الأخبار
أخبار إقليمية
سري للغاية ..!!
سري للغاية ..!!


01-27-2016 02:59 PM
الطاهر ساتي

:: ومن مخاطر الإقتصاد ما يُسمى بالإقتصاد السري..هذا الإقتصاد الضار لايُخضع - إنتاجاً وتسويقاً - للسُلطات الرقابية..كأن يتسجلب أحدهم مصنعاً لإنتاج مواد غذائية، ليعمل في الخفاء بمنطقة نائية، ثم يوزع مواده في أسواق محدودة بغير علم السلطات الصحية ..وكأن أن يفتح أحدهم محلاً تجارياً بلا ترخيص وبلا علم الضرائب .. وهكذا.. وهناك أباطرة في كل أنوع الصناعة والتجارة - بما فيها السلاح والكحول والمخدرات - يؤرقون مضاجع الدول والشعوب بإدارتهم لعملياتهم بمنتهى ( السرية)..!!

:: وزارة المالية في بلادنا، وبغض النظر عن خطأ سياساتها الإقتصادية أوصوابها، كثيراً ما تجتهد في أن تدير دفة الإقتصاد الوطني بذات نهج (الإقتصاد السري)..وعلى سبيل المثال الراهن، قبل أسابيع، دفعت الصحف ثمن صدقها شتماً وتوبيخاً وإيقافاًة عندما نقلت عن وزير المالية تصريحا أبدي فيه - لنواب البرلمان - عن رغبته في تحرير بعض السلع برفع كامل الدعم عنها خلال موازنة هذا العام..نقلتها الصحف (كما هي)، ونفتها الوزارة وأغلظت في النفي، ثم قدمت للبرلمان ميزانية خالية من التحرير لتأكيد (النفي والتكذيب)، فصدقتها السلطات العلياً ثم حاصرت الصحف بسيول التهديد والوعيد بإجراءات جرفت (التيار)..!!

:: لم تكذب الصحف يومئذ وليتها كذبت ..وبما يحدث اليوم والمرتقب في الغد، على وزارة المالية - والسلطات الأخرى - الإعتذار للصحف بدلا عن التمادي في الخطأ والتهديد بالضرائب أو الوعيد بكشف الحسابات المصرفية .. والحدث ليس هو رفع الدعم عن الغاز ليرتفع سعر الأسطوانة إلى ثلاثة أضعاف السعر الفائت بلا علم نواب البرلمان كما ينص الدستور والقانون واللوائح ، بل هناك أحداث أخرى..فالقرار رقم (679/2015)، والذي نشرته التغيير بعدد البارحة، والموقع عليه وزير المالية، يوجه بنفيذ سياسة تحرير إستيراد وتوزيع مواد بترولية بواسطة القطاع الخاص ثم بيعها للجمهور بأسعار أسماها القرار بالعادلة ..والأسعار العادلة هي اسم الدلع لنهج ( على كيفك)، بحيث لا رقابة عليها ولا سلطان ..!!

:: نعم فك إحتكار كل المواد - بما فيها البترولية - يساهم في الوفرة والمنافسة بالإنتاج والجودة والسعر، ولكن في ظل سياسة تحريرية حقيقية وليست المرفوعة شعاراً و المحتكرة - بواسطة شركات مراكز القوى - واقعاً.. والمواطن لم يعد يجهل مخاطر الإحتكار بحيث يرفض فوائد المنافسة الحرة بالسعر والجودة، ولكن بالأسعار العالمية وهي أقل من أسعار السودان (الجهنمية)..وطلاب الثانوي - وناهيكم طلاب الإقتصاد - يتطلعون إلى حكومة تكتفي بإحتكار السلاح والقانون - فقط لاغيرهما - ثم تدع الأسواق وتجارتها والمصانع وصناعاتها للمجتمع وشركاته ..ثم يبقى السؤال، لماذا نُكران رفع الدعم - واللف والدوران - وتحميل الصحف ما لايطاق من المتاعب لكي لاتعكس للمواطن ما تفعلها وزارة المالية والقطاع الإقتصادي..؟؟

:: وزارة المالية تعلم أن أهم عناصر أية نهضة إقتصادية هي ( الشفافية ) وليس ( أم غُمتي) ..ولكن إن كان خطاب وزارة المالية ذاتها يفتقد لعنصر الشفافية والوضوح في مخاطبة الشعب - المستهدف بكل الإجراءات والقرارات - بحيث ينفي التحرير بالأقوال ثم يؤكده بالأفعال، فكيف يثق الشعب وتطمئن الصحف بأن يحدث هو خراب بما يشبه الإصلاح وليس إصلاحاً؟..وعليه، بدلا عن سياسة (سري للغاية) إصدقوا مع الناس بالبيان والعمل، فأنهم تشبعوا بالأكاذيب والمفاجأت.. وأعلموا بأن إدارة حياة الناس وأرزقاهم تختلف عن إدارة العمليات العسكرية بحيث تقتضي (الشفافية)، وأن تحرير الغاز وغيره يختلف عن تحرير كاوده بحيث يستدعي (الوضوح)..!!

[email protected]


تعليقات 16 | إهداء 0 | زيارات 12295

التعليقات
#1407489 [د. هشام]
0.00/5 (0 صوت)

01-30-2016 08:36 AM
أستاذ ساتي إقتصاد شنو و تخطيط شنو؟ الناس ديل شغالين بسياسة رِزق اليوم باليوم و عشان كدا بيتخبطو و يطلعو قرار الليلة عشان ينفوهو بكرة....ديل عندهم (كلام الليل يمحوه النهار)!!

[د. هشام]

#1407291 [ابن السودان البار]
4.00/5 (2 صوت)

01-29-2016 05:53 PM
يا استاذ الظاهر بلدنا بي خيرها والمغتربين ما مقصرين يضخون المليارات للسوق السودة وبلدنا فيها 28 بنك وطني يخدمها في التنمية منها بنوك صديقة كبنك ببلوس اللبناني وبنك فيصل الإسلامي وبنك البركة الإسلامي يساعدونا بكل إخلاص في التنمية ويساعدوا المستثمرين الأجانب وتجارنا في صفقاتهم و التنمية بشفافية وأمانة ؟؟؟ والعمالة الاجنبية تساعدنا مقابل مبالغ دولارية بسيطةعشان شبابنا حارس حدودنا ؟؟؟ والمستثمرين تجار الحلويات والشاورما يعدون لنا الأطعمة الصحية اللذيذة ويجدون ما يحتاجونه من دولارات في السوق ليحولوا دخولهم الي بلادهم بكل شفافية ؟؟؟ وشركات اتصالات التي تساعدنا في التنمية وبكل شفافية وأمانة تشتري ما تحتاجه من دولارات من السوق الأسود أي السوق الموازي ؟؟؟ فالشفافية مطلوبة وبلدنا بخيرها والحمد لله عندنا اقتصاديين عمالقة مشهود لهم بالطيبة والكرم وبشيرنا ما بقصر مع الضيف والجار كفانا وأسعدنا وفي زمنه أكلنا البتزا والهوط دوق وما شاء الله مذيعاتنا شحمانات في التلفزيون ماليات الشاشة 90 بوصة ؟؟؟

[ابن السودان البار]

ردود على ابن السودان البار
Hong Kong [ابن السودان البار] 01-30-2016 11:22 AM
ااصحوا ! اصحوا ! سودانا مسروق من أهله وضيوفهم وجيرانهم الكرام ؟؟؟


#1406940 [السنجك]
5.00/5 (3 صوت)

01-28-2016 04:45 PM
نظام عائش على جيب المواطن من الله خلقنا وشفنا خلقنا ماسمعنا بيهو ولا اظن نسمع بيهو...

[السنجك]

#1406909 [Rebel]
5.00/5 (3 صوت)

01-28-2016 03:34 PM
*"تنظيم الأخوان المسلمين" نفسه,و هو المسؤل الأول و الأخير عن تحديد "الوزارات و تنصيب "الوزراء", فى عهد الفساد هذا, هو نفسه يقوم على مبادئ "السريه" و "الدسائس" و "فقه الستره"!..و يعتمدهم كأدوات فاعله و اساسيه, فى تنفيذ مخططاته و برامجه و مؤامراته!!..و المعروف ان فاقد الشئ لا يعطيه!!
* وزير الماليه الحالى و السابق و اللآحق و غيرهم, جميعهم ترعرعوا و تشبعوا بهذا المنهج المعوج!..فكيف لك ان تطالبهم بالشفافيه, التى لا مكان لها إلآ فى مناخ الحريه و فصل السلطات و العداله و حكم القانون!!
* هذا "النظام" فاسد باكمله يا أخى. و هو قائم أصلا على "التمكين" و "الفساد" و "الظلم" و "اللصوصيه"!..و انت تعلم ذلك!
* فلا "تحفر فى البحر" يا أخى!!

[Rebel]

#1406864 [محمد]
3.00/5 (2 صوت)

01-28-2016 01:56 PM
الناس في السودان مفروض تحمد ربنا لانه في السودان بدولار واحد فقط ممكن تاكل وجبة كاملة فيها رغيف وبيض وفول دا ما بحصل في اي دولة تانية في العالم.

[محمد]

ردود على محمد
[شجرة التبلدي] 01-28-2016 05:53 PM
يا شاطر انت تلك الدول متوسط دخل الفرد اليومي يتخطي الخمسين دولار ومتوسط دخل الفرداليومي في السودان في عهدكم البغيض هذا اقل من واحد دولار

[جنرال زمان] 01-28-2016 05:27 PM
طيب يا شاطر وبعد ما نحمد الله حسب تفكيرك اﻷلمعي الدولاري، نسألك سؤآل بسيط جدا، كم يبلغ متوسط الدخل لكل رب أسرة في السودان (باستثناء الحرامية والدستوريين) بالدولار يا ألمعي ونشوف الدخل دا حيكفي لكم وجبة من أبو دولار بتاعتك دي؟؟؟؟؟ وزي ما قالو الفهم قسم وكعبة الفلهمة العوراء وشيل البطارية في القمرة!!!!!!!!

[حاج علي] 01-28-2016 04:46 PM
يا خوي انت كوز ولا شنو؟
في الخليج أي هندي ممكن بدرهم ونص ياكل براطه وصحن عدس او كيما احسن من وجبتك ويشرب شاي بنص درهم وراتبه عشره اضعاف راتبك
قال تحمد ربنا


#1406800 [الناهه]
5.00/5 (2 صوت)

01-28-2016 12:12 PM
صحيح..صحيح.. صحيح فقد وصفت يااستاذ الطاهر ساتي وصدقت
كدي ياجماعه صلوا على النبي
مشكلة السودان كبيره وعويصه
وزير الماليه طبق التحصيل اللالكتروني ..ده عمل ممتاز يحد جزئيا من تجنيب ايرادات الدوله الذي هو بوابة الفساد الرئيسيه ..
طيب وزير المليه جاب القروش الى خزينة الدوله .. المشكله مازالت قائمه .. في نافذين بيصلوا للاموال بعد ما تدخل خزينة الدوله رغما عن الميزانيه وابوابها وبنود الصرف .. يعني بيلخوها من اولها لاخرها رغما عن الميزانيه التى اجيزت على الورق زذلك نتيجة ان القرار هو قرار فردي لا يردعه دستور ولا قانون ولا قوه .. بالتالي فان وزير الماليه هو موظف ماسك دفاترbook keeper وكان الميزانيه انقدت نتيجة لذلك ايضا يؤمر بزيادة اي سعر لسلعه او خدمه عشان يغطي الفرق
يعني زي عملية الغاز الاخيره قبلها بيومين تلاته عملوا للشعب قانون مكافحة الشغب من 5 الى 10 سنوات لمن يخرج متظاهر او محتج ثم عملوا زيادة الغاز 200% ومافي زول قدر يطلع الشارع ولا يرفع راسه فقط يبكي ويسكت وكمان القانون ضرب عصفورين بحجر لان الامام الصادق المهدي داير يعمل (هنا الشعب) وكمان حوار الوثبه قرب يفرتق بخفي حنين وفي ناس شاركوا في الحوار محتاجين ادب وتاديب
ناهيك عن المقاطعين لحوار الوثبه المحتاجين لحسم
المشكله ياساده في القروش بعد ما تدخل خزنة الشعب في وزاره الماليه ويتم صرفها للمليشيات الامنيه ضد الشعب نفسه وما تنسوا الفساد
مبروك المركز الخامس للفساد عالميا والمركز الثالث عربيا
نائب الطيش بسير في الطيش

[الناهه]

#1406792 [سيف الدين خواجه]
5.00/5 (3 صوت)

01-28-2016 11:59 AM
يا استاذ طاهر انت بي صحك الانقاذ لا تستزور الا من منهم تحت اباطها ووزيرك هذا متهم بتقرير المراجع العام بالتزوير في عطاءات الاقطان القضية المدفونه ودع عنك قضية بنك المزارع المسجون نائب المدير المسكين ببورسودان وتم ترقية بدر الدين لوزير رجل كان نائب مدير بنك السودان زور في عطاء واحد ام كل العطاءات ماذا تريده ان يفعل !!!رجاء حاول كشف قضية بنك المزارع لتري العجي !!!!او بنك الثروة الحيوانية !!!هذه هي الميزانية المبشرة لخراب 26سنة تصدق لو نجحت الميزانية بالكاد ترجعنا لعام 1989يونيو ويا ريت تنجح في ذلك !!!الانقاذ عندها شنو غير الكذب!!!

[سيف الدين خواجه]

#1406770 [سامي كمال]
0.00/5 (0 صوت)

01-28-2016 11:33 AM
الإقتصاد السري هو العادة السرية للتجار حين تفرض الدولة رسوما مبالغ فيها علىيهم كما لايمنع ذلم من أن البعض من التجار يستلذ الكسب وفقا لهذه العادة حتى وإن كانت الدولة لا تفرض رسوما البتة

[سامي كمال]

#1406766 [سودانية]
0.00/5 (0 صوت)

01-28-2016 11:25 AM
شغل الكيزان ده اسمو شغل الارهاب والكباب ....
طبعا مافي داعي افسر اكتر من كده الارهاب لمنو ؟؟؟ والكباب لمنو ؟؟؟
بس ممكن اسأل واتساءل لماذا صحيفة التيار بالتحديد ؟؟؟ ياخوفي يابدران دي تكون عاملة زي المجرم المبستهبل البفلق راسو بيدو ويروح القسم يقول للبوليس فلان الفلاني هو الضربني...
عثمان ميرغني تااااااااني هو الوحيد البتفلق من دون باقي الشباب وفي ظروف معينة باتت واضحة للجميع ليتشابه علينا البقر...ياربي بكون قبض كم المرة دي ....من حقي اتساءل...هو السؤال حرم علي راي المصارنة

[سودانية]

#1406730 [عودة ترنتي]
4.94/5 (5 صوت)

01-28-2016 10:33 AM
حرامية و كضابيين
سعر القدم المكعب من الغاز في الاسواق العالمية = 2.16 دولار
القدم المكعب من الغاز يعادل 28 كيبو تقريبا و يعادل 2 اسطوانة سعة 12 كيلو زائدا 4 كيلو --- سعر الاسطوانة 1 دولار + ترحيل و ضرائب و ارياح اصبحت = 3 دولار
سعر الدولار الرسمي 6.7 جنيه ---
اذن سعر بيع الاسطوانة للمستهلك تكون في حدود 3 ضرب 6.7 = 20.1 جنيه
او قيمة الاسطوانة بسعر السوق الاسود للدولار 3 ضرب 11.6 = 34.8 جنيه
و مما تقدم يتضح ان الحكومة تحقق ارياح عالية من بيعها الغاز باسعار غير واقعية
الجكومة فقط تبحث عن مصادر لتمويل صرفها البزخي و التضخم علي جهاز اداري و دستوري عاطل و مترهل --- المواطن السوداني يدفع دم قلبه ليتنعم و يستمتع الكوز المتعفن بحياته ----
قصر الله آجالهم --
عليهم اللعنة

[عودة ترنتي]

#1406712 [Locholo]
5.00/5 (1 صوت)

01-28-2016 09:58 AM
يا الطاهر ساسكت آقصد ساتى فات عليك بان غزو كاودا آكثر تكلفا من رفع الدعم عن المحروقات فعلى الشعب السودانى النهوض اليوم قبل الغد لتحرير آنفسهم من الكيزان بدل الحديث عن الدفع باطفالهم الى محرقة كاودا !!
الم تقراء تصريح القائد عرمان حين قال ان تكلفة غزو كاودا و الصلاة فية آكثر من الصلاة فى مكة ...

[Locholo]

#1406672 [الرجال ماتوا في كرري]
0.00/5 (0 صوت)

01-28-2016 08:39 AM
اخي الاستاذ طاهر ليس هناك اي دعم حتي يتم رفعه إنما زيادة في الأسعار عكس كوكب الارض حيث عندهم الأسعار في انخفاض عالميا اما في كوكب السودان كل شيء مختلف
ودايما في مقدمة العالم من حيث الفساد الدولة رقم 3
رفع الدعم قال!!!!!!!!!!!
ونحنا طبعا مفروض نصدق ولا كتر خيرنا انو في دعم واترفع
حسبي الله ونعم الوكيل علي كل ظالم
ولا حول ولا قوة الا بالله

[الرجال ماتوا في كرري]

ردود على الرجال ماتوا في كرري
[زول قرفان] 01-28-2016 01:23 PM
انا ما عارف هبالة الطاهر ساتي و معظم الصحفيين شابكننا رفع الدعم رفع الدعم بربكم هل الانقاذ مستعدة لدعم ابسط شيئ منذ ان ظهرت بوجهها الكالح في ارض السودان ؟


#1406655 [ابو جلمبو]
0.00/5 (0 صوت)

01-28-2016 08:14 AM
صورة عجيبة فيها تداخل عجيب بين الحيوانات والبشر وبين البساطة والفقر والبيوت والدكاكين كانها في مجلة قديمة

[ابو جلمبو]

#1406463 [أبراهيم عثمان]
2.75/5 (5 صوت)

01-27-2016 06:00 PM
يا الطاهر ياخوي شفافية شنو في موضوع ذي ده؟ أنت نسيت حصل شنو لما رفعوا الدعم عن البنزين والجازولين؟ نسيت مظاهراتهم وفوضتهم ديك و80 قتيل وتخريب لممتلكات المواطنين من عربات وصيدليات وبقالات؟ حاجات ذي دي ما بتنفح فيها شفافية دي دايرة تجي فجأة كدي وبنظام سري للغاية ونظام غومتي فعلاًَ لأنا شعب بتاع فوضي وسريع الغضب. لو كان كلمونا قبل فترة برفع الدعم عن الغاز كان الاحزاب السياسية الفوضجية دي عبأت الناس وطلعو مظاهرات وماتو المساكين في الشوارع ساي لكن الحكومة ذكية وتفتيحة وعارفة هي بتعمل شنو. وفي النهاية كويس أنك عارف ان تحرير السوق ورفع الدعم دي حاجة كويسة للإقتصاد والعافية درجات ياخوي.

دعم الغاز ودعم البنزين المستفيد الاكبر منه هو المواطن الغني الساكن في المنشية والرياض وكافوري والمهندسين وده بيستهلك كتير جداً لأنو عندو أكثر من عربية وأكثر من أنبوبة غاز.. لكن المواطن الفقير ده انبوبة الغاز بتكفيه شهرين تلاتة أربعة بكل إرتياح بينما الغنبي ما بتمشي معاه شهر.. يعني قصدي الحكومة قلبها علي الفقير ده وفي كل مرة يرفعوا الدعم عن حاجة بيزيدوا المرتبات عشان يسدو الفرقة.

لما رفعوا الدعم عن البنزين زادوا المرتبات لكل الناس وهسع اليومين ديل بعد رفع الدعم عن الغاز حتكون في زيادة مرتبات تانية لكل الناس. والعافية درجات والناس ما تنسي أننا دولة من دول العالم الثالث الفقرانة شئنا أم أبينا. يعني الحكومة تعمل شنو غير نظام أم غمتي؟ ذي الوالد الذي يخدع إبنه المريض ويقول ليه أرح نتفسح ويسوقو يوديهو للدكتور ويديهو الحقنة الحارة.

الحكومة شغالة معانا بنظام: قلبي علي جناي وجناي قلبو علي الحجر.

[أبراهيم عثمان]

ردود على أبراهيم عثمان
European Union [الـــســـــيــــف الـــبـــتـــار] 01-28-2016 02:12 PM
الظاهر أنك عايش فى عالم أخر غير عالمنا دا ؟
قل خيرا او اصمت !!!!!!!!!

[وداغبش] 01-28-2016 01:13 PM
يا زول ات راميك جمل ... قلت ليك كلام كتير ولخبطت لخبطة شديدة خلاص

[Fatmon] 01-28-2016 12:45 PM
فعلا في ناس في السودان مغيبين ومعمول ليهم غسيل مخ واكبر دليل كلامك الخارم بارم أصحي من الوهم ده وأعرف الحاصل حولك شنو بالضبط

[علي موسى] 01-28-2016 10:03 AM
هههههههههه شر البلية ما يضحك .. نحن حكومتنا اسلامية او كما تدعي ف عندها خيار واحد هو الصدق اتبعتو كان بها م اتبعتو يبقى دة كضب وزور وتلفيق ولعب بي عقول المواطنين ونحن شبعنا والله وقرفنا ... ويا ابراهيم انت شكلك ماعايش معانا هنا .. يعني الحكومة قلبها علي جناها ؟؟ اخخخخخ

[ميم كاف] 01-28-2016 08:35 AM
ياسيد ابراهيم الحكايه ما رفع الدعم لانو اساسا لا يوجد دعم والحكومه وتجارها يربحون المليارات لان اسعار البترول والغاز معروفه لاي انسان وسعرها يعلن يوميا للعالم وارجو ان تطلع علي الاسعار العالميه لتعرف هذه الحقيقه ثانيا زياده اسعار البترول والغاز اكتر المتضررين هم الفقراء لان زياده البتروا معناها زياده المواصلات وزياده ترحيل المواد اما زياده الغاز معناها ان صحن الفول وسندوتش الطعميه وكبايه الشاي سيرتفع اما حكايه الاغنياء نقول ربنا يزيدهم ولكن من الذي كان سببا في غني هؤلاء اوليس هي دوله هي لله

[وحيد] 01-28-2016 08:12 AM
انت جادي يا " شيخنا"؟

[جلال الدين محمد الفاتح] 01-28-2016 03:05 AM
يا ابراهيم عثمان أنت عندك ( صامولة فاكة ).

[جانا الخبر] 01-28-2016 02:43 AM
أكيد سمعت إنو وزير المالية شايتنو قريب ..
شكلك مُرَنِّقْ


#1406455 [حاج علي]
5.00/5 (4 صوت)

01-27-2016 05:22 PM
يا الطاهر ساتي
سيبو اللف والدوران الحكومة نفسها تديرها عصابة الاخوان المسلمين السرية..
اقنصاد سري قال

[حاج علي]

#1406399 [هميم]
5.00/5 (5 صوت)

01-27-2016 03:15 PM
يا طاهر يا خوي: إنت ما تخلي ناس البشير في عواستهم في الاقتصاد وتدميرهم للبلاد والعباد حتى يأخذهم الله أخذ عزيز مقتدر بواسطة الشعب أو بقضاء آخر من عنده، وهذا مصير الظالمين! الجائع لن يوقفه شيء عن التصدي للظالم وناس البشير جوعوا الناس وأوصلوهم إلى مرحلة يبدو فيها الموت أهون من الجوع!

[هميم]

ردود على هميم
[درية حسن] 01-28-2016 08:07 PM
سلام اكتر ما عجبني في الفيلم المخرج سري بتاع الغاز دة انو رئيس البرلمان قال ايه بلملم في القصة،،اها لملمها واللا لسع؟



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة