الأخبار
أخبار إقليمية
الوالي يشكل لجنة لحل مشكلة محطات مواصلات الخرطوم
الوالي يشكل لجنة لحل مشكلة محطات مواصلات الخرطوم
الوالي يشكل لجنة لحل مشكلة محطات مواصلات الخرطوم


اعترف بإخفاقات صاحبت تنفيذ تجربة نقل المواقف
05-23-2013 01:41 PM



الخرطوم : بله علي عمر: اعترفت حكومة ولاية الخرطوم، بإخفاقات صاحبت تنفيذ تجربة نقل مواقف المواصلات، وشكلت لجنة طارئة برئاسة وزير التخطيط والبنى التحتية وعضوية كافة الجهات المعنية بالنقل والمواصلات لإجراء تقييم ومراجعة شاملة لكل الاجراءات التى تمت اخيراً بتعديل مواقف ومحطات المواصلات .
وفوضت الحكومة في اجتماع ترأسه الوالي عبد الرحمن الخضر، أمس، باتخاذ كافة المعالجات للاخفاقات التى صاحبت تنفيذ التجربة.
وقال الوالي ان الهيئة أعدت خطة علمية لكن واجهتها بعض المشاكل المتعلقة بتقديرات توقيت تنفيذها، كما انه لم يصاحبها اعلام جماهيري كافٍ يوضح للمواطنين كيفية التعامل مع الأوضاع، واضاف «مع ذلك لابد من معالجة للتوفيق ما بين الرؤية العلمية المستندة لموجهات المخطط الهيكلي ومعالجة شكاوي المواطنين من الاوضاع الجديدة» .
ووجه ممثلو الصحف انتقادات شديدة للإجراءات التى تمت في تعديل المواقف وما ترتب عليها من تعب ومشقة للمواطن في الانتظار لفترات طويلة في الخطوط الدائرية او السير على الأقدام مسافات طويلة في هجير الشمس .
وقال الخضر ان أبرز المشاكل التى واجهت المواطن هي عدم وجود وسائل نقل كافية للربط بين المحطات الثلاث (الإستاد ـ السكة حديد ـ شروني)، مؤكداً ان هذا الوضع لن تتم معالجته الا بتفعيل الخطوط الدائرية بحيث يتمكن كل مواطن من الوصول الى وجهته، وكذلك تعديل مسارات بعض الخطوط حتى لا يتكبد المواطن مشقة السير على الاقدام لمسافات طويلة والاسراع بإنشاء خطوط نقل مباشرة تربط بين المواقف في وسط الخرطوم.
وأصدر الاجتماع توجيهات للجنة باستصحاب الآراء الواردة في الصحف وأجهزة الاعلام، على ان تقوم اللجنة باستخدام كافة وسائل الاعلام المتاحة لاخطار المواطنين بالمعالجات التى تتم، وأمهلت الحكومة اللجنة الطارئة اسبوعا لإطلاع مجلس وزراء الولاية على المعالجات، وتقرر ان تباشر لجنة مراجعة تعديل مواقف المواصلات فور انتهاء الاجتماع امس.
ووجه مجلس وزراء الخرطوم في اجتماعه امس برئاسة والي الولاية، اللجنة باستخدام كافة وسائل الاعلام المتاحة لاخطار المواطنين بالمعالجات التى تمت، على ان ترفع اللجنة تقريراً بهذه المعالجات لمجلس وزراء الولاية خلال اسبوع، علي ان تباشر اعمالها اعتبارا من اليوم، ووجه المجلس بإلحاق الخط الحديدي الي الحاج يوسف ضمن البرنامج الاسعافي في قطاع القطارات لحل مشكلة المواصلات .
وكان مجلس الوزراء قد استمع الى تقرير قدمه مدير هيئة النقل والمواصلات، د.امين النعمة، تناول فيه سير تنفيذ خطة الحلول الجذرية والآنية لقضية المواصلات والأسباب التى دعت الهيئة الى تعديل المواقف بعد ان اصبح الدخول والخروج من المواقف القديمة أمراً في غاية الصعوبة، مع التزايد المستمر في وسائل النقل الصغيرة والكبيرة .

الصحافة


تعليقات 18 | إهداء 0 | زيارات 4326

التعليقات
#675460 [عقبة]
0.00/5 (0 صوت)

05-25-2013 12:52 AM
الحاصل يا شباب الناس الوضعوا خطة نقل المواصلات او اعضاءاللجنة المكونة لنقل الموافق هم ولا بركبوا مواصلات ولا اولادهم بركبوامواصلات اي عضو لديه في منزله اكثر من 4 عربات عشان كدا هم ما عارفين المشقة البتكبدها المواطن العادي(الماعنده عربية)


#674969 [مساكين المعذبين في الارض]
0.00/5 (0 صوت)

05-24-2013 12:18 PM
تعلموا الحلاقة في رؤس اليتامي!!! عشرين سنه من والي فاشل الي اخر افشل من اخيه!! بطري , طبيب!! اقترح تعين جزمجي!! ممكن يوزع لينا جزم واقيه من الحر للجري وراء المواصلات!!! قال اخفاقات!!! وين المجالس الاستشاريه والهندسية!!! قاعدين تحت الاسبلت ينت ونسه وتنظير!! ياخي حتي نقل تجارب الاخرين فاشلين فيها وليس الاتيان بحلول جديده!!!بالله عليك مش نحنه فعلا شعب من الحمير نستحق والي بيطري!!!


#674879 [محموم جداً]
0.00/5 (0 صوت)

05-24-2013 10:23 AM
الخرطوم مدينة تشبه المرأة العجوز لا تنفعها المساحيق و البودرات و لا حتى عمليات الشد و التجميل والتنحيف ما تحتاجه الخرطوم أن تخرب خراب سوبا و تعدم الطوبة لأنها بنيت على باطل و على سرقات الخطط الاسكانية و تعفن توزيع الاراضي الاستثمارية و احتكار ميزانيات المظاليم من أهل السودان عامة في التعليم و الصحة فعرف الريف بذكائه الطبيعي أين حقوقه فشد الرحال نحوك يا خرطوم يا سارقة .. من أعطاك الحق في امتلاك ضرائب الانتاج و الجمارك التي يدفعها أهل الريف .. و برع أهل الريف في استلاب حقوقهم حتى تجاوزت المكيال فأصبحوا يطففون و يسكنون في كافوري في مساكن تتعجب منا القولد و ريرة و الجفيل و بابنوسة و يامبيو و محمد قول .. و بدأ عهد الخراب حتى عجز كل كبار المهندسين من كبرى جامعاتنا ليبنوا لنا مواقف للركاب !!!


#674791 [عبد الله البشير]
0.00/5 (0 صوت)

05-24-2013 04:34 AM
سبحان الله. ما حصل جا زول لمنصب محافظ أو والي لولاية الخرطوم الا كان شغلته الوحيدة هي مواقف المواصلات والأكشاك التقول البلد ما فيها مشاكل تانية. لا في زول بسأل عن مجاري لفصل الخريف لا في زول بسأل عن شوارع الظلط لا عن صحة لا عن تعليم لا حماية بيئة أو ضبط أسواق أو أي حاجة ممكن يكون فيها تسهيل للمواطن بس ياها حكاية الشطارة علي البردعة
قبل كم سنة ونحن نشاهد تليفزيون السودان لم نستطع منع أنفسنا من الضحك على السيد معتمد الولاية آنذاك والمعارض الكبير الآن د. الكودة عندما سأله مقدم البرنامج عن نقل المواصلات لمنطقة الاستاد قد يكون فيه عناء مثلا لسيدة كبيرة جاية من ام درمان قاصدة مستشفى الخرطوم فرد عليه الدكتور العبقري (وهي ماشة المستشفى ليه؟ ما تمشي جامعة السودن) ما عارف الدكتوراة بتاعته دي جابها كيف ومن وين.
وهو الانقاذ مع كل المعاناة والأحزان التي سببتها للشعب السوداني فيها ما يدخل البهجة على النفوس من نوع كلام المعتمد السابق المناضل الحالي الكودة او أخينا اللمبي بتاع صلاة العشا او محافظ سابق لأمدرمان الذي هدد أميركا بأن السودان لن يسكت على ضرب مصنع الشفاء وحا يصبح دولة ذرية في ظرف سنتين ويرد الصاع صاعين. الكلام كان ممكن يكون مقبول لو لا ان ناس امدرمان يحكون عن كيف السيدة حرم المحافظ التانية طاردته بالشبشب في شوارع الحي
دا كله ما بلحق العبقري البروفيسور بقسم الجغرافيا بجامعة أم درمان الاسلامية الذي كتب أيام مؤتمر البكور ان الساعة 12 هي منتصف النهار في كل دول العالم. يعني الزول دا لا بيعرف جغرافيا لا اسلام؟
ويا حليل مواصلات مديرية الخرطوم التي كانت تحتكر خطوط الواصلات وقادرة علي تغطيتها وشركة البصات الأهلية الكانت ماسكة الباقي
بعدين سؤال فرعي وسط الخرطوم زحمته أكتر من زحمة ميدان التحرير في القاهرة؟ ليه المصريين ما قالوا نحول الموقف دا من محله عامل زحمة لوسط البلد؟


#674683 [ودالقريه]
0.00/5 (0 صوت)

05-23-2013 10:29 PM
ياحكومة السجم مافى تخطيت ولادراسه هذا اندله انمايدل وكيل الامر الى غير اهله كل شىء محسوب غلط


#674627 [Rashid]
5.00/5 (1 صوت)

05-23-2013 08:34 PM
وزير التخطيط والبنى التحتية ؟ !! ياتو بنى تحتية !! أخجلوا عاصمة مافيها شبكة مجارى .. ولاصرف صحى .. ولاقطارات ولامواصلات ... ولاجنينة حيوانات !! ياخى كابول فيها حديقة حيوانات .. إنتو مابتعرفوا إلا التخريب .. تخطيطكم ققط للحروب والإغتيالات ... إهتمامكم بالمواقف ماجاء إلا بعد فشل النفرة الكبرى. راشد


#674619 [العاليابي]
5.00/5 (1 صوت)

05-23-2013 08:20 PM
مسكين ايها الشعب تساق كالضان من مكان إلي مكان أنا أخشي أيها الشعب السوداني الفضل يفعل بكم كما يفعل بالضان وتساقون إلي ميناء عثمان دقنه أو ميناء سواكن (( كداري )) وبعدها تذبحون في المحيط أو الخليح مافرقت فقط أصبحتم كالضان يجرونكم من الأضان وتصحون من الآذان للبحث عن لقمة عيش شريفة وترجعون آخر الليل ولا تجدون حتي وجبه خفيفه وهكذا حال السودان مع هولاء العصابة لا أنالهم الله رضاه وسلط عليهم من لا يخاف ولا يرحم آمين :::: الحقيقة أن المسمي الحقيقة لموقف (( شروني )) موقف الوجع والمعاناة التي لا تخلص لو دققنا في الكلمة نجدها مشتقه من (( الشــــره )) يقال أن فلانا شـــرا فلان أي ربط معه ميعاد ولم يصدقه بمعني (( شراه )) لذا فإن المسمي لشروني إسم علي مسمي بعد تفخيم الراء وفعلا الولاية قصدت وعن عمد أن تشر الناس في ذلك الموقف حتي تزداد آهاته ومعاناته قال خط حديدي من الخرطوم للحاج يوسف جاتك ستين داهية كدي إنت شوف معالجة لمعضلة المعاناة لكل مواقف المواصلات وإتق الله في هذا الشعب فيه الكبير في السن والشيخ والمريض رجالا ونساء وحدث ولا حرج في جرجرة إولئك الاطفال وسط قضبان السكه حديد بالله عليكم هل ماتفعلونه يرضي الله ... الله لا يرضي عليكم لا دنيا ولا آخرة آمين


#674527 [AburishA]
5.00/5 (1 صوت)

05-23-2013 06:12 PM
((وشكلت لجنة طارئة برئاسة وزير التخطيط والبنى التحتية))
طيب وزير التخطيط ده زاتو مش ياهو الزول ألـ (بنى) مواقف شروني !! ولا كان في اجازة!!
المهم يا جماعة الخير، ما دام العمولات طلعت واتأكلت رجعو الموقف للاستاد ويا دار ما دخلك شر!!
قال لجنة طارئة قال!! عالم تموت في حاجة اسمها طوارئ!!


#674494 [sinkatia wa bit masrawi]
5.00/5 (2 صوت)

05-23-2013 05:36 PM
الفشلة يتحكمون، نفسي اشوف اي شيء ناجح تعملو الحكومة. فشل زي ده اصلو ما منظور!!!!


#674477 [ساخر]
5.00/5 (1 صوت)

05-23-2013 05:16 PM
الله يطلع قلوبكم دي
قطعتو قلوبنا بالمشي لساعات طويله من الاستاد الي شروني حرام والله


#674457 [صادميم]
0.00/5 (0 صوت)

05-23-2013 04:28 PM
هل تتوقعون حلاً لمشكلة المواصلات من امين النعمة وهو قال بعظمة لسانه في برنامج تلفزيوني ما تمشي الناس لان المشي وسيلة من وسائل المواصلات


#674455 [الفاتح مقبول]
5.00/5 (1 صوت)

05-23-2013 04:23 PM
واضاف «مع ذلك لابد من معالجة للتوفيق ما بين
الرؤية العلمية المستندة لموجهات المخطط الهيكلي
ومعالجة شكاوي المواطنين من الاوضاع الجديدة» .

خليك من معالجة وكلام فارغ ..
ماذا فعلت مع الموظف الكبير
الذى قال لك فى اجتماع كنت
ترأسه ان نسبة الرضاء عن قرار
نقل المواقف لا يقل عن ثمانون
بالمائة
واضيف انك وجيشك الجرار من فاقدى
الموهبة الادارية والقدرة الاستراتيجية
غير مؤهلين لحل المشكل
وكان الله فى عوننا


#674426 [عصمتووف]
0.00/5 (0 صوت)

05-23-2013 03:53 PM
حل مشكلة المواصلات في انسيابها الاموال التي تم هدرها في الموقفين وشارع النيل كافية بتشيد انفاق وجسور وشوارع اجبارية ووقوف المركبات يجب ان يكون سليما كل واحد يقف ويقفل الشارع علي كيفة ويمنع وقوف المركبات العامة امام الاشارات والتقاطعات ويمنع عمل النمرات ما اكثر اخطاء وغباوة السائق السوداني وخاصة الحافلات ويمنع عمل الامجاد داخل الخرطوم وهم سبب الازمة بسيرهم البطئ وتجمعهم كاصحاب الركشات


#674411 [cour]
4.00/5 (1 صوت)

05-23-2013 03:43 PM
بصراحة الشعب السودانى جبان ويستاهل حكم الكيزان .والظاهر ان الشعب اصبح ادبا والدليل امامك وهم هكذا يدعوهم الحزب الحاكم للجهاد يلبون الدعوة ويدفعون الضرائب ويتبرعون بالذهب لصالح اعضاء الحزب .اللة يرحم البلد ويرزقة بشعب فية الخير لنفسة والاحرين امييييييييييين يارب


#674400 [abu sahar]
0.00/5 (0 صوت)

05-23-2013 03:32 PM
نخشى وكما عودتنا الإنقاذ ان تكون وراء كل هذه الفوضى مجرد مصالح أرزقية لانعاش منطقة شروني لصالح جهات محددة لا غير


#674349 [منعول ابكي حكومة]
0.00/5 (0 صوت)

05-23-2013 02:55 PM
الحكومة بقت خايفة وما عارفة تعمل شنو..وما عايزين يخلو الشعب ينتبه للبيحصل في البلد في الوقت الراهن لانو الاوضاع اصبحت الان غير مستقرة والحكومة وجدت نفسها امام خطر حقيقي لامفر منه وهذا الخطر ليس كغيره.....عشان كدا الحكومة او جهاز الامن تحديدا افتعل هذه الحكاية ....حكاية المواصلات ...المواصلات مافيها اي مشكلة...


#674299 [علاءالدين عباس]
5.00/5 (2 صوت)

05-23-2013 02:19 PM
هو الموضوع عادي كده انا غلطان وبصلح غلطي لانو محاسبه مافي ...لكن الله في


#674297 [ابوعلي]
5.00/5 (1 صوت)

05-23-2013 02:17 PM
لي شعبي الغلبان اقول الله يصبرك
---------------------------
عانيت كتير مر الهجير و الظلم صار ملازمك
لكن خلاص هانت قريب بالنصر ربي يآزرك
و علي بابا راح يلملم صعاليقه يودعك
ترجع تعيش تاني عزيز ما العزه اصلا تشبهك



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة