الأخبار
أخبار إقليمية
طالب سوداني يتعرض لعملية نصب واحتيال غريبة بالهند..الطالب معتقل بسجن (حيدر آباد) بتهمة الزواج من فتاة هندية قاصر
طالب سوداني يتعرض لعملية نصب واحتيال غريبة بالهند..الطالب معتقل بسجن (حيدر آباد) بتهمة الزواج من فتاة هندية قاصر
طالب سوداني يتعرض لعملية نصب واحتيال غريبة بالهند..الطالب معتقل بسجن (حيدر آباد) بتهمة الزواج من فتاة هندية قاصر


07-26-2011 11:54 AM
تحقيق: التاج عثمان

القضية محور هذا التحقيق الصحفي، ليست قضية طالب أو طالبين بل تمتد لتشمل جميع طلابنا الذين اختاروا الهند لتلقي تعليمهم الجامعي، اضافة للتجار والمغتربين الذين يتوجهون إلى هناك في اجازاتهم السنوية، جميعهم أصبحوا مستهدفين من عصابات النصب والاحتيال والابتزاز الهندية عن طريق اغرانهم بالزواج من فتيات هنديات بمستندات مزورة تشير إلى ان عمر الفتاة فوق الثامنة عشرة، أي انها ليست قاصرا، وبعد سداد المهر الذي يفوق الخمسين ألف روبية، واكمال مراسيم الزواج بواسطة ماذون شرعي ضمن فريق الشبكة الهندية الاجرامية، تبدأ (اللعبة القذرة) بمنع التقاء أو اختلاء الزوج السوداني بزوجته لأسباب مصطنعة.. ويستمر المسلسل الاجرامي باداء عدد من الممثلين من جهات مختلفة: (عائلة الفتاة.. والسماسرة.. والعصابة.. وجهات اخرى)، لادوارهم لينتهي المسلسل بظهور الفتاة لتقف أمام زوجها طالبة الطلاق قبل ان تنتقل معه لبيت الزوجية.. وبعد عملية النصب تبدأ عملية الابتزاز، ويصبح الطالب السوداني أو المواطن أمام خيارين لا ثالث لهما: أما دفع اتاوة مالية ضخمة نظير التنازل عن التهمة الموجهة له بزواجه من فتاة قاصر، أو المحكمة والسجن.. وهذا ما حدث بالضبط مع الطالب السوداني (محمد الشفيع محمد الحسن) الذي يدرس بجامعة حيدر آباد.. واليكم تفاصيل هذا (الفيلم الهندي).
----

الزواج الهندي
محمد الشفيع محمد الحسن - فتى من منطقة مروي تنقاسي الرويس - يسكن مع عائلته باركويت مربع (45) الخرطوم.. غادر السودان في العام 2008م إلى الهند طلباً للعلم، فالتحق بجامعة (حيدر آباد) كلية التجارة وأكمل دراسته بداية العام الحالي، وقبل عودته نهائياً للوطن قرر الزواج من فتاة هندية مسلمة، من حيدر آباد نفس المدينة التي كان يدرس ويسكن بها، ووافقت على العيش معه بالسودان. أوراقها الثبوتية تشير انها في الثامنة عشرة من العمر، ووافقت مع والديها على الاقتران بالفتى الأسمر القادم من السودان، كما وافق أهله بالسودان على زواجه من الهندية، طالما انها ذات خلق ودين.. وثم عقد القران بواسطة مأذون شرعي هندي مسلم، قام بتحرير عقد النكاح، وسدد العريس المهر المتعارف عليه بالكامل، وقدرة (خمسون ألف روبية)، واقيم احتفال الزفاف وفقاً للطقوس الهندية، وتم توثيق الحفل بالفيديو، حيث اظهر والدي العروس وهما يباركان الزواج، كما ارتسمت علامات الرضا على الزوجة الهندية وبعد اسبوع من اكتمال مراسم الزواج اتصل العريس (محمد) بأهله في السودان، طالباً منهم شراء غرفة نوم ثم طلب من زوجته، التي تزوجها على سنة الله ورسوله الذهاب معه الى بيت الزوجية المؤقت - الشقة التي كان يقيم بها بمدينة حيدر آباد، لحين اكتمال اجراءات عودتهما للسودان، إلاّ أن أهلها طلبوا منه تأجيل ذلك بحجة ان العروس مريضة، فتركها ثم عاد لاصطحابها بعد أيام فرفضوا وهذه المرة بحجة ان لديها الدورة الشهرية، وعند محاولة اصطحابها معه للمرة الثالثة فوجئ بزوجته تواجهه قائلة: (أنا أكرهك، ولا اريد الذهاب والعيش معك.. طلقني) وبالتالي لم يدخل عليها أو يختلى بها، فوافق على الطلاق بشرط اعادة كافة خسارته اضافة للمهر البالغ (50) ألف روبية هندية.
بداية المؤامرة
في اليوم التالي مباشرة من طلب الفتاة الطلاق، فوجئ (محمد) بمخبرة من الشرطة - تطرق باب شقته، وطلبت منه التنازل عن المهر وسداد مبلغ كبير من المال، حتى لا تلقى القبض عليه بتهمة زواجه من فتاة هندية قاصر دون عمر الثامنة عشرة، فاندهش لذلك الاتهام، حيث ان الاوراق التي بحوزته وقدمها للمأذون الشرعي الذي قام بتحرير عقد الزواج تشير ان عمرها فوق الثامنة عشرة، فكيف تكون قاصر؟!! واصفاً ذلك بالابتزاز، وابدى استعداده للقبض والمحاكمة، اقتيد مع زميله الذي يقيم معه في الشقة، وهو الطالب السوداني (خالد الرشيد)، يوم 2011/6/24م، إلى السجن ولايزال حتى كتابة هذا التقرير الصحفي حبيساً داخل سجن حيدر آباد، ولا يعرف مصيرة، حيث لم تسمح سلطات السجن بزيارة زملائه الطلاب السودانيين، ومندوبي اتحاد الطلاب هناك ولم يزره داخل السجن سوى المحامي.
محادثة من الهند
اتصلت هاتفياً باحد زملائه بمدينة حيدر آباد، وسألته عن ملابسات القبض على زميله وصديقه (محمد الشفيع) فقال:
«هذه عملية ابتزاز نسجت خيوطها ببراعة متناهية بواسطة افراد (عصابات الزواج) الهندية التي تستهدف الاجانب والعرب، خاصة الطلاب السودانيين، والتجار، والمغتربين الذين يأتون للسياحة في الهند، بهدف الحصول على المهر، وابتزاز العريس بتهديدة ان الفتاة التي تزوجها قاصر، بينما الزواج يتم بمستندات مزورة لعمر الفتاة تظهر انها فوق الثامنة عشرة، وبعض الأسر الهندية شريك أصيل في هذه العصابات، وتكررت عملية النصب والاحتيال مع كثير من السودانيين من طلاب وغيرهم، وبصراحة السفارة السودانية بالعاصمة الهندية (نيودلهي) لا تهتم بمثل هذه القضايا التي تواجه بعض السودانيين، خاصة الطلاب، وحادثة اغتيال الطالب السوداني (أبوعبيدة) الذي قتل غدراً بالشارع العام لا تزال ماثلة للعيان، وخير دليل على تجاهل السفارة لقضايا السودانيين بالهند، فقد راح دم الطالب (أبوعبيدة) هدراً، حيث لم يقبض على الجاني حتى الآن، ولو كان القتيل من جنسية اخرى لاهتمت سفارته بالحادث.. انقطع الاتصال الهاتفي هنا، ولم انجح في مواصلة الحديث مع الطالب السوداني بحيدر آباد مرة اخرى.
شقيق الطالب
ولكن ماذا فعلت السفارة السودانية في نيودلهي تجاه قضية سجن الطالب السوداني (محمد الشفيع محمد الحسن)؟ وهل تفاعلت وزارة الخارجية السودانية مع القضية؟ وكيف تصرف اتحاد الطلاب السودانيين بمدينة حيدر آباد، لاطلاق سراح الطالب المسجون واثبات ان الزواج شرعي تم بموافقة الفتاة الهندية وأهلها، وبمستندات تثبت ان عمره ثماني عشرة سنة، أي انها ليست قاصرا؟ توجهت بهذه التساؤلات الى (ياسر الشفيع محمد الحسن) شقيق الطالب المعتقل بالهند، والمتابع لقضية من السودان، فقال:
القضية ليست قضية شقيقي (محمد) فقط، بل قضية جميع الطلاب السودانيين بالهند، فهم مهمشون من جانب السفارة هناك، التي لا تتفاعل مع مشاكلهم، حتى الطالب السوداني المرحوم (أبوعبيدة) الذي تم اغتياله بواسطة هندي بالشارع العام، قام الطلاب بالهند باكمال كل الاجراءات المتعلقة به لوحدهم، حيث ان السفارة لم تحرك ساكناً.. وماحدث لشقيقي عملية نصب واحتيال، اعقبتها عملية ابتزاز من عصابة هندية متخصصة في الايقاع بالاجانب خاصة العرب وتزويجهم فتيات هنديات بالطريقة الشرعية، وباوراق مزورة، وبعد استلام أهل الفتاة للمهر، وهي شريكة في العصابة، يتم الغاء الزواج بتدخل بعض الافراد الذين يزعمون انهم من الشرطة الهندية بحجة ان الفتاة قاصر، وتبدأ المساومة وعملية الابتزاز، والغريب ان السلطات الهندية أفرجت عن المأذون الهندي بعد أيام قليلة من القبض عليه، وبعد القبض شقيقي (محمد) وزميله (خالد الرشيد) خاطبا اتحاد الطلاب السودانيين بحيدر آباد، والذي تواصل معهما باستمرار عبر الهاتف، وخاطب الاتحاد السفارة السودانية (دلهي) بشأن القضية، وقدموا لها كل الوثائق التي تثبت صحة الزواج، كما انني عبر وزارة الخارجية بالخرطوم خاطبت السفارة السودانية، وذكروا انهم يتابعون الاجراءات وسوف يذهبون لزيارة شقيقي المسجون بسجن حيدر آباد، وذلك قبل (18) يوماً، كما ان مسؤولي السفارة بدلهي ذكروا ان لديهم محامين ومسؤولين سيتابعون القضية حتى يتم شطبها، وحسب ما ذكره لي اتحاد الطلاب بحيدر آباد لم يقم اي مسؤول من السفارة السودانية بدلهي بزيارة شقيقي المحتجز بالسجن، واذا كان هناك أي اتصال من السفارة بالخارجية الهندية لتم حل القضية، كما ان وزارة الخارجية السودانية بعتت بخطابين للسفارة السودانية بنيودلهي الاول بتاريخ 2011/7/4م بالرقم (وخ/ق/ 368) هذا نصه:
(أرجو ان أحيل لكم طلب المواطن ياسر الشفيع محمد الحسن.. بشأن شقيقه محمد الشفيع.. المعتقل بسجون حيدر آباد للتكرم بالعلم واجراء ما يلزم مع أكيد التقدير.
حمزة الأمين باعو
ع/ وكيل وزارة الخارجية.
أعقبته بخطاب ثان بتاريخ 2011/7/13م بالرقم (وخ/ق/ 389) معنون للسفارة.
(نرجو الافادة بان المواطن السوداني محمد الشفيع محمد الحسن قد تم اعتقاله بواسطة السلطات الهندية بتهمة الزواج من قاصر.. المذكور معتقل بسجن حيدر آباد وسننظر المحكمة القضية اليوم الاربعاء للبت في القضية.. ونسبة لضيق الوقت لن تتمكن اسرة المواطن من حضور الجلسة.. عليه نرجو التكرم بارسال مندوب من السفارة لحضور الجلسة، والافادة مع أكيد التقدير.
حمزة الأمين باعو
ع/ وكيل وزارة الخارجية
مجهودات الخارجية
يواصل ياسر الشفيع شقيق الطالب المحتجز بسجن حيدر آباد حديثه عن المحاولات الجارية لاطلاق سراحه، قائلاً: «ذهبت لوزارة الخارجية السودانية بالخرطوم للوقوف على الاجراءات التي قاموا بها، وتم تلخيصها لي بواسطة احدى الموظفات، وتتلخص ما ذكرته في النقاط التالية»:
* اصدرت السفارة السودانية بدلهي خطاباً للجهات المسؤولة بالهند تطلب فيه السماح لرابطة الطلاب السودانيين بحيدر آباد السماح لعدد (5) طلاب سودانيين لزيارة الطالبين المعتقلين بسجن حيدر آباد (محمد) و(خالد).
* تعيين محامين للدفاع عن الطالبين واطلاق سراحهما بضمانة، ومن ثم النظر في شطب القضية.
* اجتماع احد المحامين مع القنصل السوداني بحضور ممثل عن الطلاب بحيدر آباد، والاجتماع امتد لساعتين، وتمخض - عن الاتفاق على دعم ومساندة السفارة للمحامين بشأن اطلاق سراح الطالبين.
* اخطار عضو البرلمان الهندي (أسد الله) الممثل للجالية المسلمة بحيدر آباد.
* الاستعانة بالسيد (شمار الدين) عضو البرلمان (مسلم)، ورئيس الرابطة العربية، والذي وعد بالتدخل لمعالجة القضية.
لكن اتحاد الطلاب السودانيين بحيدر آباد يشير ان المحكمة رفضت زيارة الطلاب الخمسة وفقاً لخطاب السفارة للطالبين المعتقلين ولم يزرهما في السجن سوى المحامي الهندي الموكل من اتحاد الطلاب، نافياً إرسال السفارة لأي محامين، كما ان الاتحاد أوضح عدم معرفته بالطلاب الذين اجتمعوا بالقنصل.
ماذا بعد؟
اخيراً يتساءل ياسر الشفيع محمد الحسن شقيق الطالب المعتقل (محمد): ماذا فعل المسؤولون بالخارجية تجاه قضية اعتقال شقيقي بالهند؟ ولماذا لم يزره احد من السفارة أو القنصلية بالسجن بحيدر آباد؟ ولماذا لا يزال (محمد) معتقلاً مع زميله (خالد الرشيد) بالسجن بينما المأذون الشرعي الهندي تم اطلاق سراحه، مع اختفاء أسرة الفتاة والمخبرة الهندية التي قبضت عليهما؟ وما هو دور السفارة لحماية المواطن السوداني خارج بلده؟
فبعد كل ما ذكرته السفارة لا يزال الطالبان داخل السجن بتهمة ملفقة، بل انها عملية نصب واحتيال تكررت لسودانيين آخرين، طلاب وغيرهم، من قبل، حيث أصبحوا هدفاً وحيداً تميناً لعصابات الاحتيال الهندية فالابتزاز المالي الذي تعرض له شقيقي تعرض له طلاب آخرون من قبل وللأسف نقل لي بعض الطلاب هناك انهم سألوا أحد ضباط الشرطة الهندية: لماذا يتعاملون مع الطلاب السودانيين بمثل هذه المعاملة القاسية؟ فرد الضابط الهندي: (لأنه عندما نعتقل سوداني فسوف يتم ترقيتنا).. ونفس حادث الاحتيال الذي تعرض له شقيقي (محمد) حدث لمواطن من سلطنة عمان، فتدخل سفير السلطنة، وذهب بنفسه لمدينة «حيدر آباد»، واتصل بالمسؤولين هناك، واطلق سراحه فوراً.. أما السودانيون بالهند فلهم الله.

الرأي العام



تعليقات 48 | إهداء 5 | زيارات 15000


التعليقات
#187254 India [ابن الشرق الحر]
0.00/5 (0 صوت)

07-29-2011 07:56 PM
اولا اريد ان ارد علي جزء فقط الذي اعلمة انه ان رابطة الطلاب السودانين بحيدر اباد لم تفعل اي شي لموضوع الطالب ولم تذهب حتي في متابعة اجراءاته وانا استغرب سوالها عن الموضوع وكانها جسم يخدم الطلاب فكلنا نعرف موقف السفارة ولكن الرابطة مثلها تماما لا فرق في شي سوي انها تتحدث فقط انا رايت كل الطلاب الذين كانوا في اجراءات القضية لم اري من بينهم واحد من الرابطة او واحد متابع يا اخوانا كفاية نفاق وخلونا نكون واقعين هل الموضوع كما هو نشر ام ان هنالك تبديل ومحالولة للتغير من العروسة وصاحب العريس لا تنفعلوا وتكيلوا السباب للسفارة فانا اعلم ان السفارة لاتخدمنا نحن الطلاب وكذلك الرابطة التي لم تقدم شي سوي رقص لفتاة سودانية فقط .؟؟؟؟؟؟؟؟؟؟؟؟؟؟


#186284 Sudan [fatttt]
0.00/5 (0 صوت)

07-28-2011 01:18 AM
الغريب في الموضوع انا كنت موجود في ليلة الزفاف و كان العريس و العروس من اكثر المبسوطين وبعد ليلة الزوج بثلاثة ايام غادرت الي السودان و في اليوم الرابع بعد وصولي سمعت الاخبار المحزنة لو علي السفارة علي الدنيا السلام السودانيين في الخارج ليهم الله انه وسيطنا الاعلي ...........اما اخونا محمد و خالد الرشيد ليهم الله الله يعينهم داخل سجن سيداباد المقرف


#186108 Saudi Arabia [الحزن النبيل]
0.00/5 (0 صوت)

07-27-2011 05:54 PM
السفارات السودانية:
مع كل الاسف السفارات السودانية ما بتهتم برعاياها في الخارج في الغالب الأعم و ده شي مجرب و معروف , , اذكر في ذات السفارة في دلهي في منتصف التسعينات اتصلت ادراة السحون بالسفارة لحضور و استلام جثمان شخص سوداني توفي قي السجن ( كان من مقيمي الخليج و اعتاد لأخذ اجازته في الهند – تم قبضه و ضبط كمية زايدة من المخدرات و كان بتواطؤ من نيجريين ) شاهد الموضوع انو السفارة لم تذهب لأخذه , في النهاية انا مواطن لو شربت الخمر و لا ادمنت الدولة مسوؤلة عني و خاصة اذا كنت في الغربة , تعرفو الحصل شنو !!!
قامت ادارة السجون بحرق الجثة على الطريقة الهندوسبة!!! و السفارة لم تحرك ساكن , مع انو حكومة السودان من الدول التي لها صلات طيبة مع الحكومة الهندسية بدليل انو نملك أكبر مساحة سفارة في حي السفارات و موقع استراتيجي نظرا للعلاقات و قد لعب المحتل دور في ربط الهند و السودان ابان حكم البلدين و كبري بحري الخرطوم يشهد على ذلك.
الخارجية السودانية تلعب دور مهم في رسم سياسات العناية برعاياها في الخارج و يبدو انو هذا مفقود , و الحق يقال مر على السفارة في الهند شباب من خيرة شباب السودان زي ياسر محمد و عبدالرحمن و السيد يوسف مدير مطار الخرطوم الحالي حيث كانو يصرفون من جيوبهم الخاصة لحل مشاكل الطلاب و هذا شي شهداه بعيني مع انو المسهد العام لا اهتمام بالرعايا اجمالا الا مت احاهادات شخصية لمثل هولاء النفر,,
فهذا أمر لابد من تصعيدهم لدي الخارحية من اناس أمثالكم أنتم يا من تعلقون على هذه المقالات و هذا الحراك الحميل الذي قد تتحانبه الموضوعية احياناً كما هو الحال مع صاحب المقال حبث أورد لنا وجهة نظر وحيدة و لم نري أو نسمع من السفارة حيث يمكن لهم الاطلاع على التفاصيل , أتمني من صاحب المقال ان ينورنا أكتر و يكمل جميله,,
أولادنا , أولادنا ـولادنا
طيب ديل زي ما ذكر واحد الماداير يقول اسمه من حيدر اباد سكر و مخدرات خلاص يعني نعدمهم نسيبهم للهنود و السجوم الهندية القذرة المعروف عنها اقسي سجون الدنيا كما يكتب عنها دايماً, لازم ده ودلنا و دمنا لو شرب او صلي حقه علينا نثيف عشرة معاه و ياليتك سترته او بالاصح لم تقذفه _ من ستر مسلما ستره الله يةم القيامة _ و انت تعرف محبوبتنا الراكوبة بيقراها القاصي و الداني أنا بعتبر ده بهتان و ما يصح نشهر باولاد الناس حتى لو ثبت , استر اعراض الناس يستر الله عرضك.
الشعب الهندي
شعب مسالم و لا يعرف عنه مثل هذه الاشياء و قد تحدث فهي بلد قارة و لكنها لبست صفة متلازمة لهذا الشعب و الله على أقول شهيد , أنا أعرف كثيرين حضروا للهند و تزوجوا و لم يواجهوا اي من هذه الاشياء مع انو بعضهم لا يعرف الا العربية ياتون من الخليج و مع ذلك لا يتعرض لمثل هذه السرقات بل هناك شكاوي على سوادنيين تزوجوا من هنديات و تركوا زوجاتهم و لم يعودا ثانية.
القصة و ملابسات,,
على الكاتب عبء على عاتقة بتوضيج الصورة و تقصي الحقايق لابمكن لاي شخص في الهتد يسجن في السجم العام دون محاكمة هناك لبس واضح و نظام الكفالات موجود و المحامين الهنود شاطرين و رخيصين.

الحال الطلاب السودانيين في الحارج ( الهند ):
و انا كنت واحدا منهم الحقيقة بنحتاج لوقفة فمعظمنا بقع في المحظور و قوة القلب الموجودة عندنا لتدينا دافع لان نقترف بعض المخالفات و الحقيقة هي ظاهرة لازم تتعالج , و بالرغم من كل هذا فالسوداني الشهم لا يموت في قلب كل واحد مننا و كثير من القيم لاتموت الحقيقة هذا السوداني يحتاج الى تحليل يستغرب الفلسطينيون من محافظة شبابنا على الصبام و الصلوات مع أنهم كان يلهون منذ حين و مع ذلك تلك القيم الحميلة موجودة و لاتستغرب تنه وجد من يستأذن زملاوه لاداء صلاة العشاء قبل ان ينخرط فب القعدة , نسأل الله بهذه البذرة الطيبة الموجودة لديهم ان يهدينا و اياهم لكل خير,,

بنات بلدي ,, بنات بلدي
و الله ما في زي بنات بلدي نحن غربنا و شرقنا لكن زي بت البلد ما في و هذا ليس منعاً للزواج من عير السودانية و للتاس مذاهب فبما يعشقون.
شيخ و عميد السودانيين بحيدر أباد:
هناك الشيخ أبو طه عميد السودانيين في حيدر أباد من افاضل الناس مقيم و متزوج منذ عقدين من الزمان في حيدر اباد أتمني ان يتداخل و يدلي بدلوه و لو أمكن لي الاتصال به سوف اعاود الكرة أخري و الكتابة
اللهم فرج عن اخوتنا محمد الشفيع و اخوانه و اعده الي ربوع الوطن سالما متصرا و مستفيداَ من التجربة .




ردود على الحزن النبيل
Sudan [ا1] 07-27-2011 08:56 PM
الله كريم عليك يا بلد اولادنا في السجن وسفيرنابتاجر بالتياب والصندلية ياخي خاف ربك وشوف شغلتك بدل البتسوي فيهو دة عشان كدة السودان ما بتقدم عشان امثالكم الوسخه دي


#186107 Sudan [الحرية]
0.00/5 (0 صوت)

07-27-2011 05:54 PM
والله السودانيين ديل بتاعين شماتة بس ما عندهم اي شغلة بس ما يلغو ليهم موضوع يمسكو فيهو ياخي يقولو ليكم الولد في السجن تقولو يستاهل الودة يعرس شنو يعرسكم البلة يخمكم اي زول وحريتو مالكم ومال الناس ياخ خلو الناس في حالة عالم غجر بدل يدعو ليهو ويقولو الله يفك اسرو يشمتو ولي دائما بتطلعو المظلوم ظالم عشان كدة الزيكم دة اصلو ما بمشي لي قدام والناس البتقول قاعدة معاهم وعارفاهم ياخي تعرفو السرقة ياخي ديل اصحابكم سعد انت بتعرفهم بتتكلم بي وراهم والله انت شكلك واحد مريييض و بتقول كدة بي وراهم وقدامم تضحك تضحك بلا سنون استغفر الله الله يعينك يا سودان لو دة شعبك


#186015 India [أحد الطلاب المتابعين للقضية ]
0.00/5 (0 صوت)

07-27-2011 02:58 PM
أنا أحد الطلاب المتابعين للقضية :
1.السفارة أرسلت الخطاب لأميل أحد الطلاب و ليس للجهات المختصة
2. تم تعيين المحاميين من قبل الطلاب مافي أي محامي من قبل السفارة
3. المحامي أخدوهو الطلاب على حسابهم لحد السفارة و برضو ما لقى أي أستجابة تذكر من السفارة .
............................
الحاجة الوحيدة التي تحمد السفارة على فعلها أنو أتصلو على أسد الدين عويسي و بعد كدا لا حياة لمن تنادي
. و فعلا زي ما قال الأستاذ ياسر أنو المشكلة دي ما مشكلة محمد بس و لكن مشكلة يواجهها جميع الطلاب و هي تقصير من السفارة في الأستجابة لندائات الطلاب.


#185950 Saudi Arabia [عوض]
0.00/5 (0 صوت)

07-27-2011 01:48 PM
تحرق السفارة بي الفيها ونحن لاقين منهم حاجة مادايرين اي خدمات منهم بس؟؟؟


#185901 Sudan [كربجة]
0.00/5 (0 صوت)

07-27-2011 12:53 PM
والله دى بقت قصة غريبة ..... الواحد يقول ليك ديل بتاعين بنقو وعرقي وما عندهم اخلاق ... يا خى اختشو .... هسى الطلبة الخليجيين او العرب ديل خلاص مكملين الادب والاخلاق ... ما قعد يعملوا بلاوي اكتر من كدا.
القصة انو الجنسية السودانية بقت مهانة ومن منو من الهنود والسفارات برة السودان بقت ما فاضية من الاعمال الاستخباراتية وجبايات القروش وتجنيد الافاكين عديمى الضمير من امثال القال ديل بتاعين بنقو وعرقى ( تلقاهو هسى مشترنو بخمسين دولار فى الشهر وقاعد يرفع تقارير فى اخوانو الطلبة).
واضح جدا انو دي عملية احتيال استغلوا فيها الشباب ديل .... والواضح اكتر كمان انو السلطات الهندية مستحقرة الجواز السودانى لانو الشباب ديل ليهم اكتر من شهر وما عايزين يفكوهم لا بضمانة ولا بكفالة ..... وانا ما عارف عشان شنو ولييه !!! ياخى البعملو جرايم اكبر من كدا القانون بديهم حق انو يطلعو بكفالة او ضمان.
انا مع الزول القال مفروض اخو محمد دا يمشى يختطف السفير ولا القنصل الهندى وكان ما فكو ليه اخو ما يفكو.
اخيرا لكم الله محمد وخالد وانشاءالله ربنا بفرجها
والف رحمة نور تنزل على المرحوم ابو عبيدة ..... ولا عزاء لسفارات العجز والخيبة


#185756 Sudan [محمد عبدالله]
0.00/5 (0 صوت)

07-27-2011 10:11 AM
يبدو ان الموضوع قد اثار جملة من تباين الاراء والتي تدل علي اهتمام الجميع به واريد ان اشارك ببعض الملاحظات :
اولا : هل عندما تزوج ابننا محمد اتبع كل الاجراءات الصحيحة والتي تبدأ باصدار اقرار من المحكمة من قبل والد الزوجة no objection letter
هل ارسل الي السفارة صورة من الخطاب اعلاه اضافة الي اوراقه وطلبا لترد السفارة في صورة خطاب بعدم الممانعة وهذا الخطاب يحدد علم السفارة ويسهل كل الاجراءات بعد ذلك وحتي في السودان.
ثالثا كما ورد ان محمد مكث ما يزيد من ثلاث اعوام وهو ادري بالقانون الهندي فهل سقط علي فيه ليتزوج قاصرا من خلال عميل BROKER ويدري مسبقا رأي القانون الهندي في سن الزواج .
رابعا ايعقل ان تختفي الاسرة والفتاة ويلقي القبض عليه اذا فمن قام بالاجراءات واين التهمة من غير شاكي.
خامسا : من المتهم في القضية اعلاه الزوج ام الوالدين ؟
سادسا : السفارة اصدرت خطابات للجهات المسئولة والتي تعني اولا وزارة الداخلية الهندية والتي عندما ترسل خطابا لوزارة الداخلية بحيدراباد سوف يفتحون الباب علي مصرعيه لكل منسوبي السفارة لان الهند دولة مؤسسات وليس افراد فليتاكد شقيق محمد من اصدرا الخطاب اعلاه وارساله الي حيدرباد مع العلم ام مدير شرطة حيدراباد مسلم .
سابعاً:- انه قد حول الي سجن المدينة الرئيسي غير مقبولة لان السجن العام ليس للانتظار بل للذين صدرت احكام في حقهم اما الاحتجاز وانتظار المحاكمة ففي سجون اخري
سابعأ في العام السابق قبض علي طلاب بحجة التزوير وهي ااكبر من تهمة القضية الحالية واطلق سراحهم مع حجز جوازات سفرهم وسير المحاكمة .
ثامن : هل ابننا محمد مقيم بصورة شرعية بالهند واكمل كل الاجراءات القانونية لان هذا حجر الزاوية في كل ما سبق
وشكرا


ردود على محمد عبدالله
Saudi Arabia [عبدالمنعم] 07-27-2011 12:02 PM
بداية استشف من ردك بان الطالب مذنب ؟ وفرضا ان الطالب مذنب اين دور السفارة في ذلك الا متى تكون لنا الدونية في التعامل تحت ذريعة العلاقات الدبلوماسية ؟ كلكم راع وكلكم مسئول عن رعيته هكذا حدثنا النبي الامي الذي علم المتعلمين هدية السماء الى الارض . ونحن نحلم سفارة تحافظ على حقوق مواطنيها بدلا من الردود ودفع التقصير من جانبها ؟ فستسالون يوم لاينفع مال ولا بنون

متى يتعلم سفراؤنا من السفارة الفلبينية في جميع مشارف الارض ؟

لنا الله
والله من وراء القصد100


#185738 India [ noon]
0.00/5 (0 صوت)

07-27-2011 09:47 AM
بسم الله و الصلاة و السلام على رسول الله ..و بعد ,لا ا عتقد بان الفتاة كانت حقا قاصرا وانما دون ال18 عاما و ايما فتاة زوجت دون ال18 تعتبر case في الهند يحاكم عليه ,و انا معشر المسلمين مقياسنا للزواج هو البلوغ ,و لكنه القانون الهندي


#185665 Qatar [ana]
0.00/5 (0 صوت)

07-27-2011 08:19 AM
استاهل ماشي يقرا ولايعرس مالقا غير الهنود اكتر جنس مزلول وومجرم انت تحسن النسل ولاتخربو


ردود على ana
India [مهند ] 02-09-2012 10:38 AM
اديك العافيه


#185631 India [نادر عمر ادريس]
0.00/5 (0 صوت)

07-27-2011 05:16 AM
فى البدايه السلام على من اتبع الهدى

يا الماداير تتكتب اسمك انتا يا المن حيدر اباد الله اديك العافيه لكن الزى نوعك د هو الممومشى السودان لى وره .انتا لو احتكيت بالناس دى ما كان بتقول كدا سوا من محمد او خالد.خالد انسان بشوش بى طبعو ومرح معى اى شخص اما محمد انسان مسكين بحترم ضلو لو ماعارف اعرف .وليس لهو علاقات كميه معى اشخص من حيدر اباد.اما بخصوص الناس الانقبضو معاهم اشرف منك وارجل منك .على قوله رحم الله رجل عرف مقدار نفسه .دى ممكن توريك الناس ديل شنو يا استاذ الماداير تكب اسمك انتا.

وانتا يااستاذ انتا انا ماطالب منك تورينى بتعمل فى شنوولا شنودى راجعه ليك .ماراجعه لينا .وتشكركتير

انا حجاوب عليك يا قاسم على .فى البدايه القانون لا يحمى المغفلين .ومحمد لىس مغفل يااستاذ راجع المقال بعد انتهى الفتره الدراسيه له قرر ان يتزوج ؟هل لديك مانع فى ان يتزوج ؟

وثانين الاجابه على سوالك.لم يتعرض السوداين فى السابق الى هذا؟؟

المساله لانهم قله وعدم معرفت الشعب الهندى بالسودان .اما بعد معرفت الهنود وغيرهم من الدول على ان السودان به ثرواة متعدده وارتفاع العمله هذا مايودى الى طمع الكثير من الدول الى الجوى الى هذه الطرق سوى بالزواج او بغيرها لى ابتزازك ونهب وغيره.واضيق لك نقطه اذى السفاره السودانيه لديها الاهتمام التام بخصوص الطلاب فما كانت لديها هناك مشاكل.نظر وعلما لدى الشعب الهندى عدم اهتمام السفاره السودانيه برعاياها باتت المشاكل تتنتشر فى جميع انحاء الهند.

فى النهايه اسال الله انت يتقبل مسوى اخونا المرحوم رحمته الله ابو عبيده الذى راح قدر ويسكنه فسيح جناته .ويفك اسر اخوانا الطلاب محمد وخالد.الزين راحو ايضا قدرا .واخونا معتز او الملقب بى (بقى)اسال الله ان ياتيك بحقك يوم يبعثون انشاء الله .والى جميع الطلاب السودنين كان الله فى عونكم .



#185624 United States [Ahmed Mohamed ]
0.00/5 (0 صوت)

07-27-2011 03:03 AM
اولا السفارات ماضعيفه بمزاجها نحن شعب لاتسمع له اى كلمه فى الخارج ولله يكون في عون لطالب وربنا يفك اسره


#185597 Malaysia [MAJHOOOOOOOOL]
0.00/5 (0 صوت)

07-27-2011 01:14 AM
الله يكون في عونو ويفك اسرو يا رب . من ناحية السفارة انها تعمل حاجة انسو يا نااااااااااااااااااااااس لانو احنا وللاسف ما عندنا سفارات دي اسما زفارات كما هو الحال عندنا في ماليزيا . قاعدين منظر بس . التلفونات الثابتة بتاعت السفارة ما بردو عليها وتقول تمشي السفارة يومي عندهم اجتماع ما بتعرف الناس دي اجتماعاتا دي ما بتنتهي .
المختصر المفيد : الزفارات السودانية ما منها اي فائدة .;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;(


ردود على MAJHOOOOOOOOL
United Arab Emirates [بت ملوك النيل] 07-27-2011 05:34 AM
القال ليك منو الزفارات السودانية مافاضية؟؟؟بالعكس ديل مشغولين بي لم الجبايات وما عندهم وقت يضيعو في المشاكل.
كسرة. اقترح علي الحكومة ترسل كاشيرية بدل السفراء وتوفر علي نفسها المصاريف.

India [Itachi] 07-27-2011 04:47 AM
ده كل القدرتو عليهو ماشي يقرا ولا يعرس

ديل شباب بتاعين سكر و بنقو و نسوان

5000=150$ كويس شديد

خلونا في حالنا عليك الله ما دايرين منكم اي حاجة

الله معانا

وندعو الله يفرج عن الاخوان زي ما قدر ولطف على اللقبلهم


حسبنا الله و نعم الوكيل




#185586 India [panther]
0.00/5 (0 صوت)

07-27-2011 12:20 AM
الموضوع ما بس قضيه محمد و خالد او الزواج او تاجر المخدرات.. لحدي اللحظه كل التعليقات كلها عن السودانين في الخارج و عمايلم و لا اي واحد اتكلم عن الطلبه الاتخرجوا و رجعوا و اشتغلوا و كانو كل الطلبه الفي الخارج مجرمين .. و برضو مافي اي زول لحدي هسه اتكلم عن (ابو عبيده) عليه الرحمه ... كل الناس ممكن تغلط ما بس الطلبه خارج السودان تابعوا الصحف اليوميه و شوفوا في كم جريمه بتحصل في السودان من قتل و نهب و اعتصاب و تهريب و حشيش و سكر .. ديل كلهم قاعدين في حيدراباد برضو؟؟ للاخوان في في الهند لي بس بنسمع بمشاكل السودانين ؟؟ باقي الجنسيات التانيه كلهم اخلاقم عاليه؟؟ الموضوع او القضيع لما تحصل بتمس كل السودانين و انا متأكد انو اي واحد هسه في الهند و بالاصح حيدراباد حصلت ليهو مضايقات من القضايا الحاصله دي... ده كلو عشان ما عندنا ظهر و ده ما دفاع بس عن محمد او غيروا.. بس ممكن تسألوا عن العمانين و السعودين المسكم البوليس قبل اسبوع حصل ليهم شنو؟؟ مع انو فيهم المخدرات و زواج من قاصر برضو , في ظرف ساعات كان السفير موجود في حيدراباد لافي واحد جابوهوا في جريده ولا في زول اتحول للسجن و اكيد الموضوع ما انتشر و بقت سيرتم على كل لسان.. الفرق البينا و بينم انو هم سمعتم بتهمهم و نحن بس مستنين واحد اغلط عشان نبده نتكلم فيه . حالقاها من الغربه؟؟ ولا من السودانين نفسهم؟؟ ليه الكلام ده ما حصل لما ابوعبيده ربنا ارحمو ما حصل؟؟ وين كان القانون الهندي و الجرائد و تعليقاتكم عن المجرمين السودانين في الخارج؟؟ وين كنتوا لم كان فاقد الوعي 4 شهور في المستشفى؟؟ مع العلم انو القتلوهو اتقبض عليهم و طلعوا بعد 3 ايام بس من السجن و اكيد ما دفعوا رشاوي زي ما نحن مضطرين لانو بصراحه دي الحاجه الوحيده البتقيف معانا لما تحصل لي زول مشكله هنه اذا كنت ظالم او مظلوم.........

اما الاخوان البسألوا هو مشى اعرس ولا اقرا؟؟ هو الحمد لله اتخرج و كمل الحاجه الهو جاي ليها بعد كده من حقو اتزوج او اعمل اي حاجه و على حسب معلوماتي انو الزواج ما حرام من الهند او اي مكان تاني
و ياريت نهتم بي سمعه السودانين اكتر و نتاكد من الكلام البنقولوا و من الكلام البتقال لينا قبل ما نحكم .. ما عارفين ظروف الناس شنو و كلو زول و نييتو


#185570 India [panther]
0.00/5 (0 صوت)

07-26-2011 11:18 PM
بالنسبه للاخ المن حيدر اباد و بحكي في التفاصيل كامله...واضح من كلامك انو خالد او محمد علاقتك بيهم ما قويه لانو اذا كانت بس مجرد معرفه ما كان قلت كلامك ده, معناه انك سمعت الكلام ده من الطلاب الموجودين في حيدر اباد البحكوا القصه بي اكتر من صوره. معظم الشباب المعلقين هنه او في اي موقع تاني و بقول انو عندو التفاصيل كامله سمع القصه دي من الشارع و زاد عليهاز انت ما كنت حاضر العرس او لما البوليس مسكم ....
القضيه ما بس زواج من قاصر و دي ما القضيه الاساسيهز في اكتر من سبعه تهم موجه لي محمد و خالد منها اغتصاب و تحرش جنسي و اختطاف و زواج متعه . و دي ممكن تتاكدوا منها من مواقع الاخبار الهنديه او من الموقع لانو قبل كده نشر الخبر. اول حاجه اذا كان زواج من قاصر كيف اكون في تهمه اختطاف؟ و اغتصاب؟ كان ممكن بس اقيفوا على قاصر. و ما ممكن اكون زواج متعه و اهلو عارقين الكلام ده في السودان و بموافقتم ... و اي زول حابي اشوف التهم الغريبه الموجه ليهم ممكن اديهو نسخه من ملف القضيه بالتهم كامله مع العلم لنو اي تهمه بتنفي التهم الاخرى... و الكلام ده مؤكد لانو انا واحد من العزابه بتاعين البنقو و العرقي زي ما بتقول....مع العلم انو البيت ده ساكنين فيهو محمد و خالد و انا و بس و زي ما قلت ليك انت ما عارق التقاصيل الكامله عشان تعرف باقي الاخوان كانو معانا في البيت لي لما البوليس جه...... واذا كانت التهم دي صحيحه كيف افضلوا في قسم الشرطه ارعه ايام من غير ما اقولوا ليهم تهمم شنو و كل الكان بنسمعوا بس ادفعوا قروش و كان مبلغ خرافي.. ده غير انو القضيه لما وصلت المحكمه الزوجه و اهلها و ظابطه المباحث و اهلها و حتى الظابط المسؤول من القضيه اختفوا؟؟؟ و التقرير الطبي اثبت انو البت ما قاصر و مافي اي زول اعتدى عليها..ده غير انها اصلا ما قعدت في البيت اكتر من ليلتين في مده 12 يوم؟؟


#185561 Sudan [المناضل ]
0.00/5 (0 صوت)

07-26-2011 10:59 PM
بعد قراءتي للمقال بعد فهم السفارة لموضوع محمد الشفيع هو وقع قضية نصب واحتيال وربما جهله بموضوع الزواج يتم من داخل السفارة هذا لا يعفي السفارة ان تقوم بمتابعت القضية طالما كان هناك حسن النية نطالب الجهات الرسمية والمسؤلين في الدولة بمسالة السفارة بما اوردته من حقائق تجاه القضية


#185559 Saudi Arabia [المر ]
0.00/5 (0 صوت)

07-26-2011 10:55 PM
يستاااااااهل !!! الجبهجية واولادهم غير الزواج من البنات الصغار القصر ما عندهم . يعني انت ما عندك واحده من زميلاتك المتعلمات تتزوجه بفلوس اهلك عشان تمشي تشتري طفلة !! نعم طفلة وطبعا جلست معها وشفتها طفلة وعارف انها طفلة ،والهنود ديل من احسن الناس في اسيا .. بس وقتين يعرفوك انك مش كويس بيعرفه يتعاملوا معاك كويس

ثانياً : انا شايف السودانين بيعلقوا على الموضوع بكل بساطة كأنه الهند دي مفتوحة لشراء الاطفال وزواجهم يعني السودانيين اصبح عندهم الزواج شراء وبيع عادي ذي اخوانا الخليجيين . هذا ما اخذناهو من الثقافة العربية الغير اخلاقية الطلبة والتجار في الهند فيهم إن


#185538 Saudi Arabia [واحد قرفان]
0.00/5 (0 صوت)

07-26-2011 10:16 PM
حقيقة لابد منها وهي ان معظم الطلاب السودانيين فى الهند وخاصة حيدر اباد اسوا ناس بما فيهم اخوى الموجود حاليا فى حيدر اباد كل همهم ان ترسل لهم المصروفات الدراسية فقط وبعدها ما يردو حتي على التلفونات وطبعا السكر والبنات والمخدرات من اولوياتهم ويمكن قبل فترة سمعتو بالطالب السوداني (تاجر المخدرات ) الذي تم القبض عليه فى حيدراباد وممكن الى الان خبره موجود فى ارشيف الراكوبة ونصيحة كل واحد عندو طالب فى الهند احسن يتفقدو وبعدين ما ترسلو ليهم فلوس زيادة 5000 روبية اي حدود 150 دولار .... وزيادة عليهم كمان.... وبالمناسبة نحن السودانيين فى الفترة الاخيرة وللاسف الشديد اخلاقنا اتغيرت خالص وبقينا نمشي بلا اخلاق واكيد كل الشعوب بتتعامل معانا حسب اخلاقنا وحسب متطلبات الموقف نفسه وللمعلومية الهنود ناس كويسين ومحترمين ... طبعا مع المحترم مش مع الانسان التافه السير المنحط بتاع البنات ... ربنا يجيب العواقب سليمة ويرجع لينا اخلاقنا بين الشعوب لانها كل ما نملك ... لا فلوس ولا سماحة ولا حاجة تانية


#185492 United Arab Emirates [حنين الكون ]
0.00/5 (0 صوت)

07-26-2011 08:48 PM
كل يوم بنسمع مآسي عن أخوانا وأخواتنا في الغربة .. ولكن ليس لنا إلا أن نقول قلبنا معكم . وعين الله ترعاكم ... تحياتي ;(


#185472 Saudi Arabia [ibrahim]
0.00/5 (0 صوت)

07-26-2011 08:07 PM
ياخي تستاهل عشان اهلك باعتنك تتعلم ولا تتزوج


ردود على ibrahim
Saudi Arabia [ود ادريس] 07-26-2011 08:44 PM
انت يالساعة فهمك تعبان شديد
حاول اطلع ثقافتك ضحلة شديد


#185455 India [زووووول ]
0.00/5 (0 صوت)

07-26-2011 07:41 PM
ا محمد ناس العرقي والبنات ما كل السودانيين و فكرتك خطاء
وبعدين الهنود ديل اكبر شعب محتال ونصاب في العالم وبنصبو علينا كسودانيين لانو عارفين انو سفيرنا ما فاضي من التجاره في الصندل و الصندليه واساءة الطلاب هنا


#185418 Sudan [محمد]
0.00/5 (0 صوت)

07-26-2011 06:36 PM
الناس البدافعوا عن الشاب
انا عندى فكرة عن السودانيين البيدرسوا او بيحضروا بره , وبقول ليكم ما تصدقوا انهم ضحايا
للاسف الغالب الاعم من السودانيين لمن يمشوا الهند او روسيا او مصر او اروبا بيتحولوا الى حاجة تانية مختلفة نهائيا عن صورتهم جوا السودان
خمور بنات حشيش , بالذات فى روسيا و اوكرانيا , اصبحوا يشويهوا صورتنا فى العالم كله و مابهمهم صورة السودان بى تعريفه , و المفروض ان السفارات مش تطلعم من السجن , المفروض تطلعم من البلد كلها و تجيبم السودان تانى.


ردود على محمد
Ukraine [محمد] 07-26-2011 08:17 PM
ونصب كمان يا محمد دي مالك ما زكرتها ولا خجلت والله الاختشوا ماتوا


#185416 Saudi Arabia [شلااقه]
0.00/5 (0 صوت)

07-26-2011 06:32 PM
[gasim ali] [ 26/07/2011 الساعة 12:11 مساءً]
القانون لا يحمي المغفلين...يا محمد الشفيع محمد الحسن ...وسؤالي لماذا لم يتعرض الطلاب السودانيين في السابق الا ما تعرضت الية....

لانه مغفل (؟) (؟) (؟) (؟) (؟) (؟)


#185412 Sudan [.,زول]
0.00/5 (0 صوت)

07-26-2011 06:29 PM
اولا..

نتمني من الله ان يفك اسر الاخوة

ثانيا
سفارات السودان ماهي الا لتوظيف عاطلي المؤتمر الوطني طالما الشعب السوداني

الفضل في الداخل يعاني ما بال الفي الخارج



عموما نسال السلامة لمحمد و خالد وكل ابناء الوطن وربنا يسهل :;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;(


#185384 Qatar [ana]
0.00/5 (0 صوت)

07-26-2011 05:44 PM
أكنسو الوسخ تنظفوا


#185371 Saudi Arabia [الحربي]
0.00/5 (0 صوت)

07-26-2011 05:32 PM
يربنا يفك اسره


يا جماعة ناس الانقاذ ما فاضين لمشاكل المواطنين في الخارج

الناس ديل مشغولين بقسة الكعكة عشان الزمن

المواطن ليه الله و بس


#185346 Saudi Arabia [عبد السلام ضعيف]
0.00/5 (0 صوت)

07-26-2011 04:47 PM

ذهب السفير المصري من الرياض الي حائل اكثر من 600كلم في قضية قتل مواطن مصري علي يد سعودي بالرغم من القضاء هنا لايحتاج الي كل هذا العناء ويعطي كل ذي حق حقه مواطنا كان مقيما عربيا كان او اعجميا . اما سفاراتنا في الخار ج فلا تعدو ان تكون مجمع لجمع الضرائب والاوتاوات والزكوات التي لو قسمت علي فقراء العالم لكفتهم
غير ان دورها الاساسي لخدمة المواطن ليس من شغلها ولا همها .فانك ان ذهبت الي سفارة لا تلقي ادني احترام وتعامل كانك رهينة تم اثرها من عدو لدود
اللهم انصر ضعفنا وارحمنا برحمتك يا ارحم الراحمين


#185330 Sudan [musa]
0.00/5 (0 صوت)

07-26-2011 04:33 PM
ربنا يفك سجنك يا اخي
بس انا البعرفو عن الهنود او الاسيان عموما انهم ناس انطباعين من البداية كنت كويس معاهم تلقي احسن معاملة, وللاسف فى السنين الاخيره العرب عموما ومن ضمنهم السودانين فى الهند الواحد يتزوج ويقضي فترة الدارسة ويزوق يخلي البنت المسكينة وده حصلت كتير جدا لذلك من الطبيعي ان ينشئ سلوك اجرامي مضاض,وبالجد الطلاب السودانين بالخارج والله الحافظ الله
الله يكون فى العون


#185325 Saudi Arabia [الشعب الفضل]
0.00/5 (0 صوت)

07-26-2011 04:23 PM
والله العظيم انا لا بعرف دبلوماسية ولا حاجة والله لو دا اخوي الا احتجز السفير الهندي لحدما يفكوا اخوي والله البشير لو وقف قدامي الا ادوسوا
شوفوا البرضى بالهوان ببقى تحت الجزمة والعالم دا لو مفتكرين فيهو دبلوماسية وطاطكم اصبحت كل العالم بلطجية وفي عالم البلطجة ما يحترمك الناس الا تبقى بلطجي
والجزاء من نفس العمل


#185320 Sudan [نيازوف]
0.00/5 (0 صوت)

07-26-2011 04:20 PM
نصيحة غالية واخوية اهديها الي كل من يريد ان يدرس بالخارج ...ابعد عن البنات والفودكا وستنجح في حياتك وفي دراستك العلم متطور في الغرب لكن مشكلة الطالب السوداني وليس كلهم بمجرد ان يصل يبدا في التفكير في النساء والخمر ....الغريب اديب


#185314 India [من جوا العاصفه]
0.00/5 (0 صوت)

07-26-2011 04:05 PM
اولا

اسال الله ان يفك كربتكم اخواني محمد وخالد

ثانيا

في اي يوم من الايام السفاره السودانيه او المسؤولين السودانيين اهتمو بقضايا ومشاكل الشعب ؟؟؟

الموضووع دا ما استغرااب لكن دي حقيقه


الطالب السوداني في ايي بلد خارجي يتعامل معامله زي الزفت و معامله (( هاامله ))
في الهند النصب و الاحتيال دا بقا عاادي جدا جدا فما بستغرب انا منو

اقل دليل انو الطالب السوداني مضطهد في الخارج لمن تقدم للاقامه في الهند تعال واتجرجر يا سوداني ,,,,,وغيرك بتطلع ليهو في اسرع ما يكون لي

لانك ((( سوداااااااااااني وعارفين انو حيطتك مااايله لو ما واقعه اساسا )))

وقس على ذلك في كل بلدان العالم بهذا المستوى الركيك و الوضيع في المعامله


#####ما بحس بالوجع الا سيدوو #####


والناس الداخله هنا عشان تشمت ولا عشان تدافع عن حزب حاكم او غيروا
انا كطالب بقول ليها نحن ما عاوزين غير حقنا وعلى الاقل نحس انو ورانا مسؤولين (يسألوا)
او يشكلوا زيارات دورية للمدن الهندية عشان يشوفوا الحاصل لابنائهم الطلبة شنو
ويا ريت انو الزيارات دي تتسجل لاقسام الشرطة والاقامات ويشوفوا المعانة التي يعانيها الطالب السوداني (بحيث انو زيارات الطالب الى هذه الاقسام اكثر من ذهابه الى الجامعة يوميا وذلك من اجل ان يتحصل على الشرعية في البلاد )

انت هنا لو ماشي صااح بتشك في نفسك ان ماشي غلط و العكس صحييح

ارجووووكم يا اهل المسؤوليه حسو بي ابنائكم شويه و بالعذاب البتعذبو عشان يحلحلو حاجااتم .........


وفي الاخير اسال الله التوفيق لي ولكم ولجميع الطلبه السودانيين بالخارج ويحفظم حيث لا حفيظ سوااه



#185283 Saudi Arabia [البرنس]
0.00/5 (0 صوت)

07-26-2011 03:28 PM
الله يفرج على اخيك بس بناتنا احلى بنات


#185247 Saudi Arabia [الظاهر ]
0.00/5 (0 صوت)

07-26-2011 02:41 PM
يا الناس البتسالو هو الطالب دة مشى يقرأ ولا مشى ........؟ دى حاجة خاصة بيهو يقرر يتزوج هندية امريكية استرالية نحن ما لينا دخل . ولكن لينا دخل ومطالبين بى حمايتو اذا تعرض لى اى اذى فى اى بقعة من بقاع العالم طالا ما هو سودانى . لابد من اعادة النظر فى مهام السفارات السودانية بالخارج لتقوم بواجبها كامل تجاه الجاليات السودانية المغربة قصرا الى بقاع من الارض ما كانو يسمعو بها لولا سوء ادارة الدولة وسياساتها الطاردة والمشردة . ولا بد من كنس النظام من الجزور ودون رحمة


#185234 Sudan [lصاد ميم]
0.00/5 (0 صوت)

07-26-2011 02:29 PM
حسب معلوماتي انه المهر في الهند تقوم بدفعه الزوجة و عائلتها لذلك تكثر حالات اجهاض النساء اللائي يحملن ببنات ووأد المواليد الاناث ولذلك منعت الحكومة الهندية اجراء فحوصات الموجات الصوتية لتحديد نوع الجنين ويستوي في ذلك حتي بعض المسلمين الهنود


#185203 Saudi Arabia [ابو محمود ]
0.00/5 (0 صوت)

07-26-2011 02:05 PM
نسأل الله ان يفك اسر الطلاب
ثانيا انحنا كسودانين عندنا مشكلة انو الواحد لما يكون موظف فى الحكومة فهمو شنو للوظيفة انو يرطب بيها بس ماعارف انو هى الوظيفة دى كلها مهام الواحد تقول انت جايهو فى بيتو انا مرة حصل معاى موقف ظريف ايام ماكنت فى السودان جيت مجمع الخدمة الوطنية عشان انهى اجراءات الخدمة كنا واقفين فى الصف بعدين الضابط بيتونس معاهو ضيف مابعرف قريبو ولا صحبو المهم لما جاء دورى فى المعاملة الضابط بيقول لى انتظر برة شوية بقول ليهو لى بيقول لى معاى ضيوف شوف بالله ضيوف دا مكان ضيافة ولا عمل والواحد مابيعرف انو هو المفروض يسهل المهام ويقوم بيها على اكمل وجه غير تعال بكرة ماعندنا حاجة وانشاء الله لى يوم الدين ماحنتقدم شبر


#185200 United States [الدود]
0.00/5 (0 صوت)

07-26-2011 02:04 PM
اولا نسال الله ان يهون عليه ويفك اسرة ....ثانيا انسي انك عندك سفارة بتقف معاك ....




وبعدين انتو نسيتو الشعراء وناس وردي اللي كتبو وغنو قالو

بنحب من بلدنا ما من برا البلد


#185198 India [no name ]
0.00/5 (0 صوت)

07-26-2011 02:02 PM
والله ياناس انا قاعد حااليا في حيدراباد واليكم التفاصيل كامله
اول حاجه الزول دا اتزوج البنت وقعدها معاهو في البيت الساكن فيهو كلهم عزابه معقوله بس تتزوج ليك واحده وتسكنا في بيت عزابه؟؟؟؟؟؟؟؟ وبعدين الناس القاعد معاهم كلهم ناس بنقو وبنات وعرقي ولمن الشرطه جات ومسكتو لقو البيت مليان عزابه
والسفير كم مره اتكلم مع الطلاب قال ليهم نحنا مابندخل في المشاكل الاخلاقيه وليهو حق والله وانت يااخو العريس لو جيت شفت اخوك بعمل في شنو هنا ماكنت سالت منو تاني
نسال الله السلامه والعافيه


ردود على no name
India [واحد من الناس] 07-27-2011 10:17 AM
اتق الله يا اخينا ... وخت نفسك مكانو !! .. بجد عالم زباله والله .. الله يقرفك ويقرف امثالك الكرهونا الهند ..


#185197 United Arab Emirates [رقدو]
0.00/5 (0 صوت)

07-26-2011 02:02 PM
زول عرس علي سنة الله ورسوله واهلو باركو الزواج وعاوز يصون نفسو يجي واحد
من المعلقين يشبك انت ماشي تقرا ولا تعرس؟
ياخ ناس غريبة جدا
المهم ربنا يحل كربته


#185189 Saudi Arabia [أحمد خالد]
0.00/5 (0 صوت)

07-26-2011 01:57 PM
الهنود أطيب شعوب الارض وأكثرهم نبلاً وأخلاقاً

ولا أعتقد أن حالة النصب هذه عامة وتحدث لجميع السودانيين كما يقول كاتب التقرير

وبصراحة مشكلتنا أننا بنحب نعمم.. تعمييييم فظيع

سودانيين كتيرين جداً في الهند عايشين في أمان الله بدون مشاكل

وأنا كنت واحد منهم

لا تظلموا الهنود.. والله هم أحسن ناس

الواحد منهم ممكن تضربوا أو تعمل معاهو حادث موتر أو سيارة وتقول ليهو معليش فيبتسم في وجهك ويقول ليك أوكيي حصل خير.

أما سفارتنا في الهند فهي مبني ملئ بالمنظراتية ومافيهم فائدة أبداً.


#185175 Saudi Arabia [هشام خيري]
0.00/5 (0 صوت)

07-26-2011 01:31 PM
حذارى من ناس حيدر اباد مشهورين بالكذب


#185155 Sudan [مصطفى ]
0.00/5 (0 صوت)

07-26-2011 01:01 PM
لك الله يا وطنى ؟ إسرائيل تقوم كلها من أجل جندى جاليعاد شاليط محبوس منذ سنوات ولم يتم نسيانه حتى هذه اللحظة بينما أبناء شعبى يهانون فى بقاع العالم المختلفة ؟ أين طاقم السفارة من السفير وحتى أصغر موظف والله لو حصل هذا لمواطن من أى دولة ثانية لقامت الدنيا ولكن سياسة الحكومة جعلت الطالب السودانى والمغترب والمهاجر يهان خارج البلاد ولذلك جاءت موجة الجوازات الأجنبية وأنا أحمل واحد منهم والمعاملة تفرق بينى وبين سودانى مثلى عندما نصل مطار هثيرو أو أى مطار آخر فى أوربا
حاجة محزنة بالجد والله الله ينتقم منكم


#185142 United Arab Emirates [زوووول]
0.00/5 (0 صوت)

07-26-2011 12:44 PM
عندي سوال؟ هذا الطالب هو ماشي يقرا ولا ماشي يعرس ؟ كل الطلاب للاسف عندما يصلوا الهند ينسوا الهدف الجاءوا من اجله وينغمصون في عالم تاني انا بعرف طلاب كثيرين لم يرجعوا بعد التخرج لانغماسهم في الموبقات نسال الله السلامة ونتمنى للطالب ان يطلق صراحه من السجن ويرجع لاهله سالما ويشوفوا ليهو عروس سودانية اصلية من تنقاسي.


ردود على زوووول
India [al_Sahir] 07-26-2011 03:30 PM
يا اخ زول مدينة حيدرااباد مدينة محافظ احسن من اي مدينة في السودان

Norway [ود البدري] 07-26-2011 02:45 PM
ياخينا عروس من تنقاسي ... عايز تضيع الراجل . احسن ليه السجن

Saudi Arabia [زائر] 07-26-2011 02:14 PM
يا اخي دة عرس ما عمل حاجة غلط فلماذا الموبقات ؟؟ هل صار الزواج من الموبقات.؟؟


#185141 Canada [شماليه]
0.00/5 (0 صوت)

07-26-2011 12:39 PM
والسودانيه مالا عيبها شنو ليه جارينا وراء الاجنبيه الما بتقدر تعيش في السودان وسخانه وغباره. نرسل الاولاد للخارج للتعليم يمشوا يتزوج ويجوا والبنات الفي السودان ديل ها يعرسهم منو نبحث ليهم عن اجانب ولي شنو . خلاص الاولاد ديل من هنا وجائ نعقد ليهم من السودن قبل ما يطلعو للدراسه عشان الواحد يكون مربوط . والاخ محمد الشفيع البنت قالت ليهو طلقني انا بكرهك ولااريد الزهاب والعيش معاك في السودان ؟خلاص كان يطلقها ويخلص من المشاكل والبهديل في السجون والجات في مالك سماحتك وبكره ربنا يعوضك:D :D :D


#185127 Saudi Arabia [محمد السنوسي]
0.00/5 (0 صوت)

07-26-2011 12:23 PM

لك الله يا أخ ــــــــــــــ ياسر الشفيع محمد الحسن

نسأل الله أن يفرج كربة أخيك .. يا حي يا قيوم...............

أما بالنسبة للسفارة السودانية بالهند فهي كغيرها من السفارات السودانية في العالم ، كل ما يهمها توظيف منتسبي المؤتمر الوطني في السفارات ، والقيام بالأعمال الستخبارتية لصالح الحزب الحاكم وجمع الجبابات وعملية الاستقطاب لصالح الحزب الحاكم وعمل الحفلات التكريمية والصرف على هذه الحفلات العائلية التي تخص السفارة......الخ

الا يوجد هنود بالسودان ؟؟؟؟؟؟؟؟؟؟؟؟

قوموا بالواجب ...... ذي ما فعلوا في إخواننا السودانين في الهند .... إفعلوا بهم ما شئتم ، والله هؤلاء الهنود ما هم إلا زبالة مجتمع .....................

قوموا بواجبكم حتى تعرف حكومتنا أن المواطنين السودانين ليسوا بأقل قامة من غيرهم .....

(الصاع ..... صاعين))


ردود على محمد السنوسي
France [من اين اتوا هؤلا ] 07-26-2011 02:55 PM
صدقت والله جميع السفارات لا هم لها هل تعلمو الاخوه المعلقين انو السفير السوداني في الهند يعمل في تجارة الـــــــثـــــيـــــاب الــــــنـــســــــــائـــــي


#185116 United Kingdom [gasim ali]
0.00/5 (0 صوت)

07-26-2011 12:11 PM
القانون لا يحمي المغفلين...يا محمد الشفيع محمد الحسن ...وسؤالي لماذا لم يتعرض الطلاب السودانيين في السابق الا ما تعرضت الية....


ردود على gasim ali
India [نادر عمر ادريس] 07-27-2011 05:10 AM
فى البدايه السلام على من اتبع الهدى ..
يا الماداير تتكتب اسمك انتا يا المن حيدر اباد الله اديك العافيه لكن الزى نوعك د هو الممومشى السودان لى وره .انتا لو احتكيت بالناس دى ما كان بتقول كدا سوا من محمد او خالد.خالد انسان بشوش بى طبعو ومرح معى اى شخص اما محمد انسان مسكين بحترم ضلو لو ماعارف اعرف .وليس لهو علاقات كميه معى اشخص من حيدر اباد.اما بخصوص الناس الانقبضو معاهم اشرف منك وارجل منك .على قوله رحم الله رجل عرف مقدار نفسه .دى ممكن توريك الناس ديل شنو يا استاذ الماداير تكب اسمك انتا
وانتا يااستاذ انتا انا ماطالب منك تورينى بتعمل فى شنوولا شنودى راجعه ليك .ماراجعه لينا .وتشكركتير

انا حجاوب عليك يا قاسم على .فى البدايه القانون لا يحمى المغفلين .ومحمد لىس مغفل يااستاذ راجع المقال بعد انتهى الفتره الدراسيه له قرر ان يتزوج ؟هل لديك مانع فى ان يتزوج .

وثانين الاجابه على سوالك.لم يتعرض السوداين فى السابق الى هذا المساله ..؟

حاجاوبك لانهم قله وعدم معرفت الشعب الهندى بالسودان .اما بعد معرفت الهنود وغيرهم من الدول على ان السودان به ثرواة متعدده وارتفاع العمله هذا مايودى الى طمع الكثير من الدول الى الجوى الى هذه الطرق سوى بالزواج او بغيرها لى ابتزازك ونهب وغيرها.واضيق لك نقطه اذى السفاره السودانيه لديها الاهتمام التام بخصوص الطلاب فما كانت لديها هناك مشاكل.نظر وعلما لدى الشعب الهندى عدم اهتمام السفاره السودانيه برعاياها باتت المشاكل تتنتشر فى جميع انحاء الهند.

فى النهايه اسال الله انت يتقبل مسوى اخونا المرحوم رحمته الله ابو عبيده الذى راح قدر ويسكنه فسيح جناته .ويفك اسره اخوانا الطلاب محمد وخالد.الزين راحو ايضا قدرا .واخونا معتز او الملقب بى (بقى)اسال الله ان ياتيك بحقك يوم يبعثون انشاء الله .والى جميع الطلاب السودنين كان الله فى عونكم .


India [حذيفه طه عمر] 07-26-2011 07:04 PM
انا طالب في الهند.....يامحمد انت الزيك ده برفع
طوبه اختاك من البلد انحنا مرقنا بره ندرس عشان التعليم في بلدك (زفت )والطلبه ديل والله انت مابتصل نص الاتعلمو في البلد دي والغربه للرجال انت خليك في السودان وانبح مع الكلاب الدايره تحبط الناس....وموضوع السفاره سفارتك دي اخير منها كشك (سجاير)ناس ماعندها اي وطنيه قاعدين في الهند خراب و و و و والله يفك اسر اخوانا الطلبه في حيدر والسفاره (طز)وانا ماراجي حاجه كويسه من السفاره ولا من الزيك ديل ياوهم
طالب في الهند زعلو كلام الشخص ده



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

تقييم
1.91/10 (15 صوت)

الاكثر تفاعلاً/ق/ش

الاكثر مشاهدةً/ق/ش

الاكثر تفاعلاً/ش

الاكثر مشاهدةً/ش





الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة