الأخبار
أخبار إقليمية
نائب مستقل: قيادة البرلمان (كومبارس) ونوابه (قاعدين يتسلوا ساي) (يا جماعة دا برلمان دا؟)،
نائب مستقل: قيادة البرلمان (كومبارس) ونوابه (قاعدين يتسلوا ساي) (يا جماعة دا برلمان دا؟)،
نائب مستقل: قيادة البرلمان (كومبارس) ونوابه (قاعدين يتسلوا ساي) (يا جماعة دا برلمان دا؟)،


أحمد عمر نط في العضو قائلاً له دا شنو؟، أقعد أقعد
06-06-2016 10:44 AM
البرلمان: سارة تاج السر
وجه النائب المستقل محمد طاهر عسيل انتقادات، لأداء البرلمان ووصف نائبتي الرئيس ورؤساء اللجان الدائمة بـ(الكومبارس) والنواب بـ(المتفرجين)، وأقر عسيل بعجزه عن إحداث أي تغيير من داخل القبة، وقال: (غايتو أنا قاعد هنا اتسلى)، وتابع: (بجي أتفرج على الناس ديل بعملو في شنو).
وأبدى عسيل استعداده لتقديم استقالته فوراً، وطالب زملاءه النواب بالوقوف في مواجهة الجهاز التنفيذي والتصويت بلا وإلا فليغادروا غير مأسوفٍ عليهم، ووصف البرلمان بالعجز عن مواجهة الأزمات، والبعد عن القضايا التي تهم المواطن، وقال (الأسعار زايدة، كهرباء ما في وموية قاطعة)، وردد: (المواطن يعاني)، وكرر تلك العبارة (3) مرات، وقال إنه ظل مستيقظاً يوم أمس حتى الواحدة صباحاً في انتظار عودة المياه قبل أن يضطر لشراء (برميل الموية) من (كارو الحمار) بمبلغ (60) جنيهاً.
وتساءل عسيل عن موقف نواب البرلمان من تلك القضايا، ورد على سؤاله مهاجماً نائبتي رئيس البرلمان ووصفهم بـ(الكومبارس)، والنواب بـ(المتفرجين) وقال (ما شغالين حاجة غير تمرير تعليمات الحكومة وقاعدين يتسلوا ساي)، واعتبر أن رئيس البرلمان بروفيسور إبراهيم أحمد عمر أحسنهم وذكر (عايزين واحد من رؤساء اللجان يقول لا، الكلام دا ما صاح)، وأردف: (ما حيقولوها محافظة على مخصصاتهم الوزارية).
واستنكر عسيل طريقة أحمد عمر في إدارة الجلسات وعدم قبول الرأي الآخر، واستدل بحديث أحد النواب في تعقيبه على وزير المالية بدر الدين محمود الذي أكد انخفاض حجم التضخم واستقرار سعر الصرف، مما دفع النائب للتعليق بأن ما قاله محمود لم ينعكس على (قفة الملاح)، فما كان من أحمد عمر إلا أن (نط في العضو قائلاً له دا شنو؟، أقعد أقعد)، وأضاف عسيل مستفهماً: (يا جماعة دا برلمان دا؟)، واعتبر أن المجلس الوطني أحد مشاكل السودان، وأردف: (ولو ما البرلمان دا قام وقف وقال للناس ديل لا الحال المايل دا ما بستعدل).
وأبدى عسيل استياءه من الوضع القائم، وأكد عدم بقائه طويلاً بالبرلمان، وقال: (أنا جيت هنا بي أصوات الناخبين لخدمة قضاياهم لكن لقيت نفسي ما بقدر أسوي حاجة والوضع مزعج جداً).

الجريدة


تعليقات 24 | إهداء 0 | زيارات 35322

التعليقات
#1473791 [musap]
0.00/5 (0 صوت)

06-10-2016 12:56 AM
اي واحد يشارك في الحكومة والا أجهزتها المختلفه من برلمان وهيئات ومؤسسات وغيرها ويجي بعد فتره يقول ليك والله انا داير أقدم استقالتي والناس ما عندها هم للناس والبلد وأنا أحسن اتخارج!!!!!
ده كلام فارغ قولو لي ناس ماعايشين في البلد بأخي أنت الإنقاذ جات امبارح والا انت جايي من كوكب المريخ ما كل الناس صغير وكبير عارف الناس ديل بسووا في شنو ######
قول والله انا ما لقيت عضه مع الجماعه ديل أقوم اكورك كان سكتوني خلاص كان ما سكتوني بمشي المعارضه وأعمل فيها زول وطني مادام جليت هنا ما أجلي من المعارضة كان جاتهم حاجه

[musap]

ردود على musap
[wdjale] 06-11-2016 03:28 PM
اناماعارف لي الناس بعملوليناعزعاج مايبلوعووهم ساكتين كداكدا هم شنو برمان وقصر وجنجويد ومعارضة وحمتي .دة شنو دة حسي في زول محتاج ليهم .ولا لو احتجنانلقى حاجة ..كهرباء مافي مويةمافي بنزين فول بصل .......دة كلو كان ماحصل الناس ديل ماكان ماشين الشارع لكن صوطوليهم سبتوهم وتكوركو ....عليكم الله غلو الناس في حالا ..عشان تبلع من حق المواطن ...والله كريم ...ومشكتهم ماسودانيين نهائا. كلهم اجانب بالمعارضة....دة اخر ما اتحصلت عليه مت تلقي نفسي انا....سوداني اصيل قلبو فيه رحمة علي الاقل يعاين للمرضي والمعاقين والمساكين ..لا حول ولاقوة الا بالله


#1472938 [البخاري صالح]
0.00/5 (0 صوت)

06-08-2016 11:27 AM
ولو أن أهل القرى ءامنوا وأتقوا لفتحنا عليهم بركات من السماء والأرض .

[البخاري صالح]

ردود على البخاري صالح
[sakezuke] 06-09-2016 07:19 AM
لو كلامك صح معناها اليابان أولياء الله الصالحين بطلوا خمالة و تخلف لولا البحث العلمي و الإنتاج ماف رزق ولا بطيخ . الناس الزيك و النظام أكبر دليل


#1472302 [وليد الفارس]
0.00/5 (0 صوت)

06-07-2016 08:15 AM
اذا كانت النائية الاولي بتحنن وتدخن وتتكبرت وتجي البرلمان يعني مرتاحة وماعليها الا تتبهرج
والنائبة التانية بتقول الحسن الميرغني ولي يعني شغال بالحجابات والبخرات
ورئيس البرلمان السابق بيقول عاوزين 200 سنة عشان السودان ينصلح حاله
والرئيس الحالي بيقول اقعد ولغف قروش الحكومة اللي كانت في حساب ولده بعدما توفي
وعنده 6 عربات
يعني عاوزين منهم شنو هؤلاء تيران الله في برسيمه
اللهم بجاه الشهر الفضيل افضحهم في كل خطوة ولاترزقهم وشتت شملهم وارنا فيهم يوما اسود كيوم فرعون وهامان وجنودهم امين
هؤلاء قوم لايرتجي منهم شيئا
لعنة الله عليهم

[وليد الفارس]

ردود على وليد الفارس
[عمك تنقو] 06-07-2016 03:17 PM
انت صحي ياوليد قروش ولده اسماعيل الكم و200 مليون دولار حفت الحزب ولا حفت الحكومة ولا حقت الورثه ولا الشائب العائب قسمها مع الورثه وبعدين المرحوم كان عنده 6 عربات عديل كده مافيهن امجاد ولا ركشه ام الترزيه خلوها تحنن وتتدخن وتتكبرت لمت فيه بعد خرف هههههههههههههههههههه ام بتاع المناقل الكان عنده سروال وعراقي قبل الانقاذ اسع بق عنده مجمعات سكنية لناس الحلة والطلبة وكل يوم بضبح خروف
دا كل كوم الايام دي لابنزين ولا جاز ولا رغيف الخاصل شنو


#1472265 [sasa]
0.00/5 (0 صوت)

06-07-2016 02:56 AM
لاخ صلاححاج ساسا نحياتىواسف للتداخل غير المقصود وهى المرة الاخيرة التى اتغول فيها على الاسم فليس لادارة الراكوبة علاقة بالامر ولا هى مناط بها مراقبة مثل هذه التداخلات
وشكرا

[sasa]

#1472246 [ابو احمد العربجي]
0.00/5 (0 صوت)

06-07-2016 12:33 AM
يعني شنو الجديد في الموضوع ما كل الناس حتي اطفال الروضه عارفين ده مش برلمان ولا يمثل الشعب ده ديكور عمله الموتمرالوطني عشان قايل بيخدع بيه العالم الخارجي او الناس في الداخل. انت حتي لو كنت مستقل كونو تشارك في انتخابات الكل يعرف انها مضروبه ومعظم الاحزاب الوطنيه الحقيقيه والتي تمثل غالبه الشعب السوداني قاطعتها . اشتركو فيها احزاب الفكه وبعض الانتهازيين مع كبيرهم الذي علمهم السف واللغف.. يا اختشي واحسن تستقيل بدل ما تاكل قروش حرام مخصصات عضو البرلمان دون ان تقدم اي عمل....

[ابو احمد العربجي]

#1472221 [د.وليد حميدان]
5.00/5 (3 صوت)

06-06-2016 10:54 PM
برلمانك وحكومتك كلها تمرر في قرارات اليهود هؤلاء لايحكمون السودان هم متنفعين فقط وعملاء

[د.وليد حميدان]

#1472209 [AAA]
3.50/5 (3 صوت)

06-06-2016 10:32 PM
(أحمد عمر نط في العضو قائلاً له دا شنو؟، أقعد أقعد)..لست أدري أأضحك أم أتحسر!!

[AAA]

#1472154 [nagatabuzaid]
5.00/5 (1 صوت)

06-06-2016 06:21 PM
الحمد لله لا زال هناك رجال

[nagatabuzaid]

#1472116 [ابو سكسك]
2.00/5 (5 صوت)

06-06-2016 04:10 PM
الظاهر انو رمضان سخن من اول يوم

[ابو سكسك]

#1472090 [ود الفاضل]
5.00/5 (1 صوت)

06-06-2016 03:18 PM
المدعو الحقيقة المرة من اين لك معرفة الفرق بين المدح والقدح والنقد حتى تنصح ياهذا ...... الواضح انت من الجداد اياه مايكتب ليس نقد فقط بل هو عرض لمأساة بلد نزل بها الجراد فقضى على الاوراق والاقصان معا !!! ولكن حينما تضربكم بعض التعليقات فى مقتل يصيبكم الدوار والطشاش .... وهل هؤلاء قوم ينفع معهم النقد هؤلاء ينطبق عليهم المثل المصري الشهير (ناس تخاف ماتختشيش) معاناة ناس السودان المتمثلة فى ندرة الخدمات ( حتى وصلت الى ندرة الماء فى شاطئ النيل) اذا كان هؤلاء المواطنين هبوا رجالا ونساءا على اوكار الظلم ، سترى كيف يقوم المجرمون فى حقهم لتحقيق مطالبهم !! اليس من العار ان يشرب سكان عاصمة بلد يحيط بها النيل منكل جانب بتانكر يجرها حمار ، بماء لايصلح حتى للكلاب ...

[ود الفاضل]

ردود على ود الفاضل
European Union [الحقيقة مرة] 06-07-2016 10:09 AM
المدعو ود الفاضل يبدو أنك تكتب دون أن تقرأ أو تتمعن
ردي كان على خالد الذي علق بالآتي :
(( لا كتر خيرك ولا بارك الله فيك ..لما مويتك قطعت حتى اذكرتنا.. قوم لف ))
وطوالى من يقول الحقيقة تستخدموا الاسلوب العاجز (( جداد )) ولا أدري من أين اتيتم بهذا المصطلح ....قل خيرا أو اصمت


#1472081 [sasa]
3.00/5 (2 صوت)

06-06-2016 02:53 PM
جيت من ولاية بعيدة لغرض مع احد السماسرة بتوع الادوية برسل لينا الدواء هناك بالكرتونة والشحن العادى مع الكراسى والبراميل الفارغة وفوجئت بان الرجل عندو جلسة بالبرلمان وهاتفه مغلق وضحكت قالوا لى مالك بتضحك قالو الرول كمان كان نقيب الصيادلة
والله دا كلمتين عن وضع المواطن ما بعرف اقولها يكون نائب فى البرلمان ونقيب بتاع الصيدلة فى السودان معناها السودان ما عندو نقيب ولا نواب

[sasa]

ردود على sasa
[sasa] 06-06-2016 07:27 PM
تحياتى اخى اعتقد ان الاسم ((sasa)) ماركة مسجلة باسمى انا صاحب الايميل

[email protected]

واطلب من إدارة الراكوبة تأكيد ديموقراطيتها واحترام كل معلق لحقوق المعلق الاخر ومراجعة الايميلات المسجلى لديها والتاكد من صدق او عدم صدق ادعائى بان اسم ساسا ماركة مسجلة

انا في الانتظار وقد لاحظت ان تكررت عملية قرصنة الاسم من قبل


#1472040 [ود الفاضل]
5.00/5 (1 صوت)

06-06-2016 01:45 PM
ياأستاذ عسيل انت مع احترامنا لموقفك لم تأتي بجديد ... شعب السودان كله باستثناء الكومبارس وهم كل من نزل اسمه فى الحزب المسخرة( المؤتمر الوطني ) يعلم ان مجلسهم الوطني ماهو الا مجلس صوري لتجميل وجه نظام هو اصلا يؤمن بالرأي الاخر ولايعرف للشورى سبيل ( نظام جاء بليل والناس نيام ليهدم نظام ديمقراطي تراضي عليه الشعب كله ، فهل يرجى منه خير للوطن ) هذا الحزب سيكون مصيره براميل الزبالة بعد رحيل بني كوز مباشرة .... أين ( لاتحاد الاشتراكي ) هل تسمع له صوت فى ارض السودان !!!! كل التنظيمات التي تولد من تحت فوهة مدفع الدبابة بعد ان تعوث فى البلاد فساد وتجيب عاليها واطيها وفى النهاية سيكون مصيرها مذبلة التاريخ ....
خليك على موقفك وحاول التاثير على بقية النواب المستقلين لتشكيل لوبي قوي يعبر عن هموم الشعب المكلوم ، يمكن تحركوا المياه الراكدة ذات الطحالب من تحت كرسي ابراهيم احمد عمر (وهو ياعيني لا ندري فى اي مجال اخذ شهادة الدكتوراه وقد بلغ من العمر عتيا ، ولايستطيع النطق بكلمتين بالعربي من غير لعثمة ، ويكاد يستوى مع وزير الدفاع بالنظر !!!! الطيارة جات طافية نور والناس فى الصلاة !!!!!!!!! اسماء كبيرة جدا البروف فلان والبروفيسور علان وللاسف مجرد القاب لتجميل جمال الطين !!!!!!
مهمة النواب الاولى والاساسية هي عكس معاناة الناس والعمل على ايجاد حلول لها من الجهات التنفيذية ولو بشق الانفس .. وليس الجلوس تحت قبة البرلمان للتصفيق وتمرير مشاريع الحكومات الخايبة !! كنا زمان نعرف اسماء نواب البرلمان بالاسم ونعرف النواب الشجعان فيهم العاملين للحكومات وجع اضراس . كل يطالب بالخدمات للناخبين الذين اوصلوه للبرلمان ، والان اصبحنا فى زمان ناس عبود جابر وبرطم وهذه الكائنات التي لانعلم لاي غابة تنتمي !!!!!
يوم امس رأينا صورة بنات الجموعية الحرائر فى الفتيحاب يتسابقن لملئ الجرادل بالماء المجلوب بالكارو والتانكرات الصدئة ، فى منظر لم يكن معروفا الا فى دار حمر بغرب كردفان فاصبح فى قلب عاصمة البلاد !!!!!!! الخرطوم يكاد بغرقها النيل وحكام الغفلة لم يستطيعوا عمل شبكة مياه تغطي حاجتها هل هذه بلد تستحق حتى مجر مجلس نواب او برلمان !!!!!! فشل ثم فشل يتبعه فشل .. ومن يقدم استقالته من مجلسها الغير وطني يلزمه الاغتسال بماء النيل سبع مرات آخرها بالتراب حتى يحق له الاندماج فى المجتمع !!!

[ود الفاضل]

ردود على ود الفاضل
[wdjale] 06-11-2016 03:34 PM
يالفاضل عسيل دةمافاهم حاجة لكن الناس ديل لا بخافومن عسيل ولاجبيل ولا الخالق ديل زيهم ماحصل تاريخ المسلمين عشان كدة اي واحد يشارك معهم لاذم يكون منافق .عديل عشان يلقى كمشتو..اهههه


#1472022 [الحقيقة مرة]
5.00/5 (1 صوت)

06-06-2016 01:20 PM
يا خالد قل خيرا أو أصمت
وأنا أنصحك بالصمت اذا كانت هذه طريقتك في النقد ...الا اذا كنت ذو غرض !!!!

[الحقيقة مرة]

#1472018 [ahmed ali]
5.00/5 (1 صوت)

06-06-2016 01:16 PM
قطر مدني المكندش وصل و الا لسه ؟؟؟

[ahmed ali]

#1472008 [وطن الجدود]
5.00/5 (1 صوت)

06-06-2016 01:00 PM
ما جاء من الباطل فهو باطل ...فهذا البرلمان الصوري هو من رحم ذلك النظام الباطل...فكيف يسبقيم العود والظل أعوج

[وطن الجدود]

#1472000 [خالد]
5.00/5 (4 صوت)

06-06-2016 12:25 PM
لا كتر خيرك لا بارك الله فيك ... لما مويتك قطعت حتى اذكرتنا ... قوم لف

[خالد]

ردود على خالد
European Union [منير البدري] 06-07-2016 08:07 AM
يا خالد يا اخوي كلامك صاح

زولك شعر بالمواطن فقط لمن مويتوا قطعت

كضب في كضب و نفاق
طيب ما تستقيل ؟؟؟؟؟؟


#1471993 [صديق عبد الله]
5.00/5 (1 صوت)

06-06-2016 12:09 PM
اذا كنت تخاف الله وتطلب العيش الحلال كن قدر المسئولية وقل الحق ولا تخاف لومة لائم وسوف يحفظ لك التاريخ موقفك اى كان واعلم ان النظام ذائل لامحالة ويبقى الوطن والمواطن الذى هو ابنك وابنتك واخيك واختك ابوك وامك فأترك لهم ما يفخرون به.

[صديق عبد الله]

#1471987 [الحقيقة مرة]
5.00/5 (1 صوت)

06-06-2016 11:59 AM
يا الحاجابي مراقب
وماذا ستستفيد عندما يقدم استقالته ؟؟ أيهما أفضل أن يصدح بالحقيقة داخل البرلمان ...أم يقدم استقالته ... أنا أشك في نيتك !!!!

[الحقيقة مرة]

ردود على الحقيقة مرة
[وداغبش] 06-06-2016 02:19 PM
يصدح ... يا زول ات راسك ده ما حلو


#1471981 [الحقيقة مرة]
3.00/5 (3 صوت)

06-06-2016 11:48 AM
ده الكلام ..امثال هذا الرجل (عسيل) يستحقون الاشاده والتشجيع ..وهذا ينطبق عليه ان شاء الله (قول كلمة حق في وجه سلطان جائر) بالرغم من أنه كسر شوية ثلج لرئيس البرلمان .. ربما تكون دبلوماسية منو ليوصل مثل هذه الرسائل القوية ..نحن نحتاج لعمل قوي في الداخل ..في البرلمان ..في النقابات ...في الشارع ..حتى في داخل الحزب الحاكم وربيبه المؤتمر الشعبي ان كلمة الحق لكي يكون لها تأثير لا نطلقها في الاصير ساى ..وانما يكون لها وقعا وتأثيرا اذا قيلت أمام الجلادين ووصل صداها للشارع

[الحقيقة مرة]

#1471977 [الحاجابى مراقب]
4.50/5 (4 صوت)

06-06-2016 11:38 AM
مزايدات ساكت طيب ما تقدم استقالتك تتسلى ليه ؟ نحن ما بندفع راتبك ده قدم استقالتك اليوم اليوم ما بكرة

[الحاجابى مراقب]

#1471968 [Breeze]
3.00/5 (2 صوت)

06-06-2016 11:30 AM
لا تقدم استقالتك , خليك في مكانك لكن حاول تتحصل علي معلومات أو مستندات أو أي شيء يدين هؤلاء الجماعة بعدين إن شاء الله, إذا كان في معارضة بالصورة الصحيحة كانت استفادت من مثل هذا النائب المستقل وكانت علي الاقل تعاونت معه في بعض الملفات التي تحتاجها المعارضة ضد الحكومة.

[Breeze]

ردود على Breeze
European Union [ابو الرجال] 06-06-2016 03:39 PM
ايوا اقعد وسطهم
هاجمهم وقول راي الشعب
واجمع كل معلومات كذبهم
وانشر وافضحهم
كدا تكون ريحت ضميرك
وافدت الناس


#1471951 [الـــســـيـــف الــبـــتــــار]
3.00/5 (2 صوت)

06-06-2016 11:17 AM
بارك الله فيك و اكثر من امثالك .
ورمضان شهر التوبة و الغفران وان شاء الله ربنا ينصرك و يوفقك فى كل خطوة سلامه و الله عجبنى كلامك بلحيل شديد و من زمان ما سمعته لى زول وقف فى الدارة و ما رقص .

[الـــســـيـــف الــبـــتــــار]

#1471947 [القادمون الجدد]
3.00/5 (2 صوت)

06-06-2016 11:06 AM
مزعج جدا ؟ كم درجه يعني بمقياس ريقتر

[القادمون الجدد]

#1471942 [الفكي]
3.00/5 (2 صوت)

06-06-2016 10:59 AM
عسل عديل يا عسيل ......... الله معاك وانحن معاك

[الفكي]


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة