الأخبار
أخبار إقليمية
الارشاد تعلن تكفل الامارات بإيجار مقر الوزارة بمبلغ (23) ألف دولار شهرياً
الارشاد تعلن تكفل الامارات بإيجار مقر الوزارة بمبلغ (23) ألف دولار شهرياً
الارشاد تعلن تكفل الامارات بإيجار مقر الوزارة بمبلغ (23) ألف دولار شهرياً


05-24-2016 10:47 AM

البرلمان: سارة تاج السر
اعلن وزير الارشاد والاوقاف عمار ميرغني, تكفل دولة الامارات بدفع ايجار مقر الوزارة الكائن بشارع ابراهيم المفتي بالخرطوم, لمدة 3 اشهر اعتباراً من الاول من مايو بما يعادل 23 ألف دولار شهرياً، على ان توفر الوزارة موقعاً جديداً تتحمل هيئة الشئون الاسلامية والاوقاف الاماراتية نفقات تشييده خلال تلك المدة.
ونفى الوزير في رده على سؤال مستعجل تقدم به النائب عمر دياب، بشأن تصرف الاشارد والاوقاف في منحة اماراتية لتشييد مبانٍ للوزارة, بتأجير مقر بقيمة 23 ألف دولار, نفى وجود اية منحة اماراتية تم التصرف فيها، وقال ان الامر تم بموجب مبادرة من الاوقاف الاماراتية بتوفير مقر دائم للوزارة بالشراء، بعد ان طالب صاحب العقار الذي كانت تستأجره الوزارة منذ 2009م بشارع بشير النفيدي، برفع قيمة الايجار من 85 ألف جنيه الى 200 ألف جنيه.
واشار ميرغني الى ان الوزارة افادت المالك بأنها لاتستطيع دفع المبلغ المطلوب، وطالبت بمهلة لمدة 3 اشهر لاخلاء الموقع وتوفيق اوضاعها, وفي نوفمبر 2015م، وقعت مذكرة تفاهم مع وزارة الشئون الاسلامية والاوقاف الاماراتية تكلفت بموجبها الاخيرة بايجار المقر الحالي للوزارة، بعد اختياره من جملة 5 مواقع اخرى تم استبعادها لتكلفة الايجار العالية التي وصلت في حدها الاعلى الى 17 مليون دولار، والادنى 8 آلاف دولار, لحين توفير الوزارة موقع جديد تتحمل الامارات تكلفة تشييده.
وقال الوزير ان العروض الخمسة قدمت بالدولار باستثناء موقع واحد بشارع علي عبداللطيف كان بالجنيه، ووقع الاختيار على مقر بشارع ابراهيم المفتي، ولفت الى انه تمت مخاطبة رئاسة الجمهورية بما ورد في المذكرة المشتركة، وردت الرئاسة بالموافقة وتم توثيق عقد الايجار في وزارة الخارجية وسفارة دولة الامارات بقيمة 23 ألف دولار شهرياً.

الجريدة


تعليقات 13 | إهداء 0 | زيارات 12806

التعليقات
#1466141 [عبدالله الفونجي]
0.00/5 (0 صوت)

05-25-2016 09:27 AM
ععععععععععععععععععععععععععععععععععععععععععععععععععععععععععععععععععععععععار
وبس .

[عبدالله الفونجي]

#1466027 [عمار]
0.00/5 (0 صوت)

05-25-2016 04:17 AM
خراب وطن بايدي أبنائه

[عمار]

#1465999 [الفقير]
0.00/5 (0 صوت)

05-25-2016 12:51 AM
علشان تفهموا الحاصل

مقال نشر بالراكوبة:

شاهد الصور: الأنقاذ سيرة وانفتحت (2) ... المتعافي سأل عن الكوميشن، وبكري طالب بالنصف، وعبدالرحيم ن طالب بإدخال شركاته.




ماذا طلبت سكرتيرة مدير الهلال الأحمر بعد أن رفضنا دفع رشوة مالية؟!!

05-20-2015 10:40 AM

سمية هندوسة

‏شهادتي للشعب: عن فساد منسوبي المؤتمر الوطني وطريقتهم في السطو على مجهودات الغير واستغلالهم لمصائب الوطن

- صاحب فكرة مشروع بنك الهلال الاخَٓضٓر لدعم التعليم و الشيخ محمد بن سعيد لوتاه صاحب منظمة لوتاه الخيرية و مدير منظمة زايد الخير تفاجأوا بطمع المسئولين و ضرورة ان يدفع لهم حتي يتحصل المتبرع على التصديقات اللازمة*

- من اراد ان يقدم شيء لأهل دارفور عليه ان ينفذ مشروعه بنفسه و يتابع مراحله عبر سفارته لأن كل مليم يدخل السودان سيذهب الى جيوب المسئولين

- عثمان جعفر مدير الهلال الاحمر السوداني: قال (الأماراتيون يورونا ميزانيتهم كم و عايزين شنو، و ينزلوا القروش في حسابنا، ونحنا ننفذ المشروع بمعرفتنا عبر شركة وطنية) و غير كده مشروعهم ده مرفوض.

- بكري حسن صالح سأل عن ميزانية المشروع وعندما وجد أن الرقم خيالي، قال هو حا يجيب الموافقة على شرط يقوم بتنفيذ المشروع مع الشركة المنفذة كشريك بالنصف.

- سكرتيرة مدير الهلال الأحمر طالبت برشوة مالية وعندما رفضنا طلبت سيارتي قائلة: "خلاص ممكن اخد عربيتك المرسيدس البيضاء شفتها واقفة جمب المفوضية و عجبتني شديد"

اليوم عايزة احكي عن فساد منسوبي الموتمر الوطني و طريقتهم الأخطبوطية في السطو علي مجهودات الغير و محاولة استغلالهم لمصائب الوطن ليغتنوا من خلال معاناة النازحين في مناطق الحروب ، تحديدا دارفور و جبال النوبة ، و عايزة احكي من خلال تجربة شخصية فقد غادرت السودان منذ العام ٢٠٠٤ للإقامة في مصر و لكن لم تنقطع زياراتي للسودان، و في العام ٢٠٠٦ تنقلت مع زوجي في عدد من الدول العربية و كنت اعمل مع منظومة بمصر في رصد انتهاكات حرية التعبير و النشر الصحفي و في مجال حقوق الانسان من خلال التشبيك فتمت دعوتي لحضور مؤتمر في دوسلدورف بالمانيا و هنالك تعرفت علي عدد من المدعوات من دبي و كانت إحداهن تعمل بمنظمة دبي العطاء و تناقشنا حول مشكلة دارفور و معاناة النازحين فقدمت لي دعوة بان اشاركهم في مؤتمرهم القادم للمشاورة حول كيفية عمل ملموس للنازحين حيث انهم قدموا الكثير من اجل دارفور و لكنه غير ملموس ، المهم كنت معهم في مؤتمرهم و هنالك التقيت بمجموعة من السيدات و الرجال الذين يعملون بالمجال الانساني و لديهم مؤسساتهم الخيرية و جميعهم تحدثوا عن دعم قدموه لم يذهب للمتأثرين و لم يتم دعوتهم لافتتاح مشاريعهم و عندما ذهبوا بأنفسهم لمحاولة إنفاذ مشاريع خيرية فوجئوا بطمع المسئولين و ضرورة ان يدفع لهم حتي يتحصل المتبرع علي التصديقات اللازمة و قال احدهم بانه ذهب عن طريق شخص مقرب من المتعافي و رتب له لقاء مع المتعافي الذي رحب بفكرة بناء قريتين و لكن الرجل عند الاتفاق علي كيفية التنفيذ تفاجأ بالسيد المتعافي يسأله عن نسبته اذا خلص موضوع التصديقات الرجل ساله ان يوضح كلامه اكتر فقال له المتعافي بالحرف ( الكوميشا حقي ) قبل ابدا اي اجراء قلت شنو ؟ التفت الرجل لمدير أعماله و ساله عن اول موعد لطيران الإمارات الي دبي متي ، فسأله المتعافي تاني ( رأيك شنو يا شيخنا ) الرجل اجابه هدوء قلت ارجع بلدي يا رجل انا جيت اعمرلك بلدك تطالب بسمسرة قبل اي اجراء ، انا ما ادفع لسمسار ادفع لناس محتاجة هادا اجر لله سبحانه و تعالي و خرج ، بعد سماعي لهذه القصص المخجلة قلت لهم في ذات الطاولة من اراد ان يقدم شيء لأهل دارفور عليه ان ينفذ مشروعه بنفسه و يتابع مراحله عبر سفارته لان كل مليم يدخل السودان سيذهب الي جيوب المسئولين ، المهم علي ضوء ما عرفته من انتهازية و استغلال قررت ان اتفرغ بعض الشيء للتنسيق مع هولاء المانحين لننفذ مشاريع يستفيد منها الناس مثل حفر آبار مياه و بناء مدارس و قري نموذجية للنازحين لأجل استقرارهم و اتفقنا مبدئيا علي ان احاول مساعدتهم في حال ان ياتوا بمشاريعهم جاهزة و ينفذونها عبر شركات تتبع لهم ، و بعدها بعام عدت الي الوطن و ذهبت الي دارفور و تنقلت في معسكرات النزوح القريبة من نيالا مثل كلما عُطاش وقمت بعمل دراسة حالة و حصر عدد المتضررين و ارقام النساء و الاطفال و الشيوخ داخل هذه المعسكرات و احتياجاتهم ، هذا في العام ٢٠٠٨ و بعدها بعام قررت ان استقر في السودان رسميا للعمل من اجل إنسان المعسكرات بدارفور و انشاء قري و مدارس و مرافق صحية ، و بالفعل كنت بالسودان منذ يونيو بين ٢٠٠٩ /٢٠١١ .
أولاً بعد التشاور مع عدد من زوي الخبره علمت بانه ينبغي ان أقوم بتسجيل منظمة خيرية اولا، و بعد عمل اللائحة و اسم المنظمة و برامجها قمت بتسجيلها في وزارة الشئون الانسانية في الادارة العامة للمنظمات باسم ( الوكالة الدولية للتنمية و العون الانساني ) و حصرنا مهامنا في المناطق المنكوبة وهي دارفور و جنوب كردفان فعلمت انه علينا ان نحضر موافقة من الهلال الاحمر بكادقلي حتي نستطيع ان نعمل فيها ، و بالفعل حصلنا علي الموافقة بمقابل طبعا طلب الرجل مبلغ خمسة الف جنيه بالجديد ليوافق و كان اسمه محمد هارون و هو المنسق العام للهلال الاحمر بكادقلي ، فدفعنا له فأعطانا الموافقة في شكل شهادة تقول بأننا نعمل معهم في المجال الانساني و لنا كادر مؤهل مع إننا لم نبدأ العمل بعد ( سارفق إفادته هنا ) و قمت باستئجار مكتب لعملنا بعد عودتنا من كادقلي ، و بدانا فكرة كيفية ان نستطيع تنفيذ مشروعات دون تدخل الحكومة او نهب مال المشروع و راسلت جميع الأشخاص الذين اعرفهم من منظمات خليجية و تحدثنا عن الدعم و قلت لهم بالحرف الواحد اننا نحتاج لمشروعات تنفذونها بمعرفتكم و متابعتنا لمراحل التنفيذ مع ممثل سفارتكم فعلمت انه علينا التنسيق مع جهة حكومية لأجل الاعفاءات الجمركية و تخليص ما تحضره المنظمات الداعمة و تخصيص الاراضي لأجل بناء المدارس و المستشفيات و القري النموذجي


و بعد البحث و التمحيص علمت بان الجهة المناط بها تنفيذ هكذا مشاريع هي مفوضية نزع السلاح و التسريح و اعادة الدمج عبر ادراة مشروعات السلام و هي تابعة لرئاسة الجمهورية ، و لأنني مقاطعة الكيزان و تابعي الموتمر الوطني و كل ما هو حكومي من سنوات لأسباب جوهرية عانيت ما عانيت حتي وجدت شخص له صلة بمفوضية DDR و هي اخت زوجي المرحوم و بالفعل وصلتني بشخص في المفوضية يدعي عبد الحفيظ محمد احمد و هو رجل محترم جدا ولا يشبه الكيزان في شيء فحدثته عن الفكرة بالواضح و عن سمعتنا في الخارج خاصة منظمات الخليج فتاسف الرجل و قال بانه مسئول مشاريع السلام و وعدني بان ننفذ كل مشروع يأتي لخدمة الناس عبر الجهة المانحة دون تدخل اي جهة داخلية ما عدا تخصيص الاراضي و تخليص الجمارك ، و قال بان هذا يتطلب إبرام اتفاق بين وكالتنا و مفوضية نزع السلاح ، فاتفقنا علي ان يكتب كل طرف مهامه و بعد ذلك جلسنا و قمنا بصياغة الاتفاق و توقيعه بعد التعديل حيث ان شخص اخر في بالمفوضية كتب من ضمن البنود بان الوكالة الدولية هي الزراع المدني لمفوضية DDR ، فاعترضت علي هذا بشدة و اشترطت عليهم ان يكون تنفيذ المشروع الاول هو الذي يحدد استمرار العقد او فسخه ، فعدل الفقرة بان الوكالة الدولية هي الزراع المدني للمفوضية في هذا العمل ، و بعدها اجريت اتصالاتي و سافرت الي دبي و قبل ان أقابل اي شخص ممن اتيت للتنسيق معهم كان ولابد ان اتصل بالأخ الاستاذ الطيب عبد الماجد و بالفعل حضر الي في مكان اقامتي و جلسنا باستقبال الفندق لأشرح له سبب قدومي فتحمس جدا للفكرة و قال لي بانه سوف يحدد لي موعدا مع شخص من أبناء دارفور رجل اعمال و بر و سيدلني و اجد المشورة عنده فيما يختص بالتنفيذ ، و بالفعل كنّا باليوم الثاني في مكتب الاستاذ المحترم عيسي آدم مدير اسواق دبي و رئيس الجالية السودانية بدبي و هو من أبناء الفاشر ، و بعد ان جلسنا و تفاكرنا حول ما يجب ان نقدمه لاهلنا وجدنا عنده عدة مشاريع جاهزة للتنفيذ و لكن الحكومة كانت تقف عائقا في تنفيذها و من ضمنها كان مشروع بناء بناء قريتين نموذجينين بكامل مرافقهم بالمباني الجاهزة 3D panel ، و كل قرية تتكون من أربعمائة منزل بالاضافة للمدارس و المستشفيات و المتنزهات و دور العبادة و الأندية الرياضية بكامل شبكات المياه و محطات الكهرباء ، فتحمست لهذا المشروع الضخم ، فسألته عن الجهة الممولة فقال بانه مقدم من الهلال الاحمر الإماراتي كمشروع جاهز و كان لابد من إيجاد شركة وسيطة للاتفاق مع الشركة المنفذة و لعدم الثقة الحادث من المسئولين السودانيين و عدم تنفيذ المشروعات اضطر الاستاذ آدم ان يتفق مع شركة هندية باسم شركته لتنفيذ المشروع بتفويض من الهلال الاحمر الإماراتي و تعهد بان يساهم في إكمال كل ما ينقص ، و أجرينا اتصالاتنا بالهلال الاحمر الإماراتي الذي كان يعول علي الاستاذ عيسي آدم في التنفيذ فعلمنا بان ميزانية المشروع جاهزة و الشركة المنفذة جاهزة و لكن علينا ان نحضر موافقة من الهلال الاحمر السوداني لان عدم موافقته يعني عدم تنفيذ المشروع بالكامل ؟ و قمنا بابرام اتفاق للتنفيذ بعد ان حضر السيد عبد الحفيظ مدير إدارة مشروعات السلام بمفوضية DDR ، و حددنا ان نبدأ باستقرار نازحي اكبر المعسكرات مثل كلما ، و وعد الاستاذ عبد الحفيظ بان يحضر موافقة


و بعد ان عدت الي السودان وجدت بان السيد مدير الهلال الاحمر رفض تنفيذ المشروع جملة و تفصيلا ، ابلغني الاستاذ عبد الحفيظ ذلك و قال له محاولات اخري عبر رئاسة الجمهورية ، و كنت في غاية الاحباط ، فسالت شخص قريبي يعمل بالشئون الانسانية عن من هو مدير الهلال الاحمر السوداني قال لي قريبك اسمه حبيب مختوم ، فسألته هل تعرفه أجابني : عز المعرفة و اعرف منزله بالمعمورة ممكن أكلمه الان لو حاجتك مهمة قلت له مهمة جدا ، كلمه و حدد موعد بمكتبه عاجلا ، و بعد قليل اتصل بي قريبي قائلا بان السيد حبيب مختوم ينتظرنا بالمنزل اي وقت من الان ، خرجت من المكتب و ذهبت ناحية المعمورة بعد ان التقيت بقريبي بمحطة البلابل ، و كنت أفكر في شيء واحد فقط كيف ان يكون هذا الشخص من دارفور و يرفض مشروع مثل هذا ؟ و وصلنا اليه و استقبلنا بحفاوة و شرحت له المشروع و سألته عن سبب الرفض قال ليس هو من رفض قد يكون المدير الذي بعده و اسمه عثمان جعفر و قال بانه تم نقله او إحالته لا ادري ، خرجنا منه و في اليوم الثاني ذهبت الي مكتب الهلال الاحمر السوداني لمقابلة السيد عثمان جعفر و قالت سكرتيرته علي ان اعمل موعد لاقابله لاحقا فقلت لها الموضوع هام ولا يحتمل التأجيل فسألتني و حينما علمت بانه يتعلق بمنحة الهلال الاحمر الإماراتي أخبرتني بأنها تعلم كل ما يتعلق بهذا و دخلت مكتبه ثم عادت لتاذن لي بالدخول ، و حينما دخلت وجدت السيد عثمان جعفر فقمت بتحيته فرد ببرود ، و بعد ان جلست قبل ان اساله سألني هو : من الذي اعطانا الحق لابرام اتفاق لتنفيذ مشروع من الهلال الاحمر ؟ و كيف تحصلنا علي ذلك المشروع و قال بالحرف الواحد عشان اختصر عليك انا رديت للهلال الاحمر الإماراتي باننا غير موافقين علي هذا المشروع ما لم نقوم نحن بتنفيذه ، سألته كيف قال حسب الأصول المتفق عليها ( هم يورونا ميزانيتهم كم و عايزين شنو و ينزلوا القروش في حسابنا و نحنا ننفذ المشروع بمعرفتنا عبر شركة وطنية ) و غير كده مشروعهم ده مرفوض ، خرجت من عنده و اتصلت بعبد الحفيظ فقال انه مجتهد و د سلاف الدين وعده حا يقابلنا ب بكري حسن صالح وزير الدفاع السابق و هو قادر علي ان يحصل علي الموافقة من عثمان جعفر ، جلسنا مع بكري حسن صالح سال عند ميزانية المشروع وجد رقم خيالي فقال الموافقة بسيطة علي شرط يقوم هو بتنفيذ المشروع مع الشركة المنفذة كشريك بالنصف ، سالت: كيف ؟ اجاب ( يعني نجيب شركات الكهربا و الموية و نعمل التشجير و نجيب شركات التأمين لانه دارفور منطقة حرب و غير آمنة ) فقلت له ما اظن سيوافق الهلال الاحمر قال ( خلاس اسالوهم لو هم ما موافقين نحنا ذاتنا ما موافقين ، و بعدين ما حنخصص ليهم أراضي مجانا يشتروا مننا الارض بسعر المتر للمستثمرين مش ده مشروعهم و باسمهم ؟) طلعنا وانا مؤمنة اكتر بانه الكيزان ديل دراكولا الوطن ولا يهمهم آي شيء غير فائدتهم ، و قررت إيقاف السعي لان اي مسئول يشترط ان يكون شريك لياتي بشركات تخالف المواصفات من اجل الكسب المادي او سيرفض التعاون ، و بعدها ذهبنا الي كادقلي لتأسيس عمل هناك و معنا مساعدات إنسانية ، حتي هنا انا اعمل بمجهود ذاتي من مالي الخاص دون دعم من اي جهة ولا اريد ، كل ما أريده هو ان نحصل علي جهات تحضر بنفسها لتقف علي اغاثة المتضررين ، و قمنا بحصر المتضررين من الهجوم المسلح الذي كان يحدث بين الحين و الاخر علي المدنيين قبل ان يبدأ قصف الانتنوف بقليل ، المهم حينما رجعنا وجدت عبد الحفيظ يبشرني كما قال بخبر سار ، سألته ما هو قال بانه تحدث مع عبد الرحيم محمد حسين وزير الدفاع و وعدنا خيرا ، فأجبته مستغربة ( اللمبي ؟ ما اظن يجي منه خير ، يا زول ناسكم ديل كلهم حرامية ) قال : نحنا نجرب ما خسرانين حاجة ، أجبته ( لا والله انا خسرانة حاجات كتيرة أولها سمعتي كونه اجلس مع كيزان لصوص و تجار دين و انسانيا لا يجوز نجلس مع من يبيد الشعب و نصافح اياديهم الملطخة بدم الشعب و بعد ده كل واحد عايز يستفيد من المشروع مش يفيد الجهة المن اجلها تم المنح ، معقولة ديل مسلمين ؟ أسالك بالله في مسلم يمنع مسلم من الضل ؟ جهة خارجية عملت عمل خير الكيزان يرفضوا الخير للناس عشان يستفيدوا هم ؟ ، المهم بعد ان قال قولته الشهيرة عندما يكون متضايق ( يا سيدي رَسُولِ الله ) و ختم كلامه بانه دي اخر محاولة و ذهبنا لعبد الرحيم محمد حسين في منزله بالقيادة العامة ، و كان عازمنا غداء بعد صلاة الجمعة اعتذرت عن الغداء لعبد الحفيظ بحجة انه ( ده مال حرام و سحت و ما باكل مع كوز ملح و ملاح ) احترم الحاجة دي قال نمشي الساعة ٦ مساءا ، و بالفعل كنّا هناك و قابلنا اللمبي ، و كان متحمس جدا و قال الموافقة بنجيبها علي طول وانه أتكلم مع مع عثمان جعفر و ما عندها مانع يوافق ، و تابع لكن المشروع ده ضخم و كان معاه صورة من دراسة جدري المشروع و الميزانية ، قلت : نحنا البهمنا انه المشروع ده يتنفذ باي طريقة عبر الشركة التم إبرام العقد معاها و وقعنا معاها مذكرة تفاهم ، قال : ايوه جدا بعدين ال ٢٠٠ قرية ديل مش كل قرية فيها ٤٠٠ بيت ؟ نحنا ممكن ال ٢٠٠ قرية ذاتهم نعملهم ٤٠٠ قرية ، سألته باندهاش مصطنع كيف ؟!!!! قال بنفس التكلفة دي نحنا نعمل القرية قريتين لكن ما بنعمل مباني تركيب و تلاتة غرفة و حمامين و الكلام المكتوب ده نحنا نعمل حسب حوجة أهل المنطقة ، يعني زي ناس دارفور ديل بيت من ٢٠٠ متر و غرفة و قطية بالمواد المحلية معاها مطبخ و ( دبلوسيه) كفاية عليهم و كتيرة كمان ، هم هسي ساكنين في رواكيب و بيقضوا حاجتهم في الخلا و ضحك ضحكة عبيطة و قال هسي ناس دارفور ديل لو عملتوا ليهم الحمامات دي ما بيعرفوا يستعملوها ذاته كل زول يشيل لي حجر ولا إبريق و يطّلع الخلاء ، عشان اختصر سماجته سألته : انا عايزة اعرف ال ٢٠٠ قربة نموذجية كيف ممكن تكون ٤٠٠ علما انه ما بنقدر نغير مواصفات الشركة الهندية المنفذة ، قال شركة شنو نحنا ننفذها برّأنا عبر شركاتنا قلت : رويال الهندسية ؟ و لسان حالي يفكره بمباني الرباط الانهارت فقال بكل حماس نحنا عندنا سبعة شركات مباني جاهزة ، اي واحدة ممكن ننفذ عبرها ، هنا سالت عبد الحفيظ : الساعة كم ؟ بعد ده نمشي لانه عندي اطفال و اتاخرت، طلعنا و انا قفلت الملف ده نهائيا ، و واصلت العمل تجاه جنوب كردفان مره يتصل مكتب بكري حسن صالح يسالوا الجماعة ما ردوا لسة ؟ انتي شرحتي ليهم عرضنا ؟ و يوم اتصلت سكرتيرة عثمان جعفر مدير الهلال الاحمر. و هي زوجة لواء في ال DDR وقالت انها بتقدر تجيب الموافقة علي شرط قبل ما تسلمنا ليها تستلم ٢٨٠ مليون بالقديم، قلت ليها نحنا ما عندنا قروش و مافي جهة بتدعمنا شغالين لأجل الناس دون مقابل، عشان كده صعب ندفع ٢٨٠ او حتي ٨٠ مليون ولا حتي ٨ قالت: "خلاص ممكن اخد عربيتك المرسيدس البيضاء شفتها واقفة جمب المفوضية و عجبتني شديد". قلت ليها يا ريت بس هي تبع زوجي، و كمان ما بندفع رشاوي عشان تصديق، ومنها الجوال مراقب و مكاتبنا مراقبة و نحنا مراقبين، مشينا كادقلي بقافلة ملابس اطفال و أدوية.*
اتسجنا و قالوا تابعين لوين و اتهمنا بالتخابر و زولنا بتاع الهلال الاحمر داك هو ذاته الشهد علينا زورا و هو من أبلغ عننا.*

- هؤلاء هم الكيزان وأولئك هم المسؤولين السودانيين في عهد الموتمر الوطني.*

* مرفق جميع المستندات التي توكد هذا حتي لا ندع مجالا للجداد و الكيزان .

[الفقير]

#1465924 [البصيرة ام حمد]
5.00/5 (1 صوت)

05-24-2016 08:55 PM
وزارة الارشاد والاوقاف ووزارة الشباب والرياضة كانوا جيران فى شارع النيل، الارشاد رحلوها قبل الشباب،الارشاد اجروا ليها فى شارع بشير النفيدى بمبلغ85 الف جنيه فى الشهر، ووزارة الشباب فى الخرطوم 2 بمبلغ 100 الف جنية فى الشهر،الايجار تقوم بدفعه وزار ة المالية، الاماكن التى تم ترحيل الوزارتين منهما، الآن قاعدة خرابة فى شارع النيل، مبنى وزارة الارشاد يستغلة الآن ضباط وزارة الداخلية كموقف لعراباتهم،هنالك ايضا صفقة تدبر لوزارة الشباب،ده لعب ثقيل

[البصيرة ام حمد]

#1465910 [Rebel]
5.00/5 (4 صوت)

05-24-2016 08:31 PM
* ما هو العائد المادى أو الروحى الذى تقدمه هذه "الوزاره" للوطن او للمواطن او للدين, لتستحق "إيجار مقر" لها بمبلغ 325 مليون جنيه شهريا, سواء من الخزينة العامه أو عن طريق الهبات!..بل ما فائدة جميع "وزارات و مؤسسات و وحدات" العفن و الفساد و النفاق و الظلم و اللصوصيه!
* و برجاء ان لا تحدثوننا عن الدور "الدينى" لهذه المؤسسه المضله, مره أخرى!!..فما من أحد بات يثق فى "دينكم", و لو كنتم صادقين!

[Rebel]

ردود على Rebel
[الفقير] 05-25-2016 08:55 AM
عمرهم ما حيصدقوا

تعليقك وافي و يلخص الوضع بالكامل


#1465834 [Mohd]
0.00/5 (0 صوت)

05-24-2016 04:17 PM
اعلي عرض ايجار كان ٢٠٠ مليون و٣٢ الف دولار تساوي ٣٢٢ مليون.. ولكن لعبة العطاءات برع فيها المؤتمر الوطني.. لو بحثت في ملف هذا العطاء ستجد كل شئ مفبرك قانوني و روتينيا ولا مصلحة لديوان المراجع العام وامثاله في اثارة زوابع وراء الملفات.. عليهم بالمظاهر ويادار ما دخلك شر.. ويمكن جلب متنافسين حقيقين او وهميين لخلق وهم الحقيقة وكأن الامر تم بكل شفافية... كل البيض في سلة واحدة واذا حدث وانكسر جميعه فلن يعجزهم صنع عجة وتحدي جميع السودانيين بأنهم من جلب المال محليا او بمد القرعة عالميا وما موضوع الصين ببعيد فقد عاقبوا رجلهم ونحن لا نزال في محطة فقه الضرورة والتبرير والتمكين

[Mohd]

#1465818 [من اهل العوض]
0.00/5 (0 صوت)

05-24-2016 03:41 PM
الخوف كل الخوف ان ما تقوم به الامارات هو بداية رشاوى لا تسمن ولا تغني من جوع لحكومة السودان لغض الطرف وعدم اثارة موضوع اعتراف الامارات الضمني بمصرية حلايب و شلاتين.

[من اهل العوض]

#1465811 [Sarah]
5.00/5 (3 صوت)

05-24-2016 03:10 PM
اخجلوا

[Sarah]

#1465810 [فاروق بشير]
5.00/5 (3 صوت)

05-24-2016 03:09 PM
والامارات دخلها ايه؟
والايجار يدفع لمين؟
الكلام دا فيه ان.

[فاروق بشير]

#1465792 [كاسـترو عـبدالحـمـيـد]
5.00/5 (5 صوت)

05-24-2016 02:38 PM
بالله يا عمر البشير عندك وجه ولا كرامة ؟ لم يحصل فى التاريخ انه دولة تدفع لدولة اخرى ايجار مبنى وزارة داخل اراضيها . بالله منتظر شنو ؟ لأى مستوى ودرك عايز تودى البلد دى ؟وين مستشارينك ؟ هل انتهت الكرامة فى هذا البلد ؟ اليس حولك رجل عنه كرامة وبيحس ويقول ليك البيحصل فى البلد دى ؟ والا كله همك تاكل وتخره وتنام ؟ حرام عليك والله . لقد جلبت لنا العار ياعار ياعار ياعار. الله لا كسبك دنيا وآخرة. بالله لما تمشى تزور دولة الأمارات , عندك وجه تقابل اى مسوؤل فيهم . هل عندك منظق وكلام تقولوه ليهم . الواحد ممكن يفهم انه دولة تنشئ صرح أو منشئة تعليمية أو خدمية , لكن تتكفل بدفع بايجار وزارة . والله حرام ومليون حرام اللى بيحصل دا . حسبنا الله ونعم الوكيل فيكم . حسبنا الله ونعم الوكيل فيكم .

[كاسـترو عـبدالحـمـيـد]

#1465763 [وطن الجدود]
4.99/5 (8 صوت)

05-24-2016 01:44 PM
أي بلد هذا الذي لا تملكه وزاراته سكنا؟
واي حكومة هذه التي ترضي ان تقوم دولة بدفع ايجار وزارتها؟
واي نظام هذا الذي يستجدي ويشحد ولا يرمش له جفن؟
واي وطن هذا يري ويسمع كل هذا ولا يحرك ساكنا؟
واي شعب هذا يشاهد كل هذه المهازل ويلوذ صامتاا؟
واي ..واي.. واي؟!!!
واي ..واي.. واي؟!!!
واي ..واي.. واي؟!!!

[وطن الجدود]

#1465722 [حيران]
4.88/5 (5 صوت)

05-24-2016 12:50 PM
ببراءة مالك المبني منو
لو عرف السبب بطل العجب
والغريب وزارة ارشاد يعني هم نفسهم دايرين ارشاد
حسبي الله ونعم الوكيل
اللهم ارينا عجائب قدرتك فبهم

[حيران]

#1465692 [قلام الفقر]
5.00/5 (9 صوت)

05-24-2016 11:43 AM
شغل نضيف وما فيهو كلام:(23 الف دولار شهريا لايجار مقر وزارة الاوقاف بالخرطوم).
كدى اول حاجة ياشيخ عمار: ورينى ال 23 الف دولار دى بتساوى كم فى سوقكم؟؟؟؟؟
اليوم سعر الدولار وصل : قول 14 جنية سودانى.
طيب ال23 الف تساوى كم = تضربها فى 14 = 322 مليون سودانى.
تعرف ياشيخ عمار: لو اجرتو بيوت البشير واهله كلهم فى كافورى ما تدفعوا ربع هذا المبلغ. بعنى انطبق عليكم الحكمة القائلة (ملك الملوك اذا وهب, فلا تسألون عن السبب), ياشيخ عمار: اهو دا شغل مؤتمر وطنى, والابشع جاية هذه الاموال من الامارات!!!!! عجيبة!!! وشنو العجيبة؟ انو الواحد لابد وفجأءة تطل عليهو ليلة القدر, التى هى خير من الف شهر.
مبروك ياشيخ عمار, ولدت ليكم فى قفص, بس اوصيك ابقى عشرة عليها ما يشيلوها التماسيح الكبار, ناس عمر ونافع وبدرالدين, تعرف معروف اذا ما لقوا ليهم كدة فيها بكرة بودوك الشارع, وحينها كأنما يا ابوزيد لا غزيت ولا شفت الغزو. اديهم جاجة كده يمسحوا بيها شنبهم, بس نافع ماعندو شنب ما تديهو, لانك حتمسح ليهو فى شنو, ده اذا مارباهو بكرة. اوصى ماترفع منها ياشيخ عمار, اضربا فى الركب, وما تخلى فيها نفاخ النار, الاماراتين قال بدوكم هذا المبلغ ثلاث مرات لثلاث اشهر الاولى, يعنى 322 فى 3 = مليار او يفوق, وياشيخ عمار جحا اولى بلحم تورو, مش كدة, ما هى اصلة زى ما قالوا الخواجات (once in life) فما تفوتا, انا عارفك مابياكلوك. وهذه عطية وغمتت مزين من الله جاتك, ارقد بيها رقيق, واوعك واوعك مناس ديك, طبعا جماعتك براس ليل وانت نايم جيهوها تب. بس الايام دى انت ماتنوم خليك صاحى, والبشير كفاهو اكل البطيخ بلا بذر, عشان يلهط على طول دون عوائق للبذر. لكن ياشيخ عمار دخل فى البطيخة الاماراتية دى بذر كتير بتاع بطيخ. عشان الراجل يهدن وما يلهطا منك على طول.

[قلام الفقر]

ردود على قلام الفقر
[باتمان] 05-24-2016 03:28 PM
حلوة دى يا أقلام الفقرا وأكيد دة اللى حيحصل.

ومنتظرين كاريكاتير كارب من ود أبو: حقى وين؟ على الطلاق ما تلهطها براك؟ يا راجل القروش دى أنت داقى فيها غبش ولا رامى فيها حجر وو وو وو

European Union [فري] 05-24-2016 12:39 PM
وأكيد صاحب البيت المؤجر بالدولار هو مؤتمر وطني وده شغل مؤتمر وطني كما قال الأستاذ كمال كرار.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة