الأخبار
أخبار إقليمية
"ما كُنتَ عارِف"..!
"ما كُنتَ عارِف"..!



01-28-2016 11:39 AM
عبدالله الشيخ

قُلنا لهم أن الطرق إلى الله كثيرة..الطرق إلى الله بعدد أنفاس الخلق، قالوا لا.. إلا الطريق الذي يمر عبر المنشية أو القصر..! قلنا ليهم خلّونا نشيل التّمُر بتاعنا، نمرُق بيهو على أسواق النهود و زالنجي، أو خلّونا نبيعو في الحدود مع دولة الجنوب المفصول..قالوا لا لا.. إنّهم يرفضون تعاطي المُنكر الذي لا تقبله الشريعة..!

قالوا دايرين يصلِّحوا العلاقات مع دول الجوار، فبدأوا اصلاحهم بـ "التبسُّم" في وجوه المصريين، من أجل "سي مُرسي"، ودعموا المفاتيح الليبية لصالح المُلتحين ، وأعلنوا عودة المياه إلى مجاريها مع بلاد الخليج فقاطعوا طهران، بينما الشيطان الأكبر نفسه، قد تصالح معها..!

تعاضدوا مع أهل الحجاز،أملاً في صيد ثمين، فـ "غتّسوا" هيبة أسعار البترول..! قلنا يا بختنا ويا سعدنا..سعر البرميل على قفا من يشيل..دعونا نستفيد من رَخسة الجّازولين ، وهنيئاً لنا ركوب بصّات الوالي بانشراحٍ وارتياح..هنيئاً لنا الدفء من هذا البرد..لكنهم داهموا فرحتنا، فزادوا تعريفة المواصلات، ورفعوا سعر انبوبة الغاز لثلاثة أضعاف..!

أكدوا ،أن ميزانية 2016 خالية من الزيادات ،ومبرأة من قرارات رفع الدعم.. صدّقناهم ، واحتملنا لجاجة الحوارات، وإعلام للمشّاطات، وقلنا نمرُق، نشوف أرزاقنا في بلاد الله الواسعة.. طوّالي مشوا رفعوا أسعار تذاكر الطيران وقرروا بيعها لنا بالدولار..! قلنا بسيطة.."خلّيها مستورة"..أحسن بأي طريقة، نلحق الدكتور علي الحاج محمّد، لنتعايش معه فوق جبال الألب الاوربية،،فإذا بدكتور علي، يحضِّر شعورو، و يلملم عفشو، ويقرر الرجوع للقصر العشوائي..!

وبرضو خير، نمشي لي غيرو..قلنا نمشي للشيخ غازي العتباني، يتوسط لينا في شغلانية،، لقينا العتباني رِكب راسو ومشى المعارضة..! قلنا نشوف دبارة جديدة،، نقعُد نسمع، و نفهم حاجة فقهية من علي عثمان، لقينا الزّول يقول لينا، والله أنا "ما كُنتَ عارِف"..!!

بكى الفقيه ،حتى أبكّى الجميع ، حتى الفنان عبد العزيز المبارك زاتو قعد يجعِّر، وقال:"الاغنية دي أنا زاتي ما بريدها، لكن فرضوها علي، وجبروني عليها..!

و"ما كنت عارف يا ريتني كنت عارف"..!

هجرنا الواسعة في أريافنا، لنجاوِر الصّفوة في الخرطوم..في الخرطوم أكد وزير البيئة، أننا ــ للأسف الشديد ــ نشرب من الصرف الصحي..!

في الخرطوم قال ـــ عم عبد الرحيم ـــ إنو "الجّماعة باعوا الحتّات كلّها"..! وعديلة تبْ، خلّينا نلزم الجابرة، ونبقى مع الناس الصابرة، ونتفرّج في حوار قاعة الصداقة..في القاعة، لقيناهم مرقوا لينا بـ "شعيب"، ودخلوا لينا بـ"تراجي"،التي أترعت في الأحاجي..!

ولسّة نحن نجرِّب، ونحاول ندخل مكاتب دولة الأخوان ذات التمكين..! قلنا،نمشي نضرُب الخلا، ندقُش الصحراء، يمكن نطلع لينا بشويّة دهيبات، لقيناهم هناك متعاقدين، مع شركة"سيبرين"..!

تقّلنا دمّنا و قلنا نلقِّط جرام جرامين ، من بعيد لبعيد..لقيناهم: كل ساقطة،عندكم ليها لاقطة..! فكّرنا بصورة واضحة..قلنا أحسن ننشغل بقراية و تربية أولادنا، فإذا بالحاويات قد تسرّب إشعاعها، وإذا بناظر المدرسة لا يقبل تفاوضاً، والدفع بالمليون..!

لجأنا الى المسجد، فأوقفونا في الصف الخلفي..قلنا نمسك درب العبادة..لقيناهم "عندهم دين" يقرأون فيه المأثور كأنه قرآن،، ويكتبون الحديث في مكان الآية الكريمة، ويضعون المُرسل مشكولاً و منسوباً للترمزي أوالبخاري..! تربّصتنا الدّوائر يا صاحِبي.. و"دار أبوك خِربت، شيل ليك منّها شليّة"،، لكنّهم استشعروا حرارة النبض، فقبضوا السيولة، واستأجروا الدرداقات، وتشاركوا بينهم، تحصيل العوائد و النفايات..وأي زول يدق الباب، دايرك تدفع..!

قلنا مافي طريقة.. نمرق الشارع العام..لقيناهم ــ تحت زريعة التخريب ـــ رفعوا "عقوبة التظاهر" لخمس سنوات..!

وما عندنا "حلل"..!

كل ذلك يجري، بينما برنامج "إصلاح الدولة" لسّه شغّال وشغّال، بنظام البث التجريبي..!


تعليقات 7 | إهداء 0 | زيارات 2406

التعليقات
#1407156 [Abu_Mohammed]
0.00/5 (0 صوت)

01-29-2016 08:41 AM
يا اخي انت زول كتاب

[Abu_Mohammed]

#1407070 [جفال]
0.00/5 (0 صوت)

01-28-2016 11:33 PM
كلو من بدر الدين لو زود العيار حبة بس ما كان حصل الحصل مقال ما ساهل بس القعاد في البيت عقوبتو شنو ياترى ؟؟؟؟؟؟؟؟؟

[جفال]

#1407026 [أنا السودان]
0.00/5 (0 صوت)

01-28-2016 09:14 PM
وحتي لو فكرت تنضم للتمرد..مافي طريقة لانو عندهم متمردنهم ..
ولو ماشي لي شيخ الامين الدجال تري زاويته قلبوها دار للحزب فرع بيت المال واقتسام السلطة والثروة..شعار رفعوه وطبقوه من زمان..
في زول جاب سيرتك انت يا مواطن..؟؟
احسن حاجه تعملها...تشوف ليك سنبك..مركب..ماشي اي بلد..
يا تخارجت 38بالسلامه..يا احتسبناك شهيد...

[أنا السودان]

#1406934 [عبده]
5.00/5 (1 صوت)

01-28-2016 04:36 PM
يسلم يراعك يا رجل

[عبده]

#1406892 [الجــــــــــــــزيرة ابـــا]
1.00/5 (1 صوت)

01-28-2016 03:00 PM
انا كنت عااااااااارف
بس هم قايلنى ما عارف
كنت عاااارف انه دة درب السرقة وكد العضام

[الجــــــــــــــزيرة ابـــا]

#1406823 [بدوى]
5.00/5 (1 صوت)

01-28-2016 12:49 PM
مقال رصين الحال يغنى عن السؤال

[بدوى]

#1406788 [ahmed hassan ahmed]
4.00/5 (2 صوت)

01-28-2016 11:53 AM
وما كنت عارف لحظك عن صارف
بلا يخمهم

[ahmed hassan ahmed]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة