شاهد فيديو لمخاطبة بميدان جاكسون اليوم.. أحكام بالجلد والغرامة على “3” من منسوبي حزب البعث
الخرطوم – بهرام عبد المُنعم
أصدرت محكمة النظام العام بمدينة بحري، أحكاماً بالجلد والغرامة على (3) من منسوبي حزب البعث العربي الاشتراكي في أعقاب مخاطبة جماهيرية بالمحطة الوسطى بحري، وأدانت المحكمة “بشير يس، محمد حسين، ومهند محمد رزق الله” بالجلد (40) جلدة، والغرامة (100) جنيه نفذت فوراً على كل شخص من منسوبي الحزب المشاركين في الفعالية الجماهيرية، تحت المادتين (88 / 92) من قانون النظام العام (الإخلال بالأمن وإزعاج السلطات).
وقال المتحدث الرسمي باسم الحزب، محمد ضياء الدين، في صفحته على “فيسبوك” أمس، (الأربعاء)، إن المحاكمة تمت في دقائق معدودة دون حضور محامين، وقال إن المحاكمات لن ترهبهم، ونوَّه إلى استمرار الفعاليات، وكشف عن مخاطبة جماهيرية بموقف (جاكسون) في الخرطوم اليوم (الخميس)، وأعلن استعدادهم للجلد والغرامة والسجن، وأضاف: “الرهيفة التنقد”
اليوم التالي
[SITECODE=”youtube -RuTKbuWS_A”]..[/SITECODE]كلمة الأستاذ محمد ضياء الدين في ميدان جاكسون
في عيد العمال مع الكادحين والفريشين وستات الشاي والعمال في الشارع ..
طيب يا جماعة .. نحنا بنرحب بيكم في فعالية حزب البعث العربي الإشتراكي والنحنا قررنا فيها أنو نصل فيها للشعب السوداني في كل المواقع في الأسواق في المنتديات في الأسواق في الأندية وفي الحلة، في أي موقع من المواقع الغرض الرئيسي من الكلام ده أنو نوعي شعبنا بي حقوقو انتو يا سودانيين عندكم حقوق .. على هذا النظام القاهر …هذا النظام الدكتاتوري.. النظام الجوع الشعب… النظام الفاسد النظام البكتل أهلنا في دارفور .. البكتل أهلنا في جبال النوبة .. النظام البكتل أهلنا في النيل الأزرق … والبكتل أهلنا في الخرطوم بالجوع والمرض ، النظام ده يا جماعة نظام لابد أننا نحاربوا الكلام بتاع أنو خائفين أنحنا ما خائفين .. السوداني ما بخاف .. والبتكلم أنو الخواف ربى عيالوا .. والله الخواف الزمن ده ما بربي عيالوا .. والله تخاف عيالك يموتوا بالجوع ..
أمبارح أعتقلوا رفاقنا وحاكمهم بالغرامة والجلد .. وانحنا الليلة جينا تاني جينا وما خائفين لا من سجن ولا من محاكمة ولا من غرامة ولا من جلد .. انحنا ما أحسن من الناس الكتلوهم في دارفور وفي جنوب كردفان وفي النيل الأزرق يا جماعة هما أحسن مننا.. هما ما أحسن مننا.. هما قدموا نفسهم شهداء أنحنا ما عملنا حاجة حتى الآن ..
الكيزان حيقعدوا في ريسينا وحدلدلو كرعينهم ، انتو ماقادرين تاكلوا ولا تعالجوا اولادكم ولا تدخلوهم مدارس وما قاعدين تدخلو اي دخل وهم ? الكيزان ? بيتعالجوا في الخارج وبيعلموا ابناءهم في الخارج .. الواحد فيهم لو جاتو نزلة بركب بمشي الأردن ده كله من أموال الشعب النهبوها وسرقوها و نحن ابناء الشعب ما قادرين نوفر حق الدواء ، حاكموا شباب البعث وجلدوهم في محكمة بما يسمي النظام العام هذا القانون الذي يضطهد المرأة السودانية ده القانون البجلدو بيهو النسوان .. ده القانون البشيلو بيهو الفرشة بتاعة الباعة المتجولين وبيشيلو بيهو عدة ست الشاي وبيطارد الناس الفارشة في الشارع.. الناس العاوزة تأكل لقمتها بالحلال وكل ده باسم قانون النظام العام ، لازم نعرف حقوقنا وندافع عنها لاننا اذا دافعنا عن حقوقنا حقوقنا سوف يظل الكيزان يحكمون هذا الوطن الى مشاء الله ، نحن ما عاوزين الناس تخاف من الحكومة . انتو عندكم حقوق على الحكومة دي ونحنا ما بنخاف يجو يقبضونا اسي ويدخلون السجن ما بنخاف .. ونحنا في حزب البعث العربي الإشتراكي والقوى الوطنية دارين نوري اي زول حقو ونحنا معاكم ما بنطالب الكيزان بان يعطوننا حقوقنا ونحنسهم حقنا ده بنقلعوا قلع واذا ما قلعنا نكون ما رجال .. أنتو ما رجال يا جماعة؟؟ .. في زول بخلي حقو لي راجل ما تخلوا حقكم ده للكيزان .. حقهم ده بانيين بيهو العمارات وراكبين بيهو العربات .. العمارات والعربات دي حقتكم أنتو من دمكم ومن قروشكم ومن حق أولادكم .. البلد دي ما حقت الكيزان البلد دي حقتكم أنتو وحقت الشعب السوداني حقت ستات الشاي حقت الناس الفارشين حقت الناس الكادحين عشان ياكلوا لقمة شريفة .. شفتو الحرامية في مكتب الوالي الواحد لمن يسرق يجو يقول ليهو أتحلل يحللو قروش الحرامية يشيلوا قروشنا ويتمتعوا بيها ويسرقوها ونحنا أولادنا بنوموا جيعانين .. هسع في كم خريج هنا ما لاقي شغل .. تعال يا ولد هنا تعال (شوفوا زي ده يا جماعة .. شوفوا زي ده .. ده زنبو شنو يا جماعة .. ده ذنبو شنو يبقى زي ده دي سياسة الكيزان طفل ما بلغ 10 سنة وشغال داير ياكل اكل حلال ليهو ولي أسرتو … مش من حقوا يقراء ويتعلم ويطلع أحسن زول .. انحنا نقيف كلنا مع بعض اذا نحنا خائفين مافي حل .. حقكم أقلعوا .. الراجل ما بخلي حقوا ..
حرية سلام وعدالة .. والثورة خيار الشعب ..
هكذا النظام يوهم المجتمع بأن هنالك سلام ووثبات من اجل كثب الزمن ولكن شكرا يا شباب البعث موقف موفق يتم الإشادة به ونحن جاهزون للمساهمة حتى بمبالغ مالية من اجل إزاحة الجبروت ومطلوب من الجميع مواجهة العمل الشاق آجلا
هههههههههههههههههههههه المادة دي كانوا بتسعملوها للسكران العامل جوطة والمتشاجرين ,,,لكن دي جديدة لج …بالعربي كدا عاوزين حرية ..بشرط ..هي حرية بمزاجنا نحن الحكومة والا القانون ياخد مجراه ..طبعا القانون هم المفصلنوا بمزاجهم …سلام علي الحرية ,,,
رجال اولاد رجال انتم سودانيون بحق وحقيقه وليس كأشباه الرجال الماسونيون والمتأسلمين من اهل الفته ناس سيدى عملاء وارزقيه يقتاتون فتات اللئام على اجساد الفقراء والمغلوبين
والله يا ضياء أصبعك الرافعوا دا أشرف منهم القتلة اللصوص تجار الدين
ده الكلام يلا ياشعب السودان حريتك قبل اكلك الكيزان اولاد الحرام عاوزين يخوفوا الناس تانى مافى خوف الراجل ياسر عرمان وقف المفاوضات لانهم ماعاوزين يدو فرصه لحل مشاكل البلد الكيزان عاوزين يسرقو تانى مافى كلام الموت اشرف والزول لمان يموت احسن يموت واقف ومطالب ب حقو احسن من يموت جارى من البمبان وبندقية الكيزان المداها ليهم ايران وملا ليها اهضوا يا ابناء السودان الموت واحد هنا والله هناك …..
هكذا تكون القيادة…النضال يبداؤه القياديون….الاحرار لايهابون الموت ويفدون حريتهم بدمهم… يا قيادة حزب البعث سطرت اليوم مجدا جديدا للسودانيين…وليتك يا الصادق المهدى…وليتك يا الميرغنى… تتعلم شيئا من كرامة الاستاذ محمد ضياء الدين
نرجو من الاخوة المستقلين ..وانا واحد منهم…مناصرة كل قيادى يقف فى الميدان امام الجماهير ويخاطبهم كما فعل الاستاذ محمد ضياء الدين…لو جميع القادة عملوا هكذا لما صرنا ملطشة عند الكيزان
*********** التحية لشباب البعث الابطال ************ ان توقد شمعة خير من ان تلعن الظلام ***** الثورة اوشكت ********* هذه النهاية **********
ضياء رجل والرجاال قليلون وفعﻻ كما قال انتم ما رجال وهل رجال المؤتمر الوطني الخايبين ارجل منكم؟لو هم ارجل منكم إذا انتم يا شباب ورجىل السودان منتهين وعليكم ومنكم العوض وجيت ﻻمهاتكم الراجنكم
عفارم تمام .. صاح الكلام .. كتمت شباب
كتمت خلاص بلغ النصاب
نفد الصبر والجو كتم.
جيبك نضف
وطنك نشف
كتمت سخانة الف الف
اغضب وثور
قوم وانتفض
قف وانتصب ..
لا تستكين ..أو تستخف
للحالة والعيشة القرف
نفد الصبر والجو كتم ..
جيبك نضف
وطنك نشف
لو بكرة عن وطنك سئلت
امام عيالك تنكسف
مهما تبرر او تقول .. ومهما تصف
برضو برضو حتنكشف..
لا تنحبس للحسرة والالم المرير لا ترتجف
فك البلف
كتــــاحة تكتـح
ما تخلـــي تك تح
غبارها يلفــــح
تكشف وتفـــــضح
للدمعة تمـــــسح
للظلم تكـــــشح
حرية تشطــــــح
في وطن مشــلح … حضن العذاب
عفارم تمام … صاح الكلام كتمت شباب
كتمت خلاص بلغ النصاب
*******
كتاحة كتاحة
اعصار ودوامة
طلاب شيوخ ورجال
نسوان بنات اطفال
الناس هناك لآمة
ام در وارض القاش
جرافا ديامة
كتاحة قبلية تبرق أمل وشعاع
تحمل صراخ الجاع
تهتف بصوت مسموع .. عن ظلم ساد أنواع
تبكي الصرير المر.. من شدة الأوجاع
كتاحة تلغي فساد .. وتقلع قلع من باع
تنقذ بلد قد ضاع . .. من خائنا جعجاع
كتاحة غربية … ومرات جنوبية
تقلب شمالية ….. وفجأة شرقية
شايلة البرق والرعد
شايلة الأمـل والوعد
تحمل دعاش وعبيـر
لثورة التغير ..كتاحة للتغير
كتاحة تحت وفوق .. تكسر قـيود الطوق
تقذف يمين وشمال… تنسج خيوط الفال
كتاحة للتعبير عن ثورة التغير
الحكم ما هو خلـود
بكرة الظلم حيفوت
الكبت والجــبروت
لو كان دوام لســـواك
ما كان بترجع ليك !!
والله أحسن ليك … فالنفس لوامة
حسرة وأسف وندامة
والحالة مش دوامــة
كتاحة كتاحة… إعصار ودوامــة
طلاب شيوخ ورجال
نسوان بنات وأطفال
ام در وارض القاش
ساحات هناك لأمـــة
جرافا ديامة .. الكل نزل وأجاب
عفارم تمام …صاح الكلام …كتمت شباب
كتمت خلاص بلغ النصاب
*************
كتاحة كتاحة … جوة البلد لافة
يا العسكري السراق
مين فينا شاذ آفاق !!
ياالكاذب الافاك .. لا خلقة لا أخلاق
مين الاباد شعــــبو ؟؟
مين الخســر ربــو ؟؟
مين الكــلام كذبــو ؟؟
مين الخلف وعدو ؟؟
مين البخون للـعهد .. للكلـمة والميـثاق؟؟
مين فينا شاذ افاق !!مين الكلامو نفاق ؟؟
ياالكاذب النقناق .. لا خلقة لا أخلاق
قول ياا
اسم مكتوب .. في المحكمة العلياا
يا متهم مطلوب…… لعدالة دولياا
يا هاربــا شــارد .. في هذه الدنياا
وينك تمش حتروح ؟؟
من رب عوضيــــاا ؟؟
انت الشذوذ نفسو لو تم وصفك بيه
اتبرا منك وزاق !!
مين فينا شاذ آفاق!!!
والكل منك ضاق
طبعك كضب ونفاق ..اصلو الطبع غلاب
عفارم تمام ..صاح الكلام ..كتمت شباب
كتمت خلاص بلغ النصاب.
التحية لكل الشرفاء فى بلادى والخزى والعار للانتهازيين الفاسدين الارزقية هذه الندوات والمخاطبات الجماهيرة هى وقود الثورة وهى الشرارة التى ستشعل الثورة على كل التنظيمات الحرص على ان لاتنقطع مثل هذه اللقاءت الجماهيرية العفوية وطريقنا النصر
التحية لكل الشرفاء المناضلين من أجل الحرية والعدالة وحقا الثورة هي خيار الشعب.
التحية لحزب البعث وهي توقد شمعة النضال الوطني في جماهير الشعب السوداني.
نعم للتغيير ثمن وربما كان ثمنها باهظا لكن لابد من دفعها.
ومن يطلب الحسناء لم يغله المهر.
ونحن نطلب أعناقنا من عصابة متخصصة ومدربه لا دين لهم ولا اخلاق استباحوا بلد وشعب.
التحية والتقدير والاحترام لكل الأبطال في بلادي.
وثورة حتى النصر
الي الامام لتوعية الجماهير وتعبيتها للتغيير ولا تخاذل ولا تراجع والكيزان اجبن من يصمدوا في وجه الثورة لانهم طلاب حياة ومحبين للمال والثورة وبطل يا يسن وتسلم البطن الجابتك.
كلامك جميل ولكن يبدو ان الشعب المنحط الجبان لايستجيب ، نريد حشداً مليونياً لإدخال الرعب في قلوب المتاجرين بالدين لزلزلة الأرض تحت أقدامهم رعايا السودان حتى الآن في مرحة الطفولة في فهم حقوقهم المسلوبة ، ثم ثانياً لماذا بمايسمى بالأحزاب العميلة أين موقفها وأين الشرفاء من الرعايا ، لماذا يخاف رعايا السودان ومن ماذا تخافون تتنفسون وأنتم موتى بكم العاري والمريض الفقير والضعيف واليائس من الحياة .. ألم تروا بأم عينكم الفساد والتطاول في البنيان حتى نعمة الهواء الكيزان حرموكم منها وكتموا أنفاسكم بناطحات السحاب من أموالكم المنهوبة إلى متى أنتم ساكنون .. دمروا عماراتهم وهدوا بنيان الباطل واستردوا حقوقكم المنهوبة …. آه يا أخي محمد ضياء والله أنا شفقان عليك لأنك أنت بتنفخ في قربة مقدودة … أنصحك بإستيراد شعب من الخارج يفهم ويدرك حقوقه خلاص ده شعب أنا شخصياً إعتبره منتهي الصلاحية والضرب في الميت حرام!!!!!!!!!!!!!
الريس الوثاب قال اطلق الحريات ده شنو العملوه مع شباب البعث ؟؟؟ غايتو جنس كضب على المستوى الدولى اها اتحااااااااااااوروا يا معارضة الوثبة الى القاع
الشىء المؤسف يكونوا الناس واقفين يتفرجوا دون اى تفاعل او مشاركة مع المتحدثين
مواد مثل “إزعاج السلطات” وعقوبات لها بالجلد سبق أن قال عنها الأستاذ محمود محمد طه أنها “وضعت واستغلت لإرهاب الشعب وسوقه إلى الاستكانة عن طريق إذلاله”..
وإلا فهل هناك مظهر أكثر حضارية ورقيا وسلاما من مخاطبة الشعب مباشرة في الميادين والأسواق؟
الحرية نور ونار ي رفاق لابد ان يكون المهر غالي غالي غالي ارهاب هذا النظام وقضاته اصحب لا يطاق افهم سجن غرامة مادخل عقوبة الجلد هنا غير ذلة الرجال الكرام لكن لا يهم في النهاية ف دعو الوحش الارهابي يقتل كل ثائر والارض تنبت مليون ثائر لو ماتوا لحاربت المقابر فلن تحميك تروس الهرس والقرش
هذا ليس غريباً على حزب البعث العربي الإشتراكي . لقد كان الحزب الطليعي الذي فجر إنتفاضة أبريل التي أطاحت بالديكتاتور السابق نميري. لا أملك إلا أن أرفع القبعات تحيةً وإجلالاً لرواد التحرير والتغيير الإجتماعي والسياسي في السودان.
تسلم البطن الجابتك يا ام ضياء الليله ولدك راجل
تحيه احترام وتقدير المناضل محمد ضياء الدين
انه لفخر لنا ان نجد مثلكم ما يعبر عن رؤانا ضد نظام الاستبداد الكيزانى
من كان يراهن على ضعف حزب البعث فى استقطاب الرأى العام فلعيتبر نفسه مهزوماً
هذه هى الفرصه لكسح الشارع لحزبكم
وهانحنُ نعلنها اليوم بانتماءنا معكم …….
خلو فصاحتكم دى و أطلعو الشارع زى الروجال ديل , خلاص بقيتو فطاحلة و راسكم ملان و ناس الراكوبة و كتابها ما قصروا معاكم ثقفوكم و شرحوا ليكم كل حاجة و شتمتو و فشيتو غبينتكم , أها آن الأوان تكفكفو أكمامكم و تطلعو تتحدو الكيزان و تكنسو أعفن حكومة مرت على التاريخ و كان خايفين هاكم رحاططنا و أدونا سيوفكم.
مبادرات عظيمة من حزب البعث تحتاج إلى الدعم من القوى الأخرى ولاحظنا أن الانتقادات للنظام صارت تحدث بصورة علنية في الأماكن العامة وفي وسائل المواصلات وبنبرة عالية ومتزايدة في الطريق إلى الانفجار الكامل ضد الحكم..
ايوا كده ده الشغل
التحية للشباب هم امل الشعب السوداني لقد فشلت الأحزاب التقليدية فشلا كبيرا بل أصبحت جزء من اهل الحكومة كيف لا و الحكومة هي التي تدعم الأحزاب لربع قرن من الزمان
الحركات المسلحة أصبحت ضعيفة وهزيلة لا تستطيع الصمود امام قوات الجنجويد التي تتحرك أحيانا ب 600 عربة دفع رباعي فالحركات المسلحة عندما تدخل مدينة ما صحيح انها لا تسال المواطنين تضرب الحكومة و تهرب و عندما تاتي الجنجويد تقتل وتغتصب و تنهب بدعم مباشر من جيش النظام اذا ما فائدة الحركات اذا كانت هي السبب في انتقام الجنجويد و حرق القرى
الحكومة أصبحت تضرب مصادر المياه حتى في الأماكن التي لا توجد بها الحركات المسلحة و خير مثال حزان اورشي بشمال دارفور
املنا في الشباب فقط .. الحكومة+ الجنجويد و الأحزاب + الحركات وجهان لعملة واحدة تجاه المواطن البسيط.
التحية لأبطال البعث الكرام ، هذا دوركم فقد رضعتم لبن الكرامة و العزة و بها نمت مدارككم و أنتم تقاتلون الجبروت في كل مكان من المحيط إى الخليج ، هاهي الأيام تدور و تعيدون كرة مارس أبريل و شعارات الحائط التي أذنت بذهاب حكومة مايو ، تلك الثورة التي كنتم شرارتها و سرقها الكيزان و الطائفيون ليرموها تاني في حضن دكتاتوريتهم البغيضة .. هذه هي المبادئ التي تؤمن بالشعب قائداً و سيداً ، المبادئ التي تجعل من القادة عبيداً لشعبهم في الوقت الذي هم يقودونه ، و ها أنتم تكشفون زيف الحريات و الحوار المسمى وطني و الذي هو وطني على مؤتمرهم المسخ لا وطني للوطن السودان الشامخ .. تحية رفاق الكلمة و السيف و القلم ، تحية لكم و أجسادكم تتلقى ضربات سياط الجلادين و لسان حالكم يقول الشعب أقوى و سيظل الشعب أقوى مهما تكالبت عليه المحن .. تحية لرجال السودان و حرائره و الثورة قادمة باذن الله .. التحية للمعتقلين و الشهداء و الله أكبر و لا نامت أعين الجبناء
سيروا والشعب السوداني من خلفكم وﻻنامت اعين الجبناء
يا ناس يا أخواني ويا أخواتي يا أيها الشعب السوداني الكريم كل الناس الآن واثقة ثقة عمياء بأنه هذا النظام أوشك على أن ينهار وصدقوني كلنا نتمنى له الإنهار اليوم قبل بكرة …. وأتمنى من كل متحدث أو كل كاتب أن لا يتحدث أويخاطب جماعة باسم حزب أو يكتب باسم حزب مثلا يقول ( حزب البعث أو الحزب الشيوعي أو حزب الأمة … أو أو أو ) المهم نريد كل من يقول شيئا أن يكون حكيم جدا والأستاذ ضياء الدين كانت كلمته جميلة وشيقة وأنه رجل يقل أن تجد أمثالهم ولكنه ركز في بعض كلامه بأن يقول حزب البعث العربي الإشتراكي … فهنا سيكون من له رأي وهنا سيقف بعض الناس ويقولون ده من حزب البعث وده شيوعي وده إتحادي وده ما عارف شنوا …..وهكذا في كل الأحزاب ولكنك عندما تتحدث كسوداني مغبون وممغوس من الحاصل في السودان من نهب وفساد وإفساد فوالله كلامك يكون في العين والراس وإلا فلا تهلكوا أنفسكم في الكلام الذي ((( لا حيودي ولا حيجيب ولا حيفيد في شيء ))) فوالله أقول ليكم كلامي هذا وأنا لست ضد أحد ولكني أريدها شيء يكون قومي وطني ضد هذه العصابة الحاكمة البلد والتي فرقت شمل السودانيين ووزعتهم جماعات في دول العالم والله أكبر عليهم ولا نامت أعين الجبناء والخونة…….
كلام جميل لكن نذكر اخونا وصديقنا وود حلتنا محمد ضياء الدين ( بفظائع نظام صدام حسين ) وفظائع آل الاسد في سوريا وحكم البعث بصورة عامة وفي كلا البلدين انتم آخر من يتحدث عن الحريات والديمقراطية .. الجو الذي تتحدث فية الان لم يكن متوفرا في العراق .. درسنا في العراق ونعرف الكبت والقهر واجرام نظام صدام حسين .. فاسكت الله يجزيك حير
حزب العبث العربي
عبثتم بالعراق فأضعتموه ، والآن تعبثون بالشعب السوري أيما عبث متحالفين مع الأمة الفارسية وشعاركم يقول (أمة عربية …أكمل). هل ترون لكم دورا رائدا في بلاد السودان وقد فشلتم في بلاد العربان ؟ فمن كانت عروبتهم عروبة ألوان ولسان أحق بكم من أهل السودان حيث عروبة الوجدان مع بعض التشدق في بعض الأحيان أكثر من العربان.
منذ أكثر من عامين في الخرطوم و انا في المواصلا ت .. حافلات بري بدأ الراكب بجانبي في مخاطبة سياسية و نظرت إليه بطرف عيني شكله عادى نصيييح و يواصل في الحديث و الركاب يواصلون الصمت و إذا بامرأة تحاول عبور الطريق فقال الرجل يخاطب السائق : حاسب المسكينة مشى ما قادرة تمشي تكسر كراعها حق العلاج ما تلقى و نزل الراكب وأنا أفكر مع الاعتذار للراكب..ياربي دي حركة جديدة من الامنجية و اكتشفت لاحقاً أنه الأستاذ ضياء و يبدو أنهم مازالوا مصرين على المخاطبة في المواصلات و جاكسون و الله نقدر شجاعة كوادركم و نحييهم و لكن خاطبوا محمداحمد باسم الخوة و الوطن لا باسم احزابكم لأن تجاربها معروفة في المنطقة وفي السودان الحكومة دي ما بخاطبوها بقلعوها من جذورها غيروا تكتيك المظاهرات في الأحياء و المخاطبات و تحية لكل المناضلين في بلادي
و الله يا كذابين لو ما اتاحت لكم الحكومة هذه الفرصة باسم الحوار الوطني لما استطعتم الخروج من منازلكم لمخاطبة الجماهير ,,, نرجو ان يحدثنا اعضاء هذا الحزب الفاشل عن الديمقراطية في العراق و في سوريا ,,, الا يكفي انكم تنادون بالقومية العربية و تعلمون ان سكان السودان الاصليين هم الافارقة و ان العرب مجرد مهاجرين من الجزيرة العربية ؟؟؟ تتحدثون عن الديمقراطية و تنسون الانقلاب الذي فشل و كان كل الضباط من البعثيين ,,,و عندما سئل السنهوري عن سبب هروبه من السودان الى بغداد بعد فشل الانقلاب لم يستطيع الاجابة و اصبح يتهرب من الاجابة في برنامج نادي الاعترافات في قناة امدرمان الفضائية ,,,و عندما سئل عن دوره في الانقلاب رفض الاجابة خوفا من الحكومة و اكتفى بالإجابة سوف اترك الاجابة للتاريخ هذه هي الشجاعة يا جبناء ,,,