الأخبار
أخبار إقليمية
من محن الانقاذ
من محن الانقاذ
من محن الانقاذ
في الصورة عصام الترابي


05-07-2016 02:51 AM
شوقي بدري

عندما ضرب حافظ الاسد وشقيقه رفعت الاسد مدينة حماة بالطيارات وقتل من اهلها 30 الفا وقيل 50 الفا ؟ ذهب وفد من المدينة الي حافظ الاسد الذي استمع اليهم قليلا وسألهم الم تنسوا شيئا ؟ فتلفت القوم وهم محتارون . فقال لهم ,, لقد نسيتم ان تشكروني لانني ابقيت علي حياتكم .

مدير جامعة الخرطوم يقول انه قد طرد 6 من الطلبة وكان في امكانه ان يطرد الكثيرين . هذه احدي محن الانقاذ . هذا الرجل يحتل غير مكانه . لانه من المفروض ان يكون احد حرس معسكرات الاعتقال النازي لكي يسجل عدد من ذهب الي المحرقة من الحوامل والاطفال والشيوخ والشباب وهو في حالة نشوى . فحتي اذا اضطر لان يطرد طالب واحد فالمفروض ان يبدي عميق الاسف لأن الادارة لم تجد اي مخرج سوي بتر الطالب . وحتي من كان يطرد من الجامعة قديما يجد فرصة للإبتعاث لخارج السودان ويكون له الاسبقية .

طرد الطلاب ليس من مهمات مدير الجامعة . هذا عمل الادارة . ويجب ان لا يهتز المنصب بإقحامه في امور غير محببة ، ومن المفروض ان تشكل لجنة ويمكن الاستئتاف . ولكن هؤلاء الناس حاقدون ومجرمون يستمتعون بالأذي والاضرار بالبشر . رحم الله جامعة الخرطوم ومسجل جامعة الخرطوم المفكر والكاتب ووزير الخارجية حمال محمد احمد . الذي بالرغم من انه كان نجما عالميا لم ينفصل عن مجتمعه السوداني البسيط . حكي كيف كان يركب الحمار مع شقيقه للذهاب الي المدرسة . وكان ينشب شجار بين الطفلين من يركب في الامام . وحل جدهم الاشكال بأن جعل الركوب بالتناوب كدرس في الديمقراطية والعدل. تلك التربية جعلت الاستاذ جمال يقول للصادق عندما كان منتسبا في جامعة الخرطوم ويحضر الي المدرسة وهو يقود سيارة . في ناس في الجامعة دي بيجو بي رجلينهم حق الترماج ما عندهم ... يا انت يا العربية في الجامعة دي ,, .
هل فكرمدير الجامعة لماذا تترأس جامعة هارفاد وييل الامريكيتان قائمة احسن 100 جامعة في العالم ؟ السبب هو اهتمامهم بالطلاب والتحصيل والبحوث والاكتشافات والاختراعات ... والاهم هو الاهتمام بالطالب كشئ مهم وغالي . وتقدم الجوائز والدعم . والكوز يفتخر بطرد طلابة ..... محن محن .....

في بداية الحكم العسكري كانت المدارس الثانوية مشتعلة بالاضرابات بسب ترحيل اهل حلفا ومقتل لوممبا رئيس الكونقو الخ . واشار البعض ليوسف بدري يطرد بعض الطلاب لإخافة الآخرين ، وان كلية غردون قد طردت بعض الطلاب قديما وادبت البقية. ويوسف بدري كان من المضربين وهومن قفذ علي الطاولة الكبيرة التي وضعوا عليها كرسي السيد عبد الرحمن الذي ناشد الطلبة في 1932 بالرجوع الي الدراسة . ورفض الطلاب قرار الكلية . وتراجعت الكلية عن تخفيض المرتبات للخريجين 20 % بسب الازمة العالمية ؟. اجاب يوسف بدري ان كلية غردون اسسها كتشنر البريطاني وبابكر بدري الذي اسس الاحفاد كان في الجانب الآخر من كرري . ولن يحرم اي طالب من الدراسة . هذا الكلام في كتاب قدر جيل ليوسف بدري .

الدكتور عصمت محمود يجد التحرش والاهانة من مسخ لا دخل له بالجامعة ، ويتواجد هنالك بانتظام . ويشتكي الدكتور الجامعي لأمن الجامعة ، ولم يحدث شء . ويقوم الدكتور الذي يخرج صانعي المستقبل بالشكوي لادارة الجامعة . ويقول له المدير المزيف ,, انت مالك مع اولادنا .. ؟ حتي اذا كان ذلك الصفيق ابنا للمدير فالمفروض ان يخجل من تصرفه حتي اذا كان ابنه من ظهره .,, ويتوج ,, الامر بأن يحقق الامن الانقاذي مع الدكتور عصمت محمود . محن

وتتواصل المحن ويقتحم الامن مكتب المحامي نبيل اديب والاستاذة منى عوض خوجلي لانهما مع تيم من المحامين يدافعون عن الطلبة المفصولين . والقانون يمثله القضاء الجالس والقضاء الواقف الذي هو المحامون , الا يختشي وزير العدل ؟ ولماذا اخذ موظفات المكتب والموبايلات والبطاقات بواسطة بلتون من الجنود الذين اغلقوا الشارع واعتدوا بالضرب علي الطلاب وموظفة . وتفننوا في البذاءة والترهيب ....جيدا لي اماتكم يا جيش الهنا وحراس الوطن . وما ذنب الاوراق والفايلات وثلاجة الماء والمكاتب هل هذه موقعة ذات الادراج ؟

رجال الامن ديل وكت فالحين قدر كدة ليه كل مرة نسمع بطبيب مزور شغال في مستشفي . اظني حيكون في تخصص جديد اسمه كيف تنتحل شخصية طبيب . وليه لا ... ؟ ما مدير الجامعة والبشير وكلهم منتحلين شخصيات ما عندهم اي صلة بيها من قريب ولا بعيد ؟

قرأنا بالخط العريض ان السودان اوصل الاحتياطي الي 200 مليون طن من الغلال . يعني الا يعرشوا السودان علشان يلقوا محل يختوا كل الغلال دي . الاتحاد السوفيتي الذي كان يمثل سدس الارض في العالم كان يحلم ب 120 مليون طن على ما اذكر . ولكن لم يبلغ اكثر من 111 مليون . ورفضت امريكا التي كانت تتخلص من القمح ان تبيع لروسيا . كان لينين يحلم بحصول الاتحاد السوفيتي علي 100 الف جرار . وبدأ خروتشوف في زراعة القمح والذرة الشامية في اماكن يصعب الزراعة فيها بسبب الصقيع . وعندما بدا برنامج الفضاء تسائل البعض ماذا سيعمل خروتشوف في القمر ... كان الرد الساخر.... سيزرع الذرة الشامية . السودان كل الوقت بيكابس في 2 مليون طن .

من الذي بدأ في تنخيس اسنانه من الكيزان بعد الاعلان عن 10 مليون دولار للسوريين ؟ هل سيتعاملون بالسعر الرسمي 5 الف للدولار ؟ الجائزة الادبية التي اعلنوا عنها بعشرة الف دولار استلمها الاديب الكبير بشري الفاضل في حساب 5 الف للدولار ؟ لماذا الاعلان بالدولار وهي مدفوعة بالسوداني ... حاجة غريبة ... مش كدة ؟

عند الخلاف في الحزب الشيوعي في بداية مايو حضر وفد من الحزب الشيوعي المصري لاصلاح ذات البين بين الرفاق السودانيين . طبعا ناصر كان خلف الوفد . فقال لهم السودانيون قبل ما تجوا تصالحونا ارجعوا للعمل لانكم الحزب الشيوعي الوحيد في العالم الذي حل نفسه . في الثمانينات قال خالد محي الدين عضو مجلس قيادة الثورة ومن جند ناصر للحزب الشيوعي قبل انضمام ناصر للكيزان، انهم قد طلبوا من اعضاءهم عدم الاضراب . فقالت له المناضلة فاطة احمد ابراهيم .... انحنا بالرغم من ان نميري قد سن قانونا يمكن ان يعاقب المضربين بالاعدام الا انهم لا يطالبون النقابات بالكف عن الاضراب . فقال زكريا محي الدين بالفهلوة المصرية . انتو علي كيفكم اذا عاوزين تموتوا ... انحنا مش عاوزين نموت .

قرأنا ان نقابة العمال قررت التخلي عن حق الاضراب بسبب الحظر الامريكي . الاضراب مكفول بالقانون والدستور . والشيوعيون بالرغم من بعض القوانين المقيدة للخريات والتي ينفذها البوليس قد شجعوا البوليس علي الاضراب في آخر ايام الانجليز للحصول علي حقوقهم . وحدث الاضراب وتضامن معهم الشعب,لان البولبس لم يكن عدوا للشعب . وحصلوا على 50 % زيادة في الاجور وسكن شبه مجاني وساعات عمل اقل وكثير من المكاسب المادية. تحصل الزعيم العمالي الشفيع علي وسام لينين الذي كان يحلم به زعماء الاتحاد السوفيتي وبعض رؤساء الدول . وكان ابراهيم زكريا سكرتيرا لاتحاد النقابات العالمي الذي ضم كل نقابات العالم في القارات الخمس.... محن .

والحظر الامريكي دة جديد ؟ وليه ما حظروا سويسرا وغانا والسعودية وسلطنة بروناي ؟ هل نست الانقاذ ... امريكا لك قد تسلحنا ... وامريكا قد دنا عزابها ، وامريكا لمي جدادك وشيلي بروشك . وهل امريكا نست اغتيال الدبلوماسي قرانفيل والسائق وتهريب القتله بمسرحية اخراج جمعية ادبية في مدرسة اولية . ماذا عن القتلى في سفارات شرق افريقيا والباخرة الحربية في اليمن ... وفلوس الشعب السوداني المعطوها لتعويض الضحايا الامريكان . الكيزان ديل هبل ولا بتهابلوا ؟ الاعتداء علي الطلبة والهجوم علي المحامين الاخير ... قدام الحكومة الامريكية والكونقرس .

المتنبئ بعد ان ضاقت به السبل اضطر لأن يمدح كافور الاخشيدي . كان يمدحة بما يحتمل الذم . قال .. تفضح الشمس كلما ذرت الشمس بشمس منيرة سوداء . المحن دي بقت علي البشير ؟
البروفسر الكس دي وال الذي قبض من الانقاذ مع الكثيرين منهم شركات الدعاية الغربية لتجميل وجة الانقاذ الكريه ، قال ان البشير من المفروض ان يرشح لجائزة نوبل للإقتصاد . وكان يسخر ويتأندل علي الانقاذ . هذا الكلام ادوه توم وشمار وشوية محلسة وبكش والبشير صدق الكلام ده وفي يوم 30 ابريل 2016 امام الحركة الاسلامية تطرق لهذا الكلام القديم وهلل الكيزان الله اكبر ... اللله اكبر . اليس هذا البشر بموهوم ومغيب ومسكين . ياخي الجواب من عنوانه الجنيه في نص دستة من السنين نزل من اتنين جنبه للدولار الي 14 جنيه للدولار.
مش غريب البشير يقول لي ناس الشمالية حنصنع ليكم السكر من البنجر ... البنجر ... البامبي بتعرفوه ؟ بنجر السكر حجمه اكثر من كيلو لي الحبة وهذا نبات مختلف ينموا في البلاد الباردة . الزول ده اذا ما عندو معلومات عامة ما بيفكر .

ود الترابي تاني قام لإطلاق الرصاص . ضرب زول في مزرعتو في ام دوم , والغريبة نام في بيتهم ذي كانه ادي المصاب شبال مش رصاصة . وقبل كدة مش اطلق الرصاص علي الصحفي محمد طة رحمة الله عليه . وقامت والدته باستدعاء الاستاذ وقالت له الولد دة الحكم اذا طلع من ابوه حيمشي لي خاله . وطلعت اوتسايت لعبة قون . ابوه طلع من الحكم وخاله كراع في المركب وكراع في الطوف . واولاده في الحكومة . ومبارك ود عمه في اجتماعات مع ناس الانقاذ . بعد السجن والملطشة مبارك تاني بيغازل الانقاذ . في حاجة اسمها الكرامة ... مش الكرامة والفطر وقصير ورجب الكان ناس حبوباتنا بيحسبوا بيهم الشهور .
زمان الصادق اطلق علي ناس مبارك لقب آكلي الفطيسة . بعدين الصادق جاء وقبض من الانقاذ وقال البشير جلدنا وما بنجر فيه الشوك . وبعد ما حميدتي زعل الصادق دخلوة الكريزمة . بعد تصريح الصادق ومطالبته لاتباعه بالانتفاض الانقاذ جابت ليه السم القدر غداه ... مبارك الفاضل القال وروني اي حاجة عملها الصادق وروني كشك ... .

احد السودانيين الذي حضر للسويد قبل اكثر من عقد من الزمن واسمه م . ا . ذكر انه كان يجلس ويتحدث مع فتاه في نادي الفروسية في سباق الخيل فشاهده ابن الترابي واقدم منه ووضع المسدس علي رأسه بدون كلام ولم يتركه قبل تدخل من يعرفون الشاب صغير السن كمشترك في النادي . ولا يزال هنالك من الصحفيين والكتاب والمحامين والبروفسيرات ما يبلغ به السخف الي الدفاع عن الكيزان .

لمن قدمو الدوق زوج الملكة لخروتشوف . قال انا عارف شغله بالليل .... بالنهار شغال شنو ؟ ود الترابي ده معمبب ليه . غير انه ولد الترابي شغال شنوا؟ والمزرعة والخيل وكلاب الصيد والعربات والجمرة الخبيثة والنفايات ومواهي الخدم والحشم ورصيد الموبايلات ... بيجيبهم من وين ؟ قبل كدة ود حاج ساطور شخط في عسكري بوليس وقال ليه البلد دي حاكمنها انحنا . الولد ده وظيفته شنوا ؟ والمحن زول كان مطلعين صورتة .... ابحث مع البوليس ... فجأة بقي في القصر . وانحنا لسة مساكين بنستغرب مش دي برضوا محنة ... ؟ لسة ما عارفين ان الاستغراب مرفوع في السودان والبلد قد احتلاها مغول العصر . وقطوعات الكهرباء وصفوف العيش مش رجعت ... قاعدين تسووا شنوا ؟ ما قلتوا جيتوا للقضاء علي هذه الاشياء .



[email protected]





تعليقات 23 | إهداء 0 | زيارات 37324

التعليقات
#1457528 [بنت الناظر]
0.00/5 (0 صوت)

05-09-2016 12:14 AM
الله يديك الصحة والعافية العم شوقى بدرى ..

روى إنه فى الستينات كان عبدالغفار يوسف محامى مشهور فى مدينة سنجة وكان مستأجردكان فى بناية من تاجر فى سنجة ..جاءه يوم صاحب الدكان وقال ليه عايزك تخلى لى دكانى لأنى محتاج ليه ..رد عليه المحامى عبدالغفار وقال ليه سمعتى المهنية إرتبطت بالمحل ده وحاول مع التاجر لكن التاجر أصر على الإخلاء فرفض المحامى عبد الغفار وقال للتاجر أعلى مافى خيلك أركبه ورفض يطلع من الدكان..

التاجر زعل ورفع دعوى إخلاء للحاجة الماسة وأراد أن يكلف محامى من سنجة للترافع نيابة عنه ضد المحامى عبدالغفار ولكن للأسف جميع محامى سنجة إعتذروا ورفضوا أن يترافعوا ضد المحامى عبدالغفار ..التاجر مشى سنار برضو محامى سنار رفضوا طلبه..وبرضو كرر المحاولة فى ودمدنى وأيضا رفض محامى ودمدنى طلبه.. التاجر زعل شديد وركب راسو وجاء الخرطوم ووقف أمام المحكمة الجزئية بالخرطوم وقعد يكورك بأعلى صوته( البلد دى ضاعت ومافيها قانون ..المحامين يقلعوا حقنا اوانطة وما نلقى زول يدافع عننا ويرجعه لينا ..)

فى تلك اللحظة جاء مارى جنبه الأستاذ أحمد خير المحامى وسمعه يكورك..سأله مالك ياعم بتكورك كدا؟..التاجر حكى ليه حكايته مع المحامى عبدالغفار و رفض المحامين للترافع عنه..أخرج الأستاذ أحمد خير مفكرته وقال للراجل ورينى تاريخ جلستكم متين أمام محكمة سنجة؟ قال ليه بعد أسبوعين..الأستاذ أحمد خير رحمه الله سجل ميعاد الجلسة وقال للتاجر يوم الجلسة بإذن الله تلقانى معاك فى سنجة..
التاجر سأله قال ليه ناخد منى كم؟الأستاذ قال ليه أنا هسه سألتك من قروش؟؟ المهم أنا يوم الجلسة بجيك فى سنجة..
وفعلا يوم الجلسة جاءوحضر الأستاذ أحمد خير حسب وعده وفى داخل محكمة سنجة حينما ندهوا على عبدالغفار المحامى (المدعى عليه)إندهش حينما رأى الأستاذ أحمد خير المحامى بكل شموخه داخل قاعة المحكمة مترافعا عن التاجر فى قضية الدكان جاء لأجلها من الخرطوم مسافة 600 كيلومتر!!!وسأل الأستاذ أحمد خير قال ليه ياأستاذ إنت هسة تحملت عناء السفر من الخرطوم لى سنجة لأجل قضية الدكيكين ده؟؟
كان رد الأستاذ أحمد خير رحمه الله ..كلا يا إبنى أنا هنا مش عشان الدكيكين ده وإنما أتيت
To restore the confidence of this guy in our justice institutions.

ناس المحكمة وعبدالغفار ذهلوامن هذا الرد ..وطوالى عبدالغفار قال لأحمدخير طالما دى الجابتك والله ماترجع ساى ..وطلب من المحكمة بإصدار الحكم عليه وقام بتسليم مفتاح الدكان للمحكمة..القاضى إستلم المفتاح وأداهو للتاجر..التاجر إستلم المفتاح فى يده وإتجه مخاطبا المحكمة قائلا( والله يامولانا أنا كنت فاكر البلد دى عدمت الرجال..لكن طالما عرفت إنه فيها رجال بعظمة هذا المحامى (يقصد أحمد خير) حرررررم تاخدوا المفتاح ده يامولانا تدوهوا لى عبدالغفار يقعد فى دكانى لى يوم القيامة....)

هكذا كان العدل فى بلادنا وكان رجاله بتلك العظمة وذلك الشموخ ..

أقسم بالله ياعم شوقى حينما أتذكر كيف كان شموخ هؤلاء الرجال أشعر دوما باليتم الحقيقى ولا أقصد يتمى وحدى بل يتم كل ابناء الشعب السودانى وهم يعانون من ظلم عصابة التتار ..
نسأل الله أن يحكمنا من يخشى الله فى سره وعلانيته..

[بنت الناظر]

#1457181 [عبد الرحيم]
1.00/5 (1 صوت)

05-08-2016 08:43 AM
كلامك سمح وجميل وونسة سهلة في المليان ..يديك العافية..لكن بصراحة نحن ميتين وانا اعترف اول زول ميت ؟اذ لا يعقل كل هذه المصائب تحصل والظلم يمشي ويتبختر على ارض السودان ونحن قاعدين نشوف ونرجوا من القتلة الظالمين ان يرفعو الظلم من تلقاء انفسهم ؟؟

دا ما بيحل ؟ والتاريخ يقول دا ما بحصل والسيرة تقول دا ما بحصل ؟؟ كفار قريش قالوا عايزين اية وطلبوا الاية بنفسهم ان يشق لهم القمر ؟؟ وربنا سبحانه وتعالى شق القمر نصفين واحد في الشرق ونصف في القرب ؟ ومع ذالك زمزغوا وقالوا انما سُكرت ابصارنا .. انت سحرتنا ؟؟


يا اخي انا سحرتكم انتو؟ قالوا ايوة نعم سحرتنا
طيب امشوا اسالوا ناس تانين قبيلة اخرى .. مدينة اخرى ؟
قالوا ما بنسأل ولا حاجة ؟
قالوا لا عايزين ورقة رسمية قرطاس بأسمائنا وووالخ

نحن منتظرين الجماعة ديل من تلقاء انفسهم يخلوا العز واكل الرز والفطير بالوز و
ويتركوا البساط الاحمر والجوازات الحمراء والسياحة في قصور بنى الاحمر في اسبانيا


والانسان يأمل كل يوم عندهم امل ان امريكا سوف تحن عليهم وترفع مقتها وغضبها عنهم

وكل يوم امريكا تديهم اشارة من تحت انها سوف تدهم ...
وهم عايشين على هذا اليوم

وكل يوم يقولوا انهم لن يسمحوا بان يكون السودان مثل ليبيا وسوريا والصومال
وهم ذات الناس الحاكمين هم من اشتركوا في احداث ليبيا وسوريا والصومال


غايتوا الشكية لابو ايدا قوية

غايتوا كل زول بقي يقول نفسي نفسي
لان الكيزان لما يمسكوا واحد بضربوه ضرب غرائب الابل عشان يخوفوا الناس التانين

والتالتين والرابعين
وما عندهم قشة مرة
قالوا اضربوا الصادق المهدي ولو جاءالى السودان سوف يدخلوه في كستبانة وفي زونازنة اضيق من قد الابرة
عشان يخاف الاخرين ويخاف اولاد الميرغني \
حسبي الله ونعم الوكيل

[عبد الرحيم]

#1457113 [صابر المثابر]
1.00/5 (2 صوت)

05-08-2016 03:00 AM
يا زول اتفي الله
زكريا محي الدين كان عميلا للامريكان مثل ناصر في بداية عهده
والله شطحت وكبرتها
عميل يحررالبلد من الملك والانجليز ويحقق الجلاء ويؤمم القناه والعدوان الثلاثي ويبني السد وتقول عميل
صراحة انت كارثة كبرى

والله كنت احترمك واقدرك ولكنك سقطت

[صابر المثابر]

ردود على صابر المثابر
[shawgi badri] 05-08-2016 10:52 AM
في جنازة ناصر حضر محمود حسيب وهو من النوبة الميري وقومي عربي ويسكن بانت واول اتصال له كان مع زكريا محي الدين... غضب شعراوي جمعة وعلي صبري ذو الفقار... وطلبوا من النميري ارجاعه الي السودان وحدث . لان لهمااتصالات بامريكا . وطرد من الوزارة وصار حاكما لكردفان ثم طرد من كردفان وصار مديرا لشركة الاخشاب . ووجد مقتولا في مكتبه . كان ابن عمة توئم الروح بله .
الامريكان ورثوا الامبراطورية البريطانية والمستعمرات الفرنسية لانهم يريدون محاربة الشيوعية . وكرههم الفرنسيون والبريطانيون لجلافتهم وعدم معقولينهم .
ناصر لم يشارك في الانقلاب لانه لم يكن عنده قوات كان هو وعبد الحكيم عامر في العريش . الثورة كانت ستفشل الي ان تسرع الظابط محمود وتحرك قبل ساعة . الاخوان صلاح سالم وجمال سالم كانا الاقوي في الثورة . المخابرات الامريكية كانت تراهن علي جمال ضد محمد نجيب الذي درس وعاش في السودان ووالدته من مصريي امدرمان . وكان يدعوا لدمقراطية وحرية الصحافة والرأي والامريكان كانوا يريدون نظاما عسكريا مواليا لان مصر اهم بلد عربي .
طلب الامريكان من الانجليز معارضة فكرة استقلال السودان بعد سيطرة ناصر وطرد نجيب واعتقل واهين وقتل ابنه في القاهرة لانه كان يتكلم في الهرم ويقول ان والدة المسجون هو اول رئيس للدولة واشتبك مع ظابط امن ومات تحت التعذيب . والثاني صفته المخابرات في المانيا . ناصر كذب علي التاريخ وفي الكتب المدرسية تجد ناصر اول رئيس مصري وهو من سرق الثورة . السفير الامريكي قال للمسئول البريطاني ... لماذا تدعمون 10 .مليون نيقر ضد جمال ؟
شعراوي وعلي صبري اثرا علي ناصر بعد تمثيلية محاولة اغتيال ناصر في الاسكندرية . الغرض كان اغتيال ميرغني حمزة وزير الري السوداني والذي رفض اقتراحات ناصر بخصوص السد العالي . جرح ميرغني حمزة وضرب ناصر الاخوان وهرب البعض الي السودان وقويت شوكتهم . اتت فكرة الاشتراكية وتحرير فلسطين التي حارب فيها جمال واتجه جمال للروس ودول عدم الانحياز وترك الامريكان الذين وقفوا مع ناصر في العدوان الثلاثي. هكذ1ا هي السياسة .
يكفي ان ناصر بعد مؤتمر الخرطوم واعادة الحياة له وتضحيته برفيق عمرة عامر قال للمحجوب انا حأقدم ليك مكافءة . وكان انقلاب مايو . بالرغم من ان المحجوب هة الذي اتي لناصر ب 150 مليون ودولار من الكويت ليبيا والسعودية . وهو الذي نطم اغلب انقلابات السودان احدها انقلاب شنان ومحمي الدين احمد عبد الله وطرد احمد عبد الوهاب وفرض لتفاقية مياه النيل وترحيل اهل حلفا واعطاء مصر الحق في البحيرة داخل السودان . يكفي ان ناصر كان دكتاتورا باطشا ادخل العرب في مغامرات ومشاكل لا تزال موجودة لانه لم يعرف اي شي عن العالم والسياسة العالمية . انا يا عزيزي لا استجدي الاحترام والحي .... يكفيني حبي لوطني السودان الواسع .

United States [عودة ديجانقو] 05-08-2016 09:09 AM
يازول سيب الفنجطه بتاعتك دى وأمشى اول حاجه اعرف مين اللى بنى السد العالى.
مصيبتنا اى واحد شم صناحوا عايز يعمل فيها الوحيد الفاهم والبقيه حمير


#1457110 [النور]
1.00/5 (2 صوت)

05-08-2016 02:46 AM
يا سيد شوقى بدرى أول مرة أعرف أن عبدالناصر كان ينتمى الى جماعة الاخوان المسلمين رغم أنه عمل على تصفيتهم من الحياة السياسية ومن الجيش على وجه الخصوص الى يومنا هذا.

[النور]

ردود على النور
[shawgi badri] 05-08-2016 10:10 AM
جمالانضم الي الشيوعيين كما ذكر خالد محب الدين في كتابه والآن انا اتكلم . ولكن بعد فترة عرف ان رئيسهم في التمظيم مكنيكي فغضي وترك الحزب . لانه ظابط لا يرضي ان يكون رئيسه ميكانيكي .


#1457084 [عكر]
1.00/5 (2 صوت)

05-08-2016 12:28 AM
ليس هناك كتاب يستطيع حمل جميع محن الانقاذ..

المحنة الكبيرة .. و لغياب العقل الاحصائي ..تقريبا في كل دفعة هناك مجموعة من الطلبة تم فصلهم .. في اكبر عملية تطهير التعليم العالي من اي كوادر لا تتبع للنظام ...هذا غير السنين التي بترت من الجامعات مما تسبب في تراكم الدفعات و غيرها من البهدلة ..نعم ليس هناك خطة اقتصادية و اصحة ليستيعاب جيوش المتخرجين وطبعا الرد من الجماعة كالعادة الجامعات دي نحن السويناها ...!!! متناسين (الكم و النوع)...و أغلاق الابتعاث الخارجي .. الذي لا يكلف الدولة شي..في اغرب ظاهرة تعليمية في العالم و علي مدي التاريخ ..!!!
المحن كثيرة .. وزير التعليم العالي و المسوؤليين حينها يبعثون اولادهم للدراسة في الخارج علي حساب الدولة ... تأمل....!!!
الاغرب و الادهاء العقل الطلابي و تزكيتهم للقيم ..و هم بالحرم الجامعي صارات اكبر بكثير لمن هم في سدة الحكم او بيادقهم من موظفين ...!!!
و لو جبنا هنا تفاصيل و حكايات و غرايب ... بروفات منتسبي النظام .. لتوقف الاباء و الاسرة عن دخول ابناههم للجامعات ...!!!
و العنوان فوق تحدي...

[عكر]

#1457047 [علي عبدالله علي]
1.00/5 (2 صوت)

05-07-2016 10:17 PM
الاخ شوقي تحياتي لك وتقريرنا علي ما تكتبه
ارجو شاكرا الرجوع لتعليق الاخ كمال ابوالقاسم محمد في الراكوبة مقالات اليوم بعنوان
د عصمت محمود
الخطاب الذي تسلمته للتحقيق غير رسمي
يبدو ان د عصمت هذا ماسورة كبيرة وخدعة من جهاز الامن طالما لم يتم اعتقاله حتي الان


لابد من شخص يوضح لنا من هو عصمت والا سنكون بننفخ في دخان من دون نار

[علي عبدالله علي]

ردود على علي عبدالله علي
[shawgi badri] 05-08-2016 10:55 AM
في بعض الاحيان لا يتم الاعتقال لكي لا يصنعوا الابطال . يكفي ان موضوع دكتور عصمت قد الب الرأي العام ضد مدير الجامعة وامن الجامعة .


#1457033 [محمد احمد]
1.00/5 (2 صوت)

05-07-2016 09:44 PM
لو ابو عصام رباهو بدل الجري ورا السلطة ليل نهار ما كان طلع سفيه كده ..

[محمد احمد]

#1456992 [كاكا]
2.00/5 (3 صوت)

05-07-2016 07:27 PM
اغرب شي واعجب مسائل !

[كاكا]

#1456883 [AAA]
3.44/5 (6 صوت)

05-07-2016 02:16 PM
يا اخي شوقي بدري..لك خالص التقدير والاحترام.. ان الانقاذ هي نفسها أكبر محنة تمر في تاريخ السودان منذ أجدادنا القدماء في العصر الحجري وحتى الان.. لقد سقطت عنها كل اوراق التوت التي تواري سوءتها..تمشي الان عارية تمد لنا لسانها استهتارا وعبطا ؟؟ نريد في هذه المرحلة شحذ الهمم وتوجيه الاقلام في كيفية اقتلاع هذا النظام الحقير.. بالتأكيد كتاباتكم القيمة تحمل لنا المفيد من تجارب التاريخ والحِكم..وان حكمة اسقاط النظام هي ضالتنا التي نبحث ونفتش عنها حتى لو نفتح خشم البقرة..

** نظام في نفسه محنة ألا تنبثق منه الا المحن ؟!!

[AAA]

#1456871 [ابوالبــــــــــــــنات]
2.25/5 (5 صوت)

05-07-2016 01:54 PM
الجامعات للتعليم والتعلم وليس للتخريب وترهيب الاخرين. عندما تحاول قلة من كان يعتقد بانهم طلاب بتالشويش على الاخرين فى التحصيل بالترهيب والتخويف لخدمة اجندة فشلت فيها الحركات المسلحه فى دارفور وتعمل جاهدة ان تحققها فى دور العلم وقودها فى ذلك حفنه من المغيبين عقليآ يجب فصل كل طالب تسول له نفسه بالعبث بدور العلم وحرم الاخرين حقوقهم .
محن الحركات المسلحة وناسس الجهجه الثوريه العبث بمستقبل السزج المغيبن واستعمالهم وقودآ لمعركة فاشلة معركة تجعلهم يتمتعون بالسوشل الاوربى

[ابوالبــــــــــــــنات]

ردود على ابوالبــــــــــــــنات
European Union [ابوالبــــــــــــــنات] 05-08-2016 05:40 PM
يا سيد مسافر فى البدايه شكرآ على هذا الرد المقالى ياسيدى لماذا عندما لانتفق فى الطرح نلجا الى التوصيف بان هذا مع وهذا ضدد ياسيدى الفاضل من حق كل شخص ان يقول مايراه صحيح حسب رويتو الشخصيه دونما فرضها على حد ياعزيزى الفاضل انا احد ضحايا الانقاذ نحن من اوائل ظباط الشرطه احيلو للصالح وشردنا لكن بالطبع هذا لا يحملنى ان ارى الخطأ واقول ذلك صحيح ياعزيزى هل تددرى حقيقة احداث جامعة الخرطوم الاخيرة والاسباب الحقيقه لفصل من كان يعتقد بانهم طلاب ارجو ان تجد مصدر محايد لتدرى حجم الفجيعه والكارثه.
السيف البتار الحمدلله لدى من البنين والبنات ماتقر بهم الاعين.

