جـيـب دفـتـر حـسـابَـك
جـيـب دفـتـر حـسـابَـك
طلال دفع الله
[email protected]
***
يا وطن ..
جيب دفتر حسابك
ويلاّكن نراجع
أكتب يلا عندك
أشجان المواجع
دمعات الفواجع :
نهباً .. عيني عينك
ريسيس .. و البطانه
سمّاها المراجع
بخيانة أمانه ..
و زيادة المواجع
بى إسم الديانه.
و اكتب برضو عندك
ديل يا وطني آفه
أفصِح و بالرطانه
ما من دمك إنت
ولا حاسبين معانا.
أكتب برضو عندك
ديل البينا بينهم
شهدانا و دمانا
ديل البينا بينهم
لا حد من مظالم
لا عد من جرايم
لا جونا برضانا.
فات الحد صبُرنا
بين ماكلين حقوقنا
و بين زاردين حلوقنا
بين لا قرايه صحّه
و في مجاعه .. و إهانه.
ديل البينا بينهم
أموالنا و عَنانا
و بيناتنا المحاكم
وَجَبَت حان أوانها.
