سودانير..فضيحه التأمينات علي خط هيثرو
د .الرازي الطيب ابوقنايه
توجه مؤخرا السيد مدير عام سودانير الي مطار هيثرو بلندن مع وفد كبير علي الخطوط المصريه, وقد اعاده الله ومرافقيه بالسلامه محملين بالهدايا للاهل والاصدقاء. وكما جرت العاده, فقد رافقه السيد المدير المالي والذي كان يشغل منصب وظيفه محاسب بمحطه لندن لمده اربعه سنوات في السابق. الجدير ذكره ان هذه المحطه قد شهدت بيع خط هيثرو الشهير. الا اننا لم نتاكد بعد فيما اذا كانت البيعه قد تمت اثناء تولي السيد المدير المالي منصبه هنالك, او اذا كان شاهدا عليها.
سبب الرحله كما تقول الاوراق الرسميه هو مقابله المسئولين عن تأمين طائرات سودانير والتباحث معهم علي (خطأ) قامت به اداره سودانير. فمهمة الوفد الرئيسيه التوسل الي شركه التامينات لتجاوزه. زي الكأنو شركه التامينات بتتعامل بالمبدأ الكيزاني (عفا الله عما سلف).
الخطأ هو ان الساده في قسم التأمينات بسودانير (ضمن الوفد) التابع للسيد المدير المالي (ضمن الوفد ايضا) التابع للسيد المدير العام (رئيس الوفد) كانو يقومون سنويا بتأمين الطائرات الهالكه ويدفعون مبالغ طائله علي ذلك لان قيمه التأمين علي طائرات سودانير اعلي من تأمين الطائرات الاخري نتيجة للعقوبات الاقتصاديه المعروفه للجميع . والله جد. اتخيلو زول عندو عربيه مرفوعه قدام بيتو وتسكنها القطط والكلاب يقوم كل سنه يمشي شركه التامينات ويدفع ليها تامين شامل كامل وبي قيمه اعلي كمان. المهم. الوفد ماشي يتناقش مع شركه التامين الانجليزيه عشان تحول التأمين الذي تم دفعه في السابق علي الطائرات الهالكه الما كانت شغاله, الي تأمين مستقبلي علي الطائرات الحاااا تشتغل. بالدارجي كده, زي الزول الدفع قروش تأمين لي عربيتو الهالكه, وبعد كم سنه اشتري عربيه تانيه, مشي شركه التامين عشان تحول ليه التأمين (داااااك) بتاع العربيه الهالكه للعربيه الجديده.
هل تفتكر عزيزي القارئ ان شركه التأمين ستتناقش معهم في هذا الموضوع؟؟ وهل في مدير عقله وقلبه علي وطنه سيفكر بالسفر لمناقشته والشركه ليست علي مرمي حجر وانما موجوده في (امام) اعالي البحار؟ كمدير, الشئ الطبيعي لو جاني الموظف الشغال في قسم التأمينات وفتح الموضوع دا بقول ليو اول شئ جيب لي الزول العمل التأمين في الماضي وبعمل ليو مجلس محاسبه فوري. تاني حاجه, بقول ليهو شركه التامين ماحاتوافق لانو دا موضوع منتهي وقضيه خسرانه. لوما اقتنع, واصرعلي السفر, بقول ليهو اديني ناس شيكان او النيل الازرق للتأمين في التلفون وبسالهم هل الشركه في لندن حا توافق ولا لا؟ او ياخ اتصل بالشركه مباشره في لندن عن طريق الايميل وفي ثواني ممكن تعرف التامين بتحول ولا لا. تقوم طوالي تقرر انك تسوق تيم كامل وتمشي لندن عشان تتناقش في قضيه انت عارفا خسرانه؟ إلا يكون لشئ في نفس يعقوب. اما لو ماعارفه قضيه خسرانه, دي تبقي مصيبه.
نحنا من قبيل قلنا زول مابعرف شغل طيارات ماتجيبو لينا لانو حايزيد الخسارات ساي بي المواقف الزي دي. وكمان قلنا الناس البجو من بره ديل عطشانين سفر ساي ومجموعه السوء الجوه ساهل (تدقسم) بي سفريات لي لندن والخليج والسعوديه وتوهمهم بي اسباب سطحيه. والراجل كمان معذور مابقدر يقاوم لندن, ولملمة الدولارات والتبضع في ارقي المحلات. معقول يقول لا نرسل ايميل؟ ياخ ااي قول عشان خاطر التقوي و سودانير الفقيره دي والموظفين الغلابه الليهم شهرين ماصرفو مرتباتهم.
المهم. بعد عشرات الالاف من الدولارات الاتصرفت علي الرحله, والاميال الاتقطعت, وغياب الوفد من مكاتبهم لايام عديده لانو بريطانيا ماقريبه كمان ياجماعه, الموضوع في لندن ما اخد تلاته دقايق. زي الطيره في نكتة المسطول المشهوره (الدخلت بالباب وطلعت بالشباك). الخواجه عاين ليهم بي نظره ازدرائيه وقال ليهم (Are you serious?).
نحنا وعشان موضوع خط هيثرو شاغلنا وشاغل الدنيا كلها قلنا مامشكله مادام وصلو اهو يعرفو لينا حاجه عن ملابسات الخط ويحنسو لينا الجماعه ديل ممكن يرجعو لينا مادام الموضوع بقي تحانيس. ونرتاح كمان من العار بتاع (خط هيثرو عملتو لينا فيو شنووووووو). فعلق احد الظرفاء بان سيادته لا يعرف اصلا ان هنالك خط الي هيثرو قد تم بيعه. وقال ايضا بتهكم: “الجماعه ديل لمن ياخدو حقهم في حاجه مابرجعو ليها تاني وبفتشو غيرا”.
افتكر الموضوع دا دليل قوي للناس الوقفو ضدنا لمن قلنا الراجل مابصلح لي سودانير. وانتو في كده ولا المصايب الجايه!! الجماعه اليومين ديل بخططو لايجار طيارتين واحده من مخزن الخشمان لخردة الطائرات والاخري طائره شحن من شركه تى يو من شركة كايرو افيشن حا تؤجرعلى غرار كارثه (ماكسماس) السابقه والتى كلفت الشركه مبالغ طائله دون عائد يذكر. الموضوع الموقفو طريقه تقسيم الكومشن علي الجماعه. فنيا وتسويقيا الايجارات دي ناجحه ولا ماناجحه ما مشكله. عمليا نحن هنا وليذهب المجلس الوطني, ورئيس لجنة النقل, ولجنه د نافع وكاتب هذا المقال الي الجحيم
[email][email protected][/email]
هي سودانير لسه قاعدة ما طارة من زمان من لهط الكيزان
فى زيارة لوفد عربى و أوروبى لأحدى المشاريع الأستثمارية فى السودان ..كانت هنالك سيدة أوروبيةكبيرة السن ضمن هذا الوفد….سأل أحد الناس البسيطين عن ماذا أتى بهذه المرأة الكبيرة دى ضمن وفد المستثمرين هذا… فرد عليه أخر بأن هذه المرأة ليست ضمن الوفد أساسا و لكن هى نسيبة فلان ( فلان هذا مدير أحد أدارات ذلك المشروع و متزوج من سيدة أوروبية )و هى جات تزور بتها و شايلة ليها موية رمضان…و قالو بالمرة نسيبها وصى يدخلوها ضمن الوفد عشان تشوف المشروع …
يا دكتور ما تسيىء الظن بالراجل ساكت أمكن الزول دا( بتو) فى بريطانيامع زوجها ووليداتهافى بريطانيا و اللا لندن أو المملكة المتحدة زى ما قال تور الجر و قالتلو فى الأيميل بتاعو تعال يا أبوى عديلك معانا أيام أرتاح فيهن من الجرى و الشلهتة بتاعت السودان و أولادى مشتهنك و كل مرة دايرين جدو …و يكون الحاجة لامن عرفت سفر أبو العيال لللأنقتيرة سريع سريع زرعت العيش و جهزت الحلومر و الرقاق لى نسيبها و شيلتو للحاج عشان يودى لى نسيبها …و مالو بعد الزيارة ممكن يقضى عملو الذى أتهمته به (تهمة ) ساكت فالموضوع يا دكترة عبارة عن حجة و تجرة ما تحملوه أكتر مما يحتمل و مقال لكشف الفساد و الراكوبة و سودانيز أونلاين وهلم جراااا زى ما قال الأمام…
ليس هذا بمستغرب ابدا
فان للفساد لغة وطلاسم لا يفهمها الا من مارس الفساد بخبرة تراكمية
عموما رحم الله سودانير
وقد آن الاوان لطي هذا الملف لحين الوقت المعلوم
نشكر لكاتب الموضوع التوثيق
ونؤكد له ان المدير وبطانته سيحاسبون يوما ما حتى على تذاكر ونثريات هذه الرحلة الغريبة
هاهاهاهاهاهاهاها معقووووووول سودانير الي الان حيه وفيها روح لالالالالالا ما اعتقد ذلك
والي اللقاء بلد خلاص انتهت
ارشح وبشدة الدكتور الرازي ابوقناية كمدير عام لسودانير بصفتي مواطن سوداني واتمني ان يحذوا بقية المواطنين حذوي وعلي راسهم البروف الذائع الصيت الفاتح جبرة عل وعسي ان تعود سودانير لسابق عهدها باعتباره الابن البار لهذه المؤسسة العملاقة
آمل ان يسمع السيد الرئيس بهذا الترشيح وان يصدر الامر اللازم بتنفيذه مع خالص شكري لسيادته
ودعونا نحلم بعدد 100 طائرة تقلع وتهبط خلال 90 ثانية بمطار الخرطوم الدولي
حسب القانون فان كل ممتلكات السودان يجب ان تومن في شركات تامين سودانيه وان شركات التامين هي مسئوله عن اعادة التامين لدي شركات اعادة التامين العالمية وحسب معرفتي ان سودانير مومنه لدي شركة شيكان للتامين وان شيكات هي المسئوله عن اي شي يخص تامين طئرات سودانير وان المومن له يجب عليه اخطارشركةالتامين باي تغيير يحصل في الخطر المومن فان كانت هناك طائرة لا تعمل فسودانير تخطر شىكان فورا والتي بدورها تخطر معيد التامين ليوقف التامين الي حين استئناف عمل الطائره ويكون هناك رد لجزء من قسط التامين ويكون ارجاع الجزو من يوم الاخطار .
درجت شركات التامين ان تناقش تجديد التامين مع معيدي التامين في نهاية مدته ويكون ذلك بالايميل او الفاكس او السفر ان نلزم الامر وربما تستعن شركة التامين بموظف الشركة المون لها ولا يحق للمومن له التشاور مع معيد التامين او الاتصال به الا بواسطة اشركة التامين
د. الرازي أمسك أعصابك ما يطق فيك عِرِق. يا أخي إنت ما بتتذكر وزيرة العمل، إشراقة لما السعودية أصدرت قرار تصحيح اوضاع الأجانب ماشفتها السهيتانه فنجطت وركبت ليها طيارة وجات جارية ولما الناس سألوا عن سبب الزيارة حكومتنا قالت إنها ماشة تتفاهم مع وزير العمل السعودي عشان يستثنى ليها بني جلدتها من القرار. الناس ديل أصلهم كدي والأقلام أوشكت أن تجف من الكتابة جرءً بالشكوى من سلوك مسئولي هذه الحكومة وبرضو يسوو في البسوو فيها أبّان جلداً تخين ودماً تقيل.
السفر لي لندن لي موضوع تاني خالص يعني هم عايزين يوفروا حق التذاكر ويستفيدوا من بدل السفرية لانهم عارفين سلفا ان الموضوع منتهي ولا يحتاج للسفر
طبعا دي ياها طريقتهم حكى احد منسوبي القوات النظامية انه قبل عيد الاضحى بي كم يوم تم نقل بعض ضباط وجنود لاقليم دار فور وتم تنفيذ النقل قبل العيد والسبب ليس الحوجة لذلك ولكن من اجل شحن الطائرة عند العودة بخراف الاضاحي لكبار الضباط بسعر التكلفة وذلك بغرض توفير الاضاحي وبيع الباقي
يا سيدي لا تامين و لا اعادة تامين و لا تحانيس … الجماعة عايزين رحلة ترطيبية الى لندن و خمشة دولارات و نزهة و وجه حسن و كده ….
ناس الحكومة السجمانه دي بعرفوا شنو غير لم القروش و السفريات الخارجية و النسوان؟!
الجواب ظاهر من عنوانو والوسيط ماخد قرض بي اربعين الف دولار بلد حقتهم ليكم يوم حسبنا الله ونعم الوكيل
الجماعة ديل اشتاقوا الي عاصمة الضباب للسياحة و بس
و لكن لازم يقولوا — عشان يدفوا ثمن الرحلة من خزينة الفساد