الأخبار
أخبار إقليمية
مدير عام شركة تساهيل : وداعـاً للصعاب نحن نشـيِّد ونكمل ونشطِّب بالأقساط المريحة
مدير عام شركة تساهيل : وداعـاً للصعاب نحن نشـيِّد ونكمل ونشطِّب بالأقساط المريحة
مدير عام شركة تساهيل : وداعـاً للصعاب نحن نشـيِّد ونكمل ونشطِّب بالأقساط المريحة


05-26-2012 01:40 PM
كتبت صحيفة الصحافة اليوم :

الخرطوم: عوض نميري

معاناة المواطن السوداني كثيرة، وواحدة من المعاناة التي تشغل باله هى كيفية الحصول على قطعة الارض السكنية وبنائها، حتى يضمن حياة كريمة له ولأسرته.. «الصحافة» تطرقت لهذا الموضوع من خلال شركة تساهيل التى تقدم خدمة كبيرة في مجال البناء والتشييد والعديد من الأعمال التي تعتبر مخرجاً للمواطن، والتقت الصحيفة مدير الشركة المهندس خالد مجذوب الامين الكتيابي، حيث تحدث لنا حول كيفية استفادة المواطن من خدمات الشركة وشروطها المطلوبة من خلال هذا الحوار.
٭ ما هو طبيعة عمل الشركة؟
ــ تعمل شركة تساهيل الهندسية في مجال التسهيل العقاري، حيث انها تعد من اولى الشركات التي التفتت الى معالجة هموم المواطن السوداني وتحقيق احلامه وتلبية رغباته المتمثلة في توفير مسكن بتسهيلات تتناسب مع مع مستوى دخله المتباين. وقد سنحت لها الفرصة لتنفيذ العديد من الاعمال باعلى درجات الجودة والاتقان.
٭ ما هي المميزات التى تقدمها الشركة؟
ــ يميز الشركة انها تلبي رغبة العميل بصورة مرضية، كما تقوم ايضا بتشييد كامل للمنزل مع تشطيبه، بجانب الاعمال الاخرى التي يحلم بها المواطن التي يمكنه متابعتها خطوة خطوة، باعتبار انه صاحب العمل، اضافة الى ان الشركة انتهجت سياسة الجودة المتمثلة في تقديم ارقى مستوى خدمات للعميل خلال ساعات العمل اليومي داخل وخارج نطاق الشركة، مربوطة بنظام كاميرات رقمية وغرفة متابعة لضمان سهولة وجودة الإجراءات.
٭ ما هي خطوات بناء قطعة أرض خالية الموانع؟
ــ على المتقدم لبناء قطعة ارض احضار الخرائط الهندسية المعتمدة، مع تصريح البناء ومقابلة المكتب الهندسي لعمل دراسة تفصيلية للاعمل المطلوبة، وذلك بواسطة المكتب الهندسي، واستحراج التكلفة.. اما في حالة عدم وجود خرائط فعلى العميل مقابلة المهندس المعماري لعمل الخرائط.
٭ ما هي الخطوات الاجرائية اللازمة؟
ــ أولاً توقيع العقد المتضمن لفترة التسليم، ودفع المبلغ المقدم وهوعباره عن 30% من جملة التكلفة، مع تحديد مدة التقسيط للمبلغ المتبقي لـ70% من التكلفة، بحيث تقسط من سنة الى خمس سنوات في حالة التشطيب والتكميل، بهامش ربح «6%» لكل سنة وتسلم الاقساط في شكل شيكات.
كما تقوم الشركة بترحيل المواد الى الموقع، وبدء العمل بمجرد توقيع العقد. ويدفع المقدم في فترة لا تتجاوز «6» أيام، ثم تبدأ عملية دفع الأقساط بعد فترة سماح شهرين من توقيع العقد وبداية العمل.
٭ ما هي خطوات عمل التشطيب والتكملة والصيانة؟
ــ أولاً يقوم فريق هندسي من الشركة بزيارة ميدانية للعقار للوقوف على الاعمال المراد انجازها ومناقشتها مع المالك، وهنا لا بد من ملء الفورم بخصوص الزيارة ودفع الرسوم قبل «3» ايام من زمنها، اضافة الى القيام بدراسة تفصيلية للاعمال المطلوبة بواسطة المكتب الهندسي بناءً على تقدير الزيارة واستخراج جملة التكلفة، ومن ثم توقيع العقد المتضمن فترة التسليم، ودفع المقدم «30%» من الجملة، وتحديد فترة التقسيط يتم مع مدير التسويق بناءً على التكلفة الكلية.
٭ ما هي الضمانات التي يقدمها العميل للشركة؟
ــ على المتقدم أن يحضر شهادة مرتب. وفي حالة عدم وجودها يجب ان يكون هناك ضامن من الاقرباء «شقيق ــ عم ــ خال ــ ...الخ »، هذا بجانب اثبات الشخصية وشهادة البحث وشيكات شخصية، بجانب تصديق البناء والخرائط الهنسية.
٭ هل تمارس الشركة نشاطها في ولايات السودان؟
ــ بدأ العمل فعلياً لمزاولة الشركة اعمالها بكل ولايات السودان حتى ينعم مواطنو الولايات بخدمات الشركة.
٭ كيف يصل اليكم المواطن؟
ــ مكتبنا الرئيس بالخرطوم ــ الرياض تقاطع شارع المشتل مع الجزار شارع «112». وسيجدنا العميل في انتظاره دوماً.

الصحافة



تعليقات 58 | إهداء 0 | زيارات 30587


التعليقات
#392985 [سودانى جعلى]
0.00/5 (0 صوت)

06-14-2012 11:25 PM
الحمدللة ارجو على القايمن على امرهذة الشركةوبلاخص مندوبكم المحترم بجدةان يامروهذا المندوب باسترجاع المبلغ اللذى طلبة منى وهوالف ريل وانامن قبيلة الجعلين واللة العظيم سوف يندم هذا الرجل ومن حولة وسوف تكون الف القشة القصمت ظهر البعيرواخر اربعة ارقام من جوال مندوبكم5331 ولكم فترة 2 7ساعة للردوجوالى هو0530700389


#376796 [محمد محمد صالح طاهر]
0.00/5 (0 صوت)

05-27-2012 10:33 PM
تجربه جديده وجديره بالوقوف عندها فهى تخدم قطاعات كبيرة ممن يبحثون عن السكن الملائم.


#376639 [abuomer]
0.00/5 (0 صوت)

05-27-2012 06:16 PM
نفسي اعرف سر تحالف الصحافه مع السماسره,المحتالين,الشركات الوهميه و شركات بيع السراب...و حتى الابالسه,,,سر تحالف الصحافه مع هؤلاء ضد المواطن الغلبان اصلا...ارحمونا ياناس
كل من يريد ترويج الخداع و الوهم و السراب يجد اقلام تطبل له...اليس فيكم رجل رشيد


#376523 [اب علي]
0.00/5 (0 صوت)

05-27-2012 03:36 PM
حقو يسموها شركه تصاعيب وليس تساهيل


#376433 [ام الغايب]
0.00/5 (0 صوت)

05-27-2012 02:04 PM
شركة تساهيل والله يسهلها علينا هي كمثيلاتها من البنوك الغير ربويه والتي تدعي اسلمتها بارباح 5% و8% و15% و.......وهلمجرا اعزاءي المغتربين لاتكون ضحية لتلك الشركات الوهميه والتي لاوجود لها حقيقتا علي ارض الواقع ..فالكل امام المال من دين واحد .. والطمع يدفع للاخذ دون عطاء فاخوتي المغتربين واكرر المغتربين واني من نفس الفصيله عليكم بالتعامل الجاد وبعقليه الامور وليس بعطف القلوب لان الكل متلسع من الكل والطمع كما البحر كلما زدت شربازدت عطشا وها هي نتاج غربتكم والتي عانيتو فيها وتجرعتو من كؤوس كثيره لفلزات اكبادكم فحاذاراكم في الوقوع لمثل هذه الشركات والبنوك ومن الامثل الكثيره اخصص مثال حي لاحد الاصدقاء والذي لازال طريح الفراش (شلل) من ثقته الفائقه في احد افراد اسرته ولكنه فوجئ عندما عاد الوطن بانه اتنصب عليه .. والله ماوجدت اصدق وانظف وأأمن من الباشمهندس اسامه علي وابصم بايديي العشره علي نقائه ذلك الشاب الخلوق الذاهد ..وربنا يحفظه لاسرته وذلك عن تجربتي الشخصيه له وها ليس من باب الدعايه ولكني لااخاف في الحق قوله لائم وهذا علي ماقوله شهيد


#376374 [صادق عبدالله]
5.00/5 (1 صوت)

05-27-2012 12:47 PM
التجربة مع الشركة غريبة شوية, انا مهندس مدنى واعمل بالمملكة العربية السعودية وبنشرت فى البناء بسبب التجربة المرة مع ارتفاع الاسعار, ذهبت الى شركة تساهيل بعد الاتصال على هاتف تدفع على ماظن 5 الف للدقيقة وعند الاستفسار عن الطريقة وجدت الاتى تجربة شخصية وليست دعوة او تحذير:-
1 هنالك مبلغ 500 الف زيارة مهندس ليست لها لزوم حيث ان الاوراق مكتملة وهنالك عرف سارى بأن المقاول يتحمل نوع من المخاطرة فى عمله بزيارة المواقع وحساب الكميات ومطابقة المخططات قبل تقديم السعر
2- المقدم (هامش الجدية) يبلغ 30% من المقايسة والاسعار هى اعلى من السوق بحد ادنى 50% يعنى بمثل بسيط سعر المتر المربع السيراميك كان فى بداية 2011 عندهم بين 42 الى 45 الف لنوعية راس الخيمة توريد وتركيب وبالمقارنة بسعر السوق الذى لايتعدى 30 الى 32 الف فأن نسبة ال 30% فى الحقيقة وحسب تقييمى الشخصى سوف تغطى فى حدود 55 الى 60% من التكلفة, وبحساب بسيط اذا دخلت فى عقد لتنفيذ اعمال خلال سنة وسوف تدفع الاقساط خلال خمسة سنوات فأنت تدفع 30% دفعة مقدمة + 20% دفعات شهرية تقريبا علما بأن الدفعة المقدمة تغطى حوالى 60% من التكلفة (تقدير متحفظ جدا) فهم حقيقة لايتعدى مبلغ التمويل من قبل الشركة حدود 20 الى 25% فى الاكثر.
3- ليست هناللك ضمانات بالجودة او الالتزام بمواعيد محددة وكلما طالت فترة العمل كلما وجدت ان معدل الخسارة تزيد
للاسف الشديد الوضع فى السودان وبفضل الحكومة ميؤس منه والمواطن مغبون من جميع الجهات والتجار والمقاولين فى الغالب الاعم لايراعون الله فى حقوق الناس
لذا نصيحة لكل متعامل مع هذه الشركة او غيرها حساب التكاليف من جهتين على الاقل ومن ثم عمل حسبه بسيطة من اين ياتى الربح ومن وين الخسارة, مثلا البنوك لايمكن ان تطبق نظام الفائدة المتناقصة لذا تجد ان الفائدة ثابتة رغم ان فى المرحلة الاخيرة من القرض تسدد فائدة اعلى من 80% من قيمة القرض وانا قمت بعمل حساب بسيط للفائدة سواء من بنك الخرطوم او فيصل وجدت ان الفائدة السنوية تفوق 32% بحساب عدم تطبيق الفائدة المتناقصة ورغم انهم يقولون ان الفائدة 8 الى 15 %


#376362 [احمد كمال الدين]
5.00/5 (1 صوت)

05-27-2012 12:34 PM
اولا اسوق كل شكري و تقديري لكل من اسهم بالرائ في هذا الموضوع و اي كان نوع هذا الاسهام فهو يجد منا الاهتمام و التقدير .
شركة تساهيل شركة تجارية في المقام الاول و لا اظن ان في ذلك عيب او منقصة في حق الشركة .فهي شركة تقدم خدمات في العديد من المجالات و ليس في مجال التشييد فقط .
تقوم فكرة الشركة علي تمويل المشروعات بحيث يستفيد جميع الاطراف من هذا التمويل .الشركة تتحصل علي ارباح 6% في السنة .و العارفين بالمجال التجاري و مجالات الاعمال يتفقو معي ان هذه النسبة تعتبر ضئيلة جدا لك ان تقارن بالشركات الاوربية و الشركات العاملة في الخليج حيث تتقاضي هامش ربح اعلي بكثير جدا اذا اخذنا طبعا عوامل استقرار السوق و الاستقرار الاقتصادي في تلك البلدان و التي لا تتعرض للمخاطر الاقتصادية التي يمكن ان تتعرض لها شركة تعمل في السودان في ظل الاواضاع الاقتصادية السائدة حاليا .
سؤال بسيط للمتداخلين الذين يستنكرو نسبة الارباح التي تتقاضاها الشركة هل يعني انكم تطلبو ان لا تربح الشركة و ان لا تدفع للموظفين و المهندسين و العمال و الخدمات و كل ما يجعلها تستمر ؟
و هل تعلمو ان الشركة واجهت العديد من الخسائر بسبب تراجع سعر الجنيه مما ترتب عليه ذيادة التكلفة الحقيقية للبناء بسبب ارتفاع اسعار المواد الي اكثر من ثلاثة اضعاف .مثلا لدينا عملاء منذ 3 سنوات عندما بداءنا معهم تنفيذ المشروع كان سعر الدولار 1250 جنيه و الان تبقت لهم سنتين و سعر الدولار الان يفوق ال 5600 جنيه و لا ادري كم سيبلغ بعد عامين .علما بان العقد لا يتغير مع تغير سعر الدولار .
و موضوع اخر للذين يتحدثون عن الربا ارجو مراجعة باب الربا في الفقه الاسلامي حتي تتبينو ما هو الربا قبل ان يفتو في الموضوع من غير علم فيضلو بعض الناس .
بالنسبة للاخت التي تحدثت عن موظفات الشركة فهي يبدو انها لم تقابل الشخص المخول له الاجابة عن التساؤولات التي قامت بطرحها .

لا اريد ان اطيل عليكم فقط اردت توضيح هذه النقاط
كل من يطلب المذيد من الايضاحات او الاستفسارات ارجو مراسلتي علي بريد الالكتروني
[email protected]


ردود على احمد كمال الدين
United States [مواطن سودانى] 05-27-2012 09:53 PM
يهمنا مصدر الأموال, شركات التمويل رؤوس أموالها ضخمة, من هو مالك شركة تساهيل؟

United States [حلفاوي] 05-27-2012 02:47 PM
لنكون اكثر اطمئنانا
ليتك تطلعنا عن مصدر شهادة المهندس خالد ...
يعني الجامعة التي تخرج منها والسنة .... ليى معرفة باحد المقاولين الذين تتعامل معهم تساهيل وتجربة شخصية جعلتني اضع الف خط اسفل هذه الشركة


#376319 [سودانى وطنى جدا اكثر من نافع]
4.50/5 (4 صوت)

05-27-2012 11:47 AM
ياخوانا اعملو حسابكم من هذا الشخص! اولا هو ليس بمهندس ولا علاقة له بالهندسة كل مؤهلاته اكمال المرحلة المتوسطة وهو اغترب لفترة قصيرة فى السعودية وعاد وعمل بالاجهزة الكهربائية بشارع الحرية واسمه خالد مجزوب محمد الامين وله مشاكل وتورط فى قضايا مالية كثيرة وليبس له سابق خبرة بهذا المجال ويتعامل مع مقاول اسمه حسين ويلقب بالليبى وهو من نفس العينة ويدعى بانه مهندس وهو لاعلاقة له بالهندسة لامن قريب ولا من بعيد وتردد على الحراسات وتورط فى قضايا مالية وقضايا احتيال ولهذا المدعو ابن اخت يسمى بالحارث وهو ايضا لاعلاقة له بالهندسة ولا المقاولات وهولاء عبارة عن عصابة نصب واحتيال وكل همهم الثراء السريع بغض النظر عن الوسيلة وقد دخلوا فى هزا المجال مواكبة للتطورات فى عالم البزنس ! الا هل بلغت!


ردود على سودانى وطنى جدا اكثر من نافع
Turkey [خال فاطنة] 06-11-2012 01:25 PM
من معرفتي الوثيقة والتي تصل الي درجة الرحم......هذا شخص محتاااااااااال ومن أكلة أموال الناس بالباطل


#376315 [حلفاوي]
5.00/5 (2 صوت)

05-27-2012 11:42 AM
ابحثوا عبر محرك البحث قوقل عن شركة تساهيل ... لتعرقوا حقيقة هذه الشركة...


#376259 [السنجاوي]
5.00/5 (1 صوت)

05-27-2012 10:55 AM
ــ أولاً يقوم فريق هندسي من الشركة بزيارة ميدانية للعقار للوقوف على الاعمال المراد انجازها ومناقشتها مع المالك، وهنا لا بد من ملء الفورم بخصوص الزيارة ودفع الرسوم قبل «3» ايام من زمنها، اضافة الى القيام بدراسة تفصيلية للاعمال المطلوبة بواسطة المكتب الهندسي بناءً على تقدير الزيارة واستخراج جملة التكلفة، ومن ثم توقيع العقد المتضمن فترة التسليم، ودفع المقدم «30%» من الجملة، وتحديد فترة التقسيط يتم مع مدير التسويق بناءً على التكلفة الكلية.
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
الإخوة والأخوات الأعزاء لا تضيعوا زمنكم وعن تجربة قيمة الفورم أو الطلب 200000جنيه بالقديم بعد ملء الطلب لا بد من ذهاب مهندس لتقييم الوضع على الطبيعة وده حقو 500000جنيه دفع مقدم 30% يعني لو الواحد عندو شغلانة بتكلف 100.000يدفع 30.000وطبعاً التكلفة عالية تكاد تكون أربعة أضعاف نصصيحة خاصة وعن تجربة في البناء جهز الخرطة كاملة ونفذ مرحلة مرحلة وقدر استطاعتك وستجد نفسك نفذته بيتك بالكتير في ظرف 5 إلى 7سنوات دون ديون ووجع راس


ردود على السنجاوي
United States [ابو زياد] 05-27-2012 01:06 PM
كلامك صح يا السنجاوي ديل ناس محتااااالحين ودا كلو شغل غسيييل امواال ولعب على الدقووون وعاملين فيها حايعملو ليك من البحر طحييينة على قول المصريين كلو عبارة عن مأكلة وبس


#376218 [سودانى متحييييييييير]
1.00/5 (1 صوت)

05-27-2012 10:21 AM
يا ناس الراكوبة حرام عليكم ، ما كفانا أبو رياله ورئبسه الهمام ، وأخبار المحكمة الجنائية الدولية ، ومصائب دارفور وجبال النوبة والنيل الأزرق ، و بلاوى الأخوة الأعداء فى هجليج وأبيى وعلى طول الحدود الجديدة الما معروف محلها وين ؟ كمان جايبين لينا الباشمهندس خالد الذكر عشان تفقعوا مرارتنا مرة واحدة ؟ ولا تعملوا لينا سرطان فى المخ ؟


#376061 [fikri]
5.00/5 (1 صوت)

05-27-2012 07:24 AM
لو داير مقاول يشتغل ليك شغلك وماياكلك ويديك النصيحة ويوريك تشتري ارض وين
اقع المهندس احمد الزبال
زول بخاف الله وفوق ده كلو قاري هندسة معمار ويصمم ليك الحاجة الدايرها وتشوفها في الكمبيوتر
وده رقمه نصيحة لله بس والله لاعارفني بكتب ولاحاخد نسبة
0912669375


ردود على fikri
United States [أحمد الزبال] 06-03-2012 12:24 AM
جزاك الله خير


#376051 [Mr. Hatim]
5.00/5 (1 صوت)

05-27-2012 06:20 AM
أولاً توقيع العقد المتضمن لفترة التسليم، ودفع المبلغ المقدم وهوعباره عن 30% من جملة التكلفة، مع تحديد مدة التقسيط للمبلغ المتبقي لـ70% من التكلفة، بحيث تقسط من سنة الى خمس سنوات في حالة التشطيب والتكميل، بهامش ربح «6%» لكل سنة وتسلم الاقساط في شكل شيكات.
طبعا الزول المجبور حا اجي لمثل تلك الشركات حا اكون تعبان وحا اقسط لاكبر مدة ممكنة وهي 5 سنوات بحساب 6% للسنة يعني حا تكون دفعت ارباح 30% "ده نهب" من سعر التكلفة وطبعا حا اسمسروا فيك في المواد مثل الاسمنت والسيخ والسباكة والكهرباء ..الخ


#376033 [سواح محمد]
5.00/5 (1 صوت)

05-27-2012 04:25 AM
السلام عليكم يا ناس والله الحوجه للبني في ولي كل شي يسهل الامور محتاجين اليها بس ممكن يرد علينا بشكل متفصل اصحاب الشان لكي نعرف نصدق مين ولا مين كل الناس مافي حد بقولك النصيحه واحدين كده وواحدين كدا اتمني ان يردوا علينا اصحاب الشركه نغسها ووالله محتاجين لمثل هذة الشركات لتطوير البلد ومساعده المحتاج وانا بصراحه مغترب لي بيت بنتيته ولي سنتين ما قادر اعرشه يا ناس وده يبقي كلام مع خالص تحياتي للجميع والمعزرة من الاطاله وشكرا


سواح


#376026 [whiteniless]
0.00/5 (0 صوت)

05-27-2012 03:31 AM
الموضوع يحتاج للدراسه ومقابله شخصيه وتقديم الاوراق
فارجو من اصحاب الشركه كتابه تلفونات الشركه او فاكس او ايميل حتى ان نستفيد من ما تقدمونه ونصل اليكم فارجو من الشركه كتابة كل التفاصيل والعنواين من تلفونات وبريد اكترونى


#375989 [محمد]
1.38/5 (7 صوت)

05-27-2012 12:34 AM
شهرين ثلاتة ونفس الشركة دي حنسمع بيها في الراكوبة ..ونسمع ان الجماعة لملموا ال30 % دي وكبو الزوغة...
نصحية لوجه الله من زول غربه قديم وجرب البنيان اي مغترب عنده قريشات يدخرها بره محل ما قاعد ... ولمن يفكر يرجع نهائي يدخل بيها ويسوي بيها الدايرو كان بنيان او غيره ... لكن حكايات شركات وتوكيلات دي وخصوصا في ايام الزنقة الحاصلة دي .. الا بس يكون المغترب قنعان من شقا عمره.


ردود على محمد
United States [سودانى وطنى جدا اكثر من نافع] 05-27-2012 11:57 AM
لا شهرين لا تلاتة الشركة الوهمية دى هسع متورطة فى قضايا ولللمعلومية نشاطاتها كتيرة ومتشعبة لكن مع الاسف كلها ضاربة


#375986 [الجمبقلى]
5.00/5 (6 صوت)

05-27-2012 12:22 AM
المثل بقول ،اسأل مجرب ولا تسأل طبيب ،انا بنيت منزل بأعلى المواصفات ،طابق أرضى ،فى بداية

العمل أوكلت ابن أختى وكان متفرغا تماما لهذا العمل بمرتب شهرى ،مهندس الشركة المنفذه دفعتى

وصديقى فى الدراسه ،كنت اشترى لهم المواد والشركه تنفذ ،رغما عن كل ذلك حدثت تجاوزات ماليه

خاصة من ابن أختى ،بعد ان اكمل عظم المبانى فى خلال عام كامل ،نزلت اجازه واشرفت غلى ماتبقى

من البناء بنفسى لغاية نهاية الأجازه والقروش كملت أوقفت العمل ورجعت مقر عملى بالخليج،وصرت

كل سنه انزل اجازه وأواصل فى البناء حتى اكملته تماما وفرشته وسكنت فيه ،استغرقت هذه العمليه

زهاء 8سنوات لكن الحمدلله انجزت ما اريده بعون الله ثم الصبر الصبر والمثابره،احذروا ايها الأخوه

خاصة المغتربين لأنكم صيد سهل للمحتالين فى السودان


#375981 [بتاع مباحث]
3.00/5 (2 صوت)

05-26-2012 11:58 PM
الزول ده انا بعرفوا حق المعرفة متردد حراسات وثراء حرام


ردود على بتاع مباحث
United States [مواطن سودانى] 05-27-2012 09:55 PM
والله انا من الشكل بس, نوعية الناس الما بتتعامل معاها كلو كلو, الاستهبال ظاااهر فى العيون المنططة دى

United States [الكد مبس] 05-27-2012 09:39 AM
الزول ده منو وضح لينا عشان مانروح فيها


#375977 [ابوعبدالرحمن]
3.00/5 (2 صوت)

05-26-2012 11:46 PM
الاخوة الاعزاء انا مغترب في احدى الدول العربية والمتبع بالدولة التي اعيش فيها لو عندك قطعة ارض تقوم احدى المؤسسات التابعة للدولة او شركة ببناء العفار بدون دفع اي مقدم ويتم خصم ثلث الايراد للمؤسسة او الشركة والثلثين لمالك العقار حتى يتم الانتهاء من قيمة التشييد او البناء وتقوم الشركة بادارة العقار حتى الانتهاء من التكلفة وبعد ذلك يكون العقار ملكا لصاحب القطعة ويا دار ما دخلك شر


#375971 [محمد]
3.00/5 (4 صوت)

05-26-2012 11:39 PM
هههههه عشان بندقس ليك
هاك تساهيل دى.
قال بهامش ربح 6% فى السنة ,ياخى خليك واضح وقول بفائدة ربوية بنسبة6% .......


#375948 [Rabe]
1.00/5 (1 صوت)

05-26-2012 10:50 PM
المغتربين اكثر ناس من المفروض يكونوا عارفين شغل هذه الشركة لانهم فى الغربة معظم تعاملاتهم مع مثل هذه الشركات او البنوك ،، بالنسبة للفائدة على مااعتقد بأنها غير مبالغ فيها ،، على حسب علمى الشركة ليها كم سنة شغالة ،،، الناس من الفلس العليهم مفتكرين كل الناس حرامية ،،


#375936 [عبد الكريم]
3.00/5 (2 صوت)

05-26-2012 10:22 PM
نا مقيم فى السودان ولدى تجربة بناء حديثه من الافضل البناء بنفسك شوىه شويه حتى يكتمل المبني ويمكن توكيل شخص مضمون من اسرتك للمتابعه والبناء اللود بيرنق غير مكلف


ردود على عبد الكريم
United States [salam] 05-27-2012 10:07 AM
من اسرتك كيف أذا ود اخته سرقه .. خلالالالالالالالالالالالالالالالالاص ما فيش


#375922 [كلاكلاوي سااااي]
5.00/5 (1 صوت)

05-26-2012 09:59 PM
المداخلات كلها بتدل علي انو الشركة دي ما مطمنة يعني ما نجازف وللا كيف


#375919 [الباشمهندس]
0.00/5 (0 صوت)

05-26-2012 09:47 PM
ان يتم تقسيط 70 % من تكلفة البناء بربح لتبلغ 91 % بعد 5 سنوات ؛ معناه البناء يكلف 121 % من تكلفته الحالية.
الذى لم افهمه ان 30 % اقل قليلا من نصف تكلفة المواد ، و هى متزايدة بصورة موازية للدولار.
يعنى جماعة تساهيل ، غالبا دااااااقسين


#375886 [abu tareq]
3.00/5 (3 صوت)

05-26-2012 08:35 PM
فى حالة الاخفاق بسداد الاقساط يدقوا الجرس على عقارك اينما وصل انتبهوا يامغترربيين


#375884 [Sanjack]
3.00/5 (2 صوت)

05-26-2012 08:26 PM
الله بسهل على الجميع


#375877 [wedhamid]
3.50/5 (5 صوت)

05-26-2012 07:57 PM
يقول المثل .....العاقل من إتعظ بغيره..... كم عمده و كم غيره إستولوا على أموال الطامحين و لم يعرف لهم مكان و لا أثر و لا أصل و لا فصل ..... زاغوا بحقوق الغلابه و السذج .....هذا زمان أكسح ...أمسح ...قشو وكشو و ما تجيبو حى .... و ما فى يا أمى أرحمينى.....يا مغتربين فتحوا عيونكم .....المواعين هنا جفت و الجماعه نووا عليكم .....أبقوا عشرة على مدخراتكم و حصاد سنين الغربه .....بشطارتكم لمّيتوها ...بقى ما تفرطوا فيها....و الله العظيم لما قريت الموضوع ...شعر جلدى كللو وقف ... ولكن تعليقات الإخوة الأعزاء روّاد الراكوبه رحمنونى و هديت ( أقروا كلامهم كويس) و قلت أشاطر بهذه الكلمات ... تساهيل قال ..ههههههههه


#375859 [بابكر الشيخ]
0.00/5 (0 صوت)

05-26-2012 07:12 PM
الزول الكان سمح وما زال وسيظل سمح أشكرك على نصيحتك الغالية والغربة ما بتبني بيت لأن ما ندخره ندفعه للجامعات ورسوم الداخليات وتذاكر الطيران ورسوم المغادرة في المطارات ورسوم الخدمة الألزامية ورسوم تجديد الاقامات ورسوم الخروج والعودة .............الخ وسأضع نصيحتك نصب عيني ولك وافر شكري وتقديري وإحترامي.


#375854 [jbra]
3.00/5 (2 صوت)

05-26-2012 07:04 PM
they are criminal don't don't


#375846 [نزار التوم]
0.00/5 (0 صوت)

05-26-2012 06:53 PM
والله يا خالد عبد الرحمن تعليقك في السلك والله الواحد ليهو سنين ما ضحك الله يديك العافيه


ردود على نزار التوم
United States [خالد عبدالرحمن] 05-26-2012 10:20 PM
شكرا نزار والله انا لو ما مشغول شوية كنتة عايز افتش لصورة الزول دا عشان اتأكد هل هو نفسو ولا شبيه لأنو نفس الاسم والشكل بس المشكلة الصورة العندي فيديو في شريط وما عندي فيديو انت عارف الفيديوهات انغرضت لكن ما بخليه عشان ما يقع واحد عوقة في مصيتو تحياتي ... ياخي نحنا ناقصين مصايب حرامية كفاية ناس الحكومة


#375834 [ابومعاذ]
1.00/5 (1 صوت)

05-26-2012 06:39 PM
واحد صاحبى كان مكلف مهندس , صديق ,وقريب عشان يبنى ليهو بيت وكان بثق فيهو خالص ومع نهاية كل دفعة كان بساله عايز الشبابيك كيف والسراميك كيف والخ الخ وجاء عشان يشوف البيت وما لقى الا عمودين بطول متر ...... فعشان كدا الواحد يتعامل مع شركة معروفة وبعقد يتضمن شرط جزائى
العبد لله كلف ايضا صديق وتم البناء بعد استبعاد المهندس ولكن ما زلت اعانى من الصرف الصحى وكل شهر جايب سباك وما لاقين طريقة لاصلاح ما افسده المهندس الهمام


#375833 [محمود]
3.00/5 (3 صوت)

05-26-2012 06:39 PM
يعني لو داير ابني بيت تكلفتو 400 مليون ادفع ليكم 30% حوالي 120مليون وفائدتكم لو بتقسطو على 5 سنوات 30% يعني تاخدو 120مليون يعني بتاخدو نسبتكم مقدماً ثم تبداوا في اخذ اقساطكم بعد شهرين من بدا البناء بواقع 7 مليون شهرياً
انتو يا اخوانا الحرامي الا ينط الحيط
بلد غير الحرامي ما فيها شي


#375827 [مروان]
5.00/5 (2 صوت)

05-26-2012 06:22 PM
الزول ده كان عنده محل أدوات كهربائية في شارع الحرية وهو حرامي كبيييير فاحذروه


#375825 [عثمان ماهل]
0.00/5 (0 صوت)

05-26-2012 06:17 PM
والله حيرتونا واحد قال كلام عدل ماف وواحد قال انا تعاملت مع الشركة مافي طيب نعرف الحقائق من وين !!!!!!!!!!!!!!!!!!!!!!!!


#375819 [Kunta Kinte]
5.00/5 (3 صوت)

05-26-2012 06:07 PM
اولا 6% فوائد عن كل سنة نسبة تعتبر كبيرة جدا والمقدم ايضاُ كبير 30% ، يعنى اين التسهيل ورفع المعاناة كيف؟؟ من يستطيع دفع هكذا مبالغ لا اعتقد انه فى حاجة لبرنامج اقساطكم هذا

ثانياُ كما قال الاخوة من قبلى مواطن سودانى وود الشمالية ، ما هو مصدر هذه الاموال ، انا شخصيا اقول الإنتباه من عمليات الغسيل

ثالثاُ ودى حتكون بالدارجى ... اى زول يفتح عينو كويس وما يغريهو البرنامج ده خاصة اخوانى المغتربين دايما قاعدين يتمقلبو من النظام الغريب ده ، بقول ما دامت شركة شغالة وبالطريقة الاتقالت دى معناهو راسمالا كبير ومعناهو تابعة للحزب الحاكم او احد افرادو اللاحقين ، رجال الاعمال الشرفاء كلهم يا اما افلسوا او هاجرو بما تبقى من اموالهم ، إذكرو المشاريع الوهمية بداية من بنك نيما وصفا وسندس الى العديد جدا من شركات التطوير العقارى النهبو المساكين وهربو باموالهم وقبل فترة ما بعيدة قرينا عن حادثه زى دى فى الراكوبه هنا...

اخيرا نصيحة الاخ عنقالى جميلة ممكن العايز يبنى ينجز شوية شوية على مراحل انشالله حيطة حيطة احسن بدل المحتالين يبلعو شقى عمرك


#375799 [ودامدرمان]
1.00/5 (1 صوت)

05-26-2012 05:46 PM
6% ربح في السنه يعنى 30% ربح في 5 سنوات . فرضا لو تكلفة المبانى 133 مليون المستفيد سيدفع 200 مليون . ونعم الفائده ؟؟؟؟؟


#375793 [simsim]
0.00/5 (0 صوت)

05-26-2012 05:43 PM
ظاهر جدا ان اللقاء هو دعاية للشركة . والمقصود فعلا المغتربين
شركات التقسيط معظمهم حراامية
خليهم هم اليبنوا البيت مرحلة مرحلة وبعد انتهاء كل مرحلة يقوم المواطن بسداد القسط
هههههههههههههههه
دي بلد الحرامية ومافيها اي مصداقية لاي شخص
فاعملوا حسابكم


#375787 [رايسنا الشحاد]
0.00/5 (0 صوت)

05-26-2012 05:39 PM
ماسووووووووووووووووووووووووووووووووووووووووووووووووووووووووووووووووووووووووره 30 بوصه اوعا تدقسوا يا مغترب الشركه دي حممممممممممممممممممم


#375752 [حسين]
0.00/5 (0 صوت)

05-26-2012 04:57 PM
يمكن يكون دة سوق مواسير كبير منظم من ناس القرون


ردود على حسين
United States [سودانى وطنى جدا اكثر من نافع] 05-27-2012 11:55 AM
برافو عليك ياحسين يا لماح! بالجد تحليلك اختزل كلام كتير!


#375749 [خالد]
0.00/5 (0 صوت)

05-26-2012 04:53 PM
هذه مادة إعلانية وليست خبر او مقابلة صحفية. لكن بس تقول شنو و تقول لمنو ما التدهور دخل جوة العضم


#375748 [Mustafa Mohmmed Ali]
0.00/5 (0 صوت)

05-26-2012 04:52 PM
الخوة العزاء

أرجو الا تصيطر علينا نظرية المؤامرة دائما" زي جماعة هلال مريخ كل أنسان حرامي وكل مشروع نصب أرجو البحث في المر بجدية ودراسة المر من كل جوانبه مع أخذ الضمانات الكافية والدخول او عدم الدخول ولكن التشكيك في أي شيء بدون دليل ده مرض والعياذ بالله


ردود على Mustafa Mohmmed Ali
United States [سودانى وطنى جدا اكثر من نافع] 05-27-2012 11:54 AM
عذا الشخص نصاب وهو اصلا ليس مهندس وانا احلف بالله على ما اقول!

United States [سامي فضل] 05-27-2012 10:05 AM
لا يلدغ مؤمن من حجر مرتين ...طيب كيف معاك لو الف مرة .....الواحد المضتر ..هو الوحيد الممكن يلجا للجماعة ديل ...السؤال متين الناس دي حلوا مشكلة زول ....والله برنامج الزول دا اكبر ماسورة في الدنيا ...البخش بركب ما بمرق خالص ...


#375747 [faten ahmed]
5.00/5 (4 صوت)

05-26-2012 04:52 PM
لقد قمت بزيارة الشركة في الطابق الثاني للعمارة ولحظة وصولي اليها تخيلت انني ساقضي اليوم اكمله نسبة لكثرة العملاء ولكنني تفاجأة بان الشركة خالية من الزوار ولم اخفي استقرابي وسألت الموظفة لماذا الشركة ليس بها زوار اذا كنتوا تقدموا خدمات للمواطن؟ فلم اجد اجابة ومشكورات الموظفات اخر اناقة وراس فاضي من ابسط المعلومات وانا مسئولة عما اكتبه امام الخلق وامام الله
سألت من العروض الموجوده وجاهزة فذكرت لي الموظفة يان هناك شقق بشمبات وهي جاهزة استفسرت عن
السعر وطريقة التسديد والحقتها بسؤال عن تفاصيل الشقة من غرف وملحقات والله وعلي ما اقول شهيد
الموظفة لم تستطيع الاجابة علي استفساراتي فقلت لها كيف تقبلي يشركة لا تملكك معلومات وتكوني
في وضع حرج مع الزباين وانا خارجة وفي اشد الغضب وذكرت امام موظف ان هذا كلام فارغ ،وانا احضر
احدي اللقاءات في النيل الازرق تفاجأة بذلك الموظف الذي قابلته في الشركة يقدمه المزيع بانه
مدير الشركة وصيتي للمدير ملك الموظفات المعلومات التي لا تغيب علي الزبون فالزبون ليس غبي ولا تضعهن في موقف الغبيات وهن عنوان الشركة اوصيهن بالاحتشام قالشركة ليست للعارضات انما لتقديم
الخدمات للمواطن


#375746 [MAHMOUDJADEED]
1.00/5 (1 صوت)

05-26-2012 04:50 PM
يا جماعة باختصار شديد هناك عرض وطلب والمسألة واضحة قدامك لو عرضهم ناسبك وافقت ولو ما ناسبك انسحبت بالتي هي أحسن . شنو كل واحد شاني حملة الزول ده حرامي رغم انو الصورة ما واضحة واحد يقول ليك أبني براك ( أنا لو عندي كاش ما ببني براي بدون ما أشاورك !! مثل هذه الخدمات تناسب من لا يملك الامكانيات الآنية عشان كدة بيلجأ لمثل هذه الشركات لأنك لو انتظرت تجمع كروش عشان تبني واطاتك أصبحت وبدل ما تكون الزيادة 6% في السنة حتكون 60% في السنة.حيجي واحد ناطي يقول لي أنت شريك في تساهيل وأقول له مقدماً ( يا ريت ).


#375734 [ود اللعوته]
5.00/5 (1 صوت)

05-26-2012 04:31 PM
اولا اريد ان احذر من التعامل مع هذه الشركات فلدى علاقه وثيقه تربطنى بااحد الموظفين فى شركه اتصالات معروفه فى السودان وشركه مواسير اقصد تساهيل عميله لدى الشركه فهى تشترى منها خدمه ولكن بعد ان صدرت الفاتوره لمطالبه شركه تساهيل باالدفع كبو الزوغه عديل وامقادرين المو فى زول منهم وخالد الفوق دا العمل فيهو القصه


#375728 [sama]
4.59/5 (9 صوت)

05-26-2012 04:17 PM
يا مغتربين إنتو شغالين ليل نهار بعرقكم و دمكم ذى الطاحونة المدورة 24 ساعة وبعيدين من الحاصل فى السودان من غش و خداع وسرقة الواحد أخوه و لد أمه و أبوه لو لقى فرصة فيه بيسرقه أوعكم تنخدعوا حصلت قصص كثيرة لا حصر لها دفع أصحابها مالهم و فى النهاية يا هروب صاحب الشركة و سفره للخارج يا محاكم لا نهاية لها يا موت أو شلل صاحب المنزل خاصة الأيام دى و ربح 6 بالمائة أحسبها كم؟؟؟؟؟؟


#375725 [عثمان محمد]
4.07/5 (5 صوت)

05-26-2012 04:15 PM
سعادة مدير شركة تساهيل
السلام عليكم ورحمة الله
لقد اتطلعت على موضوعكم الخاص بالسكن والتقسط العقارى واو ان اسالكم عن التالى
1- هل هامش الربح من الاجمالى ام من المتبقى
2- وهل هو مركب ومكرر ام يضاف على المتبقى ةيقسم على مدة السداد شهرى .
نامل الافادة
وشكرا


ردود على عثمان محمد
United States [مواطن سودانى] 05-26-2012 06:01 PM
برد عليك أنا يا خوى, دى شغلتنا. حاديك ليها بالبلدى الواضح عشان تكون على بينة لو داير تخش

1. هامش الربح من الإجمالى وليس من المتبقى, المبلغ القدر الهجمة الأخدتو فى الأول هو البيحسبوليك منو هامش الربح لحدى قسطك الأخير ولو كان قسطك الاخير طرادة.

2. هامش الربح تراكمى, يعنى لو حترجع قروشم فى سنتين حيربحوا فيك 12% من المبلغ الكلى (القدر الهجمة الشلتو فى الأول) ولو فى 3 سنين (18%) ولو فى 10 سنين بتلقى روحك مرجع قروشهم + 60% يعنى لو شلتا منهم 100 مليون, بترجعا بعد 10 سنين 160 مليون.

دا طبعا غير باقى الرسوم الادارية البتختلف من شركة لشركة


#375724 [عبد المنعم الجعلي محمد]
4.07/5 (5 صوت)

05-26-2012 04:13 PM
هي فكرة جيدة اذا كانت ضمانات الشركة بالنسبة للعميل واضحة وموثوق بها ولكن نخشي كما حدثت لبعض اخواننا من شركات اخري لم يجدوا اي شئ من مبلغ المقدم ،،،ولكن حسب علمي ان هنالك افاء للمغتربين من نسبة ربح السنة الاولي


#375719 [داير العرس]
4.89/5 (10 صوت)

05-26-2012 04:08 PM
المرجو من شركة تساهيل تعريف نفسها اكتر ..... و التعامل بمهنية ...بمعنى عليهم تعريف انفسهم بصورة اكتر شفافية ...يعنى السجل التجارى للشركة من هم المؤسسون .... المجال الرئيسى للشركة ...عدد الموظفين و المهندسين .... المشاريع التى تم تنفيذها ...رسالة الشركة رؤيتها ...حجم راس المال و كذلك حجم راس المال العامل .... و ميزانيتها ان كانت شركة مساهمة .... و الصورة الموجودة للمدير العام و الله تخوف ..... و تخلى الواحد يفكر الف مرة قبل الاستثمار ... و بعدين عايزن كمان نعرف علاقتهم مع البنوك لان من الطبيعى ان الشركة حتاخد قروض عشان تبنى ..مين البنوك اللى بتتعامل معها ..و كم نسبة الفايدة ...و غير كده اهم حاجة هى الجودة ...معيار الجودة ... ما ممكن تبنى لى بيت باقل مواصفات الجودة المعروفة ...يعنى بيت ما يقيف للخريف ...و سلام


ردود على داير العرس
United States [سودانى وطنى جدا اكثر من نافع] 05-27-2012 11:51 AM
لك مليون حقفى التخوف وللتاكيد اذهب لتعليقى اسفل هذه الصفحة لتعرف من هو هذا المهندس المدعى المحتال!


#375717 [ود العمدة]
3.54/5 (6 صوت)

05-26-2012 04:07 PM
الاخوة المغتربين بالذات اي واحد عاوز ابني بيت لا تتورطوا في الشركات المشبوهبة علي القسم عمرايروح هدر وبيت ما تقلى العاوز ابني بيته يمد رجله قدر لحافه الزمن بقي صعب والريال بين فكي التمساح. الحذز من شركات التقسيط


#375700 [الحقيقة]
0.00/5 (0 صوت)

05-26-2012 03:39 PM
بحيث تقسط من سنة الى خمس سنوات في حالة التشطيب والتكميل، بهامش ربح «6%» لكل سنة وتسلم الاقساط في شكل شيكات.

انه الربا و( الفايظ ) بام عينه لان ذلك يعتبر فائدة مركبة
اين هيئة الماء المسلمين.؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#375698 [بابكر الشيخ]
0.00/5 (0 صوت)

05-26-2012 03:37 PM
أنالدي بيت في الخرطوم ((السجانة شرق)) جنوب النادي الأهلي أريد تشييده وأنا مقيم بالسعودية بالمدينة المنورة حاولت مراراً الوصول لهذه الشركة دون فائدة ولرغبتي الأكيدة يرجى الأتصال على جوالي رقم0507743669 أو على البريد الألكتروني الآتي:
[email protected]


ردود على بابكر الشيخ
United States [صادق عبدالله] 05-27-2012 02:10 PM
انا ايضا مقيم فى السعودية وفىنفس المهنة انا ذهبت عندهم وتقييمى لم اجد فائدة من التعامل الا اذا كان هنالك استثمار مجزى الدخل

United States [سودانى وطنى جدا اكثر من نافع] 05-27-2012 11:50 AM
نصيحة مخلصة لوجه الله تعالى ابتعد عن هذه الشركة وهذا الشخص والاسباب موضحة فى تعليقى اسفل الصفحة! وان اعرف هولاء الناس معرفة جيدة وشخصية هولاء بالمختصر لصوص فلا تتورط معهم!ابنى بيتك لوحدك او وكل اشقائك او اى من اقربائك ممن تثق فيهم او اذهب للشركات المحترمة وهى موجودة

United States [الزول الكان سَمِحْ] 05-26-2012 06:35 PM
اخوى بابكر

اسمع نصيحتى ...لم قروشك عليك ما عدت مقيم وأعمل على إدخار المزيد حتى يتبدل الحال فى بلدنا

ديل عالم نصابين ربويين لايخافون الله فى شئ عشان بعدين ما تعضى أصابع الندم وتكتر من ( ياريت )


#375694 [عنقالي]
5.00/5 (9 صوت)

05-26-2012 03:35 PM
طبعا لا يخفى على القارئ أن اللقاء الصحفي مدفوع الاجر لأجل الدعاية ليس إلا خذ مثلا :
سأل الصحفي سعادة المدير عن الضمانات التي يقدمها العميل للشركة ولكن نسى أو تناسى السؤال المعاكس له وهو ما هي الضمانات التي تقدمها الشركة للعميل حيث أن العميل يجب أن يدفع 30% من التكلفة الكلية يعني مثلا لو عندك أرض عايز تبنيها طابق واحد مع التأسيس لاربع طوابق نفترض أن التكلفة كانت 400 الف وتريد تسديدالقرض على خمس سنوات تكون نسبة أرباح كل سنة 24000 مضروبة في خمس سنوات يكون التكلفة الكلية 520 الف لما تحسب نسبة المقدم وهي 30% تطلع معاك 156000 لما تضيف ليها رسوم البناء والترخيص والخرائط الهندسية تقفل معاك 200 الف لاحظ أن التكلفة الفعلية 400 الف يعني تدفع من قولة تيت نص قيمة البناء، طبعا ده إذا اعتبرنا أنهم أمينين في حساب التكلفة ولم يبالغوا في الاسعار
نصيحتي لكل واحد عايز يبني يحاول ينجز شوية شوية لحدي ما يخلص ولا يتورط في هكذا شركات مشبوهه


ردود على عنقالي
United States [Kunta Kinte] 05-26-2012 05:49 PM
انت فعلا عنقالى كبير وانا اتفق معك 100%

United States [mohmd] 05-26-2012 04:45 PM
وبعدين نسيت حاجة وبعد ده كله يعمل ليك زيادة 40% فرق عملة لأنه الجنيه كل يوم نازل!


#375693 [ود الشمالية]
5.00/5 (3 صوت)

05-26-2012 03:34 PM
في البداية نود ان نعرف مصدر المال
وهو حق مشروع لكل من يتعامل مع اي جهة
في حال انها اموال افراد
كشوفات الحساب البنكية الداخلية والخاجية (المقدرة المالية)
مجلس الادارة وعضويته
وممكن تكون في كتيب تعريفي بالشركة للتحقق منها
والا فانها عمليات غسيل اموال وتلاعب (سوق التساهيل-سوق المواسير)


#375671 [bank]
0.00/5 (0 صوت)

05-26-2012 02:52 PM
بما ان همكم هو رفع بعض المعاناة عن كاهل المواطن والله ده براهو شعور تشكرون عليه ..... بس المهم قولو لينا رائ الدين في هامش الربح ده ال 6% دي ؟؟ عشان الناس ما تخش في المحظور .....


#375668 [مواطن سودانى]
5.00/5 (2 صوت)

05-26-2012 02:49 PM
دى شركة تمويل عقارى وهذه الشركات رؤوس أموالها عادة ما تكون بمئات الملايين (دولار) مثلها مثل البنوك, من صاحب هذه الشركة؟, ومن هذا المطل علينا بصفته مدير الشركة؟


#375662 [خالد عبدالرحمن]
1.50/5 (2 صوت)

05-26-2012 02:46 PM
ارجو من الاخوة الانتباه والتاكد قبل الدخول مع هذة الشركة في اي التزامات وعدم دفع المقدم قبل التأكد من وجود ضامن لهذة الشركة , انالا اشك فيهم بشكل مؤكد ولكن والله علي ما اقول شهيد الراجل الفي الصورة دا انا شاكي فيه انو حرامي وبناء علي تجربة قديمة منذ 12 عاما رغم انو الصورة المنشورة ما واضحة وممكن يكون شخص تاني لذا ارجو عدم التسرع والله من وراء القصد ...


#375637 [المحسي]
5.00/5 (2 صوت)

05-26-2012 02:03 PM
دعاية مجانية ،، كلهم نصابين ، آل تساهيل آل


#375630 [ابومنيب]
5.00/5 (2 صوت)

05-26-2012 01:55 PM
وشيكات شخصية،!!!!!!!


أحذورا ياناس تحرير الشيكات لأى سبب كان لأن مجرد تحرير شيك جريمة جنائيةولا يجوز إيقافه أو تعطيله ..... فضمانات الشيكات خطرة جدا ... والأيام مامعروفة خاصة فى السودان ... يعنى العامل فيها وزير مالية ده هسى فى السودان.. ممكن بعد سنتين حق الإيجار ماعندوا !!!\


لا ترهنوا مستقبلكم بشيك أى كانت الضمانات التى ستقدمها هذه الشركة !!!! ولماذا لا تقدم هى ضماناتها بحسن الادء والصنعة بموجب شيك وضمان العيوب !!!


ردود على ابومنيب
United States [Sudani] 05-26-2012 10:25 PM
Thank you heaps to all commentators for their great and precious advise, it's quite enough for expatriates to think again and again before involving into such deals,



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية

تقييم
7.75/10 (4 صوت)





الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة