الأخبار
أخبار إقليمية
الشرطة تفض وقفة احتجاجية لـ"الفريشة" من أمام البرلمان
الشرطة تفض وقفة احتجاجية لـ"الفريشة" من أمام البرلمان



برلماني يدافع عن إزالة محال التجار
02-02-2016 10:40 AM
البرلمان: سارة تاج السر- عازة أبوعوف
فضت الشرطة، وقفة سلمية لصغار التجار بسوق أم درمان "الفريشة" نفذوها أمام مقر البرلمان، احتجاجاً على قرار معتمد أم درمان مجدي عبد العزيز، بتشريد ١٢ ألف تاجر وإلغاء تصاديقهم المؤقتة، ورفع المشاركون في الوقفة لافتات مناوئة للمعتمد حملت عبارات" لا للجهوية ولا للعنصرية" "لا للمصالح الشخصية"، "لا للتشريد"، في حين منع رئيس لجنة التشريع والعدل وحقوق الإنسان، بالبرلمان أزهري وداعة الله، وعدد من النواب، الشرطة من استخدام القوة ضد المحتجين.
وكشف المتحدث باسم لجنة السوق أحمد عمر أحمد للصحفيين أمس، عن دخول ما بين (٣٠٠-٤٠٠) تاجر السجن بسبب الجبايات المفروضة عليهم من قبل المعتمد، وأضاف: "لو عندك باكو سجاير أو حلاوة شكلت، بدفعوك ١٢٠٠ جنيه، ولو ما عندك تمشي السجن"، واتهم المتحدث المعتمد بإلغاء ١٢ الف تصديق دون الرجوع للجنة التجار، واستفزازهم بردود عنصرية مثل "أم درمان للأمدرمانيين" وقال إنه وصفهم بالـ"الشماشة"، مشيراً إلى أن صغار التجار يأخذون البضائع من تجار الإجمالي على أن يدفعوا آجلاً مما تسبب فى دخولهم السجن بعد إزالة محالهم وتعثرهم في السداد. وأكد أن التجار ليس ضد التنظيم ولكن على المحلية أن تحول نشاطهم إلى سوق منظم، وكشف عن معاناة عشرات الأسر التي يصل عدد أفرادها إلى ١٢،١٣ شخص بعد سجن عائلها وأضاف متسائلاً: "الناس دي تمش وين وتاكل شنو". وتسلم نائب رئيس لجنة التشريع والعدل، أزهري وادعة الله مذكرة التجار، ووعد بتسليمها لرئيس البرلمان بعد عودته للبلاد، وحال وداعة الله بمعية النواب، سهام حسن ومثابة حاج حسن، وعمر دياب، من اعتداء قوة الشرطة المكونة من خمسة سيارات كبيرة وصغيرة على المشاركين في الوقفة.
ونفذ التجار وقفة أخرى أمام مجلس تشريعي الخرطوم، وقال النائب البرلماني وممثل التجار عمر عبدالله إن المحلية استخدمت الشرطة للإزالة وقاموا بضرب التجار مما دعا للاشتباك بينهم، وكشف عن فرض غرامة على التجار بلغت مليون جنيه عبر قاض بالمحلية التي اتهمها بالمحاباة، في وقت أعلن نائب رئيس المجلس محمد هاشم، عن منع التصاديق المؤقتة، ودافع عن الإزالات وقال إن ما يقوم به المعتمد تنفيذ للقانون، معتبراً أن ما يحدث في سوق أم درمان فوضى كبيرة وسيقومون بحسمها فوراً، مشيراً الى أن التصاديق ستمنع نهائياً ما عدا في المواسم "الأعياد وموسم المدارس".

الجريدة


تعليقات 7 | إهداء 0 | زيارات 3192

التعليقات
#1409302 [Lila Farah]
0.00/5 (0 صوت)

02-02-2016 07:31 PM
صحي الناس وضعهم في أماكنهم دى مؤقت من أول يوم وهم عارفين الحقيقه دى
عارفين انو ممكن يجي يوم تنتهي عقودالانتفاع بتاعتهم ويتوجب عليهم مغادرة
هذه الاماكن لكن علي الا يتم ذلك فجأه وبهذه الوحشيه.

كان يتوجب انذار الناس ديل قبلها بعام كامل علي الاقل.
كان يتوجب أن تقوم الحكومه بتجهييز اماكن بديله مجهزه
تجهيزا حضاريا لتمنحها لهؤلاء الناس يحفظ كرامتهم وانسانيتهم
كسودانيين .

أمااذا كانت الحكومه عاوزه ترجع الناس ديل كل زول لي حلته التي
جاء منها بتنظيم العاصمه فهذا الكلام غير دستورى ولا قانوني ولو في
قانونيين فاهمين في البلد لكانو نشفوا ريق المعتمد ونشفوا ريق اب رياله ذاتو
وهناك مليون طريقه وطريقه لأن تجعل الحكومه الريف جاذبا بشده لأبنائه الذين ماتركوه وهاجروه الا بسبب فشل الحكومه في تنميته وتطويره وبسبب سياسات الجبايات التي تعتمدها العصابه من يوم احتلالها للبلد.

أحد هذه الطرق التي اقترحها فلتصدر الحكومه ومجلس التصفيق فرمانا او سمه قانونا يكون قانونا محصنا غير قابل للطعن او الألغاء يعفي أى مستثمر محلي في الاقاليم مهما بلغ صغر حجم استثماراته من أى ضرائب أو جمارك أو زكاة أو أى رسوم حكوميه أو جبايات معمول بها الان او سيصدر بشأنها قرار مستقبلا ولمدة 20 عاما تبدأ من تاريخ اثبات ذلك في الاقاليم علي أن تزيد مدة الاعفاء الي 50 عاما
كلما كان المستثمر يستثمر في الزراعه والانتاج الحيواني ومدخلاتهماوتسويقهما.
وتقوم الحكومه في ذات الوقت بالغاء كل هذه الاعفاءات والامتيازات من أى مستثمر محلي تثبت انه لم يستثمر في اقليمه وتحايل للاستفاده من هذه المزايا ليستثمرها في العاصمه.

أنا متأكده أنو في خلال عام واحد فقط سيتجه معظم ابناءالاقاليم الي اقاليمهم الاصليه ليستثمروا فيها وينموها وسينجحون في ذلك بكل تأكيد لأنها مناطقهم ومراتع صباهم التي نشؤا وتربوا فيها هي أولي بهم وبأموالهم وهم أولي بها طالما الحراميه بعيدين منهم.

وصدقوني مافي زول من الاقاليم مرتاح في الخرطوم ابدا والبقول مرتاح كضاااااااب

أؤكد قبال أمش لكل السودانيين الحق في كل شبر وركن من السودان في الاقاليم أو في العاصمه وعلي الفريشه المطرودين ان يرفعوا دعوى جنائيه ضد المعتمد الحمار
الذى استفزاهم بردود عنصرية مثل "أم درمان للأمدرمانيين" وقال إنه وصفهم بالـ"الشماشة" دا لو كانت ادعاءاتهم دى حقيقيه ماتكون سلبطه بتاعة ابناء الجزيره والاالنيل الابيض ساكت اقول ذلك لعلمي بأنو معظم الفراشه اذ لم يكونوا كلهم من المنطقتين ديل بالذات .
اختكم ليلي فرح الحلفاويه
واشنطن

[Lila Farah]

#1409202 [ابو رحمه]
0.00/5 (0 صوت)

02-02-2016 03:07 PM
قاتلك الله يا مجدى عبدالعزيز آكل قوت الغلابه وكل المعتمدين المنافق .

[ابو رحمه]

#1409201 [عبد الحميد السر]
0.00/5 (0 صوت)

02-02-2016 03:04 PM
نعم للتنظيم السوق ولا لسياسة التشريد والقمع . ولكن قبل اصدار تلكم القرارات التعسفية عليكم ايجاد البديل لهؤلاء الغلابة الذين لديهم اسر يقفون عليها ،اعطوهم الحلول البديلة

[عبد الحميد السر]

#1409118 [Ahmed]
5.00/5 (2 صوت)

02-02-2016 12:13 PM
فعلا الناس دي تمشي وين وتاكل شنو مشكلة بعض المسئولين قصر النظر فقرار الازالة قصد منه المنظر ولكن الا يعمل هؤلاء الفريشة في اعالة اسرهم لابد ان يقوم المسئول بايجاد حل عادل لهم

[Ahmed]

#1409110 [دايره صبر]
4.88/5 (4 صوت)

02-02-2016 11:58 AM
يا أخ كبس الموز تحت السرير
من ما قمنا الفريشه ديل شغالين امام المحلات والاسواق كلها مشوه من عدم التنظيم من قبل المحليات وبعدين ياخ الأرزاق على الله وكل زول ليهو رزقو
وظائف شنو البتتكلم عنها حملت الشهادة والخريجين ما لاقين شغل عايز يشوفو شغل للفريشه البلد كلها مشوه بالنفايات وعلى راسها العاصمه أذهب للاسواق وشوف بعينك النفايات ياخ عمال النظافه فصلو جزء كبير منهم من العمل.بالله عليك ورينى شئ صالح فى السودان سوء تعليم ولا صحه ولا مياه ولا كهرباء
برضو تقول لي تشويه السوق وعمل فوضى !!!!!!!!

[دايره صبر]

#1409096 [كبس الموز التحت السرير]
3.00/5 (6 صوت)

02-02-2016 11:26 AM
دايرن الحقيقه . لكن ياخوانا الحقيقه مره شديد . مافى حاجه اسمها فريشه ولا طبليه . فى سوق دكاكين ليها تر خيص دى المفروض تبيع للناس . اما الباقى ده كلو بشوه السوق وبعمل فوضى . كل هولاء الفريشه المفروض اشوفو شغل تانى . الحكومه تخلق ليهم وظائف.

[كبس الموز التحت السرير]

ردود على كبس الموز التحت السرير
[جنرال زمان] 02-02-2016 03:36 PM
يا كيس الموز اسأل إبن السودان البار!!!!! ود الجبل بدايته في الستينيات كان سارح بي طبلية معلقة في صدره بي حبل، تجي انت تقول كلامك الفطير دا!!! وبعدين ياخي الخريجين شغالين فريشة وسواقين ركشات وغسالين عربات في زمنكم اﻷغبر دا،،، ولعنة الله على الظالمين

[سلام يا بلادى] 02-02-2016 01:34 PM
مثل هذه المشاكل (الفريشة) كثيرة تكاد توجد فى كل مدينة سودانية ومثل هذه الحلول اصبحت غير مجديةابدا ولكن فى العاصمة متفاقمة جدا بسبب هجران الناس لمناطقهم الاصلية وترك الريف المنتج وفى النهاية سيكون الصدام كبيرا بينهم والمعتمدين لان الحكاية فيها اكل عيش ومافيش حد احسن من حد الحلول هى تنمية الريف واقامة مشاريع كبيرة وعملاقة تستوعب عمالة وطنية تحد من البطالة .


#1409082 [breeze]
5.00/5 (2 صوت)

02-02-2016 11:04 AM
هو رئيس البرلمان خارج السودان؟

[breeze]

ردود على breeze
[abushihab] 02-02-2016 08:19 PM
نعم...القاعد ليها شنو!!! بعد ما لحس كلامو...(الزيادة علي الغاز خط احمر),,, طلع ليهو الريس وراهو الطفي النور منو.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة