ميرغني أبو شنب : الصحافة الرياضية (منحطة)..!! وهذه الأنثى هزت كياني..!!
فلاشات: تفاؤل العامري
مثير للجدل أينما حطت حروف قلمه.. وصاحب تاريخ طويل في دنيا الصحافة الرياضية التي يعتبر من المؤسسين لها في السودان، يمتاز بالجرأة في الطرح، والتي تصل في بعض الأحيان إلى أسقف يصعب معها كتمان الدهشة.. يعرف في الوسط الصحفي بـ(الكاتب الشامل) لأنه لم يحصر زاويته في الحديث عن الرياضة فقط بل يتناول الحديث عن الفن والسياسة إذا لزم الأمر.. يصفه البعض بأنه (سليط اللسان) والبعض الآخر بأنه (رجل مزاجي) يكتب وفق مكانة الآخرين بداخله، لذلك حملت (فلاشات) أوراقها واتجهت صوب منزله بتعويضات بيت المال بأم درمان للحديث حول جوانب عدة، فماذا قال؟
*بداية حدثنا عن سر لقب (أبو شنب)؟
والله أبوي كان راجل صاحب (شنب كبير) وهو من أشهر تجار العطور في عطبرة ودكانه كان قبلة لأي عروس وكان مشهور (بي شنبو) فانتقل اللقب لي ولبقية إخواني من بينهم لاعب الكرة إسماعيل أبو شنب.
* تواجه اتهامات عدة مفادها أنك تقوم بتصفية حساباتك الشخصية من خلال مقالاتك؟
رد بسرعة وكأنه ينتظر سؤالي: في مثل بقول (البريدو بزيدو) وأنا البريدو بطيروا السماء لكن البدخل معاي في كراهية بـ(غطس حجرو) لأنو ما عندي وسيلة دفاع غير قلمي دا..!!
*إذن أنت تؤكد على السؤال السابق وعلى صحة ما يتردد حول تصفيتك لحساباتك عبر مقالاتك؟
نعم…بكل تأكيد..!!
* كثيراً ما نطالع طلبات زواج متكررة من خلال مقالاتك للفنانات والمذيعات..(الحكاية شنو)؟
أنا راجل أحب الجمال جدا ولو كنت أستطيع أن أتزوج كل الجميلات لفعلت وطوال حياتي أتمنى أن أحظى بقبول كل فتاة جميلة وارتبط بيها..!!
* إذن بالتأكيد عشت فترة شباب مختلفة.. بسرعة ارسم لنا تلك الأيام؟
اعتدل في جلسته ثم ابتسم قائلاً: أنا كنت متعدد العلاقات لأني تمتعت بمسحة جمالية وكنت أكثر سوداني أنيق.. ملابسي كانت بتجي من دبي لدرجة أن أصحابي أطلقوا عليّ لقب المغترب وكنت بشتري العطور الماركة عشان كدا البنات (كانوا بحبوني).!
*هاجمت الفنانة ندى القلعة في أكثر من مناسبة لأنها رفضت الزواج منك؟
ارتسمت علامات غضب واضحة على وجهه ثم اعتدل قائلاً: ندى القلعة ما من نوع النسوان البعجبوني لا صوت لا شكل!!.. وعمري ما فكرت فيها تكون زوجة لي وكل سبب الخلاف بيننا لأنها (ناكرة جميل).. أنا الذي صنعتها من عدم ولم تحفظ لي هذا الجميل.
*إذن لماذا كل هذه العداوة وهذه الخلافات؟
سبب الخلاف الحقيقي أنها اتصلت بي في يوم ما وقالت لي: (يا ميرغني أنا قررت أعتزل وأتحجب).. لما كتبت الخبر زعلت واتصلت بي قالت لي أنا بتونس معاك.!!… وأنا رديت عليها قلت ليها إنتي ما صاحبتي عشان تتونسي معاي وتاني ما تضربي لي ومن هنا كانت مقاطعتنا..!!
*بصراحة.. هل ندمت على مقال قمت بكتابته من قبل؟
إطلاقاً لم أندم، فأنا أحرص على كتابة مقال هادف ومتوازن بصحيفة (أخبار اليوم) لأن الرئيس عمر البشير بيقرأ مقالي يومياً..!!!
* موقف محرج عالق بذاكرتك؟
حينما صدر قرار إيقافي عن الكتابة من جميع الصحف الرياضية وكان الجميع يخشى التعامل معي.
* نعود لحادثة سابقة وهي قصة الموز والأناناس الذي قلت إن العاملين بقناة النيلين التهموه.. ما هي القصة الحقيقية؟
ضحك كثيراً قبل أن يجيب: (الناس ديل جوا سجلوا معاي سهرة ولما نجحت طلبوا مني تاني تسجيل حلقة و(ضربت) معاهم برضو وتاني طالبوني بتسجيل حلقتين ووافقت وبكل حب مليت ليهم التلاجة عصائر ومياه غازية وموز، وكان في علب أناناس، لكنها حاجة خاصة بي، وبعد ذهابهم تفاجأت بالثلاجة فاضية من كل شيء حتى علب الأناناس وجدتها ملقية تحت السراير، مع العلم أنهم منحوني (300) جنيه فقط مقابل السهرات الأربع وفي ذلك عدم احترام لي، فقمت بإرجاع النقود لهم وكتبت مقالي عنهم.
*هل هنالك أشخاص لا تنتقدهم أبداً؟
طبعاً.. أنا عندي ناس (ما بلعب فيهم) نهائي..!!
* في وقت سابق وصفتك مذيعة قناة النيل الأزرق سهام عمر بأنك (متصابي) ما هو السبب؟
سهام دي في يوم أساءت للصحفيين وشتمتهم وأنا من ضمن مسؤولياتي أن أحمي زملائي وأبنائي الصحفيين وأدافع عنهم، لذلك قمت بكتابة مقال طويل عريض عنها وقلت لها خلاله: (يمكن أن أكون متصابي.. لأني أعشق الجمال.. لكن الغريبة في عمري دا كلو ما عاينت ليك ولا فكرت فيك).. وبرضو في النهاية سامحتها.
* بصراحة ما هو رأيك في الفنانين الشباب في الساحة الفنية اليوم؟
هؤلاء الشباب يواجهون حملات شرسة وظالمة لكنني أعتقد أن أغنياتهم مميزة وهم شباب مبدعون، والهبوط بصراحة ما من مسؤوليتهم لأنهم جوا (لقوا الكبار ساقطين)، فإذا كان ناس الحقيبة بغنوا (للطابق البوخة) يعني بغازلوا في المرأة (المدخنة) ونماذج كتيرة ساقطة زي دي فمن المفترض إنو الشباب ديل ما في زول يسألهم.
*بصراحة ما هو رأيك في الصحافة الرياضية؟
بدون مؤاخذة… الصحافة الرياضية الحالية (منحطة).. وأنا آسف عزيزي القارئ الكريم على هذه الكلمة… لكن صحافة الزمن دا عبارة عن (هلال مريخ) ما عندها علاقة بالوسط الرياضي والصحفيون فيها يتصارعون من أجل فريقين، وذلك الصراع يصل (للرشوة) ولأشياء أخرى أفسدت الصحافة الرياضية وحطت من مكانتها.
* على ذكر الصحافة الرياضية… أنت رجل معروف بهلاليتك الصارخة.. ما هو رأيك في بعض رجال الأعمال الذين اقتحموا الكيان الهلالي بصورة مستفزة كالخندقاوي الذي ملأت إعلاناته وأخباره الصحف؟
الخندقاوي (مريخابي فرحان) عايز يشتري الهلال بقروشو زي الكاردينال.. ودي النوعية التي أفسدت الرياضة في السودان.. الخندقاوي راجل (جيبو مليان دولارات) يدفع لمن يشاء وأكتر حاجة زعلتني أن البعض يردد أنه دفع لبعض ظرفاء أمدرمان (500) دولار، منهم كمال آفرو والهادي الضلالي وخالد ليمونة، وهؤلاء إن صحت هذه الأقاويل سينتقلون من خانة (الظرفاء) إلى خانة (السفهاء)!!
*ما هو رأيك في السيارة الجديدة للكاردينال؟
الزول دا حيجي يوم ربنا يسأله من قروشو دي كيف جمعها وفيما صرفها.. وأنا بفتكر إنو كان من الأجدى إنو يعمل ليهو مسجد أو يساهم في أعمال خير.
*هل يمكن أن يعتزل أبو شنب الكتابة نهائياً؟
زمان فكرت بعد الحج أخليها.. بس لقيت الموضوع صعب خالص.
*ومتى يبكي أبو شنب؟
أبكي عندما أسمع بكاء طفل.
* بدون دبلوماسية.. من هي الأنثى التي هزت كيانك؟
المغفور ليها ليلي المغربي لأنها ربطتني بها علاقة جميلة وكنت أنوي الزواج منها.
* بصراحة… كم عمرك الآن؟
70 سنة.
*ما حقيقة خلافك مع الفنان كمال ترباس؟
ترباس راجل كان أخوي وصاحبي لكن الآن نحن مختلفين ومتخاصمين، والسبب إنو ترباس جاء يشيل الفاتحة معاي في زوجتي وعمل الموضوع كلو نكات في نكات، والمعزين بقوا يضحكوا وما في زول راعى لكمية الحزن الجواي، وأنا كتبت الكلام دا قبل كدا في الجريدة، وهسي بقول لي ترباس إنو إنت غلطت.. وأنا كنت قاسي معاك في الكتابة.. ويا أخوي الدنيا ما فيها شي والعفو والعافية.
*أبو شنب.. هل طلبت الزواج من الفنانة إيمان لندن؟
إيمان هي اللي فرضت روحها علي.. وأنا زي إيمان دي ما بعرسها..!!!
*كاتب صحفي مشاكس يلفت انتباهك؟
الرشيد علي عمر.. وهو خليفتي في الصحافة الرياضية فأنا عاشق لقلمه.
السوداني
صحفي صعلوق ومنحط .. قوم لف لفاك قطر ياتافه
خلاص ياشامى كابور
لقاء باهت وكلام لا يتناسب مع سبعيني .
كنت اتمني ان يناي المحاور عن الاسئلة الشخصية ويحاول يوثق لتاريخ الصحافة الرياضية بدلا من السؤال عن علاقاته العاطفية واخصوماته .
الانسان في عمر السبعين تنعدم لدية الشهوه الجنسية ويفقد كثير من قدرته الجنسية في نفس الوقت وتنمو عنده شهوة ممارسة الجنس بالكلام مثال (عرضت على الزواج و رفضتها ودي قالت لي تعال ياحبيبي ..) .
: في مثل بقول (البريدو بزيدو) وأنا البريدو بطيروا السماء لكن البدخل معاي في كراهية بـ(غطس حجرو) لأنو ما عندي وسيلة دفاع غير قلمي دا..!!
بالله ده اسلوب ،،، عشان كدة الصحافة السودانية مدرسة قائمة بذاتها لم يتعلم منهاأحد ولا يريد أن يعرف عنها أحد ،،،
الزول دا فاتية عديل( استغفر الله أستغفر الله)
ده صحفي شنو ده !! راجل غبي
تعليقاتك إن صدقت..حولتك من (أبوشنب) (لأبوضنب)..وغاب (الشنب) ..ولعب (الضنب)!!
للحقيقة كان لبيس ووجيه بس الواحد ما كان بيقرأ ليه، وحمدت الله لذلك
ضربك الخرف يا أبو شنب و بقيت تهضرب ساكت. و فعلا الرشيد على عمر ياهو شبهك.
دا كلام شنو دا يا ميرغنى الما عندك شنب دى ما بعرسها ودى ما المرة البتعجبنى عمرك 70 سنة ولسة بتتهابل…عامل فيها(valentine )…كلامك يسبب صداع والعمل الحوار فاضى شغلة وما فى داعى لتجريح الناس .
والله ما قايلك بالسطحية دى يا ابو شنب
عليكم الله اسي دا كلام بيقولو صحفي؟؟؟
الله المستعان…….
اذا ابتليتم فاستتروا …….
اذا كان دا اسلوبك يا أبو شنب فى هذا اللقاء الخاص فأقول واسفاه على صحفى السودان !! وانت تعديت السبعين بمعنى أهو جاتك فرصه لتلميع سيرتك الصحفيه وتحاول رسم لوحه ادبيه طابعها الوقار مش سيرة حريم صايعات وفاجرات حطت من قيمة المقابله رغم انها منحطه بما حوت ….
شفتوا مرحلة الإنحطاط والإنتكاسة الوصلنا ليها!!؟
نرجسية وضحالة وقلة ذوق وقلة أدب كمان
دا معلم بتاع فراخ كمونية وكوارع وبس، هو مش صاحب مطعم “عطبرة ملتقى الرياضيين” في أمدرمان!!؟
“فأنا أحرص على كتابة مقال هادف ومتوازن بصحيفة (أخبار اليوم) لأن الرئيس عمر البشير بيقرأ مقالي يومياً..!!! ”
ياهو فعلاً شبهك ومستواك يا أرزقي ياضحل
ماأقبح المراهقة في سن ال70وبعدين شعراء (الطابق البوخة) والغنوها من ناس الحقيبة او ابو داؤود ديل ناس فحول بقولوا الكلام النابع من تراث الشعب السوداني مش زي الباطلين بتاعنك ديل ياابوضنب تلقى الواحد لابس قلادة وممشط راسو وممسح بالكريمات
ده ما لقاء صحفي مع احترامي ليكم يا ناس جريدة السوداني ده عبارة عن قطيعه في قعدة بتاع نسوان مع الجبنه أو قعدة حلوات في صيوان ليلة الخدمة .. معقوله بس ديك ما بعرسا ودي لابحب صوتا ولا بحب جسما وده ضحك في فاتحة مرتي …
الاخوه المعلقين ما تنسو دا مرغنى ابو شنب بتاع زمان ايام جكسا و ماجد هدافين الراجل ما زال قرنو حى و الله دا مؤشر جيد للفحوله فى السودان
زول عجوز مخرب ووالله انت صحفي ما عندك موضوع 000 يا ناس إرتقوا شوية بعقول القراء وإتقوا الله فينا 00 ميرغني أو شبنب لا دا صار أبو ضنب 000 أيه جمالك ,ايه أناقتك وعمرك 70 سنة ولسع سارح في الوهم 000 أدعوا الله أن يغفر لماضيك وهلاويسك العجيبة 00 الاعمار بيد الله ولكن لم يتبقي الكثير من العمر 0000 التوبة 00 التوبة 000 اللهم تب علينا جميعا وأعف عنا ارحمنا يا رحمن 000 اللهم آآآآآآآآآآآآآآآآآآآآآآآآآآممممممممممممممممممين
يبدو اننا نعيش فى زمن الأنحطاط بكل انواعه فى عهد الأنقاذ .!
لقاء سخيف لايفيد القارى بل يعكس الافلاس الثقافى وقلة الذوق والادب فى مجتمع يتمزق يوميا ويعيش على حافة الأنهيار ويصبح ويمسى على اخبار الموت والحروب فى اكثر من اربعة ولايات …..!!!!!
قمة الانحطاط من شخص سفيه
والله البسمع الكلام ده يقول عمرك 15 سنة كلام مخجل بعد العمر ده كله فالظاهر أنك أردروج وليس كالوالد ،،، فعلا موضوع خالي من الموضوعية .
اللقاء عمل صحفي تافه. وهذا عادي ومبرر قياسا بما يحدث في وعلى الصحفة السودانية الآن.
ولكن تبقى الحقيقة:
أن ميرغني ابو شنب هو الذي وضع حجر الأساس لـ (مدرسة الانحطاط) في الصحافة الرياضية في السودان.
عالم عينا قوية وما بتختشي. من يخبر الأجيال ويفضح هذا الإجتراء؟
يا حليلك يا الصحافة ……………….. حليل جبرة كمان
…
زمان كنت ( ومازلت ) فاكيها فى نفسك
الآن انت مخرّف
نوعك ده ما بكون عندو وجود الا فى حكم الديكتاتوريات
صفتك بين زملائك انك متزلف ووصولى وخائن للعشرة
الراجل ده عبيط ولا شنو؟؟؟؟؟
ابو شنب احد رموز الانحطاط والعهر الاعلامى (القديم المتجدد)
(والله أبوي كان راجل صاحب (شنب كبير))الغريب انو ب شبو الكبير دا ما قدر يربيك.
(وأنا البريدو بطيروا السماءلكن البدخل معاي في كراهية بـ(غطس حجرو) .كلام مشاطاط ورقاصات
(أنا راجل أحب الجمال) والبقر والحمير والكلاب.
(أنا كنت متعدد العلاقات لأني تمتعت بمسحة جمالية).(جميل )!!فى الزمن (الخشن) داك !!!!مممممم
(البنات (كانوا بحبوني).!)مااااأظن البنات كانو براهم اللبحبوك !
(ندى القلعةأنا الذي صنعتها) بالتاكيد لانك تمتلك المواد الخام من انحطاط وسفالة وفجور.
(أحرص على كتابة مقال هادف ومتوازن لأن الرئيس البشير بيقرأ مقالي يومياً)واضح من حال البلد.
(قصة الموز والأناناس)عرفنا الموز لكن الاناناس بتستعملو كيف؟
(لكن الغريبة في عمري دا كلو ما عاينت ليك ولا فكرت فيك) قاعد تفكر فى (فضل المولى) ياعفريت!
(الصحافة الرياضية الحالية (منحطة)..مؤكد لانهم لقوا الكبار ساقطين ومنحطين
(افرو والضلالى وليمونة سينتقلون من خانة (الظرفاء) إلى خانة (السفهاء)!! معاك فى سرج واحد .
(إيمان هي اللي فرضت روحها علي) لانها لم تجد فى البلد احط منك.
(الرشيد علي عمر.. وهو خليفتي في الصحافة الرياضية) وفى السفالة والبلطجة والانحطاط.
أين وقار عمر السبعين …الله يتوب عليك ويرحمنا من الصحفيين أمثالك
ابوشنب لااشك انك تعاني من نقص ما خلق لك امراض نفسيه خطيرة نسأل الله لك الشفاء..
انا متابع جيد لمقالاتك اليوميه..لهذا اجزم انك اشهر متسول (وعينو قويه)…وانك سفيه
لازلت في ضلالك القديم
بكل صراحه انك صحفى ماهر جدا” فى الكتابه الصحفيه ولايشق له غبار واحترمك جدا” وأقرأ لك فى كثير من الأحيان وكنت اشترى صحيفتى الدار واخبار اليوم عشان كتاباتك فيها. بس عيبك انك انطباعى (البريدو بطيروا السماء البكرهو بغطس حجرو)بس تعجبنى صراحتك مصداقيتك باعترافك بدلك..مع كامل تقديرى لكم.
شفتو يا هلالاب الفرق كيف بينكم والمريخ حتى على مستوى الصحافة هذة هى المدرسة الهلالية متجسدة فى اشهر قلمين للهلال ميرغنى ابو شنب والرشيد بتاع خراب البلد والطريف فى الامر الاتنين معجبى عمر بشبش والاغرب بان اسوا رئيس فى تاريخ السودان هو عمر البشير .. يااخ انتو حتى فى الهبووط الطيش وحتى فى الدكتاتورية قدمتو نموزج عمر البشير الذى اشتهر بانة اضييييييينةوطوال 25 سنة لم ينفز قرار واحد لصالح المواطن ياااخ دا فى عيدهم المسمى عيد الانغاز بزيدو سعر المواد الغزائيةللمواطن الغلبان؟؟؟ والمريخ قدم الكتاتور جعفر محمد نميرى فشتاان بين هذا وهذا اقلاها كان جعفر نميرى عندو شخصيتو وعندو نوع من الانصاف وقوة الشخصية ودرجة من العدل لا ينكرها الا مكابر ووطنية تختبىء تحت الميرى يعرفة بها اى سودانى اما ذولكم تختبىء كل معالم العمالةوالكضب والخياسة وعدم احترام الكلمة سطر بها تاريخة المخزى يعرفة بها كل السودانيين معدا الكيزان ..
واضح انه خرف، قبل ايام كان معترض على تكريم البلابل و هو ليه لا؟ زول زي ده ما مفروض يجيبوه و أنا ألوم السوداني التي أجرت معاه اللقاء و الراكوبة التي نقلته، كفاك ظهور و رياء
أجمل ما في هذا الحوار هو السؤال الأخير والسطر الأخير
ياميرغنى الجانب التانى نسيتو ولا شنو (وين اصحابك ناس عطبره ناس حاج الركز) النسى قديمو تاه
يا راجل أركززز
قال ندي القلعة صحبتي
كلام نسوان وقالوا وقلنا وقلنا ليه
أحط صحفي في السودان ,,,,,
الله يرحم إعلامنا … ندى القلعة و ايمان لندن و عمر البشير زي سمك لبن تمر هندي
ده بسموه لقاء صحفي … فشل زريع لا خير في الصحفي الذي أجرى اللقاء و لا الضيف أب شنب .
الناس تنافس بمقالات و كتابات صحفية تشرف حوار ركيك ما عنده معنى و عمل غير محترف و لا محترم قالت لي و قلت ليها
رغم احترامي لي سنك وعمرك لكن الظاهر انك كنت انسان ما عندك اي موضوع ولسه ما زلت ما عندك اي موضوع (البشير يقوم بقراءة مقالاتي ) الطيور علي اشكالها تقع
وإنّ سَفَاهَ الشّيخِ لا حِلْمَ بَعْدَه وإنّ الفَتَى بَعْدَ السّفاهةِ يَحْلَمُ
دا لقاء عجب…ابو شنب صحفي لا يتكرر أبداً ..فهو كأبيض اللون وكأنه في تاني دور..كلما أرجوه ان يخرج غداًالي الإعلام ميرغني ابو شنب ليقول ان هذا اللقاء مفبرك ومفتعل ..وإلا فسلام ..سلام ..سلام عليك يا صحافة…
هههههههههه…قال اب شنب قال ؟؟؟؟؟طيب الصحفيين الماعندهم شنب يقولوا شنو …..ههههههههه والله عجب
ياخوانا القلتوه في أبوشنب والله مالك في الخمر ما قالوا .. وكلامكم دو كلوا صاح وأكثر من كده أول مرة أعرف أنو ميرغني أبوشنب راجل سبهلل .. ومن خلال كلامه يظهر أنو انتهازي ومادي .. وأناني .. وبتاع رشوة معليش الراجل خرف خلوه في حاله ولو أنو ده من عمره 15 سنة كان مخرف . وبعدين يا ناس الراكوبة مفروض أكون عندكم ناس بتاعين آداب عامة .. عشان كلام زي ده ما مفروض تنشروه .. ده زي ما قالوا أخوانا الفوق كلام بتاع فاتيـ….. وللأسف أول مرة أعرف أنو ميرغني أبوشنب بالتفاهة دي .
بالله ده كلام زول عمره 70 سنة ؟!!. يا راجل اتقي الله . لا حول ولا قوة الا بالله .
مافائدة هذا الحوار للقارئ المشتري الصحيفة افضل منها الاعلانات المبوبة الصادرة من المحاكم والاجهزة الاخري المعنية انها واحده من انحطاطات الصحافة المثلية هذه وصفة ساقطة لرؤساء التحرير كيف تضبط الجوارات وواختيار الاشخاص
اعزائي ب ادارة الراكوبة ورؤوساء تحرير الصحف
دللوا علي حسكم الصحفي نحن في غني عن حوارات سد الخانة وملء الصفحات الفارغة ببلاهة الكلام التي لا تفيدنا ولا تفيد الصحيفة الصفيحة ولا الصحفي الخملان عاجز المنطق و البيان
سلام للجميع
طيب زعلان من ترباس ومخاصمو لييييه؟؟؟ ما واضح مدى احترامك للمرحومة زوجتك وافراد أسرتك!!!
التحية لأمهات سارة والسنهوري ومصعب والكوكبة الجميلة من الشهداء / التحية لكل من صاح في وجه الظلم لاااااااااااالاااااا/ التحية لأمهات مجدي وبطرس وكل شهيد قهر الظلم ومات / واقول ليل الظلم قصير مهما طال/ وإن شاء الله بكره السودان أحلى / بدون الرقاص والنسناس والخناس والدسداس وكل من ساند الظلم قولا وفعلا / أخزاكم الله في الدنيا والآخرة / وتبت أيديكم/ ولعنكم الله إلى يوم الدين / ورجاء لإدارة الراكوبة بنشر المفيد وترك الغثاء