أخيرا .. واحد إنقاذي طلع عنده دم!!ا
أخيرا .. واحد إنقاذي طلع عنده دم!!!
شريفة شرف الدين
[email protected]
طبعا مبدأ واحد يقدم استقالتو دي من المستحيلات في عرف الإنقاذ .. و يقدم استقالتو ليه طالما ما عندو مبدأ و هو عبارة عن أداة تنفيذية طيعة و في نفس الوقت بنود الصرف عليهو مفتوحة على أضلافها؟ أحمد إبراهيم الطاهر للشافو عيني عينك كده يقدمو لإمامة الصلاة .. الراجل رزين و رايق .. يعنى ما شفناه و يطرشنا كم سمعنا منو كلمة فالتة بجاي و لا بجاي من عيار مشتقات الكوع و يطلع لينا بره و أخواتها .. لكن ديك العدة لخبط ليهو الكيمان بمليارات العيد لنوام المجلس الوطني .. زي لمن تجدع ليك قطعة لحمة بين ناس أشعبين شديد.. تلقى الببلع و البخنق و البختف .. إلا كده النرجع للزول رئيس النوام .. يكون زعلان عشان كشفو حالتو بمرتبو أبو 31000 جنيه و بالقديم زيد تلاتة أصفار باليمين و ده طبعا بدون الحاجات التانية و لاّ هو براه شاف إنو سفينة الإنقاذ سارت بس المرة دي تبالي برياح النهاية و لاّ يكون الراجل شبع خلاص و لاّ عشان نكون منصفين شوية كمان .. ضميرو المستتر بقى ظاهر و أنبو ؟ لا لا ده أكيد استفاد من حكاية الثورات العربية و إنو الواحد ينضم للثوار قبل الزمن الضايع عشان بعدين ما يتجرجر .. مهما يكون الزول شذ و بقى عندو حبة دم .. اسمحو لي يا جماعة ارجعكم تاني لجزء من مقال كتبتو قبل كده بوضح فيهو المدى الكبير الذي بلغه العهد البشيري في العدالة
(جاءنا النبأ التالي من وزير العدل دوسة: براءة ممهورة بتوقيع الوزير و بمباركة إمامنا البشير يشهدان فيها أمام رب الخلق أجمعين .. بنقاء ملفات الإنقاذيين عن بكرة أبيهم .. الفي الغروب و الفي الشروق و الفي الشمال و الفي الجنـ (وووووب علينا) .. ساد العدل و لا نامت أعين محمد أحمد ضمانا لولاءه و إتقاء لتمرده ..و نسبة لهذه الأمانة فقد رُفِعتْ الرقابة عن كل الإنقاذيين مع إلغاء مهام المراجع العام و إستبداله بمهمة المانح العام للحوافز و هذا البيان يَجُبُّ ما قبله و ما بعده (انتهى النبأ الأليم)
الحاجة الدايرنها جرد قبل خلو الطرف .. إنتو عارفين إنو بيل كلنتون لمن إنتهت فترة ولايتو الرئاسية التانية و طلع من البيت الأبيض عملوا جرد و فقدو دسته ملاعق!!!
أتوقع .. أتوقع إنو الجماعة حيمرقوا من التنظيم واحد وراء التاني لكن ما عارفه يفسروا كلام نافع بشنو القال فيهو (اللي بيطلع من المؤتمر الوطني هالك)؟ اللي قدر يفسرو يقول لينا يا جماعة الراكوبة.
التفسير/ البطلع منهم بصبح من عامة الشعب والشعب طبعا هالك منذ
نافع بقصد بحاول يفضحنا ويتكلم عن عميلنا العملناها فى الوطن والشعب المسيكين ده حيكون مصيرة الموت
ياشريفة يا بت امى الحرفنة مع الدغمسة بتخارجوا من لحس الكوع دحين يا بت امى ما تخافى الجماعة ديل يجيدون المروغة والتهديف اعملى حسابك انتى ما يركبوا التونسية ولدار التائبات يزفوك والقدقدو يجلدوك وفى التلفاز يبشعوبك ومن الملة يخرجوك وفي الانتريت ينشروك
يا استاذه شريفه
اول حاجة ما براهو بيل كلينتون تمت مراجعة عهدتو لما انتهت فترتو الرئاسيه برضو قرينا فى الراكوبه قصة اعادة الرئيس اسماعيل الازهرى رحمة الله عليه اعد بعض المال الفارق فى المنصرفات لما طلع من رئاسة الوزراء و برضو الاستاذ عبد الرحمن على طه رحمه الله لما ترك وزارة المعارف و اعاد المنزل غرم تمن طبلة باب القراش المفقودة من العهدة !!! انا مستغرب اهل الانقاذ ديل حيرجعو النهبوهو و ملؤوا به كروشهم كيف !!!
تانى حاجه ازيدك من الحاجات التانيه لمرتب و مخصصات هبل( رئيس المجلس الوطنى) المفضوح دا راتبو الشهرى 11 مليون و جملة المخصصات الكاش 50 مليون زى بدل اللبس ( دا براهو مرتب اقل شى 4 شهور فى السنة مع ملاحظة انو بيلبس جلاليب و لو اللبسه الكامله بتكلف قولى 400جنيه يعنى الراجل دا بيعمل ليهو زى 120 لبسه فل سووت بلدى و الهدوم دى بتمشى الغسيل مرة واحده فى السنه !!!) و ما قلتى بدل الضيافه كم ؟؟ و بدل التمثيل كم ؟؟؟ و ظرف الرئيس فى المناسبات و العيدين ( الظرف الجديد لعيد رمضان براهو ……و دا للعضو ساكت 15 مليون )!!!!!! و نثرية السفريه 45 الف دولار !!!! بعد ده احسبى فاتورة الموبايلات و الجمره الخبيثه ( تتصورى عندو فى كل بيت من البيتين بس المعلومات ما لا يقل من 10 اسبليت يونيت مدوره 24 ساعه نن استوب …..وفاتورتها لكل بيت لا يقل من 15 مليون فى الشهر ) و العلاج الطبى على حساب المسكين محمد احمد فى الداخل والخارج و تذاكر الطيران للاجازات و للسفر للعلاج ( بالمناسبه دا عندو قاوت وضغط و سكرى و بدانه مرضيه و برود ج………. و دكتورو بره . ) و العربات ليهو و للاولاد بسواقين من الدوله !!!! الاولاد ديل بس النسوان لانو ما مندو ولد !! و البربراويه ماليه البيت بناس بربر زى البرازايت ………. و بعد دا حيكون فى فساااااد يا حاسدين !!!!!!!!!!!