وقيم.. ومنها إنهم لا ينهبون المرأة و الجار واليتيم و الفقير والغني الكريم.. ولا يتلصصون في الخفاء و إنما يواجهون أصحاب الإبل وحماتها (جهاراً نهرا)، ثم الشهامة والمروءة ونجدة الملهوف والمظلوم .. والوفاء للرفيق أهم ما يًميز الهمباتي عن الآخرين .. فالهمباتي يفدي رفيقه بالروح والدم إذ تعرض لمتاعب المطاردة، ولا يهرب تاركاً رفيقه في الخلاء وراء ظهره مهما كان حجم القوة المطاردة..ويبدو أن بعض الناس في بلادنا يفتقدوا ويفتقروا إلى ( أخلاق الهمباتة)..!!

:: وفي تفاصيل ليلة القبض على إبن الوزيرة التي رصدتها زميلتنا المجتهدة هاجر سليمان، لم يستوقفني أن يكون المتهم بتعاطي أو الإتجار بالمخدرات (إبن وزيرة)، فالجريمة لا قبيلة لها ولا مناصب، وسواسية في إرتكابها أبناء العامة و أولاد الذين نسميهم بالمسؤولين..وكذلك لم يستوقفني أن يطلق وكيل النيابة سراح هذا الإبن بتدخل والدته الوزيرة وخاله، فالمحاباة وإرضاء السلاطين وأصحاب النفوذ - على حساب القانون والعدالة - من بعض موبقات الحياة، وليست بدعة سودانية .. وكذلك لم يستوقفني إستغلال عربة الوزارة و الوزيرة بفي غير مهامها الرسمية، إذ هذا الإستغلال جزء من واقع لا يخفى على أحد، وليس في الأمر ما يُدهش ..!!

:: ولكن في تفاصيل الحدث، ما يلي.. بعد إيقاف إبن الوزيرة ( م)، و رفيقه (ح)، عند مدخل كبري المك نمر بالخرطوم بحري - بتهمة حيازة المخدرات - حضرت الوزيرة الى قسم الشرطة ببحري وسط و إستغلت نفوذها في إطلاق سراح إبنها (م)، بضمان خاله.. وغادروا جميعاً - الوزيرة والإبن والخال - تاركين وراء ظهرهم الرفيق (ح)، قابعاً في حراسة القسم، ليواجه وحده المصير، أوهكذا أرادوا قبل إيقاف الإبن مرة أخرى – يوم أمس - و مساءلة وكيل النيابة .. أخلاق الهمباته ترفض هذا التصرف.. وما غادر همباتياُ أرض الحدث تاركاً رفيق دربه ( أسيراً أو حبيسا)..!!

:: ولو كان من تم ضبطه ليلتئذ عند مدخل كبري المك - بتهمة المخدرات أو بأية تهمة أخرى - طه الضرير أو الطيب ود ضحوية أو أي همباتي آخر، لما غادر حراسة القسم تاركاً وراءه رفيقه في غياهب الإتهام و ظلمة السجن ..وكذلك لو كان طه الضرير أو الطيب ود ضحوية أو أي همباتي آخر ( وزيراً)، لما تأبط إبنه وغادر قسم الخرطوم بحري تاركاً وراءه رفيق إبنه ( الما عندو ضهر)..وعليه، لم يكن لرفيق إبن الوزيرة أنيساً في تلك الليلة غير أبيات عوض الكريم الطاهر : خاوي الديمة كارب زندو/ خاوى الابلج المايبقى عندك عندو/ خاويهو البشيل حمل الرفيق ويسندو/ خاوى التنبسط يوم المضيف عندو..!!

[email protected]


تعليقات 28 | إهداء 0 | زيارات 15577

التعليقات
#1386315 [عصام حمزة]
0.00/5 (0 صوت)

12-17-2015 12:39 AM
مافيش قيم مع الهمبتة والسرقة ....
أي شجاعة هذه وأنت تسرق حق الغير ومجهوده
مهما نَظم في ذلك من القصائد والدوبيت
فهل سوف يغفر الله لهم ذلك ...بصفة الشجاعة
...والي الذين يسألون من إسم الوزيرة عليهم مناقشة الموضوع مهما كان إسم المسئول وزير أو وزيرة ...أين هي التربية الصحيحة لأبناء المسئولين ولماذا هذا التساهل وترك الحبل علي القارب لأبناؤنا أين المتابعة
والي الدولة التي تتاجر في المخدرات وذلك بشهادة الجمارك السائبة معقولة حاويات تدخل البلد ويتم تنزيلها ولايعرف لها مالك ...( طبعا من المستحيل ) ولماذا يتم التنزيل أين أجهزة الكشف علي المخدرات ولماذا لايعلن عن أصحابها ويتم محاكمتهم
إن لم يكونو من النافذين ....
حسبي الله ونعم الوكيل

[عصام حمزة]

#1386151 [فدائى]
2.00/5 (1 صوت)

12-16-2015 04:12 PM
اها ياكيزان السجم والله بعد ده احسن تعترفوا مافى فايده من الانكار الناس ما حاتصدق انكم مسلمين (ورونا اسو شنووووووو)(فى طريقه اسهل جيبو واحد من الشيوخ الكبار )(اجر لينا ابو داوود وخلاص)

[فدائى]

#1386072 [محمد احمد]
3.00/5 (3 صوت)

12-16-2015 01:30 PM
تهانى تور الدبة وزيرة دولة بوزارة العدل مش الاتصالات وهى الذى ولدها انقبض وقبل كدة فكت اخوها أيضا من الحبس في موضوع شيكات

وطبعا ده يديك نموذج ساطع وكاف على نظام العدالة في الإنقاذ القالت هي جاية تطبق شرع الله ، لو كانوا قالوا نحن ناس ساكت كنا قلنا الموضوع بيحصل في احسن الدول لكن تجى للناس تقول ليهم انا عايز اربط قيم السماء بالأرض ونحن جينا نمثل قيم الطهر والعفاف ونحن ونحن ونحن

ثم يكتشف الناس ان كل ما تقوله ما هو الا ستار فقط

لجرائم
نهب أموال

سلطة
احتكار ثروة

برز الثعلب يوما في ثياب الواعظينا

[محمد احمد]

#1386061 [sami]
3.00/5 (2 صوت)

12-16-2015 01:10 PM
مكالماتنا كلها
مسجلة عندها
بكرة تشفر
شرايحنا
دي وتجيب موضوع جديد
وتخلينا نفتش
لموضوع
الله يهديها
عايزا
تشغلنا شوية
باقي الملالين العندنا دي
الندفعهن اتصالات.
لانها دي الوزارة الوحيدة مع وزارة العماري(التمباك)
الشغالة في البلد دي
والوزارة الوحيدة هي الرفعت سعر الدولار
ويشتروا باي سعر
ولا منافسين
معاها الا ناس العماري
بعدين
ياحاج الطاهر
ماوريتنا
الصنف نوعو شنو
وخاص ولاعام
وبعدين ياحاج الطاهر
وين اولاد موردين السيارات ووووووو؟
تمواالمواضيع
تقلوا الظهرة

[sami]

#1385947 [truth]
4.38/5 (4 صوت)

12-16-2015 10:38 AM
الان الفساد داخل وزار السيد وزير العدل فماذا انت فاعل

[truth]

#1385885 [ود الكندى]
4.47/5 (11 صوت)

12-16-2015 09:13 AM
لاحول ولاقوة الا بالله هذه الجاهلية بذاتها التي ارسل من اجلها رسول البشرية من اجل رفع الظلم حيث كان في أيام الجاهلية اذا سرق فيهم الكبير تركوه واذا سرق الصعيف اقاموا عليه الحد الجاهلى كيفتسمح لك انت واخوك عشا البايتات ان تخرجى ابنك بدون رفيقه وكيف تستغلين منصبك والله والله والله لو كنت في مكان البشير وهو المسئول أولا وأخيرا لاقلتك وسجنتك انت واخيك لتكون عبرة للاخرين ولحظتها سوف يتحقق العدل وسوف تنفرج الأمور التي ضاقت عليه وعلى حكومته

[ود الكندى]

#1385853 [emad]
4.74/5 (9 صوت)

12-16-2015 08:48 AM
سعادة الوزيرة شافت صاحب ولدها صاحب سوء ولذلك تركته في التلاجة عشان يتأدب ويفارق ابنها

[emad]

#1385825 [ابو جلمبو]
2.88/5 (6 صوت)

12-16-2015 08:27 AM
الكوز ياكل مال النبي واولاده، الحمد لله انه البشكير ما بيولد والا اولاده كانو حشو اي سوداني وسودانية

[ابو جلمبو]

#1385811 [الجعلي]
2.88/5 (6 صوت)

12-16-2015 08:06 AM
الوزيره تهاني علي احمد وزيرة الدولة بوزارة العدل

[الجعلي]

#1385789 [ابو قرجة]
2.88/5 (6 صوت)

12-16-2015 07:37 AM
كلامك في الصميم يالكلس احوي

[ابو قرجة]

#1385736 [المهاجر]
4.47/5 (8 صوت)

12-16-2015 03:58 AM
برااااااااااااااااااااحة كدة تهاني دي أو الوزيرة دي شوفوها ماسكة ياتو ملف وبيخص قضية شنو واطرافها منو.. ح تعرفوا ليه البشيع دة!!


العاوزين يستروه بيستروه ومن استطاعت إخراج ابنها وكسرت القانون بتقدر على غيره، ومن حمى المجرمين كثيرا يستطيعون حماية هذا..!

الحكاية وراها شي تاني.. اصحوا يا قراء!!

[المهاجر]

ردود على المهاجر
[جركان فاضى] 12-16-2015 09:07 AM
تحليلك اعتقد فيه مصداقية كبيرة...قصة المخدرات مفتعلة من متنفذين ورجال أمن يحالون ان يبشعوا بالوزيرة...كيف تشك فى عربية واحدة من ملايين العربات ان فيها مخدرات خاضة وان اقل شئ 10% من السيارات بها مخدرات...وحتى شنط طلاب الابتدائى مليانة مخدرات


#1385718 [Ayoubi]
3.88/5 (6 صوت)

12-16-2015 02:29 AM
سبحانة اللة ليست هناك صدفة بل شاءت الأقدار أن
تلك الوزيرة في هذا المنصب الذي هي ليست لديها
أدني احترام لذالكم المكانة والمنصب بل والاستخفاف
لة وهذا أيضا ليست مصادفة بل أراد الله سبحانة
وتعالي أن يذلها ويخذلها في الدنيا لأنها لم تحكم
عقلها بل انساقت لعاطفة وهذا نتيجة تولية أولي
الأمر لامرأة وهذة لعنة

[Ayoubi]

#1385701 [Ayoubi]
3.96/5 (7 صوت)

12-16-2015 01:01 AM
الاخوة والأخوات ما أود قولة هو هذا سياسة
الإنقاذ إذا سرق الضعيف أقاموا علية الحد وإذا
سرق الانقاذي تركوة وعظموة ونسقوا منة بطلا
ولبسوة الأوسمة هذا هو سنة الإنقاذ إذا لم تسرق
انت لم ولن تكون انقاذي يا لعار يا ثورة الضلال

[Ayoubi]

#1385646 [HISHO]
4.49/5 (13 صوت)

12-15-2015 10:29 PM
بسيطة جدأ , على هذا الولد ( الماعندو ضهر) , بكرة الصباح لما يستجوبوهو فى النيابة يقول انا ما بعرف الزول دا ولا شفتو قبل كدة, اشرت ليهو عايز اقطع الكبرى .. ركبت معاهو... قبل ما اوصل مسكوهو بتاعين الشرطة وانا نفسى اتفاجئت ما عارف الحاصل شنو , لقيت نفسى جوة القسم وفى الحراسة , جو ناس طلعوهو من الحراسة بالليل وخلونى انا .. انا ما عارف اى حاجة ...طبعأ وكيل النيابة ما حيقدر يستدعى ود الوزيرة عشان يستجوبو من صحة الكلام بتاع الولد (الما عندو ضهر )دا..حيحتار وكيل النيابة واخر حاجة حا يطلق سراحو

[HISHO]

ردود على HISHO
[خاتي اللوم] 12-16-2015 12:01 AM
حلوة منك 😜


#1385632 [بابكر عباس]
4.47/5 (8 صوت)

12-15-2015 10:09 PM
و الله حارة شديد..ترك ذلك الشاب الأخر...إبن أم ليست وزيرة.., أب ليس وزير.. لو كان وكيل النيابة أطلق الأخر هذا(( من عنده..)) لهتفنا..يحيا العدل..لكن الطريقة دى ما صاح..و كيل النيابة ليس فقط خاين للقسم.. بل أيضا" جبان..

[بابكر عباس]

ردود على بابكر عباس
European Union [سوداني قرفان من حكم الكيزان] 12-16-2015 01:05 AM
ياساده ياكرام ولد الوزيرة ضامن يتخارج مسنود عندو ظهر قوي والمسكين المعاه الله يستر عليه وياكلها بالهنا والشفا وفي مثل بقول :( الماعندو ظهر ينضرب علي بطنه ) والمسكين ماعندو سجمو


#1385622 [عصمتووف]
3.96/5 (9 صوت)

12-15-2015 09:45 PM

كشفت مصادر مطلعة عن ضغوطات على وزيرة الدولة بوزارة العدل تهاني علي أحمد لدفعها إلى تقديم استقالتها بعد استغلال نفوذها لاخراج ابنها من احدى حراسات الشرطة ببحري.

منقول

[عصمتووف]

ردود على عصمتووف
[جبل مرة] 12-16-2015 11:45 AM
هذه وزيرة الدولة بوزارة العلوم والاتصالات وليس العدل
وهذا هو جزاء اهمال تربية الاولاد وتركهم من غير رقيب ومتابعة مع توفير لهم كل سبل الحياة من مأكل ومشرب وسيارات خاصة .
لذلك لابد من كشف تعاطي المخدرات لأبن هذه الوزيرة وسوف تظهر الحقيقة..!

[فارس] 12-16-2015 03:46 AM
يعنى الوزيرة دى هى تهانى الدبة؟؟


#1385617 [جمال علي]
3.93/5 (8 صوت)

12-15-2015 09:33 PM
خاوي الديمة كارب زندو
خاوى الابلج المايبقى عندك عندو
خاويهو البشيل حمل الرفيق ويسندو
خاوى التنبسط يوم المضيف عندو..!!
........................................................................ أخوك يا السمحة ثقاف الخلا العتمور
وأخوك يا الجاهلة ختار الجدي المديور
كان اسرق سوارك وأدورلي فيهو سرور
حكاية تضحك النعجة وتبكي التور.

تعليق :
حرم رجال.مو زي ناس قريعتي راحت.

[جمال علي]

#1385613 [هدهد]
4.47/5 (8 صوت)

12-15-2015 09:24 PM
يااستاذ شطحت شطحة كبيرة خلاس .... ما وجه المقارنة بين طه الضرير وحمادة الحنكوش ؟؟؟؟؟ ناس طه الضرير رجال فرسان رحلوا عن الفانية لكن تظل سيرتهم العطرة تفوح في وجدانا ورغم بعض السلبيات التي كانوا يمارسونها لكن تظل شهامتهم ووشجاعتهم وكرمهم الفياض بصمات قوية طغت على هذه السلبيات واصبحت سيرتهم يتناولها اجيالنا خلف عن سلف بكل اعجاب حتى يومنا هذا . صدق العربي عندما قالالراجل : البياكلو الاسد أخير من البتاكلو الضبعة !!!!.

[هدهد]

#1385594 [دردوق]
4.41/5 (21 صوت)

12-15-2015 08:17 PM
شئ عجيب و غريب ! كبري المك نمر دا يوميا جااااارين بيهوووو.

مافي زول فتشنا و لا قاال لينا مااشين وووووين !!!

كدي نصبر للصبااح

( و نقيف جنب الحيطه و نسمع الزييطه )

[دردوق]

#1385593 [الأزهري]
2.93/5 (8 صوت)

12-15-2015 08:14 PM
دا ولد يا تا وزيرة ود ساتي؟ ما فيها حاجة قول أسماءهم ما مكتوبين في البللاغ وفي دفاتر الشرطة طالما قبضوهم وأطلقوا سراح ود الوزيرة؟ أوعا يكون ود المرحوم محمد أحمد عمر دا عياله يتما والرفق باليتيم من مكارم الأخلاق وما فيها حاجة لو فكوهو بس عيب يخلوا شريكه دا زي ما قلت ليس من مكارم أخلاق حتى الهمباتة.

[الأزهري]

#1385587 [ابومرام]
2.97/5 (9 صوت)

12-15-2015 07:56 PM
الاستاذ الطاهر ساتي تحية وتقدير. صدقني ان ظللت تكتب انت وغيرك الي ماشاء الله ان يكون لن تغيروا شيئا في هذا الواقع البائس فهؤلاء الناس يعيشون في حالة غيبوبة دائمة وفي حالة مرضية عصية التشخيص وبالتالي لا علاج لها . هؤلاء لديهم قناعة تامة بان كل من ينتمي لهذا النظام الفاشل لا بد ان يكون محميا لا تطاله يد القانون لانهم بكل بساطة يخدمون هذه البلد على حسب ظنهم وبالتالي المقابل اطلاق يدهم وايدي ذويهم وخاصتهم لفعل كل ماهو محرم بنص القانون وتطبيق قانونهم على عامة الشعب وجلدهم والتشهير بهم .يااخي بعد فضيحة مدير الحج والعمرة في سنار تناقشت مع احد الكيزان في بلد المهجر الذي نقيم فيه سويا فاخذ يبحث عن مبررات واهية لشيخهم المجاهد بتاع سنار ويتفسلف بان الزنى لا يثبت بهذه السهولة.قلت له دعنا من اثبات الزنى في الشرع فهذا كلنا نعرف شروطه ولكن قانونكم بتاع النظام العام فيه مادة تسمى الشروع في الزنا واللبس الفاضح وغيره.بهذه المادة جلدتم وعزبتم المئات من الشباب والشابات لمجرد شبهة الشروع في الزنى فلماذا لا تطبقون هذه المادة على كادركم مع ان جريمته تعدت مرحلة الشروع بشهادة الضحية؟ الكوز انسحب من الحوار واتهمني كعادتهم بقوله انت طابور خامس ومعادي للمشروع الحضاري قلت له انت مازلت من جماعة المشروع الحضاري حتى اسيادك قد نسوا هذا الموضوع المرحلي فكل مايحدث الان يشير الي موت هذا المشروع من زمان تخيل الكوز ضحك وقال ايوة نعم لازم كل مرة نجيكم بي فن جديد اصلا نحنا حكوكتنا دي اكان صدقت يوم واحد مع الشعب السوداني معناها بتسمعوا بيان رقم واحد قريب؟؟؟؟؟؟؟؟؟؟؟؟؟؟

[ابومرام]

#1385582 [رحلة الاصدقاء]
2.07/5 (5 صوت)

12-15-2015 07:48 PM
ده شنو المقال العجيب ده؟

[رحلة الاصدقاء]

#1385567 [بكري محمد عمر]
2.93/5 (8 صوت)

12-15-2015 06:50 PM
بطلو الجبن بتاعكم دا وقولوا دا إبن أي وزيرة كفاية مداهنات لأن عقوبة التشهير وردت بالنص في القرآن الكريم عندما قال ( وليشهد عذابهما طائفة من المؤمنين ) حتى يكون عظة لغيره ومابعيد يكون الحاويات القابعة في بورتسودان دي حقة الوزيرة الماديرين تقولوا إسمها منو والظاهر إنو ولدها دا بيسوق ليها بضاعتها

[بكري محمد عمر]

#1385563 [متسكع]
2.96/5 (8 صوت)

12-15-2015 06:42 PM
واحد يفيدنا من هذه الوزيرة
حتي يعرف الناس الصحاب التوجه
الحضاري المسلم وتعالوا شوفوا
هل ينطق لسان الامام كاروري
الذي نطق في كل شئ لا الفساد
او الامام الحربي كمال رزق
او نسمع لسان المفتي المشهور
شيخ عبد الحي الذي يقابل الحي
يوم لا ينفع الا الواحد الحي

[متسكع]

ردود على متسكع
[kareem] 12-16-2015 12:51 AM
لا تظلم الشيخ عبدالحي يوسف فهو من اشد الناس إنتقاداََ لهذا النظام وفساده, تابع خطب الجمعة له علي قناة طيبة لتري بنفسك ثم احكم.

[جمال علي] 12-15-2015 09:37 PM
وزيرة تشرف علي أهم وزارة تربي و تعلم.و الخال مجرم حرب.
ديل الإسلاميين!


#1385542 [همت]
2.38/5 (5 صوت)

12-15-2015 06:05 PM
الكيزان يأكلون أموال اليتامى وينافقون ويسرقون ويقتلون المتظاهرين على ظلم البشير وكيزانه، هل يمكن لمثل هؤلاء أن يلدوا "لصاً" مثل طه الضرير يا أستاذ طاهر؟

[همت]

#1385523 [جركان فاضى]
2.85/5 (6 صوت)

12-15-2015 05:46 PM
ومين قال ليك خلاهو براهو...بدل تركب الجريمة على الاتنين احسن يختوها على واحد .. والاخف الشاب التانى مش ابن الوزيرة...وبذلك تنجو الوزيرة وابنها من جريمة المخدرات...ثانيا مين قال ليك هربوا وخلوه...بكرة بطلع من السجن وبياخد حقو... بعوضوه بقروش كتيرة تشترى حاوية كاملة من حاويات المخدرات الدخلت البلد ومالقوا ليها سيد حتى الان

[جركان فاضى]

#1385522 [ظلال النخيل]
2.25/5 (4 صوت)

12-15-2015 05:43 PM
همباتة وسرقة ايه اللي لماها مع الاخلاقيات والقيم

[ظلال النخيل]

ردود على ظلال النخيل
[جمال علي] 12-15-2015 09:35 PM
القاسم المشترك بينهما الشجاعة و الإيمان بالقيم.
إقرأ ما نظمه الهمباتة.


#1385513 [زرديه]
3.79/5 (13 صوت)

12-15-2015 05:34 PM
الوزيره منو ليه ما قلته اسمها

[زرديه]

ردود على زرديه
European Union [دردوق] 12-15-2015 10:05 PM
دا ولد تهاني مصطفي ( وزيرة الاتصالات ) !!! قووومو شتتتوووو!!



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

الاكثر تفاعلاً/ق/ش

الاكثر مشاهدةً/ق/ش

الاكثر تفاعلاً/ش

الاكثر مشاهدةً/ش







الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة