دفع الله حسب الرسول يفتي بعدم جواز تبادل القمصان الرياضية بين لاعبي المريخ وبايرن ميونخ
صلاح الدين عووضة
* من منطلق تشجيع (اللعبة الحلوة) نشجع خطوة شيخ دفع الله في ترك فتاوى (النسوان)- «شوية»- والخوض في فتاوى (كروية)..
* فالخطوة هذه تستحق منا تشجيعاً ذا (تصفيق!!) أشد من (صفقة) برلمان دفع الله عند إجازة قرارات اقتصادية ذات (رهق) إقتصادي على الناس..
* أو تستحق- على الأقل- (رضا) مثل رضا برلمان شيخنا هذا إزاء إجازة (القروض الربوية!!)..
* و(خدوا بالكم) من حكاية القروض الربوية هذه لأنها بمثابة (البطاقة الحمراء!!) التي يمكن أن يُطرد بها شيخ دفع الله من ملاعب كرة القدم لـ((يرتد!!) إلى ملاعب النساء التي (يجيد اللعب) فيها..
* فقد افتى- هذه المرة- شيخنا الذي اشتهر (على حساب الحريم!!) بحرمة تبادل القمصان الرياضية بين لاعبي المريخ وبايرن ميونخ في اللقاء الذي يفترض أنه جرى بين الناديين أمس..
* قال- لا فُضَّ فوه- أن هذا لا يجوز شرعاً بما أن (فنائل) لاعبي النادي الألماني عليها إعلانات ترويجية خاصة بـ(الكفار!!)..
* ولأننا حريصون على بقاء الشيخ (المثير للجدل) في ملاعب الكرة هذه- كي لا يحن إلى «قديمه»- فإننا نذكِّره بكلمة لنا قبل اشهر كان برلمانه منهمكاً خلالها في إجازة (قرض ربوي!!)..
* نذكره إياها- فقط- من باب إشعاره بـ(الحياء!!) علَّه يجد (مخارجة كلامية) تعينه على صد (هجمات مرتدة) قد تُشنُّ ضده من منطلقات (الشريعة) ذاتها التي ينطلق منها..
* ففي كلمتنا تلك عقدنا مقارنة بين برلمان- فيه أمثال شيخ دفع الله- يجيز قرضاً ربوياً، وبين بعض لاعبي نادي نيوكاسل المسلمين الذين رفضوا إرتداء (فنلات) عليها شعارات شركة (ربوية!!)..
* فلاعبو النادي الإنجليزي هذا- يا مولانا- فضلوا العقوبة على الترويج للربا في الوقت الذي (بصمتم!!) فيه أنتم على مشروع قرض ربوي لأن الحكومة كانت (عايزة كده)..
* والآن (تُحرِّمون) على لاعبي المريخ تبادل القمصان مع (الكفار) تماماً مثلما كان الخوارج يسفكون (دماء البشر) ثم (يُحرِّمون) الصلاة بثياب عليها (دم البعوض!!)..
* قل لنا (أي حاجة) يا شيخنا (مخارجة) لنفسك من الورطة هذه لأننا نريدك (لاعباً أساسياً) في ملاعبنا الخاصة بكرة القدم..
* فوجودك فيها- الملاعب هذه- سوف يعطيها (نكهة) يحبها الرجال، ولا تكرهها النساء..
* قل- مثلاً- انك تعترض على إجازة القرض الربوي بأثر رجعي ولا يهمك إن (غضبت!!) الحكومة أم رضيت..
* أو قل إن البرلمان الذي (نُجبَرون!!) على أن (تبصموا) داخله- ولو كان على شيء ضد الشرع- (ده طرفك انت شخصياً منو) متفرغاً من الآن فصاعداً لـ(الكورة وبس)..
* أو قل إنك لم تدل بمثل الفتوى هذه أبداً والصحافة (كضَّابة!!)..
*قل أي حاجة يا شيخنا ونحن جاهزون لـ(التصفيق) إن كانت لعبة (المخارجة!!) حلوة..
* ويا نساء السودان: (دعواتكن معانا!!!!!!!).
آخرلحظة
[email][email protected][/email]
ياخي ده عايز يشتهر وعايز يعمل نجم ويتلمع ساي ,, أسئلة للشيخ لعله يجد فيها ما يشغله عن الكرة وعن النساء 1- هل يجوز إبادة أهلنا في دارفور بالطائرات الغبية التي لا تفرز بين العسكر والمدنيين ؟ 2/ هل يجوز قتل أكثر من 200 شاب وشابة أيام المظاهرات دون تقديم من قتلهم للمحاكمة ؟ 3- هل يجوز والغربة حارة بالخطاب تبخل علي ؟ هههههههههههه الأخيرة دي شكلها بتعجب الشيخ .
يا شيخنا والله انت طلعت (خرنق ) الم تجد موضوع اخر لتفتي به .فعلا في زمن الأنحطاط يختفي المفكرون والعلماء .
الزول دا ماعندو موضوع هو مايتكلم في مصائب البلد الكثيرة شغلتو كلها نسوان وختان وهوس فكونا منو
انا اقترح على الاتحاد العام ان يمنح عضوية لدفع الله نسوان
عسى و لعل يطور مستوى الكورة و نقدر نجيب بطولات خارجية
الاستأذ/عووضة
تسلم ،ويسلم قلمك
والله المقال دة خلي ليك حسبو دة محتار عديييييل
يحلها من وين ولاوين
لكن اقول ليك حاجة
اخير علقة زوج الدكتورة من مقالك دة
إنضرب بالحزام ووجع الجسد زال
لكن وجع الكتابة دة اللي بيزيحوا شنو
مبرووووووك يا نساء السودان
دة الرد الشافي والكافي والمنمق بالقوافي من ودعووضة اللي ما بيقبل فيكن التعالي
والله كل ماترد سيرة هذا الدفع الله 000اجد لسانى ودون ان اشعريردد المثل (الحبوباتى )والذى كنت اسمعه كثيرا منهن فى مناسبات مشابهة
الطويل جهلو واشقاوة اهلو 000اهلو الكيزان طبعن
والله فعلا ياامى ارحكى ندعى شوية امكن نصادف ساعة الاستجابه الليلة الجمعة
وقولن معاى ياخواتى ياهادى اهدنا ياهادى اهدنا وياهادى اهدى ابودفاع واكفى شر هجمات الهجوم
وياربى ارحمو من دخول الاهداف البدخلها فى قوونو براهو من جهلو والطويل جهلو واااااااااااشقاوة اهلو
الزول لسع قاعد وليه ما يفتى لينا فى الدولة
هذا (الشاخ)
يحتاج إلي إخضاعة إلي فحص طبيّ جسديّ ونفسيّ متكامل
يفحص جينيّا و(جنيّا) لإكتشاف مسببات عقده النفسيّة
وإذا كان ثمة ( خدوش و وجروح عميقة) من زمان فائت
وربّما تعطّلت (محرّكاته) وبات يخفي ذلك (بشاذ القول )
في امور كتيرة. وعظيمة. من من مثل هذه الفتاوي ويمكن ذكرها من باب النصح وليس الفتوي …
اذا طلع من البرلمان حيصرف على حريمو التلاته من وين عشان كدا هذا المنافق لابد ان يبصم ويصفق وحبه الشديد للظهور فى الاعلام هو القعد يخليهو يفتى مثل هذه الفتاوى دا راجل فارغ ومخو فاضى
فلتو الكتر غلتو
الشيخ دنب كديس يبدى اراءه دون وعى
ياشيخنا اه رايك شنو في العمة والجلابية قماشمهم من سويسرا بلد الكفار
يا أهل الخير الراجل ده مسكين . سيبوه فى حاله . ماعنده شغله يشتغله وماعنده حاجه يعمله خلوه يفتى شويه امكن الموضوع ده يريحه ويطلعه من الحالة النفسيه الصعبة العايشه ديه.
والله يا اخوانا الرال لذيذ كلما اقراء الفتاوي بتاعته اقعد اضحك وانسي هموم الغربة شكرا ابوالدفاع انت زي وزير الدفاع ضحكتونا والله شكرا
هذا الرجل اصبح من قبيل ضووا بالشمعة شوفونا
دائما ما ادعو لامثال الشيخ دفع الله الهداية والشفاء …. فمدرس اللغة العربية الذي دخل مجال الافتاء من دولة نيجيريا التي كان مبعوثا لها يعتبر ( حالة ) مثالية تستحق الدراسة والتشخيص من قبل اطباء واخصائي الامراض النفسية والعقلية وطلاب كليات الطب ……
لم اسمع بالرجل الا في السنتين الاخيرتين
فهل للشيخ فتاوى سابقة بشان الاعلانات ( الكافرة ) لسلع (كفار ) ؟؟
اكيد الشيخ لا يمتطي سيارات المجلس الوطني الفارهة لانها من صنع ( الكفار) ….
ولا يستخدم الموبايل لا نه ( صنيعة كافرة ) وغيرها من صنائع الكفرة والكفار ……
شفاك الله يا شيخنا وهداك فامثالك هم من جعلونا في هذا الدرك السحيق من التخلف …
يا جماعة لاعبي البايرن والله ما اعطوا لاعبي المريخ فنائلم بس اعطوه لي السعودي وغاندي .الجماعة ما شغالين بينا .بس والله الراجل دة ماعندوا موضوع واقوليكم حاجة الكاتب وانحن برضنا ما عندنا موضوع قوموا لفوا الصينية يا اجبن شعب في الكون
أكيد يا شيخ فى يوم من الايام مرضت و كذلك بعض افراد اسرتك , ألم تستعمل أدوية صنعها الكفار ؟ معظم الاشياء التى تستعملها صنعها كفار إلا إذا كنت بتحب الصناعة المصرية و كما تعلم بأنها مغشوشة .
ما قول الشيخ في الاف الشباب الذين يلبسون فنايل مشاهير لاعبي العالم باسمائهم وحتى هنالك فنايل لغير لاعبى الكره بصور وكاتابات لا يعرف من يلبسها ما كتب فيها .. اليس من الاولى ان فتوته كانت تكون في ذلك قبل تبادل الفنايل مع لاعبى البايرن..
ده كل القدرت عليهو ياابو عفنه؟ ربنا ينتقم منكم زي ما دمرتو البلد وأخرتونا سنين طويله ماتحركنا شبر من محلنا
عمكم ده والله خارج الشبكة والظاهر طايرة لى عرسة بس البرلمان افلس ماديا ومعنوين
يا ناس الراكوبة انتو جايبين صورة البت العسل دى مع هيثم عايزين فتوى من دفع الله كندوم ولا شنو .
طيب تبادل القبلات كيف؟
التحية لشيخنا الجليل دفع الله حفظه الله تعالى .. و اقول للمعلقين الهمج ديل دفع الله افقه بأمور الدين منكم .. التطاول على العلماء هي من علامات الساعه .. يخون فيها الامين و يكذب فيها الصادق لك الله يا الاسلام . حسبي الله و نعم الوكيل .
أؤيد الشيخ دفع الله حسب الرسول في فتاويه المثيرة ضد كرة القدم النسائية فهي سوف تتسبب في تشتيت جهد النساء بين ملاعبهن و ملاعب الرجال الذين يحتاجون إليهن في المدرجات لمؤازرة منتخبنا القومي للرجال كي يفوز بكأس إفريقيا للسيدات! خير من مثل بأمدرمان بعد سيول 88 !
عمكم ده شايل كراع طفل اعملو حسابكم
هذه ليست فتوى بل فسوه وارجو ان لا تنشروا لهذا ولامثاله لانهم نكِره
الزول دا جنه وحالتو ما بتمني الآن خلي الجعوز العفنه والجعوز النظيفه والحلوه !! وقابل الكوره ؟؟
أنا قبل كده كتبت ليك يا شيخنا عن إجازة القروض الربويه في البرلمان وهي حرب علي الله ما لقيت منك رد ؟ وسألتك عن الغلف الما مطهارت العفنات إنت شفتوهم وين ومتين وما رديت علي ؟؟ وبالمناسبه الملابس الحلوه التي تلبسها إنت وهيئة علماء السودان مصنوعه في بلاد الكفر والعربات البتركبوها مصنوعه في بلاد الكفر والدواء مصنوع في بلاد الكفر !!!! يا أخي ما تخلينا من أمورك الفارغه دي وجاي تتكلم في لعب البنات للكوره حرام وإنتوا وديتوا البنات للدفاع الشعبي ويختلطن مع الصبيان في الخلا ويدربن علي حمل السلاح ليه دا حلال يا أخي إنتوا حللتوا الربا وسترتوا الزاني بفقه الستره وحميتوا الحرامي بفقه التمكين والربا والمرابين بفقه الضروره . في السودان كل عارف دينو قبل ما تجوا إنتوا علماء ضلال وتنابلة سلطان .
ربنا ينور بصيرتو دبل الهجولة البيعمل فيها دي يشوف سجم الحكومة دي والبتعمل فيهو
يا اخوانا حسيو نسوان قصدة لا يجوز تبادل القمصان بين اللاعبين الرجال واللاعبات الحريم لانو ديل بنات يافعات ويمكن يحصل حمل من القنابل دى!!
ياشيخنا شغل الترزية ده لسه ما تركتو على المقاس بتفصل الله يعين عيالك