الأخبار
أخبار إقليمية
عفوا سيدي الحجاج
عفوا سيدي الحجاج
عفوا سيدي الحجاج


04-29-2016 11:43 AM
أزهري محمد علي

كلابك والأفاعي الحايمة من روتانا لي أمواج ..
كاورت البلد بي حالا ..
… ولا لقت اليقولها جر ..
في ناس جيعانة ما قلبت حرف في صاج ..
… في ناس عريانة ما لفحت هدم في الزيفة ..
ما طالت ايديها رغيفه ..
والسبب المعكر كيفا ..
دق بنوتا بالكرباج ..
ناس غلبانة بس دغرية ..
ما بتعرف تخت طاقية في طاقية ..
والدين الحنيف في شرعها الحرية ..
زدتها في الحرج احراج ..
وزدتها في الدجل دجال ..
عوج شفناهو ماسمعناهو في قول زول ..
قال بنات دقوها دق العيش ..
ولاد ما أندقوا في شبال ..
بقت في غصة الأيام ..
قيم غنيتا يا قدال ..
قيم شلناها عمة وتاج ..
رقيص الشامة بت حمدين ..
وخت الحنة لي يات من حضور ضفرين ..
ونمات العديل والزين ..
ورقصة جون مع أوهاج ..
مشينا نقدم البنوت على ضو الرتاين ..
خفت وهج الغنا الوهاج ..
ورحل صوت المغني حزين ..
ورطن صوت العنج هراج ..
سقط في غفلة نون النسوة ..
أخوان البنات والنخوة ..
ستار العيوب والرسوة ..
شيال الحمول أبعاج ..
.. فيا حجاج أكل نارك ..
واتلفح بشاكيرك ..
مع طلعة شهر ذو الحجة ..
وأحرم حاج ..
وطوف فوق الجثث طاؤوس ..
وشعبك لا أكل لا علاج ..
وحاج في شنو؟ ..
معاك كل البلد هاصت ..
وفار نحل الجباية وهاج ..
فيا فالق نواة الحبة يافراج ..
ويا باسط عجايب الإسرا والمعراج ..
ويا خالق الخلايا الحية .. أمشاج ابتلت أمشاج ..
طحنتنا طاحونة الفقر ..
طحنتنا سنواتا العجاف ..
يا الله تلزمنا الصبر والسترة ..
والعيش الكفاف ..
وترحمنا من صرة وشي ..
في وش وليداتنا الضعاف ..
…….
غرقان بيرقص منتشي ..
ووطنا مقطوع من خلاف ..
وبأسم الله ما خلالنا شي ..
وفصلنا في آخر المطاف ..
يا ناسي أقدار الرجال ..
ما تخشى غدر الله وتخاف ..
كتر عوج الكلام والميل ..
وتحت الجزمة مليون ميل ..
تحت الأزمة طاحونة حوافر الخيل ..
سقط تلت البلد عفوا ..
سقط نص البلد لهوا ..
سقط كل البلد سهوا ..
فهل صحاك ضمير الأمة في هجعة هوايد الليل ..
على زبد الغنا الممحوق؟ ..
شنو الخلاك تنوم تحلم على على خرطة وطن مسروق؟ ..
وطن في السوق .. وطن أشتر ..
مرق من ذمة التاريخ على ذمة كلاب الحر ..
ينوم في جبة الدرويش ..
يقوم بي بدلة العسكر ..
.. فيا ويلك في يوم الويل ..
ويا ويلك .. تقوم تحتك قيامة الناس ..
أفواج الضحايا ..
ستات الكجيك والشاي ..
والناس البعرفو شليل ..
حشود الطلبة والعمال ..
وبنوت الغياب والليل ..
طفولة مشردة ونازحين ..
وكم حجاج .. يجيك من ديل يجيك من وين ..
أولاد الشوارع عووك .. المعدمة ومعدومة ..
قطامة وقرضمة وراندوك ..
لماضة وطرقت حلقوما ..
من كل حتة يجوك .. يوم التسود يوما ..
ناسات حكومة الجن .. وناس جنها الحيكومة ..
ما طالا الشوارع في .. في ولاد بعرفوا القوما ..
ولاد راقدين .. وأولاد اسمها المايقوما ..
ديل أولاد شريعة قوش .. المستضعفين في الأرض ..
يبنوا ويهدوا عروش ..
لا بتخون البعض لابتشتريها قروش ..
في كل حته وراك تمرق تلاقي جيوش ..
أصدق لسان الحال من نضمك المهبوش ..
نفس الولاد جايين من طينة حضارة كوش ..
حافظين شعر حميد ..
فاهمين قصايد الدوش ..
ما تمشي يا محجوب دايرين نظبط بوش ..
يا داب عرفنا الصاح ..
دخل الكلام الحوش ..
وشكرا .. شكرا سيدي الحجاج
الجريدة


تعليقات 8 | إهداء 0 | زيارات 8088

التعليقات
#1452762 [kajo]
0.00/5 (0 صوت)

04-29-2016 06:40 PM
Final match ,our people wel wining inchallah

[kajo]

#1452714 [ابومحمد]
0.00/5 (0 صوت)

04-29-2016 04:56 PM
فاطمةالسمحة

واحكى لينا ياحبوبة
عن فاطنة السمحة فى زمناً مو عديل زمناً شين
كان ياما كان وما يحلى الحكى ...
إلا بالصلاة على نبينا الكريم الزين
فاطنة السمحة زينة جيلها ...
شُعْلَةْ نشاط تبحث عن دربَاً عديل ومتين
الدرب البيصون بنوتنا من القيل والقال...
وكترة السؤال وذبح الشاة بالسكين
تناضل مع رفاقتا بحماية الله صُبُحْ وليل...
سايرات معاهن دعوة الوالدين
يعلمن البناتا كيفن يصونن نفوسهن ...
بالعلم والآداب وأمور الدين
يطالبن بالمساوة والعدالة ...
وحقهن المكفول ليهن فى كتاب رب العالمين
يطالبن حقهن تابعات كتاب الله...
وسنّةْ حبيبنا المصطفى شرعاً ودين
وفاطنة ترجع لأبوها تشاوره ...
فى كل صغيرة كبيرة وترجع براى متين
وفى يوم من الأيام جانا الغول ...
بوجهه الكالح وعينيهُ المولِّعة جمرتين
وصاح صيحات وحلَف...
مايخليلوا حُرْمَة تحوم فى الخَرْتوم حلَفْلُو يمين
يَجُرَهَا من شِعِيراتا ويقَدقَدْ عُويناتا ...
ويوريها نُجُوم النهار فى الحين
جانا اغول سكن وسط البلد...
يتبخْتَرْ ونحن نعايلوا بطرَف العين
وعاث فساد وخَرَّبَ البيناتنا...
يتفخشر ويتمخشر خلط اللبن مع الساردين
يحمِّرْ للبنيات ويكشِّرْ ليهن سنيناتو...
سنيناتو الصُفُرْ ويقولهن وين وين
جانا الغول ومات الزرع وجَفَّ الضرع...
بقينا نسِفْ فى التُراب ناكل الطين
جانا الغول وسوالو قصور سوى وسوى...
لبّسْ نسوانو دهب خلانا فقرانين
بقينا نفتش لود النّمير ينقذنا...
منَّ الغول ومنْ حالنا الكعب ومو زين
ومنتظرين رجوع ود النمير ...
من بلاد واغ واغ نفد الصبر وتعبنا سنين
واتوحدنا وشلنا الشيلة واتحزمنا وكسرنا القيد
واتحزمنا وكسرنا القيد
طردنا الغول وعادت لينا البسمة والحرية
وعادت لينا جموع الناس وحدة ويقظة قومية

[ابومحمد]

#1452712 [abdulbagi]
0.00/5 (0 صوت)

04-29-2016 04:53 PM
لا بد ان يكون كل شىء منظم وعلى الاخوة حماية النشطاء من غدر وبطش الابالسه والسريه فى تبادل المعلومات عن اماكن التجمع ومحاولة تشتيت ذهن الامن بقيام مظاهرات فى امكن متفرقه وعلى النشطاء ان لايجتمعوا فى مكان واحد وارموا قدام والله معكم تبادل المعلومات شخصيا اضمن من اجهزة الاتصال التى قد تكون مراقبه خاصة التى تخص النشطاء

[abdulbagi]

#1452685 [karkaba]
0.00/5 (0 صوت)

04-29-2016 03:17 PM
قتاة تلقزيزتية تدعم الحراك وتكشف زيف الكيزان ي الفادرين اعملوا قتاة

[karkaba]

#1452670 [مغبونه]
0.00/5 (0 صوت)

04-29-2016 02:30 PM
النص الممنوع من النشر:-

وفتحنا بابك ياوطن
للداير يدخل والبفوت
وربطنا اسمك بالشجن
والعبرة والخوف والسكوت
امالنا فيك ضاعت سُدىً
احساسنا بيك داير يموت
ودموعنا في الخدين رِسن
وهواك ماشي علي خفوت

سلمنا رايتك للغجر
ختوك في الجيب والبنوك
غشونا بي كبري وشجر
قالولنا بكرة بعمروك
مرقونا للغربة السفر
جابو البيدفع واجروك
خلونا بنسبّك جهر
ونخون جدودنا الحرروك

لقمتنا في بطنك تعب
مجلوبة بي أخر نفس
وأخلاقنا هادنت الغضب
من كلمتين بندق جرس
ديلك عبيد داك ود عرب
هي الخلت البلد اتنحس
وبقينا نفخر بالنسب
وإسم القبيلة بقى الهوس

بتروك من تحتك غصب
قالو الجنوب اكبر مرض
حكمونا بالدِّين الكِضب
وسكتنا مافي الاعترض
شغلونا بي هم الحرب
الفات وغاب والانقرض
سوّونا بيناتم لعب
احزاب حكومة مع بعض

دارينا في الروح انتماك
وبقينا كايسين لي بلاد
تنجدنا من عيشة شقاك
ونعيش أقلو سنين سُعاد
تاورنا شوق ماضينا داك
اللمة والاهل البعاد
ورجعنا بنردد غناك
ياعازة كيف ننساك عاد

سامحنا عارفنك كبير
قلبك مستف بالكرم
وعتابنا كان حرقة زفير
مغبونة من حالنا السجم
باكر معاك ان شاء الله خير
بنحررك من الوهم
وهواك يصبح في الأخير
كل القلوب حافظاهو صم.
ازهري محمد علي

[مغبونه]

#1452645 [Heron]
0.00/5 (0 صوت)

04-29-2016 01:03 PM
اه يا فجر الخلاص لمن تجي بالبشاير و تفرح الناس التعابة

[Heron]

#1452637 [sasa]
2.00/5 (1 صوت)

04-29-2016 12:45 PM
صح لسانك يامقاوم يامناضل


ولانامت اعين كل من ابوعيسى والصادق المهدوووووى

[sasa]

#1452624 [QUICKLY]
4.88/5 (5 صوت)

04-29-2016 12:03 PM
الحراك الداخلي لخلع الطاغوط ونظامه يجب ان يرافقه تحرك خارجي ليزيد الخناق عليهم بمعاونة الامم المتحدة
المطلوب الآن حصر ومتابعة الاموال المنهوبة من البلد والتى أُودعت بالخارج في شكل استثمارات وحسابات بالبنوك منذ 1992 والتى تقدر بأكثر من 80مليار دولار من عائدات البترول تكفي لسداد ديون السودان وتزيد للعيش برفاهية

ولانامت أعين الجبناء واللصوص

[QUICKLY]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة