مهازل و فضائح بعثة السودان في البطولة العربية بالدوحة
الهادي هباني
تتناول مجالس الدوحة هذه الأيام فضائح بعثة السودان المشاركة في البطولة العربية الثانية عشر و قصصها المخزية التي ما أن تسمعها (بالذات من أبناء الجالية السودانية بقطر المتطوعين و العاملين تحت مظلة اللجنة الأولمبية القطرية في تنظيم الدورة) حتي تكتشف أنه ليس من الغرابة أن يحتل السودان زيل القائمة بجدارة بعد جيبوتي و اليمن و فلسطين حيث لم يحرز أية ميدالية ذهبية و أن كل ما ظفر به بجهود 280 شخص بالتمام و الكمال (هم قوام البعثة) فقط 14 ميدالية من جملة 1043 ميدالية منها 7 فضية و 7 برونزية أي ما نسبته 1% فقط من إجمالي عدد الميداليات في البطولة كلها ،،، و بالتالي لن يكون صعبا علي المرء أن يجد تفسيراً لكل التردي و الإنحطاط الشامل الذي وصلت له بلادنا اليوم ،،،
تجمع قصص البعثة الكريمة (و التي درج أخواننا القطريين و غيرهم من المقيمين بقطر من جنسيات عربية و غير عربية أخري من باب الإستهزاء و السخرية بتسمية أعضاء البعثة الماسية "بالأزوال" أي "جمع زول") ما بين المضحك و المؤسف المبكي و الذي هو في نهاية الأمر ثمرة من ثمرات منظومة الفساد الشامل التي تتحكم في مصير شعبنا و تقوده نحو الهاوية و السقوط التام ،،، كالورم الخبيث الممتد المنتشر و المتوغل في كل أحشاء الجسم و الذي لا تنفع معه المسكنات أو العمليات الجراحية و لا فكاك منه غير الخلاص الشامل ،،،
و قبل الخوض في الموضوع أخص أولا بالشكر و الإعجاب للأصدقاء من كوكبة الشباب السودانيين الوطنيين الشرفاء المقيمين بقطر الغيورين علي بلادهم الذين رصدوا بحرقة و ألم العديد من تلك االمشاهد المخزية من داخل ميادين البطولة و من خارجها و كشفوها لنا و فضحوها في مجالس السودانيين بالدوحة و إليكم بعض ما تيسر منها (و ما خفي كان أعظم) ،،،
تمثل الخطوط القطرية الناقل الرسمي لكل الوفود العربية المشاركة و قد قامت قطر بدورها بالكامل بإرسال التذاكر لكل الوفود علي الخطوط القطرية ،،، و لكن بشكلٍ أو بآخر (و بقدرة قادر) تمكنت السلطات السودانية (وزارة الشباب و الرياضة) المسئولة عن البعثة من إستبدال التذاكر (لإرتفاع قيمة تذكرة الخطوط القطرية) و الحجز لكل أفراد البعثة المشاركة بنظام ال (Cheap Flights) علي طيران (فلاي دبي) بأقل من نصف قيمة تذكرة الخطوط القطرية ،،، و لا يدري أحد أين ذهب الفرق؟ و كيف تمت عملية الإستبدال؟ و لكن ما يتم تداوله في المجالس هو أن تذاكر فلاي دبي تم شِرائِها عن طريق وكالة سفر و سياحة في العاصمة الخرطوم مملوكة لوكيل وزارة الشباب و الرياضة المدعو عبد الهادي محمد خير و التي كان نصيبها ما لا يقل عن 5% في كل تذكرة ،،،
أعلنت السلطات السودانية أنها خصصت مبلغ 3,000 دولار أمريكي لأي مشارك يحرز ميدالية ذهبية في حين أن المبلغ الحقيقي المعلن (و يعرفه العالم أجمع) الذي خصصته اللجنة الأولمبية القطرية المنظمة مبلغ 5,000 دولار أمريكي لكل لاعب. وقد تم اكتشاف ذلك و نُشِر في بعض الصحف السودانية و القطرية ،،، الحمد لله خابت آمال السلطات السودانية التي أعلنت الخبر فقد حصل السودان علي (صفر ميدالية ذهبية) ،،،
تتحدث المجالس أيضا أن الجهات المسئولة عن البعثة في السودان كانت و قبل الحضور للدوحة تتصل علي سيادة اللواء ركن عبد العال محمود إبراهيم رئيس إتحاد ألعاب القوي و نائب اللجنة الأولمبية السودانية دون جدوي للمشاركة في إعداد البعثة و المساهمة في تذليل العقبات التي تواجهها هناك و بالذات المشاركين في ألعاب القوي (بحكم منصبه) و لكنه كان (لأمر في نفس يعقوب) متواريا عن الجميع لا يرد علي إتصالاتهم المتواصلة، و إن رد علي مضض، يتعذر بأنه مشغول في القيادة العامة و ما شابه ذلك و كأن الأمر لا يعنيه ،،، فوجئ الجميع بأنه تحت ضيافة اللجنة الأولمبية القطرية المنظمة في أحد الفنادق الراقية بصحبة زوجته الكريمة و يتقاضي نثريات 600 دولار يوميا ليس بصفته أحد رعاة البعثة السودانية و إنما كحكم مراقب ،،، فمثل هؤلاء المسئولين بدلا من أداء واجبهم الوطني في سبيل تقوية و تدريب أبطالنا ليرتفع رأس السودان عاليا علي كتوفهم ،،، فهم يعرفون جيدا من أين تؤكل الكتف ،،،
يدور في المجالس أيضا أن اللجنة المنظمة تقوم بصرف نثريات لكل المشاركين (تقدر بحوالي 100 دولار يوميا تقريبا) إلا أن أفراد البعثة السودانيين لم يستلموا غير 100 دولار فقط لكل مشارك طوال فترة بقائهم بالدوحة (فإذا صح ذلك) هل يعلم المشاركين بحقهم في هذه النثريات؟ و أين ذهبت النثريات التي كان من المفترض أن يستلموها علي مدار أيام البطولة؟ و يا تري من هي الجهة التي كانت تستلمها نيابة عنهم؟ مجرد أسئلة بسيطة تحتاج لإجابات شبه مستحيلة ،،،
إشتكي العديد من المشاركين من عدم إهتمام وزير الشباب و الرياضة بالبعثة و إعدادها و بدلا عن ذلك كلما يحاولوا مقابلته أو الإتصال به يجدوه مشغولا في الدفاع الشعبي و غيرها من كواليس الإعداد للحرب و القتل (التي تمثل المكان الطبيعي له كأحد أبرز الدبَّابين الذين لديهم تاريخ حافل في جرائم الحرب و الإبادة)، و كلما سمح به وقته الثمين هو إلقاء خطاب مغتضب في إحتفال وداع بعثة السودان المشاركة في بطولة الدوحة بصالة هاشم ضيف الله بالعاصمة الخرطوم ،،،
جاء الإعداد للبطولة متأخراً لذلك فقد تموا العدد المطلوب من المشرفين علي الفِرَق المشاركة من موظفي وزارة الشباب و الرياضة الذين لا تتوافر لهم أدني شروط الخبرة في أيٌ من المناشط الرياضية الخاصة بالبطولة ،،، و قد كانت القرية الرياضية بالدوحة مخصصة لعدد من المشاركين من ضمنهم المشرفين إلا أن مشرفي البعثة السودانية بحكم وظائفهم في وزارة الشباب و الرياضة في السودان و بمجرد وصولهم الدوحة توجهوا لمجمع (أزدان الفاخر) و هو مخصص للشخصيات الكبيرة من الفنيين (الحكام + أعضاء اللجان الفنية ،،، إلخ) ،،، و قد أثاروا هنالك مشكلة و فضيحة كبيرة بإصرارهم علي الإقامة في المجمع الفاخر بدلا عن القرية الرياضية (بإعتبارهم موظفين كبار و رجال دولة) و نسوا أنهم في حقيقة الأمر جاؤوا (تمومة جرتق) و تسببوا في إزعاج بالغ للمسئولين و المقيمين هناك و هددوا بالإتصال بالسفير أو الوزير أو البشير بشحمه و لحمه (فقد كان موجودا وقتها بالدوحة) ،،،
أفادني أحد الأصدقاء من أبناء الجالية السودانية الشرفاء المتطوعين في البطولة العربية أن أحد الفنيين المكسيكيين سأله مستغربا (كيف تُحقق بعثة السودان هذه النتائج المتدنية و رئيس البلاد بجلالة قدره قد تكبد عناء السفر و المجئ ليشجع البعثة و يشد من أزرها ،،، و هو لا يدري أن البطولة العربية في وادي و حبيبنا المشير في وادياً آخر تماما ،،،
من المفترض مشاركة ٢٧ لاعب من منتخب زوي الاحتياجات الخاصة و بعد أن تم عمل كل الترتيبات لهم قبل الحضور للدوحة فوجئ بعض المسئولين عن الفريق أن الذين حضروا سبعة لاعبين فقط و لا أحد يدري كيف تم إستبعاد الباقين منهم ،،، علَّق أحد الحاضرين (ربما فاتتهم الطائرة) ،،،
كريمة رئيس إتحاد الرماية وصلت الدوحة كمشاركة وممثلة للسودان في الرماية ولكن برفقة (زوجها و إبنها البكر و علي حساب مخصصات البعثة) ،،، و كان من الممكن أن نجد لها العذر بإحضار زوجها (كَمُحرِم) و إبنها البكر لعدم وجود من يرعاه نيابة عنها في السودان (فكله يهون في سبيل الوطن) ،،، إلا أن الكريمة إبنة الكريم (المسئول الرياضي المخضرم) قد نسيت معدات الرماية في السودان و حضرت بدون معدات و بدون أدوات تدريب ،،، حاول المسئولون في الدوحة جاهدين إيجاد بندقية مناسبة لها و لكنهم كل ما يأتوا ببندقية من البنادق المعتمدة في البطولة تقول (أول مرة أشوف زي دي ،،، ما بَعرِف ليها) ،،، و الحمد لله (و هي تُشكر كثيرا علي ذلك) أن إستمتعت هي و زوجها الفاضل و إبنها البكر ربنا يحفظه بحضور حفلتي (الافتتاح والختام) و لا تهم المشاركة في المنافسة التي إعتذرت عنها لتلك الظروف القاهرة التي مرت بها بعد أن قالت (المهم النية و إنشاء الله يكون في تحضير كويس المرة الجاية ونجيب العائلة الكريمة كلها) ،،، و في الغالب الأعم أن البندقية المنسية بالسودان هي من غنائم معركة شيكان زمن الثورة المهدية خاصة و أن المشاركين في بطولة القوس قد جاؤوا للبطولة (كالهنود الحمر ينقصهم الريش و الخيول الجامحة و الألوان) و هم مدججين بالأقواس الخشبية القديمة (النشَّاب) والتي تُرِكَت و عفي عليها الزمن و تجاوزتها تكنولوجيا البطولات العالمية و الإقليمية منذ تسعينيات القرن الماضي و أصبح يستخدم بدلا عنها ضروباً عدة من الأقواس الحديدية المتطورة مختلفٌ ألوانها و أشكالها.
في رد علي سؤآل لبعض المسئولين عن فريق السلة عن النتائج المخزية التي حققها الفريق السوداني أفادوا بأن (السبب كلو في الإنفصال لأنو أخواننا الجنوبيين مشوا وخلو الفريق) ،،، كم هي محزنة كارثة طغمة الإنقاذ و محنتهم (بترول و لاعبين سلة مرة واحدة) ،،،
الاتحاد السوداني للمصارعة لم يشارك في المصارعة الرومانية و إكتفي بالمشاركة في المصارعة الحرة و أيضا بلا جدوى و عندما سئل رئيس الاتحاد السوداني للمصارعة من قبل أحد الإعلاميين أجاب (الشباب ديل ما متعودين على اللعب في الفرشة المخصصة للعبة و برضو ما متعودين يلعبوا في الحلقة الخشبية ،،، ديل متعودين بلعبوا هناك في الواطة وفي التراب ،،، يعني عايزين اللجنة المنظمة توفِّر ليهم (دَلَجَة) ،،، عشان يتمرمطوا فيها أصلو هم متعودين علي المرمطة ،،،
ملاحظ أيضا أن المشاركين في كرة اليد و السلة غير متعودين علي الصالات الحديثة التي تتميز بها البنية الرياضة القطرية الحديثة المتطورة و المجهزة وفقا لأعلي المقاييس العالمية ففي تعليق لأحدهم (و الله التقول لاعبين مع كدايس الكورة مما تضرب بيها الواطة ما تعرفها مشت وين) ،،،
و صل حِس الإنهزامية و الخيابة و عدم المبالاة بفريق تنس الطاولة و هم يتشاطرون أطراف الحديث فيما بينهم (والله المصري طقطقني جنس طقطقة) ،،،
تقتضي القواعد أن يكون في فريق منافسات كرة القدم حارسين مرمي في قائمة كل فريق مشارك (و هذا أمر طبيعي و معروف للجميع) ،،، لم يتوافر لدي المنتخب السوداني غير الحارس أكرم الهادي (حارس فريق المريخ) فقاموا بتسجيل حارس منتخب كرة اليد في القائمة حتى يتسنى لهم المشاركة ،،،
هنالك نوعين من منافسات الكرة الطائرة التي تختلف في قوانينها و قواعدها و المهارات المطلوبة فيها (كرة الرمل + الكرة الطائرة في القاعات) و رقم ذلك فقد شارك السودان بفريق واحد في الإثنين ،،،
بعثة الفريق الأول لكرة القدم التي وصلت الدوحة تتكون من 27 شخص من ضمنهم واحد فقط مسئول عن المهام الطبية (يعالج منو ويخلي منو) ،،، (بتاع كلو) ،،،
منتخب اليد الله يديهم العافية ما قصَّروا ،،، (الفريق كان ناقص و تَموهوا من فريق الفروسية) فقد حقق نسبة نجاح (ما بطالة ٩٪) ،،، و للسودان الشرف أن دخل الفريق موسوعة جينيس للأرقام القياسية بجدارة كصاحب أكبر خسارة (مع المنتخب الجيبوتي) ضد منتخبي مصر و البحرين علي التوالي فقد كانت النتيجة (٥/٥٨) ،،،
عند وقوع أي لاعب سوداني في القرعة مع أي لاعب من دولة أخرى يقوم باقي المدربين من الدول الأخري بمباركة الفوز المسبق للاعب الذي أوقعته القرعة ضد اللاعب السوداني ،،، (أصبح السودان مسخرة) ،،،
في فقرة الملاكمة سقط الملاكم السوداني المدعو (قدورة) أرضا في الجولة الأولي من أول بوكس من نظيره المغربي، و ظل الكوتش يهزه و يستجديه للنهوض لإكمال المباراة (قدورة قوم السودان منتظرك ،،، قدورة قوم تلفزيون الجزيرة قاعد يصور ،،، قدورة ياخي عليك الله قوم عشان ترفع رأس السودان فوق) فأجابه قدورة و هو لا يقوي علي النهوض (ياخي أنا راسي ما قادر أرفعه أرفع رأس السودان كيف ،،، عليك الله يا كوتش جيب لينا الإسعاف و خليهم يكتِّروا الأوكسجين) ،،،
تم حجز العديد من المشاركين في البطولة في مطار الدوحة لفترات طويلة عند وصولهم و منعوا من الدخول لعدم وجود إذن الدخول (الفيزا) ،،،
تعود المنظمين للبطولة و بشكل يومي علي الحالات المتكررة لضياع أفراد البعثة السودانية كل يوم في القرية الرياضية المخصصة لاستقبال الضيوف المشاركين في البطولة و كل يوم يقوموا بتوصيل واحد ضائع ،،،
عندما أحرز منتخبنا لألعاب القوى الميدالية الفضية في نهائي تتابع رجال 4×400 متر و كذلك في سباق تتابع سيدات 4×400 تذكرت طرفة الملاكم الذي دخل أحد المطاعم و علّق معطفه في المكان المخصص لذلك بالقرب من مخرج المطعم و كتب في ورقة صغيرة وضعها في مكان بارز فوقه خوفا عليه من السرقة (بطل العالم للملاكمة) و عندما عاد بعد أن إنتهي من وجبته الشهيِّة و جده قد إختفي و وضع سارقه ورقة في مكانه مكتوبٌ عليها (بطل العالم للجري) ،،، (و مع الإعتذار لأبطالنا المشاركين في الجري من الرجال و السيدات الذين و برغم كل هذه المخازي حازوا بجدارة تستحق التقدير و الإشادة علي الميدالية الفضية و تأهل منهم البطل رباح يوسف إلي أولمبياد لندن 2012 بإحرازه زمناً قدره 87.45 ثانية في سباق 400 متر عدو) ،،، إلا أن نجاحنا (النسبي) في مسابقات الجري في الحقيقة يتناسب مع واقع بلادنا و يعبِّر عنه بصدق حيث أصبح الكل في حال جريٌ دائم ،،، ما بين الجري وراء لقمة العيش الكريمة للغالبية الكادحة من جماهير شعبنا، و الجري وراء المناصب و الكسب الحرام و الثراء الفاحش و رغد العيش و حب المظاهر و التفاخر و الإبتذال الفاضح لكل قيم شعبنا من قبل الطغمة الحاكمة و أزيالها و القائمين علي شئون أجهزتها الحكومية المترهلة ،،،
إلي متي يحتمل السودانيين هذا العبث ،،، و هذا الخزي و العار ،،، و كل هذا الدمل في أجسادهم ،،،
الهادي هباني
alhadihabbani@hotmail.com
تم إضافته يوم الثلاثاء 27/12/2011 م - الموافق 2-2-1433 هـ الساعة 12:20 صباحاً
,والله فضائح مخزية ومخجلة النا س ديل والله ما هاميهم اي حاجة غير جيوبن الابت تتملي دي ولا هاميهم السودان ولاحاجة لانو وطنية مافي الناس ديل جايين من وين انا ما عارف لك الله يا وطني الله يخلصنا
[الاستاز ادم ابراهيم (المانيا)] [ 22/01/2012 الساعة 4:28 مساءً]
المهازل دية مش اول مرة لكن نتمني من الله ان يخلص العباد والبلاد من هزه المجموعة الفاسدة وياتي لنا بوطنيون يدركون قيمة الوطن فوق الجميع
[أبو أحمد] [ 17/01/2012 الساعة 10:44 صباحاً]
بلاغ الى النائب العام .................
مطلوب منكم التحقيق وبشفافيه كامله فى هذه المهازل
[ابن السودان البار] [ 12/01/2012 الساعة 2:54 مساءً]
[ابن السودان البار] [ 10/01/2012 الساعة 10:31 مساءً]
هواة سباق الخيل في العالم يهتمون ويصرفون علي غذاء خيولهم اكثر مما يصرفونه علي غذاء أسرهم لأنهم ليس بالغباء ليراهنوا علي الحصان الجائع؟؟؟ والجهل مصيبة كبيرة ؟؟؟ كل الذين يهتمون بالرياضة في السودان لا يثيرون قضية التغذية للرياضيين ولايهتمون بها ويتركونها للعفوية موية فول ويكة اهو كله أكل والسلام ؟؟؟ الرياضة علم وصناعة وبزنس واساسها الغذا ء الآدمي المدروس؟؟؟ فكل رياضة لها غذاء خاص يضعه علماء تغذية متخصصين أكفاء؟ والغذاء يبدأ من رحم الأم ؟؟؟ فالأم الجائعة او التي ينقص غذائها بعض الفايتمينات او المعادن ( مثل حامض الفوليك او الحديد ) قطعاً سوف تنجب طفلاً هزيلاً ومشوهاً لا جدال في ذلك ؟؟؟ وبعد ذلك لا ينفع الغذاء حيث يستمر التشوه معه طيلة حياته؟؟؟ كما ان زواج الأقارب المنتشر بالسودان ينتج عنه جيل ضعيف البنية حاملاً للأمراض الوراثية ؟؟؟ والرسول صلي الله عليه وسلم الأمي حذر منه حيث قال ( تخيروا النطفة فأن العرق دساس ) وفي قول آخر ( اغتربوا لا تضووا) واغتربوا : اي ابعدوا عن ذوات القرابة وتضووا: اي تضعفوا وفي قول آخر ( تخيروا لنطفكم وأنكحوا الأكفاء وأنكحوا اليهم ) وهذا تشجيع للفحص قبل الزواج ؟؟؟ ان الأجيال الجديدة تتغزم ؟؟؟ وطالب الجامعة الآن من حيث الحجم يعادل طالب الوسطي في الستينات ؟؟ من هنا نجد ان سؤ التغذية وضعف النسل نتيجة زواج الأقارب ينتج عنه جيل هزيل لا يرجي منه تحقيق أي نتائج مرضية في اي مجال رياضي ؟؟؟ قد تكون هنالك فلتات نادرة تظهر احياناً في بعض الرياضات كالجري حيث حقق بعض السودانيين ( الكشيف كاكا ) نتائج مشرفة بعد ان اقتربوا في امريكا وغيرها حيث الغذاء الآدمي المكثف والمدروس؟؟؟ عندماكان السودان بخيره ايام العمالقة سبت دودو ومتوكل وابراهيم كبير جكسا برعي ابراهومة وعمر عثمان وغيرهم كان الفريق السوداني له صولات وجولات تحسده وتخافه كل الدول العربية والأفريقية وتعلموا منه ؟؟؟ اما الآن في عهد الأنقاذ عهد الجوع والفقر والمزلة وأكل موية الفول والويكة فلا تتوقعوا اي تطور في الرياضة او اي منحي آخر ؟؟؟ وطبيعتنا كسودانيين عاطفيين دائماً نحب ان نحلم احلام وردية ونتفائل بدون ان نحسبها صاح ونحبط بعد ان نهزم ونحاول ان نجد شماعة لنعلق عليها فشلنا ( عدم الأمكانيات ؟ الحكم خاين ؟ المدرب ما نافع ؟ الأدارة فاشلة الخ ) ونبعد تماماً عن التحليل العلمي المفيد ؟؟؟ في احد الليالي في الخرطوم بحري كنت اتجول مع عديلي لشراء بعض المأكولات وعديلي هلالابي قاطع صادفنا احد لعيبة الهلال الكبار من المنتخب القومي سلمنا عليه وسأله كعادة السودانيين مالك بي جاي ؟ اجاب جعان وبفتش علي أكل ؟ اتشملل عديلي واشتري له فرخة كاملة مع خبز وسأله علي وين ؟ قال ليه ماشي معسكر الفريق القومي بفيلا ببحري فدعاه للركوب لتوصيله وعندما وصلنا الفيلا قال يا جماعة كدي انتظروا شوية ؟ فتح باب السيارة وجلس ومسك الفرخة وعضها بدون رحمة الي ان تحولت الي هيكل عظمي ؟ وقال لو دخلت بيها المعسكر ما حا يخلوا لي جناح واحد ؟؟؟ فتعجبت وقلت في نفسي السودان سلة غذاء العالم لا يستطيع اشباع 22 لاعب مختارين من كل السودان ليمثلوه ويرفعوا علمه بين الأمم مع عزف سلامه الجمهوري ؟؟؟ فنرجوا ان لا تتفألوا كثيراً حتي لا تحبطوا عندما تروا فريقكم الهزيل يتحرك كالأشباح والفريق المنافس يسجل الأهداف دون عرق ودون ان تتسخ فنائله ؟؟ ؟ فلننسي الرياضة الآن ونثور ونعمل علي ازالة هذه العصابة الفاسدة التي اهانت السودان ورضيت له الهوان في كل محفل وزمان ؟؟عصابة الكيزان اللصوص مقتصبي الرجال والنساء قاتلهم الله ؟؟؟
[ابن السودان البار] [ 11/01/2012 الساعة 2:03 مساءً]
الأستاذ كمال الهدي تحياتي البرازيل من ضمن افضل عشرة إقتصادات في العالم والفقراء فيها لو أكلوا من الزبالة فسوف يحصلوا علي البروتينات والمواد اللازمة لبناء اجسامهم وحرام تقارنهم بأي دولة في العالم الثالث ؟؟؟ السودان به مواهب كروية نادرة ولكن لا يجدوا الأهتمام والعناية اللازمة من غذاء مدروس وتدريب مكثف الخ في احد المرات قدم الي الأمارات فريق تحت 17 سنة ابهر المتفرجين بفنياتهم وتحكمهم ونضوجهم الكروي ؟؟؟ النيجيريين يأكلون السمك الناشف الغني بالبروتين وكيلو السمك الطازج به حوالي 80% مياه وهذا يعني انه اذا أكل الواحد 200 جرام سمك ناشف فكأنه اكل 4 كيلو سمك ؟؟؟ والكل يعرف قوة النيجيرين وسكان غرب أفريقيا من غانيين وغيرهم ؟؟؟ اقوي بشر علي وجه الكرة الأرضية هم الرياضيين الأميركان لأنهم خلطة جينية من البيض والسود ( يعني مش خلطة اقارب ) من غرب افريقيا ويعيشون في اغني دولة بالعالم حيث الغذاء الآدمي المدروس متوفر بكميات اعلي من اي بلد آخر ؟؟؟ لاعبي الباسكت بأمريكا متوسط اطوالهم يفوق المترين ويتمتعون بأعلي نسبة للكتلة العضلية في جسم الأنسان ؟؟؟لا جدال بأن اساس اي رياضة الغذاء الصحيح المدروس وبتوقيت معين ؟؟؟؟ يعني لا يمكن تأكل وجبة دسمة وتلعب مباشرةً ؟؟؟ واي شخص يقول غير ذلك فهو كمن يراهن علي الحصان الجائع ؟؟؟ من المفارقات العجيبة انه الأسد يأكل في الوجبة الواحدة حوالي 30 كيلو لحم غزال طازج والكيلو منه بسعر 20 دولار يعني وجبته ب600 دولار ؟؟؟الدب في القطب الشمالي يأكل حوالي 20 كيلو سمك سالمون طازج في اليوم وكيلو سمك السالمون المثلج ب 25 دولار يعني ان وجبته ب 500 دولار ؟؟؟ في ايامنا بالسودان اي في الخمسينات وحتي اواخر الستينات ما كان احد يتكلم في الأكل لأنه كان متوفر بكثرة ولم يكن احد يعرف البوش ؟؟ وكان المصريين يتندرون علي السودانيين ويقولوا : ( ياعمي دول بيفطروا لحمة) العقل البشري يعادل عقل الحيوان ملايين المرات فهل يعقل ان يجد الدب والأسد ما يغذية ويجوع الأنسان بالسودان ولا يستطيع ان يجد وجبة آدمية واحدة في اليوم انه ظلم الأنسان لأخيه الأنسان المتمثل في حكومة الكيزان الفاسدة؟؟؟ وحتي الكيزان ذوي الكروش البارزة والمليئة من مال السحت تدل علي انهم لا يعرفون اصول الغذاء الصحيح حيث يكثرون من اللحوم الحمراء والدهون وتصيبهم امراض القلب والنقرس وغيره وعلي سبيل المثال رئيسهم العسكري الذي كان يجب ان يكون ذو لياقة بدنية عالية يحتزي بها تجده لا يستطيع المشي بسهولة حتي ناهيك عن المشي برشاقة وجسمه يمتد في كل الأتجاهات من الأمام والخلف ؟؟ السودان الذي حباه الخالق بالأراضي الخصبة والمياه العذبة من اكبر نهر بالعالم ومن السماء ومن جوف الأرض ؟؟؟ يجوع انسانه الذي يشكو الفاقة والعطالة وحكامنا يأتون بالعمالة من الخارج ؟؟؟ لي اقتراح عملي وهو ان تملك الحكومة كل نادي قطعة ارض زراعية علي النيل لعمل مززعة لكل نادي لينتجوا منها الغذاءالمطلوب وما يفيض يعرض بالسوق لزيادة دخولهم ؟؟؟ وهذا بدلاً من تبديد العملات الصعبة لشراء اللأعبين الأجانب ؟؟؟ هذا الأقتراح سهل تضبيقه لكنه يحتاج لحكومة وطنية يهمها السوداني وصحته وكرامته ؟؟؟ وفي ظل حكومة الكيزان اللصوص القتلة مغتصبي الرجال والنساء فلا اتوقع ان يخطر ببالهم مثل هذا العمل البناء قاتلهم الله ؟
[Ibrahim Adam] [ 09/01/2012 الساعة 8:06 صباحاً]
الأخ هبانى، و الإخوة قراء راكوبتنا الحلوة الباردة و ساخنة
أنا شاركت فى ماراثون حضارة النيل; و وقتها ما فى بطنى غير عدس معسكر الدفاع الشعبى المليان عطرون، و فطور نصف عيشة بمربة و كباية موية!!
المهم، الجرية كانت الساعة
[علي الكلكلي] [ 30/12/2011 الساعة 9:54 صباحاً]
هي دي عينة الشباب المنتظرنهم يقوموا بالتغيير !!!! افرحي بطول العمر يا حكومة
[ابن السودان البار] [ 29/12/2011 الساعة 2:31 مساءً]
الأستاذ الهادي هباني ما قصرت ونفخر بأمثالك الذين يقولون الحقيقة ولا يحبون المكابرة والتفاخر في الفاضي ؟؟؟ السودان كبقية الشعوب به العقول والمواهب في كل مجال ولكنه ابتلي بمجرمين ولصوص شرهين يتاجرون بالدين هم واصحاب البيتين السادة المنافقين الذين ابتلانا بهم الأستعمار لا بارك الله فيهم ؟؟؟والله الجنوبيين بختهم اتحلوا من عصابة اللصوص القتلة مقتصبي الرجال والنساء ؟؟ ورئيسهم أدلي بتصريح عظيم وهو ان من أوليات حكومته محاربة الفساد ؟ وخصص وزارة او ادارة لمحاربة هذه الآفة المتوقعة في بلد يبدأ من الصفر ؟؟؟ وفعلاً قبض علي بعض المسؤولين الفاسدين وتم تجريدهم من مناصبهم وما سرقوه؟؟؟ وفي سوداننا الفاسد يرقي ويمنح فرصة اُخري للسرقة ومقتصب السلطة المدعي التدين عندنا ينفي بكل بجاحة وأستخفاف بعقول الناس انه لا يوجد فساد وهو وإخوته وزوجاته كبار الفاسدين قاتلهم الله ؟؟ الجنوبيين صالحوا كل الأسرة الدولية بما فيها اسرائيل وليس لهم أعداء غير حكومة الرئيس الراقص خريان ما دريان ؟؟؟وما كفاه ان قتل منهم أكثر من مليونين ؟؟؟ ولو اشترك رياضيي هذه الدولة الفتية بالتأكيد سوف يحرزوا مداليات أكثر من بعثة هؤلاء اللصوص قاتلهم الله فأنتظروهم في المحافل الرياضية الدولية بعد ان يشتد عودهم في القريب العاجل لأن الآن لهم أوليات عاجلة ؟؟؟ وما اظن ان من بين أولياتهم بناء كنيسة تخليداً لأبو سلفا كير ؟؟وبناء مطار دولي قبل تكون عندهم شركة طيران محترمة؟ ومدينة رياضية قبل ان يكافح الجوع والمرض ؟؟
[طارق] [ 29/12/2011 الساعة 6:11 صباحاً]
يا نيام ياخ خليهو نايم والزيارات الكتيره مابتنفعو - عشان كده ما تكلم الناس لو عرفتو راجع متين - خليهو ياخ يرتاح لانو محتاجين ليهو فى منافسات الاولمبياد فى لندن ‘ خاصه انو ماكل اكسجين كويس -هو ما ذكى - الاكسجين ده لى الاولمبياد -تفتيحه وكده والمغربى ما فهمها
[نيام] [ 29/12/2011 الساعة 12:53 صباحاً]
قلت ليك عليك الله قدورة هسع راقد هناك و لا جاء
[هرون الرشيد] [ 28/12/2011 الساعة 7:55 مساءً]
نحن هذا حالنا يا استاذ كل مشاركة تمومة جرتق
الإختيار للمنافسة لم يكون بالأكفأ وانما بالأنفع
أظنك فاهم قصدي !!!!!!!!!!!!!!!!!!!!!!!!!!!!!!!!!!!!!!!
[ابو مصعب] [ 28/12/2011 الساعة 7:20 مساءً]
الأغرب من دا كلوا منتخبنا الأول راح يعسكر فى الدوحة وهاك ياتصريحات من مازدا ومن كابتن المنتخب كدي نشوف بكرة حاتعملوا شنو وإن غدا لناظره قريب
[حاتم] [ 28/12/2011 الساعة 12:45 مساءً]
وما لو ياجماعة انتوا ما فاهمين الشعب السوداني لسه راجي خير من البشير بعد 22 سنة من الهدم والخراب والبيسمع نشرة الاخبار الرئسية يقول السودان بيبقي احسن من اليابان شي جزيرة مقرسم قلب العالم وشي سكر النيل الابيض والاستثمارات الخليجية وغيره وغيره وانلناس مصدقة وتقول حاجة يقول ليك لو مشي البشير بيجي منو الصادق ولا الميرغني ، ونحن ياجماعة فهمونا انه نحن احسن شعب واحنا احنا لكن يا جماعة لما طلعنا بره لقيت نفسنا شعب ساذج ويتندر بنا الناس من سذاجة السوداني وكسله وبهدلته ياجماعة انا مرة في اكبر شارع في دبي لقيت سوداني لابس عراقي خفيف وسروال وطاقية وخاتي سفة زي دقار اللوري شوفوا المهزلة لانه كل الناس بتعتبر السوداني زي الشايفينه قدامهم ده وعلشان كده عادي البشير يحكمنا ويحكمنا كمان وكمان وقدام عيونا شايفين البلد بتتنهب وشايفين اخوان البشير بيقوا من اصحاب المليارات واسي وداد رمز الفساد عارضة بيت في الطائف للبيع بمبلغ 15 مليار ونحن نقرا الكلام ده ونقوم نتونس بيه من دون اي رد فعل تقول لي البشير ما يحكمنا.
[هندسة] [ 28/12/2011 الساعة 12:25 مساءً]
هو غايتو انا شايف انو برضو في فايدة لينا لانو الضحك الخلونا نضحكو زمن ما ضحكناهو وكلنا بندرك فايدة الضحك....
بعدين انا متفأل جدا جدا ... عسى ان تكرهوا شيئا وهو خيرا لكم
ما كفاياااكم رغي يا رجال واطلعوا من البيوت الزي الجحور اللابدين جواها وغيروا الحثالة الخانقانا ربع قرن خلاص نحنا النسوان فاض بينا...ولا الاحسن نطلع نحنا زي ما اتعودتو انو النسوان يعملوا كل حاجة...يخسي عليك يا زمان من رجال الزمن الاغبر دي...
[ahmed] [ 03/01/2012 الساعة 8:07 مساءً]
والله ما صدقت الا انتي انتوا النسوان اخير منهم رجال اخر زمن ديل والله احسن يبدلوا بيهم عده (بكسر العين)
[عبيد] [ 28/12/2011 الساعة 11:03 صباحاً]
سئل رسول الله متى الساعة قال إذا ضيعت الأمانة فإنتظر الساعة حتى يقال إن في بني فلان رجل أمين .. مساكين فاكرينها فهلوة وهم بيلعبوا الدور أما الانتباهة من الغفلة سيتأتي عند اللحظة الأولي من الموت .. فكشفنا عنك غطآءك فبصرك اليوم حديد
[JAMAL] [ 28/12/2011 الساعة 10:21 صباحاً]
ياجماعة أتمنى لومرة واحدة أسمع اعتذار من مسئولينا بعدم المشاركة فى الدورات
يمرمطوا البلد واسم البلد مامهم __ هذا هو حالنا _ والناس تحصد الذهب ونحنا حصادنا
العشم _ رحم الله زيدان ___
[ود الشيخ] [ 28/12/2011 الساعة 9:52 صباحاً]
نشكر الاخ هبانى على الموضوع (الفضيحة) الذى يجب ان نتوقف عنده كثيرا لانو بصراحة قبل دا ماشفنا زى دا خالص
انا كنت احد المتابعين من القرب وخصوصا مباريات المنتخب التلاتة من داخل الاستاد والالعاب الاخرى من خلال التلفزيون وبكل اسف بعد انتهاء اى من هذا المباريات يخرج جميع السودانيين من الملعب وترى فى وجوههم الحسرة والاسى ويلعنون اليوم الذى صارو فيه سودانيين ولكن بالمقابل انا لاالقى اللوم على اولائك الشباب الذين شاركو ممثلين للسودان فى تلك الدورة ماذا ننتظر منهم وهم قادمون على فلاى دبى فى رحلة استغرقت اكثر من 12 ساعة ماذ ننتظر منهم وهم يتقاضون 100 دولار فى كل الدورة بينما يتاقضى الاخرون 100دولار يوميا. ماذا ننتظر منهم وهم اتو الى الدوحة بملابس وازياء ومعدات من جيبهم الخاص.ماذا ننتظر منهم وهم يستاجرون الصالات للتدرب عليها من مالهم الخاص.ماذا ننتظر من شخص الدولة لم تصرف عليه مليما واحدا للاعداد.ماذا ننتظر من اتحادات ليس لهامكان او غرفة للتجتمع فيها وتناقش قضاياها وماذا ننتظر من اتحاد ابعد من المشاركة بسبب تسديد رسوم للاتحاد العربى تبلغ 3 الف دولار فقط منذ اربعة اعوام وماذا وماذا
وبعد كل ذلك ياتى رئيس البعثة وهو غاضب ويهدد ويعد بانه سياخذهم مباشرة الى المطار على اول طائرة بعد تلك النتائج المخزية واماحيديهم حتى فرصة للتسوق ...تسوق؟؟؟؟؟ من وين ؟؟ وبى شنو ؟؟؟ وانت اساسا اديتم حاجة عشان يتسوقو ... ياخى لو كان الاكل والشراب عليكم الناس ديل كانو جاعو وماتو من اليوم التانى .... قال تسوق قال
باختصار... شبابنا ديل لو لقو 10% من البتصرف على غيرهم كان عملو افضل من كدة مليون مرة .. بس مامنهم ...من العليهم
[ashref] [ 28/12/2011 الساعة 6:22 صباحاً]
الفساد اصبح قاعده ولابد للفساد ان يولد خراب
والخراب اصبح خراب مبادى والمبادى عندما تخرب يخرب جيل كامل
لهذا لا اعتقد ان الدخل فى السودان يطلع تانى
والله يجازى الكان السبب
[ابوشيبه] [ 27/12/2011 الساعة 8:55 مساءً]
الاغرب من كده عقب مباره فلسطين شاهدت صديقى واقف مع حارس كره اليد قلت ليه بتعرف دة قال لى دة شغال معاى 3سنه فى السودان قبل ما اقترب لمن سالت من شغله عرفت انه بتاع ساوند ؟؟؟؟؟؟ المشكله ما فى الساوند المشكله فى السهر والرياضه ما بتلمو
[Zingar] [ 27/12/2011 الساعة 8:51 مساءً]
يا أخ أبوايه... يعنى الحاجه ما تكون صاح إلا لما تسمع بيها إنت....شئ عجيب والله.
دعنى أقول ليك يا أخى الكريم ومن خبرتى بمجال الطيران من مطار الخرطوم ومطار الرياض..السودانيين هم الوحيدين البروحوا فى صالات السفر من دون الجنسيات الأخرى وذلك نتيجه للدروشه بتاعتنا...ولكن دى مره كان لها فائده لصديق لى فى حادثة الترايستار الأتحرقت فى مطار الرياض وصديقى كان هو الناجى لأنه كان جالس فى البوابه الغلط.
يا راجل نحن بنروح فى ليلة المولد فما بالك بالقريه الأولمبيه.
[ابوشريف / الدوحة] [ 27/12/2011 الساعة 8:30 مساءً]
نزيدكم من الشعر بيت ... هل تعلموا أن المنتخب السوداني الاول وصل قبل فترة في معسكر ولا توجد معه كرة قدم .. وقاموا بطلب كور حتي يواصلوا التمارين .. واخونا كابت حسن دقدق ما قصر واحضر لهم مجموعة من الكور ليواصلوا برنامجهم التدريبي ,,
والان وصلوا الي الدوحة في معسكرهم الحالي وقام بعض المسئولين باحد الاخوة اللاعبين القدامي الموجودين في الدوحة وطلبوا منه أن يجهز لهم ملابس ومسلتزمات المعسكر (( اين اتحاد الكرة والمسئولين ))
الظاهر البلغ استشري في كل مكان في السودان ابتداءا من حكومتهم حتي الرياضة ,, وهذا ما ثبت في النتائج الاخيرة التي حققوها في الدوحة ,, فضحونا امام الكبير والصغير والله لو كان اعتذروا لكان افضل ,,, والكل غير لسودانيين بسال لماذا صار السودان بهذ المستوي الرديء .. أما الصحف الرياضية التي يسيطر عليها المصريين فقد أساءوا لنا اساء لن يتحملها احد ,, ولكن اين الصحف السودانية التي بامكانها الرد علي هذا الاستفزاز المتعمد ..
لكن المشكلة هي الحكومة بكل صراحة ,, ولما دخلت في الرياضة وقاموا بتزوير الانتخابات داخل اتحاد الكرة ,, فقد كان طبيعيا ان نخرج بهذه النتائج ,,
الكلام كثير ولا اريد الاطالة .. فالتحية لكاتب هذا المقال ,, وكما ذكر لما اخفي اعظم ,,, فاليخرج المؤتمر الوطني من الرياضة واليتركها كما كانت ..
ولنا لقاء عن المعسكر بعد نهايته ,,
[أسوسا] [ 28/12/2011 الساعة 8:17 صباحاً]
أنا أوافقك في كل ما قلته بس حاجة واحدة .. الجرائد السودانية تدافع عن شنو .. تقول شنو .. عايزها تكضب ؟؟ أنت بقلمك كتبت اللي كتبتو.. عايز الجرائد تكابر .. زي ما قال أخونا هبابي الحق وأنكر أنو دة يمثل السوداني وبالتالي ورفع رأسنا فوق بقول الحق .. حقو إنت تحمد الله أنو جرايدنا سكتت لا أحسن توري للناس كضبنا كمان.. كفاية الحقارة الجابوة لينا حكامنا..
[صلاح مصطفى] [ 27/12/2011 الساعة 8:00 مساءً]
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
حسبى الله و نعم الوكيل
[الرئيس القادم للسودان] [ 27/12/2011 الساعة 7:05 مساءً]
اول حاجة يا جماعة الموضوع ما موضوع رياضة الموضوع موضوع الحاصل في البلد عامة وعشان الوضع دة يتغير لازم الناس تعمل الحاجات دي :
1- لانو نحن ربنا ادانا مخ وقالو الواحد بتعظ من البشوفو في غيرو موضوع ثورة وما ثورة دة بخرب اكتر من ما يصلح
الحل الوحيد انو نعمل جمعة اسمها جمعة الدعاء اي سوداني في اي مكان يخلص النية وكلنا ندعو ربنا بي نية صافية انو يخلصنا من الحكومة دي وربنا ما بخيب ظننا
2- بعد ما يمشو الجماعة ديل دايرين لينا زول جديد بس بكون بخاف الله وزول شغل بس يعني والله نحن والله ما دايرين زول يكورك لينا والاسلام وما الاسلام نحن اكتر شعب بعرف الله دايرين زول يشتغل لينا عملي لانو مليانين كلام لي حلقنا
3- انا شخصيا لو كنت رئيس والله لا بحارب لي معارضة ولا بشتغل بي زول شغل بس الناس كلها تشتغل بس ولو في زول معارض جاي خاشي الخرطوم والله نستقبلو بي طورية وهو اصلا ما حا يلقانا فاضيين ولا نحن زاتنا فاضيين ليهو
4- دايرين زول بخاف الله يقول لي الوزير انت مرتبك زييك وزي اي زول واحد ويكونو ساكنيين بين الناس عشان الشيء البحصل للناس يحصل ليهم
5- ولازم يكون في منافسة بين الولايات في الانتاج والنهضة العمرانية ما تقول لي ولاية ما عندها دخل والله الناس لو اشتغلت واخلصت النية والله ربنا بوفق
6- لازم مفهوم الناس كلها يتغير انو مافي شيء بجي بالساهل يعني ما اي حكومة في الدنيا بس تنتظر موضوع البترول دة لازم يكون في بدايل
7- مخصصات الرئيس زاتو ما تكون غير عن باقي الناس لانو الرئيس دة ما ملك جاي من السماء دة زول زيو وزي اي زول
لو ما عملنا الحاجات دي حا نكون طول عمرنا بي الحالة دي
والله الموفق
[ابوايه ] [ 27/12/2011 الساعة 6:27 مساءً]
الاخ الهادي كلامك كلو يعتبر صح بس الجزئية بتاعت الروحة في القرية الرياضية دي ما صاح لاني ما سمعتا بيها لكن كلامك بعتبرو ع المستوي العام لكن ع الصعيد الشخصي حدث ولا حرج وما في داعي لنشر الغسيل اكتر من كدا وبي اختصار هي خربانا من كبارا والسودان ما تفوم ليهو قايمة لي يوم الدين لو ما الكيزان مشو بي ترابيهم دا ير اوضح حاجة وفي بالي النكتة البقنع الديك منو انا شاركتا في الالعاب الفردية وطبعا كل العاب ما فيها ولا حكم سوداني واحد وفعلا انطباع انو اي سوداني يعتبر كبري دا سايدة وبي درجة كبيرة جدا بالاضافة للدول الذكرتها ودا اتنفذ فينا بي امتياز وشخصيا متفائل انوالكيزان يمشو وتجي اتحادات مسئولة وبتفهم في الرياضة صدقوني ما حنخلي ولا ميدالية اكرر تحياتي وتاني ارجع لي مصدرك ما ف زول راح وزي ما قلتا زول دي كرهونا ليها
[356مدحت عروة] [ 27/12/2011 الساعة 6:16 مساءً]
الانقاذ عار على السودان!!!!!!!!!!
[بوكش ] [ 27/12/2011 الساعة 5:52 مساءً]
والله انا الشي المحيرني انو مازال يوجد ناس في الانقاذ ويتحدثو عن التنمية واستقرار البلد والامن . ياخ الناس ديل ما بقرو الحقائق الكل يوم بتتكتب دي نسال الله ان نشوف فيهم في الدنيا قبل الاخره واليوم قبل غدا .
[اسامة شرف الدين ] [ 27/12/2011 الساعة 5:28 مساءً]
إلي الاخ الولي النوبي ....أنا معاك 200%.....فضوها سيرة وتمو القسمة .....الجلابة ناس جعانيين وكسلانين وماعندهم شغلة غير النضمي بس ...نحنا في دارفور برضو ما بنحب الفشل ...خلونا نرجع زي ماكنا قبل سنة 1916 ....دارفور الكبري ترجع زي ماكانت عظيمة ومضيافة وقوية وكريمة وشجاعة وشهمة....خلونا من نقة عرب وماعرب دي كفانا مرضتونا معاكم بمهازلكم
[كان لنا وطن] [ 27/12/2011 الساعة 5:06 مساءً]
والله ضحكت حتى اغرورغت عيناي ....
... قدورة ياخي عليك الله قوم عشان ترفع رأس السودان فوق) فأجابه قدورة و هو لا يقوي علي النهوض (ياخي أنا راسي ما قادر أرفعه أرفع رأس السودان كيف ،،، عليك الله يا كوتش جيب لينا الإسعاف و خليهم يكتِّروا الأوكسجين).....
هذا فقط يكفي بالهادي هباني... انها المأساة المستمرة
ولكن المأساة الاكبر منها ان بعض مسؤولي البعثة ظلوا وكالعادة يدافعون عن ما سموه انجازا .. فقد اصابني الاستياء الشديد وانا استمع الي احدهم في الاذاعة الرياضية وهو يقول .. ما مشكلة المرة دي جبنا ميداليات برونزية المرة الجاية حتكون فضية وبعدها نجيب الذهبيات .... او هكذا قال لافض فوه...!
نفس ما يقوله اعضاء بعثة الحج كل عام وهم يغالطون طلوع الشمس .. مع الاختلاف في الحالتين..!
ابدوي الخير ادريس الذي قاتل وزمرته من اجل الفوز بالاتحاد دون ادنى مقومات الا الرغبة في التكويش على الحياة قاطبة في السودان باسم المؤتمر الوطني .. ماذا يفهم ومن معه في مثل هذه الدورات...!؟
شئ آخر ..
ما هو سر قيادة العساكر للنشاط الرياضي في السودان؟
هل الدول المتقدمة يقودها مرافيت الجيش ام المتخصصون؟
ماذا اقول ...
الفاتحة في وطن كان اسمه السودان ... ويلا قسموه خلونا نخلص
[واحد] [ 27/12/2011 الساعة 3:51 مساءً]
ياجماعة ناسنا ديل ماتابعين للاتحادات الدولية للعبات المشاركين فيها ولاشنو؟؟؟
شنو البندقية اول مرة تشوفها والارضية فى السودان تراب ______ الخ !!!!
ياخى نحنا عايشين فى عالم تانى __ وللاسف اغلب السودانيين عاجبهم الوضع !!!!!
[واحد] [ 27/12/2011 الساعة 3:43 مساءً]
ناس الجرى وراء المناصب ماحيحرزوا الذهبية لانو تكوينهم الجسمانى مابيساعد
كروش ومؤخرات تفوق النساء__
اما الجارين وراء اكل العيش فهم الجديرين بالفوز زى الجماعة الفازوا __ كتر خيرهم
[أبو محمديحيى] [ 27/12/2011 الساعة 2:24 مساءً]
ما عندنا حظ ،،، لو أن المنظمين للبطولة أضافوا إليها رياضة رقص رؤساء الدول المشاركة كنا أحرزنا الميدالية الذهبية خاصة أن فريقنا كان حاضر و جاهز للمشاركة،،،،، على كل حال يا أخ هباني أحلى ما قلت لا ينفع غير الخلاص الشامل من هذه الطغمة المتربعة على الجزء المتبقي من السودان ؛ تمر علينا ذكرى الإستقلال وقد ضاع ما يقارب ثلث السودان يا للحسرة...
[ابو العزائم الكردفاني] [ 27/12/2011 الساعة 2:20 مساءً]
من زمان ...... ما قلنا نحن محتاجين نقلبها........... ما صدقتمونا .... اها قيسوها على هذا المنوال... اين السكة حديد ..... اين البحرية ..... اين المعلمون.... اين الاطباء .... اين الزرع والضرع....؟؟؟؟؟ كان زمان......... الله لا..... كسب الكاكي خيرا ... ولا الاحزاب المتوالية .. وعديمة الهذف.... الا ان النصر لات لامحالة .. بكنس اكوام ....الزبالة..... لا حول ولا لاقوة الا بالله.... الله ينتقم من مسبب البلاء. مضيع البلاد..
[ابو اسراء] [ 27/12/2011 الساعة 2:13 مساءً]
لكل المسئولين فى هذا البلد المنكوب اسوق هذا الحديث الشريف فى التحذير من غش المسلمين لمن قلده الله تعالى شيئا من أمرهم ..
(ما من عبد يسترعيه الله رعية يموت يوم يموت وهو غاش لرعيته إلا حرم الله عليه الجنة) او كما قال صلى الله عليه وسلم
[احمد ] [ 27/12/2011 الساعة 2:08 مساءً]
بالمناسبه البشير ذاااتو ما كان فاضي ليهم, للاسف واحد قطري قال لي شايف رئسكم جاي الدوحه (يطر) و دي بي لغتهم يعني يشحد
[واقعى] [ 27/12/2011 الساعة 2:02 مساءً]
فساد..فساد..فساد !! فى كل شى فساد وعدم كفأة يبدو لى والله اعلم انو المشكلة ما بس فى الحكومة بل فى فى الفرد السودانى المكون للمجتمع والحكومة يعنى ياجماعة كترة الفساد والمفسدين ديل جايين من وين ؟! ما جايين من صميم الشارع السودانى
ولا شنو
[maw] [ 27/12/2011 الساعة 1:15 مساءً]
قدورة قوم السودان منتظرك ،،، قدورة قوم تلفزيون الجزيرة قاعد يصور ،،، قدورة ياخي عليك الله قوم عشان ترفع رأس السودان فوق) فأجابه قدورة و هو لا يقوي علي النهوض (ياخي أنا راسي ما قادر أرفعه أرفع رأس السودان كيف ،،، عليك الله يا كوتش جيب لينا الإسعاف و خليهم يكتِّروا الأوكسجين) ،،،
[maw] [ 27/12/2011 الساعة 1:14 مساءً]
قدورة قوم السودان منتظرك ،،، قدورة قوم تلفزيون الجزيرة قاعد يصور ،،، قدورة ياخي عليك الله قوم عشان ترفع رأس السودان فوق) فأجابه قدورة و هو لا يقوي علي النهوض (ياخي أنا راسي ما قادر أرفعه أرفع رأس السودان كيف ،،، عليك الله يا كوتش جيب لينا الإسعاف و خليهم يكتِّروا الأوكسجين) ،،،
[ابوعلى] [ 27/12/2011 الساعة 12:17 مساءً]
اذا كنتم تريدون معرفة سبب المهازل دى شوفو انتخابات اتحاد العاب القوى شوفو نتائج الاتحاد السابق بقيادة العميد مصطفى عبادى والدكتور صديق وعليكم الله شوفو خبرة الاتحاد السابق وخبرة الاتحاد الحالى بقيادة الكيزان
[الزول] [ 27/12/2011 الساعة 12:15 مساءً]
الأخ هباني...فقعت مصارينا من الضحك وأنت تصور ملاكمنا الهمام قدورة: ((في فقرة الملاكمة سقط الملاكم السوداني المدعو (قدورة) أرضا في الجولة الأولي من أول بوكس من نظيره المغربي، و ظل الكوتش يهزه و يستجديه للنهوض لإكمال المباراة (قدورة قوم السودان منتظرك ،،، قدورة قوم تلفزيون الجزيرة قاعد يصور ،،، قدورة ياخي عليك الله قوم عشان ترفع رأس السودان فوق) فأجابه قدورة و هو لا يقوي علي النهوض (ياخي أنا راسي ما قادر أرفعه أرفع رأس السودان كيف ،،، عليك الله يا كوتش جيب لينا الإسعاف و خليهم يكتِّروا الأوكسجين) ،،،))
بي صراحة نتائج البطولة كارثية وقمة المسخرة
[العايش الدايش] [ 27/12/2011 الساعة 12:14 مساءً]
أحيي كل الابطال الذين شاركوا والذين اتو بميداليات حتي ولو كان حديدية مصدية واحي البطل العالمي اللي ماقدر يرفع رأسو لأني عارف السبب ،ببساطة لانو جيعان وكل المنافسين جيعانين. كيف يفوز متنافس جيعان مع شبعان لايمكن إطلاقا ذلك والحكومة جيعانة جوع عجيب اما اللجنة الاولمبية فهي جحمانة ..
[muhajira] [ 27/12/2011 الساعة 11:57 صباحاً]
اول مره اقرا لي مقال من فتره طويله كامل الدسم والسم في نفس الوقت .....................طيب بعد دا انحنا نافعين في شنوا...... .................لالا لا ياجماعه بعد دا احسن نقول حي علي العمل وبدل ما نبكي على اللبن المسكوب لازم يكون في عمل..............................ز
[sid ahmed] [ 27/12/2011 الساعة 11:44 صباحاً]
في وضع زي ده يا استاذ الهادي نتوقع كل قبيح وسئ. التخلف واللا مبالاة مقدور عليها لكن مشكلة السرقه والنهب المنظم ده يتعالج كيف؟
[awad] [ 27/12/2011 الساعة 11:24 صباحاً]
والله وبكل امانة
اي شخص مسئول في اي منصب في السودان اصبح لا يهمه سوى ان يلم ويجمع لنفسه ولزمرته فقط ،،،،،، الكل ياكل في الآخر
لا احد يحاسب ولا احد يخاف الله في اموال الناس ولا احد يخاف الله في الحرام ولا احد يقول هذا حلال وهذا حرام ،،،،،،
واصبح الحرام يصاحب المسئولين مثل ظلهم
اصبح الحلال هو عين الحرام
والمسئولين شغالين بالمثل البقول
دار ابوك كان خربت شيل ليك منها شلية
والخراب عم كل شئ ولا امل لا امل لا امل
[ابراهيم جبير ] [ 27/12/2011 الساعة 11:12 صباحاً]
شكرا قبانى على الموضوع والموضوعية
شكرا على القدرة الرائعة فى السخرية
وشكرا اكثر على الهم الوطنى وحس المسئولية
على الرغم من متابعتنا الى كل ما يسطر فى رصد الأزمة السودانية ،من كتابات فتحى الضو وسيف الدولة حمدنا الله وساخر سبيل وغيرهم ، الا ان هذا المقال كان الاروع فى تصوير الشخصية السودانية بعد سنين الحكم الانقاذى التى طالت الجميع .
ارجو أن ننتبه لخطورة وضعنا الحالى فى التشويه الذى اصبح ملامح وطنية وسحنة سودانية ، وان تغيير هذه الملامح يحتاج الى اكثر من حكومة وحدة وطنية ، فبدلا عن الحديث اقوال ابن القيم وابوداؤؤد فى خطب الجمعة الاسبوعية، يمكن تناول ماجاء فى هذا المقال باعتبارة ذكرة لأمة اسلامية ، حتى يتنبه الكل بان هناك متابعة ورقابة جماعية ، على كل ماهو شين وضد المبادئ الانسانية .
على فكرة عمر البشير كان هناك وما ظهر فى الافتتاح !!!!!!!!!!!
[محمد ] [ 27/12/2011 الساعة 10:51 صباحاً]
الاستاذ الهادي هباني
اولا اشكرك على طرح الموضوع فأنا كنت من ضمن من شهدوا هذه المهزلة بحكم عملي بالقرية الرياضية واليك عض النقاط:
(1)كرة اليد: قابلت اللعيبة وكانت ضمن اسبابهم اولا الصالة البتمرنوا ويلبعبوا فيها بالسودان بلاط وفي قطر ترتار ده ادى الى انو اللعيبة تعرضوا لاصابات وكانوا يتعالجوا في الوحدة الطبية بالكهرباء. حارس المرمى المفترض يلبس واقي وهذا ما لم توفره البعثة او الاتحاد واضطر حارس المرمى للعب دون واقي. كرة اليد المتعودين باللعب بها في السودان قديمة وتختلف تماما عن التي تم اللعب بها خلال الدورة يعني مافي اي مواكبة للعبة. من المفترض توفير احذية خاصة للعب بالصالة حيث ان الارضية ترتار كما ذكرت لكن لم يتم توفير احذية رياضية.
(2)البلياردو والسنوكر:تفاجأ اللاعبين بطاولة البلياردو والسنوكر الحديثة وحسب كلامهم أول مرة يشوفوها وما متوفرة في السودان.
(3) كرة القدم: لاعبي كرة القدم اشتروا الملابس الحايلعبوا بيها في نفس يوم مباراتهم.
(4) الجودو: اعدادهم كان بالعون الذاتي وعلى نفقتهم الخاصة وبعضهم لم يشترك في بطولات اصلا.
(5)الكرة الطائرة: اشتكوا من ارضية الملعب الحديثة برضوا بيلعبوا في بلاط بالاضافة الى ان معظمهم صغار في السن وجاءت مشاركتهم للاعداد فقط.
(6)الزي الموحد للبعثة: الملاحظ إلى أن جميع الوفود المشاركة كانت ترتدي زي موحد يحمل شعار الدولة واسم الدولة الا بعثة السودان بشتنه شديدة مرة تلقاهم بي برموده ومره ترينق ومره جلابية ومره عراقي وسروال وكتير كتير من المهازل والفضائح التي لم تكن في ارضية الملعب فقط.
[حزين جداً ] [ 27/12/2011 الساعة 10:50 صباحاً]
الهادي هباني ... الله يجازي محنك ... ضحكتني يا إنت ....!!؟؟؟
قال قدوره ...قال .... يا عمي الهادي : كورة مين وبطولة دولة عربية مين ...!!؟؟
نحن والله العظيم أصبحنا مهزلة ومضحكة ... وهل لنا وزير شباب ورياضه ؟؟؟
بس الناس تعرف للجعجعة والكلام الفارغ ...نحن دائماً مهزومين ...ودائماً في الخلف ...
وتغيير تذاكر الطيران القطري ... ما هذا الجوع ؟؟ وما هذا الفقر ...وما هذا العوز ؟؟؟
ويجب أن يحاكموا فوراً ...لأنهم يمثلون الشعب السوداني الذي أصبح محتقر دائماً ...
وخاصة كريمة إتحاد الرماية ... هل نحنا طيبين ومتساهلين لهذه الدرجة ...ودي أول
مره أشوفا ؟؟؟ طيب إنتي الودااااك شنو ؟؟؟
ومن هو المسئول عن إختيار هذه الفرق المخزية ...والفضيحة ؟؟؟
قال نشتكيكم للريس البشير قاااال .... هو الريس في رقبتو .... والله يستر ...
والله العظيم ...ووالله العظيم معظم الشعب الخليجي بستهتر بنا ويعتبرنا ناااس ... ناس
شنو بل بعتبرنا بهائم ومن الدرجة الرابعة ....
بس ليه كدا يا حكومة الإنقاذ ؟؟؟؟ وهل هذه غايتكم ...وهذا إنقاذكم لنا ؟؟؟؟؟؟؟؟
المطلوب :
(1) إغلاق جميع الأنشطه الرياضية داخل السودان ...يعني منافسات داخلية فقط .
(2) أن لا يفتح الإغلاق إلا بعد نضوج الرياضيين وحتي لو وصلنا لعشر سنوات .
(3) الإهتمام بالبراعم وكب الجيل القديم والذي لم يحقق أي نجاح .
(4) أي إداري قديم في مجال الرياضه يرجي التخلص منه وبوجه السرعة .
بس حزين شديد لما آل إليه وضعنا الرياضي .....
وشكراً أخي الإنسان الهادي هباني ....
[سوداني قديم] [ 27/12/2011 الساعة 10:04 صباحاً]
كيف يستقيم الظل والعود اعوج؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!
لقد تحدثنا مرارا وتكرارا وقلنا ان هذا الفساد المستشري لا يلد الا فسادا .
وها قد عم الفساد في البر والبحر
من يريد معرفة مستوى السودان في الرياضة عليه الرجوع الى حقبة السبعينات.
ليرى كيف تطورنا الى الخلف !!!!!!!
ةلا حيلة لمن تنادي ؟؟؟؟؟؟
[حنو] [ 27/12/2011 الساعة 9:58 صباحاً]
اولا اشكرك الاخ هباني والله موضوع مهم جدا ووفيت وكفيت واضم صوتي للاخ زول موجوع صح بقينا مهزلة والله في كل الدول العربية الدول الكانت ما في خريطة العالم ونحن لسع زي ما قلت نحن بنعرف كل حاجة ونحن ونحن . بلغت السخرية من بعض الشعوب الوصفونا بالكسل واحد منهم سألني من باب السخرية قال لي هل السودانين عند تناولهم الطعام يتناولنه وهم متأكين يعني بالسوداني راقدين علي صفحتهم .لو اصلا نحن ما عندنا امكنيات للمشاركة ما في داعي للمهزلة . قال المدرب متعودين علي الواطة صحيح نحن متعودين علي حاجات ومواصفات معينة مثلا في عالم السيارات متعودين علي البكاسي 5شنكل ما عارف ليه متعودين علي صابون اللوكس معتودين علي معجون سيجنال او ابوصفقة متعودبن علي شاي لبتون . متعودين نقول نحنا الحارة بنخوضها ونحن الساس ونحنا الراس نحنا ساس من جالوص........ خلونا من الكرة والفن اقصد الغناء اوقفوهو لمدة سنة ونعمل حاجة ثانية مثلا عام للزراعة عام للصناعة الناس تتنافس وتحفز . ياجماعة شوفوا الفرقة الموسقية احسبوا اعضاء الفرقة كم تخيلوا هذا العدد دا لوكل واحد شال ليهو طورية او حشاشة وزرع او صنع كم المردود.
[ابوعلا] [ 27/12/2011 الساعة 9:53 صباحاً]
بالله عليك يا اخت حليمة لو شفتى السوهو الكيزان فى مجندى ما يسمى بالخدمة الوطنية فى التسعينات نيرون ما سواه فى روما.
[مجنون] [ 27/12/2011 الساعة 9:30 صباحاً]
لسة جاية المهازل فى امم افريقيا ، هو النافع شنوا فى البلد عشان تنفع الرياضة سمعتنا بقت فى الحضيض
[لولي النوبي] [ 27/12/2011 الساعة 9:29 صباحاً]
نكرر ...الحل في الحلحلة....يعنى فضوها سيرة ...وكل اقليم ياخد استقلالو ويدبر اموروا...نحن في بلاد النوبة ما بنحب الفشل ولا حكم العساكر....وبعض اجزاء السودان بيحبوا وعشقوا الفشل والعسكرية،...فليه تلمونا معاهم او معاكم...الجنوبيين تخارجوا وانقذو انفسهم ومافي داعى لحروب اخرى والافضل نرجع السودان الى ما قبل التركية وكده يرتاح كل واحد في منطقتوا ويعمرها بالشكل العاوزو....انتوا فاااشليين وربنا يوفقكم !!!!
[صلاح الامين عرقوب] [ 27/12/2011 الساعة 9:29 صباحاً]
الاستاذ هبانى
موضوعك تجسيد وتصوير لحال البلد فى زمن الضياع ، رغم عدم المامى باخبار النشاط الرياضى الا اننى موقن ان الحال من بعضو ، ويكفى ان تنظر لحال الحيكومة التى ظلت تتسلط علينا طوال الفترة السابقة لتعرف النتائج المتوقعة اليوم وغدا ، هؤلاء القوم لايهمهم حال السودان وسمعة السودان بل همهم الاساسى المال ، هؤلاء عصابة ماسونية تسلطت علينا وقلبت حياتنا الى جحيم ، وهم على هذا الحال سوف يستمرون الا اذا خرج الشعب وانتفض عليهم وازاحهم من سدة التسلط والجبروت حتى ينصلح حال البلاد وتعود الى سيرتها الاولى
شكرا لك هبانى والله لقد ذدت على مواجعنا وآلامنا مذيد من الوجع والالم
[عماد الدين علي مكي] [ 27/12/2011 الساعة 9:27 صباحاً]
والله عبارة عن مسرحية هزلية مضحكة مبكية
يا جماعة الناس مسخنين
[النوبي] [ 27/12/2011 الساعة 9:22 صباحاً]
منقول من النص "أفادني أحد الأصدقاء من أبناء الجالية السودانية الشرفاء المتطوعين في البطولة العربية أن أحد الفنيين المكسيكيين سأله مستغربا (كيف تُحقق بعثة السودان هذه النتائج المتدنية و رئيس البلاد بجلالة قدره قد تكبد عناء السفر و المجئ ليشجع البعثة و يشد من أزرها ،،، و هو لا يدري أن البطولة العربية في وادي و حبيبنا المشير في وادياً آخر تماما ،،،"
التعليق: لا يعلم هذا المكسيكي الطيب أن رئيسنا البشير ليس استاذا جامعيا مرموقا بدرجة عالم بل هو عسكري لم يتمكن حتى من الحصول على مؤهل ثانوي يمكنه من دخول الجامعة..!! كيف تتوقع من شعب رضى بمثل هكذا مؤهل ليدير شئونه لأكثر من عشرين عام أن ينجز ما استطاعت ان تنجزه دول لم تنل استقلالها بعد وتقلل عنه مساحة وسكانا بمئات الاضعاف كفلسطين التى تقدمت في الترتيب عن سودان العجز والفشل الدائم فرئيسها فشل حتى في الحصول على مؤهل جامعى ونجح في الحصول على قيادة 37 مليون فرد ببندقية وعلى قدر مستوى مؤهلاته يأتى بوزراء هذه هي قدراتهم في الانجاز وهم عباقرة في التملق والاستجداء والتهليل لزعيمهم ولكل من يرمى دولار امامهم...هل يستحق مثل هذا الشعب سوى هكذا نتائج وانجازات....متعوووده..0....داااايما
[mohd] [ 27/12/2011 الساعة 8:45 صباحاً]
غايتو انا بضمن لكم
كان عملوا مسابقة رقيص بين الرؤساء والملوك بشبش حيجيب لكم ميدالية ذهب
وكان عملوا مسابقة فساد ناس المؤتمر ما حيرضوا بغير الذهب
الذي سوف تكوى به جباههم وانوفهم يوم القيامة واسال الله ان يذيقهم منه في الدنيا قبل الاخرة وان يريهم اصناف العذاب امين انه سميع مجيب الدعاء
[BOOO] [ 27/12/2011 الساعة 8:38 صباحاً]
What is sudanese doing in the arab champion in the first place, they are there to the TRUE arabs laugh you got it
[mohd] [ 27/12/2011 الساعة 8:16 صباحاً]
الله يفضحكم الله يفضحكم في الدنيا والاخرة
الله يذيقكم ويلاته في الدنيا والاخرة يا عمر البشير وعلي عثمان والترابي وكل من اشترك في عصابة الانقاذ الله يجهجكم في الدنيا والاخرة الله يفضحكم ويفضح اولادكم ونسائكم
الله يسلط عليكم بذنوبكم من لا يرحمكم ولا يخافه
يا مفسدي الاخلاق ويا مدمري البلاد
لعنة الله عليكم الله يجعلكم مع فرعون وعاد وثمود
[كايندى] [ 27/12/2011 الساعة 7:33 صباحاً]
الاشياء لا تجزأ اخى هبانى فالتردى اصاب كل مناحى الحياة وتمدد حتى نخر فى قيمنا وسلوكياتنا واخاف ان تمتد الى جيناتنا --- ما اصاب السودان والسودانيين خلال هذا العهد صعب ان نقومه ولكن بعزم وقوة الشرفاء نستطيع ان نعيد للسودان مجده
صحيفة الراكوبة الإخبارية - اخبار السودان لحظة بلحظة - توثيق للثقافة والفنون السودانية ..هنا ستجد السودان بمختلف مناطقه وعاداته وموروثاته خلال أقسام متعددة مثل المنتدى العام، العنقريب، الأغاني السودانية، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبها.
القائمة الرئيسية
جديد المقالات 
رقية وراق
زهير السراج
فاطمة غزالي
رشا عوض
رباح الصادق
عبد الباقي الظافر
شمائل النور
عثمان ميرغني
الصادق الشريف
هويدا سر الختم
د.سعاد ابراهيم
حيدر المكاشفي
محمد عبد الله برقاوي
د. طه بامكار
د. سلمان محمد أحمد
ابراهيم سليمان
طارق عبد الهادي
الطاهر ساتي
صلاح شعيب
بكري الصايغ
شوقى بدرى
فضيلي جماع
احمد المصطفى
فيصل محمد صالح
محجوب عروة
حسن وراق
لنا مهدي عبدالله
ياسر عرمان
الـصـفـحـة الـرئيسية
v2.0.5