الأخبار
منوعات سودانية
تعالت صيحات سكانه من وجودهم..الأجانب يغزون حي الديم بالخرطوم
تعالت صيحات سكانه من وجودهم..الأجانب يغزون حي الديم بالخرطوم
تعالت صيحات سكانه من وجودهم..الأجانب يغزون حي الديم بالخرطوم


05-24-2013 09:18 AM

الخرطوم: مؤيد سعيد أحمد : حي الديم اعرق احياء وسط الخرطوم، وكان ذات يوم من ضمن احياء «الصحافة ظلط»، وموقع الديم الاستراتيجي بين ابو حمامة والعمارات جعل منه اكثر مناطق الخرطوم جاذبية من النواحي الحضارية والاقتصادية، وعرف الحي بتوفر الخدمات التعليمية والصحية بجانب توفر التعليم العالي من قبل جامعة السودان، ويقع بحي الديم مركز البرهاني الإسلامي الذي يعتبر مصدر إشعاع حضاري لكل السودان وبعض دول الجوار، إلا أن موقع الحي الاستراتيجي وقربه من مركز الخرطوم التجاري والإداري جلب للحي مشكلات سكن الأجانب، ورويداً رويداً بات الحي يجذب الأجانب للسكن فيه والعمل داخل مناطقه المختلفة لجهة رخص أسعار البيوت المستأجرة، وأكثر مظاهر وجود الأجانب في الحي انتشار الأماكن الخاصة ببيع الشاي والقهوة والنرجيلة «الشيشة» التي باتت تجذب الشباب للمنطقة التي يفدون إليها من مختلف أنحاء الخرطوم.
يقول المواطن عالم إنه عندما سكن في الحي لم يكن هناك أجانب، وأكد أنه لن يرحل عن الحي مهما كانت وجهة نظر الناس عن الأجانب، وقال «الأجانب لم يسببوا لي مشكلات أو إزعاجاً»، لكن الحاج آدم كان له رأي آخر يختلف عن إفادة عالم، حيث أبدى أسفه للحال التي وصل إليها حي الديم، وحمل الأمر للمسؤولين في الولاية بعد تفاقم الأوضاع بالحي. ويكشف الحاج آدم عن مناظر مخجلة وممارسات سيئة يرتكبها الأجانب بالحي، مضيفاً أن الأجانب أصبحوا أسياد الحي ويتعاملون على هذا الأساس.
على أن الحاجة فاطمة تروي جانباً من الحياة في الحي يتمحور حول كثافة عربات الدورية بالحي والكشات التي تعمل الجهات المختصة على تنفيذها، بجانب إغلاق عدد من المنازل المستأجرة، والقبض على الكثير من مخالفي القانون، وتؤكد الحاجة فاطمة أن الأحوال في الديم لم تتغير كثيراً بالرغم من كل تلك الحملات .

الصحافة


تعليقات 10 | إهداء 0 | زيارات 7898

التعليقات
#711186 [abu hamza alsaudi]
0.00/5 (0 صوت)

07-02-2013 12:47 AM
اقسم بعزة وجلال الله ان البيت اللي في الكورنر وفوقه الصحن الديجتال الابيض بيت دعارة تديره ست شاي حبشية معاها نسوان حبش وفلاتة


#675476 [جهاد الكترونى]
0.00/5 (0 صوت)

05-25-2013 01:31 AM
الديوم الشرقيةالحالية تاسست فى زمن الانجليز سنة 46 بعد ترحيلهامن منطقتها القديمةمن السكةحديدشمالا حتى مقابر فاروق جنوباً(كانت المقابر اخر الخرطوم)و تقسيم منطقتهاالسابقة الي نمرة 2 ونمرة 3 واضيفت لها العمارات حتى شارع 45 و اعطائها لكبار موظفى الدولة السودانيين وبعد ذالك قامت الحكومات الوطنية بتوزيع الامتدادات(امتداد العمارات من شارع 45 حتى 61 ) اما الصحافة فقد قام نميري بتوزيعها للصحافيين فى اواخر السبعينيات


#675373 [الصادق أبو روان]
5.00/5 (3 صوت)

05-24-2013 10:43 PM
أخي الفاضل تصحيح معلومة أولاً الديم ما تابع للصحافة بل الديم من أعرق أحياء الخرطوم والصحافة امتداد لسكان الديم لأننا من أهل الديم القدامى ديم التعايشة أخواني الكبار اتولدوا هناك وأمي هناك أيضاً في محطة الغالي والغالي أصيل ده عم أمي وهي مولوده هناك وحالياً نسكن الصحافة ومن أوائل سكان الصحافة لما كانت بيت هنا والتاني هناك ونعتبر نفسنا ديامة ما في كلام بعدين الحبش ديل أهلنا من زمان وأصبحوا جزء من واقعنا بنأجر ليهم ونشرب قهوتهم وناس عشريين خالص وبيدفعوا وكمان في الصحافة ساكنين والحلة مليانة يعني تجي طالع الصباح تقول إنك في أثيوبيا بعدين ديل ناس مساكين الظروف أجبرتهم وذلتهم يعني نكون عليهم نحن والزمن قول الحمد لله إنهم ماسكين مصاريف أسر سودانية بتنتفع من الإيجار ؟
وهناك مشاكل أكبر من كده شوف ليك موضوع حيوي ثاني اتكلم فيه عندك الفساد لو عندك الجرأة اتكلم فيه وخلي الحبش مع الديامة يحلوا مشاكلهم رغم إنه ما في مشاكل والأجانب ديل هم أبناء السودان بس من مناطق ثانية . وزي ما قال أحد الأخوان أي واحد جاء الخرطوم في التسعينات عايز يعمل فيها خرطومي أصلي فكونا ؟!


ردود على الصادق أبو روان
European Union [عاشق الامهره] 05-25-2013 02:27 PM
كلام في منتهي الروعه ,,,اخوتنا الاثيوبيون يعيشون بيينا من الاف السينين ويرحبون بكل سوداني في بلادهم دون تمثيل او نفاق كما يفعل جيرانا الفي الشمال

الف مرحب باهلنا الاثيوبيين في السودان فانتم وسط اهلكم مهما حاول المرجفون في صحيفة الصحافة اثارت الفتن بيننا

United States [الوطن فوق الجميع] 05-25-2013 11:04 AM
انا لست من سكان الخرطوم ولكن كلامك هذا ليس بمنطق،،، فحتى لو كنت من سكان الخرطوم والديم تحديداً فهذا لن يعطيك الحق في ان تقرر آلية وعمل وزارة داخلية،،، فالصحفي والشرطي والمواطن هم العين الساهرة،،، نحنا لسنا ضد عمل الحبش ولكن يجب أن تكون بطريقة مقننة محفوظة حقوق الجميع مستأجر ومأجر ومواطن ووافد. وحتى لو اجبرتهم الظروف مافي مشكلة مادام البلد اصلا ما فيها عمل للمواطنين اكيد بكون ما فيها وظائف لغيرهم والحبش يجب أن يكرموا إذا جاءوا نازحين بوضعهم في مكان معروف ومسجل اسمائهم وتعرفهم المنظمات،،، من باب الانسانية اولا ومن باب اننا سودانيين كلنا إن كنا نسكن الخرطوم أو غيرها..
فليس من المنطق انك عند بيت وتريد أن تتستأجره وبما أنه مستأجر من الاحباش لذلك لا تريد خروجهم لمصلحتك الخاصة تتطغى على مصلحة بلد بحاله.. فالوطن أهم من الممتلكات الشخصية والذاتية.

بعدين يا محترم السوداني له الحق في أن يسكن في كل شبر في ارض السودان طالما انه سوداني،،، ما معناها انت اتولدت في الخرطوم وفي الديم تحديدا فمعنى هذا بيشفع ليك أنك تكون وصي على عاصمة بلاد السودانيين وتسمح لمن يسكن ولمن لا يسكن.. لو انت فاهم الوضع دا كدا فانت محتاج تغيير طريقة تفكيرك.. فالعاصمة دي زاتها من قاموا بتعميرها هم اليونانيين والاقباط والمغاربة واليهود لانهم كانوا تجار والأغلبية الغالبة من السودانينين كانوا ناس زراعة في الجروف على النيل وناس اغنام. وقلة قليلة تتاجر في العيش والحبوب.

United States [سمير] 05-25-2013 09:58 AM
رائع وممتاز


#675128 [ودالخير]
0.00/5 (0 صوت)

05-24-2013 04:21 PM
الديم ارض الاجداد من حدائق القصر للموقع الحالى الذى يقوم الكيزان بجد ونشاط بهدمه ارض الحيوان وديم الله اب شنبر الداخل مفقود والخارج مولود من زمن كتشنر لرفع العلم شردت منه عندما انكشف حالى عمارة من خلفى وعمارة بجانبى واخرى امامى فتركت ارض اجدادى الى حى شعبى حيث انتمى بدون عمائر بدون اجانب ليس كره فى الاجانب ولكن حبا فى شعبى . ديامى من ارض الحيوان .


#675078 [hazim]
4.75/5 (3 صوت)

05-24-2013 03:04 PM
النظام العام و الحكومة عاملين رايحين,لا يريدون ان يغضبوا الحكومة الاثيوبية الشقيقة بمضايقة الاحباش فى السودان..اتركوا الاحباش ما تركوكم...ههههه,لكن هم بالتاكيد لم يتركوا مثل هذه الفوضى تحصل في بلدهم,اتحدى اي سوداني ان يستطيع يشتغل ماسح احذية في اثيوبيا من غير ان تمنعه الحكومة الاثيوبيه..رحم الله السودان لا صليح و لا وجيع


#675033 [ود الديم]
5.00/5 (4 صوت)

05-24-2013 02:01 PM
الديم حي عريق وبه اعرق سكان العاصمة ناس اصيلين ,وظاهرة الاجانب ليست في الديم وحده هنالك اجانب يقيمون الحفلات الماجنة وحفلات الدي جي المختلطة في شقق توجد في ارقي احياء العاصمة! الغريبة يجي واحد يتفاصح ويكون جا العاصمة في التسعينات!!!!!!


#674962 [مساكين المعذبين في الارض]
2.75/5 (4 صوت)

05-24-2013 12:06 PM
ياخوي الاجانب ديله مالبدفعوا القروش !!عشان كده كلو واحد اجر نص بيتو وله طلع منو واجروا كلو!!! يعني هم جوكم بالبنادق وله الهمة بقت رمة والقروش بتلعب بي راس اي زول في الزمن الصعب!!! والبشرب الشيشه وبدق القراف منو الاجانب مااولادكم!!! وانتو عارفين ممكن تطلعوهم في اي وقت عشان كده بتاجروا ليهم!! وشوف المستفيد قال لم يسببوا لي ازعاج والكتضرر راي الازعاج!!! مع العلم ان مجرد الدخول للشوارع في الديم تصيبك بالدولار من كثرة الفوضي والازدحام والركشات وفوضي ستات الاكل والشاي!! كانما نحن ىفي حاجة لستات شاي وقهوة مستوردات!! ونحنه عارفين ماحول الشاي!!! لكن بتوع الحمايه بس عوضية ممكن يضربوها لكن جماعة هشك بشك بيدوهم حقهم ناشف ولين!! شوربه ولحم!!!ويقولوا ليك لاتشغل اجنبي بدون اوراق هو الاجنبي عامل بزنس ومشغل نفسو وغيرو...!! لابل بعضهم من الوله بيدعي اخوة بعضهن للحصول علي الرقم الوطني!!! يعني بيجيبه علي اسم اهله!!! وقد شاهدت بام عيني مش قالولك من اعرفه يجلب احداهن بعد ان استخرج لها شادة ميلاد وينسبها انها شقيقته!!! وكان ضابط الجوازات حصيفا فشكك في الجنسية!! ورفض حتي ان يعيدها له دون ان يخبره بالحضور غدا للادارة الجوازات!!!!


#674905 [ممرض]
5.00/5 (8 صوت)

05-24-2013 10:53 AM
كاتب المقال سفيه وما عندو موضوع ولا أدنى فكرة عن الديم.... بقيتنا تابعين للصحافة؟؟ من متين؟؟ بعدين زعلان مالك من أجانب الديم وجاي تكورك في الزمن الضائع؟؟ كنت وين وحكومتك بتشرد في أهل الديم من بداية تسعيناتهم بس لأنو الديم بلد الشهيد على فضل والمرحوم نقد ولوممبا أول مواطن سوداني يقيم بإسرائيل!! حكومتك زرعت أول نظام عام في السودان كلو في الديم!! وعديييييل كدة قصدو المعترين والمرتاحين زاااتو وساوموهم عشان يبيعوا بيوتهم ويطفشو للأزهري والكلاكلة وأبوآدم كأكبر حملة في تاريخ السودان للإبدال السكاني - على مستوى الأحياء- .. ناس الديم نصهم بررا السودان والربع منهم باع وقبض سمينتو وإتخارج والربع القاعد دة... قاااااعد ورااااايق ومبسوووووط مع الحبش كان بنقالة مادام بهجتو مدورة ونقاطتو شغالة.!!.. الحسادة ليكم شنوووووو؟؟
قال الديم ضمن أحياء الصحافة!!! ودوني الضل ... جاب لي الضغط الوهم دة!!


ردود على ممرض
United States [سمير] 05-25-2013 09:55 AM
كلامك مضبوط هو اصلوا اسمو مؤيد يعني صغير اولا الديم هو ابو الكل ومازال هو ابو الصحافة والامتداد واركويت وغيرها وهو أرض الحضارة والابطال وانا انتمي للديم واحب الديم رغم اني ليس من سكان الديم ولكن الحقيقة يجب ان تقال فقد شهد الديم وراي فى حواريه ومدارسه الاستاذ/ محمد وردي ومحمد ميرغني وكثير من الشعراء والاطباء الكبار بالاضافة الى المناضلين ولااود ذكر الاسماء كلها لان القائمة تطول وبالمناسبة اغلب الاجانب الذين يسكنون الديم وغيره يعتبرونه في كثير من الاحيان محطة للذهاب لدول اخري .الكاتب يفتقر الى ابسط مقومات مادة التاريخ والعزرله لانه صغير فى العمر ولكن ممكن يسال مواليد الصحافة والامتداد فى الستينات والخمسينات والاربعينان .


#674903 [سامي]
4.50/5 (2 صوت)

05-24-2013 10:52 AM
الديوم باقسامها هي من اقدم احياء الخرطوم وبالاخص الديوم الشرقية وهذا الحي هو الحي الذي تفرخت منه باقي الاحياء مثل الامتداد والصحافة واركويت ولكن من السبب في وجود الاجانب ؟اكيد جزء من المواطنين انفسهم الذين يفضلون الايجار للاجنبي بدل المواطن لاسباب لاتخفي على الجميع وقالوا لفرعون من فرعنك قال : الناس . بعض سكان الديوم يؤجرون منازلهم للاجانب طمعا في سعر الايجار الاعلي وان الاجنبي ممكن يطلع في أي وقت تحتاج فيه لبيتك وهذا خطأ يقع فيه الكثيرون والكلام اتركه للديامه فأهل مكة ادري بشعابها والديم الذي ذكره الشاعر اسماعيل حسن وقال :-
بين الديوم والعمارات شارع ضلط للعين يبين لكن في الحق هو ماهو شارع هو الاف السنين


#674902 [عصمتووف]
5.00/5 (6 صوت)

05-24-2013 10:51 AM
الصحافة والصحف السودانية انتهت من كل مشاكل البلد واتجهت للاحباش اولا غالبية بيوت الديم اصحابها يؤجرونها للاحباش لتوفر الاموال والسعر المناسب لصاحب المنزل اما ممارساتهم ايضا السودانيون مقصرين اذهبوا لجده غالبية الاحياء تخجل الي غبيرا ومنفوحة الناصرية وابوظبي دبي الصحافة دي ما تمشي تفتح تلك الملفات والله خليها في سركم ساي كل العند الحبش عند نا وعند غيرنا لسنا ملائكة ومن العيب اثارة متاعب الشعوب وتنسون متاعبكم


ردود على عصمتووف
United States [؟] 05-25-2013 10:52 AM
بس يا فاهم في فرق بين احياء منفوحة واحياء غبيرة وغيرها من احياء جدة التي يسكنها السودانيين.. فهي إن كان بها فساد أو غيره فهي ليست ذات تأثير على مستوى اهل البلد.. فإن كان في فساد فهو فساد لأن طبيعة المنطقة هنا تختلف عن السودان ذو التداخل الاجتماعي وسوف يتأثر بها اغلبية الشباب نسبة لأن طبيعة السوداننين الانفتاح والتعرف على ثقافة الغير عكس المجتمعات الخليجية التي ضربت بها مثلاً.



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة