ولاية الخرطوم تطلع على تجربة روسيا في إنتاج الخبز المخلوط
الخرطوم
كشفت ولاية الخرطوم عن عرض روسي لمساعدة الولاية في تخفيض تكلفة انتاج الخبز عن طريق الخبز المخلوط وانشاء نموذج لمصنع ينتج مليون قطعة خبز في اليوم، بجانب الاتفاق على تطوير الانتاج الحيواني والزراعي عبر استخدام التقانات والآليات الروسية المتقدمة في هذا الجانب.
ووصف والي الخرطوم د.عبدالرحمن الخضر لدي لقائه مؤخراً موفد حاكم مقاطعة بلغراد الروسية المبادرة والموضوعات المطروحة بانها خطوة هامة لجهة ان التجربة الروسية عريقة وقائمة على خبرات متراكمة .
وتسلمت ولاية الخرطوم دعوة رسمية من روسيا للتوقيع على برنامج عمل مشترك يتم من خلاله تبادل المنافع المشتركة مع مقاطعة بلغراد الروسية.
الجريدة
س
قلنا ليك يا الوالي احلامك كبيرة ربنا يقدرك وذي ما قالوا السواي ما حداث
شفافيةالدب والتمساح ؟
اولا تصحيح معلومة – المدينة الروسية تسمى ( بيلغرد) وليست بلغراد –
ثانيا – المصنع هل سيكون شراكة مع جانب سودانى معين – ومن هو – ام ان
الامور ستكون ( كتمة ) بين دببة روسية وتماسيح سودانية –
يا ناس الصحافة هوي…
أخباركم بقت زي رسائل الوتساب…. ناقصة… وكلها غلط في غلط…. ومحتاجة إعادة صياغة (تحرير)
أسة الخبز ده مخلوط بي شنو؟ فودكا مثلاً؟
بعدين المقاطعة الروسية دي موقعها وين؟… وخبرتهم المذكورة في الخبر…. في شنو بالضبط؟
يا حليل الصحف…
والله الناس ديل الشغلة غلبتهم لا قادرين يلزموها ولا قادرين يفكوها والشعب هو الضحية
كويس عليهم حصار الان والسودان عليه حصار ،منذ اكثر من عشرين عاما،،،يللا استفيدو من روسيا ،،،قالً روسيا قال،،،
غايتو والي الخرطوم ده زول متخلف عديل وأي واحد يبيع ليهو “الترماج”.
رغيف بالخلطة الروسية الشيوعية
رغيف بالخلطة الإيرانية الشيعية
داهية تاخدكم كلكم يا بجم
مصانع للمريسة بدل مصانع للخبز
جميع الولايات فشلت في صناعة الخبز وبدلا لمصنع ينتج خبزا مخلوطا معناه في تفسيري قمح/ ذرة/ فتريتة علي ولاة الولايات انشاء مصانع تنتج الخبز السائل (المريسة) خاصة والينا المبدع الالمان يشربون البيره كباية كبييييييييييييييييييييييره ليها رغوة واجسامهم ما شاء الله شوف ح توفر كم دولار وان يكون تدشين المصنع باول انتاج للمريسة يتناولة عبدالحي يوسف وكمال رزق والكاروري وعصام وهي فتوي ومباركة بحلالها
وين شعار روسيا دنا عذابها
ارجعوا لدراسات مركز أبحاث الأغذية شمبات قبل 30 سنه تقريبا تجدون أبحاث و دراسات عن الخبز المخلوط و تم إنتاجه تجريبياً بنجاح فهذا ليس بجديد و لكن المهم من ينفذ
خطوة جميلة و ان جاءت متأخرة يجب ان ينتج نوع من الخبز بخلط القمح ببعض انواع الذرة البيضاء عندنا و هذا بجانب انه يقلل من تكلفة الخبز فأنه يشجع زراع الذرة بخلق سوق مضمون لهم..اغلب الدول تفعل ذلك,مصر القريبة مننا عندها غرفة خاصة لمثل هذا الدقيق المخلوط و تعتبر من امور الامن الغذائي…
السيد الوالى الهمام قدس الله سرك
مسالة الخبز المخلوط محلولة سودانيا منذ السبعينات بواسطة العلماء والباحثين السودانيين،راجع الملفات و ألأبحاث عن خبز القوار،ولا الحكاية سفر ونثريات وسياحة علاجية على حساب الزول السودانى القلبان وشراكة كيزان مع الروس وبعدين مافى وقت،الزير وإنكشف قطاه والمقراف شغال يطلع فى الفضائح والفساد وسلام يا إنقاذ.
بالله ما تنسو تشوفو لينا معاكم التجربة الدنماركية ….يا بتوعين التجارب
الوالى راجل مجتهد وبيعمل باخلاص
التوفيق من رب العالمين
وعلى كده السودانيين حيفطروا كل يوم فطور ما حصاش:
رايكم شنو في خبز مخلوط بالتراب والسجم والرماد يسمى خبز الخدر.
وبوش بالسمن البلدي مخلوط بالزيت الراجع ومصلح بالجير من جبل طورية والمرخيات يسمى بوش بشبش
بالإضافة لكمونية مسبكة بالطين اللك والنفايات والتراب المستورد تسمى كمونية الترابي.
وكل ذلك تشجيعاً للصناعات المحلية والموارد الذاتية.
هنيئاً مريئاً …..