الأخبار
أخبار إقليمية
مايكل مكوي: "نحن ما عملنا أي حاجة" وضعنا لا يسمح لنا بأن نساعد "زول تاني".. نحن ما قادرين نساعد نفسنا
مايكل مكوي: "نحن ما عملنا أي حاجة" وضعنا لا يسمح لنا بأن نساعد "زول تاني".. نحن ما قادرين نساعد نفسنا
مايكل مكوي:


03-18-2016 06:58 PM
اميرة الجعلي
** قرر مجلس الوزراء في اجتماعه الدوري أمس (الخميس) برئاسة المشير عمر البشير رئيس الجمهورية معاملة مواطني دولة جنوب السودان المقيمين بالسودان بوصفهم أجانب لدى تلقيهم خدمات الصحة والتعليم، كما قرر المجلس التحقق من هوية الجنوبيين المقيمين بالبلاد، وهدد باتخاذ الإجراءات القانونية حيال كل من لا يحمل جواز سفر وتأشيرة دخول رسمية خلال أسبوع، في وقت هددت الحكومة بإغلاق الحدود مع جمهورية جنوب السودان مجددًا حال لم تتوقف عن دعمها للحركات المسلحة السودانية. وشددت على أنها ستتعامل معهم وفق القانون الدولي. جاءت كل هذه التطورات في أعقاب الاتهامات التي وجهتها الحكومة خلال اليومين الماضيين لحكومة جنوب السودان بأنها لازالت توالي دعم الحركات المسلحة، بالإضافة لعقدها اجتماعات معها -أي الحركات المسلحة- في العاصمة جوبا. كل هذه القرارات والاتهامات وضعتها (اليوم التالي) أمس (الخميس) أمام مايكل مكوي، الناطق الرسمي باسم حكومة الجنوب ووزير الإعلام، عبر اتصال هاتفي لاستفساره حول المستجدات التي طفت إلى السطح في الآونة الأخيرة ومدى تأثيرها على علاقات البلدين.
الخرطوم، جوبا - أميرة الجعلي
* اتهمت الخرطوم جوبا باستمرارها في دعم الحركات المسلحة السودانية، وأنها عقدت اجتماعات مع قادة الحركة الشعبية قطاع الشمال في جوبا، وهددت بإغلاق الحدود مجدداً ما هو تعليقكم؟
- طبعا الاتهام ليس في محله.. نحن ما عملنا أي حاجة.. حكومة الجنوب لم تدعم أي حركة تمرد في الخرطوم، وحتي وضعنا لا يسمح لنا بأن نساعد "زول تاني".. "نحن ما قادرين نساعد نفسنا"..!
* أصدر مجلس وزراء السودان قرار بمعاملة الجنوبيين في السودان كأجانب، كيف ترون ذلك؟
- هم أصلاً أجانب من بدري.
* لكن مجلس الوزراء أيضاً اتخذ قراراً أمس بأنه سيتخذ إجراءات قانونية حيال كل من لا يملك جواز سفر أو تاشيرة دخول رسمية خلال أسبوع..
- على كيفهم؛ نحن نعمل شنو؟! بعدين أي مواطن مشى بدون جواز ده بطريقتو.. يعني نقعد نحنس فيهم نقول ليهم ياخي ما تعمل كده؟! الجديد شنو يعني؟!
* إذن كل هذه القرارات التي اتخذت من قبل مجلس الوزراء السوداني والتهديد بإغلاق الحدود كيف تراها؟
- مؤكد أنها ستؤثر سلباً في علاقات البلدين لأن قرارات مثل هذه، ونحن نتحدث عن تفعيل اتفاقية التعاون المشترك بين البلدين؛ بهذه الطريقة كيف يمكننا تفعيل هذه الاتفاقية؟
* لكن هناك اتهام موجه لحكومة الجنوب بأنها هي التي تماطل في تنفيذ الاتفاقيات خاصة الاتفاقية الأمنية؟
- هذا مجرد اتهام، والاتهام مفتوح؛ "أي زول ممكن يتهم أي شخص وفي أي وقت"، لكن عليه إثبات هذه الاتهامات وإلا تكون مجرد اتهام فقط.
* ما هي الخطوة التي ستقوم بها دولة الجنوب تجاه هذه القرارات؟
- لن نقوم بأي خطوة إلا حينما نرى أنهم نفذوا هذه القرارات على أرض الواقع، لكن نحن نرى أن لا بد من جلوس الطرفين للتباحث.
* هل يمكن أن تستدعي حكومة الجنوب سفير السودان بجوبا احتجاجا على الخطوة؟
- لا ما حنستدعي السفير لحدي ما يتم تطبيق القرارات وبعدها نشوف نعمل شنو، وحكومة الجنوب ترى من الأفضل ألا تتسرع، وأن تعطي نفسها الفرصة حتى يجلس الطرفان لمناقشة القضايا العالقة

اليوم التالي


تعليقات 20 | إهداء 0 | زيارات 8207

التعليقات
#1430979 [ابوالبــــــــــــــنات]
5.00/5 (2 صوت)

03-19-2016 06:43 PM
حقيقه لا ادرى اى سبب منطقى لتشنج البعض من قرار اعتبار الجنوبين اجانب لا اجد مبررآ واحدآ لمكابرة هذه الحقيقة . حتى تاريخ انفصال الجنوب ليس هناك احد ينكر على الجنوبين العيش والعمل والتمتع بكل الحقوق المدنيه وفق الدستور من منطلق حق المواطنه لافرق فى ذلك بين هذا وذاك والملاحظ قبل الانفصال بان الجنوبين كان يتمتعون بحقوق اكثر من الشمالين حيث كانت مخصصه لهم نسبة25% من الوظائف الحكوميه مع حق المنافسه فى نسبة75% المتبقيه اضافة للتمتع بمجانية التعليم والعلاج واذكر ونحن طلبه بمدرسة بورتسودان الحكوميه قبل ان تصبح جامعة البحرالاحمر كان الطالب الجنوبى مميز عن باقى الطلاب حيث يتوفر السكن والماكل والملبس والترحيل من والى المدرسة ولا اظن باقان اموم وفاولو مكوى وفاولينو يكذبونى فى ذلك .سقت ذلك حتى يدرك المتشنجون اى وضع كان يتمتع به الجنوبين. اما مثالة تحديد شكل معاملة الجنوبين بعد الانفصال فهذا امر سيادى يخص الدولة ويتم وفق مصالح الدولة . ومن الخطأ وضع مقارنه بين مواطنين دولة واخرى . اما اسطوانة اواصر الاخوة المشروخة لن تجدى نفعآ ولن تغير حقيقة وضعية الجنوبين كاجانب او لاجئون يعاملون وفق قانون الاجانب ووفق المعاهدات الدوليه . ،،،،، فيجب ان ندرك بان الجنوبين تنكرو لكل ذلك وقد يقول قائل باننا من دفعنهم لذلك فهذا قول يكذبه تهافت الجنوبين على العوده نحوالشمال بعد الانفصال فالجنوبين ضاع عليهم حلم الجنة الموعودة بالعامل الاثنى والقبلى.

[ابوالبــــــــــــــنات]

#1430798 [المنجلك]
1.00/5 (1 صوت)

03-19-2016 08:50 AM
يا حيوان البشير بالله عليك من هي الايادي العاملة التي شيدت القصر الذي تجلس عليه؟

الجنوبيين مثل الشماليين انه سودان واحد في الاساس هم مستحقين لكل مساعدة ممكنة

بعدين البلد ملانة اجانب لماذا لا يتم طرد هولاء الاجانب الذين لم نستفد منهم يوماً واحداً

اما قضية الخدمات التي تقدم فهي في الاساس غير موجودة ولن يشكل الجنوبيين عب علي الدولة

تبقي قضية الجنوب والهاجس الامني هي في الاساس التي دعت المؤتمر الوطني للسعي في انفصال السودان لانه اتي خصماً علي ثروات وتاريخ وحضارة السودان وهو مجموعة من الحشرات الضارة التي لا تشبع وانشغلت بتحقيق مكاسب شخصية ولم تهتم بالوطن

فما هو الجديد انتم في امانيكم القضاء علي كل مواطن والجلوس علي قبورهم

[المنجلك]

#1430745 [Sebit]
0.00/5 (0 صوت)

03-19-2016 04:42 AM
Nothing happen yet Mr. Criminal Bashire splm- N is building a new strategy how to get rid of you...

Splm-N oyyeee
Conservative oyyyeee

[Sebit]

#1430740 [ودالترس// عاشق ترابك يا بلد //]
3.00/5 (2 صوت)

03-19-2016 03:42 AM
اخوتنا فى جنوب السودان ماذا قدمنا ليهم لما كنا دولة واحده ؟ والان ما المطلوب منا نحوهم ؟
نحن شعب واحد رغم اي شي رغم الانفصال لكني اسال نفسي هل ينفصل الوجدان ؟ سيظل الجنوب
فى وجداننا وقلوبنا وتراثنا واغانينا وما نترنم به رغم المرارات ورغم السياسه
الان الجنوب محتاج للشمال وكذلك الشمال محتاج للجنوب .انا ليس عاطفي ... ولكن هذا التصرف
المفروض . رغم حالنا الاقتصادي وظروفنا المعيشيه المفروض نسعى للوحده وتعمل لها لكي يرجع السودان
دولة واحده زي زمان بان نستقبل اخوتنا الجنوبين النازحين من الحرب ونقدم لهم كل دعم ومساعده
وبدل ينزحوا ليوغندا ودول تانيه يجوا السودان بلدهم الام نحن معنا اجانب كثيرين
( اثيوبين - مصريين - وافارقة ) المفروض الاولويه للجنوبين وبالتالي يحسوا اننا فعلا اخوانهم
حا يعود السلام للسودان ( جنوب وشمال ) وتتوافق القياده السياسيه فى البلدين ساعتا سيكون القرار
التاريخي المنتظر بوحده السودان . جعل مواطني جنوب السودان اجانب وحصرهم
والله ما اظن انه بالقرار الصائب . هذا لؤم قبيح ليس من شيم السودانيين . اتمنا ان لا تعمينا السياسه
وامنيتي ان يكون بكره أحلى يحمل الخير والسلام للسودان ( الكبير )

[ودالترس// عاشق ترابك يا بلد //]

#1430732 [فيلق]
3.00/5 (3 صوت)

03-19-2016 01:47 AM
من هم الاحق بالعيش في السودان...الجنوبين مواطنين اصيلين سودانيين ميه الميه ...الجنسيه السودانيه اي زول بخش السودان ممكن اتحصل عليها اسهل من شراب كبايه موية بس حبه رشوة وحق كيس تمباك...انت ياالبشير بتكضب علي منو رجالتك دي اعملا مع المصريين والاردنيين القتلو السودانيين وخلي الكلام الفارغ ...حدود دولتنا فاكه ساي التشاديين والنيجيرين عادي بشيلو الجواز ...واسي السوريين والفلسطينين انت قايل نفسك حاكم عادل
ارجعو للتاريخ
نحن نرحب بالاخوة الجنوبيين مواطنين درجة اولي وليذهب البشير الي محكمه العدل الدولية وكفي

[فيلق]

ردود على فيلق
[faris] 03-19-2016 05:32 PM
غريبة كثير من الشمالين حتى الان يتكلمو كان السودان واحد
وكذلك حبهم للجنوب من طرف واحد


#1430727 [خليفة احمد]
3.00/5 (3 صوت)

03-19-2016 12:44 AM
يناس الراكوبة الجداد البكتب في الكلام الفارغ دا لازم يقيف ،،،ما تقولو الراي الاخر وزي ما بوظوا سودانيز اولاين بتاعت بكري الذي فتح لهم الباب فطفش الجداد والمؤلفة قلوبهم كل الناس المحترمة ....راي وراي اخر لاتنفع مع اخوان الشيطان لانهم ببساطة لا يقبلو ادنى وجهة نظر ويستخدمنون القمع حتى ضد بعصهم البعض...اوقفو هذا الهراء وإلا سيدمرون هذا المنبر الجميل ومن يريد ان يكتب لهم صحفهم وقنواتهم الطيعة اللينة التي لا يزورها احد،،،ما تمرضونا زيادة كفى ما عندنا

[خليفة احمد]

#1430726 [AAA]
1.00/5 (1 صوت)

03-19-2016 12:41 AM
كلامك عديييل وواضح يا مكوي.. لا فيه اندغام ولا دغمسة.. الموضوع كله بسبب الضربات التي تلقتها قوات النظام الايام الفائتة.. والجنوب هو شماعة جاهزة..واهلنا قالوا حقارتي في وليد مرتي..
الحل الناجع هو ان يثوب النظام الى رشده ويوقف الحرب مهما كلف من ثمن عوضا عن استمرارها الذي اكل اخضر السودان ويابسه..

[AAA]

#1430714 [سوداني]
1.00/5 (1 صوت)

03-18-2016 11:38 PM
أفتكر الراجل كلامة جيد ... يحنسوهم ... بس في ناس مثل جلال لايفهم معاني الكلامات الا من الصيغه فقط ... راجل بقول نحنسهم .... إيه المشكلة في ذلك ... هذا كلام واضح جداً ... وأفتكر أنتو راجل عنده قدرات وزير الاعلام ليس كوزير اعلام الجبهة البلال ...

[سوداني]

#1430683 [عبدالرحيم]
3.00/5 (2 صوت)

03-18-2016 10:15 PM
كلام عاقل ومتعقل من الوزير ؟ ما هي الحكومة معتقل الشعب السوداني كله وهاجر من هاجر وسافر من سافر ويقول المثل التي يغلبها راجلها تشاكل حماها..

لماذا لا تطبق مخرجات الحوار بكل شفافية وبدون مط وتطويل وجمعية عمومية ولولوة قرارات لجنة الحكم واضحة سيبك من اللجان التانية .. حكومة انتقاليةتقوم على العدل والمساواةوالشفافية وتكنس اثار المفسدين ومراجعة القوانين المقيدة للحريات وحل المليشيات الحكومية وكل فرد من افراد تلك المليشيات يمشى لزراعته او رعيه الابل بدل كل واحد اعطي كلاشك وقاعد يصرف في الفاضي .. البلد 90% منها امن باسماء ومسميات عديدة من اجل حراسة النظام وحراسة الحركة الاسلامية؟

[عبدالرحيم]

#1430677 [جلال عثمان]
4.00/5 (5 صوت)

03-18-2016 10:02 PM
بالله ده وزير إعلام ده؟
قال نحن ما عملنا أي حاجة.
نحنسهم يعني؟
نحن نعمل شنو؟
علي كيفهم.
واي واي أنا سجم خشمي.

والله حكومة الجنوب حالتهم بقت حالة زنقة زنقة بس بتاعة القذافي.
ونفخة هواء صغيرة فيهم ممكن تعمل إنقلاب عسكري ناجح.
وهسع الخرطوم بتفكر أن الوقت قد حان لضرب الشعبية الكبيرة قبل الصغيرة.
يعني بدل نضيع وقتنا مع الصغار المختبئين ديل نضرب الكبار المكشوفين.
ولما الكبار يقعوا الصغار بيدخلو جحورهم.
والعاقل بالإشارة يفهم.
والموضوع ما فيهو أي مغامرة أو خطورة (دُولية) علينا..
بس نفك دكتور مشار ده عليهم ونديهو الدعم اللازم ونقعد نتفرج من بعيد.
ودي حركة جربناها قبل كده مع التشادي إدريس ديبي لمن كان عنيد ورأسو حجر..
رسلنا ليهو معارضته المسلحة لغاية باب قصره في أنجمينا..
بعد داك يادوووووب رأسه إنعدل وجاء الخرطوم وأدي فروض الطاعة.
وهسع ممكن نعمل نفس التجربة مع الجنوب الفوضجي ده ونقول لمشار خشششش.
وتاني يوم طوالي سلفاكير بيركب التونسية البتودي ما بتجيب.
أصلو هو المسكين براه نفسو مقطوع ورأسو ضارب.

ملحوظة: الكيزان نفسهم طوييييييييييييل لكن في النهاية ما بينسوا حقهم.

[جلال عثمان]

ردود على جلال عثمان
[الفقير] 03-19-2016 11:14 AM
جملتك التي ذكرت فيها (.. .. سجم ..) ، و التي لا أستطيع كتابتها كاملة! لا تليق بمنبر عام و لها مدلولات سيئة في مجتمعنا.

أليس لك ولي أو رحم تستحي منه قبل أن تخط مثل هذه الجملة؟

الله يكون في عونك و يهديك

[ود الجزيرة] 03-19-2016 10:11 AM
ههههه ادريس ديبي ده جاب ليك خليل ابراهيم لحدي كبري الانقاذ .. يعني تعادل واحد بواحد بعدين الفرق ناس خليل انسحبوا براهم لكن معارضتكم الارسلتوها لتشاد ضربهم ادريس ديبي شخصيا وهو القائد الفعلي لعملية القصر

[احمد] 03-19-2016 09:18 AM
اولا
انتا عندك وزير اعلام افشل من اي طالب ثانوي ثم يليه الدفاع بالنظر ثم يليه كل المطبلين والمنتفعين امثالك
ثانيا
مليشيات الحكومة السودانية التي دخلت انجمينا قتلو جميعا بل امسكوهم احياء ورد عليهم بدعمهم حركة العدل والمساواة ودخلو الخرطوم جوا بعداك الرئيس البشكير خضع لبيت الطاعة واعلن اسلامو من جديد واكراما له زوجهو بت الامير موسى هلال
ثالثا
انتا تعمل جاهدا لكي تزيف الحقائق لكن الشعب يعلم جيدا من هم الكيزان بالعربي كدة الموضوع ما داير درس عصر هم كائنات من كوكب اخر

[عبدالرحيم] 03-19-2016 06:07 AM
قال(ملحوظة: الكيزان نفسهم طوييييييييييييل لكن في النهاية ما بينسوا حقهم)
صحيح الكيزان نفسهم طويل لأنهم يستخدم اشياء لا يستخدمها الانسان ولانهم مكارين مخادعين يستخدمون التقية والغش باسم الدين ..
ولكنهم جبناء ونفسهم الطويل دا خليهم يورونا ليهو مع اثيوبيا؟ اما مصر فأنهم قادرين عليه عن طريق دعم الاخوان المسلمين في مصر بخطة سرية وتربية الدواعش؟

الله يقلع الكيزان والله نحن ابتلينا بقوم 90% منهم جداد الكتروني

[احمد] 03-19-2016 05:37 AM
يا كوز أول حاجة الوزير كلامو كلام زول عاقل جدا انت ورينا وزيرك بتاع الاعلام بعرف يتكلم اصلا ولا عبدالرحيم بتاع النظر ولا منو اصلا في المنتفعين واللصوص بعرف يتكلم بس قاعدين للنباح وكسير الثلج وعامل فيها دولتك متطورة أخجل على روحك بعدين إدريس دبي أتعامل مع الحكومة السودانية بالمثل زي ما الحكومة دعمت المعارضة التشادية و معاها مليشيات سودانية برضو هو دعم حركة العدل والمساواة ودخلوا الخرطوم الشمس فوق ولعلمك الحكومة هي لي دخلت بيت الطاعة وزوجهو بتهم ولي البت عمر البشكير اخيرا يا ناس الجداد الإلكتروني ما تعملوا فيها عارفين براكم الشعب السوداني والله عارف انو انتو اسوء من اليهود والنصارى اتكلموا لينا عن الغاز أبو مية جنيه عن معاناة الشعب الذي أهلكه الفقر والبطالة اتكلم لينا عن فساد كبار وابناء الكيزان برا السودان بدل ما تجي تعلق عن اسيادك عشان يدوك حفنة من الدراهم

[ابو الخير] 03-19-2016 02:36 AM
تونسية تشيلك انت
والله الراجل كلامه عين العقل
الشعب السوداني تعبان وعينه طالعة لسه الكيزان عايزين يفتشو ليهم شماعة يعلقوا فيها فشلهم
بتجوسع الناس وتخريب البلاد
العالم حولهم كله تطور وماشي لقدام الا السودان
الدولار ارتفع اكثر من الف ضعف في زمنهم
والله انا ماعايز اقول ليك انت مين لأن الجميع عارفين انت مين
الراجل ما غلط والجنوبيين ماغلطوا واي بلد فيها الخونة
ريك مشار خائن زيو وزي الكيزان الذين انقلبوا على الديمقراطية ولخبطو حالنا
ربنا يوديكم في ستين داهية ياكيزان السجم والرماد

[AAA] 03-19-2016 12:31 AM
واي واي أنا سجم خشمي.
** يا ود خلى المياعة بتاعتك دي على الاقل احترم اسم ابوك عثمان.. لعنة الله على اشباه الرجال..

European Union [عمران] 03-19-2016 12:01 AM
رجالتكم دى يا كيزان ما تسوها مع المصريين ولا الاثيوبيين المحتلين أراضيكم حقارتكم دى بس مسونها في الجنوبيين.


#1430667 [الباشكاتب]
5.00/5 (1 صوت)

03-18-2016 09:41 PM
هذا الرجل لا يصلح ان يكون وزيرا ناهيك عن كونه الناطق الرسمى باسم دوله .

[الباشكاتب]

#1430648 [عصمتووف]
5.00/5 (1 صوت)

03-18-2016 07:53 PM
ازمة البلاد اصيحت تعلق ف شماعة الجنوب فعلا سلفاكير غارق ف مشاكلة مع رياك وهل يريد نقل مشاكلة وتعليقها ف شماعة الشمال كلنا بيوتنا من قش النار لو ولعت من يطفيها مواضيع هايفة وشغل عيال كنت اتمني من الحكومة مدنا ب الدليل الجنوبي لدعم الحركات والمعارضة استقيلوا وريحوا بالكم وبالنا سئمنا مغامراتكم م ذنبنا

[عصمتووف]

#1430645 [osama dai elnaiem]
4.00/5 (1 صوت)

03-18-2016 07:43 PM
التعامل مع الأشقاء في دولة جنوب السودان يجب أن يتسم بالحكمة وليس طكت بالشكل الذي فضلنا به الجنوب قدوlة الجنوب تحتاج إلي احتواء ومزيد من التواصل الي ان تتشكل معالم الدولة وإيقاف عمل الحركات المسلحة يحتاج تواجد منا داخل دولة السودان ويجب علينا عدم تغيير سي
استمنا مع مواطني الجنوب

[osama dai elnaiem]

#1430641 [ابو حسين]
5.00/5 (3 صوت)

03-18-2016 07:32 PM
كلام دوبلماسي موزون فيه الكثير من الحكمة ومواطني جنوب السودان أصبحوا بين سندان دولة الجنون وطرفة دولة الشمال فلهم الله

[ابو حسين]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة