الأخبار
أخبار إقليمية
غازي سليمان : لو أبلغني الترابي من وقت مبكر لأحضرت العروس إلى المسجد!!،، الضيوف الذين زعلوا وخرجوا صعاليك بحق وحقيقة.!
غازي سليمان : لو أبلغني الترابي من وقت مبكر لأحضرت العروس إلى المسجد!!،، الضيوف الذين زعلوا وخرجوا صعاليك بحق وحقيقة.!
غازي سليمان : لو أبلغني الترابي من وقت مبكر لأحضرت العروس إلى المسجد!!،، الضيوف الذين زعلوا وخرجوا صعاليك بحق وحقيقة.!


كنت مؤدبا جدا على غير العادة!،،الشيوعية شرف لا أدعيه!!
01-28-2013 03:28 AM
رغم أنه يرفض هذا التصنيف، إلا أنه شخصية "مثيرة للجدل" أينما حل، في السياسة والقانون والاجتماع.. دائما ما يكون عنصر المفاجأة حاضرا ضمن تصرفاته وأقواله وأفعاله.. يتصدر بين فينة وأخرى مينشيتات الصحف.. كان في وقت من الأوقات منتميا للحركة الشعبية وفي ذات الوقت يوجه لأعضائها نقدا أقرب إلى (الشتيمة)، ثم يعلن تأييده لرئيس الجمهورية عمر البشير وينتقد المؤتمر الوطني، يقول إنه حوار الشيخ حسن الترابي إلا أنه لا يرى إمكانية الانضمام للمؤتمر الشعبي وبين هذه المتناقضات يتمكن غازي سليمان من المزج بانسجام..
بعيدا هذه المرة عن السياسة وتحالف المعارضة، هاجم المحامي غازي سليمان بعض ضيوفه في مسجد العصمة بالخرطوم حينما أبدوا ضيقا من خطبه طويلة كان يقولها الشيخ د.حسن عبد الله الترابي، أثناء عقد قران ابنه.. غازي مسك المايكروفون وقال للضيوف "الماعجبو مع السلامة"..
(السوداني) أجرت حوارا قصيرا مع المحامي الشهير، فقال الكثير المثير كعادته..
أجرى الحوار: القسم السياسي
* ما صحة ما كتب عن أنك قلت لضيوفك الذين دعوتهم لزواج ابنك " الماعجبو، مع السلامة" حينما احتجوا على طول خطبة الترابي؟
نعم قلت ذلك.. لقد دعيت أعدادا كبيرة من أصدقائي ورموز الحركة الوطنية على رأسهم الصادق عبد الله عبد الماجد وحسن عبد الله الترابي وعبد الباسط سبدرات، وكان جامع العصمة مكتظا بأهلنا الجعليين العمراب وغيرهم، وبدأنا عقد القران بآيات من القرآن الكريم، قرأها علينا المجاهد الكبير الشيخ دفع الله، وبعد أن تحدث دفع الله لمدة نصف ساعة قام بتسليم المايكروفون لحسن عبد الله الترابي ليقوم بإجراءات عقد الزواج.. وتحدث الدكتور حديث المثقف الواعي والعالم الفذ حول الفرق بين عقد الزواج وعقود المعاملات الأخرى مثل عقد الإيجار وعقود البيع الآنية، واسترسل في محاضرة قيمة لمن يريد الاستماع لكن فجأة وقف أحد الحضور لا أعرف من هو، وأنا شخصيا لا أدعو العامة..
* (مقاطعة) من تقصد بالعامة؟
الزول العامي
* يعني أنك تدعو المشاهير فقط.. لم نفهم قصدك؟
الزول الما بفهم..الرجل العامي أنا لا أناديه أو أدعوه.
* ثم ما الذي حدث؟
وقف أحدهم وأعتقد أنه غير صحيح العقل، أمام الترابي حينما كان يتحدث وقال له يازول اختصر الكلام إحنا ما عندنا زمن.. وكانت ردة فعلي عادية جدا، باعتباري دعيت الترابي كنت مؤدبا جدا وقلت أنا صاحب هذه الدعوة وأنا والد العريس وأنا أتحمل مسئولية الدكتور الترابي كما أني شخصيا أسمح للترابي بالتحدث إلى الصباح، العاجبو ومن يريد أن يتعلم فليستمع وليصبر، عدا ذلك ودعناه الله والرسول ومع السلامة.. بعدها حصل هرج ومرج وأعتقد أنهم مدسوسون، خرجوا وانتهى الاحتفال بإتمام العقد.. هذا ما حدث.
* دفاعك عن الترابي، هل فقط لأنه مجرد شخص مدعو أم لعلاقة وطيدة تربطك به منذ القدم؟
هل في شخص محترم في السودان ليست لديه علاقة وطيدة مع الشيخ حسن الترابي؟ علاقتي مع الترابي بدأت بأمانة حينما قاد شعب السودان في ثورة أكتوبر وأطاح بحكم الفريق إبراهيم عبود، وكنت أحد تلاميذه في جامعة الخرطوم.
* هل لهذا السبب فقط تحب الترابي أم هناك أسبابا أخرى؟
حبي للترابي حب موضوعي.. أحبه لمساهمته في العمل العام وتجرده وأمانته ونزاهته وهو رجل شفاف..
* هل تكن له هذه المشاعر منذ أن عرفته إلى الآن أم أنها تعرضت لهزات في فترة من الفترات؟
إلى الآن هذه المشاعر وإلى أن يرث الله الأرض وما عليها، وهو يبادلني نفس الشعور والاحترام، واعتقلت في الماضي بسببه وعذبت لأكثر من مرة.
* ألا ترى أنه كان يمكن أن تكون أكثر لباقة مع ضيوفك المدعوين، مثلا أن تحاول تصبيرهم بدلا عن طردهم بصورة ناعمة؟
أولا أنا كنت مؤدبا جدا، ولست غازي سليمان المعروف لأهالي أم درمان.. كان بإمكاني أن أكون أفظع من ذلك.. كون أن أقول للناس ودعتكم الله والرسول فهذا منتهى اللباقة والأدب ولا يعكس شخصيتي الحقيقية، كان بإمكاني أن أقول لهم برة يا صعاليك!!..
* لماذا زعل الضيوف من كلامك وخرجوا إذا؟
زعلوا لأنهم صعاليك بحق وحقيقة..
* عفوا أستاذ غازي، ليس جميع من غضب من تصرفك هم بما وصفت.. ألم تتأكد من ذلك؟
لا أعرف.. هذا مكان عام،.. لكني شخصيا لم أرسل دعوة لأشخاص غير محترمين إنما الدعوات كانت للمحترمين فقط.
* ماذا كانت ردة فعلهم؟
عرفت لاحقا أن بعض الصعاليك حينما قلت لهم ما قلت في المسجد، قالوا لي من الخلف أسكت يا شيوعي لكن ردي عليهم أن هذه تهمة لا أنفيها وشرف لا أدعيه.. ويكفي الشيوعيين السودانيين فخرا أن ليس من بينهم فاسد ماليا ولا أخلاقيا.
* هل أنت زعلان من الحكومة؟
هذا سؤال سياسي بحت..
* يبدو أنك لم تدعُ شخصيات بارزة من الحكومة؟
أكثر من كون أن يأتي الرجل المحترم وزير العدل محمد بشارة دوسة، وعبد الباسط سبدرات و مأمون حميدة، تاني عايز منو في الحكومة؟.. ثم أني لا أدعو الحكومة إنما شخصيات احترمها، ولا تهمني الحكومة، ولم أدعُ من دعوت لهذه الصفة، إنما دعيتهم لعلاقتي الشخصية معهم..إذا ناس الحكومة جاءوا مرحبا بهم وإن لم يأتوا فأنا غير محتاج لهم.. قال حكومة قال!! ياتو حكومة دة؟
* هل فعلا حضرت زواج ابنك بعض الشخصيات من الجنوب وقدامى الأصدقاء من الحركة الشعبية؟
هذا الكلام غير صحيح.. من جاء هو صديقي المحترم لام أكول وحرسه..الجنوبيون فاتوا والقاعدين هم ناس أبيي..
* هل طلبت من الترابي أن يقول الخطبة أم أنه تبرع من تلقاء نفسه؟
أنا طلبت أن يتم العقد على يديه.. لأن العقد الذي يتم على يد حسن الترابي عقد مبارك ومسنود ومقبول من الله رب العالمين.
* ما رأيك في الفتوى التي قالها "لماذا لا تكون المرأة حاضرة في المسجد مع الرجال لتشهد عقد قرانها"؟
طبعا.. الترابي لو قال لي منذ وقت مبكر لأحضرت العريس والعروس في المسجد.. أنا طبعا من الناحية الثقافية والفقهية حوار ملتزم في كل ما يقول وهو لا يقول إلا الصحيح..
* لماذا إذا لا تنضم إلى المؤتمر الشعبي؟
المؤتمر الشعبي لا يحتاج إلى غازي سليمان، ويكفي المؤتمر الشعبي أن غازي سليمان دائما تتوافق أفكاره مع زعيمه الشيخ حسن عبد الله الترابي.. أنا لا أنفع في أي حزب سياسي.
* لا ميول سياسية لديك الآن؟
لا على الإطلاق.. لدى ميول لأفكاري فقط
* وإن التقت أفكارك مع حزب معين.. ما المانع؟
لكنها لا تلتقي بنسبة 100%.. إنما فقط في بعض الأشياء.. أفكاري مثلا تلتقي مع المؤتمر الوطني فيما يختص بضرورة هزيمة ما يسمى الجبهة الثورية والموقعين على مذكرة الفجر الكاذب لأنها مذكرة صهيونية تستهدف السودان الشمالي وسلامة أراضيه.. لكني في أشياء أخرى أختلف مع "الوطني" في طريقة إدارة البلاد ومحاربة الفساد.. أشياء كثيرة جدا.
* قلت إنك تؤمن بما يقوله الترابي.. ماذا عن الناحية السياسية؟
أنا قلت من ناحية ثقافية وشرعية أنا حوار من حواري الدكتور حسن عبد الله الترابي.

السوداني


تعليقات 190 | إهداء 0 | زيارات 38126


صفحة 1 من 3123>
التعليقات
#592137 [طاكرج]
0.00/5 (0 صوت)

02-22-2013 10:03 AM
غازي جا !! غازي عقد !! غازي سافي!! انا مابدورو!!! ماعندكم موضوع هسع مالكم ومال الراجل خبر اتنقل وهو نفسو ماعارفو انتو مالكم؟!! وهميين جدا


#588389 [البوعزيزي]
0.00/5 (0 صوت)

02-18-2013 11:28 AM
جنبلاط السوداني


#587853 [الجزولى]
0.00/5 (0 صوت)

02-17-2013 07:40 PM
لا اريد ان اتطرق الىطرده لضيوفه بل من تبركه بمن هو احرى بتبريكه وضياع اخرته


#586168 [Abu Rasheed]
0.00/5 (0 صوت)

02-15-2013 11:20 PM
ياحسرتاه وألف حسرة على ما تبقى من رجال في آسن السياسة في بلادنا الطيبة وإخص على كل رخيص من أشباح الرجال. ليس مستغربا كل ما يرد من أقوال وأفعال في أيامنا هذه.


#585770 [مهدى]
0.00/5 (0 صوت)

02-15-2013 01:47 PM
إنت كيف تسمح لنفسك أن تخاطب ضيف من دعاك لحفله ؟
هل لكى تسيئ لمن دعاه ؟
يعنى كل ماتقولوهو فى الاعلام ضد الترابى ماكفاية ؟
جارتنا مصر قالت لم تعرف من لاسلاميين إلا الترابى
وهل ترضى انت ان تعامل بهذه الطريقة؟
طيب أصلا لو عندك موضوع مهم مش أحسن تكتبوا فى ورقة صقيرونتى وتديها ليه او لمن يوصلها له؟
أفتكر الصعلوك هنا مظلوم لكى يتم مقارنته بك...


#579040 [هادي الطبع]
0.00/5 (0 صوت)

02-07-2013 09:55 AM
اي دين هذا يبيح للمراة الجلوس في بيت الله وعقد قرانها بنفسها ...!!!


ردود على هادي الطبع
United States [ابو ادم] 02-09-2013 11:15 AM
هات انت مايمنع المراة ان تجلس في بيت الله وتحضر العقد والشهادة الم يرد في القران الاخذ بشهادة المراة ام ان بيوت الله حكرا للرجال ؟ اتق الله ولا تجادل بلا علم


#576237 [abbas]
0.00/5 (0 صوت)

02-04-2013 10:33 AM
Dr Al Fatih is absolutely right, the man is scizophrenic.He has to look for treatment


ردود على abbas
United States [depo] 02-21-2013 09:22 AM
الأخ عباس الرجاء الكتابه بالعربي أو الإنجليزية السليمة مافي داعي للفلسفة
the man is schizophrenic تعني الرجل هو الفصام وحتي كلمة schizophrenic غير صحيحة إملائياً لاحظ ليها والصحيح أن تكتب The man suffers from schizophrenia
وليست he has to look for treatment الصحيح he have to look for treatment
والله أعلم
الله يرضي عليكم ما يجيبو لينا الضغط
وخلونا في العربية بتاعتنا أحسن


#575500 [حذيفة]
4.00/5 (2 صوت)

02-03-2013 12:47 PM
غازي سليمان مثال للمعارض الذي يفرق بين معارضة الحزب السياسي الفلاني ومعارضة الوطن وهذه حقيقة لا يستطيع استيعابها او لا يريد استيعابها الكثيرون ممن يرون في التعليق وسيلة للتنفيس عن حقد كامن...فمثلا الذين يقولون انه اي غازي ليس بالمثقف فهذا هطلا فهو محامي ناجح + حمله لدرجتي بكالريوس من جامعة الخرطوم بالاضافة للذين يرمون الترابي بانه غير مؤهل لعقد عقران تلك السنة التي يقوم بها اشخاص فهمهم للقران والسنة سطحي للغاية "محفوطات فقط" فما بالكم برجل يشهد له علماء الدين الاسلامي في امريكا واروبا و اسيا "ماليزيا تحديدا" ناهيك عن بلاد افريقيا و العرب

هذا الرجل الذي قاطع الترابي غير محترم وكل الذين حذو حذوه ..لماذا؟ لان القاعدة تقول اذا انتهت الصلاة وقام احد الناس ليخطب او يلقي كلمة فمن حق اي شخص ان يستمع او ينصرف والشئ...الشخص الوحيد الذي من حقه ايقاف الترابي او اي متحدث هو صاحب غازي او امام المسجد اذا حان وقت الصلاة التالية


ردود على حذيفة
United States [sudani] 02-03-2013 07:31 PM
والله المابيعرفك بيحترمك دى مقولة قديمة والناس ديل كلهم مابعرفوهو بس نحنا البنعرفو


#572565 [sami irahim]
5.00/5 (4 صوت)

01-31-2013 06:14 AM
هذه واحدة من علامات الانحطاط السياسي والاجتماعي في السودان
انه واحد مريض مثل غازي سليمان يظهر في الصحف،،، هذا زمانك يا مهازل فامرحي
والله يرفع السودان برفع الرجال
ويطمس على اشباه الرجال


ردود على sami irahim
United States [ابو ادم] 02-09-2013 11:19 AM
غازي كان معارضا للانقاذ عندما كان كل الناس خائفة ومندسة ومنبرشة وله دور كبير في التربية الوطنية للطلاب عبر ندواته في كل جامعات السودان والاستاذ حقوقي وسياسي معروف اعطو الناس حقهم


#572450 [ودالجزيرة]
3.75/5 (3 صوت)

01-30-2013 10:28 PM
زول مفترى وبتاع مظاهر زول يطرد ضيوفه ده يقولوا عليه شنو


#572448 [ودالجزيرة]
3.00/5 (1 صوت)

01-30-2013 10:26 PM
مفترى وبتاع مصالح لا برى الا مصلحته ومتكبر وبتاع مظاهر وماعندو مبدأ ولا يحترم الغير
زول يطرد ضيوفه ده زول عاقل


#571444 [وريف]
4.00/5 (2 صوت)

01-29-2013 09:42 PM
نصيحتي
ان تعيدوا العقد مرة تانية
لان الترابي غير كفؤ بالموضوع
يعني هو شن عرفو بالشريعة وعقود الزواج


ردود على وريف
United States [خرخرة] 02-02-2013 09:58 PM
ههههههههههههههههههههههههههههه اتلم المتعوس على خائب الرجا


#571433 [موسى]
0.00/5 (0 صوت)

01-29-2013 09:28 PM
انسان سمج
فاوه ساكت


#571393 [Dr. ALfatih]
0.00/5 (0 صوت)

01-29-2013 08:15 PM
شيزوفرينيا .هذا هو التشخيص الصحيح لحالة الأستاذ غازى سليمان ،ما تتعبوا نفسكم فى بحث حالته


#571159 [الشاعر]
3.00/5 (1 صوت)

01-29-2013 02:31 PM
الرد علىAlmo3lim]

اولا انا راجل اقليمى عشان ماتفهمنى غلط انا عايشت ناس العاصمه فى الغربه ولقيتهم ناس رجال(مش يعنى شايلين سكاكين وعكاكيز) ديل رجال مواقف وعينهم مليانه والمواقف كثيرة(المرض-العدم-الشورة-ناس حجة ومنطق مخلوط بالشجاعه-وعينهم حمره عند الضرورة وناس مشنقة-بيستقبلوك ويودعوك بالابتسامه-بينتظروك تاكل اول وتشبع اول-بيعزوك ويدرسوك كيف تحترم الضيف-وبيكتموا الضحكه حتى لو كان شكلك مضحك مراعاه لشعورك-بيودعوك على امل العوده وصدقنى ممكن دية كلها تكون مجاملات لانهم ناس زوق رفيع وهكزا تربوا عاش العاصميين فهم اهل الحضارة والزوق والفهم.(تصرف غازى مبنى على تصرف الاول وهو زا مغزى-اولا حتى لايظن الضيوف بان الرجل قريب غازى-ثانيا رد الاعتبار للضيوف-بس المشكله غازى جمع الناس كلهم وقال الماعاجبوا كان ممكن يوجه الكلام للرجل المعنى فقط ويقول ليه ازا ماعاجبك الباب فاتح-ولا شنو ياجماعه انصفوا الراجل.


ردود على الشاعر
United States [Almo3lim] 01-29-2013 06:58 PM
شكرا يا الشاعر على سعة الصدر ..

ذكرت هنا ((تصرف غازى مبنى على تصرف الاول وهو زا مغزى-اولا حتى لايظن الضيوف بان الرجل قريب غازى-ثانيا رد الاعتبار للضيوف-بس المشكله غازى جمع الناس كلهم وقال الماعاجبوا كان ممكن يوجه الكلام للرجل المعنى فقط ويقول ليه ازا ماعاجبك الباب فاتح)

و لو غازي كان لديه مثل فهمك لما كانت هناك أي إشكالية ، لكن لكي تعلم بأنه خالي ذهن من الكياسة و الإتيكيت لم تسعفه ذاكرته (الخربة) أثناء هذا اللقاء الصحفي و أصر على التعالي على العامة بل تمادى بوصفهم بالصعاليك ..

و عليه فلاخلاف بيننا بعد هذا التوضيح فغازي رجل غير ( حكيم) و سلوكه يشير ( للعته)..

و غازي أدان نفسه و ما أمل لإنصافه بالباطل )..

و عليك الله ما تحرق رزك على ( طبخه) معفنه و محمضه ..


#571157 [المهرج غازي]
4.75/5 (8 صوت)

01-29-2013 02:25 PM
غازي جاب الترابي يعقد لبنته عشات الترابي هو من عقد للانقاذ ولسع مافي زوووول قادر يطلقها داير يضمن بتو ما تتطلق


#571143 [sahlzahir]
1.00/5 (1 صوت)

01-29-2013 02:06 PM
تعليقات القراء تدل أن الانقاذ سوف تستمر طويلا وتكون نجحت فى التسطيح والتجهيل .. وأتمنى أن يكون هناك قطاع كبير يتمتع بالوعى والعمق ولديه قدره للابداع .. أو تكون الانقاذ سخرت جنودا متخصصة لهذة التعليقات الضحلة وهذا نوع من لجم الاسفير .. طبعا هناك تعليقات جادة ومحترمة


#571095 [kakan]
0.00/5 (0 صوت)

01-29-2013 01:03 PM
السيد المحامي
كتب الراحل محمد طه محمد احمدبتاريخ 2ظ7ظ

و




















في ثالث ايام الانقاذ كتب الراحل محمد طه محمد معلقا علي رد الرفاق في الجبهة الديمقراطية بجامعة الخبعنوان رطوم في صحيفتهم مساء الخير علي مدير التحرير في صحيفة القوات المسلحة
في مقاله بعنوان هل هؤلاء الرجال جبهة بقولهم انما الجبهة هي هؤلاء الرجال وانا اقو لك انما العامة هم من استجلبوا لدعوتك ايها المتعاظم الكبير
اتمني السماع لمصطفي في عم عبدالرحيم لتدرك ان العامة هم عبق هذا الوطن وعطره وشموخه
















1989


ردود على kakan
United States [مواطن حر] 01-29-2013 09:12 PM
قلت شنو ؟


#571048 [سيدا]
5.00/5 (2 صوت)

01-29-2013 12:13 PM
غازي سليمان اكثر انسان انا اكرهه لانه مغتل اقليا وعافد للاهليه ومصر على ان يهشر نفسه فيما لايفهمه وكمان انسان متناقدلدرجه لايتوصف اني رايت متناقدين كثر لكن ما وجدت مثل غازي فهو يقول دعا ناس محترمين يعني هو محترم فكيف يصف الاخرين بالصعاليك لا ينكر انه شويعي لماذا الخلاف مع ميثاق الفجر الجديد ................الخ كثير من التناقد ولكن كرهي له سيتطور لدرجه كبيره يوما ما لان انا بعرفه انه كوز جبان خافي الحكايه لانه عارف ماذا يحصل له ولكن سيحصل له اسوء من ذلك


ردود على سيدا
United States [ابو الشباب] 02-10-2013 02:46 PM
عليك الله ما تقرفنا باللغة الما عارف جبتها من وين ... اكتب بعربية او بعامية او بانجليزية .. لكن ما تكتب لينا العربى بلهجة ميثاق الفجر الجديد ... مع انو كلامك عن غازى صاح وهو راجل متخلف ظاهرا و باطنا .. يكفيك الصورة المختوتة هنا ... وين المشكلة انو الواحد يكون مهندم و معارض .. ما شفتو الخواجات ديل بلبسو كيف .. الواحد كان ما بعرف اللبس ما شاف الناس بلبسو كيف ... و المصيبة انو محامى كمان ,,, اف """

United States [ابومحمد] 02-03-2013 02:00 AM
معقولة بس يكون مكروه اكتر من نافع الما نافع وربيع عبد العاطي وعبد الرحيم محمد حسين,كده انت انتهيت منه خالص خالص


#570900 [ma]
4.75/5 (5 صوت)

01-29-2013 09:40 AM
قالوا واحد من اهلك( الجعليين ؟؟؟؟ ) كان مسافر مع واحد شكري .. أها كل واحد كان بيفتخر بحسبه ونسبه وعند الظهيرة قالا تحت شجرة ظليلة مثمرة (لعلها شجرة هجليج) فقال الشكري للجعلي : آ ود العباس كدي حت لينا من اللالوب دا شوية ناكل منه . فما كان من الجعلي إلا أن قال : أنا جدي العباس أحت ليك انت اللالوب .. فسكت الشكري .. بعد قليل جاء أسد إلى تلك الشجرة التي فيها نقره ومقيله .. فصعد الجعلي إلى أعلى الشجرة آخذاً معه السيف وترك الشكري ومعه سوطه فقط . فأمسك الشكري بسوطه ونهر به الأسد ..جر آ كلب .. جر آ كلب إلى ان ابتعد الاسد .. أها باقي ليك قال لإبن عمه : ود العباس ، كدي وكت الله رفع القدم نزل لينا شوية من اللالوب .


ردود على ma
United States [الشاعر] 02-11-2013 04:26 PM
فى كلامك يعنى الشكرى مامن آل البيت طبعا غلطان ..الشكرى نسبو الى سيدى جعفر أبن أبى طالب (جعفر الطيار) صحح معلوماتك أو صحح معلومات الجعلى..وشكرا(أبواتك رجال تب مابعرفوا النيه الاسد المربعن الفى دربو منع الجيه)..ساده وفرسان

United States [Mohd] 01-29-2013 10:07 PM
فلاحة العربي داب سفروقو يجلب كلبو
يا يربط درب يرجي الاضينة يسلبو
الهيلكم حقيقة و فيها ما بتنغلبو
فالحين في القنيص ترعو و تعرفو تحلبو


#570628 [فيصل محمدخير]
5.00/5 (5 صوت)

01-29-2013 03:16 AM
عندما اطلعت على الموضوع ونظرت الى مؤشر طول الصفحه خمنت أن أغلب التعليقات لن تكون فى صالح غازى ...وقد كان ؟؟؟!!

أللهم الهمنا حب المساكين فمنهم من هو مجهول فى الارض معروف فى اهل السماء لو اقسم على الله ابره مستجاب الدعاء ويشفع فى خلق مثل مضر وربيعه !؟!
وعن أنس بن مالك رضي الله عنه، أن النبي صلى الله عليه وسلم قال: (اللهم أحيني مسكينا و أمتني مسكينا و احشرني في زمرة المساكين يوم القيامة) رواه الترمذي . وعن ابن عباس عن النبي صلى الله عليه وسلم قال: (أتاني الليلة آت أو أتاني الليلة ربي) وذكر الحديث، إلى أن قال: (قال: يا محمد ! قلت لبيك وسعديك، فقال: إذا صليت قل: اللهم إني أسألك فعل الخيرات وترك المنكرات، وحب المساكين، وإذا أردت بعبادك فتنة فاقبضني إليك غير مفتون) رواه الترمذي وحسنه.
وعن أبي ذر رضي الله عنه، قال: (أوصاني خليلي صلى الله عليه وسلم بخصال من الخير، أوصاني ألا أنظر إلى من هو فوقي، وأنظر إلى من هو دوني، وأوصاني بحب المساكين، والدنو منهم، وأوصاني أن أصل رحمي وإن أدبرت) رواه الطبراني وابن حبان في صحيحه ].
قال رسول الله صلى الله عليه وسلم «طوبى لعبد آخذ بعنان فرسه في سبيل الله أشعث رأسه مغبرة قدماه إن كان في الحراسة كان في الحراسة وإن كان في الساقة كان في الساقة إن استأذن لم يؤذن له وإن شفع لم يشفع» [صحيح البخاري
قال رسول الله صلى الله عليه وسلم ‏"‏ رب أشعث أغبر ذي طمرين لا يؤبه له لو أقسم على الله لأبره منهم البراء بن مالك ‏"‏ وقال ابن مسعود‏:‏ قال النبي صلى الله عليه وسلم ‏"‏ رب ذي طمرين لا يؤبه له لو أقسم على الله لأبره لو قال اللهم إني أسألك الجنة لأعطاه الجنة ولم يعطه من الدنيا شيئاً وقال صلى الله عليه وسلم ‏"‏ ألا أدلكم على أهل الجنة‏:‏ كل ضعيف مستضعف لو أقسم على الله لأبره وأهل النار كل متكبر مستكبر جواظ وقال أبو هريرة‏:‏ قال صلى الله عليه وسلم ‏"‏ إن أهل الجنة كل أشعث غير ذي طمرين لا يؤبه له الذي إذا استأذنوا على الأمراء لم يؤذن لهم وإذا خطبوا النساء لم ينكحوا وإذا قالوا لم ينصت لقولهم حوائج أحدهم تتخلل في صدره لو قسم نوره يوم القيامة على الناس لوسعهم ‏"‏ وقال صلى الله عليه وسلم ‏"‏ إن من أمتي من لو أتى أحدكم يسأله ديناراً لم يعطه إياه ولو سأله فلساً لم يعطه إياه ولو سأل الله الجنة لأعطاه إياها ولو سأله الدنيا لم يعطه إياها وما منعها إياه إلا لهوانها عليه رب ذي طمرين لا يؤبه له لو أقسم على الله لأبره وروي أن عمر رضي الله عنه دخل المسجد فرأى معاذ بن جبل يبكي عند قبر رسول الله صلى الله عليه وسلم فقال ما يبكيك فقال‏:‏ سمعت رسول الله صلى الله عليه وسلم يقول ‏"‏ إن اليسير من الرياء شرك وإن الله يحب الأتقياء الأخفياء الذين إن غابوا لم يفتقدوا وإن حضروا لم يعرفوا قلوبهم مصابيح الهدى ينجون من كل غبراء مظلمة‏.‏
وقال محمد بن سويد‏:‏ قحط أهل المدينة وكان بها رجل صالح لا يؤبه له ملازم لمسجد النبي صلى الله عليه وسلم فبينما هم في دعائهم إذ جاءهم رجل عليه طمران خلقان فصلى ركعتين أوجز فيهما ثم بسط يديه فقال‏:‏ يا رب أقسمت عليك إلا أمطرت علينا الساعة‏!‏ فلم يرد يديه ولم يقطع دعاءه حتى تغشت السماء بالغمام وأمطروا حتى صاح أهل المدينة من مخافة الغرق فقال‏:‏ يا رب إن كنت تعلم أنهم قد اكتفوا فارفع عنهم وسكن وتبع الرجل صاحبه الذي استسقى حتى عرف منزله ثم بكر عليه فخرج إليه فقال إني أتيك في حاجة‏!‏ فقال ما هي قال تخصني بدعوة قال‏:‏ سبحان الله‏!‏ أنت أنت وتسألني أن أخصك بدعوة ثم قال ما الذي بلغك ما رأيت قال‏:‏ أطع الله فيما أمرني ونهاني فسألت الله فأعطاني‏.‏
وقال ابن مسعود‏:‏ كونوا ينابيع العلم مصابيح الهدى أحلاس البيوت سرج الليل جدد القلوب خلقان الثياب تعرفون في أهل السماء وتخفون في أهل الأرض‏.‏
وقال أبو أمامة‏:‏ قال رسول الله صلى الله عليه وسلم ‏"‏ يقول الله تعالى إن أغبط أوليائي عبد مؤمن خفيف الحاذر ذو حظ من صلاة أحسن عبادة ربه وأطاعه في السر كان غامضاً في الناس لا يشار إليه بالأصابع ثم صبر على ذلك ‏"‏

أللهم أهدينى واهدى كل من ضل عن سبيلك


ردود على فيصل محمدخير
United States [عادل] 01-29-2013 11:31 AM
والله تعليقك يوزن آلاف مثل غازي ... اللهم اجعلنا من من تحبهم وترضى عنهم وتدخلهم مع الحبيب سيدنا محمد العبد النبي الرسول


#570570 [ود الماحي]
0.00/5 (0 صوت)

01-28-2013 11:15 PM
لأن العقد الذي يتم على يد حسن الترابي عقد مبارك ومسنود ومقبول من الله رب العالمين. ياخي أتقي الله هل أطلعت علي الغيب؟؟؟؟؟؟
يكفي الترابي انه كان السبب في جلب الحكومة الحالية قال قاد الإنتفاضة علي عبود. وأنت والترابي وأمثالك سبب بلاوي السودان


#570564 [Sabir]
5.00/5 (4 صوت)

01-28-2013 11:07 PM
الجنون فنون، وجنون خريف العمر يثير الشفقة أكثر. دكتور غازي سليمان يسيء لسمعته كأستاذ قانون ومحامي منذ فترة ليست بالقصيرة وأصبحت مداخلاته في أجهزة الإعلام تثير اشمئزاز من عرفوه. فقد أصبح لا يتوانى بالتلفظ بتعبيرات عنصرية وبإثارة الحمية القبلية التي لا يتمسك بها إلا من يعتريه مركب نقص. يظهر "صنبور الأموال" الذي توقف مع توقف ضخ نفط الجنوب قلب موازين كثيرة فأصبح دكتور غازي يخلط الأوراق ويتملق بصورة مقرفة. عندما يتبع المرء سلوكا انتهازيا ينبغي عليه أن يكون حريفا وإلا أثار الشفقة بدلا من السخط. حمانا الله.


ردود على Sabir
United States [محمد احمد] 01-29-2013 05:23 PM
با اخينا الراجل ده انا بعرفه شخصيا من وين جبت ليه الدكتوراة عمره ما كان دكتور لكن انا بعرفه من غير دك


#570561 [mohy]
0.00/5 (0 صوت)

01-28-2013 11:02 PM
حامد أبعصا


#570555 [مكاجر]
0.00/5 (0 صوت)

01-28-2013 10:54 PM
يا غازي يغز فيك سكين ميتة
امشي بلا غازي بلا وشخ معاك


#570549 [دا شنو]
5.00/5 (7 صوت)

01-28-2013 10:45 PM
البشتنة شنو ياغزغز بعد الكرفتة دي مالقيت لك مشط ولا خلال تضاير بة نيشك دا ؟ ولا فازلين تودر بة الغبشة دي ؟ انا اقترح عليك ان تهتم بنفسك ومظرهك قبل السياسة احسن ماتفط سطر.


ردود على دا شنو
United States [حاجة تحير] 01-29-2013 05:31 PM
دا كلو كوم ,حتى مستكثر يبزق السفة الشانقا دي....

United States [لاتعليق] 01-29-2013 05:28 PM
بداية الجنون كدا...................


#570543 [ودالشلال]
5.00/5 (2 صوت)

01-28-2013 10:37 PM
الشرف شنو؟الشيوعية ولا التركشة ؟ أنا اقترح عليك ياغازي ان تعالج امورك الشخصية بعيدا عن الاعلام , منو الجاك ومنو الزعل ومرق ولا العروس جات او ماجات دي امور مابتهمنا لامن قريب ولامن بعيد "الماضايق الوجع مابحس فية" ماراجيين خير لا منك ولامن شيخك وخطيبك الترابي!


ردود على ودالشلال
United States [ود القوس] 02-11-2013 10:07 AM
أصبت ياود الشلال اصلا الموضوع كلو شخصي وانصرافي لا بقدم ولا بأخر وخساة الواحد يضيع فيو زمنو!!


#570524 [البلولة]
0.00/5 (0 صوت)

01-28-2013 10:20 PM
قادي سجيمان وبس خلاص


#570517 [محجوب عبد المنعم حسن معني]
0.00/5 (0 صوت)

01-28-2013 10:07 PM
http://www.youtube.com/watch?feature=player_embedded&v=RQOVDN64ABo
سودانية توقع على عقد زواجها والعريس باكستاني الف مبروك


#570513 [ابو حسام]
3.63/5 (4 صوت)

01-28-2013 10:01 PM
هذا الرجل معتوه اتابعه منذ فتره طويله وحسب متابعته له يجب ان يكون فى سلة المهملات وان لا يعار اى اهتمام قال انا لا ادعو العواموالله لا اقبل بك ولا معشوقك حراسا امام منزلى المتواضع فى الكلاكه


#570491 [jini]
2.75/5 (5 صوت)

01-28-2013 09:33 PM
شلال وطاح بخربة مثل تونسي يعنى
هرار ولقى ليهو خرابة
اخرى وهر يا غازى بلدا ما فيها تمساح يقدل فيها الورل


#570477 [الجقر]
5.00/5 (1 صوت)

01-28-2013 08:58 PM
ياخي دا زول بتتعبوا في كلامه؟ غبشان زي البعاتي كدا


#570476 [بانقا الفاتح]
5.00/5 (2 صوت)

01-28-2013 08:57 PM
غازي سليمان شقيق بدر الدين سليمان
لكن شتان بين الإثنين
بدر الدين رجل ذو خلق
أما غازي فلن تستطيع أن تجد له وصفاً


ردود على بانقا الفاتح
United States [كابو] 02-02-2013 09:26 PM
لا يا انت بدر الدين سليمان دا اخوا مولانا بدرية سليمان


#570464 [ناصح]
5.00/5 (5 صوت)

01-28-2013 08:29 PM
غازي جزء من بلاوي زمننا الرديء .شخص مغرور في الفاضي مزهو بنفسه وقبيلته .منافق من الدرجة الأولى ونستاهل نحن لأننا نعطي أمثاله فرصة في إعلام السجم والرماد .
صحيح الطيور على أشكالها تقع .


#570457 [Magol]
5.00/5 (3 صوت)

01-28-2013 08:10 PM
(لكني شخصيا لم أرسل دعوة لأشخاص غير محترمين إنما الدعوات كانت للمحترمين فقط.) السؤال هوهل هو شخصيا محترم؟؟؟؟؟


#570453 [الفاتح مقبول]
5.00/5 (1 صوت)

01-28-2013 08:05 PM
كفاية
بلا غازى بلا زفت
شوفو الوطن الذى نحلم
به طوالى ..وطن شامخ
وطن عاتى ..
وطن خبر ديمقراطى ..
الله يخليكم زول يجر فيها
كرت تانى مافى ..


#570441 [عصمتووف]
5.00/5 (6 صوت)

01-28-2013 07:28 PM
لدي الشخصية الغـــــازية الكرتونية صفتان الغرور والعبط كان يسمي غاذات بطنية يسمم كل الاشياء بيوت الله لم تسلم من لسانة الزفر يعتقد في قرارة نفسة بانة صريح وواضح


#570430 [عبود]
1.00/5 (2 صوت)

01-28-2013 07:13 PM
انا لي احترام نسبي للترابي وغاذي،الصادق المهدي،الميرغني،،يعني مهما اختلف معهم فكريا اوسياسيا لم اصل مرحلة اشتم واحد منهم..من زاوية اخري انا بشوف انو الزول القال للترابي اختصر زول قليل الادب وصعلوك كما قال غاذي سليمان ،مايمشي بدون مايتكلم في زول ماسكو..والناس البيقولوا غاذي جبان وانتهازي نقول ليهم الزول ده عندو مواقف يشهد له التاريخ احسن من واحد ينبح لينا متل الكلب بالتعليقات المابكتل نملة دي


ردود على عبود
United States [ما شاعر] 01-29-2013 12:22 AM
انت ما عندك موضوع


#570424 [القرم تفاحة أبل]
4.94/5 (5 صوت)

01-28-2013 07:05 PM
********(( أولاً الاتنين معتوهين:الترابي و غازي .
ثانياً الاتنين بيحبو الاثارة ولفت الانظار , ويغيب عنهما الوقار.
((((( غازي دافعو شنو عشان يدعو الترابي ويوليه عقد قران ابنه!!!!!!!!!,,كل واحد منهم عنده مليون رأي في الآخر ,,))
(((( هل الترابي احضر كل البنات اللاتي تمّ عقد قرانهن على يديه؟!!!!!!!!! واللّا بس اليوم جاي يطبق هذه الفرية!!!!!!!؟


#570413 [abdulaye]
5.00/5 (4 صوت)

01-28-2013 06:53 PM
والله العظيم اذا كان غازى دا عندو اهل بيخافوا عليه كان ربطوه فى كراع عنقريب ولا دخلوه مستشفى التجانى الماحى احسن من الحالة العايش فيه غازى دا


#570406 [Givara]
4.88/5 (4 صوت)

01-28-2013 06:43 PM
عليكم الله ما ليهم حق الكيزان يعدوا 24سنة فى الحكم اذا كان ده مستوى سياسيينا ومستوى معارضتها ومستوى أعلامنا ......حرام والله نحن لسة فى العصور الوسطى


#570401 [مجنون]
5.00/5 (3 صوت)

01-28-2013 06:33 PM
اسة دا شعر زول نصيح عاملين ليه هيلمانه كدا راجين منو شنو غير التصرف دا


ردود على مجنون
United States [aviv] 01-28-2013 08:48 PM
ههههههههههههههههههه صدقت والله اسي دا شعر زول نصيح ,, وعامل فيها غشيم


#570398 [الفجري داك]
2.38/5 (4 صوت)

01-28-2013 06:30 PM
ماقيل من غازي سليمان وعن خصوصيات زواج أبنه شي لايعني المجتمع ولاهذه الهيلمانه الاعلامية ،وغازي محامي وله أسرة يحتفل بالترابي ولا الصادق ولا يدعوا من يدعوا هذة علاقاته ،أما عن معرفة أهالي أم درمان بمن هو غازي ،فأهل أم درمان يعرفون العمراب عامة مع أحترامنا للبعض منهم ،واذا غازي بمعني حديثه يجيد الصعلقه مع أهالي أم درمان فغازي يعرف أم درمان قاطبة واهالي ام درمان وفي من يريد أن يقول مقولته وأين - من الجموعية الفتيحاب وحتى الكبجاب وودنوباوي وحي العرب ،وعلية أن يحدد
ولايستطيع هذا الاسلوب .مع احترامي .


#570385 [ظلال النخيل]
5.00/5 (7 صوت)

01-28-2013 06:08 PM
والله غلطان يا غازي ليه ما دعيت قرينك شيطان الكوشة (أمين حسن عمر) فالطيور على أشكالها تقع.
والله أنا لما أشوق الاثنين ديل ( غازي وقرينه أمين ) بشمئز وبدون ما أشعر ببصق على التلفزيون.


#570377 [كلك كلو]
5.00/5 (1 صوت)

01-28-2013 05:54 PM
الجامع بيت أبوك أم بيت الله بتطرد منو الناس؟؟؟ تف عليك ياوقح.


#570361 [طرزان]
4.50/5 (2 صوت)

01-28-2013 05:30 PM
عليك ان تتأدب مع الله سبحانه وتعالى وهاؤلائى الذين طردهم لك الحق اذا كانو فى دارك وبعد تجردك من الادب اما بيوت الله لها حرمتها ومكانتها ولا لاى مخلوق الحق ان يطرد انسان من بيت الله والهرج والمرج ده عليك ان تعملو خارج بيوت الله... اما اطلاعك على الغيب بان القران مقبول عند الله لانو على يد الترابى فهذا لايدل الا على جهلك....


#570358 [حسن]
0.00/5 (0 صوت)

01-28-2013 05:16 PM
كلام غازي صحيح ضيف يتدخل فيما لايعنيه يسمع ما لايرضيه


#570341 [darjameel]
5.00/5 (2 صوت)

01-28-2013 04:53 PM
غازي دا خلاص اتحرق تماما .انا اسميهو جنبلاط السودان كل مره عندو موقف جديد .


#570336 [د/ نادر]
4.25/5 (3 صوت)

01-28-2013 04:41 PM
الخبر ده ممكن ان يكون في اي مكان غير المكان المميز الذي احتله يعني في الصفحات الغموزة جدا حق التابلوهيد Tabloid و لولا احترامي لحرية النشر قلت لاهل الراكوبة رجاءا عدم نشر اخبار هذا الرجل لا بالكويس لا بالبطال


#570333 [عبد اللطيف]
3.82/5 (7 صوت)

01-28-2013 04:34 PM
هذا رجل مخبول رفضته الحركة الشعبية ورفضه المؤتمر الوطني وحاول بكل الطرق التملق للوصول لوازارة والله لوكنت محل الحكومة اعمل ليه وزارة خصيصا له انشاء الله وزارة مكافحةالسل واعمل ليه مكاتب بالبيوت الجاهزة ده في اي منطقة وكل ثلاثة ايام اجبو في التلفزيون باعتباره وزير اتحادي لمكافحة السل وعليه يصبح غازي سليمان وزير الي ان يشقو عرقي ولا وسكي ونستريح منه ونضع له شروط ما يجتمع مع مجلس الوزراء عشان ما يعمل ازعاج ويعين ليه شلة من الصعاليك لزوم الوزراء


#570332 [نوار]
5.00/5 (4 صوت)

01-28-2013 04:30 PM
والله اشهد ان هذا الرجل ليس بسوي وطالما التجاني الماحي خالو يعني بتعالج بلاش طيب يعني المشكلة محلولة فليدخل المستشفى


#570331 [Azzat]
4.75/5 (3 صوت)

01-28-2013 04:29 PM
المحامى الفج غازى سليمان صعروك و سكير درجة اولى و (مصلحجى ) مثله مثل سبدرات وحميدة و لا فرق بين هذا الساذج و هولا المدعويين وهذه مناسبة خاصة يجب على الصحف الا تثيرها من اصله .


#570317 [فيصل]
1.00/5 (1 صوت)

01-28-2013 04:00 PM
اذا دى حفلة نزاع وليس حفلة عرس ؟؟؟؟؟؟؟؟؟؟


#570315 [أحمد السيد أبراهيم]
4.50/5 (3 صوت)

01-28-2013 03:59 PM
سبحان الله غازى ده بيذكرنى دائما الجلافيط والكونيه المعفنه فى زنكى الخضار لاحول ولاقوة الابالله


#570295 [عبد الله والحمد لله]
4.50/5 (10 صوت)

01-28-2013 03:29 PM
1/ القال يازول اختصر ( لو إتأخر كان يطلع من المسجد حتى ولو كان بكره الترابي)دا بيت الله .
2/ غازي ردو ما مهذب ، التهذيب كان يصمت وشنو دا زواجنا .(كان تعملو في بيتكم )
3/ غازي قال العقد الذي يتم على يد حسن الترابي عقد مبارك ومسنود ومقبول من الله رب العالمين.
شوف قلة الأدب دي .( رسلو ليك مسج من السماء )


ردود على عبد الله والحمد لله
United States [1بو منصور] 01-30-2013 12:20 PM
احسن يكون الكلام احسن من كده

United States [الحسامي] 01-28-2013 09:47 PM
أنت أيضاً قليل الأدب


#570293 [احد المدعويين]
5.00/5 (2 صوت)

01-28-2013 03:27 PM
ضيوف غازى سليمان صعاليك ههههههههههههههههههههههههههههههههههههههههههههههههههههههههههههههه
نسى انه هو واحد منهم
الطيور على اشكالها تقع


ردود على احد المدعويين
United States [SAEED AL SAEED] 01-28-2013 06:24 PM
الدعاك منو ؟؟ ماقريت كلام صاحب الدعوة ولاشنو ؟؟؟ الدعوة بيوجهوها من طرف ههههههههههههههههه


#570281 [اللمبي بمسي]
4.90/5 (9 صوت)

01-28-2013 03:11 PM
عليكم الله اسه ده موضوع!!يعرسو بتو وله يطهروها!!والله الجرايد دي خساره فيها قرش!!


#570279 [ابو سمرة]
5.00/5 (3 صوت)

01-28-2013 03:09 PM
يا اخوانا المخلوق الاسمه غازي سليمان ما بستحق الزيطة دي كلها..دايما بحاول يسبح عكس التيار عشان يظهر في الاعلام..دة واحد ما عندو موضوع


#570269 [mansour]
4.75/5 (5 صوت)

01-28-2013 02:51 PM
لقد سبق وقلت لكم ان هذا الرجل وعندما قرر المحامون انتخابه كنقيب للمحامين في مواجهه الراحل فتحي خليل وقد ليقول كلمته لقد قال في الترابي وحكومته قولا غير الذي قاله الآن واسهب وتفنن في شتم اتلترتبي والحكومه وذلك كي يحظي باسواط المحامين الغاضبين علي الحكومه فو رجل انتهازي متسلق معفن وكلب وجبان.


ردود على mansour
United States [SAEED AL SAEED] 01-28-2013 06:28 PM
حأقول ليك كلمة واحدة بس ___ مافى حاجة اسمها (اسواط) -- اصوات دى جمع سوط - ومفروض يجلدوك 100سوط لانك بليد وبتقل فى ادبك ----البيت من زجاج مايجدع الناس ولاشنو يا مثقف افندى ؟؟؟؟


#570267 [الشاعر]
0.00/5 (0 صوت)

01-28-2013 02:47 PM
اسمعوا ياجماعه كلامى ديه كويس...اعتبروا انتوا انفسكم فى مكان غازى والضيوف ضيوفكم والعرس عرسكم وأى اساءة لضيوفك تعتبر إساءة اليك الراجل ده الظاهر متخلف ويستحق من غازى اكثر من كده ازا انت فعلا تعبان باب المسجد فاتح واحترام نفسك والاخرين من سمات الرجل المتحضر لكن ياغازى الظاهر العاصمه ديه اصبحت لملمه وربنا يصبركم على البلاوى ولا شنو ىاجماعه خليكم شجعان وانصفوا الراجل(بغض النظر عن من هو غازى او الترابى او الضيف).


ردود على الشاعر
United States [Almo3lim] 01-28-2013 08:59 PM
و سمعنا كلامك (كويس) لكن ما صحيح و مليء بالعنصرية .. و المرة دي أسمع إنت ...حسب الشجاعة التي ناديت بها وأنا لا أسميها شجاعة لكن (وجهة نظر) .

أسلوبك و قولك بأن العاصمة (الظاهر العاصمه ديه اصبحت لملمه وربنا يصبركم على البلاوى ) فيه إستفزاز كبير و كأن العاصمة هي ( مقاطعة خاصة) يجب ألا يؤمها أو يقطن فيها العامة و هذا منطق ضعيف و لا يستند على أي ( رؤية) نلتمس فيها ( حضارة) المتحدث ..

كما لمست في بعض التعليقات بأن ( العرف) هو الذي يحكم و ليس (الدين) و العجيب هنا يا أخي أن العرف و الدين يلتقيان في إحترام الضيف مهما كان(واطيا) أقصد ( عاميا) كما وصفه غازي و كذلك الدين قال بأن المؤمن ( كيس فطن) أي يعالج أموره كلها بـ ( الحكمة) فأي حكمة ترى هنا أيها الشجاع ؟؟
أهي حكمة مقياس( أهل العاصمة و أهل الأقاليم) التي لا نلمس فيها إلا التعالي و العنصرية مع أنه أي عاصمة في العالم عبارة عن ( لخم رأس) !!!

أيضا إلتقي العرف بأن يستمع الناس إلى ( خطبة) قصيرة يتناول فيها المأذون أو أحد مشايخ الدين فضائل الزواج في تحصين الفرد و المجتمع و تجري مراسم العقد و يتم (الدعاء) للزوجين و يأمن الحضور على الدعاء ( سنة و عرف) فكيف يقوم هذا (الغتزي) بطرد من ( تململ) من طول الخطابة التي تحدث فيها الشيخ دفع الله لمدة نصف ساعة ثم تلاه (الترابي) و لا أدري إن كان عقد نكاح أو ليلة سياسية !!!

رأيي الشخصي بأن من قال (إختصر) قد أحطأ لكن غازي عالج الخطأ بخطأ أكبر منه يخرج به من العرف و التقاليد و الدين و الأسوأ هو ما صرح به بخصوص ( العامة) ...

هذه هي (الحكمة) التي يجب أن تبحث عنها و ليس ( الشجاعة) أيها الشاعر ..

United States [SAEED AL SAEED] 01-28-2013 06:30 PM
كلامك منطقى جدا وكلام عقل فعلا



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


صفحة 1 من 3123>
مساحة اعلانية

تقييم
7.32/10 (7 صوت)

الاكثر تفاعلاً/ق/ش

الاكثر مشاهدةً/ق/ش

الاكثر مشاهدةً/ش





الرئيسة |المقالات |الأخبار |الصور |الفيديو |راسلنا | للأعلى


صحيفة الراكوبة السودانية... راكوبة الأغاني السودانية، في رحاب الراكوبه ستجد السودان بمختلف مناطقه وعاداته وموروثاته خلال أقسام منتدياته المتعددة مثل المنتدى العام، العنقريب، المدائح ومنتدى التلاوة الذي يحتوي على تلاوة للشيوخ: صديق أحمد حمدون , عوض عمر , الفاتح محمد عثمان الزبير , محمد عبدالكريم , نورين محمد صديق , عبداللطيف العوض , صلاح الدين الطاهر سعد , الزين محمد أحمد الزين , وأحمد محمد طاهر. إلى جانب هذا هنالك منتدى مخصص للمدائح النبوية، هنالك المادح: الامين احمد قرشى وعلى الشاعر , الشيخ مصطفي محي الدين ابوكساوي , أولاد حاج الماحي , عبدالله محمد عثمان الحبر , اسماعيل محمد علي , السماني أحمد عالم , الجيلي الصافي , خالد محجوب (الصحافة) , علي المبارك , حاج التوم من الله , عبدالعزيز قورتي , ثنائي الصحوة , فيحاء محمد علي , الجيلى الشيخ , نبوية الملاك , عبدالعظيم الفاضل , عاصم الطيب , فرقة عقد الجلاد , سيف الجامعة , عثمان محمد علي , المدائح النبوية , فرقة الكوثر. علماً بأن المشاركات والآراء المنشورة في منتديات الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.
Powered by Dimofinf cms Version 3.0.0
Copyright© Dimensions Of Information Inc.
Copyright © 2014 alrakoba.net - All rights reserved

صحيفة الراكوبة