[مسافر] 05-08-2016 08:19 AM
طيب يا بوالبنات وبدون سباب .. جماعتكم هم الأدخلوا العنف في الجامعات.. العبد لله شاهد عيان ولست ناقلا عن أحد .. أصلا نشأ الأخوان المسملون في مصر كحركة عنف وكان حسن البنا يدربهم في المعسكرات الخارجية.. هذا جزء أصيل من ثقافتهم وفكرهم المعقد والملتوي ولذا تجد أكثر من عضويتهم من المعقدين من أيام الطفولة والدراسة ويعانون من عقد نفسية عميقة وبينهم وبين الآخرين جدار سميك .. ياخي الحركات المسلحة بتاعة دارفور دي يا دوبك بدت سنة 2003 ونحن درسنا في جامعة الخرطوم دي من 71-76 حقيقة بدون تلفيق كان لهم مخزن سيخ وجنازير في الغرفة الداخلية لمسجد البركس داخلية القاش (المباني الأمريكية) الطابق الأرضي هذا رأيناه بأعيننا وحصل أن توصل له أمن نميري واستخرج الأسلحة المخبأة وكانت كمياتها كبيرة جدا ويمكن لك أن تسأل لماذا سمي الطيب سيخة بهذا الاسم وهو بالمناسبة في دفعنا لكن كانوا في داخليات الطب ونحن كنا في مجمع البركس .. وبعد دا لا أحد يمكن أن يشهد لهم بأي شجاعة ..كانوا دائما يعتمدون أن يكونوا كثيرين جدا في مواجهة فرد واحد واعتقد دا أسوأ نوع من الجبن وكان مرفوض في مشاكل السودانيين منذ الصغر (ولكن حقيقة هل ديل سودانيين؟) حتى لو أحد الطرفين شايل عكاز أو سكين والتاني أعزل يعتبر جبانا إذا استعملها واستعمال الحجر كان أيضا كذلك والعض .. لم أر مشكلة بين كوز وفرد (مان تو مان) أبدا.. عندهم واحد توفى اقبل مدة كانوا يقولون إنه قائد تنظيمهم العسكري في الجامعة آنذاك وكان لي إبن خال شرس جدا في هندسة إبن خالي لقاه منفرد جلده جلدة طيري (تعرف طيري؟) فصار كلما لقيه يترك له الشارع مرة واحدة .. ولكن ذات ليلة داهمت ابن الخال مجموعة كبيرة جدا مسلحة بالسيخ والجنازير وهو نائم في سطح داخلية ترهاقا بتاعة الهندسة وضربوه كل واحد من جهة (لا زلتم قرن واحد) وكانوا على وشك أن يقذفوه من أعلى سطح البناية إلى الأرض لولا محاماة عدد كبير من الطلاب.. هذه صورة من شجاعة الجبناء إن صحت العبارة .. قبلنا طبعا استعملوا العنف المبرمج في حادثة قاعة الامتحانات ضد فرقة التراث الشعبي/ الثقافة الوطنية التي كانت تؤدي رقصات شعبية في عرض داخل القاعة والعجيبة مر الزمن وشفت بعيني الفنانة الشهيرة حاليا وهي تجقلب قدام البشير في زواج إدريس دبي وغيره حاجات كتيرة.. إن كنت مستفيد من الجماعة ديل فأنت وشأنك وحسابك يأتي عند الناس أو عند الله ولكن كنت مجرد مؤمن مصدق أن هؤلاء يمثلون الاسلام أو يعملون لأجله فإني لك ناصح بأن تتركهم وهذا يعني أنك انسان على نياتك ولا تعرف تميز الخير من الشر.. الناس ديل حتى ولو تركنا كل مسائل السياسة جانبا ومسكناهم من الناحية الشخصية والسلوكية بس حنلقاهم أسوأ البشر وعندهم أسوأ الخصال وكلامي عن تجربة مش ساكت أولا يكاد كلهم يكونوا كذابين .. من فوق لي تحت.. وبخلاء جدا (أيضا ‘ن تجربة متعددة وسماع لأطراف كثيرة) وهم لا يقدمون المساعدة لأي بشر ولو كان عند الواحد منهم مال قارون لا يمكن أن يعطيك كسرة خبز ناشفة .. وأبدا لا يرجى منهم إنسان أي خير ومن طلب منهم خيرا أو مساعدة مهما كانت ومهما كانت علاقتك به وأحوالك سيئة فلا تلومن إلا نفسك .. أعرف منهم شخص كبر مسمي خبير يسكن والده في غرفة الخدم قرب باب الشارع .. قال لي الصناعي الذي كان يعمل في بيت المذكور أنا كنت قايله زول كان شغال في البيت زمان وكبر وصاحب البيت استحسن فيه وأسكنه بعد أن أسن ولكني اتخلعت عديل عندما أكد لي أن صاحب الفيلا الكبيرة دا ولده المن صلبأيمانا مغلظة .. هل يرجى احد منهم خير؟ أنا لست حزبيا .. أكره الأحزاب والطائفية جدا من جوانب السياسة لكن من جوانب تقييم الشخصيات لا أستطيع مثلا أن أقول أن الامير نقد الله لم يكن شجاعا ولا كريما وكذلك ولده المصاب وابنته سكرتيرة حزب الأمة الان .. ناس زي الدهب الأحمر .. التقييم السياسي شي تاني .. ولا أستطيع أن أقول أن الأزهري لم يكن رجلا صلبا ومقداما وقويا وصبورا ولا عمر نور الدايم ولا عبد الخالق ارئيس الشيوعيين كان رجل ستينلس أستيل وملو هدومه مع أنه كان بالنسبة لي مرفوض لأنه شيوعي لوالصادق نفسه لولا تأثيراتهم عليه وارتباطه بهم بصورة ما كان من الناحية الشخصية رجل مؤدب .. السودانيين عندهم طباع يقدرونها جماعتك العاجبنك ديل خلو منها نهائي ولو درت أكتب كتاب في هذا الجانب لفعلت ولكن الموضوع معروف للجميع لأنهم شايفنهم في المجتمع وفي الحلة .. لا نخوة لا مبادرة في الخير لا نجدة في الشر حتى عوازيمهم الأسرية كما شايف واحد معفن في الحلة لا يدعونا لها ولو كشكرة مع أنه نحن جيرانه تمرق من بيتنا عينك في باب بيتهم .. إضافة إلى أن زوجته تربطنا بها علاقة قربي.. هل دا طبع سودانيين ؟ خلاصة يا أخي أبو البنات.. هذه أسوأ ملة من البشر على سطح الأرض منذ أبينا آدم وحتى اليوم وظني حتى تقوم الساعة لن يبتلى البشر بشر منهم... سلامي

[السماك] 05-08-2016 06:43 AM
يا أبا البنات .. لا أظن أن هناك من يأخذك مأخذ الجد .. حتى الأستاذ شوقي عندما رد عليك بهذا القدر من الانضباط بالمنطق وأدب الكتابة الصحفية لا لأنه أخذك مأخذ الجد .. وإنما أراد فقط أن يلفت النظر إلى أن هناك الكثير من أمثالك ينافقون وهم يعلمون تمام العلم بأنهم ينافقون .. ولا عجب في ذلك لأن الجرائد الإلكترونية مفتوحة للجميع .. وهو في حد ذاته شيء صحي ومطلوب ..

European Union [اسامه] 05-07-2016 11:00 PM
انت عبيط ولا بتتعابط

European Union [الســــــيــــــف الــبــتـــار] 05-07-2016 10:30 PM
الحمد لله
أن حرمت من الولد الذى يحمل أسمك و جيناتك الغابيه و يكون عالة وعبىء ثقيل على الوطن و المواطن و مؤكد يكون سفاح و مجرم نسجل خطر لان الطينه من العجينه و الخباز واحد ؟
اتعتقد أن غباءك و جهلك باللوائح و القانون المعمول به فى جامعة الخرطوم يمنح المدير الهبيل الحق فى طرد او فصل طالب لمدة محددة ؟
لا يا ابو البايرات أن شاء الله هناك خطوات يجب أن تتبع قبل الفصل او الحرمان من الدراسة و اكيد ما عندك شغله بالجامعه و لا من النوع البمر مرور الكرام خلف اسوارها لانها أكبر من مداركك و نافووخك الذى لا يستوعب و لم تكمل تعليمك الابتدائى و هذا فضل من الله عليك لتعرف تقرأ اسماء بناتك فى الشهادة وهم رسوب مغلظ لان الاب جاهل ....

European Union [ابوالبــــــــــــــنات] 05-07-2016 09:12 PM
من المؤكد من يرد عليك بالسباب وتوصيفك حسب مايروق له دون ان يوصل لك فكرة معينه بالطبع هو شخص خاوى لايحمل فكر معين مثله فى ذلك مثل اولائك الذين يستعملون كوقود دونما يدرون وانا عندما اقول ذلك لا اتجنى على احد. اقول للذين لايدرون باننى على اتم العلم باولائك النفر المتخذين من العواصم الاوربيه مسكن لهم واسرهم اقسم بالذى رفع السماء بلا عمد انهم لم يفكرو فى يوم فى غير مصالحهم الشخصيه وعندما اقول ذلك لانى كنت على مقربه منهم وتيقنت بان مبارتهم مضيعة وقت على الفارق تعرضنا منهم لكثير من المضيقات كثيرآ ان كانت فى لندن اوباريس اودنهاك ودنهاك دى للذى لايعرفها هى لاهاى مقر المحكمة الجنائيه . حقيقه الواحد جد يتلم لفصل اولائك المغيبين لانهم لايجدون غير المتاجرة بقضيتهم ليس اكثر افيقو ولا تنتظرو سرابآ خضاع

European Union [mamomkin] 05-07-2016 06:30 PM
يا كوز مافي زول مخرب ويحمل سلاح وسيخ داخل الجامعة غيركم.. الكلام دا قبل ما تكون في حركات مسلحة ذاتو!!.. بطل تهريج وتضليل..

[kokab] 05-07-2016 06:01 PM
لعنة الله تغشاك في القبل الاربعه يا كوز يا ملعون يا مجرم يا كذاب يا منافق يا حرامي....لعنة الله تغشاك في القبل الاربعه يا كوز يا ملعون يا مجرم يا كذاب يا منافق يا حرامي....لعنة الله تغشاك في القبل الاربعه يا كوز يا ملعون يا مجرم يا كذاب يا منافق يا حرامي....لعنة الله تغشاك في القبل الاربعه يا كوز يا ملعون يا مجرم يا كذاب يا منافق يا حرامي....لعنة الله تغشاك في القبل الاربعه يا كوز يا ملعون يا مجرم يا كذاب يا منافق يا حرامي يا كلب....

[Truth] 05-07-2016 05:09 PM
كل الذين يحكمون البلد من خريجى الجامعات اكرر من خريجى الجامعات حتى الذين يقودون حركات التمرد من خريجى الجامعات هم تعلموا السياسة فى جامعة الخرطوم او احدى الجامعات السودانية لانها سن تكوين الشخصية السياسية و مكان تغلم السياسة مافى زول تما الجامعة و بعدا بقا سياسى الا امثال الاصم و كرار التهامى و اسماعيل الحاج موسى و هؤلاء يأكلون فى موائد اى حاكم فلا فكر لهم ولا سياسة لهم و لتكن جامعة الخرطوم او نيالا او النيلين او اى جامعة منارة لتعلم السياسة قبل العلم

[shawgi badri] 05-07-2016 05:07 PM
ابو البنات لك الحية . الجيش ليس هو صفا انتباه الي الامام مارش . هنالك التربية الوطنية والانضباط والاخلاق والامانة . التعليم ليس كراسات ومذكرات ومحاضرات . الاخوان المسلمين كانوا اكثر من دعي للاضراب وقادوا الاتحادات ومارسوا النقاش والضرب بالسيخ ومنع الرقص . وفي سنه 1966 اضربوا عن الدراسة عندما ادخلوا الخدمة الزاتية بدل الجرسونات في الاكل .
الطالب ينصقل وينمو لكي يقود المجتمع ومش صم بكم . هل توافق انت علة جرائم الانقاذ ؟


#1456865 [جبل البركل]
2.50/5 (5 صوت)

05-07-2016 01:43 PM
غزوة الادراج بقيادة المنتصب دوما القمبرجوز محمد عطا وكتيبة اصحاب الروح الطيب والجسد الفاسد...الله يرحمك يا حاج نور مؤسسس تلك الكتيبه..

[جبل البركل]

#1456842 [باتمان]
2.00/5 (3 صوت)

05-07-2016 01:08 PM
والحظر الامريكي دة جديد ؟ وليه ما حظروا سويسرا وغانا والسعودية وسلطنة بروناي ؟ هل نست الانقاذ ... امريكا لك قد تسلحنا ... وامريكا قد دنا عزابها ، وامريكا لمي جدادك وشيلي بروشك . وهل امريكا نست اغتيال الدبلوماسي قرانفيل والسائق وتهريب القتله بمسرحية اخراج جمعية ادبية في مدرسة اولية . ماذا عن القتلى في سفارات شرق افريقيا والباخرة الحربية في اليمن ... وفلوس الشعب السوداني المعطوها لتعويض الضحايا الامريكان . الكيزان ديل هبل ولا بتهابلوا ؟ الاعتداء علي الطلبة والهجوم علي المحامين الاخير ... قدام الحكومة الامريكية والكونقرس!!!!!!!!!!!!!

وزاد البشير موية على قتلة قرنفيل وسائقه وشرطى المراقبة فأطلق سراح الذى ساعدهم على الهرب من سجن كوبر بينما يتذمر الآن بتأثير المقاطعة على إقتصاده.

[باتمان]

ردود على باتمان
[shawgi badri] 05-07-2016 11:08 PM
الغريبة يفتخروا في التلفزيون ويقولوا انهم شاركوا في حرب ليبيا . ويصورون الشاحنات السودانية والظباط السودانيين وهم يسلمون الاسلحة لكيزان ليبيا . ويقولون ما عندهم صلةبالارهاب .


#1456829 [Rajab]
3.83/5 (8 صوت)

05-07-2016 12:49 PM
ااحمد الله علي انك فتحت الباب ده و الموضوع ده من البداية اثار في مواضيع و احداث قديمة جعلتني من زمان عارف مصايب الجماعة ديل كلهم و فسادهم و فساد غيرهم. الموضوع وما فيه اول ما جات الانقاذ كان الجماعة ديل مثل الكلاب الضالة سجنوا كل تجار العملة في كوبر و دبك وقالوا ليهم القروش و الدولارات في البلد عند منوا. كل واحد منهم قال يخارج روحة..وبعضهم معروف وبعضهم طفش بعد ذلك من السودان.لفقوا التهم والمعلومات الكاذبة التي ادت الي اعتقال مجدي و صحبه من الذين اعدموا او الذين اطال الله في اعمارهم.الكلاب الكيزان لموا كل القروش ومافي راجل بيقدر يقول حاجة. بعد ذلك اشتغلوا فساد في جميع موسسات الدولة واحالوا للصالح العام من مات بعد ذلك كمدا بفقدان وظيفته او عدم مقدرته علي المعيشة. في ذلك الوقت اولاد الكيزان واسرهم عاشوا بحبوحة من اولاد الترابي عصام تاجر التوكيلات للسكر و الدقيق وغيره. واخوه محمد عمر الاهدوه عربة كريسيدا اخر موديل و هو لسة في الثانوية. اشهد الله لم ار شي معيب علي محمد عمر لكن عصام كان شخص متصلت و يحب المظاهر وكل كلامه كان انوا عنده هذا و يمتلك ذاك. واذا غضب يشهر مسدسه للرجال و يضرب النساء و مافي داعي للكلام هنا. نرجع لعمك الترابي و الناس خايفين يقولوا ليه ولدك عمل. لكن هوا علي علم بكل شي والبيعمله عصام. مشاكل في الفروسية و في السوق مع التجار و مع الصحفيين وكل المشاكل تصل لاستعمال السلاح. في نفس الوقت اولاد الوزراء ما مقصرين من ود صلاح دولار، ود سبدرات. واولاد فلان و علان وفي نفس الوقت اولاد الناس يا يغشوهم ويودهم الجنوب ويا يكشوهم في الكشة لي حوش البقر في امدرمان وبعديها العيلفون والجنوب طوالي. بمناسبة الشهداء العملوا ليهم منظمة من شركات استثمارية فيها الصرف علي حرامية الكيزان. عارف ان ميزانية صرف المنظمة دي كمثال مفتوحة و كلها معفية من اي شى حتي الضرائب. عربات كيف وبيوت كيف و كله هي لله هي لله. الله برئ منكم الي يوم القيامة. اي محاولة من وكيل الضرائب مع شركات الكيزان و منظماتهم كانت فاشلة تماما مثل محاولات المواصفات و المقاييس وفي النهاية الكيزان شالوا عبد القادر و عبد القادر من وظائفهم. وكدا خلا الجو للحرامية والمفسدين لسرقة و تسميم الشعب الغلبان. دقيق و سكر و غيره من السلع الفاسدة و المميته بارخص الاسعار من زبالات و مواني العالم الي السودان. طبعا استفادوا من عدم عضوية السودان في نظام مراقبة و مقايسة البضائع ودخلوا كل ما هو مميت للي السودان. دي ذي قصة الشاب خالد مندوب وزارة النفط في بورسودان كانت مهمتة تخليص كل شحنات الكيزان المميته دون تفتيش او اوراق وبعد ذلك بضائع ابو النسب. سبحان الله الناس تاكل حرام وتاكل الحرام لي اولادها. تمر الايام وتجي سوداتل و موبيتل و الفساد يصبح في الصحف و الضرب بين الحرامية يصل مراحل متقدمة يتم فيها تصفية كل من هو نظيف و عفيف و الشركات قامت في دبي و ماليزيا بقروش البلد. عمر البشير واخوانه وبالذات المدعو عبدالله الذي لايخاف الله وقد حكي لي المسؤل المحال للصالح العام عن سبب مشاكله مع عبدالله وعن ضابط المحكمة الذي قال له يا عم والله الناس ديل قاصدنك و حاول امشي واشكي امرك لله. وقصة حادث عبدالله البشير وصاحب العربة يقول للعسكري انا الغلطان و ود حرام و ما عارف الجابني قدام عربية سيادتوا شنوا.اين الدين الاسلامي اين التربية واحترام الحق و العدل. قصص فساد بنك السودان و النقد الاجنبي قديمة جدا. وحسي خلاص مفتاح الخزنة عند فلانة. و فلانة دي كل شي حقها من نملي لي حلفا. واخيرا شالت الاراضي خلف العمارات و معاها اراضي ونادي بري العريق شرق عبيد ختم.كل يوم مرسلة قروش لي دبي و ماليزيا و كمان مصر. ذي ما قال موظف الامن في مطار دبي السودانيين ديل ما عندهم وسطية.. يا مغترب و تعبان و جاري المرة و الولاد. ولا ناس جارين هم و اولادهم شنط الفلوس. ناس عنوانهم شقة في ارخص مكان في عجمان و الشارقة.. وناس عنوانهم فيلا في شط دبي. سبحان الله. اما الصادق و مبارك فديل ذي اللعبة الشغالة بالحجارة. كل شوية بسافروا بره يشحنوهم و يجونا راجعين شوية كدة وهاك كلام جرائد و حوارات وبس. السودان انتهي من زمان من زمن مامون حميدة و ابراهيم احمد عمر خربوا الجامعة و بعدين رسلوا اولادهم بيرطانيا حيث اعرق الجامعات. وقفلوا مستشفي الخرطوم و بهدلوا الغبش من اهل بلادي. عشان تمشي رويل كير و الزيتونة و يستبشرون. ودي قصة ليوم اخر.. قال واحد دكتور قال لينا انا بشتغل في العيادة لحدب ما اعمل كذاء مليون حق اقساط سلفية العمارة بعد ذلك امشي لو في وقت للمستشفي الحكومي وه كلوا معناه الناس الما عندهم قروش يموتوا وكذلك الماعدهم دراية بالطب برضوا بيمتوا لمن يسمعوا كلام الدكتور البيكون سرحان وداير يتخارج بس. بلد تصحي من الصباح كهربا مافي، موية مافي، غاذ معدوم وغالي، مواصلات مافي، خضار غالي وعيش معدوم و مسرطن وبعد ده علاج من دكاتره بالالوفات لمقابلة مدتها ٥ دقايق الدكتور بيكون مديك اهتمام ٣٠ ثانية وبيكون منتظرك تتخارج سريع.وادوية ضاربة من الواغ الواغ ومخزنة في بيوت الاجار.الفروض جائزة نوبل في الاقتصاد للمواطن السوداني البيعيش بماهيته لاخر الشهر وعنده اسرة ممتدة. وجائزة نوبل للسلام برضوا للمواطن السوداني الصابر و الساكت علي عمائل الكيزان. وجائزة نوبل للاداب برضوا لاهل بلادى علي ادبهم و ابداعهم المستمر رغم المعاناه. وكل وجائز نوبل سواء في العلوم والتكنلوجيا و غيرها من الجوائز برضوا للشعب السوداني.

[Rajab]

ردود على Rajab
[عبد الرحيم] 05-08-2016 12:19 PM
والله رجب انا قريت كلامك كلو زي ما قال العم شوقي بدري وكلام زول عارف الحاصل وزول كان قريب من الناس ديل او متابع لصيق للحالة السودانية

والحقيقة بصراحة الحالة السودانية حالة عجيبة جدا حالة تحتاج الى كاتب مبدع يكتب فيها كتاب .. يكون كتاب العالم وكتاب القرن القادم والقرون القادمة لاول مرة ناس تسطوا على السلطة باسم الدين والاسلام ويستبشر الناس خيراً بالدين وبالاسلام

وتصحى الناس من سكرتهم وتجد الكيزان اول ما بدأوا بتدمير الدين والاسلام وعملوا ضد الدين وضد الاخلاق

هجموا على البلد باسم الدين فأفرغوا الدين من محتواه ..وصار ارخص شي في السودان هو الانسان وقتل الانسان واغتيال الانسان وتعذيب الانسان ..وتجفيف منابع الخير ...
حالة السودان تستدعي ان يكتبها فقط الكاتب ويكي كولنز الكاتب الامريكي الجنسية البريطاني الاصل الذي تربي في ايطاليا وهو كاتب بوليس يجيد تتبع الاحداث وهو مؤلف قصة ذات الرداء الابيض ... واجمل ما في القصة السطرين الاولين من الرواية...
شكرا لك

[shawgi badri] 05-07-2016 05:17 PM
العزيز رجب لك التحية . كريت موضوعك بنفس واحد واعدت القراءة . تعلمنت واستفدت من المعلومات . ارجو ان تتوقف عن المداخلات وتكتب مواضيعك مباشرة .


#1456817 [sakina]
2.25/5 (5 صوت)

05-07-2016 12:31 PM
من الأفضل تصحيح الأخطاء او جعلها في الحد الأدنى قبل وضعها علي صفحة الراكوبة هذا افضل للصحيفة والكاتب، أخطاء فظيعة وكثيرة

[sakina]

ردود على sakina
[shawgi badri] 05-07-2016 03:58 PM
لك التحية وشكرا علي لفت النظر . الاخطاء بسبب الاستعجال وعملية خطف الوقت . واحد الاسباب عدم التركيز وضعف الكاتب واستخدام برنامج تصحيح بسيط يمكن ان يساعد كثيرا. مرة اخري شكرا .

European Union [Sudani] 05-07-2016 02:05 PM
We love it as it is what is your problem go to hell


#1456788 [الناهه]
1.00/5 (2 صوت)

05-07-2016 11:53 AM
اما فيما يختص بمدير جامعه الخرطوم فليس هنالك ما يثير الدهشه بانه اكتفى برفد 6 طلاب فقط وان الله صرفه عن ظلم المزيد منهم وتلك من معطيات سياسة التمكين البغيضه
اما فيما يختص باطلاق النار من احدهم على مواطن وان الحكومة حكرا على اسرتهم فلا ادري لماذا تذكرت الرئيس الراحل جعفر نميري الذي يعتبر اعظم زعيم مر على السودان على الاطلاق

[الناهه]

#1456783 [ALwatani]
2.00/5 (5 صوت)

05-07-2016 11:42 AM
والله يناس قبل فترة كنت اعتقد الدكتور احمد سليمان مظلوم لانى كنت ازوره مع مريض من زمن وهو جد طبيب مقتدر ولدية عيادة متواضعة وعربة اكثر تواضع جياد بكوس قديمة وقلت فى نفسى جد الانقاذ ظلامة للعبيد زول كان عميد الاسنان وتعبان زى دا وايام حرب غزة كان رئيس الوفد الطبى لغزة وقلت دا شيى طيب وبعد فترة اختفى من البلد وسالت طبيب اسنان وقال لى البروف هاجر قلت سبحان الله البلد دى مافيها خير اى حكامها يشردوا الخبرات زغم الاحتياج لهم وبعد فتره ظهر بعايدة غرب الحكمة اكثر تنظيم بعد الغربة ولكنها متواضعة جدا

ولكن لم اطلت لنا الصحف بصورة العالم والبروف يتوعد الطلاب بمزيدمن الفصل زهلت
من سطوت الحكم بعد الممارسه

وتناسوا علماءنا وحكماء السودان العلم لابد من عمل يصحبة والعلم كاشجرة والعمل بة هو تلك ثمرة الشجرة والعالم الذى يجارى السلطان فى بطشة والتنكيل بشعبة بدل من ان يرشدة الى السيرة الحسنة يكون زنديق فى نظر الخواص والعوام

يا دكتور تدسر بثوب العلم واجمع طلابك بميدان الشرقى واحضر لهم رئيسك ليخاطبهم بان الجامعة خط احمر ويمنحهم شهادة بحث بذلك ويشكرهم على الحمية من اجل الممتلكات العامة ويعلم كثير من الطالب الذين استشهدوا من اجل الوطن "الجنوب" ليس جلهم كيزان بل وحدة التراب هى الدافع العام وياكد هذا اين المجاهدين الى الدمازين ودارفور برغم ابناء الكيزان اليوم مستلمين ضرع البقرة الحلوب لانهم يؤمنون ببيع المواقع المهمة الاستراتجية ويفتكرونها شطارة


واخيرا يادكتور وماشاكلك : اقرؤا عن الفيلسوف بيدبا الهندى ومقاله لدوشليم الملك الفاسد وكيف تراجع ودخل التاريخ واصبحوا مرجع للحكمة حتى لاتفتكم قاطرة التاريخ

[ALwatani]

#1456772 [ود حلتنا]
2.00/5 (5 صوت)

05-07-2016 11:25 AM
اقتباس .
ولد الترابي شغال شنوا؟ والمزرعة والخيل وكلاب الصيد والعربات والجمرة الخبيثة والنفايات ومواهي الخدم والحشم ورصيد الموبايلات ... بيجيبهم من وين ؟

فى لقاء صحفى لكمال عمر عقب وفاة الترابى وكان يتحدث عن مناقبه قال جيت راجع من سجن كوبر ومشيت بيت الترابى لحاجتنا للمال فى تسيير شؤون الحزب وصدمت حينما عرفت بأن أهل بيته لا يملكون من المال شئ وقامت زوجته باعطائى دهب ورثته من والدتها
وعرف عن كمال عمر الكذب والتدليس والنفاق والأرتزاق بس فى الحتة دى بالذات أنا بصدقوا لانو الكيزان ديل بعبدو الدولار والريال والجنيه السودانى لكن الكلام فى صاحب الكلاب الفى الصورة دا جو يساعدوا فى دفن ابوه دس المحافير

[ود حلتنا]

#1456739 [ابومروان]
1.50/5 (5 صوت)

05-07-2016 10:09 AM
الانقاذ سيئة لكن مشكلة امريكا والحظر ليس لسوء الحكومة بل لامصلحة لامريكا كبيرة في السودان ولو كانت هنالك مصلحة لتنازلت مع سوء البشير كما تنازلت عندما لم تجد بديل للصمغ العربي ودونكم السيسي وقضاءه وشرطته ده المتظاهرين بيعدمهم وبيابدهم والصحفيين والاطباء العساكر بينكلوا بيهم بعد ده كله امريكا ضاربه طناش

[ابومروان]

#1456728 [عباسية موردة]
1.97/5 (6 صوت)

05-07-2016 09:48 AM
والله ياعم شوقى ربنا يديك العافية عشان دائما بتدينا متعة والقرف بفارقنا بعد نقرا كلامك العسل ده والله السودان اصبح جمر مش الاسعار او الكهرباء والله جحيم عديل كده والكيزان وصلوا مرحلة من الطغيان والفجور والعتو والغلو لم نسمع بها منذ عهدج حكم الخليفة عبد الله الذى كان ايضا من الطغاة والظلمة وصراحة كده يا عمنا شوقى عايزنك تعمل لينا جمعية او منظمة فى السويد لمساندة ذوى ضحايا جرائم عصابة الرقاص خاصة الطلاب الذين قتلوا والذين فصلوا من الجامعات وغيرهم من ضحايا عصابة هى لله لابارك الله فيهم احياء واموات

[عباسية موردة]

ردود على عباسية موردة
[shawgi badri] 05-07-2016 04:55 PM
العزيز عباسية موردة لك التحية . المشكلة انو اليد الواحدة ما بتصفق. عملنا منظمات عدة . وجمعنا معدات طبية رائعة ودفعت الترحيل والتخليص وانتهت في مستشفيات خاصة . وسوداني يعمل في شركة شحن كلفناه بالشحن قام بترحيل كميات ضخمة وباعها في افريقيا .
عملنا منظمة لحقوق الانسان ومشينا لي وزارة الخارجية ووعدونا بالمساعدة . السكرتير رفض تسليم الاوراق للمؤتمر الجديد وطالب بفلوس . وقشر بالمنظمةودخل علي السويديين وصار الابن المدلل يمشي المؤتمرات والتمظيمات . السودانيين في الغربة ذي السودانيين في السودان يصعب العمل الجماعي معهم .


#1456717 [جركان فاضى]
2.50/5 (10 صوت)

05-07-2016 09:34 AM
كانت تنتشر الcoolers فى جامعة الخرطوم...ففى كل زاوية وملف تجد cooler لتشرب ماء باردا...عندما جاءت الانقاذ حولت جميع ال coolers الى مكاتب الحزب الحاكم ووضعت فى مكانها ازيار...ازيار بلا حمالات والله على ما أقول شهيد ..اذلالا واحتقارا لطلاب جامعة الخرطوم...فاذا كان مدير جامعة الخرطوم لايستطيع حماية cooler فكيف يمكنه حماية طلاب

[جركان فاضى]

ردود على جركان فاضى
[سننتصر علي الكيزان الخونة اكلي قوت الغلابة] 05-07-2016 05:34 PM
سلام ياجركان فاضي... يااخوي وين انت - انقطعت لفترة عن التعليق !!

عملية نزع الcoolers واردة في بنود المشروع الحضاري والقصد منها ان بتخلي الناس (من غير الكيزان ) عن النعم والاستعداد ليوم الرحيل ..

الاتري الارداف و البطون المنتفخة من اكل حقوق الناس ..كله لحم من سحت ... والرسول الكريم قال : (من نبت لحمه من سحت فالنار اولي به) .. اللهم اجعل الكيزان جميعهم في الدرك الاسفل من النار.


#1456708 [الكردفاني العديييييييييييييييييييييل]
2.50/5 (8 صوت)

05-07-2016 09:20 AM
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....
اللهم عليك .......... بعصابات الرقاص ....اقطعهم ... تك .....

[الكردفاني العديييييييييييييييييييييل]

ردود على الكردفاني العديييييييييييييييييييييل
[معاويـــــــــــــــــــــــــــــــــــة] 05-07-2016 07:12 PM
اللهم امييييييييييييييييييييييييييييييييييييييييييييييييييييييييييييييييييين
يا ارحم الراحمييييييييييييييييييييييييييييييييييييييييييييييييييييييييييييييييييييين


#1456704 [Bit messames]
2.50/5 (6 صوت)

05-07-2016 09:18 AM
اطال الله عمرك و عمره بذاد الاخرة يا عمنا شوقي بدري.و الله اننا لنشتم من كتاباتك "دعاش" ازمان جميلة هي كل ما تبقي لنا..فلا تحرمنا منها و لا تطل غيبتك عنا فنحن قد "ادمناك".

[Bit messames]

ردود على Bit messames
[shawgi badri] 05-07-2016 04:58 PM
العزيزة بت مسيمس لك التحية وشكرا علي الكلام اللطيف .لقد عشنا سودانا رائعا شرقنا فيه بالسعادة والشعور بالامن والحنان . نريد ان ننقل بعض الاحساس للجميع .


#1456696 [اليوم الأخير]
2.00/5 (6 صوت)

05-07-2016 09:05 AM
أكيد تقصد خالد محي الدين في الفقرة المعنية بدلاً من زكريا محي الدين ، المهم كلهم كانوا زي الزفت ، فتحوا باب الإنقلابات في الوطن العربي عن غباء لا يختلفون عن النميري و البشير في أي شيء ، سوى ادعاء التوجه لليمين أو اليسار أو للإسلام ، فالعساكر تم توجيههم غبائياً في أول شهور الحبس CONFINEMENT في الكليات العسكرية

[اليوم الأخير]

ردود على اليوم الأخير
[shawgi badri] 05-07-2016 12:32 PM
لك التحية . حتي السوءوالغلط درجات . الانقلاب علي حكم استبدادي ملكي فاس كان من الممكن ان يكون جيدا اذا اعاد الديمقراطية للشعب . هاشم العطا وعبد الخالق كان من المفروض ان يدعوا منذ اليوم الاول الي اعادة الديمقراطية .لانه من المؤكد انهم يفقدون الدعم الشعبي ولا يستطيعون الاحتفاظ بالسلطة .
خالد محي الدين في كتابه والآن انا اتكلم كان معقولا . هو الذي طالب الروس باعطاء شقة للشاعر جيلي عبد الرحمن وزوجنه الروسية وبناته لانه يعرف ان السودانيين عادة لا يطلبون بشء . زكريا محي الدين كان عميلا للامريكان مثل ناصر في بداية عهده .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة