الأخبار
أخبار إقليمية
تأشيرة راعي غنم
تأشيرة راعي غنم
تأشيرة راعي غنم


05-08-2013 04:19 AM
عثمان أبوزيد

في صالة المغادرة بمطار الخرطوم سألني شاب صغير: يا عم صحيح كل واحد بيشتغل مع كفيله، وما يقدر ينقل كفالته؟ إنه خريج هندسة منذ ما يزيد على خمس سنوات، بقي دون عمل في تخصصه، واشتغل بائعاً متجولاً وسائق (أمجاد). أخيراً توكل على الله وسافر بتأشيرة راعي غنم ... يقول: " نعمل شنو الحالة بقت صعبة شديد، وشغل ما في، وعندي ديون لازم تتسدد".

واضح أن موجة الهجرة الأخيرة طالت الشباب وغير الشباب، فقد جلستُ في الطائرة المتجهة من الخرطوم إلى جدة إلى جانب شخص جاوز الخمسين من العمر. عرفت منه أنه راجع إلى السعودية لاستئناف فترة جديدة من الاغتراب، وكان قد أمضى قبل ذلك ستة عشر عاماً. سألته: ما الذي دفعك مرة ثانية للهجرة؟ فأجاب: بقيت في السودان أربع سنين، والعمل لا بأس به، لكن الظروف الاقتصادية الأخيرة أجبرتني للنزول على رغبة صاحب العمل في السعودية الذي ظل يطلبني باستمرار.

قبل ثلاثة أعوام، كان السودانيون من أعضاء هيئة التدريس في تلك الجامعة، قد تناقص عددهم إلى ما دون العشرة ، وفوجئت بمن يقول لي إنهم قد زادوا على الستين أستاذاً في ظرف سنتين فقط.

خلال السنوات الأخيرة حصلت زيادة كبيرة في أعداد المهاجرين. وحسب ما ذكرت وزيرة تنمية الموارد البشرية والعمل في برنامج تلفزيوني أن العدد ارتفع إلى (30) ألف في عام (2011م)، ثم تضاعف إلى (91) ألف خلال العام (2012م).

لا شك أن لهذه الهجرة المتزايدة جانبها السلبي، وأيضاً لها إيجابيات إذا أحسنا التعامل معها، بوضع سياسات مدروسة.

لا ينسى المغتربون أنهم ظلوا ضحية التقلبات الاقتصادية وتذبذب سعر العملات الأجنبية. لقد ضاعت مدخراتهم بين ارتفاع الدولار وهبوطه. صار هناك عدم ثقة يمنعهم من تحويل المدخرات إلى الداخل، ولكنهم لا يستطيعون أن يمتنعوا من إرسال مصروفاتهم، التي تمتصها تجارة العملة.

في ورشة عن اقتصاديات الهجرة ، قدم خبير أجنبي تجربة دولة إفريقية أقل نمواً مثل أثيوبيا حققت الفائدة المثلى من تحويلات المغتربين في التنمية خاصة في القطاع الصناعي. وأجازت الورشة نفسها مقترحاً بمنح ميزة تفضيلية للمغتربين في سعر الصرف عند إرسال تحويلاتهم إلى الداخل.

هذا الجانب المالي مهم جداً، ولكن ما هو أهم منه الاستفادة من الوجود السوداني في الخارج. المغترب خارج وطنه يكون أعمق إحساساً بمشكلات وطنه وأشد تفاعلاً معها. وما نلاحظ من نقاشات محمومة بين المغتربين في مواقع التواصل الاجتماعي دافعها هو هذا الإحساس العميق بالوطن.

يمكن أن يتوجه هذا الإحساس إلى نشاط إيجابي لخير الوطن، بتعزيز مكاسب الوطن على يد أبنائه في الخارج، ونقل الصورة الحسنة عنه. هناك نشاط في هذا الاتجاه يتولاه جهاز تنظيم شؤون السودانيين بالخارج، ولا سيما في حصر الكفاءات والخبرات، وتجسير العلاقة مع الداخل بأسلوب مؤسسي.

إذن المغترب قريب جداً بمشاعره وإحساسه من الوطن. ومع ذلك فقد ينظر إليه البعض وكأنه انتقل إلى الدار الآخرة! وهذا بسبب تقدير غير صحيح وشعور غير طبيعي بالعالم من حولنا. المغترب نفسه قد يعطي هذا الإحساس عندما يغيب سنوات طويلة، ويجعل تراكم السنوات حاجزاً نفسياً بينه وبين وطنه.

مهما يكن فالسودانيون يشبهون الطيور المهاجرة التي تعود إلى أوكارها وتهتدي إلى أعشاشها وإن بعدت المسافات. إنهم لا يقارنون بالمغتربين الآخرين ... فرق كبير.

علينا أن نهتم بهذا الارتباط القوي بين الوطن وأبنائه، فهل بإمكاننا مثلاً أن نقترح ملحقية عمالية في كل بلد توجد فيه جالية سودانية كبيرة. وتستطيع هذه الملحقية أن تباشر حقوق السودانيين، وتسهم في رفع المظالم التي تحيق ببعضهم مع أصحاب العمل. أليس وجود الملحقية العمالية أولى من المستشارية الثقافية التي لم يعد لها عمل ملموس في ظل تناقص العلاقات الثقافية بين السودان والخارج؟

السودانيون في الخارج يريدون الاطمئنان إلى وجود ظل لدولتهم وحكومتهم ترعى شؤونهم وتحميهم، وبذلك يزداد شعورهم بالانتماء لهذا الوطن.
يسّروا سبيل السفر والعودة، اجعلوا تطبيعاً كاملاً للدخول والخروج. يا ما تحدثنا عن صعوبة الخروج من السودان، وليست تأشيرة الخروج إلا عنواناً صارخاً لهذه الصعوبة.

لن نكف عن ترديد القول بأن السودان هو البلد الوحيد في العالم الذي يشترط تأشيرة خروج لمواطنيه. وعندما كتبنا عن هذا الأمر من قبل "تأشيرة الخروج للمواطن بدعة سودانية"، عقّب أحد المعلقين ساخراً : تصوّروا شخصاً يتعيّن عليه أن يدق باب بيته حين يريد الخروج منه!

حاشية :

قال أمير المؤمنين عليّ: من سعادة الرجل خمس: أن تكون زوجته موافقة (أي على وفاق) ، وأولاده أبراراً ، وإخوانه أتقياء ، وجيرانه صالحين ، وأن يكون رزقه في بلده.

وقال شاعر :

وكلُّ البلادِ بلادُ الفتى

وما بينه وبلادٍ نسب

إذا بلد بك يوماً نبا

فلا تخلدنّ به واغترب

[email protected]


تعليقات 22 | إهداء 0 | زيارات 15250

التعليقات
#662991 [ود نقزو]
1.00/5 (2 صوت)

05-12-2013 12:48 PM
يعني كده قفلتوا لينا الابواب كلها - حتى تفكير اننا ننزل البلد مافي؟ لا حول ولا قوة الا بالله العظيم
الواحد داير يتلم مع وليداته وياكل معاهم ويعيش معاهم على الحلوة والمرة والامور مش تمام على حسب ما قريت النقاشات بتاعتكم
كدي حاولوا شوفوا لينا حل سريع علشان نرجع نهائي وحريقة في الغربة والاغتراب


#660735 [جاد كريم]
1.00/5 (2 صوت)

05-09-2013 04:58 PM
الناس شايفة الفيل وبتطعن فى الضل
الفيل هو العصابة الوسخة الكاتمة على انفاس البلد تجار الدين الكيزان .. اجبرت الناس على الهجرة والاغتراب = الهروب
الضل هو العسكري البليد الفى المطار والمرتشي الحفير فى جهاز المغتربين


#660406 [ود الجبهة الثورية]
2.00/5 (3 صوت)

05-08-2013 08:07 PM
ياناس انتو مالكم ومال الخليخ او السعودية يا اخي انتو لو دايرين الفقر دا يمشى مننكم فعليكم بحفر الدهب او الانضمام الى الجبهة الثورية عشان الفقر يطير من السودان عديل كدة لانو الفقر ذاتو حلف وقال ما بيطلع من السودان الا بعد ذهاب هذه الحكومة وكدة وانت شيف لما ناس الجبهة الثورية ضربو ام روابة الفقر مش جرى خشة الرهد مع الواطنين سوا


ردود على ود الجبهة الثورية
Germany [وليد ذو الفقار] 05-08-2013 09:25 PM
طيب يا ود الجبهه الثوريه انا معاك التغير لابد منه ونحن لو انضمينا للجبهه الثوريه يعني نحمل السلاح وندخل الخرطوم وطبعا ما تنسي مليشات الحكومه دي بالاف المؤلفه
يعني حيكون في موووت كتير طيب قول دخلنا الخرطوم واتحاربنا مع جهاز الامن وانتصرنا قول المعركه احدت شهور طبعا لازم نكون واقعين ما ممكن معركه زي دي داخل الخرطوم تنحسم في يوم او يومين انت ما شفت شكلك الكم الهائل من المليشات يعني معركه زي دي عايزه ليها علي الاقل خمسه سته شهور يعني فتره وقول باذن الله ننتصر وده معناه حيموتو ناس كتير والبلد توصل مرحله الهلاك وتعم الفوضي ويحصل دمار شامل يا خوي انا مع التغير لكن ما مع الحل العسكري لو في تغير او ثوره نعملها في الانتخابات الجايه دي ونعلم الناس كلها ما تصوت للمؤتمر وبعد ما نفوز بعدين حاكم كل من لعب بهذه البلاد ونرجع كل مليم اخدوه ونحاكمهم لكن تقولي جبهه ثوريه وموت وقتل وناس دارفور اللي هم بقو ما عندهم غير القتل انهم يجو ويدخلو بالسلاح وتعم الفوضي انا ابدا ما معاك التغير يكون بالنضال والنضال عمرو ما ينهزم


#660388 [aymeen]
2.00/5 (3 صوت)

05-08-2013 07:48 PM
والله اعظم مهنة راعي غنم خصوصا اذا مارستها فعليا ..في خلال سنوات بسيطة جدا ..( 2 الي 4 سنة ) يمكنك بتوفيق من الخالق ان تكون مليونير سعودي ( مش مليونير وطني ) ودي اسرار مابعرفوها الا الاشتغلوها ... خليكم انتوا في سخريتكم دي من المهن التي قسمها الله علي خلقه ومعترضين عليها .انا ابن عمي يعمل حقيقة راعي غنم وابل وضان .. في عامين ونصف جمع 250الف ريا ل شوفوها بالسوداني بتعادل كم !! وبالحلاااال ...اكتبوا ل السنة الجاية ماحاتعرفوا عملها كيف؟؟قال مهندس ولا استاذ جامعي !!! ماعارفين الدنيا دي ماشة كيف ..مساكيين والله


ردود على aymeen
European Union [الشريف] 05-09-2013 08:11 PM
نقول ليك يا ايمن الله اديك واخوك من خيرو كمان وكمان بس انت ما تتعقد من الشغله وعموما الشغل ما هو عيب مهما كان وحقو عشان الناس تستفيد احكي للناس قصة نجاح اخوك العجيبه دي

United States [الانقاذ قد دنا عذابها] 05-08-2013 10:00 PM
يقال ان هناك اثنين كانا دفعه في الابتدائي وتقابلا بعد سنين طويله بعد السلام والسؤال سال احدهما الاخر اه شغال شنو فقال له استاذ جامعي في الكيمياء العضويه وسال استاذ الجامعه الاخر وانت شغال شنو؟ فقال له طبعاً بعد ان كملته الابتدائي دخلته السوق فضربته 5 في 6 فطلع الناتج 60 فقال له استاذ الجامعه لكن 5 في 6 ب30 فقال له المليونير عشان كدي انت مفلس وما عندك لا عربيه ولا بيت وستظل مفلس


#660255 [غسال]
5.00/5 (1 صوت)

05-08-2013 05:37 PM
يعني شنو راعي غنم قبل كدا مش السعودية طلبت سودانيات يشتغلوا خدامات في البيوت والطيب مصطفي ما جاب عقود عمل للخليج للجميلات الحلوين بنات العرب البيض بس عشان يشتغلوا؟؟؟

؟؟ شنو ماعارف يااخوانا في السعودية شوفوا لينا طريقة انشاء غسال


#660175 [مغـــترب]
5.00/5 (1 صوت)

05-08-2013 04:19 PM
( خلال السنوات الأخيرة حصلت زيادة كبيرة في أعداد المهاجرين. وحسب ما ذكرت وزيرة تنمية الموارد البشرية والعمل في برنامج تلفزيوني أن العدد ارتفع إلى (30) ألف في عام (2011م)، ثم تضاعف إلى (91) ألف خلال العام (2012م).

لا شك أن لهذه الهجرة المتزايدة جانبها السلبي، وأيضاً لها إيجابيات إذا أحسنا التعامل معها، بوضع سياسات مدروسة.)


يا رااااااجل , هجــرة بهــذه الكثافة و شــملت كل المهن و الأطياف تجي تقول عندها فايدة
و نوظفها ,,,, هـو غير أمثالك ديل الخرب البلد شــنو يا كــوز ,,,,,, دي كلها ســلبيات ,,
فمن هـو عماد و ركيزة التنميـة , اليس هم هؤلاء المهاجرون , البـلد عدمت نفاخ النار يا ....

و ما قادر ترفع قلمك في وجه الحكام الظلمة الفاسـدين لتقول لهم ( اتقوا الله في هذا الشـعب
و يســروا له ســبل العيش الكريم في بلده )


#660169 [حزين جداً]
0.00/5 (0 صوت)

05-08-2013 04:13 PM
الحكومة ، المعيشة ، المواطن .

لم توفر الحكومة الحياة الكريمة للمواطن . كل مسئول حلف القسم وقال سوف يحافظ على الوطن والمواطن وعيشة المواطن ، ولكن فقدنا الوطن بأرضه وفقدنا المواطن وعرضه ، وتمت إهانت حياته ومعيشته وكرامته .
السوداني يفارق وطنه فسراً .وذليلاً حقيراً إما راعي أو مزارع أو سائق خاص !!!؟؟؟ ونعتز بمهنة الرعي والزراعة . ولكن نحن في بلد غربة لماذا يكون السوداني ذليل ومكسور الخاطر . وقدجلس وتعلم وساهر وتاريخه في بلاد الغربة مليئ بالنخوة والكرانة والشهامة والعلم بل السوداني كان قائداً في كل المجالات في الطب ، في التدريس ن في الكورة في مجال المحاسة والحسابات في أخلاقه وأمانته . ولكن أهل الخليج وخاصة الشام ومصر وحتي الهنود أصبحبوا يضحكون ويتندرون علينا بأننا شعب كسول ولا يفهم شئ وفي كل شئ وحتي في الكورة .وقيادة السيارات !!!؟؟؟والقديمة خاصة لظروفنا طبعاً
والسبب أن حكومتنا وسفاراتنا بالخارج تنام في العسل وليس لها هم بالمواطن السوداني الأصيل .
با حكومة السودان أنتي مسئولة مسئولية كاملة ومباشرة أمام الله .
إما أن تطهري كل الوزرات من جميع الحرامية وإزالة كل الأوساخ ليعيش السوداني في بلده أصيل مكرم وإما أطلقي صراحه وبمهنة شريفة وفي وظيفة تناسبه ولا تهين كرامته وتذله .
يا عمر البشير أنت السمئول الأول من شعبك وأمام الله وحلفت القسم أنك مسئول من كل مواطن ومن كل شبر من أرض الوطن . فضلاً أطرد الحرامية من حكومتك 80% حرامية ونصابين وبإسم الدين .ووفر لشعبك الحياة الكريمة والتي إفتقدها 23 عام .وأرجو أن تغلق المستشفيات الخاصة وتدعم المستشفيات الحكومية وبكل قوة . وأرجو أن تغلق جميع المدارس الخاصة وأدعم جميع المدارس الحكومية وبقوة . ويجب تغيير السلم التعليمي . ويا ليت لو تم تطبيق السلم التعليمي اللبناني يا ليت . صدقني سوف يزدهر السودان ونخلق جيل صالح متعلم مثقف فاهم في كل المجالات .
أرجو إحياء القري والريف لتغيير مسار الهجرات .ريح شعبك . وأعرف أنك إرتحت وريحت أسرتك وكفاك .والشعب ينتظرك .... الشعب ينتظرك وأطرد من يلتف حولك وهم من دمر السودان . اللهم هل بلغت فاشهد .


#660141 [سمير]
0.00/5 (0 صوت)

05-08-2013 03:40 PM
يااخوي عدد السودانيين بمهنة راعي (كاوبوي ) فى الرياض اكثر من عدد الغنم .الله يعين.


#660132 [معتصم]
5.00/5 (2 صوت)

05-08-2013 03:30 PM
انا اتعجب لماذا بطبعنا نهرب من المواجهه !! المشكله في بللدنا كلنا نعلم انها في المؤتمر الوطني وازياله فنحن نملك امكانيات تفوق كل هذه الدول التي نهاجر اليها فلما لا نعود ونراجع حساباتنا


#660044 [علي احمد جارالنبي المحامي والمستشار القانوني]
5.00/5 (1 صوت)

05-08-2013 02:13 PM
.
سوء الإدارة هو ديدن من ليس له حس يسعفه في ان يتخذ القرار المناسب والمفيد للوطن والمواطن في الداخل والخارج .
من المؤسف له تدار مسائل الاقتصاد الوطني بذهنية جابي ( من جباية ) وهذا ما جعل قضايا المغترب لم تزل تراوح مكانها داخل صناديق تعبأ من جيب المغترب لتفرغ في جبِ ليس له قرار .....
.


ردود على علي احمد جارالنبي المحامي والمستشار القانوني
Saudi Arabia [عبد الرحيم محمد حسين علي وزير الداخلية والدفاع سابقا وعضو مج] 05-09-2013 05:38 AM
هههههههههههههههههههههههههه
ههههههههههههههههههههههههههههههههههههه
هههههههههههههههههههههههههههههههههههههههههههههه
اسمك مضحك جدا يا بتاع الغلاط

Saudi Arabia [ابونازك البطحاني المغترب جبر] 05-08-2013 06:27 PM
شنو يا استاذنا جنابك جاي تعلق ولا تعلن عن نفسك مجانا ؟


#660024 [ناس وناس]
0.00/5 (0 صوت)

05-08-2013 01:58 PM
في المقال طرح كلمة ( مغتربين) و ( هجرة)


الاغتراب بمعني في رغبة للعودة مهما طال السفر او الابتعاد

اما الهجرة فلم يعد في القلب نية للعودة او تذكر الوطن


#659989 [بشتنة]
5.00/5 (2 صوت)

05-08-2013 01:31 PM
يا جماعة سيبكم من موضوع الكفيل والكفالة والرمتلة والجقلبة البتسووا فيها دي وتعالوا إتصنفروا معانا هنا . ياخي الساترة مي فاقرة وإطمأنوا تب التكتحة ما بجيكم أنا مجهز ليكم محافير وشواكيش وكواريق من أمها بديكم يومين تلاتة مع أهلكم ومن هناك بكشكم علي الدهب يا غرق يا جيت حازمها


ردود على بشتنة
Saudi Arabia [كركـــــــــــاب] 05-08-2013 07:39 PM
يا ابوالشباب
ههههههههه
دهب شنو اسى تلقاك من مسرح الى دار ياضة
وكمان زاكى حفلات عقد الجلاد والتشنيطة كدة
جكسية باليمين واحدة بالشمال
انت بس حاقر بينا وداير تناقر وقعنا فى البلد الضلمة دى

Saudi Arabia [1+1] 05-08-2013 06:16 PM
الدهب دا سمعنا بيهو قبل 10 عشرة انت لسه قاعد تحفر ما غنيت.. لسه شايل محفارك

Saudi Arabia [Abdullah] 05-08-2013 02:45 PM
حاضر يا بشتنة لكن البضمن لينا شنو قروش الدهب اذا اتوفقنا فيها انه ناس المؤتمر الواطي ما يقلعوها مننا او يقلعو دهبنا


#659978 [ابواحمد]
0.00/5 (0 صوت)

05-08-2013 01:27 PM
اولا الحممد لله علي كل حال المغتربين عائشين في ظل الوضع الحاصل حاليا الم لا يعرف مداه الي الله والحمدلله


#659961 [من الجذور إلى البذور]
1.00/5 (1 صوت)

05-08-2013 01:13 PM
يا أخي في الإغتراب ... عثمان ... لقد علمت يقيناً عند عودتي مُنذ زمان ..... أنّ السودان الآن يحكمه الهمباتة والربابيط والحراميّة وآل فهلوان ... وآل بلطجان .. وآل زلنطحان .... لا يعرفون معنى إصلاح السودان ..... ولا يريدون أن يخدموا أهل السودان .... إنّما يريدون أن يخدموا حركات ومؤتمرا الإخوان ؟؟؟


#659832 [أبوالكجص]
5.00/5 (1 صوت)

05-08-2013 11:45 AM
الحوافز للمغتربين لترغيبهم في التحويل عبر القنوات الرسمية موضوع ظل قيد الطرح لأكثر من 20 سنة ولو أصلاً في جدية من الحكومة لإيلائها الإهتمام الكافئ ما كان دا الحال.


#659773 [2]
1.75/5 (3 صوت)

05-08-2013 11:10 AM
فأجاب: بقيت في السودان أربع سنين، والعمل لا بأس به، لكن الظروف الاقتصادية الأخيرة أجبرتني للنزول على رغبة صاحب العمل في السعودية الذي ظل يطلبني باستمرار.

معقول يا راجل بعد 4 سنين!! قول الحالة بقت صعبة و انت اللي اتصلت بيهو و طلبت فيزة


ردود على 2
European Union [الشريف] 05-09-2013 08:38 PM
ليه يا نمره 2 سوء الظن ده يمكن يكون كلامو صاح في ناس بسكوهم وناس بتركوهم . الناس ما واحد يااخونا

Saudi Arabia [عوض محمد] 05-08-2013 02:51 PM
صراحة كلامك صحيح يا اخى ... اى واحد لما يرجع من الاغتراب ويستقر ببلده ما فى كفيل يطلبه مرة تانيه من اهميته الا اذا الظروف ضاقت بيهو .... لان هناك الملايين فى المعذر ومنفوحه العاطلين عن العمل وما رجعوا للسودان ممكن يجد من هؤلاء العطاله بدلا من ارسال فيزا له ...


#659730 [عبد الرحيم موسى]
2.00/5 (2 صوت)

05-08-2013 10:49 AM
كل الجنسيات تأتى بمهن محترمة ، محاسب ، محاسب عام ، مترجم ، عامل ، عمال بجميع انواعه الا نحن السودانيين كتب علينا الراعى امعانا من البدو على اذلال الزول الجميل المثقف وانتقاما من المعرفة المتنقلة فى السودانى فيا ما علمناهم مجرد المشى والله علمناهم كل شىء حتى الخراءة فهم يعلمون ان الزول الجميل المتعلم المثقف المستعد لمناقشة أى شىء فى أى شىء لا يمكن تحجيمه الا بهذه المهن جزاء وفاقا لما علمناهم وفعلا ان الاعراب أشد كفرا ونفاقا !!!!!!


ردود على عبد الرحيم موسى
Saudi Arabia [عبدالرحمن الشيخ] 05-08-2013 04:18 PM
هو نحن غير النفخه والفشخره الكذابه مافي وصلنا لي كدا
يا سيدي الدنيا كلها اتطورت الا نحن نتحدث عن التاريخ والامجاد التي اكل الدهر عليها وشرب
نحن اسسنا الاتحاد الافريقي والان طيش افريفيا
جامعة الخرطوم احسن جامعه في العالم والان خارج الخمسه الف جامعه
نحن علمنا السعوديين الكوره السعوديه 4 بطولات اسيويه و4 مشاركات في كاس العالم
وبطولات اسيويه للانديه لا تحصي ولا تعد
الجامعات السعوديه الان
من اوائل الجامعات
يا سيدي بطلوا كذب ونفاق الدكتور والمهندس السوداني ابسط شئ ما بعرف البس ولا بعرف اربط كرفته
اوع تجي تقول لي دا تواضع الحاجه الوحيده الما فيها تواضع البس والنظافه

Saudi Arabia [ود كسلا] 05-08-2013 02:47 PM
يا شيخ عبد الرحيم منو القال ليك مهنة الراعي مهنة ازلال ياخ دي اشرف مهنة لانها كانت مهنة سيد الأولين والآخرين دي مهنة انبياء عارف لو بلد زي السودان دا بحترم الثروة الحيوانية الفيهو ويعرف يسوق ليها عالمياً كان الراعي السوداني دا من أفضل رجال الاعمال في الدنيا بعيدين يا شيخنا العرب ديل ما بزلونا بتأشيرة الراعي في ناس بتشتريها لانها متاحة زيها وزي تأشيرة السائق الخاص لانها فردية وما عندها تبعات وبنفس المستوى في تأشيرة تطلع لناس بحملوا درجات علمية وبعملوا في اكبر الجامعات في المملكة

Saudi Arabia [Mohd] 05-08-2013 02:22 PM
لأنه حكومتك فاسدة وغير محترمة هي نفسها


ولا تجيد غير التسول لدى الخليجيين واخر مرة لم يجدوا منهم درهما واحدا والسبب اكتشفوا انهم لصوص ومنافقين درجة اولى


واذا فقدت حكومتك الاحترام بالتالي تنعكس الاهانة على المغترب نفسه ، لانه حتى سفارته لا تحل مشاكله مثل السفارات الاخرى بل عينها على جيبه

وبالرغم من حقارة حكومتك وتسولها ولصوصيتها لا يزال السوداني يجد الاحترام ولأن اهل الخليج واعين ويعرفون جيدا ولا يتعاملون بردود الافعال فهم لا يزالون يحترمون السوداني لانه يحترمهم وامين وذو خلق وحتى عندما تذهب الى التقديم لوظيفة يسألك الكثير من اصحاب الاعمال :

هل انت خريج ما قبل 1994ام ما بعدها

وهذا دلالة على ان التعليم بعد خريجي 1994 تعليم فاضي واي كلام وهذا من اهل الخليج
وبرضه الحمير في حكومتك مصرين يدمروا كل شي دمر الله عظامهم في الدنيا وفي قبورهم وفي جهنم

Saudi Arabia [المتغرب الأبـدي] 05-08-2013 02:12 PM
هناك آلاف العمال من مصر واليمن يأتون بتأشيرات كهذه بل بتأشيرات عامل نظافة .. ما رأيك ؟؟

Saudi Arabia [عباس] 05-08-2013 12:20 PM
لاتتحدث وانت غير ملم بمفاصل الموضوع يوجد معنا الان فى منطقة فى شمال المملكة مئات بل الاف المصريين من يحمل مهنة تربية مواشى وهم يحملون شهادات عليا ليس السودانى
وحده من اتى المملكة بهذه المهنة ولعلمك لولا الاجراءات الاخير ة كانت تاشيرة تربية مواشى من اكثر التاشيرات طلبا لان اجراءاتها غير معقدة ولكن بعد الاجراءات الاخيرة
صارت من اكثر المهن مشكلة لاصحابها .


#659695 [مدحت الهادي]
5.00/5 (1 صوت)

05-08-2013 10:34 AM
بسم الله والحمد لله والصلاة والسلام على رسول الله ... قال الكاتب (( السودانيون في الخارج يريدون الاطمئنان إلى وجود ظل لدولتهم وحكومتهم ترعى شؤونهم وتحميهم، وبذلك يزداد شعورهم بالانتماء لهذا الوطن)))..... صدقوني لا ولن ترعى في يوم من الأيام الحكومة السودانية شؤون أبنائها سوى آن تجمع الأموال وتزيد فقط في هذا الجواز بهذا المبلغ وهذه الورقة بـ100 ريال وهذا وهذا وهذا وأما المغترب فبمجردأن غادر السودان فإنتماؤه لوطنه ولكن لمن القول ؟؟
هناك شيء مهم مهم للإخوة الذين يريدون الدخول إلى المملكة العربية السعودية ... إخواني عليكم بالإنتباه عند شرائكم لفيزة من السودان الرجاء الإنتباه لأن غالبية الفيز الموجودة في الخرطوم الآن وهي (((( مضروبة )))) بمعنى أن الكفلاء أصحاب الفيز التي خرجت من عندهم إما هو في الخط الأحمر أي لا فائدة من الفيزة التي إشتريتموها لأنهكم سوف تصلون إلى المملكة وتدخلون في مشاكل وخلافه هذا إذا كان هو إبن حلال وحلال مشاكل والشيء الآخر الكثير من الكفلاء ضعاف النفوس بمجرد خروج الفيزة وبالذات في هذه عندما تصل تجده قد بلغ عنك هروب بعد أيام فقط من دخولك للمملكة والرجاء يا إخواني الرجاء الرجاء الإنتباه وهذه الأشياء شاهدتها بعيني وأمامي ووجدت سودانيين يعانون معاناة شديدة جداً ... ومافيش حاجة ثاني إسمها فيزة حرّة فبالله عليكم لا تخدعوا ...والسلام عليكم .....


#659639 [مريود]
5.00/5 (1 صوت)

05-08-2013 10:03 AM
ليس المشكلة في الهجرة .
المشكلة يغلق عليك الباب وتمنع حتى من أرض الله الواسعة.
وبعد عودتك ( المقطعة ) أو النهائيةيترك لك فتات مما رزقك الله.

عشان تهاجر تاني ما ترجع ولا تحلم بالعودة.


#659626 [ابو زينب]
2.50/5 (2 صوت)

05-08-2013 09:54 AM
هجرة السودانيون في الآونة الأخيرة ليست لتحسين الوضع كما كان في السابق ولكن دواعي سياسية جعلت نصف الشعب السوداني يهاجر ومن ذلك بدعة التمكين التي اقعدت بأكثر من نصف الشعب السوداني في بيوتهم ولذلك آثروا الهجرة رغم مرارتها ، ومن نعم الله على عباده السودانيين المهاجرين او المغتربين ، لم يسألوا ( بضم الياء ) عند ارباب العمل في بلاد الاغتراب عن خلفياتهم السياسية في بلدهم الام وكثير من شبابنا كان يمني النفس بتحقيق رتبة عامل في وطنه .


#659616 [Abdullah]
3.00/5 (1 صوت)

05-08-2013 09:51 AM
مقال جميل بس المشكلة انه حينما نذهب الى شئون المغتربين عشان نعمل التأشيرة لازم تحرق ليك يوم كامل يكون راح منك شمار في مرقه ما بين ارانيق واجراءات عقيمة- اول شئ مفروض تتلغي تاشيرة الخروج دي. تاني شئ وانت طالع من المطار العسكري يعاين ليك في وشك كانك مجرم ويخليك تشك في نفسك مرة من المرات عاين لصورتي في الجواز وبقى يعاين لي بطريقة غبيه كده والله شكيت في نفسي ياربي في كارثة حاصلة ولا في شنو؟ سالني الجواز ده مستخرجه من وين؟ في حين انه هو ممكن يفتح الصفحة الاولى ويعرف انه الجواز طالع من ياتو بلد ماعارف ليه التصرفات الغبيه دي مع انه مفروض بعد ما يشوف الجواز يبتسم لي ويقول لي ربنا يوصلك بالسلامة ربنا يستر عليكم في غربتكم- لكن وين التعامل الزي ده نلقاه في بلد اغلب المسئولين فاقد تربوي - لكن العسكر السودانيين غير مثقفين ناس بليدين بس ماعارف ليه بختوهم في اماكن زي دي. ثالثا السفارة في السعوديه في الرياض ماعندها اي دور لو اترميت في السجن سنه ماحد بعرف عنك شئ. رابعا صراحة كده الواحد بقى يشيل هم لمن يمشي اجازة السودان وانا شخصيا السنة دي ما حنزل السودان بشوف لي اي بلد امشي ليها على الاقل نغير من العساكر والوسخ الحكومي الفي السودان- دمتم تحياتي


ردود على Abdullah
Saudi Arabia [العوض] 05-08-2013 05:33 PM
يبتسم ليك ليه هو شغال في مرطبات بعدين انت مواطن ما سايح عشان ابتسم ليك عاوز ابتسامة اركب الخطوط الجوية القطريه وانت تلقي احلي ابتسامة

Saudi Arabia [مدني الحبيبة] 05-08-2013 02:24 PM
يااخوي الشغلانة بقت فيها احقاد وحسد ومالاقي ليهوا طريقة اشان اهنبتك لانو طبعهم البليد عساكرنا اشان كدا انت مابتعرفوا داير شنو بالضبط يعني الموضوع بلادة دلاه عوارة حسادة اي حاجة كعبة


#659460 [قرفة قديم]
2.00/5 (3 صوت)

05-08-2013 07:49 AM
حيّاك الله أستاذنا أبوزيد.
إنت ذاتك يا دكتور أستاذ جامعي هاجرت مرتين!


ردود على قرفة قديم
Saudi Arabia [عبده] 05-08-2013 10:39 AM
أخي قرفة قديم، الراجل لم ينتقص من قدر الذين إغتربوا مرة او مرتين و لم يعيب عليهم هذه او تلك بل ختم بأبيات شعر في نهايتها تحث على الإغتراب في ظروف معينة أشار إليها في موضوعه الذي يتحدث عن أسباب و مشاكل و معاناة المغتربين و قدم مقترح لحلها و إنتقد ظاهرة سودانية بحته و هي دق أحدهم لبابه عند الخروج منه ( تأشيرة الخروج )
فما بالك أخي تعجلت في إنتقاده ، ام هي القرفة القديمة.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة